Գործ No ԵԱՔԴ/0080/01/15

ԴԱՏԱՎՃԻՌ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՙ11՚ փետրվարի 2016թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը

նախագահությամբ` դատավոր Արթուր Մկրտչյանի
քարտուղարությամբ` Միլենա Սարգսյանի
Շուշան Վանոյանի
Օֆելյա Կիրակոսյանի
մասնակցությամբ`
մեղադրող Վաղարշակ Մկրտչյանի
պաշտպան Անժելիկա Հակոբյանի
տուժող Սոս Աբրահամյանի
տուժողի ներկայացուցիչ Ռուզան Նալբանդյանի

Դատարանում, դռնբաց դատական նիստում քննեց քրեական գործն ըստ մեղադրանքի Վահան Արտեմի Եփրեմյանի /ծնված 1985 թվականի հուլիսի 21-ին` Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, նախկինում չդատված, չի աշխատում, հաշվառված` ք.Երևան, Յ.Լեփսիուսի փողոց, 33 շենք, 15 բնակարան, բնակվող` ք.Էջմիածին, Մ.Խորենացի փողոց, 54ա տուն/, ՀՀ քրեական օրենսգրքի 185-րդ հոդվածի 2-րդ մասի 1-ին և 2-րդ կետերով:

Գործի դատավարական նախապատմությունը
2015 թվականի ապրիլի 25-ին ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում ՀՀ քրեական օրենսգրքի 185-րդ հոդվածի 2-րդ մասի 1-ին և 2-րդ կետերով և 137-րդ հոդվածի 1-ին մասով հարուցվել է թիվ 09107915 քրեական գործը:
2015 թվականի ապրիլի 26-ին Վահան Եփրեմյանի նկատմամբ որպես խափանման միջոց է կիրառվել ստորագրություն` չհեռանալու մասին:
2015 թվականի մայիսի 02-ին Վահան Եփրեմյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 137-րդ հոդվածի 1-ին մասով:
2015 թվականի մայիսի 27-ին թիվ 09107915 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:

Գործի փաստական հանգամանքները
Նախաքննության մարմինն ամբաստանյալ Վահան Եփրեմյանին ՀՀ քրեական օրենսգրքի 185-րդ հոդվածի 2-րդ մասի 1-ին և 2-րդ կետերով մեղադրանք է առաջադրել, որ ՙ26.04.2015թ. ժամը 01:30-ի սահմաններում, կոտրելով Երևան քաղաքի Լեփսիուսի փողոցի 33 շենքի բակում կայանված, Սոս Աբրահամյանին պատկանող ՙՆիսսան Մարչ՚ մակնիշի 34 FN 160 հաշվառման համարանիշի ավտոմեքենայի առջևի ձախ դռան ապակին` վառել և ավտոմեքենայի մեջ է նետել պոլիէթիլենային տոպրակ, և դիտավորությամբ հրկիզման եղանակով ոչնչացրել է /վերականգնման համար ոչ պիտանի/ խոշոր չափերի` 1.800.000 ՀՀ դրամ արժողության ավտոմեքենան՚:

Ապացույցների հետազոտում
Առաջադրված մեղադրանքում Վահան Եփրեմյանն իրեն մեղավոր է ճանաչել և դատաքննության փուլում ըստ էության պնդել է նախաքննության փուլում տված ցուցմունքը, որ 25.04.2015թ. ալկոհոլ է օգտագործել, որից հետո երեխայի հետ միասին ժամը 21-ի սահմաններում գնացել է մոր` Անժելա Գրիգորյանին պատկանող, Երևան քաղաքի Լեփսիուսի 33 շենքի թիվ 15 բնակարան: Շենքի բակում նկատել է, որ բնակիչներից մեկը, որը հետագայում իմացել է, որ Սոս Աբրահամյանն է, իրեն պատկանող ՙՆիսսան Մարչ՚ մակնիշի ավտոմեքենան կայանել է իրենց բնակարանի պատուհանի տակ: Այդ հանգամանքն իր մոտ զայրույթ է առաջացրել, բնակիչներից մեկից տեղեկացել է, թե ում է պատկանել այդ ավտոմեքենան, որից հետո բարձրացել է 3-րդ հարկ, թակել մեքենայի տիրոջ բնակարանի մուտքի դուռը, որը բացել է Ս.Աբրահամյանը: Զայրացած նրան ասել է, որ ավտոմեքենան հանի իր տարածքից, որից հետո իջել է բակ և կանգնել շենքի մուտքի դիմաց: Մի քանի րոպե անց Ս.Աբրահամյանն իջել է, ինքը կրկին զայրացած նրան ասել է, որ մեքենան հանի իր տարածքից և այլևս չկայանի այնտեղ: Ս.Աբրահամյանն ասել է եղավ, սակայն չի հանել ու թեքվել է, որ գնա, որից ինքը զայրացել է, երեխայից վերցրել է նրա խաղալիք ատրճանակը, Ս.Աբրահամյանին վախեցնելու համար պահել նրա վրա և ասել ՙարի ստեղ արա՚, Ս.Աբրահամյանը թեքվել է և կանգնել տեղում: Ինքը կրկին ատրճանակը պահած նրա վրա` ասել է, որ իր մեքենան հենց այդ պահին հանի, հասկացել է, որ Ս.Աբրահամյանը վախեցել է: Այդ ժամանակ վերջինս մոտեցել է իրեն ու հրել, որից հետո իրենց միջև քաշքշուկ է առաջացել: Քաշքշուկին միջամտել են հարևանները և բաժանել իրենց: Քաշքշուկի ժամանակ էլ զայրացած երեխայի խաղալիք ատրճանակը նետել է շենքի դիմաց գտնվող ավտոտնակների մոտ: Քաշքշուկից հետո եկել են նաև իր մայրը և մորեղբայրը և իրեն տարել տուն: Տանը գտնվելիս դեռ զայրացած է եղել Ս.Աբրահամյանի վրա, մի պահ հանդարտվել է, որից հետո մայրը և մորեղբայրն իր երեխային վերցնելով` գնացել են վերջինիս տուն: Դրանից հետո ինքը դուրս է եկել տնից, գնացել գարեջուր գնել, խմելով եկել շենքի բակ, և քանի որ շատ զայրացած է եղել Ս.Աբրահամյանի վրա, որոշել է նրա ավտոմեքենան այրել` իր խոսքը չլսելու և վեճի բռնվելու համար: Մոտեցել է Ս.Աբրահամյանի ավտոմեքենային, ոտքով հարվածել և կոտրել առջևի ձախ դռան ապակին, որից հետո վառել է պոլիէթիլենային տոպրակը և նետել մեքենայի մեջ, համոզվելով, որ սրահի կտորը այրվում է, գնացել է մորեղբոր տուն, սակայն ոչ ոքի ոչինչ չի պատմել: 26.04.2015թ. տեղեկանալով, որ նշված դեպքի կապակցությամբ իրեն փնտրում են, ինքնակամ ներկայացել է ոստիկանության Քանաքեռ-Զեյթունի բաժին և հայտնել կատարածի մասին:

