Գործ No ԵԱՔԴ/0046/01/16

ԴԱՏԱՎՃԻՌ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՙ14՚ հուլիսի 2016 թվական քաղաք Երևան

Երևան քաղաքի Արաբկիր և Քանաքեռ-Զեյթուն վարչական շրջանների առաջին ատյանի ընդհանուր իրավասության դատարանը,

նախագահությամբ` դատավոր Արթուր Մկրտչյանի
քարտուղարությամբ` Միլենա Սարգսյանի
մասնակցությամբ`
մեղադրող Կարեն Բարսեղյանի
պաշտպան Մարինե Ֆարմանյանի
տուժող Էդգար Բարեղամյանի

դատարանում, դռնբաց դատական նիստում քննեց քրեական գործն ըստ մեղադրանքի Լևոն Լևոնի Բազինյանի /ծնված 1991 թվականի հունվարի 24-ին` Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, չի աշխատում, դատվածություն չունեցող, հաշվառված և բնակվող` քաղաք Երևան, Նոր Նորք, Բակունցի փողոց, 9-րդ շենք, 2-րդ բնակարան/ մեղադրվում է ՀՀ քրեական օրենսգրքի 178-րդ հոդվածի 2-րդ մասի 2-րդ կետով և 176-րդ հոդվածի 2-րդ մասի 1-ին, 2-րդ և 4-րդ կետերով:

Գործի դատավարական նախապատմությունը

2013 թվականի սեպտեմբերի 20-ին ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում ՀՀ քրեական օրենսգրքի 178-րդ հոդվածի 2-րդ մասի 2-րդ կետով հարուցվել է թիվ 13805013 քրեական գործը:
2014 թվականի մայիսի 16-ին Լևոն Բազինյանն ինքնակամ ներկայացել է ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժին:
2014 թվականի մայիսի 16-ին Լևոն Բազինյանը ձերբակալվել է:
2014 թվականի մայիսի 19-ին Լևոն Բազինյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով և նրա նկատմամբ որպես խափանման միջոց է կիրառվել ստորագրություն` չհեռանալու մասին:
2014 թվականի հոկտեմբերի 01-ին Լևոն Բազինյանի նկատմամբ ընտված խափանման միջոցը փոփոխվել է և որպես խափանման միջոց է կիրառվել կալանավորումը:
2014 թվականի հոկտեմբերի 01-ին Լևոն Բազինյանի նկատմամբ հայտարարվել է հետախուզում:
2014 թվականի նոյեմբերի 17-ին թիվ 13805013 քրեական գործով վարույթը կասեցվել է:
2014 թվականի հունիսի 24-ին ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթուն քննչական բաժնում ՀՀ քրեական օրենսգրքի 176-րդ հոդվածի 2-րդ մասի 4-րդ կետով հարուցվել է թիվ 09118814 քրեական գործը:
2014 թվականի նոյեմբերի 17-ին Լևոն Բազինյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքիի 176-րդ հոդվածի 2-րդ մասի 1-ին, 2-րդ և 4-րդ կետերով, նրա նկատմամբ որպես խափանման միջոց է կիրառվել ստորագրություն` չհեռանալու մասին և հայտարարվել է հետախուզում:
2014 թվականի դեկտեմբերի 17-ին թիվ 09118814 քրեական գործից անջատվել է Լևոն Բազինյանի վերաբերյալ մասը և դրան շնորհվել է թիվ 09118814/1 համարը:
2014 թվականի դեկտեմբերի 24-ին թիվ 09118814/1 քրեական գործով վարույթը կասեցվել է:
2016 թվականի փետրվարի 04-ին թիվ 13805013 քրեական գործն ընդունվել է ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնի վարույթ, թիվ 091118814/1 քրեական գործի կասեցված վարույթը վերսկսվել է և թիվ 13805013 քրեական գործը միացվել է թիվ 09118814/1 քրեական գործին:
2016 թվականի փետրվարի 05-ին Լևոն Բազինյանին առաջադրված մեղադրանքը փոփոխվել, լրացվել է և նրան նոր մեղադրանք է առաջադրվել ՀՀ քրեական օրենսգրքի 176-րդ հոդվածի 2-րդ մասի 1-ին, 2-րդ և 4-րդ կետերով, 178-րդ հոդվածի 2-րդ մասի 1-ին և 2-րդ կետերով և 178-րդ հոդվածի 2-րդ մասի 2-րդ կետով: Նույն օրը Լևոն Բազինյանը ներգրավվել է որպես մեղադրյալ:
2016 թվականի փետրվարի 06-ին Լևոն Բազինյանի նկատմամբ որպես խափանման միջոց է կիրառվել կալանավորումը` կալանքի սկիզբը հաշվելով 2016 թվականի փետրվարի 04-ից:
2016 թվականի մարտի 12-ին Լևոն Բազինյանի նկատմամբ խարդախության երկու դրվագներով` ՀՀ քրեական օրենսգրքի 178-րդ հոդվածի 2-րդ մասի 1-ին և 2-րդ կետերով քրեական հետապնդումը դադարեցվել է:
2016 թվականի մարտի 12-ին Լևոն Բազինյանի վերաբերյալ գործն անջատվել է թիվ 09118814/1 քրեական գործից և անջատված մասին շնորհվել է թիվ 09107516 համարը:
2016 թվականի մարտի 12-ին Լևոն Բազինյանին առաջադրված մեղադրանքը փոփոխվել է և նրան նոր մեղադրանք է առաջադրվել ՀՀ քրեական օրենսգրքի 176-րդ հոդվածի 2-րդ մասի 1-ին, 2-րդ և 4-րդ կետերով և 178-րդ հոդվածի 2-րդ մասի 2-րդ կետով: Նույն օրը Լևոն Բազինյանը ներգրավվել է որպես մեղադրյալ:
2016 թվականի մարտի 18-ին թիվ 09107516 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների առաջին ատյանի ընդհանուր իրավասության դատարան:

Գործի փաստական հանգամանքները

Նախաքննության մարմինն ամբաստանյալ Լևոն Բազինյանին ՀՀ քրեական օրենսգրքի 178-րդ հոդվածի 2-րդ մասի 2-րդ կետով և 176-րդ հոդվածի 2-րդ մասի 1-ին, 2-րդ և 4-րդ կետերով մեղադրանք է առաջադրել, որ ՙչարաշահելով Արմեն Վարդգեսի Թաթոսյանի վստահությունը Երևան քաղաքի Աբովյան 37 հասցեում գործող ՙՖաստ-Կրեդիտ՚ վարկային կազմակերպությունում գրավադրված, 801.060 ՀՀ դրամ ընդհանուր արժողության ոսկյա զարդերը գրավից հանելու և վերջինիս վաճառելու պատրվակով, 2013թ. սեպտեմբերի 10-ին, ՙՖաստ-Կրեդիտ՚ վարկային կազմակերպությունում Ա. Թաթոսյանի կողմից վճարված 801.060 ՀՀ դրամի դիմաց, ոսկյա զարդերը գրավադրումից հանելուց հետո, չի տրամադրել նրան և խաբեությամբ տիրացել է Ա.Թաթոսյանին պատկանող խոշոր չափի` 801.060 ՀՀ դրամ գումարին:
Բացի այդ, Լևոն Լևոնի Բազինյանը նախնական համաձայնության գալով Գարիկ Միշայի Դավոյանի հետ` ուրիշի գույքի բացահայտ հափշտակություն կատարելու դիտավորությամբ, 2014 թվականի հունիսի 24-ին` ժամը 13:30-ի սահմաններում, Երևան քաղաքի թիվ 127 դպրոցի մոտ, կյանքի կամ առողջության համար ոչ վտանգավոր բռնություն գործադրելով` ձեռքերով հարվածներ են հասցրել Էդգար Արմենակի Բարեղամյանի գխին` պատճառելով առողջությանը թեթև վնասի հատկանիշներ չպարունակող մարմնական վնասվածք, այնուհետև պարանոցից բացահայտ հափշտակելով խոշոր չափի 550.000 ՀՀ դրամ արժողության ոսկյա շղթան` դիմել են փախուստի:՚:

Ապացույցների հետազոտում

Առաջադրված մեղադրանքում ամբաստանյալ Լևոն Լևոնի Բազինյանն իրեն լիովին մեղավոր է ճանաչել և դատաքննության փուլում, օգտվելով իր սահմանադրական իրավունքից, հրաժարվել է ցուցմունք տալուց: Միայն նշել է, որ հանցագործության հետևանքով տուժողներին պատճառված վնասներն ամբողջությամբ հատուցել է:
Նախաքննության փուլում Լևոն Բազինյանը ցուցմունք է տվել որ, 2013թ. օգոստոսին իր ծանոթ Սաթիկ Մարտիրոսյանին խնդրել է, որ նրա անձնագրով ոսկյա զարդեր գրավադնի և միասին գնացել են Երևան քաղաքի Աբովյան փողոցում գտնվող ՙՖաստ Կրեդիտ՚ գրավատուն, որտեղ գրավադրել են ոսկյա զարդերը: Այնուհետև նույն թվականի սեպտեմբեր ամսին ցանկացել է գրավադրված ոսկյա զարդերը վաճառել:Այդ նպատակով ընկերոջ` Միասնիկ Խաչատրյանի հետ միասին գնացել են Երևան քաղաքի Խորենացի փողոցում գործող ոսկու տոնավաճառ, որտեղ նախկինում իրեն անծանոթ` Արմեն Թաթոսյանին առաջարկել է գնելու նշված ոսկյա զարդերը` 850.000 ՀՀ դրամով` նրան ասելով, որ այդ գումարից 801.000 ՀՀ դրամը պետք է նախապես վճարի գրավատանը` զարդերը գրավադրումից հանելու համար: Վերջինս համաձայնվել է և միասին գնալով Երևան քաղաքի Աբովյան 37 հասցեում գործող «Ֆաս-Կրեդիտե գրավատուն, Արմեն Թաթոսյանը այնտեղ վճարել է 801.000 ՀՀ դրամ, գրավադրված ոսկյա զարդերի դիմաց: Այնուհետև, գրավատան աշխատակիցները հայտնել են, որ գրավադրված ոսկյա զարդերը վերադարձնելու համար պետք է գրավատուն անձնագրով ներկայանա` Սաթիկ Մարտիրոսյանը: Դրանից հետո ինքը զանգահարել է վերջինիս և խնդրել, որ անձնագրով մոտենա գրավատուն` ոսկյա զարդերը գրավադրումից հանելու համար, իսկ ինքն ընկերոջ հետ դուրս են եկել գրավատան դիմաց ու սպասել նրան: Դրանից հետո, ընկերոջ` Միասնիկ Խաչատրյանի հետ միասին գնացել են գրավատան մոտակայքում գտնվող գետնացում` իր բջջային հեռախոսը վերանորոգելու համար, իսկ Արմեն Թաթոսյանն իրենց սպասել է գրավատան դիմաց: Գետնանցումում իրեն է զանգահարել Սաթիկ Մարտիրոսյանը և հայտնել, որ գրավատան դիմացն է, իսկ ինքը նրան հայտնել է, որ գրավադրված զարդերի գումարը վճարված է և խնդրել է, որ ոսկյա զարդերը ստանա, մինչև ինքը կմոտենա: Այնուհետև, մի քանի րոպե անց Սաթիկ Մարտիրոսյանը կրկին զանգահարել և հայտնել է, որ գրավադրված զարդերը ստացել է: Այդ ժամանակ ինքը մտածելով, որ կարող է գրավից հանված ոսկյա զարդերը չտրամադրել Արմեն Թաթոսյանին, որոշել է դրանք վերցնել և ավելի բարձր գնով վաճառել մեկ այլ անձի ու այդ նպատակով Սաթիկ Մարտիրոսյանին խնդրել է, որ նա մոտենա գետնանցումին, որտեղ գտնվել է ինքը: Սաթիկ Մարտիրոսյանը որդու` Էդգար Մարտիրոսյանի հետ մոտենալով գետնացումին, նշված ոսկյա զարդերը տվել է իրեն և հեռացել: Երբ Սաթիկ Մարտիրոսյանից ինքը վերցրել է ոսկյա զարդերը, Միասնիկ Խաչատրյանը այտեղ չի գտնվել, իսկ իր մտադրությունների մասին ինչպես իր ընկերը, այնպես էլ Սաթիկ Մարտիրոսյանը, չեն իմացել:Այնուհետև, նշված ոսկյա զարդերը Երևանի Խորենացի փողոցում գտնվող ոսկու տոնավաճառում վաճառել է անծանոթ մի տղայի: Հայտնել է, որ ինքը խարդախություն կատարելու նպատակ և Արմեն Թաթոսյանին գումարը չվերադարձնելու դիտավորություն, չի ունեցել:
Հատոր 2 գ/թ 179-183, 193-194
Հատոր 3 գ/թ 35, 129-130

