Գործ No ԵԱՔԴ/0001/01/16

ՈՐՈՇՈՒՄ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

ՙ07՚ հունիսի 2016 թվական քաղաք Երևան

Երևան քաղաքի Արաբկիր և Քանաքեռ-Զեյթուն վարչական շրջանների առաջին ատյանի ընդհանուր իրավասության դատարանը`

նախագահությամբ` դատավոր Արթուր Մկրտչյանի
քարտուղարությամբ` Միլենա Սարգսյանի
մասնակցությամբ`
մեղադրող Վիգեն Հարությունյանի
պաշտպաններ Գեղամ Հակոբյանի
Համլետ Դավթյանի
ամբաստանյալներ Սվետլանա Գրիգորյանի
Սպարտակ Բաղդասարյանի

դատարանում, դռնբաց դատական նիստում, դատական քննության արագացված կարգով քննեց քրեական գործն ըստ մեղադրանքի Սվետլանա Վիկտորի Գրիգորյանի` ՀՀ քրեական օրենսգրքի 325-րդ հոդվածի 1-ին մասով, և Սպարտակ Սուրիկի Բաղդասարյանի` ՀՀ քրեական օրենսգրքի 38-325-րդ հոդվածի 1-ին մասով:

Գործի դատավարական նախապատմությունը

2014 թվականի հուլիսի 08-ին ՀՀ ՊՆ ՀԿԳ քննչական բաժնում ՀՀ քրեական օրենսգրքի 311-րդ հոդվածի 4-րդ մասի 2-րդ կետով, 312-րդ հոդվածի 3-րդ մասի 1-ին կետով, 313-րդ հոդվածի 2-րդ մասի 2-րդ կետով և 375-րդ հոդվածի 1-ին մասով հարուցվել է թիվ 90153114 քրեական գործը:
2014 թվականի հուլիսի 11-ին Սվետլանա Գրիգորյանը ձերբակալվել է:
2014 թվականի հուլիսի 12-ին Սպարտակ Բաղդասարյանը ձերբակալվել է:
2014 թվականի հուլիսի 14-ին Սպարտակ Բաղդասարյանը ներգրավվել է որպես մեղադրյալ, նրան մեղադրանք է առաջադրվոլ ՀՀ քրեական օրենսգրքի 313-րդ հոդվածի 2-րդ մասի 2-րդ կետով և նրա նկատմամբ որպես խափանման միջոց է կիրառվել կալանավորումը:
2014 թվականի հուլիսի 14-ին Սվետլանա Գրիգորյանը ներգրավվել է որպես մեղադրյալ, նրան մեղադրանք է առաջադրվոլ ՀՀ քրեական օրենսգրքի 311-րդ հոդվածի 4-րդ մասի 2-րդ կետով և նրա նկատմամբ որպես խափանման միջոց է կիրառվել կալանավորումը:
2014 թվականի դեկտեմբերի 26-ին Սվետլանա Գրիգորյանի խափանման միջոցը փոփոխվել է, նա ազատվել է կալանքից և որպես խափանման միջոց է ընտվել ստորագրություն` չհեռանալու մասին:

2014 թվականի դեկտեմբերի 29-ին Սպարտակ Բաղդասարյանի խափանման միջոցը փոփոխվել է, նա ազատվել է կալանքից և որպես խափանման միջոց է ընտվել ստորագրություն` չհեռանալու մասին:
2015 թվականի դեկտեմբերի 14-ին Սվետլանա Գրիգորյանին առաջադրված մեղադրանքը փոփոխվել է, նրան մեղադրանք է առաջադրվել ՀՀ քրեական օրենսգրքի 325-րդ հոդվածի 1-ին մասով և ներգրավվել է որպես մեղադրյալ:
2015 թվականի դեկտեմբերի 16-ին Սպարտակ Բաղդասարյանին առաջադրված մեղադրանքը փոփոխվել է, նրան մեղադրանք է առաջադրվել ՀՀ քրեական օրենսգրքի 38-325-րդ հոդվածի 1-ին մասով և ներգրավվել է որպես մեղադրյալ:
2015 թվականի դեկտեմբերի 24-ին թիվ 90154315 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների առաջին ատյանի ընդհանուր իրավասության դատարան:

Գործի փաստական հանգամանքները

Նախաքննության մարմինն ամբաստանյալ Սվետլանա Գրիգորյանին ՀՀ քրեական օրենսգրքի 325-րդ հոդվածի 1-ին մասով մեղադրանք է առաջադրել, որ ՙԳորիսի զինկոմիսարիատի զորակոչային բաժանմունքի պետ Սպարտակ Բաղդասարյանի դրդմամբ 2014 թվականի հունիսի 3-ին կեղծել է իրավունք վերապահող պաշտոնական փաստաթուղթ, այն է` օգտվելով այն հանգամանքից, որ Գորիսի զինկոմիսարիատում հաշվառված զորակոչիկ Սարգիս Գագիկի Սարգսյանը ՙՍրտաբանության գիտահետազոտական ինստիտուտ՚ ՓԲ ընկերությունում հետազոտություններ անցնելու շրջանակներում ՙՀոլտեր՚ հետազոտության է ենթարկվել այդ բժշկական կենտրոնի վարչական շենքում գործող, իրեն պատկանող ՙԻնտերդիագնոստիկա՚ ՍՊ ընկերությունում, զինվորական ծառայությունից տարկետում ստանալու համար օգտագործվելու նպատակով Սարգիս Սարգսյանի ՙՀոլտեր՚ հետազոտության տվյալների մեջ համակարգչում մտցրել է կեղծ տեղեկություններ` ավելացրել է գրանցված սրտի ռիթմի խանգարումների քանակը, ինչի արդյունքում ՙԻնտերդիագնոստիկա՚ ընկերության աշխատակիցների կողմից կազմվել և տրվել է Ս.Սարգսյանի վերաբերյալ իրավունք վերապահող պաշտոնական փաստաթուղթ` զինվորական ծառայությունից տարկետման իրավունք ձեռք բերելու հիմք հանդիսացող ախտորոշմամբ ՙՀոլտեր՚ հետազոտության կեղծ եզրակացություն՚:
Ամբաստանյալ Սպարտակ Բաղդասարյանին ՀՀ քրեական օրենսգրքի 38-325-րդ հոդվածի 1-ին մասով մեղադրանք է առաջադրել, որ ՙնա դրդել է Սվետլանա Գրիգորյանին Գորիսի զինկոմիսարիատում հաշվառված զորակոչիկ Սարգիս Սարգսյանի վերաբերյալ կազմել իրավունք վերապահող կեղծ պաշտոնական փաստաթուղթ, այն է` խնդրել ու համոզել է Սվետլանա Գրիգորյանին, որ վերջինս, լինելով զորակոչիկների բժշկական ստուգում իրականացնող ՙՍրտաբանության գիտահետազոտական ինստիտուտ՚ ՓԲ ընկերության աշխատակից և ՙԻնտերդիագնոստիկա՚ ՍՊ ընկերության տնօրենը, Սարգիս Սարգսյանի վերաբերյալ տրամադրի ժամկետային զինվորական ծառայությունից տարկետում ստանալու իրավունք վերապահող ախտորոշմամբ կեղծ բժշկական փաստաթուղթ, ինչի արդյունքում 2014 թվականի հունիսի 3-ին Սվետլանա Գրիգորյանը ՙԻնտերդիագնոստիկա՚ ՍՊ ընկերությունում կատարված Սարգիս Սարգսյանի ՙՀոլտեր՚ հետազոտության տվյալների մեջ համակարգչում մտցրել է կեղծ տեղեկություններ` ավելացրել է գրանցված սրտի ռիթմի խանգարումների քանակը, ինչի արդյունքում ՙԻնտերդիագնոստիկա՚ ընկերության աշխատակիցների կողմից կազմվել և տրվել է ՙՀոլտեր՚ հետազոտության կեղծ եզրակացություն՚:

Դատարանի իրավական վերլուծությունները և պատճառաբանությունները

Մինչև դատաքննությունն սկսելն ամբաստանյալներ Սվետլանա Գրիգորյանը և Սպարտակ Բաղդասարյանը միջնորդել են դատական քննությունն անցկացնել արագացված կարգով և հայտարարել, որ մեղադրանքը պարզ է, համաձայն են առաջադրված մեղադրանքին, ընդունում են ամբողջ ծավալով, գիտակցում են արագացված կարգով դատական քննություն անցկացնելու հետևանքները, միջնորդությունը ներկայացրել են կամավոր` պաշտպանների հետ խորհրդակցելուց հետո: Միջնորդությունը հաստատել են նաև ամբաստանյալների պաշտպաններ Գեղամ Հակոբյանը և Համլետ Դավթյանը: Մեղադրող Վիգեն Հարությունյանը դատական քննության արագացված կարգ կիրառելուն չի առարկել:
Դատարանը, համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Քրեական գործի դատական քննության դատական վիճաբանությունների փուլում ամբաստանյալներ Ս.Գրիգորյանը, Ս.Բաղդասարյանը և նրանց պաշտպաններ Գ.Հակոբյանը և Հ.Դավթյանը միջնորդեցին քրեական գործի վարույթը կարճել և ամբաստանյալների նկատմամբ քրեական հետապնդումը դադարեցնել` վաղեմության ժամկետներն անցնելու հիմքով: Միաժամանակ այդ կապակցությամբ ամբաստանյալները հայտնեցին, որ չեն առարկում նշված հիմքով քրեական գործի վարույթը կարճելուն, քանի որ լիովին ընդունում են իրենց առաջադրված մեղադրանքը և համաձայն են դրա հետ:
Մեղադրող Վ.Հարությունյանը չառարկեց միջնորդության դեմ և նշեց, որ առկա են ՀՀ քրեական դատավարության օրենսգրքի 35-րդ հոդվածի 1-ին մասի 6-րդ կետով քրեական գործի վարույթը կարճելու և քրեական հետապնդումը դադարեցնելու հիմքերը:
ՀՀ քրեական օրենսգրքի 19-րդ հոդվածի համաձայն`
ՙ1. Ըստ բնույթի և հանրության համար վտանգավորության աստիճանի՝ հանցագործությունները դասակարգվում են՝ ոչ մեծ ծանրության, միջին ծանրության, ծանր և առանձնապես ծանր հանցագործությունների:
2. Ոչ մեծ ծանրության հանցագործություններ են համարվում դիտավորությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երկու տարի ժամկետով ազատազրկումը, կամ որոնց համար նախատեսված է ազատազրկման հետ կապ չունեցող պատիժ, ինչպես նաև անզգուշությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երեք տարի ժամկետով ազատազրկումը: (…)՚:
ՀՀ քրեական դատավարության օրենսգրքի 75-րդ հոդվածի համաձայն`
ՙ1. Անձն ազատվում է քրեական պատասխանատվությունից, եթե հանցանքն ավարտված համարելու օրվանից անցել են հետևյալ ժամկետները.
1) երկու տարի՝ ոչ մեծ ծանրության հանցանքն ավարտված համարելու օրվանից.
2) հինգ տարի՝ միջին ծանրության հանցանքն ավարտված համարելու օրվանից.
3) տասը տարի՝ ծանր հանցանքն ավարտված համարելու օրվանից.
4) տասնհինգ տարի՝ առանձնապես ծանր հանցանքն ավարտված համարելու օրվանից:
2. Վաղեմության ժամկետը հաշվարկվում է հանցանքն ավարտված համարելու օրվանից մինչև դատավճռի օրինական ուժի մեջ մտնելու պահը: /.../՚:
ՀՀ քրեական դատավարության օրենսգրքի 35-րդ հոդվածի 1-ին մասի 6-րդ կետի համաձայն`
ՙՔրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե անցել են վաղեմության ժամկետները՚:
ՀՀ քրեական դատավարության օրենսգրքի 35-րդ հոդվածի 6-րդ մասի համաձայն`
ՙՍույն հոդվածի առաջին մասի 6-րդ և 13-րդ կետերում նշված հիմքերով գործի վարույթի կարճում և քրեական հետապնդման դադարեցում չի թույլատրվում, եթե դրա դեմ առարկում է մեղադրյալը: Այս դեպքում գործի վարույթը շարունակվում է սովորական կարգով՚:
ՀՀ վճռաբեկ դատարանը ԳԴ5/0022/01/10 գործով Անահիտ Սաղաթելյանի վերաբերյալ 2011թ. հոկտեմբերի 20-ի որոշմամբ արտահայտել է հետևյալ իրավական դիրքորոշումը.
