ԵԱՔԴ/0157/01/16



Ո Ր Ո Շ ՈՒ Մ
ԱՆՁԻՆ ՔՐԵԱԿԱՆ ՊԱՏԱՍԽԱՆԱՏՎՈՒԹՅՈՒՆԻՑ ԵՎ ՊԱՏԺԻՑ ԱԶԱՏԵԼՈՒ ՈՒ ՆՐԱ ՆԿԱՏՄԱՄԲ ԲԺՇԿԱԿԱՆ ԲՆՈՒՅԹԻ ՀԱՐԿԱԴՐԱՆՔԻ ՄԻՋՈՑ ԿԻՐԱՌԵԼՈՒ ՄԱՍԻՆ

«24» հոկտեմբերի 2016թ. ք. Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը (այսուհետ նաև` Դատարան),

նախագահությամբ` դատավոր Ա.Մաթևոսյանի,
քարտուղարությամբ` Հ.Արտաշեսյանի, Ա.Պարտիզպանյանի,
մասնակցությամբ`
Երևան քաղաքի Արաբկիր և Քանաքեռ-Զեյթուն վարչական շրջանների դատախազության ավագ դատախազ` Ա.Առաքելյանի,

քրեական օրենքով արգելված արարք
կատարած անձ՝ Կ. Պետրոսյանի

օրինական ներկայացուցիչ` Մ.Աբրահամյանի,
պաշտպան՝ Ռ.Սիրեկանյանի,

դռնբաց դատական նիստում քննության առնելով անմեղսունակ վիճակում քրեական օրենքով արգելված արարք կատարած անձ` Կարեն Ֆելիքսի Պետրոսյանի (ծնված 1968 թվականի հուլիսի 01-ին, ք. Երևանում, ազգությամբ հայ, ՀՀ քաղաքացի, միջին-մասնագիտական կրթությամբ, չամուսնացած, հաշվառված և բնակվող ք.Երևան Շովրոյան փող. 14 շենք, 29 բն., նախկինում չդատված, որպես անվտանգության միջոց է կիրառված հոգեբուժական հիվանդանոցում տեղավորելը) նկատմամբ բժշկական բնույթի հարկադրանքի միջոց կիրառելու վերաբերյալ գործը.