Ամբաստանյալ Լևոն Բազինյանին մեղսագրվող արարքները հիմնավորվել են նաև դատաքննությամբ հետազոտված հետևյալ ապացույցներով.

Տուժող Էդգար Բարեղամյանը դատաքննության փուլում ցուցմունք է տվել, որ 2014թ. հունիսի 24-ին` առավոտյան ժամը 11-ի սահմաններում Երևան քաղաքի Պ.Սևակ փողոցով քայլելով գնացել է դեպի թիվ 127 դպրոց: Չհասած Պ.Սևակ և Կ.Ուլնեցի փողոցների խաչմերուկ` իրեն է մոտեցել մի երիտասարդ, հարցրել, թե որտեղ է ինքը բնակվում, ապա նաև հարցրել, թե ճանաչում է Հոսո անունով անձնավորության, որին ինքը պատասխանել է, որ չի ճանաչում, այնուհետև շարունակել է ճանապարհը: Ժամը 13:00-ի սամաններում, երբ քննություններն ավարտվելուց հետո համադասարանցիների հետ կանգնած է եղել դպրոցի բակում, իրեն կանչել է Գարիկ Դավոյանը և սկսել է ինչ-որ աղջիկների վերաբերյալ իրեն հարցեր տալ, ապա երկուսով քայլել են դեպի դպրոցի հետնամաս: Հասնելով այդտեղ` տեսել է դպրոցի անկյունային մասում կանգնած Լևոն Բազինյանին, ով նույնպես Գարիկ Դավոյանի հետ սկսել է իրեն կրկին աղջիկների վերաբերյալ հարցեր տալ: Ինքը նրանց հարցերին պատասխանելով, որ աղջիկներից որևէ մեկին չի ճանաչում, հրաժեշտ է տվել նրանց և շրջվել, որ գնա: Դրանից հետո Գարիկ Դավոյանն ու Լևոն Բազինյանն իր գլխի շրջանում ձեռքերով հարվածներ են հասցրել, որի ընթացքում իր պարանոցից հափշտակել են ոսկյա շղթան և դիմել փախուստի:
Տուժողը հայտնել է, որ իր ոսկյա շղթան ունեցել է խորանարդաձև հյուսվածք, մոտ 48-50 գրամ քաշ, 585 հարգի և այն ձեռք է բերել 550.000 ՀՀ դրամով, իր հետ կատարված դեպքից մոտ երկու ամիս առաջ: Միաժամանակ տուժողը նշել է, որ իրեն պատճառված գույքային վնասն ամբողջությամբ հատուցվել է և ամբաստանյալ Լևոն Բազինյանից որևէ բողոք կամ վնասի հատուցման պահանջ չունի:

Տուժող Արմեն Թաթոսյանը նախաքննության փուլում ցուցմունք է տվել, որ աշխատում է Խորենացի 24 հասցեում գործող ՙՈսկու Աշխարհ՚ տոնավաճառում: 2013թ. սեպտեմբերի 10-ին իր տաղավար են այցելել երկու անծանոթ երիտասարդներ և նրանցից մեկը հայտնել է, որ գրավատանը 801.000 ՀՀ դրամ արժողությամբ գրավադրված ոսկյա զարդեր ունի, որոնք ցանկանում է վաճառել: Պայմանավորվածության համաձայն նշված ոսկյա զարդերն ինքը ցանկացել է գնել երեկոյան` աշխատանքի ավարտից հետո: Այնուհետև, նշված երիտասարդը զանգահարել է 099-17-80-42 հեռախոսահամարից և միասին գնացել են Աբովյան 37 հասցեում գործող ՙՖաստ-Կրեդիտ՚ գրավատուն, որտեղ ինքը վճարել է 801.060 ՀՀ դրամ, գրավադրված ոսկյա զարդերի դիմաց: Դրանից հետո տեղեկացել է, որ ոսկյա զարդերը գրավադրված են Սաթիկ Մարտիրոսյանի անվամբ և առանց վերջինիս ներկայության հնարավոր չէ դրանք ստանալ, սակայն նշված երիտասարդն իրեն հայտնել է, որ զարդերը գրավադրված են իր մորաքրոջ անունով, մի քանի րոպեից իր մորոքույրը կգա և նշված զարդերը կվերցնեն: Դուրս են եկել գրավատան դիմաց սպասելու, սակայն երիտասարդները հեռացել են ասելով կվերադառնան մի քանի րոպեից: Այնուհետև, մոտ երկու ժամ սպասել է գրավատան դիմաց, սակայն նրանք չեն եկել, որից հետո գրավատան աշխատակիցներից տեղեկացել է, որ նշված զարդերը ստացել է Սաթիկ Մարտիրոսյանը մի երիտասարդ տղայի հետ և հեռացել են:
Արմեն Թաթոսյանն իր ցուցմունքում նշել է նաև, որ Լևոն Բազինյանի հարազատների կողմից իրեն պատճառված 800.000 ՀՀ դրամն ամբողջությամբ հատուցվել է:
Հատոր 2 գ/թ 3-4, 12, 61-63, 168-169

