ԵԱՔԴ/0231/01/15
Ո Ր Ո Շ ՈՒ Մ

քրեական հետապնդումը դադարեցնելու և քրեական գործի վարույթը կարճելու մասին

19 փետրվարի 2016թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը` նախագահությամբ դատավոր Լ.Ավետիսյանի, քարտուղարությամբ Ն.Այվազյանի, մասնակցությամբ ամբաստանյալ Մ.Պետրոսյանի, պաշտպան Կ.Մեժլումյանի, մեղադրող Ն.Աշրաֆյանի, դռնբաց դատական նիստում քննության առնելով Միքաել Արայի Պետրոսյանի (ծնված 1990 թվականի հունվարի 29-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին մեկ մանկահասակ երեխա, նախկինում չդատված, չի աշխատում, բնակվում է Արարատի մարզի Սիսավան գյուղի Գետառ փողոցի 28 տուն հասցեում, մեղադրվում է ՀՀ քրեական օրենսգրքի 325 հոդվածի 1-ին մասով, որպես խափանման միջոց է ընտրվել ստորագրություն չհեռանալու մասին) վերաբերյալ քրեական գործը:

Պ Ա Ր Զ Ե Ց

2014 թվականի հուլիսի 15-ին Երևան քաղաքի քննչական վարչության Քանաքեռ-Զեյթունի քննչական բաժնում ՀՀ քրեական օրենսգրքի 325 հոդվածի 1-ին մասով նախատեսված հանցագործության հատկանիշներով հարուցվել է թիվ 09121114 քրեական գործը:
Նախաքննության մարմնի 2014 թվականի նոյեմբերի 24-ի որոշմամբ Միքաել Արայի Պետրոսյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 325 հոդվածի 1-ին մասով այն արարքի կատարման համար, որ նա իր հորեղբոր դստեր` Եվգինե Պետրոսյանի ԱԱ սերիայի 116781 համարով ծննդյան վկայականը գործով չպարզված անձի կողմից իր անվամբ կեղծելուց հետո, 2013 թվականի դեկտեմբեր ամսին այն օգտագործելով դիմել է ոստիկանության Քանաքեռ-Զեյթունի բաժնի անձնագրային բաժանմունք` ՀՀ քաղաքացու անձնագրով անձնագրավորվելու համար:
2014 թվականի նոյեմբերի 24-ին Միքաել Արայի Պետրոսյանի նկատմամբ որպես խափանման միջոց է ընտրվել չհեռանալու մասին ստորագրությունը:
2015 թվականի նոյեմբերի 27-ի որոշմամբ թիվ 09121114 քրեական գործից Միքաել Պետրոսյանի կողմից կեղծ ծննդյան վկայական օգտագործելու մասն անջատվել է, որին շնորհվել է 09126615 համարը:
2015 թվականի դեկտեմբերի 4-ին թիվ 09126615 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան` ըստ էության քննելու համար:
Դատական քննության ժամանակ պաշտպան Կարեն Մեժլումյանը միջնորդեց ՀՀ քրեական դատավարության օրենսգրքի 35 հոդվածի 1-ին մասի 6-րդ կետով` վաղեմության ժամկետներն անցնելու հիմքով Միքաել Պետրոսյանի նկատմամբ քրեական հետապնդումը դադարեցնել և քրեական գործի վարույթը կարճել:
Ամբաստանյալ Միքաել Պետրոսյանը հայտարարեց, որ համաձայն է, որպեսզի իր նկատմամբ քրեական հետապնդումը դադարեցվի և քրեական գործի վարույթի կարճվի` վաղեմության ժամկետներն անցնելու կապակցությամբ:
Մեղադրող Ն.Աշրաֆյանը միջնորդության դեմ չառարկեց:
Վերոգրյալը հաշվի առնելով, դատարանը գտնում է, որ Միքաել Արայի Պետրոսյանի նկատմամբ քրեական հետապնդումը պետք է դադարեցնել և թիվ ԵԱՔԴ/0231/01/15 քրեական գործի վարույթը կարճել, նկատի ունենալով հետևյալը.
ՀՀ քրեական դատավարության օրենսգրքի 35 հոդվածի 1-ին մասի 6-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե անցել են վաղեմության ժամկետները:
Նույն հոդվածի 6-րդ մասի համաձայն, նշված հիմքով գործի վարույթի կարճում և քրեական հետապնդման դադարեցում չի թույլատրվում, եթե դրա դեմ առարկում է մեղադրյալը: Այս դեպքում գործի վարույթը շարունակվում է սովորական կարգով:
ՀՀ քրեական օրենսգրքի 75 հոդվածի 1-ին մասի 1-ին կետի համաձայն, անձն ազատվում է քրեական պատասխանատվությունից, եթե հանցանքն ավարտված համարելու օրվանից անցել է երկու տարի` ոչ մեծ ծանրության հանցանքն ավարտված համարելու օրվանից:
Նույն հոդվածի 2-րդ մասի համաձայն, վաղեմության ժամկետը հաշվարկվում է հանցանքն ավարտված համարելու օրվանից մինչև դատավճռի օրինական ուժի մեջ մտնելու պահը: Տևող հանցագործության դեպքում վաղեմության ժամկետը հաշվարկվում է արարքը դադարելու, իսկ շարունակվող հանցագործության դեպքում` վերջին արարքը կատարելու պահից:
Նույն հոդվածի 3-րդ մասի համաձայն, վաղեմության ժամկետի ընթացքն ընդհատվում է, եթե մինչև նշված ժամկետներն անցնելն անձը կատարում է միջին ծանրության, ծանր կամ առանձնապես ծանր նոր հանցանք: Այս դեպքում վաղեմության ժամկետի հաշվարկն սկսվում է նոր հանցանքի ավարտված համարելու պահից:
ՀՀ քրեական օրենսգրքի 19 հոդվածի 2-րդ մասի համաձայն, ոչ մեծ ծանրության հանցագործություններ են համարվում դիտավորությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երկու տարի ժամկետով ազատազրկումը, կամ որոնց համար նախատեսված է ազատազրկման հետ կապ չունեցող պատիժ, ինչպես նաև անզգուշությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երեք տարի ժամկետով ազատազրկումը:
Միքաել Պետրոսյանին ՀՀ քրեական օրենսգրքի 325 հոդվածի 1-ին մասով մեղսագրված արարքի համար նախատեսված առավելագույն պատիժը երկու տարի ժամկետով ազատազրկումն է, ուստի տվյալ հոդվածով նախատեսված հանցավոր արարքը դասվում է ոչ մեծ ծանրության հանցագործությունների շարքին: Հետևաբար, այն կատարած անձն ազատվում է քրեական պատասխանատվությունից, եթե հանցանքն ավարտված համարելու օրվանից մինչև դատավճռի օրինական ուժի մեջ մտնելու պահն անցել է երկու տարի:
Հաշվի առնելով, որ Միքաել Արայի Պետրոսյանը հանցանքը կատարել է 2013 թվականի դեկտեմբեր ամսին, կատարված հանցավոր արարքը դասվում է ոչ մեծ ծանրության հանցագործությունների շարքին, ինչպես նաև այն, որ բացակայում են վաղեմության ժամկետներն անցնելու հետևանքով քրեական պատասխանատվությունից ազատելուն խոչընդոտ հանդիսացող օրենսդրությամբ սահմանված պայմանները, դատարանը գտնում է, որ վաղեմության ժամկետներն անցնելու հետևանքով Միքաել Պետրոսյանին պետք է ազատել քրեական պատասխանատվությունից:
Դատարանը գտնում է, որ Միքայել Պետրոսյանի նկատմամբ կիրառված խափանման միջոցը` չհեռանալու մասին ստորագրությունը, պետք է թողնել անփոփոխ, մինչև որոշման օրինական ուժի մեջ մտնելը:
Դատարանը գտնում է, որ ՀՀ քննչական կոմիտեի Քանաքեռ-Զեյթուն վարչական շրջանի քննչական բաժնի ավագ քննիչի 30.11.2015թ. որոշմամբ ապացույց ճանաչված այլ փաստաթուղթ հանդիսացող` քրեական գործի նյութերում առկա գունավոր տպիչ սարքով տպած ծննդյան վկայականի սկանավորված օրինակը /հատոր 2, գ.թ. 18/, ՀՀ ոստիկանության ԱՎՎ պետ Ն.Մուրադխանյանի զեկուցագիրը /հատոր 1, գ.թ. 149/, Քանաքեռ-Զեյթուն անձնագրային բաժանմունքի պետի պաշտոնակատար Ս.Բարոյանի 28.12.2014թ. թիվ 22/5-1965 զեկուցագիրը /գ.թ. 150/, 06.03.2014թ. թիվ 302 գրառումը /հատոր 1 գ.թ. 152/, 24.04.2014թ. թիվ Զ 4003 գրությունը և կից տեղեկանքը /հատոր 1, գ.թ. 161-162/ պետք է պահել սույն քրեական գործում:
Ելնելով վերոգրյալից և ղեկավարվելով ՀՀ քրեական օրենսգրքի 19, 75 հոդվածներով, ՀՀ քրեական դատավարության օրենսգրքի 35 հոդվածի 1-ին մասի 6-րդ կետով, 313 հոդվածով, դատարանը
Ո Ր Ո Շ Ե Ց

