Ո Ր Ո Շ Ո Ւ Մ ԵԱՔԴ/0007/01/16
Ք Ր Ե Ա Կ Ա Ն Գ Ո Ր Ծ Ի Վ Ա Ր Ո Ւ Յ Թ Ը Կ Ա Ր Ճ Ե Լ Ո Ւ Ե Վ Ք Ր Ե Ա Կ Ա Ն
Հ Ե Տ Ա Պ Ն Դ Ո Ւ Մ Ը Դ Ա Դ Ա Ր Ե Ց Ն Ե Լ Ո Ւ Մ Ա Ս Ի Ն

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը հետևյալ կազմով

Նախագահությամբ` դատավոր Դ. Գրիգորյան
քարտուղարությամբ` Հ.Դաջունցի
Մասնակցությամբ`
Մեղադրող` Է.Պետրոսյանի
պաշտպան` Ա.Հակոբյանի
թարգմանիչ՝ Մ. Բալոյանի

Դռնբաց դատական նիստում 2016 թվականի փետրվարի 19-ին, Երևան քաղաքում, քննության առնելով քրեական գործով, ըստ մեղադրանքի Արմեն Սամվելի Պողոսյանի՝ ՀՀ քրեական օրենսգրքի 117-րդ հոդվածով, ամբաստանյալ Ա.Պողոսյանի՝ իր նկատմամբ ՀՀ քրեական օրենսգրքի 117-րդ հոդվածով քրեական հետապնդումը դադարեցնելու և քրեական գործի վարույթը կարճելու մասին միջնորդությունը,