Վկա Սեդա Բազինյանը դատաքննության փուլում ցուցմունք է տվել, որ Լևոն Բազինյանի հորաքույրն է: 2014թ. մայիս ամսին վերջինս զանգահարել է իրեն և ասել, որ գումար է անհրաժեշտ, քանի որ Արմեն Թաթոսյանին 800,000 ՀՀ դրամ գումար է պարտք և ամաչում է անձամբ նրան վերադարձնել այդ գումարը, քանի որ ոսկյա զարդերը վաճառել է և գումարը չի փոխանցել նրան: Իրեն տվել է Արմեն Թաթոսյանի բջջային հեռախոսահամարը, ապա ինքը զանգահարել է վերջինիս, հրավիրել իր տուն և նրան փոխանցել 800.000 ՀՀ դրամ գումարը:

Վկա Սաթիկ Մարտիրոսյանը նախաքննության փուլում ցուցմունք է տվել, որ 2013թ. օգոստոսին իրենց հարևան Լևոն Բազինյանը դիմել է իրեն և խնդրել, որ իր անձնագրով ոսկյա զարդեր գրավադնի, ինքը չի մերժել: Միասին գնացել են Երևան քաղաքի Աբովյան փողոցում գտնվող ՙՖաստ Կրեդիտ՚ գրավատուն, որտեղ Լ.Բազինյանն իր անձնագրով գրավադրել է ոսկյա զարդերը և դրա դիմաց ստացել շուրջ 700.000 ՀՀ դրամ գումար: Այնուհետև, 2013 թվականի սեպտեմբեր ամսին Լևոնը զանգահարել և ասել է, որ կարող են զարդերը գրավադրումից հանել: Ինքը որդու` Էդգար Մարտիրոսյանի հետ միասին գնացել է նշված գրավատուն, որտեղ Լևոն Բազինյանն իրեն է տվել 760.000 ՀՀ դրամ գումար, ինքն այդ գումարը վճարել և ստացել է գրավադրված ոսկյա զարդերը, որոնք էլ գրավատան մոտակայքում փոխանցել է Լևոնին, որից հետո որդու հետ միասին գնացել են տուն: Վկան նշել է, որ որքանով նկատել է` գրավադրված զարդերը կանացի զարդեր էին: Ինքը չգիտի, թե Լևոնը զարդերը որտեղից էր ձեռք բերել: Զարդերը Լևոնին տալուց հետո տեսել է, որ նրան երկու երիտասարդ տղաներ են սպասել, որոնց ինքը չի ճանաչում:
Հատոր 2 գ/թ 138-142, 223-225

Վկա Միասնիկ Խաչատրյանը նախաքննության փուլում ցուցմունք է տվել, որ 2013թ. սեպտեմբեր ամսին ընկերոջ` Լևոն Բազինյանի խնդրանքով նրա հետ գնացել է Երևան քաղաքի Խորենացի փողոցում գործող ոսկու տոնավաճառ, որտեղ վերջինս Արմեն Թաթոսյանի հետ պայմանավորվել է գրավադրված ոսկյա զարդերը նրան վաճառելու շուրջ: Այնուհետև, երեքով գնացել են Երևան քաղաքի Աբովյան 37 հասցեում գործող ՙՖաստ-Կրեդիտ՚ գրավատուն, որտեղ ինքը սպասել է դրսում, իսկ նրանք մտնելով գրավատուն վճարել են գրավադրված զարդերի համար և դուրս եկել ու սպասել են Սաթիկ Մարտիրոսյանին: Դրանից հետո Լևոն Բազինյանի հետ գնացել է գրավատան մոտակայքում գտնվող գետնացում, վերջինիս բջջային հեռախոսը վերանորոգելու նպատակով, իսկ Արմեն Թաթոսյանը սպասել է գրավատան դիմաց: Հասնելով գետնանցում` ինքը հրաժեշտ է տվել Լևոնին և գնացել իր անձնական գործերով: Դեպքի մասին որևէ տեղեկություն չունի:
Հատոր 2 գ/թ 220-222, 269-270

Վկա Արմենակ Բարեղամյանը նախաքննության փուլում ցուցմունք է տվել, որ 2014թ. հունիսի 24-ին որդու` Էդգար Բարեղամյանի հետ տեղի ունեցած դեպքից հետո նա ունեցել է առողջական լուրջ խնդիրներ և հոգեպես լարված է եղել, այդ պատճառով, քանի որ դեպքից անցել է երկար ժամանակ, որդին դեպքի հետ կապված մանրամասն տվյալներ չի հիշում, սակայն իրեն ասել է, որ այն ժամանակ, երբ մասնակցել է անձին լուսանկարով ճանաչման ներկայացնելուն, Լևոն Բազինյանին ճանաչել է որպես իրենից բացահայտ ոսկյա շղթան հափշտակած անձանցից մեկի:
Հատոր 3 գ/թ 55

Ամբաստանյալ Լևոն Բազինյանին վերագրվող արարքները հիմնավորվել են նաև.

