ԵԱՔԴ/0171/01/15
Ո Ր Ո Շ ՈՒ Մ

քրեական հետապնդումը դադարեցնելու և քրեական գործի վարույթը կարճելու մասին

9 դեկտեմբերի 2015թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը` նախագահությամբ դատավոր Լ.Ավետիսյանի, քարտուղարությամբ Ն.Այվազյանի, մասնակցությամբ` մեղադրող Ա.Առաքելյանի, ամբաստանյալ Գ.Կոջամանյանի, տուժող Ա.Դավթյանի, դռնբաց դատական նիստում, քննության առնելով Գագիկ Աշոտի Կոջամանյանի (ծնված 1988 թվականի հունիսի 3-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, նախկինում դատված, չի աշխատում, հաշվառված և բնակվում է Երևան քաղաքի Բատիկյան փողոցի 42 տուն հասցեում, մեղադրվում է ՀՀ քրեական օրենսգրքի 177 հոդվածի 1-ին մասով, որպես խափանման միջոց է ընտրվել չհեռանալու մասին ստորագրությունը) վերաբերյալ քրեական գործը,

Պ Ա Ր Զ Ե Ց

2015 թվականի սեպտեմբերի 3-ին ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում ՀՀ քրեական օրենսգրքի 177 հոդվածի 1-ին մասով նախատեսված հանցագործության հատկանիշներով հարուցվել է թիվ 09117815 քրեական գործը:
2015 թվականի սեպտեմբերի 12-ին Գագիկ Աշոտի Կոջամանյանի նկատմամբ որպես խափանման միջոց է ընտրվել չհեռանալու մասին ստորագրությունը:
Նախաքննության մարմնի 2015 թվականի սեպտեմբերի 16-ի որոշմամբ Գագիկ Աշոտի Կոջամանյանը ներգրավվել է որպես մեղադրյալ ՀՀ քրեական օրենսգրքի 177 հոդվածի 1-ին մասով այն արարքի կատարման համար, որ նա 2015թ. օգոստոսի 22-ին, ժամը 2020-ի սահմաններում, Երևան քաղաքի Ազատության 24 հասցեի մոտակայքում թիվ 58 երթուղային տաքսու մեջ գտնվող Արփինե Էրնեստի Դավթյանին պատկանող պայուսակից գաղտնի հափշտակել է զգալի չափի` 5.500 ՀՀ դրամ արժողության դրամապանակը, որի մեջ եղել է 68.000 ՀՀ դրամ գումար, 1.500 ՀՀ դրամ արժողության էլեկտրական կրիչ և ՙՀայէկոնոմբանկ՚ ՓԲԸ-ի պլաստիկ քարտը:
2015 թվականի հոկտեմբերի 02-ին թիվ 09117815 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթույն վարչական շրջանների ընդհանուր իրավասության դատարան` ըստ էության քննելու համար:
Դատական քննության ժամանակ տուժող Արփինե Դավթյանը հայտնեց, որ ինքը հաշտվել է ամբաստանյալի հետ: Վերջինս ամբողջությամբ հատուցել է հանցագործությամբ իրեն պատճառած վնասը և նրա նկատմամբ որևէ պահանջ չունի: Խնդրեց Գագիկ Կոջամանյանի նկատմամբ քրեական հետապնդումը դադարեցնել:
Ամբաստանյալ Գագիկ Կոջամանյանը հայտնեց, որ ինքը և տուժողը հաշտվել են, ամբողջությամբ հատուցել է հանցագործությամբ նրան պատճառած վնասը: Համաձայն է, որպեսզի իր նկատմամբ քրեական հետապնդումը դադարեցվի և քրեական գործի վարույթը կարճվի` տուժողի հետ հաշտության հիմքով:
Մեղադրող Ա.Առաքելյանը միջնորդեց ՀՀ քրեական դատավարության օրենսգրքի 35 հոդվածի 1-ին մասի 2-րդ կետով ամբաստանյալի նկատմամբ քրեական հետապնդումը դադարեցնել և քրեական գործի վարույթը կարճել:
Վերոգրյալը հաշվի առնելով, դատարանը գտնում է, որ Գագիկ Աշոտի Կոջամանյանի նկատմամբ քրեական հետապնդումը պետք է դադարեցնել և թիվ ԵԱՔԴ/0171/01/15 քրեական գործի վարույթը կարճել, նկատի ունենալով հետևյալը.
ՀՀ քրեական դատավարության օրենսգրքի 35 հոդվածի 1-ին մասի 5-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական դատավարության օրենսգրքի 183 հոդվածի 1-ին մասի համաձայն, ՀՀ քրեական օրենսգրքի 177-րդ հոդվածի 1-ին մասով (...) նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի, մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
ՀՀ քրեական օրենսգրքի 73 հոդվածի համաձայն, ոչ մեծ ծանրության հանցանք կատարած անձը կարող է ազատվել քրեական պատասխանատվությունից, եթե նա հաշտվել է տուժողի հետ և հատուցել կամ այլ կերպ հարթել է նրան պատճառած վնասը:
ՀՀ քրեական օրենսգրքի 19 հոդվածի 2-րդ մասի համաձայն, ոչ մեծ ծանրության հանցագործություններ են համարվում դիտավորությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երկու տարի ժամկետով ազատազրկումը, կամ որոնց համար նախատեսված է ազատազրկման հետ կապ չունեցող պատիժ: ՀՀ քրեական օրենսգրքի 177 հոդվածի 1-ին մասով նախատեսված արարքները դասվում են ոչ մեծ ծանրության հանցագործությունների շարքին:
Անդրադառնալով ամբաստանյալի նկատմամբ կիրառված խափանման միջոցին, դատարանը գտնում է, որ Գագիկ Կոջամանյանի նկատմամբ ընտրված խափանման միջոցը` չհեռանալու մասին ստորագրությունը, պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 33 հոդվածի 2-րդ մասով, 35 հոդվածի 1-ին մասի 5-րդ կետով, 36, 183 և 313 հոդվածներով, դատարանը
Ո Ր Ո Շ Ե Ց

Գագիկ Աշոտի Կոջամանյանի նկատմամբ ՀՀ քրեական օրենսգրքի 177 հոդվածի 1-ին մասով քրեական հետապնդումը դադարեցնել և նրա վերաբերյալ թիվ ԵԱՔԴ/0171/01/15 քրեական գործի վարույթը կարճել` ամբաստանյալի հետ տուժող Արփինե Դավթյանի հաշտվելու հիմքով:
Գագիկ Աշոտի Կոջամանյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր` Լ. Ավետիսյան