Պ Ա Ր Զ Ե Ց

Գործի դատավարական նախապատմությունը.
ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնի քննիչ Կ.Գրիգորյանի 2016 թվականի ապրիլի 01-ի որոշմամբ ՀՀ քրեական օրենսգրքի 137-րդ հոդվածի 1-ին մասով հարուցվել և վարույթ է ընդունվել թիվ 09110216 քրեական գործը:
2016 թվականի ապրիլի 01-ի որոշմամբ Կարեն Արտավազդի Գրիգորյանը ճանաչվել է տուժող:
2016 թվականի մայիսի 10-ին ՀՀ ԱՆ «Ավան» հոգեկան առողջության կենտրոն ՓԲԸ-ից ից ստացված գրության համաձայն՝ Կարեն Ֆելիքսի Պետրոսյանը՝ ծնված 1968 թվականի հուլիսի 01-ին, հաշվառված՝ ք.Երևան, Շովրոյան 14 շենքի 29 բնակարանում, ՀՀ ԱՆ «Ավան» հոգեկան առողջության կենտրոն ՓԲԸ-ում հաշվառված է 2016 թվականի ապրիլի 19-ից «Օրգանական զառանցական խանգարում» ախտորոշմամբ:
2016 թվականի մայիսի 12-ին ՀՀ ԱՆ «Նարկոլոգիական հանրապետական կենտրոն» ՓԲԸ-ից ստացված գրության համաձայն՝ Կարեն Ֆելիքսի Պետրոսյանը՝ ծնված 1968 թվականի հուլիսի 01-ին «Նարկոլոգիական հանրապետական կենտրոն» ՓԲԸ-ում հաշվառման մեջ չի գտնվում:
ՀՀ քննչական կոմիտեի Երևան քաղաքի ՔՎ Քանաքեռ-Զեյթուն վարչական շրջանի քննչական բաժնի քննիչ Կ.Գրիգորյանի 2016 թվականի մայիսի 17-ի որոշմամբ Կարեն Ֆելիքսի Պետրոսյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 137-րդ հոդվածի 1-ին մասով այն բանի համար որ. « [Կարեն Ֆելիքսի Պետրոսյանը] 2016 թվականի մարտի 21-ին՝ ժամը 19:30-ի սահմաններում, Երևան քաղաքի Շովրոյան փողոցի 14 շենքի 8-րդ հարկում գտնվող վերելակի բացված դռների դիմաց կանգնած, առանց հիմնավոր պատճառի ձեռքին եղած խոհանոցային դանակն ուղղել է նույն շենքի բնակիչ Կարեն Արտավազդի Գրիգորյանի ուղղությամբ և թափահարելով այն, տվել է սպանության սպառնալիք՝ ասելով. «Մորթելու եմ»: Այդ ժամանակ Կարեն Գրիգորյանը վերելակի դռների միջնամասից ոտքով հետ է հրել Կարեն Պետրոսյանին և փակելով վերելակի դռները իջել է ներքև: Կարեն Գրիգորյանը Կարեն Պետրոսյանի տված սպառնալիքն իրական է համարել:»
2016 թվականի մայիսի 20-ի որոշմամբ մեղադրյալ Կարեն Պետրոսյանի նկատմամբ որպես խափանման միջոց է ընտրվել ստորագրություն չհեռանալու մասին:
2016 թվականի մայիսի 26-ին որոշում է կայացվել Կարեն Պետրոսյանի նկատմամբ ամբուլատոր դատահոգեբուժական ամբուլատոր փորձաքննություն նշանակելու մասին:
2016 թվականի հուլիսի 12-ի որոշում է կայցվել Կարեն Պետրոսյանի նկատմամբ քրեական հետապնդում չիրականացնել մասին՝ նրա արարքում ՀՀ քրեական օրենսգրքի 235-րդ հոդվածի 4-րդ մասով նախատեսված հանցագործության հանցակազմի բացակայությամ հիմքով:
2016 թվականի ամբուլատոր դատահոգեբուժական փորձագիտական հանձնաժողովի թիվ 369/16 եզրակացություն համաձայն՝ « (...) Կարեն Ֆելիքսի Պետրոսյանը տառապում է «Օրգանական զառանցական խանգարում» հոգեկան հիվանդությամբ: Այդ մասին վկայում են ինչպես անամնեստիկ տեղեկությունները նախկինում հոգեբուժական ստացիոնար նրա հոսպիտալացման արդյունքների և Ավանի կլինիկայում հաշվառման վերցնելու մասին, այնպես էլ ներկա հետազոտման արդյունքները, որոնք թույլ տվեցին փորձաքննվողի մոտ հայտնաբերել լսողական ընկալման խանգարումներ, վերաբերման, հետապնդման, ազդեցության զառանցական մտքեր, մտածողության կտրտվածություն, անկապություն, պարալոգիզմ, դատարկաբանելու հակվածություն, դատողությունների անհեթեթություն, անհետևողականություն, հուզական ոլորտի անկայունություն, սեփական վիճակի նկատմամբ ունեցած քննադատության և սեփական գործողության հետևանքները կանխատեսելու ունակության բացակայություն, ինչը ինչպես