Այլ փաստաթուղթ հանդիսացող և ապացույց ճանաչված ու քրեական գործին կցված ՙՖաստ Կրեդիտ՚ ՍՊԸ-ի և Սաթիկ Մարտիրոսյանի միջև կնքված թիվ 255772 վարկային պայմանագիրով և Սաթիկ Մարտիրոսյանի անվամբ վճարված 801,060 ՀՀ դրամի դրամարկղային մուտքի օրդերով /հատոր 1` գ/թ 5-6/:
Հատոր 3 գ/թ 57-59

Տեսաձայնագրային փորձագետի թիվ 42891306 եզրակացության համաձայն` ձայնագրող տեխնիկական միջոցը տեղադրված է ապակե պատուհանների հետևը և այն հիմնականում ձայնագրում է պատուհանից դեպի ներս գտնվող անձանց` կազմակերպության աշխատակիցների, բանավոր խոսքը: Համադրելով տեսաշարերում պատկերված իրադարձությունները հնչող բանավոր խոսքերի հետ կարելի է նշել հետևյալը. տեսագրությունում 19:31:12 պահին ներս մտած երիտասարդների հետ աշխատակցուհին ճշտում է գրավի չափը, գումար մուծողի անուն ազգանունը, իսկ 19:43:32 պահին սրահ մտած կնոջ և երիտասարդի հետ ճշտում է գումարի մուծված լինելու փաստը, անձի անուն ազգանունը /Մարտիրոսյան Սաթիկ/, որից հետո աշխատակիցը անձանց ուղարկում է համապատասխան պատուհանի մոտ` զարդերը ստանալու համար:
Հատոր 1 գ/թ 128-136

Դատաբժշկական փորձագետի թիվ 1761 եզրակացության համաձայն` Էդգար Բարեղամյանի մարմնական վնասվածքները` պարանոցի շրջանի քերծվածքների ձևով հասցվել են բութ, կոշտ առարկաներով, հնարավոր է որոշմամբ նշված ժամկետում և հանգամանքներում, որոնք ինչպես ընդհանուր, այնպես էլ առանձին-առանձին վերցված առողջությանը թեթև վնասի հատկանիշ չեն պարունակում: Էդգար Բարեղամյանը տարածության մեջ կարող էր գտնվել ցանկացած` վնասվածքների առաջացումը չբացառող դիրքերում, վերոնշյալ վնասվածքները ստանալու պահին մարմնի տվյալ մակերեսներով ուղղված դեպի` բութ, կոշտ առարկան:
Հատոր 2 գ/թ 24-25

Անձին լուսանկարով ճանաչման ներկայացնելու վերաբերյալ արձանագրության համաձայն` տուժող Էդգար Բարեղամյանին ճանաչման ներկայացրած թվով չորս անձանցից, վերջինս նմանեցրել է Լևոն Բազինյանին և հայտարարել, որ լուսանկարում պատկերված անձը նման է այն նույն աձին, որը 2014թ. հունիսի 24-ին` ժամը 13:00-ի սամաններում թիվ 127 դպրոցի հետնամասում հարվածել է իր գլխի շրջանին և հափշտակել ոսկյա շղթան: Լևոն Բազինյանին ճանաչել է ընդհանուր դիմագծերից:
Հատոր 2 գ/թ 94-95

Տուժող Էդգար Բարեղամյանի մասնակցությամբ կատարված դեպքի վայրի զննության արձանագրության համաձայն` Էդգար Բարեղամյանը մատնացույց է արել Երևան քաղաքի Պ.Սևակ փողոցի այն հատվածը, որտեղ իրեն է մոտեցել Լևոն Բազինյանը և թիվ 127 դպրոցի այն հատվածը, որտեղ Գարիկ Դավոյանն ու Լևոն Բազինյանն իրեն հարվածելով, բացահայտ հափշտակել են ոսկյա շղթան:
Հատոր 2 գ/թ 18-21

ՀՀ ՃՈ-ից ստացված 2014թ.հունիսի 24-ի ժամը 10:30-ից մինչև ժամը 11:15-ն ընկած ժամանակահատվածում Պ.Սևակ և Կ.Ուլնեցի փողոցների խաչմերուկում տեղադրված տեսանկարահանման սարքի միջոցով արձանագրված տեսանյութի զննության արձանագրությամբ:
Հատոր 2 գ/թ 27

Այլ փաստաթուղթ հանդիսացող և ապացույց ճանաչված ու քրեական գործին կցված ՙVebratim DVD-R՚ տեսակի լազերային սկավառակով, որում առկա է ՀՀ ՃՈ-ից ստացված 2014թ. հունիսի 24-ի ժամը 10:30-ից մինչև ժամը 11:15-ը ընկած ժամանակահատվածում Պ.Սևակ և Կ.Ուլնեցի փողոցների խաչմերուկում տեղադրված տեսանկարահանման սարքի միջոցով արձանագրված տեսանյութի ձայնագրությունը:
Հատոր 2 գ/թ 193-194

ՙՎիվաՍել՚ ընկերությունից ստացված մեղադրյալ Գարիկ Դավոյանի բջջային հեռախոսահամարի զննության արձանագրությա համաձայն` Գարիկ Դավոյանի /098/ 29-26-26 և Լևոն Բազնինյանի /094/ 05-19-91 հեռախոսահամարները
2014թ. հունիսի 24-ի ժամը 09:30-ից մինչև ժամը 13:00-ն ընկած ժամանակահատվածում շահագործվել են Երևան քաղաքի Պ.Սևակ և Ռուբինյանց փողոցների հատվածներում, ինչպես նաև վերը նշված հեռախոսահամարներով միմյանց հեռախոսազանգեր են կատարել:
Հատոր 2 գ/թ 132-156

ՙՎիվաՍել՚ ընկերությունից ստացված մեղադրյալ Լևոն Բազինյանի բջջային հեռախոսահամարի զննության արձանագրության համաձայն` Լևոն Բազնինյանի /094/ 05-19-91 և Գարիկ Դավոյանի /098/ 29-26-26 հեռախոսահամարները 2014թ. հունիսի 24-ի ժամը 09:30-ից մինչև ժամը 13:00-ն ընկած ժամանակահատվածում շահագործվել են Երևան քաղաքի Պ.Սևակ և Ռուբինյանց փողոցների հատվածներում, ինչպես նաև վերը նշված հեռախոսահամարներով միմյանց հեռախոսազանգեր են կատարել:
Հատոր 2 գ/թ 132-156

