Գործ No ԵԱՔԴ/0077/01/15

ԴԱՏԱՎՃԻՌ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՙ17՚ փետրվարի 2017 թվական քաղաք Երևան

Երևան քաղաքի Արաբկիր և Քանաքեռ-Զեյթուն վարչական շրջանների առաջին ատյանի ընդհանուր իրավասության դատարանը,

նախագահությամբ` դատավոր Արթուր Մկրտչյանի
քարտուղարությամբ` Միլենա Սարգսյանի
Շուշան Վանոյանի
մասնակցությամբ`
մեղադրողներ Արա Մնացականյանի
Արթուր Չախոյանի
պաշտպաններ Կարեն Սարդարյանի
Արթուր Ալիխանյանի
Վահե Մնացականյանի

դատարանում, դռնբաց դատական նիստում քննեց քրեական գործն ըստ մեղադրանքի Տարոն Գեորգիի Գալուստովի /ծնված 1991 թվականի հունիսի 29-ին` Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, չի աշխատում, դատվածություն չունեցող, հաշվառված` քաղաք Երևան, Նոր Նորքի 7-րդ զանգված, 39-րդ շենք, 39-րդ բնակարան/, մեղադրվում է ՀՀ քրեական օրենսգրքի 104-րդ հոդվածի 1-ին մասով:

Գործի դատավարական նախապատմությունը

2014 թվականի հոկտեմբերի 11-ին ՀՀ քննչական կոմիտեի Երևան քաղաքի քննչական վարչությունում ՀՀ քրեական օրենսգրքի 104-րդ հոդվածի 1-ին և 235-րդ հոդվածի 1-ին մասերով հարուցվել է թիվ 59103514 քրեական գործը:
2014 թվականի հոկտեմբերի 12-ին Տարոն Գեորգիի Գալուստովը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին և 235-րդ հոդվածի 1-ին մասերով, նրա նկատմամբ հայտարարվել է հետախուզում և որպես խափանման միջոց է կիրառվել կալանավորումը:
2014 թվականի հոկտեմբերի 12-ին Տարոն Գալուստովն ինքնակամ ներկայացել է ՀՀ ոստիկանության Երևան քաղաքի վարչության Քանաքեռ-Զեյթունի բաժին:
2014 թվականի հոկտեմբերի 14-ին Տարոն Գալուստովի նկատմամբ կիրառված խափանման միջոց կալանավորումը վերահաստատվել է` կալանքի սկիզբը հաշվելով 2014 թվականի հոկտեմբերի 12-ից:
2015 թվականի մայիսի 05-ին Տարոն Գալուստովին առաջադրված մեղադրանքի մասը վերացվել է, նրան կրկին մեղադրանք է առաջադրվել ՀՀ քրեական օրենսգրքի 104-րդ հոդվածի 1-ին մասով և նա ներգրավվել է որպես մեղադրյալ:
2015 թվականի մայիսի 22-ին թիվ 59103514 քրեական գործն ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների առաջին ատյանի ընդհանուր իրավասության դատարան:

Գործի փաստական հանգամանքները

Նախաքննության մարմինն ամբաստանյալ Տարոն Գալուստովին ՀՀ քրեական օրենսգրքի 104-րդ հոդվածի 1-ին մասով մեղադրանք է առաջադրել, որ ՙնա 2014 թվականի հոկտեմբերի 11-ին` ժամը 01.00ի սահմաններում, գտնվելով Արթուր Եղիազարյանի կողմից վարվող, ՙՕպել Աստրա՚ մակնիշի 34 AQ 054 հաշվառման համարանիշի տաքսի ավտոմեքենայի սրահում, Երևան քաղաքի Պարույր Սևակի 89 հասցեում տեղակայված թիվ 125 դպրոցի դիմաց, ավտոմեքենայի վարորդ Արթուր Եղիազարյանի ներկայությամբ, Լևոն Արմենի Բունիաթյանի հետ գումարային պարտք ու պահանջի խնդիրներ ունենալու պատճառով, վերջինիս ապօրինաբար կյանքից զրկելու` սպանելու դիտավորությամբ, մեկ անգամ կրակել է իր հետ ավտոմեքենայի սրահի` առջևի աջ նստատեղին նստած Լևոն Բունիաթյանի գլխի հատվածի` ձախ քունքային շրջանին, որի հետևանքով առաջացած գլխուղեղի կենսականորեն կարևորագույն ֆունկցիաների սուր խանգարումից Լևոն Բունիաթյանը մահացել է: Այնուհետև նույն տաքսի ավտոմեքենայով Լևոն Բունիաթյանի դին տեղափոխել է Ծարավ Աղբյուրի փողոցի հարևանությամբ տեղակայված զորամասին հարող տարածք, որտեղ ևս մեկ ստուգողական կրակոց է արձակել Լևոն Բունիաթյանի ծոծրակային հատվածին և դին թողնելով գնացքի գծերի մոտ` նույն տաքսի ավտոմեքենայով հեռացել է:՚:

Ապացույցների հետազոտում և գնահատում

Առաջադրված մեղադրանքում ամբաստանյալ Տարոն Գալուստովն իրեն լիովին մեղավոր է ճանաչել և դատաքննության փուլում ըստ էության պնդել է նախաքննության փուլում տված ցուցմունքը, որ 2008 թվականին ՀՀ ԱՆ ՙԱբովյան՚ քրեակատարողական հիմնարկում պատիժ կրելու ընթացքում ծանոթացել է նույն հիմնարկում պատիժ կրող Լևոն Բունիաթյանի հետ, որից հետո նրանց կապը շարունակվել է: Լևոն Բունիաթյանի միջոցով ծանոթացել և ընկերացել է Նարեկ Գասպարյանի հետ: 2014 թվականի օգոստոսին Լևոն Բունիաթյանը զրույցի ընթացքում տեղեկացել է, որ Ռուսաստանի Դաշնությունում նրա ընկեր Գոռը ինչ-որ գործունեություն է ծավալում և գումար ներդնելու դեպքում կարող է ստանալ եկամուտներ: Ինքը Լևոն Բունիաթյանին հայտնել է, որ իր ծանոթ Գևորգը զբաղվում է ոսկու առևտրով և վերջինիցս հետագայում գումարը տալու պայմանով հնարավոր է վերցնել մինչև 30.000 ԱՄՆ դոլար գումարի չափով ոսկի: Իսկ իրականում, տանն ունենալով հանգուցյալ մոր կողմից թողնված ոսկյա զարդեր, այդ ճանապարհով փորձել է իրացնել դրանք: Լևոն Բունիաթյանը համաձայնվել է այդ պայմաններին, որից հետո պայմանավորվածության համաձայն հանդիպել են ՙՄերգելյան՚ այգու մոտ, որտեղ էլ ինքը Լևոնին է տվել մոր ոսկյա զարդերը, նրան խաբել է-ասելով, որ այդ զարդերը վերցրել է Գևորգ Եսայանից, որպեսզի նրա մոտ բարձրացնի գումարի վերադարձման պատասխանատվությունը: Դրանից մոտ 10 օր անց Լևոն Բունիթայանը վերադարձրել է 6000 ԱՄՆ դոլարը, սակայն մեկ շաբաթ անց կրկին վերցրել է այն` պատճառաբանելով, որ գումար է անհրաժեշտ ՌԴ ուղարկելու համար և մի քանի օրվա ընթացքում ամբողջ գումարը, պայմանավորվածության համաձայն` կվերադարձնի: Հետագա երկու ամսվա ընթացքում Լևոն Բունիաթյանը չի վերադարձրել գումարը և ամեն կերպ ձգձգել է: Այդ հարցի վերջնական լուծման նպատակով 2014 թվականի հոկտեմբերի 10-ին` ժամը 21.30-ի սահմաններում, պայմանավորվել և հանդիպել է Լևոն Բունիաթյանին և Նարեկ Գասպարյանին: Լևոն Բունիաթյանը խնդրել է մեկ օր ժամանակ ՌԴ գնալու և ոմն Գոռից գումարը վերցնելու համար, սակայն ինքը չի հավատացել: Լևոն Բունիաթյանն ասել է, որ կարող է ընդհանրապես գումար չվերադարձնել, քանի որ ինքը նրան տոկոսով է գումար տվել, ինչի պատճառով էլ իրենց միջև առաջացել է վիճաբանություն և քաշքաշուկ: Դրան միջամտել է Նարեկ Գասպարյանը և դադարեցրել քաշքաշուկը, այնուհետև պայմանավորվել են հետո հանդիպել և խոսակցությունը շարունակել: Այդ ժամանակ հասկացել է, որ Լևոն Բունիաթյանն իրեն խաբել է և որևէ գումար չի վերադարձնելու: ՙՕպել՚ մակնիշի տաքսի ավտոմեքենայով գնացել են Նարեկի տան մոտ, Նարեկն իջել է, իսկ իրենք շարունակել են ճանապարհը դեպի իրենց տուն: Ճանապարհին գումարի վերաբերյալ խոսակցությունը շարունակվել է, որի ընթացքում Լևոնն իրեն սպառնացել է` ասելով, որ եթե նորից պարտքն ուզի, ՙգլուխը կջարդի՚: Նկատելով, որ տաքսին ճանապարհից շեղվել է, և քանի որ ինքը Լևոնի մոտ ատրճանակ էր տեսել, սկսել է վախենալ` մտածելով, որ Լևոնն իրեն կվնասի: Այդ պատճառով ավտոմեքենայի մեջ Լևոնի գոտկատեղից վերցրել է վերջինիս թմբուկավոր ատրճանակը և կրակել նրա գլխի շրջանին: Այնուհետև նույն տաքսի ավտոմեքենայով Լևոն Բունիաթյանի դին տեղափոխել է Ծարավ Աղբյուրի փողոցի հարևանությամբ տեղակայված զորամասին հարող տարածք, այն դուրս է բերել ավտոմեքենայից, որտեղ ևս մեկ կրակոց է արձակել Լևոն Բունիաթյանի գլխի շրջանին և դին թողնելով այնտեղ` նույն տաքսի ավտոմեքենայով հեռացել է:
Ամբաստանյալը նշել է նաև, որ կրակելուց հետո որոշել է հանձնվել ոստիկանությանը և տաքսու վարորդին նույնպես խորհուրդ է տվել ներկայանալ ոստիկանություն, և հաջորդ օրն ինքնակամ ներկայացել է ՀՀ ոստիկանության Քանաքեռ-Զեյթունի բաժին:
Միաժամանակ ամբաստանյալ Տ.Գալուստովը նշել է, որ զղջում է կատարած արարքի համար:

Ամբաստանյալ Տարոն Գալուստովին առաջադրված մեղադրանքը հիմնավորվել է դատաքննությամբ հետազոտված ներքոհիշյալ ապացույցներով.