Միքաել Արայի Պետրոսյանի նկատմամբ ՀՀ քրեական օրենսգրքի 325 հոդվածի 1-ին մասով քրեական հետապնդումը դադարեցնել և թիվ ԵԱՔԴ/0231/01/15 քրեական գործի վարույթը կարճել` քրեական պատասխանատվության ենթարկելու վաղեմության ժամկետն անցնելու հիմքով:
Միքաել Արայի Պետրոսյանի նկատմամբ կիրառված խափանման միջոցը` ստորագրություն չհեռանալու մասին, թողնել անփոփոխ, մինչև որոշման օրինական ուժի մեջ մտնելը:
ՀՀ քննչական կոմիտեի Քանաքեռ-Զեյթուն վարչական շրջանի քննչական բաժնի ավագ քննիչի 30.11.2015թ. որոշմամբ ապացույց ճանաչված այլ փաստաթուղթ հանդիսացող` քրեական գործի նյութերում առկա գունավոր տպիչ սարքով տպած ծննդյան վկայականի սկանավորված օրինակը /հատոր 2, գ.թ. 18/, ՀՀ ոստիկանության ԱՎՎ պետ Ն.Մուրադխանյանի զեկուցագիրը /հատոր 1, գ.թ. 149/, Քանաքեռ-Զեյթուն անձնագրային բաժանմունքի պետի պաշտոնակատար Ս.Բարոյանի 28.12.2014թ. թիվ 22/5-1965 զեկուցագիրը /գ.թ. 150/, 06.03.2014թ. թիվ 302 գրառումը /հատոր 1 գ.թ. 152/, 24.04.2014թ. թիվ Զ 4003 գրությունը և կից տեղեկանքը /հատոր 1, գ.թ. 161-162/ պահել սույն քրեական գործում:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր` Լ. Ավետիսյան