ՀՀ ՃՈ-ից ստացված տուժող Էդգար Բարեղամյանի մասնակցությամբ Պ.Սևակ և Ռուբինյանց փողոցների խաչմերուկին տեղադրված տեսանկարահանող սարքի տեսագրության զննության արձանագրության համաձայն` Պ.Սևակ փողոցի վրա առջևից քայլող երիտասարդը հանդիսանում է ինքը, իսկ իր հետևից քայլող երտասարդը նույն այն երիտասարդն է, որն իրեն մոտեցել և հարցրել է ոմն Հոսոյի վերաբերյալ
Հատոր 1 գ/թ 65-66

ՀՀ ոստիկանության Կենտրոնականի բաժնում տուժող Արմեն Թաթոսյանի և ՀՀ ոստիկանության Քանաքեռ-Զեյթունի բաժնում տուժող Էդգար Բարեղամյանի կողմից հանցագործության մասին տրված հաղորդմների արձանագրությամբ:
Հատոր 1 գ/թ 1
Հատոր 2 գ/թ 2

Դատարանի իրավական վերլուծությունները

Դատարանը գործով ձեռք բերված յուրաքանչյուր ապացույց գնահատելով թույլատրելիության վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, գտնում է, որ Լևոն Բազինյանը կատարել է ՀՀ քրեական օրենսգրքի 176-րդ հոդվածի 2-րդ մասի 1-ին, 2-րդ և 4-րդ կետերով և 178-րդ հոդվածի 2-րդ մասի 2-րդ կետով նախատեսված իրեն մեղսագրվող արարքները, այն է` մի խումբ անձանց հետ նախնական համաձայնությամբ կատարել է խոշոր չափերով ուրիշի գույքի բացահայտ հափշտակություն, որը զուգորդվել է կյանքի կամ առողջության համար ոչ վտանգավոր բռնություն գործադրելով, ինչպես նաև` կատարել է խարդախություն` խաբեության եղանակով ուրիշի գույքի խոշոր չափերով հափշտակություն:
Վերոհիշյալ հանցանքների կատարման համար ամբաստանյալը ենթակա է քրեական պատասխանատվության և պատժի, որը նա պետք է կրի:

ՀՀ քրեական օրենսգրքի 10-րդ հոդվածի համաձայնª ՙՀանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացիª համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար՚:
ՀՀ քրեական օրենսգրքի 48-րդ հոդվածի 1-ին մասի համաձայնª ՙպատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից ու ազատություններից օրենքով նախատեսված զրկմամբ կամ դրանց սահմանափակմամբ՚:
ՀՀ քրեական օրենսգրքի 48-րդ հոդվածի 2-րդ մասի համաձայնª ՙՊատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61-րդ հոդվածի 1-ին մասի համաձայն` ՙՀանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները՚:
ՀՀ քրեական օրենսգրքի 61-րդ հոդվածի 2-րդ մասի համաձայնª ՙՊատժի տեսակը և չափը որոշվում է հանցագործությանª հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվումª պատասխանատվությունը և պատիժը մեղմացնող կամ ծանրացնող հանգամանքներով՚:
ՀՀ Վճռաբեկ դատարանը 2012թ. նոյեմբերի 1-ին Սերոբ Սարգսյանի վերաբերյալ թիվ ՍԴ/0109/01/12 գործով արտահայտել է հետևյալ իրավական դիրքորոշումը. ՙ(…) պատիժ նշանակելու ընդհանուր սկզբունքները քրեական օրենքով նախատեսված այն հիմնադրույթներն են, որոնցով պետք է ղեկավարվի դատարանը պատիժ նշանակելիս: Այդ սկզբունքներն են`
ա) օրինականությունը,
բ) արդարությունը,
գ) պատժի անհատականացումը,
դ) մարդասիրությունը:
Պատիժ նշանակելու վերոնշյալ սկզբունքները սահմանում են այն հիմնական դրույթները, որոնցով ղեկավարվում է դատարանը յուրաքանչյուր քրեական գործով պատժի տեսակն ու չափն ընտրելիս:
(…) պատժի նշանակման իրավական շրջանակները սահմանված են ՀՀ քրեական օրենսգրքով: Դրա հետ մեկտեղ, սակայն, վերոնշյալ օրենքը դատարանին հնարավորություն է տվել որոշակի սկզբունքների (…) պահպանմամբ, իր ներքին համոզմանը և իրավագիտակցությանը համապատասխան, ՀՀ քրեական օրենսգրքի Ընդհանուր և Հատուկ մասերով նախատեսված սահմաններում որոշել պատժի տեսակն ու չափը: Այլ կերպ` ուրվագծելով կոնկրետ հանցանքի համար նշանակման ենթակա պատժի առավելագույն և նվազագույն սահմանները` ՀՀ քրեական օրենքը դատարանին տվել է այդ շրջանակում հայեցողություն դրսևորելու հնարավորություն:
Վճռաբեկ դատարանը գտել է, որ ՀՀ քրեական օրենսգրքի Հատուկ մասի գրեթե բոլոր հոդվածների սանկցիաներում ամրագրված վերոնշյալ մոտեցումը պայմանավորված է այն տրամաբանությամբ, որ քրեական օրենքը համընդհանուր բնույթ ունի, իսկ արարքը և հանցավորի անձը կոնկրետ են: Ուստի կոնկրետ արարքի և անձի նկատմամբ համընդհանուր քրեական օրենքով նախատեսված սանկցիան կիրառելիս դատարանը պետք է որոշակի հայեցողություն դրսևորի:
Այսինքն` առանց դատարանի հայեցողության պատժի անհատականացումն անհնար է:
(…) Պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության աստիճանի ու բնույթի, հանցավորի անձի, պատիժը մեղմացնող և ծանրացնող հանգամանքների վերլուծության հիման վրա: Նշված հանգամանքների հայեցողական և ոչ երբեք կամային գնահատման ժամանակ դատարանը պետք է ելնի ՀՀ քրեական օրենսգրքի 48-րդ հոդվածով նախատեսված` պատժի նպատակների իրացումն ապահովելու անհրաժեշտությունից (տե°ս Նարեկ Գևորգի Սարգսյանի գործով Վճռաբեկ դատարանի 2011 թվականի դեկտեմբերի 22-ի թիվ ԵԿԴ/0042/01/11 որոշման 14-րդ, 22-23-րդ կետերը)՚:
ՀՀ Վճռաբեկ դատարանը Լիա Ավետիսյանի գործով 2011թ. փետրվարի 24-ի որոշմամբ (ԵԿԴ/0176/01/09) արտահայտել է հետևյալ իրավական դիրքորոշումը.
ՙԽաբեությունը գույքի սեփականատիրոջը կամ գույքը տիրապետողին մոլորության մեջ գցելու նպատակով իրական, ճշմարիտ փաստերի դիտավորյալ խեղաթյուրումն է կամ ճշմարտության մասին լռելը: Այսպիսով, խաբեությունը դրսևորվում է հետևյալ երկու եղանակով`
ա) իրական, ճշմարիտ փաստերի դիտավորյալ խեղաթյուրում,
բ) ճշմարտության մասին լռել:
Իրական, ճշմարիտ փաստերի դիտավորյալ խեղաթյուրման դեպքում հանցավորը գույքի սեփականատիրոջ կամ գույքը տիրապետողի մոտ սխալ պատկերացում է ստեղծում գույքը նրա տնօրինությանն անցնելու օրինական հիմքերի մասին և առաջ բերում գույքի հանձնման օրինականության պատրանք (ակտիվ խաբեություն): Իրական, ճշմարիտ փաստերի խեղաթյուրումը կարող է իրականացվել կամ բանավոր խոսքի միջոցով կամ դրսևորվել որոշակի գործողություններով: Գործողությունների միջոցով փաստերի խեղաթյուրումը, սակայն, ենթադրում է տուժողի վրա հանցագործի առավել ակտիվ ներգործություն:
Ճշմարտության մասին լռելու դեպքում հանցավորը դիտավորյալ լռում է իրավական նշանակություն ունեցող փաստական հանգամանքների մասին, որի արդյունքում գույքի սեփականատերը կամ գույքը տիրապետողը մոլորության մեջ են ընկնում գույքը հանցավորին հանձնելու օրինական հիմքերի առկայության հարցում (պասիվ խաբեություն): Ճշմարտության մասին լռելը, սակայն, քրեորեն պատժելի է այն դեպքերում, երբ հանցագործը պարտավոր էր տուժողին իրազեկել այնպիսի հանգամանքների մասին, որոնց իմացության արդյունքում տուժողը մոլորության մեջ չէր ընկնի (...):
Վճռաբեկ դատարանն անդրադարձել է այն հարցին, թե ինչ հատկանիշների հիման վրա է սահմանազատվում խարդախության հանցակազմը քաղաքացիաիրավական պարտավորությունների չկատարման կամ ոչ պատշաճ կատարման դեպքերից:
Տարբեր տեսակի գործարքների (առուվաճառք, գրավ, փոխառություն, այդ թվում` վարկային պայմանագիր և այլն) կատարման ժամանակ ծագող քաղաքացիական իրավահարաբերություններից խարդախության հանցակազմի սահմանազատման հիմնախնդրին Վճռաբեկ դատարանն անդրադարձել է` ելնելով այն հանգամանքից, որ անձի կողմից իր գույքային պարտավորությունների չկատարումը դեռևս չի վկայում անձի մոտ հանցանքի կատարման դիտավորության առկայության մասին: Այլ կերպ` անձի կողմից քաղաքացիաիրավական պարտավորության չկատարումը դեռևս չի վկայում վերջինիս արարքում խարդախության հանցակազմի սուբյեկտիվ կողմի և հետևաբար, խարդախության հանցակազմի առկայության մասին:
Նշված գործով ՀՀ Վճռաբեկ դատարանն արտահայտել է այն իրավական դիրքորոշումը, որ խարդախությունը քաղաքացիաիրավական պարտավորություններից տարանջատելիս անհրաժեշտ է հաշվի առնել հետևյալ հանգամանքները.
ա) Խարդախության դեպքում տուժողին խաբելու կամ նրա վստահությունը չարաշահելու մտադրությունն անձի մոտ ծագում է նախքան գույքը կամ գույքի նկատմամբ իրավունքներ ձեռք բերելը:
բ) Խարդախության դեպքում անձի մոտ քաղաքացիաիրավական պայմանագրով ստանձնած պարտավորությունները (գույքը փոխանցել, կատարել վարկային պարտավորությունը, պարտքը վերադարձնել և այլն) չկատարելու դիտավորությունը ծագում է նախքան գույքը կամ գույքի նկատմամբ իրավունքներ ձեռք բերելը:
ՀՀ վճռաբեկ դատարանը Կարեն Հարությունյանի վերաբերյալ գործով վերլուծելով ՀՀ քրեական օրենսգրքի Ընդհանուր մասի մի շարք դրույթներ, մասնավորապես` ՀՀ քրեական օրենսգրքի 10-րդ, 48-րդ և 61-րդ հոդվածներըª հանգել է այն հետևության, որ պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, անձին բնութագրող բոլոր տվյալները և քրեական օրենքով նախատեսված պահանջներից ելնելով` հանցագործության մեջ մեղավոր անձի նկատմամբ նշանակում է այնպիսի պատիժ, որն անհրաժեշտ և բավարար է այդ անձին ուղղելու և նրա կողմից նոր հանցանքի կատարումը կանխելու համար (տե'ս ՀՀ վճռաբեկ դատարանի` Կարեն Հարությունյանի վերաբերյալ գործով 2007 թվականի նոյեմբերի 30-ի ՎԲ-201/07 որոշումը):
Ամբաստանյալ Լևոն Բազինյանի անձը բնութագրող տվյալներ դատարանը հաշվի է առնում, որ նա բնութագրվում է դրական, ամուսնացած է:
Դատարանն ամբաստանյալի պատասխանատվությունն ու պատիժը մեղմացնող հանգամանք է դիտում, որ նա ընդունել է մեղքը և զղջացել կատարած արարքների համար, խնամքի տակ է գտնվում 2012 թվականին ծնված մեկ մանկահասակ երեխան, ընտանիքի միակ կերակրողն է, լիովին հատուցել է տուժողների հանցագործության հետևանքով անմիջականորեն պատճառված գույքային վնասը, տուժողները բողոք կամ գույքային վնասի հատուցման պահանջ չեն ներկայացրել:
Դատարանն արձանագրում է, որ ամբաստանյալի պատասխանատվությունն ու պատիժը ծանրացնող հանգամանքներ չկան:
Հաշվի առնելով ամբաստանյալ Լևոն Բազինյանի կատարած հանցագործությունների բնույթը և հանրության համար վտանգավորության աստիճանը, դրանց կատարման եղանակը, հանցավոր մտադրության իրականացման աստիճանը, հանցագործությունը կատարելուց հետո նրա դրսևորած վարքագիծը, խախտված հասարակական հարաբերության սոցիալական նշանակությունը և այդ ոլորտում պետության քրեական քաղաքականության ուղղվածությունը, դատարանը գտնում է, որ ամբաստանյալը ՀՀ քրեական օրենսգրքի 176-րդ հոդվածի 2-րդ մասի 1-ին, 2-րդ և 4-րդ կետերով նախատեսված հանցագործության կատարման համար ենթակա է պատժի ազատազրկման, իսկ ՀՀ քրեական օրենսգրքի 178-րդ հոդվածի 2-րդ մասի 2-րդ կետով նախատեսված հանցագործության կատարման համար` տուգանքի ձևով:
ՀՀ քրեական օրենսգրքի 69-րդ հոդվածի 3-րդ մասի համաձայն`
ՙՄինչև դատավճռի օրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման, կարգապահական գումարտակում պահելու ձևով նշանակված պատժին` մեկ օրը հաշվելով մեկ օրվա դիմաց /.../՚:
Դատարանն արձանագրում է, որ 2014 թվականի մայիսի 16-ից մինչև 2014 թվականի մայիսի 19-ը Լևոն Բազինյանը ձերբակալված է եղել, բացի այդ, համաձայն Ռուսաստանի Դաշնության Մոսկվա քաղաքի Դորոգոմիլովսկի միջշրջանային դատախազի 15.04.2015թ. որոշման` Լևոն Բազինյանը 2014 թվականի նոյեմբերի 08-ից միչև 2015 թվականի փետրվարի 15-ը գտնվել է նախնական կալանքի տակ: Հետևաբար, Լևոն Բազինյանի նկատմամբ ազատազրկման ձևով պատժին պատժին պետք է հաշվակցել նախնական կալանքի տակ գտնվելու ժամկետը:

Քննության առնելով ամբաստանյալի նկատմամբ կիրառված խափանման միջոցի հարցը` դատարանը գտնում է, որ ամբաստանյալ Լևոն Բազինյանի նկատմամբ կիրառված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Ղեկավարվելով ՀՀ քրեական դատավարության օրենսգրքի 134-րդ, 357-360-րդ, 365-րդ, 366-րդ, 369-373-րդ և 379-րդ հոդվածներով, դատարանը`

ՎՃՌԵՑ

Լևոն Լևոնի Բազինյանին մեղավոր ճանաչել ՀՀ քրեական օրենսգրքի 178-րդ հոդվածի 2-րդ մասի 2-րդ կետով և 176-րդ հոդվածի 2-րդ մասի 1-ին, 2-րդ և 4-րդ կետերով նախատեսված հանցագործությունների կատարման մեջ:
ՀՀ քրեական օրենսգրքի 176-րդ հոդվածի 2-րդ մասի 1-ին, 2-րդ և 4-րդ կետերով նրա նկատմամբ պատիժ նշանակել ազատազրկում 3 /երեք/ տարի ժամկետով:
ՀՀ քրեական օրենսգրքի 178-րդ հոդվածի 2-րդ մասի 2-րդ կետով` պատիժ նշանակել տուգանք` նվազագույն աշխատավարձի հինգհարյուրապատիկի` 500.000 /հինգ հարյուր հազար/ ՀՀ դրամի չափով:
ՀՀ քրեական օրենսգրքի 66-րդ և 68-րդ հոդվածների կանոններով Լևոն Լևոնի Բազինյանի նկատմամբ պատիժ նշանակել ազատազրկում 3 /երեք/ տարի ժամկետով և տուգանք` նվազագույն աշխատավարձի հինգհարյուրապատիկի` 500.000 /հինգ հարյուր հազար/ ՀՀ դրամի չափով:
ՀՀ քրեական օրենսգրքի 69-րդ հոդվածի 3-րդ մասի կանոններով, ազատազրկման ձևով նշանակված պատժին հաշվակցել Լևոն Բազինյանի նախնական կալանքի տակ գտնվելու 5 /հինգ/ ամիս 10 /տասը/ օրը և Լևոն Լևոնի Բազինյանի նկատմամբ վերջնական պատիժ նշանակել ազատազրկում 2 /երկու/ տարի 6 /վեց/ ամիս 20 /քսան/ օր և տուգանք` նվազագույն աշխատավարձի հինգհարյուրապատիկի` 500.000 /հինգ հարյուր հազար/ ՀՀ դրամի չափով:
Պատժի սկիզբը հաշվել 2016 թվականի փետրվարի 04-ից:
Լևոն Բազինյանի նկատմամբ կիրառված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո` մեկամսյա ժամկետում:




ԴԱՏԱՎՈՐ Ա.ՄԿՐՏՉՅԱՆ