ԵԱՔԴ/0176/01/15
Ո Ր Ո Շ ՈՒ Մ

քրեական հետապնդումը դադարեցնելու և քրեական գործի վարույթը կարճելու մասին

7 դեկտեմբերի 2015թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը` նախագահությամբ դատավոր Լ.Ավետիսյանի, քարտուղարությամբ Ն.Այվազյանի, մասնակցությամբ` մեղադրող Ն.Աշրաֆյանի, ամբաստանյալ Ա.Դավթյանի, պաշտպան Կ.Քաջազնունու, տուժող Ն.Մկոյանի, տուժողի ներկայացուցիչ` Մ.Ասլանյանի, դռնբաց դատական նիստում, քննության առնելով Արմինե Ազատի Դավթյանի (ծնված 1981 թվականի հունվարի 7-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնալուծված, խնամքին երկու անչափահաս երեխա, նախկինում չդատված, չի աշխատում, բնակվում է Երևան քաղաքի Կոմիտասի պողոտայի 23/3 շենքի թիվ 46 բնակարան հասցեում, մեղադրվում է ՀՀ քրեական օրենսգրքի 117 հոդվածով, որպես խափանման միջոց է ընտրվել չհեռանալու մասին ստորագրությունը) վերաբերյալ քրեական գործը,

Պ Ա Ր Զ Ե Ց

2015 թվականի սեպտեմբերի 8-ին ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնում ՀՀ քրեական օրենսգրքի 117 հոդվածով նախատեսված հանցագործության հատկանիշներով հարուցվել է թիվ 14805715 քրեական գործը:
2015 թվականի սեպտեմբերի 23-ին Արմինե Ազատի Դավթյանի նկատմամբ որպես խափանման միջոց է ընտրվել չհեռանալու մասին ստորագրությունը:
Նախաքննության մարմնի 2015 թվականի սեպտեմբերի 24-ի որոշմամբ Արմինե Ազատի Դավթյանը ներգրավվել է որպես մեղադրյալ ՀՀ քրեական օրենսգրքի 117 հոդվածով այն արարքի կատարման համար, որ նա 2015թ. օգոստոսի 28-ին, ժամը 0230-ի սահմաններում Երևան քաղաքի Կոմիտասի 5ա շենքի 1-ին հարկի հարթակում, Նունե Մկոյանի նկատմամբ ունեցած անձնական անբարյացակամ հարաբերությունների կապակցությամբ ծագած վիճաբանության ընթացքում դիտավորությամբ ձեռքերով և ոտքերով հարվածներ է հասցրել վերջինիս մարմնի տարբեր մասերին, շուրջ 15 մետր մազերից քաշելով հասցրել շենքի 2-րդ մուտքի մոտ` Նունե Մկոյանի առողջությանը պատճառելով թեթև վնաս` առողջության կարճատև քայքայումով:
2015 թվականի հոկտեմբերի 02-ին թիվ 14805715 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթույն վարչական շրջանների ընդհանուր իրավասության դատարան` ըստ էության քննելու համար:
Դատաքննության ժամանակ տուժող Նունե Մկոյանը դիմում է ներկայացրել դատարան, հայտնելով, որ ինքն ու ամբաստանյալ Արմինե Դավթյանը հաշտվել են: Վերջինս ամբողջությամբ հատուցել է իրեն պատճառած նյութական վնասը: Խնդրել է Արմինե Դավթյանի նկատմամբ քրեական հետապնդումը դադարեցնել:
Ամբաստանյալ Արմինե Դավթյանը դիմում է ներկայացրել դատարան, հայտնելով, որ ինքն ու տուժողը հաշտվել են և համաձայն է, որպեսզի իր նկատմամբ քրեական հետապնդումը դադարեցվի և քրեական գործի վարույթը կարճվի` հաշտության հիմքով:
Մեղադրող Ն.Աշրաֆյանը գտավ, որ ամբաստանյալի նկատմամբ քրեական հետապնդումը պետք է դադարեցնել և քրեական գործի վարույթը կարճել` հաշտության հիմքով:
Վերոգրյալը հաշվի առնելով, դատարանը գտնում է, որ Արմինե Ազատի Դավթյանի նկատմամբ քրեական հետապնդումը պետք է դադարեցնել և թիվ ԵԱՔԴ/0176/01/15 քրեական գործի վարույթը կարճել, նկատի ունենալով հետևյալը.
ՀՀ քրեական դատավարության օրենսգրքի 35 հոդվածի 1-ին մասի 5-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական դատավարության օրենսգրքի 183 հոդվածի 1-ին մասի համաձայն, ՀՀ քրեական օրենսգրքի 117-րդ հոդվածով (...) նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի, մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
ՀՀ քրեական օրենսգրքի 73 հոդվածի համաձայն, ոչ մեծ ծանրության հանցանք կատարած անձը կարող է ազատվել քրեական պատասխանատվությունից, եթե նա հաշտվել է տուժողի հետ և հատուցել կամ այլ կերպ հարթել է նրան պատճառած վնասը:
ՀՀ քրեական օրենսգրքի 19 հոդվածի 2-րդ մասի համաձայն, ոչ մեծ ծանրության հանցագործություններ են համարվում դիտավորությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երկու տարի ժամկետով ազատազրկումը, կամ որոնց համար նախատեսված է ազատազրկման հետ կապ չունեցող պատիժ: ՀՀ քրեական օրենսգրքի 117 հոդվածով նախատեսված արարքները դասվում են ոչ մեծ ծանրության հանցագործությունների շարքին:
Անդրադառնալով ամբաստանյալի նկատմամբ կիրառված խափանման միջոցին, դատարանը գտնում է, որ Արմինե Դավթյանի նկատմամբ ընտրված խափանման միջոցը` չհեռանալու մասին ստորագրությունը, պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 33 հոդվածի 2-րդ մասով, 35 հոդվածի 1-ին մասի 5-րդ կետով, 36, 183 և 313 հոդվածներով, դատարանը
Ո Ր Ո Շ Ե Ց

Արմինե Ազատի Դավթյանի նկատմամբ ՀՀ քրեական օրենսգրքի 117 հոդվածով քրեական հետապնդումը դադարեցնել և նրա վերաբերյալ թիվ ԵԱՔԴ/0176/01/15 քրեական գործի վարույթը կարճել` ամբաստանյալի հետ տուժող Նունե Մկոյանի հաշտվելու հիմքով:
Արմինե Ազատի Դավթյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր` Լ. Ավետիսյան