ԵԱՔԴ/0230/01/16

Ո Ր Ո Շ ՈՒ Մ
ԱՆՁԻՆ ՔՐԵԱԿԱՆ ՊԱՏԱՍԽԱՆԱՏՎՈՒԹՅՈՒՆԻՑ ԵՎ ՊԱՏԺԻՑ ԱԶԱՏԵԼՈՒ,
ՆՐԱ ՆԿԱՏՄԱՄԲ ԲԺՇԿԱԿԱՆ ԲՆՈՒՅԹԻ ՀԱՐԿԱԴՐԱԿԱՆ ՄԻՋՈՑ
ԿԻՐԱՌԵԼՈՒ ՄԱՍԻՆ

<<24>> հունվարի 2017թ. ք.Երևան

ԵՐԵՎԱՆ ՔԱՂԱՔԻ ԱՐԱԲԿԻՐ ԵՎ ՔԱՆԱՔԵՌ-ԶԵՅԹՈՒՆ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ

Նախագահող դատավոր` Դ.Գրիգորյան
քատուղարությամբ` Գ.Վարդանյանի

Մասնակցությամբ`
դատախազ` Գ.Ալոյանի
պաշտպան` Ս.Հարությունյանի


Դռնբաց դատական նիստում քննության առնելով անմեղսունակ Վահագ Սուրիկի Նավոյանի (ծնված 28.10.1982 թվականին ՌԴ-ում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, չի աշխատում, նախկինում դատված, բնակ. է Շիրակի մարզ, գ.Ազատան, 18-րդ փողոց, տուն 6) նկատմամբ բժշկական բնույթի հարկադրական միջոցներ կիրառելու վերաբերյալ վարույթը

Պ Ա Ր Զ Ե Ց

Արաբկիր վարչական շրջանի քննչական բաժնի քննիչ Տ.Ղազարյանի 2016 թվականի հոկտեմբերի 1-ի որոշմամբ ՀՀ քրեական օրենսգրքի 133-րդ հոդվածի 2-րդ մասի 2-րդ և 3-րդ կետի հատկանիշներով հարուցվել է թիվ 14812516 քրեական գործը:
Նախաքննության մարմնի կողմից 2016 թվականի հոկտեմբերի 4-ին Վահագ Սուրիկի Նավոյանին մեղադրանք է առաջադրվել ՀՀ քրեական օրենսգրքի 133-րդ հոդվածի 2-րդ մասի 2-րդ և 3-րդ կետերով այն բանի համար, որ նա 2016 թվականի հոկտեմբերի 1-ին՝ ժամը 13:30-ի սահմաններում, Երևան քաղաքի Հ. Էմին փողոցի 123 հասցեում գտնվող Հայ-Ռուսական սլավոնական համալսարանի գլխավոր մուտքի դիմաց ձախ ձեռքով բռնել է Տատյանա Ռավաևայի մազերից, իսկ աջ ձեռքով որպես զենք օգտագործվող առարկան՝ դանակը, պահելով Տ. Ռավաևայի պարանոցին և հնչեցնելով կյանքի համար վտանգավոր բռնություն գործադրելու՝ սպանության սպառնալիքներ, շուրջ 30 րոպե՝ 13:30-ից մինչև 14:00-ն ուղղակի դիտավորությամբ Տ.Ռավաևայի կամքին հակառակ ապօրինի ազատությունից զրկել է նրան, զրկելով ազատ տեղաշարժվելու հնարավորությունից, ստեղծելով սպառնալիքներն իրականացնելու իրական վտանգ և պահանջել է այդտեղ կանչել ոստիկանության աշխատակիցներին: Ժամը 14:00-ին ոստիկանության աշխատակիցներին հաջողվել է շեղել Վ. Նավոյանի ուշադրությունը և վնասազերծել նրան՝ ազատելով Տ. Ռավաևային:
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 2016 թվականի հոկտեմբերի 4-ի որոշմամբ Վահագ Սուրիկի Նավոյանի նկատմամբ որպես խափանման միջոց է կիրառվել կալանավորումը` կալանքի ժամկետի սկիզբը հաշվելով 2016 թվականի հոկտեմբերի 1-ից:
Երևան քաղաքի Արաբկիր և Քանաքեռ-Զեյթուն վարչական շրջանների դատախազության դատախազ Գ.Ալոյանի 2016 նոյեմբերի 15-ի որոշմամբ անմեղսունակության վիճակում քրեական օրենսգրքով չթույլատրված արարք կատարած Վահագն Սուրիկի Նավոյանի նկատմամբ որպես խափանման միջոց կիրառված կալանավորումը վերացվել է:
Արաբկիր վարչական շրջանի քննչական բաժնի քննիչ Տ.Ղազարյանի 2016 թվականի նոյեմբերի 15-ի որոշմամբ Վահագն Սուրիկի Նավոյանի նկատմամբ կիրառվել է անվտանգության միջոց` տեղավորվել է ՀՀ ԱՆ <<Նուբարաշեն>> հանրապետական հոգեբուժական հիվանդանոցի հարկադիր բուժման հատուկ հսկողության հոգեբուժական բաժանմունքում, որը Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 2016 թվականի նոյեմբերի 15-ի որոշմամբ հաստատվել է:
Նկատի ունենալով, որ Վահագ Սուրիկի Նավոյանը ճանաչվել է անմեղսունակ իրեն մեղսագրվող արարքի նկատմամբ, նախաքննական մարմինը որոշում է կայացրել <<Բժշկական բնույթի հարկադրական միջոցներ կիրառելու համար գործը դատարան ուղարկելու մասին>> և 05.12.2016 թվականին Վահագ Սուրիկի Նավոյանի վերաբերյալ գործը ուղարկել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
Դատաքննությամբ հետազոտվեց կողմերի ներկայացրած ներքոհիշյալ ապացույցները.
Վահագ Սուրիկի Նավոյանի որպես մեղադրյալի ցուցմունքը, համաձայն որի առաջադրված մեղադրանքում իրեն մեղավոր է ճանաչել և ցուցմունք տվել այն մասին, որ 2016 թվականի սեպտեմբերի 30-ին Գյումրի քաղաքից ժամանել է Երևան: Նույն օրը պատահական անցորդներից հարցրել է համալսարանի տեղը, որտեղ ազգությամբ ռուս ուսանողներ կարող են լինել: Անցորդները ցույց են տվել Երևան քաղաքի Հայ-Ռուսական (սլավոնական) համալսարանի տեղը: Նույն օրը՝ ժամը 12:00-ից մինչև ժամը 13:00-ն ընկած ժամանակահատվածում իմանալով նշված համալսարանի տեղը գնացել է այդտեղ և սկսել ման գալ ազգությամբ ռուս աղջկա, այդ նպատակով սկսել է հետաքրքրվել այդտեղ անցնող պատահական անցորդներից, սակայն այդպիսի անձ չգտնելով նույն օրը՝ ժամը 17:00-ի սահմաններում գնացել է Չարենցավան քաղաք, որտեղ գիշերել է հարազատ քրոջ՝ Արմինեի տանը: Հաջորդ օրը՝ հոկտեմբերի 1-ին՝ ժամը 11:00-ի սահմաններում կրկին գնացել է Հայ-ռուսական սլավոնական համալսարանի մոտ, իր հետ վերցնելով դանակ, որը ձեռք է բերել դրանից մոտ մեկ ամիս առաջ՝ Գյումրի քաղաքում գտնվող խանութից 600 ՀՀ դրամ գումարով: Ժամը 13:30-ի սահմաններում Հայ-Ռուսական (սլավոնական) համալսարանի գլխավոր մուտքի դիմացի հատվածում տեսել է պատահական աղջկա՝ Տատյանա Ռավաևային, ով իր արտաքինով նման է ազգությամբ ռուսի: Անմիջապես ձախ ձեռքով բռնել է Տ. Ռավաևայի մազերից, որից հետո աջ ձեռքով՝ իր մոտ եղած դանակը պահել է վերջինիս ծոծրակային հատվածում ու սպառնացել սպանել նրան, եթե այդտեղ չկանչեն ՀՀ և ՌԴ նախագահներին և պահանջել է իրեն զենք տրամադրել: Պահանջների մասին գոռացել է, որպեսզի այդտեղ պատահական անցնող անձիք լսեն և կանչեն ոստիկաններին: Դրանից մոտ 10 րոպե անց այդտեղ են եկել ոստիկանության աշատակիցները, որոնցից սկսել է պահանջել, որ իրեն զենք տրամադրեն, այդտեղ կանչեն ՀՀ և ՌԴ նախագահներին, այլապես սպառնացել է կտրել Տ. Ռավաևայի գլուխը և դնել գետնին: Դա շարունակվել է մոտ 30 րոպե, որի ընթացքում Տ. Ռավաևային զրկել է տեղաշարժվելու հնարավորությունից: Դրանից հետո լսել է կրակոց, դրանից վախեցել է ու այդ պահին իր համար հանկարծակի ձևով հարձակվել են իր վրա և պառկեցրել գետնին: Դրանից հետո բերման են ենթարկել ոստիկանության բաժին:

