ԵԱՔԴ/0100/01/15
Ո Ր Ո Շ ՈՒ Մ

քրեական հետապնդումը դադարեցնելու և քրեական գործի վարույթը կարճելու մասին

27 օգոստոսի 2015թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը` նախագահությամբ դատավոր Լ.Ավետիսյանի, քարտուղարությամբ Ն.Այվազյանի, մասնակցությամբ` մեղադրող Ա.Առաքելյանի, ամբաստանյալ L.Գևորգյանի, տուժող Հ.Գրիգորյանի, տուժողի օրինական ներկայացուցիչ Ն.Գևորգյանի դռնբաց դատական նիստում, քննության առնելով Լևոն Գառնիկի Գևորգյանի (ծնված 1985 թվականի հունիսի 29-ին, Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, խնամքին մեկ անչափահաս երեխա, նախկինում չդատված, աշխատում է Ս.Բյուրատի անվան թիվ 125 հիմնական դպրոցում, որպես ֆիզկուլտուրայի ուսուցիչ, հաշվառված և բնակվում է Երևան քաղաքի Դրոյի փողոցի 8/1 շենքի թիվ 5 բնակարան հասցեում, մեղադրվում է ՀՀ քրեական օրենսգրքի 118 հոդվածով, որպես խափանման միջոց է ընտրվել չհեռանալու մասին ստորագրությունը) վերաբերյալ քրեական գործը,