իրավախախտումը կատարելու պահին, այնպես էլ ներկայումս զրկել է և զրկում է նրան իր գործողությունների բնույթն ու վտանգավորությունը գիտակցելու և դրանք ղեկավարելու հնարավորությունից: Ուստի Կարեն Ֆելիքսի Պետրոսյանին հարկ է ճանաչել կատարածի նկատմամբ ԱՆՄԵՂՍՈՒՆԱԿ: Հաշվի առնելով այն փաստը, որ իրավախախտումը կատարելուց հետո 22.03-19.04.2016թթ-ին «Ավան ՀԱԿ» ՓԲԸ-ում ստացած ստացիոնար բուժումից հետո փորձաքննվողի մոտ դեռևս հայտնաբերվում են վերը նշված հոգեախտաբանական սիմպտոմատիկան /լսողական ընկալման խանգարումներ, վերաբերման, հետապնդման, ազդեցության զառանցական մտքեր/, ինչպես նաև սեփական վիճակ նկատմամբ ունեցած քննադատության և սեփական գործողության հետևանքները կանխատեսելու, ունակության բացակայությունը, իր ներկա հոգեկան վիճակով Կարեն Ֆելիքսի Պետրոսյանը կարիք ունի հարկադիր բուժման ընդհանուր տիպի հոգեբուժական ստացիոնարի պայմաններում: Իր ներկա հոգեկան վիճակով նա չի կարող մասնակցել քննչական կամ դատավարական գործողություններին:»:
2016 թվականի հուլիսի 19-ի որոշմամբ որպես անմեղսունակության վիճակում քրեական օրենսգրքով չթույլատրված արարք կատարած Կարեն Ֆելիքսի Պետրոսյանի օրինական ներկայացուցիչ է ճանաչվել Մարիետա Խաչիկի Աբրահամյանը:
2016 թվականի հուլիսի 19-ի որոշմամբ անմեղսունակության վիճակում քրեական օրենսգրքով չթույլատրված արարք կատարած Կարեն Ֆելիքսի Պետրոսյանի նկատմամբ նախկինում կիրառված խափանման միջոց ստորագրությունը չհեռանալու մասին վերացվել է:
2016 թվականի հուլիսի 19-ի որոշում է կայացվել անմեղսունակության վիճակում քրեական օրենսգրքով չթույլատրված արարք կատարած Կարեն Ֆելիքսի Պետրոսյանի նկատմամբ բժշկական բնույթի հարկադրական միջոցներ կիրառելու վարույթ հարուցելու մասին:
2016 թվականի հուլիսի 20-ի որոշում է կայացվել անմեղսունակության վիճակում քրեական օրենքով չթույլատրված արարք կատարած Կարեն Ֆելիքսի Պետրոսյանին Նուբարաշեն հոգեբուժական հիվանդանոցի ընդհանուր հսկողության հոգեբուժական բաժանմունքում տեղավորելու համար թույլտվություն ստանալու մասին, որը նույն օրը հաստատել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի դատավոր Ա.Մաթևոսյանի կողմից:
2016 թվականի հուլիսի 20-ին անմեղսունակության վիճակում քրեական օրենքով չթույլատրված արարք կատարած Կարեն Ֆելիքսի Պետրոսյանն ընդունվել է «Նուբարաշեն հոգեբուժական կենտրոն» ՓԲԸ:
2016 թվականի հուլիսի 27-ին որոշում է կայացվել ՀՀ քրեական օրենսգրքի 137-րդ հոդվածի 1-ին մասով նախատեսված արարքն անմեղսունակ վիճակում կատարած Կարեն Ֆելիքսի Պետրոսյանի նկատմամբ բժշկական բնույթի հարկադրական միջոցներ կիրառելու համար գործը Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան ուղարկելու մասին:
2016 թվականի օգոստոսի 01-ին Երևան քաղաքի Արաբկիր և Քանաքեռ-Զեյթուն վարչական շրջաննորի դատախազության ավագ դատախազ Ա.Առաքելյանի որոշմամբ հաստատվել է Կարեն Ֆելիքսի Պետրոսյանի նկատմամբ բժշկական բնույթի հարկադրական միջոցներ կիրառելու համար գործը դատարան ուղարկելու մասին որոշումը:
Դատավորների միջև քրեական գործերի բաշխման էլեկտրոնային համակարգի միջոցով, Կարեն Ֆելիքսի Պետրոսյանի նկատմամբ բժշկական բնույթի հարկադրական միջոցներ կիրառելու գործը թիվ ԵԱՔԴ/0157/01/16 համարի ներքո, մակագրվել է դատավոր Ա. Մաթևոսյանին:
Դատավոր Ա. Մաթևոսյանի 2016 թվականի օգոստոսի 05-ի որոշմամբ թիվ ԵԱՔԴ/0157/01/16 քրեական գործը ընդունել է վարույթ և նույն թվականի օգոստոսի 19-ի որոշմամբ նշանակվել դատական քննության:

Ապացույցների հետազոտում և գնահատում.
Կարեն Ֆելիքսի Պետրոսյանի կողմից ՀՀ քրեական օրենսգրքի 137-րդ հոդվածի 1-ին մասով նախատեսված չթույլատրված արարք կատարելը հաստատվում է գործով ձեռք բերված և դատաքննությամբ հետազոտված հետևյալ ապացույցներով.
Տուժող Կարեն Արտավազդի Գրիգորյանի ցուցմունքով այն մասին, որ բնակվում է Երևան քաղաքի Շովրոյան փողոցի 14 շենքի 33 բնակարանում կնոջ` Գոհար Անդրիյանի և երկու անչափահաս երեխաների հետ միասին: 2016 թվականի մարտի 21-ին ժամը 19:30-ի սահմաններում ինքը կնոջ հետ երեխաներին կերպարվեստի դասերից տուն բերելուց է եղել, երբ մոտեցել են իրենց շենքին, մտել են շքամուտք, որից հետո վերելակով բարձրացել են 9-րդ հարկ` իրենց բնակարան: 8-րդ հարկում վերելակը կանգնացրել է իր հարևան Կարեն Պետրոսյանը, ով իր ձեռքում գտնվող քանոնանման գործիքով բացել է վերելակի դռները և մոտը գտնվող դանակով սպառնացել է Կարեն Գրիգորյանին, որ կսպանի նրան և մեղադրել իր բջջային հեռախոսները փչացնելու մեջ: Այդ ժամանակ ինքը տեսնելով, որ Կ.Պետրոսյանը չի հանդարտվում`ոտքով հրել է նրան և փակելով վերելակի դռները սեղմել է առաջին հարկի կոճակը ու իջել: Դուրս գալով վերելակից ինքը կնոջ և երեխաների հետ շտապել է դուրս գալ շենքից, սակայն լսելով Կ.Պետրոսյանի բղավոցը և ոտնաձայները, ով աստիճաններով իջնելուց է եղել, սպասել է շքամուտքում: Կ.Պետրոսյանը հասնելով 1-ին հարկ շարունակել է սպառնալ իրեն, որ կսպանի և շարունակել է մեղադրել նրան իր բջջային հեռախոսները փչացնելու մեջ: Այդ ժամանակ բղավոցները լսելով իր բնակարանից դուրս է եկել 1-ին հարկի բնակիչ Սեդրակ Երզնկյանը, ով հանդարտացրել է Կ.Պետրոսյանին և համոզել բարձրանա տուն, որից հետո Կ.Պետրոսյանը բարձրացել է տուն և կրկին իջել է 1-ին հարկ, սակայն առանց դանակի և շարունակել իր մեղադրանքները: Այդ ժամանակ ինքը զանգահարել է ոստիկանություն և հայտնել կատարածի մասին: Քիչ անց եկել են ոստիկանության աշխատակիցները և Կ.Պետրոսյանին տարել ոստիկանության Քանաքեռ-Զեյթունի բաժին: Կ.Գրիգորյանը հայտնել է, որ ինքը որևէ առնչություն չունի հեռախոսների հետ, երբևէ չի զբաղվել հեռախոսների վերանորոգմամբ: Կ.Պետրոսյանի սպառնալիքները ռեալ և իրական է ընդունել:Միևնույն ժամանակ հայտնել է, որ շուրջ երեք տարի առաջ իր բնակարանում կատարվել են շինարարական աշխատանքներ և պատահել է, երբ աշխատանքները շարունակվել են մինչև 22:30-ի սահմանները, ինչի արդյունքում աղմուկ է առաջացել: Սակայն առավոտյան ինքը Կ.Պետրոսյանից ներողություն է խնդրել, ինչին պատասխան վերջինս սկսել է գոռալ:
Վկա Գոհար Սերյանի Անդրիյանի ցուցմունքով այն մասին, որ բնակվում է Երևան քաղաքի Շովրոյանի փողոցի 14 շենքի 33 բնակարանում ամուսնու` Կարեն Գրիգորյանիև երկու անչափահաս երեխաների հետ միասին: 2016 թվականի մարտի 21-ին ժամը 19:30-ի սահմաններում ինքը ամուսնու հետ երեխաներին կերպարավեստի դասերից տուն բերելուց է եղել, երբ մոտեցել են իրենց շենքին, մտել են շքամուտք, որից հետո վերելակով բարձրացել են 9-րդ հարկ` իրենց բնակարան: 8-րդ հարկում վերելակը կանգնեցրել է իր հարևան Կարեն Պետրոսյանը, ով սկսել է սպառնալ ամուսնուն, ասելով, որ նա փչացնում է իր բջջային հեռախոսները: Նրա ձեռքին տեսել է ինչ-որ առարկա, ամուսնու խոսքերից հասկացել է, որ դանակ է: Այդ ժամանակ իր ամուսինը տեսնելով, որ Կ.