(Դատական նիստի արձանագրություն)

Տուժող Տատյանա Ռավաևայի ցուցմունքը, համաձայն որի սովորում է Հայաստանի Հանրապետությունում գտնվող Հայ-Ռուսական (սլավոնական) համալսարանի 2-րդ կուրսում: 2016 թվականի հոկտեմբերի 1-ին, ժամը 13:15-ի սահմաններում գտնվել է Երևան քաղաքի Հ.Էմին փողոցի 123 հասցեում գտնվող Հայ-ռուսական սլավոնական համալսարանում: Այդ ժամանակ երկու ընկերուհիների հետ դուրս է եկել համալսարանից և կանգնել համալսարանի դիմացի հատվածում ու մոտ 10 րոպե զրուցել: Այդ պահին հանկարծակի զգացել է, որ իր մազերից քաշում են, պտտվելով տեսել է, որ դա Վահագ Նավոյանն է: Վերջինս այդ պահին ձախ ձեռքով բռնել է իր մազերից և հենել պատին, իսկ աջ ձեռքով իր վզի հատվածում պահել է մոտը առկա դանակը: Վ. Նավոյանը դանակը թափահարելով բղավել է, որ քաղաքացիները չմոտենան: Դրանից հետո Վ.Նավոյանը սկսել է գոռալ, որ այդտեղ հավաքված քաղաքացիները ոստիկանություն կանչեն, այդտեղ հրավիրեն ՀՀ և ՌԴ նախագահներին և իրեն զենք տրամադրեն: Մոտ 10 րոպե անց եկել են ոստիկանության աշխատակիցները, որոնց ներկայությամբ Վ. Նավոյանը շարունակել է իր հասցեին հնչեցնել սպանության սպառնալիքներ ասելով, որ կկտրի իր գլուխը և կդնի գետնին: Դա տևել է մոտ 30 րոպե, որից հետո լսվել է կրակոց, ոստիկանության աշխատակիցները կտրուկ հարձակվել և ազատել են իրեն: Երբ Վ.Նավոյանը բռնել է իրեն՝ ինքը չի կարողացել շարժվել, քանի որ վերջինս ուժեղ քաշել է մազերից և դանակով սպառնացել սպանել:

(Դատական նիստի արձանագրություն)

Վկա Արթուր Ավետիսյանի ցուցմունքը, համաձայն որի ծառայում է ՀՀ ոստիկանության ՊՊԳՎ ԿՕ և ՀՁ գնդի ռազմականացված ջոկատում, որպես ավագ հրաձիգ: 2016 թվականի հոկտեմբերի 1-ին՝ ժամը 13:00-ի սահմաններում գտնվել է Հայ-Ռուսական (սլավոնական) համալսարանի մոտ: Նույն օրը՝ ժամը 13:40-ի սահմաններում համալսարանի մուտքի մոտ նկատել է հավաքված քաղաքացիների: Մոտենալով այդտեղ տեսել է Վահագ Նավոյանին, ով այդ պահին ձախ ձեռքով բռնել էր Տատյանա Ռավաևային, իսկ աջ ձեռքով պահելով դանակը Տ. Ռավաևայի ծոծրակային հատվածում սպառնում էր, որ կսպանի վերջինիս, կկտրի գլուխը և կդնի գետնին: Իր գործողություններով Վ. Նավոյանը զրկել էր Տ. Ռավաևային ազատ տեղաշարժվելու հնարավորությունից: Դա շարունակվել է մոտ 30 րոպե, որի ընթացքում այդտեղ են եկել նաև ոստիկանության մի շարք ծառայողներ: Մոտ 30 րոպե անց իր մոտ գտնվող գազային ատրճանակի միջոցով մեկ անգամ նախազգուշական կրակոց է արձակել օդ և այդ կերպ շեղել Վ. Նավոյանի ուշադրությունը, որից հետո հնարավոր է եղել Վ. Նավոյանին վնասազերծել և բերման ենթարկել ոստիկանության բաժին:

(Դատական նիստի արձանագրություն)

Վկա Էթերի Ծատրյանի ցուցմունքը, համաձայն որի սովորում է Հայաստանի Հանրապետությունում գտնվող Հայ-Ռուսական (սլավոնական) համալսարանի 2-րդ կուրսում: 2016 թվականի հոկտեմբերի 1-ին՝ ժամը 13:30-ի սահմաններում, ընկերուհիների, այդ թվում Տատյանա Ռավաևայի հետ գտնվել է Երևան քաղաքի Հ. Էմին փողոցի 123 հասցեում գտնվող Հայ-ռուսական սլավոնական համալսարանի մուտքի անմիջապես դիմացի հատվածում: Այդ պահին Վահագ Նավոյանը կտրուկ հարձակվել է ընկերուհու՝ Տատյանա Ռավաևայի վրա, ձախ ձեռքով բռնել նրա մազերից, դեմ տվել պատին և աջ ձեռքում առկա դանակով սկսել է սպառնալ, որ կսպանի նրան: Վ. Նավոյանը դանակը թափահարելով գորգռացել է, որ քաղաքացիները չմոտենան նրանց: Դա տևել է մոտ 30 րոպե, որից հետո լսվել է կրակոց, ոստիկանության աշխատակիցները կտրուկ հարձակվել և Վ. Նավոյանից ազատել են ընկերուհուն՝ Տ. Ռավաևային: Հայտնել է, որ Վ. Նավոյանը բռնելով Տ. Ռավաևային զրկել է վերջինիս ազատ տեղաշարժվելու հնարավորությունից:

(Դատական նիստի արձանագրություն)
Վկա Ստելլա Ոսկանյանի ցուցմունքը, համաձայն որի սովորում է Հայաստանի Հանրապետությունում գտնվող Հայ-Ռուսական (սլավոնական) համալսարանի 2-րդ կուրսում: 2016 թվականի հոկտեմբերի 1-ին՝ ժամը 13:30-ի սահմաններում, ընկերուհիների, այդ թվում Տատյանա Ռավաևայի հետ գտնվել է Երևան քաղաքի Հ. Էմին փողոցի 123 հասցեում գտնվող Հայ-ռուսական սլավոնական համալսարանի մուտքի անմիջապես դիմացի հատվածում գտնվող ավտոլվացման կետի հարակից գտնվող՝ Է. Էմին 128 տան դիմաց: Այդ պահին տեսել է Վահագ Նավոյանին, ով նստած է եղել նրանց կողքին՝ գետնին: Այդ պահին Վ. Նավոյանը կանգնել և կտրուկ հարձակվել է Տատյանա Ռավաևայի վրա, ձախ ձեռքով բռնել վերջինիս մազերից, դեմ տվել պատին, իսկ աջ ձեռքում առկա դանակով սկսել է սպառնալ, որ կսպանի նրան՝ կկտրի գլուխը և կդնի գետնին: Վ. Նավոյանը դանակը թափահարելով գոռացել է, որ քաղաքացիները չմոտենան նրանց և պահանջել, որ այդտեղ կանչեն ՀՀ և ՌԴ նախագահներին ու զենք տրամադրեն իրեն: Դա տևել է մոտ 30 րոպե, որից հետո լսվել է կրակոց, ոստիկանության աշխատակիցները կտրուկ հարձակվել և Վ. Նավոյանից ազատել են Տատյանա Ռավաևային: Հայտնել է, որ Վ. Նավոյանը այնպես է բռնել Տ. Ռավաևային, որ վերջինս մոտ 30 րոպե հնարավորություն չի ունեցել տեղաշարժվելու:

(Դատական նիստի արձանագրություն)
Վկա Մարիամ Օգանեզովայի ցուցմունքը, համաձայն որի սովորում է Հայ-Ռուսական սլավոնական համալսարանի 2-րդ կուրսում: 2016 թվականի հոկտեմբերի 1-ին, ժամը 13:36-ի սահմաններում իրեն է զանգահարել ընկերուհին՝ Էթերի Ծատրյանը և հայտնել, որ համալսարանի մուտքի անմիջապես դիմացի հատվածում մի տղամարդ բռնել է Տատյանա Ռավաևայի մազերից և դանակով սպառնում է, որ կսպանի նրան: Անմիջապես գնացել է նշված վայր, որտեղ տեսել է Վահագ Նավոյանին, ով ձախ ձեռքով բռնել էր Տ. Ռավաևայի մազերից, իսկ աջ ձեռքում եղած դանակով սպառնում էր, որ կսպանի նրան՝ գլուխը կկտրի և կդնի գետնին, եթե այդտեղ չկանչեն ՀՀ և ՌԴ նախագահներին: Վ. Նավոյանը պահանջել է նաև, որ իրեն զենք տրամադրեն: Վերջինս մոտ 30 րոպե պահել է Տ. Ռավաևային և սպառնացել, որից հետո լսվել է կրակոց, ոստիկանության աշխատակիցները կտրուկ հարձակվել և Վ. Նավոյանից ազատել են Տատյանա Ռավաևային: Հայտնել է, որ Վ. Նավոյանը այնպես է բռնել ընկերուհուն՝ Տ.Ռավաևային, որ վերջինս մոտ 30 րոպե հնարավորություն չի ունեցել տեղաշարժվելու:
(Դատական նիստի արձանագրություն)

Վկա Արմեն Անդրեասյանի ցուցմունքը, համաձայն որի սովորում է Հայ-Ռուսական (սլավոնական) համալսարանի 2-րդ կուրսում: 2016 թվականի հոկտեմբերի 1-ին՝ ժամը 13:40-ի սահմաններում, երբ դուրս է եկել համալսարանից տեսել է, որ համալսարանի մուտքի անմիջապես դիմացի հատվածում քաղաքացիներ են հավաքված: Մոտենալով այդտեղ տեսել է Վահագ Նավոյանին, ով ձախ ձեռքով բռնել էր Տատյանա Ռավաևայի մազերից, աջ ձեռքով պահել էր դանակ և սպառնում էր, որ կսպանի Տատյանա Ռավաևային, եթե այդտեղ չկանչեն ՀՀ և ՌԴ նախագահներին: Վ. Նավոյանը պահանջել է նաև, որ իրեն զենք տրամադրեն: Ընդհանուր առմամբ Վ. Նավոյանը Տ. Ռավաևային բռնել և զրկել է տեղաշարժվելու հնարավորությունից մոտ 30 րոպե, որի ընթացքում շարունակել է սպառնալ, որ կսպանի նրան: Դրանից հետո լսվել է կրակոց, ոստիկանության աշխատակիցները կտրուկ հարձակվել և Վ. Նավոյանի ձեռքերից ազատել են Տ.Ռավաևային: Այդ ողջ ընթացքում Տ. Ռավաևան հնարավորություն չի ունեցել տեղաշարժվելու:

(Դատական նիստի արձանագրություն)

Վկա Իգոր Մեսրոպյանի ցուցմունքը, համաձայն որի 2004 թվականից աշխատում է ՀՀ ոստիկանությունում: 2015 թվականից հանդիսանում է ՀՀ ոստիկանության Արաբկիրի բաժնի ՔՀԲ պետ, կոչումով մայոր է: 2016 թվականի հոկտեմբերի 1-ին՝ ժամը 13:40-ի սահմաններում ահազանգ են ստացել այն մասին, որ մի տղամարդ Հայ-Ռուսական (սլավոնական) համալսարանի մոտ դանակը պահել է մի աղջկա պարանոցին: Անմիջապես օպերատիվ խմբի հետ միասին մեկնել են դեպքի վայր, որտեղ Հ. Էմին փողոցի 123 հասցեում գտնվող Հայ-Ռուսական սլավոնական համալսարանի մուտքի դիմացի հատվածում տեսել է Վահագ Նավոյանին, ով իր ձեռքին եղած դանակը պահել էր Տ. Ռավաևայի պարանոցին և պահանջում էր, որ իրենք այդտեղ կանչեն ՀՀ և ՌԴ նախագահներին, նաև պահանջում էր, որ իրեն զենք տրամադրեն: Մոտ 30 րոպե Վ.Նավոյանը սպառնացել է, որ կսպանի Տ.Ռավաևային, կկտրի վերջինս գլուխը և կդնի գետնին: Այդ ընթացքում իր կողմից Վ. Նավոյանի հետ տարվել են բանակցություններ, կատարվել է օպերատիվ զրույց, սակայն Վ. Նավոյանը հրաժարվել է բաց թողնել Տ.Ռավաևային և հանձնվել իրավապահ մարմիններին: Մոտ 30 րոպե անց իրեն հաջողվել է Վ. Նավոյանին համոզել, որպեսզի նստի այդտեղ կայանված ոստիկանության ավտոմեքենան: Երբ Վ. Նավոյանը մոտեցել է ավտոմեքենային ինքը փորձել է նրա ձեռքից ազատել Տ. Ռավաևային: Այդ պահին, այդտեղ գտնվող ՊՊԳՎ ԿՕ և ՀԶ գնդի ռազմականացված ջոկատի ավագ հրաձիգ՝ Ա. Ավետիսյանը իր մոտ առկա գազային ատրճանակով մեկ անգամ կրակել է օդ և այդ կերպ շեղել Վ. Նավոյանի ուշադրությունը, որից հետո իր և ոստիկանության Արաբկիրի բաժնի մյուս աշխատակիցների կողմից անմիջապես կիրառվել է համապատասխան միջոցներ, այդ թվում ձեռնամարտի հնարքներ, որի արդյունքում հաջողվել է Վ. Նավոյանի ձեռքից ազատել Տ. Ռավաևային և բերման ենթարկել ոստիկանության բաժին:

(Դատական նիստի արձանագրություն)

Տուժող Տատյանա Ռավաևայի և կասկածյալ Վահագ Նավոյանի միջև կատարված 2016 հոկտեմբերի 1-ի առերես ցուցմունքը, համաձայն որի Վ.Նավոյանին առաջին անգամ տեսել է 2016 թվականի հոկտեմբերի 1-ին ժամը 12:20-ի սահմաններում, երբ գտնվում էր Երևան քաղաքի Հ.էմին փողոցի 123 հասցեում գտնվող Հայ-Ռուսական (սլավոնական) համալսարանում, որտեղ սովորում է: Այդ ժամանակ դուրս է եկել ընդմիջման: Դրանից հետո գնացել է դասի, որից հետո՝ ժամը 13:15-ի սահմաններում դուրս է եկել համալսարանից երկու ընկերուհիների հետ, որոնց հետ համալսարանի դիմացի հատվածը կանգնած մոտ 10 րոպե զրուցել է: Դրանից հետո հանկարծակի զգացել է, որ իր մազերից քաշում են, պտտվելով տեսել է, որ դա իր հետ առերես հարցաքննվողն է: Նա այդ պահին մի ձեռքով բռնել է մազերիցս և հենել է պատին,իսկ մյուս ձեռքով վզի հատվածում պահել է իր մոտ եղած դանակը: Իր հետ առերես հարցաքննվողը դանակը թափահարելով բղավում էր, որ մարդիկ չմոտենան: Դրանից հետո սկսել է այդտեղ հավաքված մարդկանց ասել, որ ոստիկանություն կանչեն, իր մոտ բերեն ՀՀ նախագահին, ՌԴ նախագահին և զենք տան: Մոտ 10 րոպե անց եկել են ոստիկանության աշխատակիցները, որոնց ներկայությամբ իր հետ առերես հարցաքննվողը շարունակել է պահանջել, որպեսզի ոստիկանության աշխատակիցները իրեն զենք տրամադրեն, այդտեղ կանչեն ՀՀ և ՌԴ նախագահներին: Դա տևել է մոտ 30 րոպե, որից հետո լսվել է կրակոց, ոստիկանության աշխատակիցները կտրուկ հարձակվել են և իրեն ազատել նրա ձեռքից: Երբ իր հետ առերես հարցաքննվողը բռնել է իրեն, չէր կարողանում շարժվել, քանի որ ուժեղ քաշում էր մազերից և դանակով սպառնում էր սպանել, կտրել գլուխը:
Կասկածյալ Վ.Նավոյանը նշեց, որ լսեց իր հետ առերես հարցաքննվողի ցուցմունքը և հայտնում է, որ նա ամեն ինչ ճիշտ է պատմում: Ինքը 2016 հոկտեմբերի 1-ի ժամը 13:30-ի սահմաններում, երբ գտնվում էր Հայ-Ռուսական (սլավոնական) համալսարանի դիմաց, տեսել է նրան, մտածել է, որ ազգությամբ ռուս է և հարձակվելով նրա վրա, քաշել է մազերը, հենել է պատին ու իր մոտ եղած դանակով սկսել է սպառնալ նրան ու պահանջել, որ այդտեղ գան ՀՀ նախագահ Սերժ Սարգսյանը, ՌԴ նախագահ Պուտինը և իրեն զենք տան: Ինքը դանակը պահելով նրա վզի մոտ սպառնում էր, որ կսպանի: Դրանից հետո եկել են ոստիկանները, որոնց ներկայությամբ շարունակել է սպառնալ իր հետ առերես հարցաքննվողին: Նրան չի թողել, որ շարժվի, սպառնացել է, որ այդտեղ հավաքված անձիք չմոտենան իրեն, հակառակ դեպքում կսպանի իր հետ առերես հարցաքննվողին` կկտրի նրա գլուխը:
Տուժող Տատյանա Ռավաևան նշեց, որ լսել է իր հետ առերես հարցաքննվողին, ամեն ինչ ճիշտ է, պնդում է իր ցուցմունքը:
Կասկածյալ Վահագ Նավոյանը նշեց, որ ամեն ինչ ճիշտ է, պնդում է ցուցմունքը:

(Դատական նիստի արձանագրություն)