Պ Ա Ր Զ Ե Ց

2015 թվականի ապրիլի 13-ին ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում ՀՀ քրեական օրենսգրքի 118 հոդվածով նախատեսված հանցագործության հատկանիշներով հարուցվել է թիվ 09107015 քրեական գործը:
2015 թվականի ապրիլի 28-ին Լևոն Գառնիկի Գևորգյանի նկատմամբ որպես խափանման միջոց է կիրառվել չհեռանալու մասին ստորագրությունը:
Նախաքննության մարմնի 2015 թվականի մայիսի 5-ի որոշմամբ Լևոն Գառնիկի Գևորգյանը ներգրավվել է որպես մեղադրյալ ՀՀ քրեական օրենսգրքի 118 հոդվածով այն արարքի կատարման համար, որ նա 2015 թվականի մարտի 30-ին, ժամը 1015-ից մինչև նույն օրը՝ ժամը 1100-ն ընկած ֆիզկուլտուրայի դասաժամի ընթացքում Երևան քաղաքի Պարույր Սևակ փողոցի 89 հասցեում գտնվող Ս.Բյուրատի անվան թիվ 125 հիմնական դպրոցի մարզադահլիճում, համապատասխան համազգեստով դասին չներկայանալու համար 7բ դասարանի աշակերտներ Հայկ Գրիգորյանին, Դավիթ Ալեքսանյանին և Հենրիկ Սարգսյանին հրանգել է մարզադահլիճի մուտքից դեպի աջ ընկած հատվածում գետնի վրա հենում պառկած դիրք ընդունել: Հայկ Գրիգորյանը չի կարողացել նրա ասած դիրքով մնալ և ոտքերի ծնկների հատվածը դրել է գետնին, ինչի համար նա մոտեցել է վերջինիս և բռունցքով դիտավորությամբ հարվածել նրա աջ ուսագոտու հետին մակերեսին՝ նշված հատվածում Հայկ Գրիգորյանին պատճառելով արյունազեղման ձևով առողջության թեթև վնասի հատկանիշներ չպարունակող մարմնական վնասվածք: Այնուհետև Լևոն Գևորգյանը նստել է Հայկ Գրիգորյանի կողքին գտնվող նստարանին և կրկին ոտքերի ծնկների հատվածը գետնին դնելու համար մեկ անգամ ձախ ձեռքի ափով և մեկ անգամ ձեռքերի մատներով դիտավորությամբ հարվածել է Հայկ Գրիգորյանի գլխի հետևի հատվածին՝ նրան պատճառելով ֆիզիկական ցավ:
2015 թվականի հունիսի 5-ին թիվ 09107015 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթույն վարչական շրջանների ընդհանուր իրավասության դատարան` ըստ էության քննելու համար:
Դատաքննության ժամանակ տուժողի ներկայացուցիչ Նունե Գևորգյանը դիմում է ներկայացրել դատարան, հայտնելով, որ ինքը և իր որդին՝ Հայկ Գրիգորյանը ամբաստանյալ Լևոն Գևորգյանի հետ հաշտվել են: Խնդրում են նրա նկատմամբ քրեական հետապնդումը դադարեցնել:
Ամբաստանյալ Լևոն Գևորգյանը դիմում է ներկայացրել դատարան, հայտնելով, որ ինքը, տուժող Հայկ Գրիգորյանը և նրա օրինական ներկայացուցիչ Նունե Գևորգյանը հաշտվել են: Խնդրում է իր նկատմամբ քրեական հետապնդումը դադարեցնել և քրեական գործի վարույթը կարճել՝ տուժողի հետ հաշտվելու հիմքով:
Մեղադրող Ա.Առաքելյանը միջնորդեց ամբաստանյալ Լևոն Գևորգյանի նկատմամբ քրեական հետապնդումը դադարեցնել և քրեական գործի վարույթը կարճել: Վերոգրյալը հաշվի առնելով, դատարանը գտնում է, որ Լևոն Գառնիկի Գևորգյանի նկատմամբ քրեական հետապնդումը պետք է դադարեցնել և թիվ ԵԱՔԴ/0100/01/15 քրեական գործի վարույթը կարճել, նկատի ունենալով հետևյալը.
ՀՀ քրեական դատավարության օրենսգրքի 35 հոդվածի 1-ին մասի 5-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական դատավարության օրենսգրքի 183 հոդվածի 1-ին մասի համաձայն, ՀՀ քրեական օրենսգրքի 118-րդ հոդվածով (...) նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի, մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
ՀՀ քրեական օրենսգրքի 73 հոդվածի համաձայն, ոչ մեծ ծանրության հանցանք կատարած անձը կարող է ազատվել քրեական պատասխանատվությունից, եթե նա հաշտվել է տուժողի հետ և հատուցել կամ այլ կերպ հարթել է նրան պատճառած վնասը:
ՀՀ քրեական օրենսգրքի 19 հոդվածի 2-րդ մասի համաձայն, ոչ մեծ ծանրության հանցագործություններ են համարվում դիտավորությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երկու տարի ժամկետով ազատազրկումը, կամ որոնց համար նախատեսված է ազատազրկման հետ կապ չունեցող պատիժ: ՀՀ քրեական օրենսգրքի 118 հոդվածով նախատեսված արարքները դասվում են ոչ մեծ ծանրության հանցագործությունների շարքին:
ՀՀ քրեական դատավարության օրենսգրքի 77 հոդվածի 3-րդ մասի 2-րդ կետի համաձայն, սահմանափակ գործունակ տուժողի օրինական ներկայացուցիչն իրավունք ունի հաշտվելու կասկածյալի, մեղադրյալի հետ:
Անդրադառնալով ամբաստանյալի նկատմամբ կիրառված խափանման միջոցին, դատարանը գտնում է, որ Լևոն Գևորգյանի նկատմամբ ընտրված խափանման միջոցը` չհեռանալու մասին ստորագրությունը, պետք է վերացնել:
ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնի ավագ քննիչի 2015թ. մայիսի 30-ի որոշմամբ ապացույց ճանաչված այլ փաստաթուղթ հանդիսացող Երևան քաղաքի Պարույր Սևակ փողոցի թիվ 89 հասցեում գտնվող Ս.Բյուրատի անվան թիվ 125 հիմնական դպրոցի մարզադահլիճում առկա տեսախցիկների տեսաձայնագրությունը պարունակող լազերային սկավառակը /գ.թ. 29/ պետք է պահել սույն քրեական գործի հետ:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 33 հոդվածի 2-րդ մասով, 35 հոդվածի 1-ին մասի 5-րդ կետով, 36 հոդվածով, 77 հոդվածի 3-րդ մասի 2-րդ կետով, 183 և 313 հոդվածներով, դատարանը

Ո Ր Ո Շ Ե Ց

Լևոն Գառնիկի Գևորգյանի նկատմամբ ՀՀ քրեական օրենսգրքի 118 հոդվածով քրեական հետապնդումը դադարեցնել և նրա վերաբերյալ թիվ ԵԱՔԴ/0100/01/15 քրեական գործի վարույթը կարճել` ամբաստանյալի հետ տուժող Հայկ Գրիգորյանի օրինական ներկայացուցիչ Նունե Սիմակի Գևորգյանի հաշտվելու հիմքով:
Լևոն Գառնիկի Գևորգյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Ապացույց ճանաչված այլ փաստաթուղթ հանդիսացող Երևան քաղաքի Պարույր Սևակ փողոցի թիվ 89 հասցեում գտնվող Ս.Բյուրատի անվան թիվ 125 հիմնական դպրոցի մարզադահլիճում առկա տեսախցիկների տեսաձայնագրությունը պարունակող լազերային սկավառակը /գ.թ. 29/ պահել սույն քրեական գործի հետ:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր` Լ. Ավետիսյան