Պետրոսյանը չի հանդարտվում` ոտքով հրել է նրան և փակելով վերելակի դռները սեղմել է առաջին հարկի կոճակն ու իջել: Դուրս գալով վերելակից իրենք երեխաների հետ շտապել են դուրս դալ շենքից, սակայն ամուսինը լսելով Կ.Պետրոսյանի բղավոցը և ոտնաձայները, ով աստիճաններով իջնելուց է եղել, սպասել է շքամուտքում: Կ.Պետրոսյանը հասնելով 1-ին հարկ շարունակել է սպառնալ իր ամուսնուն, որ կսպանի և շարունակել է մեղադրել իր բջջային հեռախոսները փչացնելու մեջ:Այդ ժամանակ բղավոցները լսելով իր բնակարանից դուրս է եկել 1-ին հարկի բնակիչ Սեդրակ Երզնկյանը, ով հանդարտացրել է Կ.Պետրոսյանին և համոզել բարձրանա տուն, որից հետո Կ.Պետրոսյանը բարձրացել է տուն և կրկին իջել 1-ին հարկ, սակայն առանց դանակի և շարունակել իր մեղադրանքները: Այդ ժամանակ իր ամուսինը զանգահարել է ոստիկանություն և հայտնել կատարվածի մասին: Քիչ անց եկել են ոստիկանության աշխատակիցները և Կ.Պետրոսյանին տարել ոստիկանության Քանաքեռ-Զեյթունի բաժին:
Վկա Սեդրակ Իշխանի Երզնկյանի ցուցմունքով այն մասին, որ բնակվում է Երևան քաղաքի Շովրոյան փողոցի 14 շենքի 1 բնակարանում` ընտանիքի հետ միասին: 2016 թվականի մարտի 21-ին ժամը 19:30-ի սահմաններում ինքը գտնվել է տանը, երբ առաջին հարկի շքամուտքից բղավոցներ է լսել ու դուրս եկել բնակարանից: Դուրս գալով շքամուտք ինքը տեսել է իր հարևան Կարեն Պետրոսյանին, ում ձեռքում միայն քանոնի նման առարկա է եղել: Կարեն Պետրոսյանը մեղադրել է Կարեն Գրիգորյանին իր բջջային հեռախոսները փչացնելու մեջ: Ինքն այդ ժամանակ հանդարտացրել է Կ.Պետրոսյանին և համոզել նրան բարձրանա տուն: Կ.Պետրոսյանը բարձրացել է տուն և կրկին իջել 1-ին հարկ, սակայն առանց դանակի և շարունակել իր մեղադրանքները: Քիչ անց եկել են ոստիկանության աշխատակիցները և Կ.Պետրոսյանին տարել ոստիկանության Քանաքեռ-Զեյթունի բաժին:
Մեղադրողի միջնորդությամբ դատական նիստի ընթացքում հրապարակվեց Սեդրակ Երզնկյանի նախաքննության ընթացքում տրված ցուցմունքի այն հատվածը, որի համաձայն վկան Կարեն Պետրոսյանի մի ձեռքում տեսել է դանակ, իսկ մյուս ձեռքում` քանոնանման առարկա: Առկա հակասությունների վերաբերյալ, վկան հայտնեց, որ նախաքննական ցուցմունքում չնայած գրել է, որ Կ.Պետրոսյանի մի ձեռքում տեսել է դանակ, իսկ մյուս ձեռքում` քանոնի նման առարկա, սակայն, միևնույն ժամանակ, նախաքննության ժամանակ ևս նշել է, որ այդ հանգամանքը հստակ չի հիշում:
Ներկայումս ևս պնդում է, որ հստակ չի հիշում, սակայն վստահ է, որ Կ.Պետրոսյանի ձեռքում տեսել է քանոնի նման առարկա:
Դատական քննության ընթացքում հետազոտված` Կ.Պետրոսյանի մոտից անձնական խուզարկությամբ հայտնաբերված և իրեղեն ապացույց ճանաչված դանակով:
2016 թվականի մարտի 21-ին Կարեն Գրիգորյանի կողմից տրված հաղորդման արձանագրությամբ այն մասին, որ` 2016 թվականի մարտի 21-ին ժամը 19:30-ի սահմաններում իրենց շենքի բնակիչ Կարեն Պետրոսյանը, ով ունի հոգեկան խնդիրներ խոհանոցային դանակով շենքի վերելակում իրեն տվել է սպանության սպառնալքներ, որից ինքը վախ է ապրել:

Դատարանի վերլուծությունները.

Դատարանը, վերլուծելով և համակցության մեջ գնահատելով գործով ձեռք բերված և դատաքննությամբ հետազոտված ապացույցները, հաստատված է համարում, որ Կարեն Ֆելիքսի Պետրոսյանը կատարել է քրեական օրենքով չթույլատրված արարք, որը համապատասխանում է ՀՀ քրեական օրենսգրքի 137-րդ հոդվածի 1-ին մասի հատկանիշներին:
ՀՀ քրեական օրենսգրքի 25-րդ հոդվածի համաձայն`
1. «Քրեական պատասխանատվության ենթակա չէ այն անձը, ով հանրության համար վտանգավոր արարք կատարելու պահին գտնվել է անմեղսունակության վիճակում, այսինքն` քրոնիկ հոգեկան հիվանդության, հոգեկան գործունեության ժամանակավոր խանգարման, տկարամտության կամ հոգեկան այլ հիվանդագին վիճակի հետևանքով չէր կարող գիտակցել իր գործողության (անգործության) վտանգավորությունը կամ ղեկավարել դա:
2. Հանրության համար վտանգավոր արարքն անմեղսունակության վիճակում կատարած անձի նկատմամբ դատարանը կարող է նշանակել բժշկական բնույթի հարկադրանքի միջոցներ: (...)»:
Նույն օրենսգրքի 97-րդ հոդվածի համաձայն`
1. «Բժշկական բնույթի հարկադրանքի միջոցներ դատարանը կարող է նշանակել այն անձի նկատմամբ`
1) ով սույն օրենսգրքի Հատուկ մասի հոդվածով նախատեսված արարքը կատարել է անմեղսունակության վիճակում.(...)
2. Բժշկական բնույթի հարկադրանքի միջոցները սույն հոդվածի առաջին մասում նշված անձանց նկատմամբ նշանակվում են միայն այն դեպքերում, երբ հոգեկան խանգարումները կապված են այդ անձանց կողմից այլ էական վնաս պատճառելու հնարավորության կամ իր կամ այլ անձանց համար վտանգավորության հետ: (...)»:
ՀՀ քրեական օրենսգրքի 98-րդ հոդվածի 1-ին մասի համաձայն`
1. Բժշկական բնույթի հարկադրանքի միջոցներ են՝
1) հոգեբույժի մոտ արտահիվանդանոցային հսկողությունը և հարկադիր բուժումը.
2) հոգեբուժական կազմակերպությունների ընդհանուր հսկողության հոգեբուժական բաժանմունքում հարկադիր բուժումը.
3) հոգեբուժական հիվանդանոցի հատուկ տիպի հոգեբուժական բաժանմունքում հարկադիր բուժումը:

ՀՀ քրեական օրենսգրքի 100-րդ հոդվածի 1-ին մասի համաձայն` «Հոգեբուժական կազմակերպությունների ընդհանուր հսկողության հոգեբուժական բաժանմունքում դատարանի որոշմամբ հարկադիր բուժում կարող է նշանակվել, եթե անձի հոգեկան խանգարման վիճակը պահանջում է բուժման, խնամքի և հսկողության այնպիսի պայմաններ, որոնք կարող են իրականացվել միայն հիվանդանոցային ձևով»:
ՀՀ քրեական դատավարության օրենսգրքի 463-րդ հոդվածի համաձայն`
«Գործով որոշում կայացնելիս դատարանը պետք է լուծի հետևյալ հարցերը`
1) կատարվել է արդյոք հանրորեն վտանգավոր արարք.
2) արարքը կատարել է արդյոք այն անձը, որի նկատմամբ իրականացվել է բժշկական բնույթի հարկադրական միջոցներ կիրառելու վարույթ.
3) արարքը կատարվել է արդյոք անմեղսունակության վիճակում, անձը գտնվում է արդյոք տվյալ վիճակում դատական քննության պահին.
4) անձը կարիք ունի արդյոք իր նկատմամբ բժշկական բնույթի հարկադրական միջոցներ կիրառելու և հատկապես ինչպիսի միջոցներ»:
ՀՀ քրեական դատավարության օրենսգրքի 464-րդ հոդվածի 1-ին մասի համաձայն`
«Անձի կողմից քրեական օրենքով չթույլատրված արարքն անմեղսունակության վիճակում կատարելն ապացուցված համարելով` դատարանը որոշում է կայացնում անձին քրեական պատասխանատվությունից և պատժից ազատելու ու նրա նկատմամբ բժշկական բնույթի հարկադրական միջոցներ կիրառելու մասին»:
Դատարանը գտնում է, որ հանրության համար վտանգավոր վերը նշված արարքը կատարելու պահին Կարեն Ֆելիքսի Պետրոսյանը գտնվել է անմեղuունակության վիճակում և նրա նկատմամբ պետք է նշանակվի բժշկական բնույթի հարկադրանքի միջոց, նկատի ունենալով, որ ներկա հոգեկան վիճակով նա վտանգ է ներկայացնում իր և շրջապատի համար, կարիք ունի հարկադիր բուժման ընդհանուր տիպի հոգեբուժական ստացիոնարի պայմաններում:
ՀՀ քրեական օրենսգրքի 101-րդ հոդվածի համաձայն` Կարեն Պետրոսյանի նկատմամբ բժշկական բնույթի հարկադրանքի միջոց նշանակելիս դատարանը հաշվի է առնում նրա հոգեկան հիվանդությունը, նրա կատարած արարքի բնույթն ու հանրության համար վտանգավորության աստիճանը, և նկատի ունենալով ամբուլատոր դատահոգեբուժական փորձաքննության թիվ 369/16 եզրակացությունը և ՀՀ քրեական օրենսգրքի 98-րդ հոդվածով ու 100-րդ հոդվածի 1-ին մասով սահմանված նորմերը, գտնում է, որ նա պետք է ազատվի ՀՀ քրեական օրենսգրքի 137-րդ հոդվածի 1-ին մասով նախատեսված պատասխանատվությունից ու պատժից, և նրա նկատմամբ պետք է նշանակվի հարկադիր բուժում` հոգեբուժական կազմակերպությունների ընդհանուր հսկողության հոգեբուժական բաժանմունքում, քանի որ նա կարող է վտանգ ներկայացնել իր և շրջապատի համար:
Քննարկելով իրեղեն ապացույցների տնօրինման հարցը` Դատարանը գտնում է, որ որոշման օրինական ուժի մեջ մտնելուց հետո, Կարեն Պետրոսյանի մոտից խուզարկությամբ հայտնաբերված դանակը պետք է ոչնչացնել:
Քննարկելով Կ.Պետրոսյանի նկատմամբ կիրառված անվտանգության միջոցի հարցը` Դատարանը գտնում է, որ այն պետք է թողնել անփոփոխ մինչև որոշման օրինական ուժի մեջ մտնելը:
Վերոգրյալների հիման վրա և ղեկավարվելով ՀՀ քրեական դատավարության օրենսգրքի 462-464-րդ հոդվածներով` դատարանը

Ո Ր Ո Շ Ե Ց

Անմեղսունակ վիճակում քրեական օրենքով չթույլատրված արարք կատարած անձ` Կարեն Ֆելիքսի Պետրոսյանին ազատել քրեական պատասխանատվությունից և պատժից:
Կարեն Ֆելիքսի Պետրոսյանի նկատմամբ կիրառել բժշկական բնույթի հարկադրանքի միջոց` հոգեբուժական կազմակերպությունների ընդհանուր հսկողության հոգեբուժական բաժանմունքում հարկադիր բուժում:
Կարեն Ֆելիքսի Պետրոսյանի նկատմամբ կիրառված անվտանգության միջոցը`հոգեբուժական հիվանդանոցում տեղավորելը, թողնել անփոփոխ մինչև որոշման օրինական ուժի մեջ մտնելը:
Որոշումն օրինական ուժի մեջ մտնելուց հետո իրեղեն ապացույց ճանաչված`Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյաի դատարանում գտնվող` Կարեն Ֆելիքսի Պետրոսյանի մոտից խուզարկությամբ հայտնաբերված դանակը` ոչնչացնել:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:




ԴԱՏԱՎՈՐ` Ա. ՄԱԹԵՎՈՍՅԱՆ