Ամբաստանյալ Վահան Եփրեմյանին վերագրվող արարքը հիմնավորվել է նաև դատաքննությամբ հետազոտված հետևյալ ապացույցներով.

Տուժող Սոս Գրիգորի Աբրահամյանը դատաքննության փուլում ցուցմունք է տվել, որ շուրջ 6 ամիս է ընտանիքի հետ միասին բնակվում է Երևան քաղաքի Լեփսիուսի փողոցի 33 շենքի 21 բնակարանում: 2015թ. մարտ ամսին 3000 ԱՄՆ դոլարով գնել է ՙNISSAN MARCH՚ մակնիշի 34 FN 160 հաշվառման համարանիշի ավտոմեքենան, որի վրա 600 ԱՄՆ դոլարով տեղադրել է գազի բալոն: Սովորաբար մեքենան կայանել է Երևան քաղաքի Լեփսիուսի փողոցի 33 շենքի 1-ին հարկի թիվ 15 բնակարանի պատշգամբի պատուհանի տակ: 2015թ. ապրիլի 25-ին, ժամը 18-ի սահմաններում վերադարձել է աշխատանքից, մեքենան կայանել նշված վայրում, որից հետո բարձրացել է տուն: Նույն օրը, ժամը 21:00-ի սահմաններում, երբ գտնվել է իրենց բնակարանում, թակել են բնակարանի մուտքի դուռը: Դուռը բացելով՝ տեսել է 25-30 տարեկան, միջին հասակի մի տղայի, որը հետագայում պարզվել է, որ նույն շենքի բնակիչ Վահան Եփրեմյանն է: Վերջինս գտնվել է ալկոհոլի ազդեցության տակ և հարբած վիճակում: Վ.Եփրեմյանն իրեն հարցրել է, թե ՙNISSAN MARCH՚ մակնիշի ավտոմեքենան իրենն է, ինքը պատասխանել է, որ իրենն է, որից հետո վերջինս ասել է, որ իջնի բակ: Մի քանի րոպե անց միայնակ իջել է բակ, որտեղ մուտքի դիմաց կանգնած է եղել Վ.Եփրեմյանը մի երեխայի հետ, և կողքին դրված է եղել գարեջրի շիշ: Վ.Եփրեմյանն ասել է, որ մեքենան կայանել է իր տարածքում և այլևս այդտեղ չպետք է կայանի: Ինքը պատասխանել է, որ եթե նրա տարածքն է, ապա վաղն առավոտից չի կայանի՚, սակայն Վ.Եփրեմյանը կոպիտ տոնով պնդել է, որ հենց այդ պահին հանի ու անընդհատ փորձել է վեճի բռնվել իր հետ: Ինքը խուսափել է դրանից և Վ.Եփրեմյանին ասել, որ հիմա կբարձրանա, տանից ավտոմեքենայի բանալիները կվերցնի և մեքենան կտեղափոխի, սակայն այդ ժամանակ Վ.Եփրեմյանն իր ետևից ասել է` ՙհլը արի ստեղ արա՚, շրջվել և տեսել է, որ Վ.Եփրեմյանն ինչ-որ ատրճանակ է ուղղել իր գլխին: Ինքը վախեցել է ու հրել Վ.Եփրեմյանին, ինչի հետևանքով վերջինս հետ է գնացել, ատրճանակը ձեռքից բռնելով վերցրել է ու դեն նետել, որից հետո իրենց միջև քաշքշուկ է առաջացել: Իրենց ձայներից բակ են իջել հարևանները և իր կինը` Կարինե Սահակյանը ու հանդարտեցրել իրենց: Այդ ժամանակ տաքսի ավտոմեքենայով եկել են Վ.Եփրեմյանի մայրը և մորեղբայրը, ու նրան տարել տուն: Ինքն ավտոմեքենան տեղափոխել է և կայանել շենքի դիմացի մայթեզրին: Մոտ 30 րոպե անց իրենց պատուհանից նկատել է, որ Վ.Եփրեմյանը մի քանի երիտասարդների հետ միասին բակում` իր ավտոմեքենայի կայանման վայրից փոքր-ինչ այն կողմ նստած, բարձր ձայնով զրուցել են, սակայն ինքը դրան ուշադրություն չի դարձրել: Մոտ 1 ժամ անց` արդեն 26.04.2015թ. ժամը 01:25-ի սահմաններում, իրենց բնակարանի մուտքի դռան զանգն են տվել, կինը մոտեցել է դռանը, դիտանցքից նայել և ասել է, որ Վահանն է, սակայն չեն բացել դուռը, որից հետո նա հեռացել է: Որոշ ժամանակ հետո պատուհանից նկատել են, որ Վ.