Գործ No ԵԱՔԴ/0134/01/15

ԴԱՏԱՎՃԻՌ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՙ02՚ փետրվարի 2016թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը,

նախագահությամբ` դատավոր Արթուր Մկրտչյանի
քարտուղարությամբ` Միլենա Սարգսյանի
Շուշան Վանոյանի
Օֆելյա Կիրակոսյանի
մասնակցությամբ`
մեղադրողներ Տիրայր Կարապետյանի
Արա Մնացականյանի
պաշտպան Ռաֆայել Ամիխանյանի
տուժող Նարեկ Մովսիսյանի
տուժողի ներկայացուցիչ Երեմ Սարգսյանի

դատարանում, դռնբաց դատական նիստում քննեց քրեական գործն ըստ մեղադրանքի Գոռ Արմենի Մարգարյանի /ծնված 1992 թվականի դեկտեմբերի 24-ին` Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, չի աշխատում, չամուսնացած, նախկինում չդատված, բնակվող` Երևան քաղաքի Արշակունյաց փողոցի 44/3-րդ շենքի 58-րդ բնակարանում/ մեղադրվում է ՀՀ քրեական օրենսգրքի 258-րդ հոդվածի 3-րդ մասի 4-րդ կետով:

Գործի դատավարական նախապատմությունը

2015 թվականի ապրիլի 09-ին Երևան քաղաքի Արաբկիր և Քանաքեռ-Զեյթուն վարչական շրջանների դատախազությունում ՀՀ քրեական օրենսգրքի 113-րդ հոդվածի 2-րդ մասի 6-րդ կետով հարուցվել է թիվ 14201115 քրեական գործը:
2015 թվականի ապրիլի 21-ին Գոռ Արմենի Մարգարյանի նկատմամբ որպես խափանման միջոց է կիրառվել ստորագրություն` չհեռանալու մասին:
2015 թվականի ապրիլի 28-ին Գոռ Արմենի Մարգարյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 113-րդ հոդվածի 2-րդ մասի 6-րդ կետով:
2015 թվականի ապրիլի 28-ին թւվ 14201115 քրեական գործի նյութերով` ՀՀ քրեական օրենսգրքի 333-րդ հոդվածի 1-ին մասով հարուցվել է նոր` թիվ 14125915 քրեական գործը և այն առանձնացվել առանձին վարույթում:
2015 թվականի հունիսի 27-ին Գոռ Մարգարյանին առաջադրված մեղադրանքը փոփոխվել է, նրան նոր մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 4-րդ կետով և նա ներգրավվել է որպես մեղադրյալ:
2015 թվականի հուլիսի 10-ին թիվ 14201115 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:

Գործի փաստական հանգամանքները

Նախաքննության մարմինն ամբաստանյալ Գոռ Մարգարյանին ՀՀ քրեական օրենսգրքի 258-րդ հոդվածի 3-րդ մասի 4-րդ կետով մեղադրանք է առաջադրել, որ ՙնա 2015թ. ապրիլի 6-ին` ժամը 14:30-ի սահմաններում, Երևան քաղաքի Հ.Էմին 123 հասցեում գտնվող Հայ-Ռուսական /Սլավոնական/ համալսարանի հետևի մուտքի մոտ` խմբով, որը դրսևորվել է նաև անձի նկատմամբ բռնություն գործադրելով, հասարակական կարգը կոպիտ կերպով խախտելու դիտավորությամբ, հասարակության նկատմամբ իր բարձր դիրքը և սեփական անձի կարծեցյալ առավելություններն ընդգծելու մոլուցքով տարված, համալսարանի ուսանողների և տարածքում գտնվող բնակարանների բնակիչների նկատմամբ դրսևորել է բացահայտ անհարգալից վերաբերմունք, այն է՝ բարձրաձայն գոռգռացել է և տվել է հայհոյանքներ, որի ընթացքում բռնություն է գործադրել Նարեկ Նորայրի Մովսիսյանի նկատմամբ, այն է` բռունցքով հարվածել է վերջինիս դեմքին` դիտավորությամբ առողջությանը պատճառելով միջին ծանրության վնաս՚:

Ապացույցների հետազոտում

Առաջադրված մեղադրանքում ամբաստանյալ Գոռ Արմենի Մարգարյանն իրեն մեղավոր չի ճանաչել և դատաքննության փուլում ցուցմունք է տվել, որ 2015թ. ապրիլի 6-ին գնացել է ՙՀայ-Ռուսական Սլավոնական՚ համլսարան` իրեն դուր եկած աղջկա համակուրսեցիներին հադիպելու և նրանց հետ խոսելու համար: Տեսել է մի տղայի, նրա հետևից ձայն տվել, որ նա սպասի, մոտեցել է նրան, ներկայացել ու հարցրել, թե նա որ կուրսում է սովորում, այդ տղան ներկայացել է որպես Նարեկ և ասել, որ սովորում է մենեջմենթի ֆակուլտետի առաջին կուրսում` առաջին խմբում: Ինքը Նարեկին հարցրել է, թե նա երկրորդ խմբից ում է ճանաչում, իսկ նա հեգնական տոնով նրան ասել է, որ բոլորին էլ ճանաչում է, որից հետո նույն հեգնական տոնով իրեն հարցրել է, թե իր ուզածն ինչ է և առաջարկել է իրար հետ քայլել: Երբ իրենք հասել են համալսարանի հետևի պատի մոտ, Նարեկն իրեն ՙարա՚ դիմելով հեգնանքով հարցրել է, թե հիմա ասի, թե իր ուզածն ինչ է, բռնել է իր կրծքավանակի շորերից, իրեն հետ հրել և ցանկացել է հարվածել: Այդ ժամանակ ինքն աջ ձեռքով հարվածել է Նարեկի դեմքին, որից վերջինս վայր է ընկել, իսկ ինքը ձեռքի հատվածում ուժեղ ցավ է զգացել և ձեռքը սեղմելով որովայնին` հեռացել է: Ամբաստանյալը միաժամանակ նշել է, որ այդ ընթացքում իրենց հետ այլ մարդ չի եղել, չի հայհոյել և խուլիգանություն չի կատարել:

Ամբաստանյալ Գոռ Մարգարյանին վերագրվող արարքը հիմնավորվել է դատաքննությամբ հետազոտված հետևյալ ապացույցներով.

Տուժող Նարեկ Մովսիսյանը դատաքննության փուլում ցուցմունք է տվել, որ սովորում է Երևանի ՙՀայ-Ռոսական սլավոնական՚ համալսարանի 1-ին կուրսում: 2015թ. ապրիլի 6-ին ժամը 14.00-ի սահմաններում համալսարանի հետևի մուտքից մտել է համալսարանի տարածք և այդ ժամանակ սրճարանում նստած մի տղա, որին հետագայում ճանաչել է` Գոռ Մարգարյանն է եղել, իր հետևից բղավել է, որ ինքը կանգնի: Ինքը կանգնել է տեղում, իսկ այդ տղան մոտեցել է իրեն և հարցրել է, թե նա որ կուրսից է, իսկ ինքը պատասխանել է, որ սովորում է առաջին կուրսում մենեջմենտի ֆակուլտետում: Դրանից հետո այդ տղան հարցրել է, որ խմբից է, իսկ ինքը նրան պատասխանել է, որ առաջին խմբից է: Դրանից հետո այդ տղան իրեն հարցրել է, երկրորդ խմբից ինչ որ մեկի ճանաչում է, թե ոչ, ինքը պատասխանել է, որ գրեթե բոլորին ճանաչում է և հարցրել է ինչն է նրա հարցերի պատճառը: Այդ տղան ասել է, որ ինքը ուզած աղջիկ ունի երկրորդ խմբից, և ցանկանում է այդ հարցով խոսել: Ինքն այդ տղային առաջարկել է մի կողմ գնալ և խոսել քանի որ դասախոսները կարող էին իրեն տեսնել: Այնուետև իրենք դուրս են եկել համալսարանի դարպասներով, քայլել դեպի համալսարնի հետնամասում գտնվող հատված և այդ տղան հեգնական տոնով ասել է, որ ցանկանում է իրենց կուրսի բոլոր տղաներին հանդիպել և զգուշացնել, որ այդ աղջկա հարցում հանկարծ ՙչշշկռվեն՚: Այդ ժամանակ իր նյարդերը տեղի են տվել, ինքը բռնել է այդ տղայի դոշերից, ասել որ նա գժվել է, և այդ ժամանակ էլ այդ տղան աջ բռունցքով հարվածել է իր դեմքին, որի պատճառով ինքը կորցրել է հավասարակշռությունը և ընկել գետին, իսկ այդ տղան բռնելով իր ձեռքը դիմել է փախուստի: Այնուհետև ինքը զանգահարել է իր ընկեր Արայիկ Ղուկասյանին և խնդրել գալ իր մոտ: Մոտ տաս րոպե հետո Արայիկը եկել է իր մոտ, իրեն տարել Մալխասյան փողոցի վրա գտնվող բիստրո, որտեղ բիստրոյի աշխատակցուհի տիկին Օսիկը իր դեմքին սառույց է դրել, սակայն քանի որ արյան հոսքը չի դադարել, ուստի ինքը զանգահարել է իր հորը տեղյակ պահել կատարվածի մասին որն էլ իրեն տարել է հիվանդանոց:

Վկա Դիանա Էդուարդի Մելիք-Նուբարյանը դատաքննության փուլում ցուցմունք է տվել, որ աշխատում է ՙՀայ-Ռոսական սլավոնական՚ համալսարանի մոտ գտնվող Հ.Էմին 134-րդ հասցեում գործող մթերային խանութում` որպես վաճառողուհի: 2015թ. ապրիլի 6-ին ժամը 15.00-ի սահմաններում ինքը գտնվել է խանութում, երբ խանութ է մտել մի տղա և գնել 5 շիշ ջուր ու երկու տուփ անձեռնոցիկ: Այնուհետև տիկին Գոհարից իմացել է, որ նույն օրը համալսարանի մոտ վիճաբանություն է տեղի ունեցել, որի ժամանակ մարմնական վնասվածք է ստացել մի տղա և այդ ջուրն ու անձեռնոցիկները գնել են նրա համար:

Վկա Օվսաննա Միսակյանը դատաքննության փուլում ցուցմունք է տվել, որ աշխատում է Մալխասյան փողոցի վրա գտնվող բիստրոյում և որպես հաճախորդներ ճանաչում է Նարեկ Մովսիսյանին և Արա Ղուկասյանին: 2015թ. ապրիլի 6-ին ժամը 14.00-ից 15.00-ն ընկած ժամանակահատածում բիստրո են գնացել Արան և Նարեկը, վերջինիս դեմքից արյուն է հոսել: Ինքը տեղում Նարեկին առաջարկել է լվացվել, այնուհետև նրա դեմքին սառույց է դրել, որ արյան հոսքը դադարի: Շուրջ մեկ ժամ բիստրոյում մնալուց հետո այդպես էլ Նարեկի քթից արյան հոսքը չի դադարել և ինքը խորհուրդ է տվել նրան գնալ հիվանդանոց, որից հետո Նարեկը և Արան դուրս են եկել բիստրոյից ու հեռացել: Քանի որ Նարեկն իրեն վատ է զգացել, ինքը նրան չի հարցրել, թե ինչ է պատահել:

Վկա Նիկոլայ Արշակի Առաքելյանը դատաքննության փուլում ցուցմունք է տվել, որ սովորում է Երևանի ՙՀայ-Ռոսական սլավոնական՚ համալսարանի մենեջմենթի ֆակուլտետի 2-րդ կուրսում, և Նարեկ Մովսիսյանն իր համակուսեցին է: Ինքը համալսարանի ուսանողների և իր համակուրսեցիների խոսակցություններից տեղյակ է, որ 2015թ. ապրիլի 6-ին վիճաբանություն է եղել համալսարանի տարածքումª համալսարանի ուսաողների և դրսից եկած տղաների միջև, որի ժամանակ մարմնական վնասվածքներ է ստացել Նարեկ Մովսիսյանը:

Վկա Արթուր Ֆելիքսի Ստեփանյանը նախաքննության փուլում ցուցմունք է տվել, որ սովորում է Երևանի ՙՀայ-Ռոսական սլավոնական՚ համալսարանի օտար լեզուներ ֆակուլտետի 4-րդ կուրսում: 2015թ. ապրիլի 6-ին ժամը 15.00-ի սահմաններում դուրս է եկել համալսարանի բակ ծխելու և երբ քայլելով մոտեցել է համալսարանի բակում գտնվող ցայտաղբյուրին Սևքարեցի Սաքոյի փողոցի վրա գտնվող մուտքի մոտ տեսել է հավաքված 6-7 տղաների: Այնուհետև տեսել է, որ այդ կողմ են գնում համալսարանի անվտանգության երկու աշխատակից: Դրանից հետո վերադարձել է դասի, իսկ հետագայում իմացել է, որ համալսարանում վիճաբանություն է եղել, որի ժամանակ դեմքի շրջաում մարմնական վնասվածք է ստացել համալսարանի առաջին կուրսի ուսանող Նարեկ Մովսիսյանը, ում ինքը ճանաչում է և գտնում են մտերիմ փոխհարարբերությունների մեջ:
Հ.1 գ/թ 61-65

