ԵԱՔԴ/0082/01/15
Ո Ր Ո Շ ՈՒ Մ

քրեական հետապնդումը դադարեցնելու և քրեական գործի վարույթը կարճելու մասին

18 հունվարի 2016թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը` նախագահությամբ դատավոր Լ.Ավետիսյանի, քարտուղարությամբ Ն.Այվազյանի, մասնակցությամբ ամբաստանյալ Ս.Նաջարյանի, պաշտպան Մ.Դավթյանի, մեղադրող Ն.Աշրաֆյանի, դռնբաց դատական նիստում քննության առնելով Սամվել Խաչատուրի Նաջարյանի (ծնված 1956 թվականի փետրվարի 16-ին, Լոռու մարզի Վանաձոր քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, նախկինում չդատված, աշխատում է ՙՉինվան՚ ՍՊԸ-ում որպես տնօրեն, հաշվառված և բնակվում է Լոռու մարզի Վանաձոր քաղաքի Նիզամու փողոցի 49/2 տուն հասցեում, մեղադրվում է ՀՀ քրեական օրենսգրքի 325 հոդվածի 1-ին մասով, որպես խափանման միջոց է ընտրվել ստորագրություն չհեռանալու մասին) վերաբերյալ քրեական գործը,

Պ Ա Ր Զ Ե Ց

2015 թվականի ապրիլի 2-ին ՀՀ ՖՆ իրավախախտումների հայտնաբերման և վարչական վարույթների իրականացման վարչության հետաքննության բաժնում ՀՀ քրեական օրենսգրքի 325 հոդվածի 1-ին մասով նախատեսված հանցագործության հատկանիշներով հարուցվել է թիվ 83154115 քրեական գործը և ըստ քննչական ենթակայության ուղարկվել ՀՀ քննչական կոմիտե:
2015 թվականի ապրիլի 8-ին թիվ 83154115 քրեական գործն ըստ տարածքային ենթակայության ուղարկվել է ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժին:
2015 թվականի ապրիլի 10-ին թիվ 83154115 քրեական գործը ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնում ընդունվել է վարույթ և կատարվել նախաքննություն:
Նախաքննության մարմնի 2015 թվականի մայիսի 19-ի որոշմամբ Սամվել Խաչատուրի Նաջարյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 325 հոդվածի 1-ին մասով այն արարքի կատարման համար, որ նա հանդիսանալով ՙՉինվան՚ ՍՊԸ-ի տնօրեն 2013 թվականին Կոմիտաս 54բ հասցեում գտնվող ՙԳնումների աջակցման կենտրոն՚ ՊՈԱԿ-ի կողմից կազմակերպված գնման ընթացակարգերին մասնակցելու իրավունք ստանալու նպատակով 28.11.2012թ. և 04.12.2013թ. ընկերության անունից ՊՈԱԿ է ներկայացրել ընթացակարգերի հրավերով սահմանված մասնակցության իրավունքի պահանջներին, իր տվյալների համապատասխանության մասին հայտարարություն, որի 2-րդ կետում նշված է տեղեկություններ այն մասին, որ իբր ՙՉինվան՚ ՍՊԸ-ն չունի ժամկետանց պարտքեր ՀՀ հարկային և պարտադիր սոցիալական ապահովության վճարների գծով, մինչդեռ ընկերության ժամկետանց հարկային պարտավորությունները կազմել են 10.877.519 ՀՀ դրամ, իսկ համաձայն ՙԳնումների մասին՚ ՀՀ օրենքի 5 հոդվածի 1-ին մասի 2-րդ կետիª գնումների ընթացակարգերին մասնակցելու իրավունք չունեն անձինք, որոնք ունեն ժամկետանց պարտքեր Հայաստանի Հանրապետության հարկային և պարտադիր սոցիալական ապահովության վճարների գծով:
Այսինքն` Սամվել Նաջարյանը ՙԳնումների աջակցման կենտրոն՚ ՊՈԱԿ-ի կողմից կազմակերպված գնման ընթացակարգերին մասնակցելու նպատակով ՊՈԱԿ է ներկայացել կեղծ փաստաթուղթ այն մասին, որ ՙՉինվան՚ ՍՊԸ-ն չունի ժամկետանց պարտքեր ՀՀ հարկային և պարտադիր սոցիալական ապահովության վճարների գծով, մինչդեռ ընկերության ժամկետանց հարկային պարտավորությունները հիշյալ ժամանակահատվածում կազմել են 10.877.519 ՀՀ դրամ:
2015 թվականի մայիսի 19-ի որոշմամբ Սամվել Խաչատուրի Նաջարյանի նկատմամբ որպես խափանման միջոց է ընտրվել չհեռանալու մասին ստորագրությունը:
2015 թվականի սեպտեմբերի 29-ին թիվ 83154115 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան` ըստ էության քննելու համար:
Դատական քննության ժամանակ պաշտպան Մհեր Դավթյանը միջնորդեց ամբաստանյալ Սամվել Նաջարյանի նկատմամբ քրեական հետապնդումը դադարեցնել և քրեական գործի վարույթը կարճել` քրեական պատասխանատվության ենթարկելու վաղեմության ժամկետներն անցնելու հիմքով:
Ամբաստանյալ Սամվել Նաջարյանը հայտարարեց, որ համաձայն է, որպեսզի իր նկատմամբ քրեական հետապնդումը դադարեցվի և քրեական գործի վարույթի կարճվի` վաղեմության ժամկետներն անցնելու կապակցությամբ:
Մեղադրող Ն.Աշրաֆյանը միջնորդության դեմ չառարկեց: Նույնպես գտավ, որ քրեական գործի վարույթը ենթակա է կարճման` վաղեմության ժամկետներն անցած լինելու հիմքով:
Վերոգրյալը հաշվի առնելով, դատարանը գտնում է, որ Սամվել Խաչատուրի Նաջարյանի նկատմամբ քրեական հետապնդումը պետք է դադարեցնել և թիվ ԵԱՔԴ/0082/01/15 քրեական գործի վարույթը կարճել, նկատի ունենալով հետևյալը.
ՀՀ քրեական դատավարության օրենսգրքի 35 հոդվածի 1-ին մասի 6-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե անցել են վաղեմության ժամկետները:
Նույն հոդվածի 6-րդ մասի համաձայն, նշված հիմքով գործի վարույթի կարճում և քրեական հետապնդման դադարեցում չի թույլատրվում, եթե դրա դեմ առարկում է մեղադրյալը: Այս դեպքում գործի վարույթը շարունակվում է սովորական կարգով:
ՀՀ քրեական օրենսգրքի 75 հոդվածի 1-ին մասի 1-ին կետի համաձայն, անձն ազատվում է քրեական պատասխանատվությունից, եթե հանցանքն ավարտված համարելու օրվանից անցել է երկու տարի` ոչ մեծ ծանրության հանցանքն ավարտված համարելու օրվանից:
Նույն հոդվածի 2-րդ մասի համաձայն, վաղեմության ժամկետը հաշվարկվում է հանցանքն ավարտված համարելու օրվանից մինչև դատավճռի օրինական ուժի մեջ մտնելու պահը: Տևող հանցագործության դեպքում վաղեմության ժամկետը հաշվարկվում է արարքը դադարելու, իսկ շարունակվող հանցագործության դեպքում` վերջին արարքը կատարելու պահից:
Նույն հոդվածի 3-րդ մասի համաձայն, վաղեմության ժամկետի ընթացքն ընդհատվում է, եթե մինչև նշված ժամկետներն անցնելն անձը կատարում է միջին ծանրության, ծանր կամ առանձնապես ծանր նոր հանցանք: Այս դեպքում վաղեմության ժամկետի հաշվարկն սկսվում է նոր հանցանքի ավարտված համարելու պահից:
ՀՀ քրեական օրենսգրքի 19 հոդվածի 2-րդ մասի համաձայն, ոչ մեծ ծանրության հանցագործություններ են համարվում դիտավորությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երկու տարի ժամկետով ազատազրկումը, կամ որոնց համար նախատեսված է ազատազրկման հետ կապ չունեցող պատիժ, ինչպես նաև անզգուշությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում երեք տարի ժամկետով ազատազրկումը:
Սամվել Նաջարյանին ՀՀ քրեական օրենսգրքի 325 հոդվածի 1-ին մասով մեղսագրված արարքի համար նախատեսված առավելագույն պատիժը երկու տարի ժամկետով ազատազրկումն է, ուստի տվյալ հոդվածով նախատեսված հանցավոր արարքը դասվում է ոչ մեծ ծանրության հանցագործությունների շարքին: Հետևաբար, այն կատարած անձն ազատվում է քրեական պատասխանատվությունից, եթե հանցանքն ավարտված համարելու օրվանից մինչև դատավճռի օրինական ուժի մեջ մտնելու պահն անցել է երկու տարի:
Հաշվի առնելով, որ Սամվել Խաչատուրի Նաջարյանը հանցանքը կատարել է 28.11.2012թ. և 04.12.2013թ., կատարված հանցավոր արարքը դասվում է ոչ մեծ ծանրության հանցագործությունների շարքին, ինչպես նաև այն, որ բացակայում են վաղեմության ժամկետներն անցնելու հետևանքով քրեական պատասխանատվությունից ազատելուն խոչընդոտ հանդիսացող օրենսդրությամբ սահմանված պայմանները, դատարանը գտնում է, որ վաղեմության ժամկետներն անցնելու հետևանքով Սամվել Նաջարյանին պետք է ազատել քրեական պատասխանատվությունից:
Դատարանը գտնում է, որ Սամվել Նաջարյանի նկատմամբ կիրառված խափանման միջոցը` չհեռանալու մասին ստորագրությունը, պետք է թողնել անփոփոխ, մինչև որոշման օրինական ուժի մեջ մտնելը:
Ելնելով վերոգրյալից և ղեկավարվելով ՀՀ քրեական օրենսգրքի 19, 75 հոդվածներով, ՀՀ քրեական դատավարության օրենսգրքի 35 հոդվածի 1-ին մասի 6-րդ կետով, 313 հոդվածով, դատարանը
Ո Ր Ո Շ Ե Ց

Սամվել Խաչատուրի Նաջարյանի նկատմամբ ՀՀ քրեական օրենսգրքի 325 հոդվածի 1-ին մասով քրեական հետապնդումը դադարեցնել և թիվ ԵԱՔԴ/00082/01/15 քրեական գործի վարույթը կարճել` քրեական պատասխանատվության ենթարկելու վաղեմության ժամկետն անցնելու հիմքով:
Սամվել Խաչատուրի Նաջարյանի նկատմամբ կիրառված խափանման միջոցը` ստորագրություն չհեռանալու մասին, թողնել անփոփոխ, մինչև որոշման օրինական ուժի մեջ մտնելը:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր` Լ. Ավետիսյան