Եփրեմյանը շիշը ձեռքին պտտվել է իր ավտոմեքենայի շուրջը: Րոպեներ անց կրկին իրենց բնակարանի մուտքի դուռն են թակել և զանգ տվել, նայել է դիտանցքից և տեսել Վ.Եփրեմյանն, սակայն դուռը չի բացել և նա կրկին հեռացել է: Դրանից րոպեներ անց լսել է պայթյունի ձայն, պատուհանից տեսել է, որ իր ավտոմեքենան այրվում է, մեքենայի շրջակայքում մարդ չի եղել, սակայն նկատել է, որ մեքենայից այն կողմ` շենքի ձախակողմյան հատվածում կանգնած է մի տաքսի ավտոմեքենա, որի մեջ որքանով նկատել է մի քանի տղաներ են եղել, այդ պահին տաքսի ավտոմեքենան հեռացել է: Անմիջապես զանգահարել են հրշեջ ծառայություն, եկել են հրշեջ ծառայության, այդ թվում` շտապօգնության և ոստիկանության աշխատակիցները, այրվող մեքենայի կրակը մարել են: Տուժողը նշել է, որ իրեն պատկանող ՙՆիսսան Մարչ՚ մակնիշի 34 FN 160 հաշվառման համարանիշի ավտոմեքենան հրկիզել է Վահան Արտեմի Եփրեմայնը: Ավելացրել է, որ ավտոմեքենայի մեջ եղել են իր ՀՀ քաղաքացու անձնագիրը, զինգրքույկը, վարորդական իրավունքի վկայականը, 100.000 ՀՀ դրամ գումար և հրկիզման հետևանքով իրեն պատճառվել է 1.800.000 ՀՀ դրամի գույքային վնաս:

Վկա Կարինե Գառնիկի Սահակյանը դատաքննության փուլում ցուցմունք է տվել, որ 2015թ. ապրիլի 25-ին, ժամը 21:00-ի սահմաններում թակել են իրենց Երևան քաղաքի Լեփսիուսի 33/21 բնակարանի մուտքի դուռը, ամուսինը` Սոս Աբրահամյանը, բացել է և ինչ-որ մեկը նրան ասել է, որ իջնի բակ: Ամուսինն իջել է, իսկ ինքը պատուհանից նայելով տեսել է, որ ամուսնու հետ մի երիտասարդ զրուցել է և նրա շարժումներից հասկացել է, որ գտնվել է ալկոհոլի ազդեցության տակ ու սկսել է քաշքշել ամուսնուն: Նկատել է, որ ամուսինը ցանկացել է բարձրանալ վերև, սակայն լսել է, թե ինչպես է այդ անձը նրա ետևից բղավել ՙհլը արի բան եմ ասում՚, որին ի պատասխան ամուսինն ասել է ՙդրանով ինձ չվախացնես՚: Այդ լսելով` անմիջապես իջել է բակ, որտեղ հավաքված են եղել նաև հարևաններ և հանդարտեցրել այդ անձին, ով ասել է, որ այդ հողատարածքն իրենն է ու ավտոմեքենան այդտեղ չկայանի: Տուն բարձրանալուց հետո լսել է, որ հարևաններից մեկն ասել է ՙհա դե Վահանն ա, եկել ա խմած, էլի կռիվ ա անում՚: Մոտ 20 րոպե անց ամուսինը տուն է եկել և պատմել, որ նշված անձն իրեն զենքով է սպառնացել, իսկ ինքը մեքենան մեկ այլ վայր է տեղափոխել: Մոտ 10 րոպե անց թակել են իրենց բնակարանի մուտքի դուռը, ամուսինը նայել է դիտանցքից և ասել, որ կրկին Վահանն է ու դուռը չի բացել: Արդեն 26.04.2015թ., ժամը 01:30-ի սահմաններում թակել են բնակարանի դուռը: Ինքը դիտանցքից նայելով նկատել է Վահանին, սակայն դուռը չի բացել: Որոշ ժամանակ անց լսել են պայթյունի ձայն, մոտեցել են պատուհանին և նկատել, որ իրենց ավտոմեքենան այրվում է, որից հետո անմիջապես ահազանգել է ոստիկանություն: Նկատել է նաև, որ Վահանը մի շիշ ձեռքին կանգնած է եղել ավտոմեքենայի մոտ և վայրկյաններ անց հեռացել, որից հետո եկել են ոստիկանության, հրշեջ ծառայության աշխատակիցները և այրվող ավտոմեքենան մարել:

Վկա Մարինե Պավելի Հովհաննիսյանը նախաքննության փուլում ցուցմունք է տվել, որ 2015թ. ապրիլի 25-ին, ժամը 21:00-ի սահմաններում, երբ գտնվել է իրենց բնակարանի խոհանոցում, բակից լսել է աղմուկի և վիճաբանության ձայներ, նկատել է, որ վիճաբանել են իրենց բնակարանի հարևանությամբ բնակվող Սոս Աբրահամյանը և 1-ին հարկի 15 բնակարանի բնակիչ Վահան Եփրեմյանը: Նրանց խոսակցությունը լսելով` հասկացել է, որ Վ.Եփրեմյանը Ս.Աբրահամյանին դիտողություն է արել, ավտոմեքենան պատուհանի տակ կայանելու համար, որին ի պատասխան Ս.Աբրահամյանն ասել է, որ կհանի, սակայն Վ.Եփրեմյանը պնդել է, որի ժամանակ լսել է, որ Ս.Աբրահամյանն ասել է ՙդրանով ինձ մի վախացրու՚: Ինքն այդ ժամանակ վերևից բղավել է ՙՎահան, խելոք մնա՚, որից հետո նկատել է, որ նրանց միջև քաշքշուկ է առաջացել, և անմիջապես իջել է, որպեսզի նրանց հանդարտեցնի: Իջնելիս նկատել է նաև Ս.Աբրահամյանի կնոջը: ինքը մոտեցել է Վ.Եփրեմյանին, ով հարբած է եղել, նրան ասել է ՙչես ամաչում Վահան՚, վերջինս իրեն դիմելով` ասել է ՙքույր կներես՚, և մոր ու մորեղբոր հետ միասին գնացել տուն: Դրանից հետո Ս.Աբրահամյանի կնոջ հետ բարձրացել են տուն, մոտ 30 րոպե գտնվել են իրենց տանը, որից հետո եկել է Ս.Աբրահամյանը և կնոջ հետ միասին գնացել իրենց բնակարան: Մոտ 2-3 ժամ անց նկատել է, բակում մի տղայի հետ նստած է եղել Վ.Եփրեմյանը, որից հետո պառկել է քնելու: 26.04.2015թ., ժամը 01:30-ի սահմաններում, արթնացել է աղմուկի ձայներից, արթնացել է նաև մայրը` Սուսաննա Հարությունյանը, և պատուհանից նկատել են, որ բակում կայանված Ս.Աբրահամյանի ավտոմեքենան այրվում է: Որոշ ժամանակ անց եկել են ոստիկանության, հրշեջ ծառայության աշխատակիցները և այրվող ավտոմեքենան մարել են:
գ.թ. 25-27

Վկա Սուսաննա Արտավազդի Հարությունյանը նախաքննության փուլում ցուցմունք է տվել, որ 2015թ.ն, ժամը 20:30-ի սահմաններում աղմուկ է լսել բակի կողմից, մոտեցել է պատուհանին և նկատել, որ Վահան Եփրեմյանն ու Սոս Աբրահամյանը վիճաբանում են: Նրանց խոսակցությունից հասկացել է, որ վիճը ծագել է, Ս.Աբրահամյանի ավտոմեքենան Վ.Եփրեմյանի բնակարանի պատուհանի տակ կայանելու համար: Վ.Եփրեմյանն ու Ս.Աբրահամյանը վիճաբանության ընթացքում քաշքշել են միմյանց, որի ընթացքում լսել է, որ Ս.Աբրահամյանն ասել է. ՙարա դու դրանով ես վախցնում ինձ՚: Նրանց միջև վիճաբանությունը և քաշքշուկը տևել է մի քանի րոպե, որից հետո նրանց հանդարտեցրել են: 26.04.2015թ., ժամը 01-ի սահմաններում, երբ քնած են եղել, լսել է ուժեղ պայթյունի ձայն և պատուհանից նկատել, որ Ս.Աբրահամյանի ավտոմեքենան այրվում է, որի ժամանակ միջանցքից լսել է Վ.Եփրեմյանի ձայնը, ով թակել է Սոս Աբրահամյանի բնակարանի դուռը և ասել. ՙդուրս արի տես, որ մեքենատ վառեցի, տես, թե ոնց ա վառվում՚: Մի քանի րոպե անց եկել են հրշեջ ծառայության աշխատակիցները և այրվող մեքենան մարել են:
գ.թ. 28-30

