Գործ No ԵԱՔԴ/0259/01/16
ՈՐՈՇՈՒՄ

քրեական գործի վարույթը կարճելու և
քրեական հետապնդումը դադարեցնելու մասին

ՙ21՚ նոյեմբերի 2018 թվական քաղաք Երևան

Երևան քաղաքի ընդհանուր իրավասության դատարանը

նախագահությամբ` դատավոր Արթուր Մկրտչյանի
քարտուղարությամբ` Միլենա Սարգսյանի
մասնակցությամբ`
մեղադրող Արծրուն Առաքելյանի
պաշտպան Թամարա Բաղդասարյանի
ամբաստանյալ Համլետ Գասպարյանի

Կենտրոն նստավայրում, դռնբաց դատական նիստում քննության առնելով քրեական գործն ըստ մեղադրանքի Համլետ Ստեփանի Գասպարյանի /ծնված` 1993 թվականի հուլիսի 14-ին` Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, չի աշխատում, նախկինում դատված, հաշվառված և բնակվող` ք.Երևան, Նոր Նորքի 8-րդ զանգված, 2-րդ շրջան, 1-ին շենք, 4-րդ բնակարան/, մեղադրվում է ՀՀ քրեական օրենսգրքի 34-176-րդ հոդվածի 1-ին մասով,

ՊԱՐԶԵՑ

2016 թվականի սեպտեմբերի 06-ին ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն քննչական բաժնում ՀՀ քրեական օրենսգրքի 176-րդ հոդվածի 1-ին մասով հարուցվել է թիվ 09123416 քրեական գործը:
2016 թվականի սեպտեմբերի 14-ին Համլետ Գասպարյանի նկատմամբ որպես խափանման միջոց է ընտրվել ստորագրություն`չհեռանալու մասին:
2016 թվականի սեպտեմբերի 20-ին Համլետ Գասպարյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 34-176-րդ հոդվածի 1-ին մասով:
2016 թվականի սեպտեմբերի 20-ին Համլետ Գասպարյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 34-176-րդ հոդվածի 1-ին մասով:
2016 թվականի հոկտեմբերի 24-ին Համլետ Գասպարյանին առաջադրված մեղադրանքը փոփոխվել է, նրան նոր մեղադրանք է առաջադրվել ՀՀ քրեական օրենսգրքի 34-176-րդ հոդվածի 1-ին մասով և նա ներգրավվել է որպես մեղադրյալ:
2016 թվականի դեկտեմբերի 28-ին թիվ 09123416 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
Նախաքննության մարմինն ամբաստանյալ Համլետ Գասպարյանին ՀՀ քրեական օրենսգրքի 34-176-րդ հոդվածի 1-ին մասով մեղադրանք է առաջադրել, որ ՙնա, 2016թ. սեպտեմբերի 4-ին` ժամը 20:30-ի սահմաններում Երևան քաղաքի Յան-Ռայնիս փողոցի 89 շենքի մոտ` Գոգոլի փողոցի հատման ճանապարհահատվածում, ուրիշի գույքի բացահայտ հափշտակություն կատարելու դիտավորությամբ, Նաիրա Վարդանյանի պարանոցից քաշել-պոկել է վերջինիս 300.000 ՀՀ դրամ արժողությամբ 20 գրամ քաշով ոսկյա շղթան ադամանդե քարերով ոսկյա կախազարդի հետ միասին և դիմել փախուստի: Գործով ինքնությունը չպարզված անձը, նկատելով հանցագործությունը, սկսել է վազելով հետապնդել Հ.Գասպարյանին: Այդ պահին Սարգիս Աբրահամյանը, գտնվելով Յան-Ռայնիս փողոցի 7 շենքի դիմաց գտնվող բանջարեղենի խանութում, բղավոցի ձայն լսելով` անմիջապես դուրս է եկել և տեսել իրեն ընդառաջ վազող երկու երիտասարդ տղաների, որոնցից մեկը խնդրել է օգնել` բռնել մյուսին: Ս.Աբրահամյանը պահանջել է, որպեսզի առջևից վազող Հ.Գասպարյանը կանգ առնի, ինչին ի պատասխան Հ.Գասպարյանը ոսկյա շղթան և կախազարդը նետելով և ձեռքում պահելով դանակ, պահանջել է մի կողմ գնալ` սպառնալով, հակառակ դեպքում, դանակով հարվածել: Ս.Աբրահամյանն այդ ժամանակ բռունցքով մեկ անգամ հարվածել է Հ.Գասպարյանի դեմքին` քթի շրջանում, ինչի արդյունքում վերջինս, բռնելով քիթը, հարվածել է նշված վայրում առկա աղբամաններին և դիմել փախուստի` չկարողանալով հանցագործությունն ավարտին հասցնել իր կամքից անկախ հանգամանքներով:՚:

Քրեական գործի դատական վճաբանություններրի փուլում ամբաստանյալ Համլետ Գասպարյանը և նրա պաշտպան Թամարա Բաղդասարյանը միջնորդել են քրեական հետապնդումը դադարեցնել և քրեական գործի վարույթը կարճել` համաներման որոշման համապատասխան կետի հիմքով:
ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի համաձայն`
ՙՔրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ընդունվել է համաներման ակտ:՚:
ՀՀ քրեական դատավարության օրենսգրքի 35-րդ հոդվածի 6-րդ մասի համաձայն`
<<Սույն հոդվածի առաջին մասի 6-րդ և 13-րդ կետերում նշված հիմքերով գործի վարույթի կարճում և քրեական հետապնդման դադարեցում չի թույլատրվում, եթե դրա դեմ առարկում է մեղադրյալը: Այս դեպքում գործի վարույթը շարունակվում է սովորական կարգով:
Սույն հոդվածի առաջին մասի 13-րդ կետում նշված հիմքով գործի հարուցման մերժում, վարույթի կարճում և քրեական հետապնդման դադարեցում չի թույլատրվում, եթե չի հատուցվել կամ այլ կերպ չի հարթվել պատճառված վնասը, կամ առկա է վեճ հատուցման ենթակա վնասի կապակցությամբ: Այս դեպքում ևս գործի վարույթը շարունակվում է սովորական կարգով:>>:
ՀՀ քրեական օրենսգրքի 176-րդ հոդվածի 1-ին մասը պատասխանատվություն է նախատեսում կողոպուտի՝ ուրիշի գույքի բացահայտ հափշտակություն կատարելու համար և պատժվում է տուգանքով՝ նվազագույն աշխատավարձի երկուհարյուրապատիկից վեցհարյուրապատիկի չափով, կամ կալանքով՝ առավելագույնը երկու ամիս ժամկետով, կամ ազատազրկմամբ՝ առավելագույնը երեք տարի ժամկետով:
ՀՀ քրեական օրենսգրքի 82-րդ հոդվածի համաձայն`
<<Հանցանք կատարած անձն օրենսդիր մարմնի կողմից ընդունվող համաներման ակտով կարող է ազատվել քրեական պատասխանատվությունից, իսկ դատապարտյալը կարող է լրիվ կամ մասնակիորեն ազատվել ինչպես հիմնական, այնպես էլ լրացուցիչ պատժից, կամ պատժի չկրած մասը կարող է փոխարինվել ավելի մեղմ պատժատեսակով, կամ կարող է վերացվել դատվածությունը:>>:
ՀՀ Ազգային ժողովի 2018 թվականի նոյեմբերի 1-ի` <<Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին>> ՀՀ օրենքի 2-րդ հոդվածի 5-րդ մասը սահմանում է.
<<Քրեական գործի հարուցումը մերժել, հարուցված քրեական գործը կարճել, ինչպես նաև դադարեցնել քրեական հետապնդումը կամ չիրականացնել քրեական հետապնդում 2018 թվականի հոկտեմբերի 21-ը ներառյալ կատարած հանցագործությունների դեպքերով (բացառությամբ անմիջականորեն մարդու մահվան հանգեցրած դեպքերի, որոնցով առկա է տուժողի իրավահաջորդի առարկությունը), որոնցով՝