Վկա Էթերի Ծատուրյանի և կասկածյալ Վահագ Նավոյանի միջև կատարված 2016 հոկտեմբերի 1-ի առերես ցուցմունքը, համաձայն որի վկա Էթերի Ծատուրյանը հայտնել է, որ իր հետ առերես հարցաքննվողին առաջին անգամ տեսել է 2016 հոկտեմբերի 1-ի ժամը 13:30-ի սահմաններում, երբ ընկերուհիների, այդ թվում, Տատյանա Ռավաևայի հտ գտնվում էր Երևան քաղաքի Հ.Էմին փողոցի 123 հասցեում գտնվող Հայ-Ռուսական (սլավոնական) համալսարանում, որտեղ սովորում է: Այդպահին իր հետ առերես հարցաքննվողը կտրուկ հարձակվել է ընկերուհու` Տատյանա Ռավաևայի վրա, բռնել է նրա մազերից, դեմ տվել պատին և դանակով սկսել սպառնալ, որ կսպանի նրան: Իր հետ առերես հարցաքննվողը դանակը թափահարելով գորգռում էր, որ մարդ չմոտենա նրան: Դրանից հետո սկսել է մարդկանց ասել, որ ոստիկանություն կանչեն, իր մոտ բերեն նախագահին և զենք տան: Դրանից հետո`10 րոպե անց, այդտեղ են եկել ոստիկանության աշխատակիցները, որոնց ներկայությամբ իր հետ առերես հարցաննվողը շարունակել է սպառնալ սպանել ընկերուհուն` կտրել նրա գլուխը և նման բաներ ու միաժամանակ պահանջում էր, որպեսզի ոստիկանության աշխատակիցները իրեն զենք տրամադրեն, այդտեղ կանչեն նախագահին: Դա տևել է մոտ 30 րոպե, որից հետո լսվել է կրակոց, ոստիկանության աշխատակիցները կտրուկ հարձակվել են իր հետ առերես հարցաքննվողի վրա և ազատել ընկերուհուն: Իր հետ առերես հարցաքննվողը այնպես էր բռնել ընկերուհուն, որ նա հնարավորություն չուներ շարժվելու, նաև սպառնում էր նրան, որ կկտրի գլուխը:
Կասկածյալ Վահագ Նավոյանը նշեց, որ լսեց իր հետ առերեսվողի ցուցմունքը և հայտնում է, որ նա ամեն ինչ ճիշտ է պատմում: Ինքը 2016 հոկտեմբերի 1-ին, ժամը 13:30-ի սահմաններում, երբ գտնվում էր Հայ-ռուսական սլավոնական համալսարանի դիմաց, տեսել է նրան: Նա կանգնած էր այն աղջկա հետ, ում վրա հարձակվել է, բռնել նրա մազերը և սկսել սպառնալ, որ կսպանի ու միաժամանակ սկսել պահանջել, որ այդտեղ բերեն ՀՀ և ՌԴ նախագահներին ու իրեն զենք տան: Քիչ անց եկել է ոստիկանության աշխատակիցները, որոնց ներկայությամբ շարունակել է սպառնալ, որ կսպանի այդ աղջկան, եթե չկատարի իր պահանջները: Ընդհանուր առմամբ դա շարունակվել է մոտ 30 րոպե, որից հետո լսել է կրակոց ու իր վրա կտրուկ հարձակվել են ոստիկանության աշխատակիցները և գցել են գետնին:
Վկա Էթերի Ծատուրյանը նշեց, որ իր հետ առերես հարցաքննվողին, ամեն ինչ ճիշտ է, պնդում է ցուցմունքը:
Կասկածյալ Վահագ Նավոյանը նշեց, որ ամեն ինչ ճիշտ է, պնդում է ցուցմունքը:

(Դատական նիստի արձանագրություն)

03.10.2016 թվականին կատարված դեպքի վայրի զննության արձանագրությունը, համաձայն որի կասկածյալ Վ.Նավոյանի մասնակցությամբ կատարվել է դեպքի վայրի զննություն, որի ընթացքում պարզվել է, որ դեպքի վայր է հանդիսանում Երևան քաղաքի Հ. Էմին 128 տան անմիջապես դիմացի հատվածը: Դեպքի վայրի զննության ընթացքում Վ.Նավոյանը մատնացույց է արել Հ.Էմին 128 տան անմիջապես դիմացի հատվածը և մանրամասը նկարագրել, թե ոնց է բռնել Տ. Ռավաևայի մազերից և սպառնացել նրան՝ ապօրինի զրկելով վերջինիս ազատությունից:

(Դատական նիստի արձանագրություն)

Զննություն կատարելու մասին արձանագրությունը, համաձայն որի զննվել է ոստիկանության Արաբկիրի բաժնից ստացված տեսաձայնագրություններ պարունակող լազերային սկավառակը, որի արդյունքում պարզվել է, որ լազերային սկավառակը պարունակում է 1 րոպե տևողությամբ տեսաձայնագրություն <<IMG_4389>> անվամբ: Տեսաձայնագրության 00:01 վարկյանից երևում է ոստիկանության ավտոմեքենա, որի դիմացի հատվածում, Երևան քաղքի Հ. Էմին 128 տան մոտ կանգնած է Վահագ Նավոյանը, որը իր ձախ ձռքով բռնել է Տատյանա Ռավաևային և գոռում է <<արա, արա, կոխում եմ, բոզի տղա լինեմ կոխում եմ>>: Տեսաձայնագրության 00:08 վարկյանից երևում է, թե ինչպես է Վ. Նավոյանը մոտենում հիշյալ ոստիկանական ավտոմեքենային՝ իր հետևից այդտեղ քաշելով Տ. Ռավաևային: 00:20 վարկյաին փորձ է կատարվում Վ. Նավոյանի ձեռքից Տ.Ռավաևային ազատելու, սակայան չի հաջողվում և Վ. Նավոյանը սկսում է աջ ձեռքը անկանոն շարժել, որից հետո՝ տեսագրության 00:24 վարկյանին լսվում է կրակոց ու նույն պահին պատահական անձիք հարձակվում և Տ. Ռավաևային ազատում են Վ. Նավոյանի ձեռքերից:

(Դատական նիստի արձանագրություն)

Իրեղեն ապացույց ճանաչելու մասին 08.11.2016 թվականի որոշումը, համաձայն որի թիվ 14812516 քրեական գործով Վ.Նավոյանին պատկանող ծալովի դանակը ճանաչվել է իրեղեն ապացույց:
(Դատական նիստի արձանագրություն)

Վահագն Նավոյանին բերման ենթարկելու մասին արձանագրությունը, համաձայն որի 2016 թվականի հոկտեմբերի 1-ին, ժամը 14:20-ին, Վահագն Նավոյանը Հայ-Ռուսական (սլավոնական) համալսարանի գլխավոր մուտքի դիմացից բերման է ենթարկվել ոստիկանության Արաբկիրի բաժին:

(Դատական նիստի արձանագրություն)

Ստացիոնար դատահոգեբուժական փորձաքննության թիվ 101 եզրակացությունը, համաձայն որի Վ.Նավոյանը տառապել և տառապում է <<Շիզոֆրենիա պարանոիդ ձև՝ պարաֆրեն էտապ>> խրոնիկական հոգեկան հիվանդությամբ: Այդ մասին են վկայում ինչպես անամնեստիկ տեղեկությունները, այնպես էլ ներկա հետազոտման արդյունքները, ազդեցման զառանցական մտքեր, անհետևողական և ոչ ճիշտ դատողություն, հուզական անադեկվատություն, հետաքրքրությունների շրջանակի նեղացում, հուզակամային ոլորտի իջեցում, քննադատության բացակայության հետ մեկտեղ: Իրավախախտումը կատարելիս, փորձաքննվողը գտնվել է վերը նշված հիվանդագին խանգառման վիճակում, արարքը կատարել է ցնորազառանցական ապրումների ազդեցության ներքո, որը զրկել է նրան գիտակցել իր գործողությունների վտանգավորությունը և ղեկավարել դրանք: Ներկայումս նա նույնպես չի կարող գիտակցել իր գործողությունների վտանգավորությունը և ղեկավարել դրանք: Ուստի, իրեն մեղսագրվող արարքի նկատմամբ Վահագ Սուրիկի Նավոյանին հարկ է ճանաչել անմեղսունակ: Ներկա հոգեկան վիճակով նա չի կարող մասնակցել դատաքննչական գործողություններին, բարձր սոցիալապես վտանգ է ներկայացնում իր և շրջապատի համար, կարիք ունի հարկադիր բուժման հատուկ հսկողության հոգեբուժական բաժանմունքի պայմաններում:
(Դատական նիստի արձանագրություն)

ՀՀ ոստիկանության ինֆորմացիոն կենտրոնից ստացված ձև 8 դատվածության մասին վկայող պահանջագիրը, համաձայն որի անմեղսունակ մեղադրյալ Վահագ Նավոյանը նախկինում դատված է՝ դատվածությունը մարված չէ:

(Դատական նիստի արձանագրություն)

ՀՀ ոստիկանության Երևան քաղաքի վարչության Արաբկիրի բաժնի պետ Ա.Հովհաննիսյանի տեղեկանքը, համաձայն որի լուսանկարում պակերված անձը հանդիսանում է Վահագ Սուրիկի Նավոյանը, ծնված` 28.10.1982թ. հաշվառված է Շիրակի մարզ, գյուղ Ազատան, 18 փողոց, տուն 6:

(Դատական նիստի արձանագրություն)