Վկա Անժելա Արծրունու Գրիգորյանը, օգտվելով իր դատավարական իրավունքից, հրաժարվել է դատաքննության փուլում ցուցմունք տալուց, նշելով, որ պնդում է նախաքննության փուլում տված ցուցմունքները:
Նախաքննության փուլում վկա ցուցմունք է տվել, որ 25.04.2015թ. իրեն զանգահարել է որդին` Վահան Եփրեմյանը, և հայտնել, որ գալիս է իր Երևան քաղաքի Լեփսիուսի փողոցի 33 շենքի 15 բնակարան՝ տեսակցելու: Ինքն այդ ժամանակ գտնվել է եղբոր տանը, որից հետո ժամը 20:30-ի սահմաններում վերադարձել է տուն: Տուն վերադառնալիս նկատել է, որ իրենց շենքի բակում մարդիկ են հավաքված, որոնց մեջ նկատել է որդուն՝ Վահանին: Խառնաշփոթ իրավիճակ է եղել, որի ժամանակ տեսել է, որ որդու և ներկա երիտասարդներից մեկի վերնաշապիկը պատռված է, սակայն վերջինիս չի ճանաչել, միայն տեղյակ է եղել, որ շենքի բնակիչներից է և վարել է ՙՆիսսան Մարչ՚ մակնիշի ավտոմեքենա: Այուհետև, թոռան հետ միասին մտել է իրենց բնակարան, որից հետո մի քանի տղաներ տուն են բերել որդուն, ով զայրացած և բորբոքված է եղել: Վահանը իրենից խմիչք պահանջել, սակայն ինքը մերժել է: Այդ ժամանակ ինքն թոռնիկին վերցրել է և եղբոր հետ միասին գնացել վերջինիս տուն: 26.04.2015թ., ժամը 03-ի սահմաններում հեռախոսազրույց է ունեցել հարսի` Սոնա Թումանյանի եղբոր` Սուրեն Թումանյանի հետ, ում հայտնել է, որ վիճաբանություն է տեղի ունեցել որդու` Վ.Եփրեմյանի, և շենքի բնակիչներչից մեկի հետ: Հաջորդ օրը` 26.04.2015թ., ժամը 13:30-ի սահմաններում հարսը` Սոնա Թումանյանը, զանգահարել է իրեն, հետաքրքրվել երեխայից: Որոշ ժամանակ անց Ս.Թումանյանը եկել է եղբոր տուն և վերջինիս պատմել, որ 2015թ. ապրիլի 25-ին ամուսինը` Վ.Եփրեմյանը, ալկոհոլի ազդեցության տակ քաշքշուկի մեջ է մտել իրենց շենքի բնակիչներից մեկի հետ: Դրանից հետո Ս.Թումանյանը երեխային վերցրել և գնացել է, իսկ ինքը գնացել է իր բնակարան և շենքի բակում նկատել, որ այնտեղ կայանված ՙՆիսսան Մարչ՚ մակնիշի ավտոմեքենան, որը պատկանել է որդու հետ քաշքշուկի մեջ մտած երիտասարդին՝ ամբողջությամբ այրված է:
գ.թ. 56-58

Վկա Սոնա Ստեֆանի Թումանյանը դատաքննության փուլում ցուցմունք է տվել, որ Վահան Եփրեմյանն իր ամուսինն է: 25.04.2015թ., ժամը 24-ի սահմաններում, երբ ՌԴ-ից վերադառնալիս է եղել ՀՀ, իրեն է զանգահարել եղբայրը` Սուրեն Թումանյանը, և հայտնել, որ ամուսինը` Վահան Եփրեմյանը, գնացել է մոր` Անժելա Գրիգորյանի, Երևան քաղաքի Լեփսիուսի փողոցի 33 շենքի 15 բնակարան, որտեղ, գտնվելով ալկոհոլի ազդեցության տակ, վիճաբանել է շենքի բնակիչներից մեկի հետ, որից հետո այրել է նրա ավտոմեքենան: Այնուհետև, 26.04.2015թ., ժամը 13-ի սահմաններում ինքը գնացել է ամուսնու մոր տուն, և մայրը պատմել է, որ որդին վիճաբանել է հարևաններից մեկի հետ, որից հետո այրել նրա ավտոմեքենան:

Վկա Սուրեն Ստեֆանի Թումանյանը նախաքննության փուլում ցուցմունք է տվել, որ Վահան Եփրեմյանն իր քրոջ՝ Սոնա Թումանյանի ամուսինն է: 2015թ. ժամը 19-ի սահմաններում, Վահան Եփրեմյանի խնդրանքով պատվիրել է տաքսի ավտոմեքենա և նրան որդու հետ ճանապարհել Երևան քաղաք` նրա մոր տուն: 26.04.2015թ. ժամը 03-ի սահմաններում իրեն է զանգահարել Վ.Եփրեմյանի մայրը` Անժելա Գրիգորյանը, և հայտնել, որ որդին վիճաբանել է հարևաններից մեկի հետ, որից հետո այրել է նրա ավտոմեքենան, իսկ Վ.Եփրեմյանի գտնվելու վայրի մասին տեղյակ չի եղել: Դրանից հետո ժամը 03:30-ի սահմաններում զանգահարել է քրոջը` Սոնա Թումանյանին, ով ՌԴ-ից ՀՀ վերադառնալիս է եղել, և նրան ասել, որ ամուսինն ալկոհոլի ազդեցության տակ վիճաբանել է մոր շենքի բնակիչներից մեկի հետ, որից հետո այրել է նրա ավտոմեքենան: Այնուհետև, 26.04.2015թ., ժամը 10-ի սահմաններում Վ.Եփրեմյանը գնացել է իրենց տուն, միասին իջել են բակ, որտեղ իրեն պատմել է, որ նախորդ օրը մոր շենքի մոտ վիճաբանել է բնակիչներից մեկի հետ այն պատճառով, որ այդ տղան ավտոմեքենան կայանել է իրենց պատուհանի տակ: Վիճաբանությունից հետո կոտրել է նրա ՙՆիսսան Մարչ՚ մակնիշի ավտոմեքենայի ապակին, վառվող պոլիէթիլենային տոպրակը նետել մեքենայի մեջ ու այրել մեքենան և դիմել փախուստի:
գ.թ. 59-61

26.04.2015թ. ոստիկանության Քանաքեռ-Զեյթուն բաժնում Սոս Աբրահամյանի կողմից հաղորդում տալու մասին արձանագրության համաձայն` Սոս Աբրահամյանը հաղորդում է տվել այն մասին, որ 2015թ. ապրիլի 25-ին ժամը 21:00-ի սահմաններում Վահան Եփրեմյանը Երևան քաղաքի Լեփսուսի 33 շենքի բակում ատրճանակով սպառնացել էիրեն, որից հետո 26.04.2015թ. ժամը 01:30-ի սահմաններում հրկիզել է շենքի բակում կայանված իրեն պատկանող ՙՆիսսան Մարչ՚ մակնիշի ավտոմեքենան:
գ.թ. 5

Ինքնակամ ներկայանալու մասին արձանագրության համաձայն` 26.04.2015թ., ժամը 18:15-ին Վահան Արտեմի Եփրեմյանը ներկայացել է ոստիկանության Քանաքեռ-Զեյթունի բաժին և հայտնել, որ 25.04.2015թ. ժամը 21-ի սահմաններում Երևան քաղաքի Լեփսիուսի փողոցի 33 շենքի բակում վիճաբանել է Սոս Աբրահամյանի հետ, իսկ 26.04.2015թ., ժամը 01:30-ի սահմաններում հրկիզել է նշված շենքի բակում կայանված Սոս Աբրահամյանին պատկանող ՙՆիսսան Մարչ՚ մակնիշի 34 FN 160 հաշվառման համարանիշի ավտոմեքենան:
գ.թ. 66

26.04.2015թ. կատարված դեպքի վայրի զննության արձանագրության և դրան կից լուսանկարչական հավելվածների համաձայն` Երևան քաղաքի Լեփսուսի 33 շենքի դիմաց կայաված է ՙՆիսսան Մարչ՚ մակնիշի ամբողջությամբ այրված ավտոմեքենա, որը ըստ զննության մասնակից Սոս Աբրահամյանի պատկանում է իրեն և ավտոմեքենան այրել է Վահան Եփրեմյանը:
գ.թ. 7-9

27.04.2015թ. Վահան Արտեմի Եփրեմյանի մասնակցությամբ կատարված դեպքի վայրի զննության արձանագրության և դրանց կից լուսանկարչական հավելվածների համաձայն` Երևան քաղաքի Լեփսուսի 33 շենքի բակում Վ.Եփրեմյանը մատնանշել և հայտարարել է, որ շենքի բակում այրված վիճակում կայանված ՙՆիսսան Մարչ՚ մակնիշի ավտոմեքենան ինքն է այրել, իսկ շենքի մուտքի դիմաց խաղալիք ատրճանակը ուղղել է Ս.Աբրահամյանի վրա և տվել սպառնալիքներ:
գ.թ. 97-104

21.05.2015թ. որոշմամբ իրեղեն ապացույց ճանաչված ՙՆիսսան Մարչ՚ մակնիշի 34 FN 160 հաշվառման համարանիշի այրված ավտոմեքենայով և Սոս Աբրահամյանի կողմից ներկայացված և առգրավված պատռված վերնազգեստով:
գ.թ. 173-174

21.05.2015թ. ՀՀ տարածքային կառավարման և ԱԻ նախարարությունից ստացված նյութերը որպես այլ փաստաթուղթ ապացույց ճանաչելու որոշման համաձայն` /ակտ հրդեհի մասին/ հանձնաժողովը մանրազնին ուսումնասիրելով հրդեհի վայրը, ինչպես նաև լսելով առաջին ականատեսների գրավոր և բանավոր բացատրությունները, պարզեց, որ հրդեհի օջախը գտնվել է ՙՆիսսան Մարչ՚ մակնիշի ավտոմեքենայի ուղևորասրահի աջ հատվածում:
Ուսումնասիրելով հրդեհի օջախը, հիմնվելով տեղազննության արդյունքներին, լսելով առաջին ականատեսների գրավոր և բանավոր բացատրությունները, ինչպես նաև հաշվի առնելով քաղաքացի Վ.Եփրեմյանի կողմից քննչական կոմիտեին տված ցուցմունքը, հանձնաժողովը եկավ այն եզրակացության, որ հրդեհի առաջացման պատճառ է հանդսացել բաց կրակի օգտագործումը հրկիզման նպատակով
գ.թ. 139-150