Պ Ա Ր Զ Ե Ց

ՀՀ ՔԿ Երևան քաղաքի ՔՎ Արաբկիր վարչական շրջանի ՔԲ ավագ քննիչ Գ.Գենջոյանի 2015թ. նոյեմբերի 26-ի որոշմամբ ՀՀ քրեական օրենսգրքի 258-րդ հոդվածի 2-րդ մասի հատկանիշներով հարուցվել է թիվ 14823615 քրեական գործը:
Նախաքննության մարմնի կողմից ամբաստանյալ Արմեն Սամվելի Պողոսյանին 2016թ. հունվարի 26-ին մեղադրանք է առաջադրվել ՀՀ քրեական օրենսգրքի 117-րդ հոդվածով այն բանի համար, որ նա 2015թ. նոյեմբերի 15-ին ժամը 01:00-ի սահմաններում Վաղարշյան-Կոմիտաս փողոցների խաչմերուկում մեքենան վարելու շուրջ առաջացած վիճաբանության ժամանակ բռունցքներով հարվածներ է հասցրել Արամայիս Շահբազյանի դեմքին՝ դիտավորությամբ վերջինիս առողջությանը պատճառելով թեթև վնաս, որն արտահայտվել է դեմքի աջ կեսի, ճակատային, քունքային այտային, հարակնակապճային շրջանների, քթի փափուկ հյուսվածքների սալջարդի, ենթամաշկային արյունահավաքի, աջ ստորակնակապճային շրջանի պատռված վերքի, քթի մեջքի շրջանի ձախ կեսի քերծվածքի և քթոսկրի կոտրվածքի ձևով:
Ամբաստանյալ Արմեն Սամվելի Պողոսյանի նկատմամբ 2015թ. դեկտեմբերի 15-ի որոշմամբ որպես խափանման միջոց է կիրառվել չհեռանալու մասին ստորագրությունը:
2016թ. հունվարի 29-ին քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան, որն ընդունվել է վարույթ և նշանակվել դատաքննության:
2016թ. փետրվարի 19-ին Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան մուտք է եղել տուժող Ա.Շահբազյանի դիմումը, որով վերջինս նշել է, որ հաշտվել է ամբաստանյալ Արմեն Պողոսյանի հետ, վերջինիցս որևէ բողոք, պահանջ, քաղ. հայց չունի և խնդրել է նրա նկատմամբ հարուցված քրեական գործի վարույթը կարճել և քրեական հետապնդումը դադարեցնել` իր բողոքի բացակայության հիմքով:
Ամբաստանյալ Արմեն Սամվելի Պողոսյանը նշեց, որ տուժող Ա.Շահբազյանի հետ հաշտվել է, ՀՀ քրեական օրենսգրքի 117-րդ հոդվածով առաջադրված մեղադրանքը լիովին ընդունում է, իրեն մեղավոր է ճանաչում, չի առարկում տուժողի հետ հաշվելու հիմքով իր նկատմամբ քրեական հետապնդումը դադարեցնելուն և քրեական գործի վարույթը կարճելուն:
Դատական նիստի ընթացքում մեղադրող Է.Պետրոսյանը նշեց, որ տուժող Ա.Շահբազյանի հետ հաշտվելու կապակցությամբ ամբաստանյալ Արմեն Սամվելի Պողոսյանի վերաբերյալ քրեական գործի վարույթը պետք է կարճել և քրեական հետապնդումը դադարեցնել:
ՀՀ քրեական դատավարության օրենսգրքի 183-րդ հոդվածի 1-ին մասի համաձայն ՀՀ քրեական օրենսգրքի 117-րդ հոդվածով նախատեսված հանցագործության վերաբերյալ գործը հարուցվում է ոչ այլ կերպ, քան տուժողի բողոքի հիման վրա և կասկածյալի կամ մեղադրյալի կամ ամբաստանյալի հետ հաշտվելու դեպքում ենթակա է կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի համաձայն քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե տուժողը հաշտվել է կասկածյալի կամ մեղադրյալի հետ:
Ելնելով վերոգրյալից, դատարանը փաստում է, որ Արմեն Սամվելի Պողոսյանի կողմից կատարած հանցանքը համապատասխանում է ՀՀ քրեական օրենսգրքի 117-րդ հոդվածի հատկանիշներին:
Հաշվի առնելով այն հանգամանքը, որ տուժող Արամայիս Արտակի Շահբազյանը դիմումով հայտնել է, որ Արմեն Սամվելի Պողոսյանից բողոք, պահանջ, քաղ. հայց չունի և դիմել է վերջինիս նկատմամբ հարուցված քրեական գործի վարույթը կարճել` իր հետ հաշտվելու հիմքով, ինչպես նաև որ ամբաստանյալ Արմեն Սամվելի Պողոսյանը դիմում է ներկայացրել դատարան և հայտարարել է, որ առաջադրված մեղադրանքում իրեն լիովին մեղավոր է ճանաչում, հաշտվել է տուժողի հետ, ուստի դատարանը գտնում է, որ Ա.Պողոսյանի վերաբերյալ քրեական գործի վարույթը ենթակա է կարճման և նրա նկատմամբ քրեական հետապնդումը դադարեցման` տուժողի հետ հաշտվելու հիմքով:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 35 հոդվածի 1-ին մասի 5-րդ կետերով, 41-րդ, 379-րդ, 427-րդ հոդվածներով դատարանը,

Ո Ր Ո Շ Ե Ց
Ամբաստանյալ Արմեն Սամվելի Պողոսյանի միջնորդությունը բավարարել և Արմեն Սամվելի Պողոսյանի նկատմամբ ՀՀ քրեական օրենսգրքի 117-րդ հոդվածով նախատեսված հանցագործություն կատարելու համար քրեական հետապնդումը դադարեցնել և քրեական գործի վարույթը կարճել` տուժողի հետ հաշտվելու հիմքով:
Արմեն Սամվելի Պողոսյանի նկատմամբ կիրառված խափանման միջոց չհեռանալու մասին ստորագրությունը վերացնել:
Գործով քաղ. հայց չի հարուցվել, իրեղեն ապացույցներ չկան:
Որոշումը կարող է բողոքարկվել ՀՀ քրեական վերաքննիչ դատարան հրապարակման պահից մեկամսյա ժամկետում:

ԴԱՏԱՎՈՐ` Դ. ԳՐԻԳՈՐՅԱՆ