Ո Ր Ո Շ Ո Ւ Մ ԵԱՔԴ/0156/01/16
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՔՐԵԱԿԱՆ ԳՈՐԾԻ ՎԱՐՈՒՅԹԸ
ԿԱՐՃԵԼՈՒ ՎԵՐԱԲԵՐՅԱԼ ՄԻՋՆՈՐԴՈՒԹՅՈՒՆԸ ՔՆՆՈՒԹՅԱՆ ԱՌՆԵԼՈՒ ՄԱՍԻՆ

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը հետևյալ կազմով

Նախագահությամբ դատավոր Դ. Գրիգորյան
քարտուղարությամբ` Գ.Վարդանյանի
Մասնակցությամբ`
մեղադրող` Կ.Բարսեղյանի
պաշտպան` Ռ.Սիրեկանյանի
տուժող` Է.Աթուֆիի
տուժող ներկայացուցիչ` Ա.Սահակյանի
թարգմանիչ` Հ.Հախմասյանի

Դռնբաց դատական նիստում 2016 թվականի հոկտեմբերի 31-ին, Երևան քաղաքում, քննության առնելով քրեական գործով, ըստ մեղադրանքի Մոհսեն Ալիռեզայի Բախշիանի՝ ՀՀ քրեական օրենսգրքի 113-րդ հոդվածի 2-րդ մասի 6-րդ կետով, ամբաստանյալ Մ.Բախշիանի պաշտպան Ռ.Սիրեկանյանի կողմից ներկայացված միջնորդությունը` գործուն զղջալու հիմքով իր պաշտպանյալ Մոհսեն Ալիռեզայի Բախշիանի նկատմամբ քրեական հետապնդումը դադարեցնելու և քրեական գործի վարույթը կարճելու մասին,