1) անձինք կարող են մեղադրվել կամ մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ` ոչ ավելի, քան չորս տարի ժամկետով ազատազրկում.
/.../>>:
Քրեական գործով տուժող Նաիրա Վարդանյանը որևէ բողոք կամ վնասի հատուցման պահանջ չի ներկայացրել, բացի այդ, ամբաստանյալ Համլետ Գասպարյանը չի առարկել իր նկատմամբ համաներման որոշման կիրառմանը:
Դատարանն արձանագրում է, որ մինչև Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 29.08.2016թ. դատավճիռն օրինական ուժի մեջ մտնելը` 04.09.2016թ. Համլետ Գասպարյանը կատարել է ՀՀ քրեական օրենսգրքի 34-176-րդ հոդվածի 1-ին մասով նախատեսված հանցանքը, հետևաբար Համլետ Գասպարյանը պատիժը կրելու ընթացքում չի կատարել ՀՀ քրեական օրենսգրքի 34-176-րդ հոդվածի 1-ին մասով նախատեսված հանցանքը և նրա նկատմամբ կիրառելի չէ համաներման մասի օրենքի 2-րդ հոդվածի 10-րդ մասի 2-րդ կետի սահմանափակումները:
Դատարանը միաժամանակ փաստում է, որ Համլետ Գասպարյանի նկատմամբ համաներման մասին օրենքի կիրառման մյուս սահմանափակումները ևս առկա չեն, հետևաբար ՀՀ քրեական օրենսգրքի 34-176-րդ հոդվածի 1-ին մասով քրեական գործի վարույթը ենթակա է կարճման, իսկ Համլետ Գասպարյանի նկատմամբ` քրեական հետապնդումը դադարեցման` ՀՀ Ազգային ժողովի 2018 թվականի նոյեմբերի 1-ի` <<Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին>> ՀՀ օրենքի 2-րդ հոդվածի 5-րդ մասի 1-ին կետի հիմքով:
Անդրադառնալով իրեղեն ապացույցների տնօրինման հարցին, ապա դատարանը գտնում է, որ իրեղեն ապացույց ճանաչված և տուժող Նաիրա Վարդանյանին ի պահ հանձնված ոսկյա շղթան` իր կախազարդով, պետք է թողնել տուժողի տնօրինմանը:
Ղեկավարվելով ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետով, 119-րդ և 379-րդ հոդվածներով, դատարանը

ՈՐՈՇԵՑ

ՀՀ քրեական օրենսգրքի 34-176-րդ հոդվածի 1-ին մասով քրեական գործի վարույթը կարճել և Համլետ Ստեփանի Գասպարյանի նկատմամբ քրեական հետապնդումը դադարեցնել` ՀՀ Ազգային ժողովի 2018 թվականի նոյեմբերի 1-ի` <<Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին>> ՀՀ օրենքի 2-րդ հոդվածի 5-րդ մասի 1-ին կետի հիմքով:
Համլետ Ստեփանի Գասպարյանի նկատմամբ ընտրված խափանման միջոցը` ստորագրություն` չհեռանալու մասին, վերացնել:
Իրեղեն ապացույց ճանաչված և տուժող Նաիրա Վարդանյանին ի պահ հանձնված ոսկյա շղթան` իր կախազարդով, թողնել տուժողի տնօրինմանը:
Որոշումը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո` մեկամսյա ժամկետում:


ԴԱՏԱՎՈՐ Ա.ՄԿՐՏՉՅԱՆ