Վկա Արա Տիգրանի Ղուկասյանը նախաքննության փուլում ցուցմունք է տվել, որ շուրջ մեկ տարի է ճանաչում է Նարեկ Մովսիսյանին, որի հետ ընկերներ են: 2015թ. ապրիլի 6-ին ժամը 15.00-ի սահմաններում իրեն է զանգահարել Նարեկը և ասել է, որ Սլավոնական համալսարանի հետևի մասում ինչ որ մեկի հետ վիճաբանել է, որի ընթացքում վնասել է աչքը և խնդրել է որ ինքը շուտ գնա իր մոտ: Ինքը շուտ գնացել է Նարեկի մոտ և երբ հասել է տեղ տեսել է, որ Նարեկը նստած է համալսարանի կողքի պարսպի մոտ: Իրենք փողոցի կանգնեցրել են պատահական տաքսի մեքենա և գնացել են ալխասյան փողոցի վրա գտնվող բիստրո, որտեղ բիստրոյի աշխատակցուհի տիկին Օսիկը Նարեկի դեմքին սառույց է դրել, սակայն քանի որ արյան հոսքը չի դադարել, ուստի Նարեկը զանգահարել է իր հորը տեղյակ պահել կատարվածի մասին, որից հետո իրենք գնացել են Նարեկենց տուն, որտեից էլ նրա հայրը նրան տարել է հիվանդանոց:
Հ.1 գ/թ 256-258

Վկա Պողոս Բերբերյանը նախաքննության փուլում ցուցմունք է տվել, որ Գոռ Մարգարյանն իր մտերիմ ընկերն է: 2015թ. ապրիլի 6-ին ժամը 15.00-ի սահմանեորւմ Գոռը զանգահարել է իրեն և ասել է, որ ինքը գնա իրենց տուն: Երբ ինքը հասել է Գոռենց տուն, տեսել է Գոռին ձեռքը վիրակապած: Այդ ժամանակ Գոռն իրեն պատմել է, որ նույն օրը գնացել է Սլավոնական համալսարան իր ուզած աղջկա համակուրսեցիներին հադիպելու և նրանց տեղեկացնելու, որ ինքն այդ աղջկան ուզող է: Համալսարանում հանդիպել է Նարեկ անունով մի տղայի, որն իր հետ ժարգոնով է խոսել և այդ պատճառով ինքը հարվածել է Նարեկի դեմքին և վնասել իր ձեռքը:
Հ.2 գ/թ 55-58

Վկա Գոհար Օնիկի Զաքարյանը նախաքննության փուլում ցուցմունք է տվել այն մասին, որ Սլավոնական համալսարանի հարևանությամբ Հ.Էմին 134-րդ հասցեում իր ամուսին ունի մթերային խանութ և ժամանակ առ ժամանակ ªամուսնու բացակայության դեպքում ինքը գնում է խանութ: 2015թ. ապրիլի 6-ին ժամը 15.00-ի սահմաններում գտնվել է խանոթում, երբ խանութ է մտել մի տղա և գնել է շշով ջրեր: Այդ տղայի դուրս գալուց հետո ինքը նկատել է, որ դրսում կանգնած է արյունոտ դեմքով մի տղա: Այդ ժամանակ խանութում եղել են նաև այլ հաճախորդներ և երբ ինքը սպասարկել է հաճախորդներին և կրկին հետ պտտվել, այդ ժամանակ այդ տղային այլևս չի տեսել: Հետագայում խանութի հաճախորդներից տեղեկացել է, որ Սլաոնական համալսարանի հետնամասում ուժեղ վիճաբանություն է եղել, որի ժամանակ մարմնական վնասվածքէ ստացել մի տղա: Այլ հագամանքներ դեպքի մասին չգիտի:
Հ.2 գ/թ 202-203

Նարեկ Մովսիսյանի մասնակցությամբ կատարված դեպքի վայրի զննության արձանագրության համաձայն` Նարեկ Մովսիսյանը մատնացույց է արել ՙՀայ-Ռուսական Սլավոնական՚ համալսարանի հետին հատվծում գտնվող վայրը և հայտարարել, որ այդ վայրում է ստացել իր մարմնական վնասվածքը:
Հ.1 գ/թ 248-251

ԱմբաստանյալԳ.Մարգարյանին առաջադրված մեղադրանքը հիմնավորվել է նաև ներքոհիշյալ ապացույցներով.

