ԵԱՔԴ/0112/01/15
Ո Ր Ո Շ ՈՒ Մ

քրեական հետապնդումը դադարեցնելու և քրեական գործի վարույթը կարճելու մասին

12 հոկտեմբերի 2015թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը` նախագահությամբ դատավոր Լ.Ավետիսյանի, քարտուղարությամբ Ն.Այվազյանի, մասնակցությամբ` մեղադրող Ա.Դոլինյանի, ամբաստանյալ Տ.Խաչատրյանի, տուժող Ն.Բալյանի, դռնբաց դատական նիստում, քննության առնելով Տիգրան Վալերիի Խաչատրյանի (ծնված 1989 թվականի օգոստոսի 8-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, նախկինում չդատված, չի աշխատում, հաշվառված և բնակվում է Երևան քաղաքի, Ավան, Աճառյան փողոցի 20 շենքի թիվ 511 բնակարան հասցեում, մեղադրվում է ՀՀ քրեական օրենսգրքի 177 հոդվածի 1-ին մասով, որպես խափանման միջոց է ընտրվել չհեռանալու մասին ստորագրությունը) վերաբերյալ քրեական գործը,

Պ Ա Ր Զ Ե Ց

2015 թվականի փետրվարի 20-ին ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում ՀՀ քրեական օրենսգրքի 177 հոդվածի 1-ին մասով նախատեսված հանցագործության հատկանիշներով հարուցվել է թիվ 09103115 քրեական գործը:
2015 թվականի մայիսի 21-ին Տիգրան Վալերիի Խաչատրյանի նկատմամբ որպես խափանման միջոց է ընտրվել չհեռանալու մասին ստորագրությունը:
Նախաքննության մարմնի 2015 թվականի մայիսի 27-ի որոշմամբ Տիգրան Վալերիի Խաչատրյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 177 հոդվածի 1-ին մասով:
2015 թվականի հունիսի 19-ին Տիգրան Վալերիի Խաչատրյանին առաջադրված մեղադրանքը փոփոխվել և նրան մեղադրանք է առաջադրվել այն արարքի կատարման համար, որ նա 2015թ. փետրվարի 15-ին, ժամը 1630-ի սահմաններում մտնելով Թբիլիսյան խճուղու 2/125 շինությունում գտնվող մթերային խանութ և նկատելով Նաիրուհի Սոսի Բալյանին պատկանող դրամապանակը, օգտվելով պատեհ իրավիճակից և տեսնելով, որ դեպի իր կողմ ոչ ոք չի նայում գաղտնի հափշտակել է Ն.Բալյանի դրամապանակը, որի մեջ եղել են զգալի չափի՝ 27.000 ՀՀ դրամ գումար և 70.000 ՀՀ դրամ արժողության ՙSAMSUNG GALAXSI S3՚ մոդելի բջջային հեռախոս:
2015 թվականի հունիսի 26-ին թիվ 09103115 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթույն վարչական շրջանների ընդհանուր իրավասության դատարան` ըստ էության քննելու համար:
Դատական քննության ժամանակ տուժող Նաիրուհի Բալյանը դիմում է ներկայացրել դատարան և հայտնել, որ ամբաստանյալ Տիգրան Խաչատրյանը վերականգնել է իրեն պատճառված վնասը: Ինքը հաշտվել է ամբաստանյալի հետ, նրա նկատմամբ որևէ պահանջ և բողոք չունի: Խնդրել է Տ.Խաչատրյանի նկատմամբ քրեական հետապնդումը դադարեցնել և քրեական գործի վարույթը կարճել՝ հաշտության հիմքով:
Ամբաստանյալ Տիգրան Խաչատրյանը նույնպես դիմում է ներկայացրել դատարան և հայտնել, որ ինքը հաշտվել է տուժողի հետ, հատուցել է հանցագործությամբ նրան պատճառած վնասը: Խնդրել է իր նկատմամբ քրեական հետապնդումը դադարեցնել և քրեական գործի վարույթը կարճել:
Մեղադրող Ա.Դոլինյանը նկատի ունենալով, որ ՀՀ քրեական դատավարության օրենսգրքի 183 հոդվածով նախատեսված հանցագործությունների վերաբերյալ գործերը համարվում են մասնավոր հետապնդման գործեր, գտել է, որ տվյալ պարագայում քրեական գործի վարույթը ենթակա է կարճման և ամբաստանյալի նկատմամբ քրեական հետապնդումը ենթակա է դադարեցման:
Վերոգրյալը հաշվի առնելով, դատարանը գտնում է, որ Տիգրան Վալերիի Խաչատրյանի նկատմամբ քրեական հետապնդումը պետք է դադարեցնել և թիվ ԵԱՔԴ/0112/01/15 քրեական գործի վարույթը կարճել, նկատի ունենալով հետևյալը.
ՀՀ քրեական դատավարության օրենսգրքի 35 հոդվածի 1-ին մասի 5-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական դատավարության օրենսգրքի 183 հոդվածի 1-ին մասի համաձայն, ՀՀ քրեական օրենսգրքի 177-րդ հոդվածի 1-ին մասով (...) նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի, մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
ՀՀ քրեական օրենսգրքի 73 հոդվածի համաձայն, ոչ մեծ ծանրության հանցանք կատարած անձը կարող է ազատվել քրեական պատասխանատվությունից, եթե նա հաշտվել է տուժողի հետ և հատուցել կամ այլ կերպ հարթել է նրան պատճառած վնասը:
ՀՀ քրեական օրենսգրքի 19 հոդվածի 2-րդ մասի համաձայն, ոչ մեծ ծանրության հանցագործություններ են համարվում դիտավորությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երկու տարի ժամկետով ազատազրկումը, կամ որոնց համար նախատեսված է ազատազրկման հետ կապ չունեցող պատիժ: ՀՀ քրեական օրենսգրքի 177 հոդվածի 1-ին մասով նախատեսված արարքները դասվում են ոչ մեծ ծանրության հանցագործությունների շարքին:
Անդրադառնալով ամբաստանյալի նկատմամբ կիրառված խափանման միջոցին, դատարանը գտնում է, որ Տիգրան Խաչատրյանի նկատմամբ ընտրված խափանման միջոցը` չհեռանալու մասին ստորագրությունը, պետք է վերացնել:
ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնի քննիչի 05.06.2015թ.-ի որոշմամբ իրեղեն ապացույց ճանաչված ՙSAMSUNG GALAXSI S3՚ մոդելի բջջային հեռախոսը պետք է վերադարձնել Նաիրուհի Բալյանին:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 33 հոդվածի 2-րդ մասով, 35 հոդվածի 1-ին մասի 5-րդ կետով, 36, 183 և 313 հոդվածներով, դատարանը
Ո Ր Ո Շ Ե Ց

Տիգրան Վալերիի Խաչատրյանի նկատմամբ ՀՀ քրեական օրենսգրքի 177 հոդվածի 1-ին մասով քրեական հետապնդումը դադարեցնել և նրա վերաբերյալ թիվ ԵԱՔԴ/0112/01/15 քրեական գործի վարույթը կարճել` ամբաստանյալի հետ տուժող Նաիրուհի Բալյանի հաշտվելու հիմքով:
Տիգրան Վալերիի Խաչատրյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Որոշումն օրինական ուժի մեջ մտնելուց հետո իրեղեն ապացույց հանդիսացող ՙSAMSUNG GALAXSI S3՚ մոդելի բջջային հեռախոսը վերադարձնել Նաիրուհի Բալյանին:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր` Լ. Ավետիսյան