/.../ Քրեական օրենսդրությամբ, կապված արարքի բնույթից և հանրության համար վտանգավորության աստիճանից, նախատեսված են քրեական պատասխանատվության ենթարկելու տարբեր ժամկետներ, որոնց անցնելու դեպքում կատարված արարքը կորցնում է իր վտանգավորությունը, և անձն ազատվում է քրեական պատասխանատվությունից: Վերոգրյալի հիման վրա քրեադատավարական օրենքը վաղեմության ժամկետն անցնելը դիտում է որպես քրեական գործի վարույթը և քրեական հետապնդումը բացառող հանգամանք` սահմանելով, որ քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե անցել են վաղեմության ժամկետները:
Միևնույն ժամանակ քրեադատավարական օրենքը վաղեմության ժամկետն անցնելու հիմքով քրեական պատասխանատվությունից ազատելու պարտադիր նախապայման է դիտում մեղադրյալի համաձայնությունը, որի բացակայությունը ենթադրում է վարույթի շարունակում ընդհանուր կարգով: Ինչպես երևում է նշված արգելքը սահմանող իրավանորմի վերլուծությունից, ՀՀ քրեական դատավարության օրենսգրքի 35-րդ հոդվածի 1-ին մասի 6-րդ կետի կիրառման համար ենթադրյալ իրավախախտում կատարած անձի համաձայնությունն անհրաժեշտ է միայն այն դեպքում, երբ քրեական գործն արդեն իսկ հարուցված է, և անձը ներգրավվել է որպես մեղադրյալ, այսինքն` նրա նկատմամբ սկսվել է քրեական հետապնդում:
Բոլոր այն դեպքերում, երբ քրեական գործը դեռ հարուցված չէ, կամ քրեական գործը հարուցվել է, սակայն որևէ անձի մեղադրանք չի առաջադրվել, և անցել են վաղեմության ժամկետները, ապա ենթադրյալ իրավախախտում կատարած անձի համաձայնությունն անհրաժեշտ չէ, և մինչդատական վարույթն իրականացնող մարմինը պարտավոր է իր նախաձեռնությամբ հրաժարվել քրեական գործ հարուցելուց կամ որոշում կայացնել հարուցված քրեական գործի վարույթը կարճելու մասին: Այլ կերպ` քրեական պատասխանատվության ենթարկելու ժամկետներն անցած լինելն ինքնին բացառում է քրեական գործի վարույթը և քրեական հետապնդումը` անկախ ենթադրյալ իրավախախտում կատարած անձի համաձայնությունից կամ առարկությունից. համաձայնության հարցն առաջ է գալիս միայն կոնկրետ անձի նկատմամբ քրեական հետապնդում սկսելուց` նրան մեղադրանք առաջադրելուց հետո՚:
Համաձայն ամբաստանյալներ Սվետլանա Գրիգորյանին և Սպարտակ Բաղդասարյանին նախաքննության մարմնի կողմից առաջադրված մեղադրանքի, ՀՀ քրեական օրենսգրքի 325-րդ հոդվածի 1-ին մասով և 38-325-րդ հոդվածի 1-ին մասով նախատեված ոչ մեծ ծանրության հանցագործություններն ավարտվել են 2014 թվականի հունիսի 3-ին:
ՀՀ քրեական օրենսգրքի 325-րդ հոդվածի 1-ին մասի դիսպոզիցիայի վերլուծությունից բխում է, որ այն նկարագրում է դիտավորյալ հանցագործություն, իսկ հոդվածի սանկցիաներով նախատեսված ազատազրկման ձևով պատժի ժամկետը չի գերազանցում 2 տարին, ուստի տվյալ հոդվածով նախատեսված հանցավոր արարքը դասվում է ոչ մեծ ծանրության հանցագործությունների թվին, հետևաբար այն կատարած անձն ազատվում է քրեական պատասխանատվությունից, եթե հանցանքն ավարտված համարելու օրվանից անցել է երկու տարի:
Այսպիսով, դատարանը գտնում է, որ ՀՀ քրեական օրենսգրքի 325-րդ հոդվածի 1-ին մասով և 38-325-րդ հոդվածի 1-ին մասով հարուցված թիվ 90154314 քրեական գործի վարույթը պետք է կարճել և Սվետլանա Գրիգորյանի և Սպարտակ Բաղդասարյանի նկատմամբ քրեական հետապնդումը դադարեցնել` վաղեմության ժամկետներն անցնելու հիմքով:
Քննության առնելով գույքի վրա դրված կալանքի հարցը, դատարանը գտնում է, որ Սվետլանա Գրիգորյանի անվամբ գրանցված ՙVOLKSWAGEN GOLF 1.8՚ մակնիշի 06 LU 848 և ՙSUZUKI IGNIS 1.3՚ մակնիշի 16 OU 288 պետհամարանիշների տրանպորտային միջոցների վրա 29.08.2014թ. և նրան սեփականության իրավունքով պատկանող Երևան քաղաքի Հր. Քոչար փողոցի 44 շենքի 24 բնակարանի վրա 01.09.2014թ. որոշումներով դրված կալանքը պետք է վերացնել:
Անդրադառնալով իրեղեն ապացույցների տնօրինման հարցին, դատարանը գտնում է, որ իրեղեն ապացույց ճանաչված ՙՍրտաբանության գիտահետազոտական ինստիտուտ՚ ՓԲԸ-ում կազմված հիվանդության թիվ 1634 պատմագիրը պետք է պահել քրեական գործի հետ միասին:
Ղեկավարվելով ՀՀ քրեական դատավարության օրենսգրքի 35-րդ հոդվածի 1-ին մասի 6-րդ կետով, 119-րդ, 238-րդ, 313-րդ և 379-րդ հոդվածով դատարանը`