Ինքնակամ ներկայանալու մասին արձանագրության համաձայն` Գոռ Մարգարյանը 2015թ. ապրիլի 21-ին ժամը 13.25-ին ինքնակամ ներկայացել է Արաբկիր վարչական շրջանի քննչական բաժին և հայտնել, որ 2015թ. ապրիլի 6-ին ժամը 14.30-ի սահմաններում ինքն է վիաճաբանել Նարեկի հետ, որի ընթացքում մեկ անգամ բռունցքով հարվածել է Նարեկի դեմքին և դիմել փախուստի:
Հ.2 գ/թ 11

Դեպքի վայրի զննության արձանագության համաձայն` Գոռ Մարգարյանի մասնակցությամբ կատարվել է դեպքի վայրի զննություն, վերջինս մատնացույց է արել Սլավոնական համալսարանի հետին հատվածը և հայտարարել, որ այդ վայրում բռունցքով մեկ անգամ հարվածել է Նարեկ Մովսիսյանի դեմքին, որի հետևանքով վնասել է իր աջ ձեռքը, ապա նկատելով, որ նա վայր է ընկել, փախել է:
Հ.2 գ/թ 32-34

Դատաբժշկական փորձագետի թիվ 594 եզրակացության համաձայն` Նարեկ Նորայրի Մովսիսյանի մարմնական վնասվածքներըª ձախ վերին և ստորին կոպերի, ձախ աչքի սպիտակուցաթաղանթի արյունազեղումների, աջ արմնկահոդի շրջանի քերծվածքի, քթոսկրերի, այտակնակապճային համալիրի ներհրված, տեղաշարժված կոտրվածքների ձևով, որոնք հնարավոր չէ տարանջատել միմյանցից, հասցվել են բութ, կոշտ առարկայով /ներով/, հնարավոր է` որոշմամբ նշված ժամկետում և հանգամանքում, որոնք առաջացրել են առողջությանը միջին ծանրության վնաս, առողջության տևական քայքայումով:
Հ.2 գ/թ 2-3

Դատաբժշկական փորձագետի թիվ 989 եզրակացության համաձայն` Գոռ Մարգարյանի մարմնական վնասվածքներըª աջ դաստակի 4,5-րդ նախադաստակային ոսկրերի կոտրվածքների ձևով, պատճառվել են բութ առարկայով, հնարավոր է` նշված ժամկետում և հանգամանքում, պատճառվել է առողջությանը միջին ծանրության վնաս` առողջության տևական քայքայումով:
Հ.2 գ/թ 148-149

Դատարանի իրավական վերլուծությունները
Դատարանը գործով ձեռք բերված յուրաքանչյուր ապացույց գնահատելով թույլատրելիության վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, գտնում է, որ ամբաստանյալ Գոռ Մարգարյանի մեղավորությունը` Նարեկ Մովսիսյանի առողջությանը միջին ծանրության վնաս պատճառելով խուլիգանություն կատարելու` դիտավորությամբ հասարակական կարգը կոպիտ կերպով խախտելու մեջ, որն արտահայտվել է հասարակության նկատմամբ բացահայտ անհարգալից վերաբերմունքով, նախատեսված ՀՀ քրեական օրենսգրքի 258-րդ հոդվածի 3-րդ մասի 4-րդ կետով, ապացուցված է, արարքը ճիշտ է որակվել:
Վերոհիշյալ հանցանքի կատարման համար ամբաստանյալը ենթակա է քրեական պատասխանատվության և պատժի, որը նա պետք է կրի:
Ինչ վերաբերվում է վկաներ Արթուր Ստեփանյանի, Նիկոլայ Առաքելյանի, Դիանա Մելիք-Նուբարյանի, Գոհար Զաքարյանի, Արա Ղուկասյանի և Պողոս Բերբերյանի, տուժող Նարեկ Մովսիսյանի ցուցմունքները, ինչպես նաև` Գոռ Մարգարյանի հետ կատարված առերես հարցաքննության, Նարեկ Մովսիսյանի և Գոռ Մարգարյանի մասնակցությամբ կատարված դեպքի վայրի զննության, Գոռ Մարգարյանի ինքնակամ ներկայանալու մասին արձանագրությունները անթույլատրելի ապացույցներ ճանաչելու և ապացույցների շարքից հանելու մասին պաշտպան Ռաֆայել Ամիրխանյանի միջնորդությանը, ապա դատարանը գտնում է, որ այն ենթակա է մերժման, քանի որ նշված ապացույցները ձեռք են բերվել օրենքով սահմանված քրեադատավարական նորմերի պահպանմամբ և չեն հակասում միմյանց և գործով ձեռք բերված մյուս ապացույցներին:

ՀՀ քրեական օրենսգրքի 10-րդ հոդվածի համաձայնª ՙՀանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացիª համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար՚:
ՀՀ քրեական օրենսգրքի 48-րդ հոդվածի 1-ին մասի համաձայնª ՙպատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից ու ազատություններից օրենքով նախատեսված զրկմամբ կամ դրանց սահմանափակմամբ՚:
ՀՀ քրեական օրենսգրքի 48-րդ հոդվածի 2-րդ մասի համաձայնª ՙՊատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61-րդ հոդվածի 1-ին մասի համաձայն` ՙՀանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները՚:
ՀՀ քրեական օրենսգրքի 61-րդ հոդվածի 2-րդ մասի համաձայնª ՙՊատժի տեսակը և չափը որոշվում է հանցագործությանª հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվումª պատասխանատվությունը և պատիժը մեղմացնող կամ ծանրացնող հանգամանքներով՚:
ՀՀ Վճռաբեկ դատարանը 2012թ. նոյեմբերի 1-ին Սերոբ Սարգսյանի վերաբերյալ թիվ ՍԴ/0109/01/12 գործով արտահայտել է հետևյալ իրավական դիրքորոշումը. ՙ(…) պատիժ նշանակելու ընդհանուր սկզբունքները քրեական օրենքով նախատեսված այն հիմնադրույթներն են, որոնցով պետք է ղեկավարվի դատարանը պատիժ նշանակելիս: Այդ սկզբունքներն են`
ա) օրինականությունը,
բ) արդարությունը,
գ) պատժի անհատականացումը,
դ) մարդասիրությունը:
Պատիժ նշանակելու վերոնշյալ սկզբունքները սահմանում են այն հիմնական դրույթները, որոնցով ղեկավարվում է դատարանը յուրաքանչյուր քրեական գործով պատժի տեսակն ու չափն ընտրելիս:
(…) պատժի նշանակման իրավական շրջանակները սահմանված են ՀՀ քրեական օրենսգրքով: Դրա հետ մեկտեղ, սակայն, վերոնշյալ օրենքը դատարանին հնարավորություն է տվել որոշակի սկզբունքների (…) պահպանմամբ, իր ներքին համոզմանը և իրավագիտակցությանը համապատասխան, ՀՀ քրեական օրենսգրքի Ընդհանուր և Հատուկ մասերով նախատեսված սահմաններում որոշել պատժի տեսակն ու չափը: Այլ կերպ՝ ուրվագծելով կոնկրետ հանցանքի համար նշանակման ենթակա պատժի առավելագույն և նվազագույն սահմանները՝ ՀՀ քրեական օրենքը դատարանին տվել է այդ շրջանակում հայեցողություն դրսևորելու հնարավորություն:
Վճռաբեկ դատարանը գտել է, որ ՀՀ քրեական օրենսգրքի Հատուկ մասի գրեթե բոլոր հոդվածների սանկցիաներում ամրագրված վերոնշյալ մոտեցումը պայմանավորված է այն տրամաբանությամբ, որ քրեական օրենքը համընդհանուր բնույթ ունի, իսկ արարքը և հանցավորի անձը կոնկրետ են: Ուստի կոնկրետ արարքի և անձի նկատմամբ համընդհանուր քրեական օրենքով նախատեսված սանկցիան կիրառելիս դատարանը պետք է որոշակի հայեցողություն դրսևորի:
Այսինքն` առանց դատարանի հայեցողության պատժի անհատականացումն անհնար է:
(…) Պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության աստիճանի ու բնույթի, հանցավորի անձի, պատիժը մեղմացնող և ծանրացնող հանգամանքների վերլուծության հիման վրա: Նշված հանգամանքների հայեցողական և ոչ երբեք կամային գնահատման ժամանակ դատարանը պետք է ելնի ՀՀ քրեական օրենսգրքի 48-րդ հոդվածով նախատեսված՝ պատժի նպատակների իրացումն ապահովելու անհրաժեշտությունից (տե°ս Նարեկ Գևորգի Սարգսյանի գործով Վճռաբեկ դատարանի 2011 թվականի դեկտեմբերի 22-ի թիվ ԵԿԴ/0042/01/11 որոշման 14-րդ, 22-23-րդ կետերը)՚:
ՀՀ վճռաբեկ դատարանը Կարեն Հարությունյանի վերաբերյալ գործով վերլուծելով ՀՀ քրեական օրենսգրքի Ընդհանուր մասի մի շարք դրույթներ, մասնավորապես` ՀՀ քրեական օրենսգրքի 10-րդ, 48-րդ և 61-րդ հոդվածներըª հանգել է այն հետևության, որ պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, անձին բնութագրող բոլոր տվյալները և քրեական օրենքով նախատեսված պահանջներից ելնելով` հանցագործության մեջ մեղավոր անձի նկատմամբ նշանակում է այնպիսի պատիժ, որն անհրաժեշտ և բավարար է այդ անձին ուղղելու և նրա կողմից նոր հանցանքի կատարումը կանխելու համար (տե'ս ՀՀ վճռաբեկ դատարանի` Կարեն Հարությունյանի վերաբերյալ գործով 2007 թվականի նոյեմբերի 30-ի ՎԲ-201/07 որոշումը):
Ամբաստանյալ Գոռ Մարգարյանի անձը բնութագրող տվյալներ դատարանը հաշվի է առնում, որ նա բնութագրվում է դրական, ուսանող է` սովորում է ՀՀ տնտեսագիտական համալսարանում` 3-րդ կուրսում, նախկինում դատված չէ, ծառայել է ՀՀ զինված ուժերում:
Դատարանը, ամբաստանյալի պատասխանատվությունն ու պատիժը մեղմացնող հանգամանք է դիտում, որ Գ.Մարգարյանն ինքնակամ ներկայացել է վարույթն իրականացնող մարմնին, տուժողը բողոք կամ գույքային վնասի հատուցման պահանջ չի ներկայացրել և նշել է, որ հաշտվել է Գոռ Մարգարյանի հետ:
Ամբաստանյալի պատասխանատվությունն ու պատիժը ծանրացնող հանգամանքներ առկա չեն:
Քննարկելով խափանման միջոցի հարցը` դատարանը գտնում է, որ ամբաստանյալ Գոռ Մարգարյանի նկատմամբ կիրառված խափանման միջոցը` ստորագրություն` չհեռանալու մասին, պետք է թողնել անփոփոխ` մինչև դատավճռի օրինական ուժի մեջ մտնելը:
Ղեկավարվելով ՀՀ քրեական դատավարության օրենսգրքի 134-րդ, 357-360-րդ, 365-րդ, 366-րդ, 369-373-րդ և 379-րդ հոդվածներով, դատարանը`

ՎՃՌԵՑ

Գոռ Արմենի Մարգարյանին մեղավոր ճանաչել ՀՀ քրեական օրենսգրքի 258-րդ հոդվածի 3-րդ մասի 4-րդ կետով նախատեսված հանցագործության կատարման մեջ և նրա նկատմամբ պատիժ նշանակել տուգանք նվազագույն աշխատավարձի երկուհարյուրհիսնապատիկի` 250.000 /երկու հարյուր հիսուն հազար/ ՀՀ դրամի չափով:
Գոռ Մարգարյանի նկատմամբ կիրառված խափանման միջոցը` ստորագրություն` չհեռանալու մասին, թողնել անփոփոխ` մինչև դատավճռի օրինական ուժի մեջ մտնելը:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո` մեկամսյա ժամկետում:




ԴԱՏԱՎՈՐ Ա.ՄԿՐՏՉՅԱՆ