Դատարանի իրավական վերլուծությունները
Դատարանը գործով ձեռք բերված յուրաքանչյուր ապացույց գնահատելով թույլատրելիության վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, գտնում է, որ ամբաստանյալ Վահան Եփրեմյանի մեղավորությունը` հրկիզման եղանակով Սոս Աբրահամյանի գույքը դիտավորությամբ ոչնչացնելու մեջ, որը խոշոր չափերի վնաս է պատճառել, նախատեսված ՀՀ քրեական օրենսգրքի 185-րդ հոդվածի 2-րդ մասի 1-ին և 2-րդ կետերով, ապացուցված է, արարքը ճիշտ է որակվել:
Վերոհիշյալ հանցանքի կատարման համար ամբաստանյալը ենթակա է քրեական պատասխանատվության և պատժի, որը նա պետք է կրի:
ՀՀ քրեական օրենսգրքի 10-րդ հոդվածի համաձայնª ՙՀանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացիª համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար՚:
ՀՀ քրեական օրենսգրքի 48-րդ հոդվածի 1-ին մասի համաձայնª ՙպատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից ու ազատություններից օրենքով նախատեսված զրկմամբ կամ դրանց սահմանափակմամբ՚:
ՀՀ քրեական օրենսգրքի 48-րդ հոդվածի 2-րդ մասի համաձայնª ՙՊատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61-րդ հոդվածի 1-ին մասի համաձայն` ՙՀանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները՚:
ՀՀ քրեական օրենսգրքի 61-րդ հոդվածի 2-րդ մասի համաձայնª ՙՊատժի տեսակը և չափը որոշվում է հանցագործությանª հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվումª պատասխանատվությունը և պատիժը մեղմացնող կամ ծանրացնող հանգամանքներով՚:
ՀՀ Վճռաբեկ դատարանը 2012թ. նոյեմբերի 1-ին Սերոբ Սարգսյանի վերաբերյալ թիվ ՍԴ/0109/01/12 գործով արտահայտել է հետևյալ իրավական դիրքորոշումը. ՙ(…) պատիժ նշանակելու ընդհանուր սկզբունքները քրեական օրենքով նախատեսված այն հիմնադրույթներն են, որոնցով պետք է ղեկավարվի դատարանը պատիժ նշանակելիս: Այդ սկզբունքներն են`
ա) օրինականությունը,
բ) արդարությունը,
գ) պատժի անհատականացումը,
դ) մարդասիրությունը:
Պատիժ նշանակելու վերոնշյալ սկզբունքները սահմանում են այն հիմնական դրույթները, որոնցով ղեկավարվում է դատարանը յուրաքանչյուր քրեական գործով պատժի տեսակն ու չափն ընտրելիս:
(…) պատժի նշանակման իրավական շրջանակները սահմանված են ՀՀ քրեական օրենսգրքով: Դրա հետ մեկտեղ, սակայն, վերոնշյալ օրենքը դատարանին հնարավորություն է տվել որոշակի սկզբունքների (…) պահպանմամբ, իր ներքին համոզմանը և իրավագիտակցությանը համապատասխան, ՀՀ քրեական օրենսգրքի Ընդհանուր և Հատուկ մասերով նախատեսված սահմաններում որոշել պատժի տեսակն ու չափը: Այլ կերպ՝ ուրվագծելով կոնկրետ հանցանքի համար նշանակման ենթակա պատժի առավելագույն և նվազագույն սահմանները՝ ՀՀ քրեական օրենքը դատարանին տվել է այդ շրջանակում հայեցողություն դրսևորելու հնարավորություն:
Վճռաբեկ դատարանը գտել է, որ ՀՀ քրեական օրենսգրքի Հատուկ մասի գրեթե բոլոր հոդվածների սանկցիաներում ամրագրված վերոնշյալ մոտեցումը պայմանավորված է այն տրամաբանությամբ, որ քրեական օրենքը համընդհանուր բնույթ ունի, իսկ արարքը և հանցավորի անձը կոնկրետ են: Ուստի կոնկրետ արարքի և անձի նկատմամբ համընդհանուր քրեական օրենքով նախատեսված սանկցիան կիրառելիս դատարանը պետք է որոշակի հայեցողություն դրսևորի:
Այնսինքն` առանց դատարանի հայեցողության պատժի անհատականացումն անհնար է:
(…) Պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության աստիճանի ու բնույթի, հանցավորի անձի, պատիժը մեղմացնող և ծանրացնող հանգամանքների վերլուծության հիման վրա: Նշված հանգամանքների հայեցողական և ոչ երբեք կամային գնահատման ժամանակ դատարանը պետք է ելնի ՀՀ քրեական օրենսգրքի 48-րդ հոդվածով նախատեսված՝ պատժի նպատակների իրացումն ապահովելու անհրաժեշտությունից (տես Նարեկ Գևորգի Սարգսյանի գործով Վճռաբեկ դատարանի 2011 թվականի դեկտեմբերի 22-ի թիվ ԵԿԴ/0042/01/11 որոշման 14-րդ, 22-23-րդ կետերը)՚:
ՀՀ վճռաբեկ դատարանը Կարեն Հարությունյանի վերաբերյալ գործով վերլուծելով ՀՀ քրեական օրենսգրքի Ընդհանուր մասի մի շարք դրույթներ, մասնավորապես` ՀՀ քրեական օրենսգրքի 10-րդ, 48-րդ և 61-րդ հոդվածները հանգել է այն հետևության, որ պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, անձին բնութագրող բոլոր տվյալները և քրեական օրենքով նախատեսված պահանջներից ելնելով` հանցագործության մեջ մեղավոր անձի նկատմամբ նշանակում է այնպիսի պատիժ, որն անհրաժեշտ և բավարար է այդ անձին ուղղելու և նրա կողմից նոր հանցանքի կատարումը կանխելու համար (տե'ս ՀՀ վճռաբեկ դատարանի` Կարեն Հարությունյանի վերաբերյալ գործով 2007 թվականի նոյեմբերի 30-ի ՎԲ-201/07 որոշումը):
Ամբաստանյալ Վահան Եփրեմյանի անձը բնութագրող տվյալներ հաշվի է առնում, որ նա նախկինում դատված չէ, բնութագրվում է դրական:
Ամբաստանյալի պատասխանատվությունն ու պատիժը մեղմացնող հանգամանք դատարանը հաշվի է առնում, որ նա ընդունել է մեղքը և անկեղծորեն զղջացել կատարած արարքի համար, առաջին անգամ կատարել է միջին ծանրության հանցանք, խնամքի տակ են գտնվում 2009 և 2012 թվականներին ծնված երկու մանկահասակ երեխաները, քայլեր է ձեռնարկել տուժողին պատճառված գույքային վնասի հատուցման ուղղությամբ, տուժողը բողոք կամ գույքային վնասի հատուցման պահանջ չի ներկայացրել:
Ամբաստանյալի պատասխանատվությունն ու պատիժը ծանրացնող հանգամանք է դիտում հանցանքն ալկոհոլի ազդեցության տակ կատարելը:
Հաշվի առնելով ամբաստանյալ Վահան Եփրեմյանի կատարած հանցագործությունների բնույթը և հանրության համար վտանգավորության աստիճանը, դրա կատարման եղանակը, հանցավոր մտադրության իրականացման աստիճանը, հանցագործությունը կատարելուց հետո նրա դրսևորած վարքագիծը, խախտված հասարակական հարաբերության սոցիալական նշանակությունը և այդ ոլորտում պետության քրեական քաղաքականության ուղղվածությունը, ինչպես նաև` հանցավորի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, դատարանը գտնում է, որ ամբաստանյալը ՀՀ քրեական օրենսգրքի 185-րդ հոդվածի 2-րդ մասի 1-ին և 2-րդ կետերով նախատեսված հանցագործության կատարման համար ենթակա է պատժի ազատազրկման ձևով:
Անդրադառնալով իրեղեն ապացույցների տնօրինման հարցին, դատարանը գտնում է, որ իրեղեն ապացույց ճանաչված ՙՆիսսան՚ մակնիշի 34 FN 160 հաշվառման համարանիշի այրված ավտոմեքենան և տուժող Սոս Աբրահամյանի պատռված վերնազգեստը պետք է թողնել նրա տնօրինմանը:
Քննարկելով խափանման միջոցի հարցը` դատարանը գտնում է, որ ամբաստանյալ Վահան Եփրեմյանի նկատմամբ ընտրված խափանման միջոցը` ստորագրություն` չհեռանալու մասին, պետք է թողնել անփոփոխ` մինչև դատավճռի օրինական ուժի մեջ մտնելը:
Ղեկավարվելով ՀՀ քրեական դատավարության օրենսգրքի 119-րդ, 134-րդ, 357-360-րդ, 365-րդ, 366-րդ, 369-373-րդ և 379-րդ հոդվածներով, դատարանը`

ՎՃՌԵՑ

Վահան Արտեմի Եփրեմյանին մեղավոր ճանաչել ՀՀ քրեական օրենսգրքի 185-րդ հոդվածի 2-րդ մասի 1-ին և 2-րդ կետերով նախատեսված հանցագործությունների կատարման մեջ և նրա նկատմամբ պատիժ նշանակել ազատազրկում 6 /վեց/ ամիս ժամկետով:
Վահան Եփրեմյանի նկատմամբ ընտրված խափանման միջոցը` ստորագրություն` չհեռանալու մասին, թողնել անփոփոխ` մինչև դատավճռի օրինական ուժի մեջ մտնելը:
Իրեղեն ապացույց ճանաչված ՙՆիսսան՚ մակնիշի 34 FN 160 հաշվառման համարանիշի այրված ավտոմեքենան և տուժող Սոս Աբրահամյանի պատռված վերնազգեստը թողնել նրա տնօրինմանը:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո` մեկամսյա ժամկետում:



ԴԱՏԱՎՈՐ Ա.ՄԿՐՏՉՅԱՆ