Պ Ա Ր Զ Ե Ց

ՀՀ ՔԿ Երևան քաղաքի քննչական վարչության Արաբկիր վարչական շրջանի քննչական բաժնի ավագ քննիչ Լ.Յոլչյանի 2016 թվականի մարտի 21-ի որոշմամբ ՀՀ քրեական օրենսգրքի 113-րդ հոդվածի 2-րդ մասի 6-րդ կետի հատկանիշներով հարուցվել է թիվ 14115816 քրեական գործը:
Նախաքննության մարմնի կողմից ամբաստանյալ Մոհսեն Ալիռեզայի Բախշիանին 2016 թվականի մայիսի 12-ին մեղադրանք է առաջադրվել ՀՀ քրեական օրենսգրքի 113-րդ հոդվածի 2-րդ մասի 6-րդ կետով այն բանի համար, որ նա 2016 թվականի մարտի 2-ի ժամը 21-ի սահմաններում Երևան քաղաքի Արաբկիր 53 փողոցի 2-րդ տան դիմաց, հասարակական կարգի նկատմամբ անհարգալից վերաբերմունք դրսևորելով, չնչին առիթով վիճաբանել է ԻԻՀ քաղաքացի Էրֆան Ռեզայի Աթուֆիի հետ, որի ընթացքում մեկ անգամ բռունցքով հարվածել է վերջինիս դեմքին և 2 անգամ ապտակել` պատճառելով առողջությանը միջին ծանրության վնաս, առողջության տևական քայքայումով:
Ամբաստանյալ Մոհսեն Ալիռեզայի Բախշիանի նկատմամբ որպես խափանման միջոց է կիրառվել չհեռանալու մասին ստորագրությունը:
Քրեական գործը մեղադրական եզրակացությամբ 2016 թվականի օգոստոսի 1-ին ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2016 թվականի հոկտեմբերի 31-ի դատական նիստի ընթացքում ամբաստանյալ Մոհսեն Ալիռեզային Բախշիանի պաշտպան Ռ.Սիրեկանյանը միջնորդություն է ներկայացրել դատարան և խնդրել գործուն զղջալու հիմքով իր պաշտպանյալի նկատմամբ քրեական հետապնդումը դադարեցնելու և քրեական գործի վարույթը կարճելու:
Ամբաստանյալ Մոհսեն Բախշիանը միացավ պաշտպանի միջնորդությանը:
Մեղադրող Կ.Բարսեղյանը, տուժող Է.Աթուֆին և տուժող ներկայացուցիչ Ա.Սահակյան չառարկեցին միջնորդության դեմ:
ՀՀ քրեական դատավարության օրենսգրքի 37-րդ հոդվածի 1-ին մասի համաձայն դատարանը, դատախազը, ինչպես նաև դատախազի համաձայնությամբ՝ քննիչը կարող են հարուցված քրեական գործի վարույթը կարճել և քրեական հետապնդումը դադարեցնել Հայաստանի Հանրապետության քրեական օրենսգրքի 72-րդ, 73-րդ և 74-րդ հոդվածներով նախատեսված դեպքերում։
ՀՀ քրեական օրենսգրքի 72-րդ հոդվածի 1-ին մասի համաձայն առաջին անգամ ոչ մեծ ծանրության կամ միջին ծանրության հանցանք կատարած անձը կարող է ազատվել քրեական պատասխանատվությունից, եթե նա հանցանք կատարելուց հետո կամովին ներկայացել է մեղայականով, աջակցել է հանցագործությունը բացահայտելուն, հատուցել կամ այլ կերպ հարթել է հանցագործությամբ պատճառված վնասը:
ՀՀ քրեական օրենսգրքի 19-րդ հոդվածի 1-ին մասի 3-րդ կետի համաձայն միջին ծանրության հանցագործություններ են համարվում դիտավորությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում հինգ տարի ժամկետով ազատազրկումը, ինչպես նաև անզգուշությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում տասը տարի ժամկետով ազատազրկումը:
Այսպիսով, դատարանը գտնում է, որ քրեական գործով ձեռք բերված ապացույցներով հիմնավորվել է, որ Մոհսեն Ալիռեզայի Բախշիանը կատարել է ՀՀ քրեական օրենսգրքի 113-րդ հոդվածի 2-րդ մասի 6-րդ կետով նախատեսված հանցավոր արարք, որը ՀՀ քրեական օրենսգրքի 19-րդ հոդվածի համաձայն հանդիսանում է միջին ծանրության հանցանք, իսկ նույն օրենսգրքի 72-րդ հոդվածի համաձայն առաջին անգամ ոչ մեծ և միջին ծանրության հանցանք կատարած անձը կարող է ազատվել քրեական պատասխանատվությունից, եթե աջակցել է հանցագործությունը բացահայտելուն, զղջացել է իր կողմից կատարած արարքի համար, որպիսի հանգմանքն առկա է տվյալ դեպքում: Բացի այդ, դատարանը հաշվի է առնում նաև Մ.Բախշիանի տարիքը, հանցագործության կատարման շարժառիթը և նպատակահարմար է գտնում Մոհսեն Ալիռեզայի Բախշիանի նկատմամբ քրեական հետապնդումը դադարեցնել և քրեական գործի վարույթը կարճել` գործուն զղջալու հիմքով:
Անդրադառնալով Մոհսեն Ալիռեզայի Բախշիանի նկատմամբ կիրառված խափանման միջոց չհեռանալու մասին ստորագրության հարցին Դատարանը գտնում է, որ ՀՀ քրեական դատավարության օրենսգրքի 151-րդ հոդվածի 2-րդ մասի հիմքով` այն պետք է վերացնել:
Դատարանն արձանագրում է, որ ամբաստանյալ Մոհսեն Ալիռեզայի Բախշիանի դեմ քաղաքացիական հայց չի ներկայացվել, նրա գույքի վրա արգելանք չի կիրառվել, իրեղեն ապացույցներ և դատական ծախսեր չկան:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 37-րդ, 41-րդ, 379-րդ, 427-րդ հոդվածներով դատարանը,

Ո Ր Ո Շ Ե Ց
Ամբաստանյալ Մոհսեն Ալիռեզայի Բախշիանի պաշտպան Ռ.Սիրեկանյանի միջնորդությունը բավարարել և Մոհսեն Ալիռեզայի Բախշիանի (ծնված 1999 թվականի փետրվարի 2-ին, Իրանի Իսլամական Հանրապետության Աբադե քաղաքում, ազգությամբ պարսիկ, ԻԻՀ քաղաքացի, սովորում է Շահիդ Վահմիդեի ավագ դպրոցի 12-րդ դասարանում, հաշվառված է ԻԻՀ, ք. Իսպահան պ. 8-րդ Բեհեղթ պողոտա, մոջթամեյե Բոզորգե Նարվանե 36, փաստացի բնակվում է ՀՀ, ք.Երևան, Նոր Նորքի 4-րդ զանգված, Ավետիսյան 10 տուն) նկատմամբ ՀՀ քրեական օրենսգրքի 113-րդ հոդվածի 2-րդ մասի 6-րդ կետով քրեական հետապնդումը դադարեցնել և քրեական գործի վարույթը կարճել` գործուն զղջալու հիմքով:
Մոհսեն Ալիռեզայի Բախշիանի նկատմամբ կիրառված խափանման միջոց չհեռանալու մասին ստորագրությունը վերացնել:
Որոշումը կարող է բողոքարկվել ՀՀ քրեական վերաքննիչ դատարան հրապարակման պահից մեկամսյա ժամկետում:



ԴԱՏԱՎՈՐ` Դ. ԳՐԻԳՈՐՅԱՆ