Ո Ր Ո Շ Ե Ց

Թիվ 90154314 քրեական գործի վարույթը կարճել և ՀՀ քրեական օրենսգրքի 325-րդ հոդվածի 1-ին մասով և 38-325-րդ հոդվածի 1-ին մասով ամբաստանյալներ Սվետլանա Վիկտորի Գրիգորյանի /ծնված 1950 թվականի մարտի 8-ին` Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, չդատված, աշխատում է ՙՍրտաբանության գիտահետազոտական ինստիտուտ՚ ՓԲԸ-ում` որպես սրտի ռիթմի խանգարման բաժանմունքի վարիչ, խնամքին` 2-րդ խմբի հաշմանդամ ամուսինը, բնակվող` քաղաք Երևան, Այգեձորի 72/28/ և Սպարտակ Սուրիկի Բաղդասարյանի /ծնված 1967 թվականի նոյեմբերի 17-ին` Կապան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, չդատված, ծառայել է Գորիսի զինվորական կոմիսարիատում` որպես զորակոչային բաժանմունքի պետ, խնամքին` 2 անչափահաս երեխա, բնակվող` քաղաք Կապան, Սպանդարյան 6/52/ նկատմամբ քրեական հետապնդումը դադարեցնել` վաղեմության ժամկետներն անցնելու հիմքով:
Սվետլանա Գրիգորյանի և Սպարտակ Բաղդասարյանի նկատմամբ կիրառված խափանման միջոցըª ստորագրությունª չհեռանալու մասին, վերացնել:
Սվետլանա Գրիգորյանի անվամբ գրանցված ՙVOLKSWAGEN GOLF 1.8՚ մակնիշի 06 LU 848 և ՙSUZUKI IGNIS 1.3՚ մակնիշի 16 OU 288 պետհամարանիշների տրանպորտային միջոցների վրա 29.08.2014թ. և նրան սեփականության իրավունքով պատկանող Երևան քաղաքի Հր. Քոչար փողոցի 44 շենքի 24 բնակարանի վրա 01.09.2014թ. որոշումներով դրված կալանքը վերացնել:
Իրեղեն ապացույց ճանաչված ՙՍրտաբանության գիտահետազոտական ինստիտուտ՚ ՓԲԸ-ում կազմված հիվանդության թիվ 1634 պատմագիրը պահել քրեական գործի հետ միասին:
Որոշումը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո` մեկամսյա ժամկետում:



ԴԱՏԱՎՈՐ Ա.ՄԿՐՏՉՅԱՆ