ՀՀ քրեական դատավարության օրենսգրքի 462-րդ հոդվածի համաձայն` 1. Դատաքննությունն սկսվում է քրեական օրենքով չթույլատրված արարք կատարած անձի նկատմամբ` բժշկական բնույթի հարկադրական միջոցներ կիրառելու անհրաժեշտության մասին դատախազի զեկույցով: Այնուհետև` դատարանը հետազոտում է կողմերի ներկայացրած ապացույցները և լսում է այն անձին, որի նկատմամբ իրականացվում է վարույթը, նրա պաշտպանին և օրինական ներկայացուցչին, ինչպես նաև դատախազի կարծիքը: 2. Այնուհետև դատարանը հեռանում է խորհրդակցական սենյակ` որոշում կայացնելու համար:
ՀՀ քրեական օրենսգրքի 25-րդ հոդվածի 1-ին մասի համաձայն` քրեական պատասխանատվության ենթակա չէ այն անձը, ով հանրության համար վտանգավոր արարք կատարելու պահին գտնվել է անմեղսունակության վիճակում, այսինքն` քրոնիկ հոգեկան հիվանդության, հոգեկան գործունեության ժամանակավոր խանգարման, տկարամտության կամ հոգեկան այլ հիվանդագին վիճակի հետևանքով չէր կարող գիտակցել իր գործողության /անգործության/ վտանգավորությունը կամ ղեկավարել դա: Նույն հոդվածի 2-րդ մասը սահմանում է` հանրության համար վտանգավոր արարքն անմեղսունակության վիճակում կատարած անձի նկատմամբ դատարանը կարող է նշանակել բժշկական բնույթի հարկադրանքի միջոցներ:
ՀՀ քրեական օրենսգրքի 97-րդ հոդվածի 1-ին մասի 1-ին կետի համաձայն` բժշկական բնույթի հարկադրանքի միջոցներ դատարանը կարող է նշանակել այն անձի նկատմամբ, ով սույն օրենսգրքի Հատուկ մասի հոդվածով նախատեսված արարքը կատարել է անմեղսունակության վիճակում:
ՀՀ քրեական օրենսգրքի 97-րդ հոդվածի 2-րդ մասի համաձայն` բժշկական բնույթի հարկադրանքի միջոցները սույն հոդվածի առաջին մասում նշված անձանց նկատմամբ նշանակվում են միայն այն դեպքերում, երբ հոգեկան խանգարումները կապված են այդ անձանց կողմից այլ էական վնաս պատճառելու հնարավորության կամ իր կամ այլ անձանց համար վտանգավորության հետ:
ՀՀ քրեական օրենսգրքի 100-րդ հոդվածի 2-րդ մասի համաձայն` հոգեբուժական հիվանդանոցի հատուկ տիպի հոգեբուժական բաժանմունքում դատարանի որոշմամբ հարկադիր բուժում կարող է նշանակվել այն անձի նկատմամբ, որը հոգեկան վիճակով վտանգավոր է իր և այլ անձանց համար և պահանջում է մշտական հսկողություն:
ՀՀ քրեական օրենսգրքի 101-րդ հոդվածի 1-ին մասի համաձայն` բժշկական բնույթի հարկադրանքի միջոց նշանակելիս դատարանը հաշվի է առնում անձի հոգեկան հիվանդությունը, նրա կատարած արարքի բնույթն ու հանրության համար վտանգավորության աստիճանը:
ՀՀ քրեական դատավարության օրենսգրքի 361-րդ հոդվածի 2-րդ մասի համաձայն` գտնելով, որ ամբաuտանյալը արարքը կատարելու պահին եղել է անմեղuունակ վիճակում, կամ հանցագործությունը կատարելուց հետո հիվանդացել է հոգեկան հիվանդությամբ, որը զրկել է նրան իր գործողությունների համար իրեն հաշիվ տալու կամ այդ գործողությունները ղեկավարելու հնարավորությունից, դատարանն ընդունում է համապատաuխան որոշում:
ՀՀ քրեական դատավարության օրենսգրքի 450-րդ հոդվածի 1-ին մասի համաձայն` բժշկական բնույթի հարկադրական միջոցները դատարանը կիրառում է այն անձանց նկատմամբ, ովքեր քրեական օրենքով չթույլատրված արարքը կատարել են անմեղսունակ վիճակում, եթե այդ անձինք շարունակում են վտանգավոր լինել հասարակության համար:
ՀՀ քրեական դատավարության օրենսգրքի 463-րդ հոդվածի համաձայն` գործով որոշում կայացնելիս դատարանը պետք է լուծի հետևյալ հարցերը`
1) կատարվել է արդյոք հանրորեն վտանգավոր արարք.
2) արարքը կատարել է արդյոք այն անձը, որի նկատմամբ իրականացվել է բժշկական բնույթի հարկադրական միջոցներ կիրառելու վարույթ.
3) արարքը կատարվել է արդյոք անմեղսունակության վիճակում, անձը գտնվում է արդյոք տվյալ վիճակում դատական քննության պահին.
4) անձը կարիք ունի արդյոք իր նկատմամբ բժշկական բնույթի հարկադրական միջոցներ կիրառելու և հատկապես ինչպիսի միջոցներ:
ՀՀ քրեական դատավարության օրենսգրքի 464-րդ հոդվածի 1-ին մասի համաձայն` անձի կողմից քրեական օրենքով չթույլատրված արարքն անմեղսունակության վիճակում կատարելն ապացուցված համարելով` դատարանը որոշում է կայացնում անձին քրեական պատասխանատվությունից և պատժից ազատելու ու նրա նկատմամբ բժշկական բնույթի հարկադրական միջոցներ կիրառելու մասին:
Դատարանը լսելով Վահագ Սուրիկի Նավոյանի նկատմամբ բժշկական բնույթի հարկադրական միջոցներ կիրառելու անհրաժեշտության մասին դատախազի զեկույցը, հետազոտելով ներկայացված ապացույցները, լսելով պաշտպանի կարծիքը, հանգում է հետևության, որ Վահագ Սուրիկի Նավոյանը կատարել է ՀՀ քրեական օրենսգրքի 133 հոդվածի 2-րդ մասի 2-րդ և 3-րդ կետերով նախատեսված հանցավոր արարք, սակայն այն կատարելու պահին գտնվել է անմեղսունակության վիճակում, իր ներկա հոգեկան վիճակով չի կարող մասնակցել դատաքննչական գործողություններին, նա կարիք ունի հարկադիր բուժման հատուկ հսկողության հոգեբուժական բաժանմունքի պայմաններում:
Քաղաքացիական հայցի պահանջ չկա:
Ինչ վերաբերում է իրեղեն ապացույցների տնօրինման հարցին, դատարանը գտնում է, որ որոշումն օրինական ուժի մեջ մտնելուց հետո իրեղեն ապացույց հանդիսացող ծալովի դանակը պետք է ոչնչացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 450-րդ, 462-րդ, 463-րդ, 464-րդ հոդվածներով, դատարանը

Ո Ր Ո Շ Ե Ց

Վահագ Սուրիկի Նավոյանին ազատել քրեական պատասխանատվությունից և պատժից, նրա նկատմամբ կիրառել բժշկական բնույթի հարկադրանքի միջոց` հատուկ հսկողության հոգեբուժական բաժանմունքի պայմաններում:
Որոշումն օրինական ուժի մեջ մտնելուց հետո իրեղեն ապացույց հանդիսացող ծալովի դանակն ոչնչացնել:
Որոշումը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:




ԴԱՏԱՎՈՐ` Դ.ԳՐԻԳՈՐՅԱՆ