Վկա Արթուր Եղիազարյանը դատաքննության փուլում պնդել է նախաքննության փուլի ցուցմունքը, որ 2014 թվականի սեպտեմբեր ամսին գնել է ՙՕպել Աստրա՚ մակնիշի 34 AQ 054 հաշվառման համարանիշի ավտոմեքենան, որը Երևան քաղաքում վարել է որպես տաքսի: 2014 թվականի հոկտեմբերի 11-ին` ժամը 01-ի սահմաններում, Երևան քաղաքի Աբովյան փողոցում իր տաքսին կանգնեցրել են երեք անծանոթ երիտասարդներ, որոնցից մեկը նստել է ավտոմեքենայի սրահի առջևի աջ նստատեղին, իսկ մյուս երկուսը ետևի նստատեղին: Հետևի նստատեղին նստած երիտասարդներից մեկին իջեցրել է Երևան քաղաքի ՙՄերգելյան՚ կոչվող թաղամասում, որից հետո ուղևորվել են դեպի Զեյթուն թաղամաս: Հասնելով նշված թաղամասում գտնվող ՙԵրևան Սիթի՚ սուպերմարկետի խաչմերուկ, թեքվել են դեպի աջ և երթևեկելով մոտ 300 մետր, շենքերի բակում գտնվող օղակաձև հրապարակի մոտ շրջադարձ կատարելուց հետո երիտասարդներից մեկի հրահանգով կանգնեցրել է ավտոմեքենան, որից հետո անսպասելի լսել է կրակոցի ձայն, պտտվելով նկատել է, որ առջևի նստատեղին նստած տղայի գլխի ձախ հատվածից արյուն է հոսում, իսկ հետևի նստատեղին նստած երիտասարդի ձեռքին ատրճանակ կա: Դրանից հետո երիտասարդը` Տարոնը, իրեն ասել է, որ խուճապի չմատնվի, քանի որ իր դեմ ոչինչ չունի, և խնդրել է անել այն` ինչ կասի: Տարոնի ցանկությամբ ուղևորվել են դեպի Երևան քաղաքի Ծարավ Աղբյուրի փողոցում գտնվող զորամասին հարող տարածք, նա մեքենայից հանել է արնահոսող երիտասարդի մարմինը, գցել գետնին և արձակել ևս մեկ կրակոց, իսկ ինքն այդ ընթացքում մնացել է ավտոմեքենայի սրահում: Այնուհետև երիտասարդն ասել է, որ իրեն տանի Սայաթ-Նովա փողոց, տվել է ձեռքի ժամացույց ու ասել, որ գնա հանձնվի, քանի որ ինքն էլ է հանձնվելու: Տարոնն իրեն ասել է նաև, որ սպանված երիտասարդը գումարի համար մի քանի անգամ ցանկացել է իրեն սպանել, այդ է եղել նրան սպանելու պատճառը:
Վկան նշել է նաև, որ ավտոմեքենայի մեջ երիտասարդների խոսակցությունները չի լսել և չի նկատել` քաշքշուկ կամ վիճաբանություն եղել է, թե` ոչ:

Վկա Ամալիա Զաքարյանը դատաքննության փուլում ցուցմունք է տվել, որ Լևոն Բունիաթյանի հետ գտնվել է մտերիմ հարաբերությունների մեջ: Նրա միջոցով ծանոթացել և մտերմացել է նաև Նարեկ Գասպարյանի և նրա կնոջ` Արուսյակ Ալթունյանի հետ: Լևոն Բունաիթյանը վերջին 3-4 ամիսների ընթացքում մտերմացել է Տարոն Գալուստովի հետ և այդ ժամանակահատվածից սկսած Լևոն Բունաիթյանը, Տարոն Գալուստովը և Նարեկ Գասպարյանը գրեթե միշտ եղել են միասին: Լևոն Բունիաթյանից տեղեկացել է, որ Տարոն Գալուստովը ոմն Գևորգից վերցրել և նրան է տվել 23.000 ԱՄՆ դոլար գումարի ոսկյա զարդեր: 2014 թվականի հոկտեմբերի 10-ին` ժամը 17:00-ի սահամաններում, Լևոն Բունաիթյանը և Նարեկ Գասպարյանը գնացել են վերջինիս ՌԴ մեկնելու տոմս գնելու, որից հետո Նարեկ Գասպարյանից տեղեկացել է, որ Լևոն Բունիաթյանը Տարոն Գալուստովի հետ է, ինչ-որ գործեր ունեն: Դրանից հետո, մոտ 20 րոպե անց Տարոն Գալուտովը և Լևոն Բունաիթյանը ՙՕպել՚ մակնիշի տաքսիով հանդիպել են իրեն, որից հետո ինքը և Լևոն Բունիաթյանը գնացել են տուն, սակայն որոշ ժամանակ անց Լևոն Բունիաթյանը փոխելով իր հագուստները և վերցնելով բջջային հեռախոսը` հեռացել է:
2015 թվականի հոկտեմբերի 11-ին` ժամը 00:50-ի սահմաններում Լևոն Բունիաթյանը Տարոն Գալուստովի բջջային հեռախոսահամարից զանգահարել է իրեն և հայտնել, որ 20 րոպեից լինելու է տանը: Տեսնելով, որ Լևոն Բունաիթյանն ուշանում է` զանգահարել է Տարոն Գալուստովի հեռախոսահամարին, որը անհասանելի է եղել: Հաջորդ օրը ՀՀ ոստիկանության Քանաքեռ-Զեյթունի բաժնում տեղեկացել է, որ Լևոն Բունիաթյանը սպանված է: Վկան նշել է, որ իր համոզմամբ` Տարոնը Լևոնին սպանել է 20000 դոլար պարտքի պատճառով:

Վկա Արուսյակ Ալթունյանը նախաքննության փուլում ցուցմունք է տվել, որ Նարեկ Գասպարյանի կինն է և մտերիմ փոխհարաբերությունների մեջ է գտնվել վերջինիս ընկերներ Լևոն Բունիաթյանի և Տարոն Գալուստովի հետ: Լևոն Բունիաթյանն ու Նարեկ Գասպարյանը մանկական ընկերներ են, իսկ Տարոն Գալուստովի հետ Նարեկն սկսել է ընկերություն անել 2014թ.-ի հունիս-հուլիս ամիսներից: Լևոն Բունիաթյանն ու Տարոն Գալուստովը միասին պատիժ են կրել անչափահասների գաղութում: Նարեկ Գասպարյանը գումար է պարտքով վերցրել Տարոն Գալուստովից, սակայն մաս-մաս վերադարձրել է` գրավադնելով իրենց ոսկյա զարդերն ու համակարգիչները: 2014թ. հոկտեմբերի 10-ին` ժամը 22:30-ի սահմաններում, Նարեկը դուրս է եկել տնից` ասելով, որ գնում է Տարոնի և Լևոնի հետ հանդիպման: Վերադարձել է ժամը 01-ի սահմաններում: Ժամը 01:30-ի սահմաններում, հեռախոսազրույց է ունեցել Լևոն Բունիաթյանի ընկերուհու` Ամալիա Զաքարյանի հետ և նրանից տեղեկացել, որ Լևոնն ընկերուհուն է զանգահարել ժամը 01-ի սահմաններում և ասել է, որ 20 րոպեից կհասնի տուն, սակայն չի վերադարձել: Նարեկը զանգահարել է Տարոն Գալուստովի հեռախոսահամարին և տեսնելով, որ այն անհասանելի է, մտածել է, որ նրանք միասին գնացել են հյուրանոց: Հետագայում իմացել է, որ Տարոն Գալուստովը տաքսի ավտոմեքենայում կրակել և սպանել է Լևոն Բունիաթյանին:

Հատոր 1 գ.թ. 109-110, հատոր 2 գ.թ. 121-123, հատոր 3 գ.թ. 191-196

Վկա Գեղամ Հակոբյանը դատաքննության փուլում ըստ էության պնդել է նախաքննության փուլի ցուցմունքը, որ 2014թ.-ի սեպտեմբերին իր ՙՕպել՚ մակնիշի 34 AQ 054 հաշվառման համարանիշի ավտոմեքենան տվել է իրենց հետ նույն փողոցում ապրող Արթուր Եղիազարյանին` պայմանով, որ վերջինս այն շահագործի որպես տաքսի և հավաքված գումարով հետագայում գնի այդ ավտոմեքենան: 2014թ. հոկտեմբերի 10-ին գնացել է Ծաղկաձոր և վերադարձել է հաջորդ օրն առավոտյան: Վերադառնալուց հետո Արթուրը զանգահարել է իրեն և հայտնել, որ գիշերն ավտոմեքենայի մեջ դեպք է տեղի ունեցել և ցանկանում է հանդիպել իր հետ: Վերադառնալով գյուղ հանդիպել է Արթուրին, ով պատմել է, որ գիշերը` ժամը 01-ի սահմաններում, Երևանի Աբովյան փողոցի վրա ավտոմեքենան են նստել երեք երիտասարդ և պատվիրել են գնալ Զեյթուն թաղամաս: Կոմիտաս թաղամասում նրանցից մեկն իջել է, իսկ մյուսները պատվիրել են գնալ Զեյթուն: Ճանապարհին ուղևորների պահանջով կանգնեցրել է ավտոմեքենան, և այդ ժամանակ հետևի նստատեղին նստած երիտասարդը կրակել է դիմացի նստատեղին նստած երիտասարդի գլխին, որից հետո պատվիրել է գնալ ինչ-որ վայր, որտեղ այդ տղան ավտոմեքենայից դուրս է բերել տուժած տղային, ևս մեկ անգամ կրակել է, որից հետո Արթուրը նրան տեղափոխել է Կենտրոն թաղամաս և այդ տղայի իջնելուց հետո վերադարձել է տուն: Իր խորհրդով Արթուրն ավտոմեքենայով ներկայացել է ոստիկանության Արմավիրի մարզային վարչություն:

Վկա Խոսրով Քեսաբյանը դատաքննության փուլում ցուցմունք է տվել, որ շինարարական աշխատանքներ է իրականացրել Երևան քաղաքի Ծարավ Աղբյուրի փողոցում գտնվող ՀՀ ՊՆ զորամասի հարևանությամբ: 2014թ. հոկտեմբերի 11-ին` ժամը 08-ի սահմաններում, նշված զորամասի դիմաց գտնվող երկաթգծի մոտով անցնելիս նկատել է տղամարդու դիակ: Այդ մասին տեղեկացրել է զորամասի աշխատակիցներին, ովքեր ահազանգել են ոստիկանություն:

Վկա Գևորգ Աղաջանյանը դատաքննության փուլում ցուցմունք է տվել, որ նա աշխատել է Երևան քաղաքի Ծարավ-Աղբյուր փողոցում տեղակայված ՀՀ ՊՆ զորամասում` որպես գումարտակի հրամանատար: 2014թ. հոկտեմբերի 11-ին` ժամը 08:15-ին, զորամասի հսկիչ անցագրային կետի մոտ բանվորներից տեղեկացել է, որ զորամասի հարակից գնացքի գծի մոտ ընկած է տղամարդու դիակ: Ահազանգել են 1-02 ծառայություն:

Վկա Սրբուհի Գրիգորյանը նախաքննության փուլում ցուցմունք է տվել, որ բնակվում է Ծարավ Աղբյուրի փողոցի 49/2 տանը: 2014թ. հոկտեմբերի 11-ին` ժամը 08:00-ի սահմաններում, դրսում լսելով ձայներ դուրս է եկել տնից և մոտ 10 մետր հեռավորության վրա նկատել է զինվորական համազգեստով տղամարդկանց և գնացքի գծերի մոտ ընկած մի երիտասարդի` ամբողջությամբ արնաշաղաղ վիճակում:

Հատոր 1 գ.թ. 17-18

Վկա Ռուզաննա Վարդանյանը նախաքննության փուլում ցուցմունք է տվել, որ Լևոն Բունիաթյանի մայրն է: Որդու ընկերուհի Ամալյա Զաքարյանից տեղեկացել է, որ 2014 թվականի հոկտեմբերի 11-ին` ժամը 01:00-ի սահմաններում որդին զանգահարել է վերջինիս և հայտնել, որ 20 րոպեից լինելու է տանը, սակայն այդպես էլ տուն չի եկել: Որդու ընկեր Նարեկ Գասպարյանից, տեղեկացել է, որ որդին գիշերը Տարոն Գալուստովի հետ է եղել, նրանք Նարեկին տուն են տարել, իրենք էլ պատրաստվել են տուն գնալ: Այնուհետև ոստիկանությունում տեղեկացել է, որ Տարոն Գալուստովը որդուն սպանել է:

Հատոր 1 գ.թ. 101-102, հատոր 2 գ.թ. 115-118

Վկա Սուսաննա Եղիազարյանը դատաքննության փուլում ցուցմունք է տվել, որ Արթուր Եղիազարյանի մայրն է, բնակվել են միասին: Արթուր Եղիազարյանն ընկերոջ` Գեղամի եղբոր ՙՕպել՚ մակնիշի ավտոմեքենան վարել է որպես տաքսի: 2014թ. հոկտեմբերի 11-ի առավոտյան տեսել է, որ Արթուր Եղիազարյանը գունատ է և ունեցել է տարօրինակ պահվածք: Արթուրը խնդրել է սուրճ եփել, որից հետո դուրս է եկել և հեռացել նշված ավտոմեքենայով: Արթուրի կինը հայտնել է, որ Արթուրը գիշերվանից տարօրինակ պահվածք է ունեցել: Օրվա վերջում տեղեկացել է, որ Արթուրի ավտոմեքենայում մարդ են սպանել և Արթուրը գտնվում է ոստիկանությունում: Վերադառնալուց հետո Արթուր Եղիազարյանը կցկտուր պատմել է, որ իր ավտոմեքենան երեք երիտասարդ են նստել: Նրանցից մեկին իջեցրել են ինչ-որ տեղ, որից հետո գնացել են Զեյթուն թաղամաս: Ճանապարհին ավտոմեքենայում կրակոց է տեղի ունեցել և Արթուրը տեսել է, որ առջևի նստատեղին նստած տղայի գլխի շրջանից արյուն է հոսում: Հետևի նստած տղան սպանված տղային հանել է ավտոմեքենայից, ևս մեկ անգամ կրակել է: Տան դիմացը մաքրելու ընթացքում գտել է կապույտ ժամացույց, այն ցույց է տվել Արթուրին, ով իրեն ասել, որ այդ ժամացույցը իրեն է տվել իր ավտոմեքենայի ուղևորին սպանող տղան:

Վկա Վահե Սաղաթելյանը դատաքննության փուլում ցուցմունք է տվել, շուրջ չորս տարի է` ճանաչում է Տարոն Գալուստովին և նրա հետ գտնվում է ընկերական փոխհարաբերությունների մեջ: Քանի որ ինքն ապրում է Վայքում, ուստի երբ եկել է Երևան, հանդիպել է Տարոնի հետ: Հանդիպումներից մեկի ժամանակ իմացել է, որ այդ օրը Տարոն Գալուստովը պետք է գնա աղջկա հետ հանդիպման, և իր ՙMontblanc՚ տեսակի կապույտ գույնի ձեռքի ժամացույցը տվել է նրան` հետագայում վերադարձնելու պայմանով: Հետագայում լրատվամիջոցներից տեղեկացել է, որ Տարոն Գալուստովը գումարային հարցերի պատճառով սպանություն է կատարել:

Վկա Ռաֆայել Գասպարյանը դատաքննության փուլում ցուցմունք է տվել, որ հանդիսանում է Նարեկ Գասպարյանի եղբայրն է և ընկերություն է արել Լևոն Բունիաթյանի հետ, ում միջոցով ծանոթացել է Տարոն Գալուստովի հետ: Լևոն Բունիաթյանի և Տարոն Գաալուստովի հետ հանդիպումների ժամանակ վերջիններիս միջև տեղի ունեցած խոսակցություններից իմացել է, որ ոսկու հետ կապված գործարքներ են կատարում:

Հատոր 3 գ.թ. 179-184

Արթուր Եղիազարյանի մասնակցությամբ կատարված քննչական փորձարարության ընթացքում վերջինս մատնացույց է արել Տարոն Գալուստովի, Նարեկ Գասպարյանի և Լևոն Բունիաթյանի հետ ուղևորության երթուղին: Արթուր Եղիազարյանը հայտարարել է, որ 2014թ. հոկտեմբերի 11-ին` ժամը 01-ի սահմաններում, Արամի փողոցի 3 հասցեում գործող ՙԱդիդաս՚ խանութի դիմաց իր վարած տաքսի ավտոմեքենային է մոտեցել երեք երիտասարդ, ովքեր պատվիրել են երթևեկել Մերգելյան փողոցով Զեյթուն թաղամաս: Հ.Հակոբյան փողոցի 4-րդ շենքի մոտ իջեցրել են հետևի նստատեղին նստած երիտասարդներից մեկին /Նարեկ Գասպարյանին/, շարունակել են երթուղին Կոմիտասի պողոտայով դեպի Զեյթուն թաղամաս: Շավրոյան և Յան Ռայնիսի փողոցների հատման խաչմերուկում` Սևակ 89 հասցեում գործող թիվ 125 դպրոցի դիմաց, կողքի նստատեղին նստած երիտասարդի /Լևոն Բունիթայան/ պահանջով կանգնեցրել է ավտոմեքենան, և այդ պահին լսել է կրակոց, ապա թեքվելով տեսել է, որ վերջինիս գլխի հատվածից արյուն է հոսում: Այնուհետև հետևի նստատեղին նստած երիտասարդի պահանջով ավտոմեքենան վարել է դեպի Ծարավ Աղբյուրի փողոց, որտեղ տեղակայված զորամասի դիմաց կանգ է առել: Հետևի նստատեղին նստած երիտասարդը /Տարոն Գալուստովը/ առջևի նստատեղին գտնվող երիտասարդի անշարժ մարմինը դուրս է բերել ավտոմեքենայից և գցել գետնին: Այդ ժամանակ լսել է երկրորդ կրակոցը, որից հետո այդ երիտասարդը նստել է հետևի նստատեղին և պատվիրել ուղևորվել դեպի Կենտրոն թաղամաս: Վերջինիս պահանջով նրան իջեցրել է Սայաթ-Նովա 12 շենքի դիմաց, իսկ ինքը գնացել է տուն:

Հատոր 1 գ.թ. 57-63

Դեպքի վայրի զննության արձանագրության համաձայն` Երևան քաղաքի Ծարավ Աղբյուրի փողոցի վրա տեղակայված զորամասի հարևանությամբ հայտնաբերվել է տղամարդու դիակ` գլխի շրջանում մուտքի անցքի տեսքով հրազենային վնասվածքով: Զննության ընթացքում հայտնաբերվել են արնանման հետքեր, որոնցից խծուծների վրա վերցվել են նմուշներ, հողի նմուշներ, որոնք փաթեթավորվել և կնիքվել են: Հայտնաբերվել է նաև արնանման հետքերով երեք քար, մետաղյա կտոր, ոսկրի կտոր, փայտի կտոր, որոնք փաթեթավորվել են առանձին փաթեթներում և կնիքվել:

Հատոր 1 գ.թ. 5-6

ՙՕպել՚ մակնիշի 34 AQ 054 հաշվառման համարանիշի ավտոմեքենայի զննության արձանագրության համաձայն` սրահում հայտնաբերվել են արնանման հետքեր, որոնցից վերցվել են նմուշներ, փաթեթավորվել են մեկ փաթեթում և կնիքվել: Զննության ընթացքում վերցվել են նաև նստատեղերի գորգերը, որոնք փաթեթավորվել են առանձին փաթեթներում և կնիքվել են: Վերցվել է նաև ավտոմեքենայում հայտնաբերված սրբիչը, որը նույնպես փաթեթավորվել և կնիքվել է: Ավտոմեքենայի զննությամբ նստատեղերից և հենակներից անգույն և սև գույնի դակտոժապավեններով վերցվել են միկրոմասնիկների նմուշներ:

Հատոր 1 գ.թ. 51-54

Անձին լուսանկարով ճանաչման ներկայացնելու մասին արձանագրության համաձայն որի` Արթուր Եղիազարյանին ներկայացված թվով չորս անձանց լուսանկարներից, վերջինս ճանաչել է Տարոն Գալուստովի լուսանկարը և հայտարարել, որ դա նույն անձնավորությունն է, ով 2014 թվականի հոկտեմբերի 11-ին` ժամը 01.30-ի սահմաններում, իր կողմից վարվող ՙՕպել՚ մակնիշի ավտոմեքենայի մեջ կրակել է ավտոմեքենայի սրահի առջևի աջ նստատեղին նստած երիտասարդի գլխի հատվածին:

Հատոր 1 գ.թ. 103-105

Անձին լուսանկարով ճանաչման ներկայացնելու մասին արձանագրության համաձայն` Արթուր Եղիազարյանին ներկայացված թվով չորս անձանց լուսանկարներից, վերջինս ճանաչել է Լևոն Բունիաթյանի լուսանկարը և հայտարարել, որ դա նույն անձնավորությունն է, ով 2014 թվականի հոկտեմբերի 11-ին նստած է եղել իր կողմից վարվող տաքսի ավտոմեքենայի սրահի առջևի աջ նստատեղին, ում գլխի հատվածին կրակել է նույն օրը ժամը 01.30-ի սահմամններում իր ավտոմեքենայի սրահի հետևի նստատեղին նստած անձը:

Հատոր 1 գ.թ. 106-108

Դիակը ճանաչման ներկայացնելու մասին արձանագրության համաձայն` Հովհաննես Հմայակյանը ճանաչել է իր քրոջ որդի Լևոն Բունիաթյանի դին:

Հատոր 1 գ.թ. 113

Անձին ճանաչման ներկայացնելու մասին արձանագրության համաձայն` Արթուր Եղիազարյանը ճանաչել է թվով չորս անձանց շարքում կանգնած Տարոն Գալուստովին և հայտարարել, որ վերջինս այն նույն անձնավորությունն է, ով 2014 թվականի հոկտեմբերի 11-ին, ժամը 01-ի սահմաններում, ատրճանակով կրակել է իր ավտոմեքենայի սրահի առջևի աջ նստատեղին նստած անձի գլխի շրջանին:

Հատոր 1 գ.թ. 156-158

Տարոն Գալուստովի մասնակցությամբ կատարված քննչական փորձարարության ընթացքում վերջինս մատնացույց է արել Արթուր Եղիազարյանի, Նարեկ Գասպարյանի և Լևոն Բունիաթյանի հետ ուղևորության երթուղին: Տարոն Գալուստովը հայտարարել է, որ 2014թ. հոկտեմբերի 11-ին` ժամը 01-ի սահմաններում, Արամի փողոցի 3 հասցեում գործող ՙԱդիդաս՚ խանութի դիմաց նստել են տաքսի ավտոմեքենա և պատվիրել երթևեկել Մերգելյան փողոցով դեպի Զեյթուն թաղամաս: Երևան քաղաքի Բակունցի փողոցի 2-րդ շենքի մոտ իջեցրել են Նարեկ Գասպարյանին, շարունակել են երթուղին Կոմիտասի պողոտայով դեպի Զեյթուն թաղամաս: Պարույր Սևակ 89 հասցեում գտնվող թիվ 125 դպրոցի դիմաց Լևոն Բունիաթյանի պահանջով տաքսի ավտոմեքենան կանգնել է, և այդ պահին ինքը կրակել է վերջինիս գլխի շրջանին: Այնուհետև, իր պահանջով տաքսի ավտոմեքենայի վարորդը վարել է դեպի Ծարավ Աղբյուր փողոց, որտեղ տեղակայված զորամասի դիմաց կանգ է առել: Տարոն Գալուստովը Լևոն Բունիաթյանի անշարժ մարմինը դուրս է բերել ավտոմեքենայից և գցել գետնին: Այդ ժամանակ ևս մի կրակոց է արձակել Լևոն Բունիաթյանի ուղղությամբ և պատվիրել ուղևորվել դեպի Կենտրոն թաղամաս: Դրանից հետո Սայաթ-Նովա փողոցում իջել է տաքսիից և հեռացել:

Հատոր 1 գ.թ. 190-208

Ստացիոնար դատահոգեբուժական փորձագետի թիվ 125 եզրակացության համաձայն` Տարոն Գալուստովը հոգեկան հիվանդությամբ չի տառապել և չի տառապում: Այդ մասին են վկայում ինչպես անամեստիկ տվյալները, այնպես էլ ներկա հետազոտման արդյունքները: Ինչպես իրավախախտումը կատարելիս այնպես էլ ներկայումս նա կարող էր և կարող է գիտակցել իր գործողությունների վտանգավորությունը և ղեկավարել դրանք, ուստի իրեն մեղսագրվող արարքի նկատմամբ Տարոն Գեորգիի Գալուստովին հարկ է ճանաչել մեղսունակ:

Հատոր 2 գ.թ. 186-190

Դատաբժշկական փորձագետի թիվ 990 եզրակացության համաձայն` ըստ դիակի դատաբժշկական փորձաքննության ընթացքում ուսումնասիրված վաղ դրակային երևույթների արտահայտվածությունների աստիճանների կարելի է ենթադրել, որ Լևոն Բունիաթյանի մահը վրա է հասել դիակի դատաբժշկական փորձաքննությունից ավելի քան 24 ժամ առաջ: Լևոն Բունիաթյանի մահը վրա հասել գլխուղեղի կենսականորեն կաևորագույն ֆունկցիաների սուր խանգարումից` գլխի հրազենային, գնդակային միջանցիկ և կույր վնասվածքներ ստանալու հետևանքով, որոնք էլ գտնվում են ուղղակի պատճառական կապի մեջ` մահվան անմիջական պատճառի հետ: Լևոն Բունիաթյանի դիակի դատաբժշկական փորձաքննությամբ հայտնաբերվել են` աջ և ձախ աչքերի վերին կոպերի արյունազեղումներ, ձախ աչքի սպիտակուցաթղանթի արյունազեղում, արյունազեղումներ գլխի մաշկի տակ, քունքամկաններում, ձախ ծոծրակային շրջանում ենթավերնոսկրային արյունահավաք, գանգի թաղի, հիմի ոսկրերի բաց, բազմաբեկորային կոտրվածքներ, գլխուղեղի ուղեղիկ անցումով տարածում ենթաոստայնային արյունազեղումներ և արյունահավաքներ, ներուղեղային մանր ու մեծ արյունազեղման ու արյունահավաքի օջախներ, ուղեղանյութի ջնջխում, հրազենային <<մուտքի անցք>>-եր` ձախ քունքային և ձախ ծոծրակային շրջաններում, հրազենային <<Ելքի անցք>> աջ քունքային շրջանում, հեղուկ արյուն ուղեղի կողմնային փորոքներում, որոնք պատճառվել են` կենդանության օրոք, գնդակով /ներով/ լիցքավորված, որի կազմի մեջ եղել է պղինձ, հրազենից արձակված կրակոցներով, ձախ քունքային շրջանի վնասվածքը պատճառվել է տվյալ զենքին բնորոշ կրակոցի լրացուցիչ գործոնների ազդեցության սահմաններում, իսկ ձախ ծոծրակային շրջանի վնասվածքի շուրջ կրակոցի լրացուցիչ գործոնների առկայություն չի հայտնաբերվել, կենդանի անձանց մոտ, համարվում են առողջությանը ծանր վնաս պատճառող` կյանքին վտանգ սպառնացող մարմնական վնասվածքներ, որոնք էլ բերել են մահվան: Լևոն Բունիաթյանը, հրազենային, գնդակային վնասվածքները ստանալու պահին` ձախ քունքային և ծոծրակային շրջաններով ուղղված է եղել դեպի հրազենի փողաբերանի լայնական կտրվածքը /ները/: Ձախ և աջ քունքային շրջանների հրազենային միջանցիկ վերքային խողովակն ունի ձախից աջ ուղղություն, իսկ ձախ ծոծրակային շրջանի հրազենային կույր վերքային խողովակն ունի հետևից առաջ, աջից ձախ ուղություն: Լևոն Բունիաթյանի դիակի դատաբժշկական փորձաքննությամբ հայտնաբերվել են նաև քերծվածքներ, արյունազեղումներ, սալջարդ վերք` գլխի, դեմքի, ծնկային հոդի շրջաններում, որոնք ևս պատճառվել են կենդանության օրոք, բութ առարկաներով կենդանի անձանց մոտ սովորաբար համարվում են` առողջությանը թեթև վնասի հատկանիշներ չպարունակող մարմնական վնասվածքներ և չեն գտնվում պատճառական կապի մեջ մահվան անմիջական պատճառի հետ: Լևոն Բունիաթյանի դիակից վերցված արյան մեջ, դատաքիմիական հետազոտությամբ սպիրտներ չեն հայտնաբերվել: Դատաքիմիական ուսումնասիրությամբ Լևոն Բունիաթյանի դիակից վերցված արյան մեջ և ներքին օրգանների կտորներում թմրանյութեր չեն հայտնաբերվել: Լևոն Բունիաթյանի դիակից վերցված արյան, ներքին օրգանների կտորների դատաքիմիական ուսումնասիրությամբ` հոգեմետ նյութեր չեն հայտնաբերվել: Լևոն Բունիաթյանի դիակի հետանցքի բերանի շրջաններում վնասվածքներ և փոփոխություններ, որոնք կվկայեին վերջինիս հետանցքից, բերանից սեռական հարաբերության մասին` չեն հայտնաբերվել: Դատակենսաբանական ուսունսիրությամբ դիակի հետանցքից և բերանից վերցված քսուկներում ու տամպոններում սերմնաէակներ չեն հայտնաբերվել: Լևոն Բունիաթյանի դիակի դատաբժշկական փորձաքննության ընթացքում, ձախ ծոծրակային շրջանից, գլխի մաշկի տակից հանվել է գնդակ, որն առգրավվել է քննիչի կողմից:

Հատոր 2 գ.թ. 191-202

Դատակենսաբանական փորձագետի թիվ 459 եզրակացությամբ համաձայն` փորձաքննությանը ներկայացված թվով երեք քարերի, մետաղի կտորի, փայտի կտորի, ոսկրի կտորի, մառլայի երկու խծուծների, թվով 8 փաթեթներում ներկայացված քսուկների փաթեթներում, դեղին սրբիչի, ավտոմեքենայի թվով 4 գորգերի վրա տեղակայված կասկածելի հետքերում հաստատվել է մարդկային ծագման արյան առկայություն, որն առաջացել է ըստ արյան ABO իզոշճաբանական համակարգի Օ խմբի արյուն ունեցող անձից կամ անձանցից, այդ թվում նաև` կարող էր առաջանալ Լևոն Բունիաթյանից:

Հատոր 3 գ.թ. 72-78

Դատաձգաբանական և դատաքիմիական համալիր փորձագետի թիվ 2971-14 եզրակացության համաձայն` փորձաքննության ներկայացված գնդակը հանդիսանում է ՙՊՄ՚, ՙԱՊՍ՚ և համապատասխան տրամաչափի այլ ակոսափող ատրճանակների համար նախատեսված գործարանային արտադրության 9 մմ տրամաչափի փամփուշտի մաս` կրակված գնդակ, կրակվել է ինքնաշեն զենքի փողից, պիտանի է կրակող զենքի փողի նույնացման համար, ռազմամթերք չի հանդիսանում: Լևոն Բունիթյանի հագուստներից երկարաթև շապիկի գլխանոցի վրա առկա է վնասվածք, որը հանդիսանում է հրազենային, գնդակային մուտքի թափանցող վնասվածք, պատճառվել է պղինձ պարունակող հավանաբար 9 մմ տրամաչափի գնդակով /հնարավոր է ներկայացված գնդակով/, տվյալ զենքի համար լիցքի լրացուցիչ գործոնների ազդեցության սահմաններում` մոտ 40-60 սմ հեռավորությունից` հետից առաջ ուղղությամբ կատարված կրակոցի հետևանքով:

Հատոր 3 գ.թ. 79-84

Դատակենսաբական փորձագետի թիվ 89 եզրակացության համաձայն` փորձաքննությանը ներկայացված Արթուր Եղիազարյանի սպորտային անդրավարտիքի և վերնաշապիկի վրա տեղակայված կասկածելի հետքերում հաստատվել է մարդկային ծագման արյան առկայություն, որն ըստ արյան ABO իզոշճաբանական համակարգի առաջացել է Օ խմբի արյուն ունեցող անձից կամ անձանցից, այդ թվում նաև կարող էր առաջանալ Լևոն Բունիաթյանից: Փորձաքննությանը ներկայացված հանգուցյալ Լևոն Բունիաթյանի ջինսե անդրավարտիքի, ջեմպերի, բաճկոնի, գոտու, վարտիքի, զույգ կոշիկների և գուլպաների վրա տեղակայված կասկածելի հետքերում հաստատվել է մարդկային ծագման արյան առկայություն, որն առաջացել է ըստ արյան ABO իզոշճաբանական համակարգի Օ խմբի արյուն ունեցող անձից կամ անձանցից, այդ թվում նաև` կարող էր առաջանալ Լևոն Բունիաթյանից:

Հատոր 4 գ.թ. 149-153

Դատամանրաթելային փորձագետի թիվ Ք-15 եզրակացության համաձայամբ, համաձայն որի` փորձաքննությանը տրամադրված ՙՕպել՚ մակնիշի 34 AQ 054 հաշվառման համարանիշի ավտոմեքենայի սրահի` «առջևի աջ նստատեղե և «առջևի աջ հենակե գրառմամբ փաթեթներում առկա անգույն թափանցիկ միկրոմասնիկային ժապավենների կպչուն շերտերին հայտնաբերված երկնագույն բամբակյա ծագում ունեցող միկրամանրաթելերն ըստ մորֆոլոգիական հատկանիշների համընկնում են Լևոն Բունիաթյանի ջինսե անդրավարտիքի և ջինսե բաճկոնի գործվածքի կազմի մեջ մտնող երկնագույն բամբակյա ծագում ունեցող մանրաթելերի հետ, և հնարավոր է ունեն ընդհանուր սեռային պատկանելիություն: Փորձաքննությանը տրամադրված ՙՕպել՚ մակնիշի 34 AQ 054 հաշվառման համարանիշի ավտոմեքենայի սրահի` ՙառջևի ձախ նստատեղ՚ և ՙվարորդի նստատեղի հենակ՚ գրառմամբ փաթեթներում առկա անգույն թափանցիկ միկրամասնիկային ժապավենների կպչուն շերտերին հայտնաբերված սև գույնի բամբակյա ծագում ունեցող միկրոմանրաթելերն ըստ մորֆոլոգիական հատկանիշների համընկնում են Արթուր Վաչագանի Եղիազարյանի սև գույնի սպորտային անդրավարտիքի և սպորտային վերնազգեստի գործվածքի կազմի մեջ մտնող սև գույնի բամբակյա ծագում ունեցող մանրաթելերի հետ, և հնարավոր է ունեն ընդհանուր սեռային պատկանելիություն:
Դատամանրաթելային փորձաքննությամբ հիմնավորվել է, որ դեպքի ժամանակ Արթուր Եղիազարյանը նստած է եղել ՙՕպել՚ մակնիշի 34 AQ 054 հաշվառման համարանիշի ավտոմեքենայի սրահի առջևի ձախ նստատեղին, իսկ տուժող Լևոն Բունիաթյանը` նույն ավտոմեքենայի սրահի առջևի աջ նստատեղին:

Հատոր 3 գ.թ. 238-242

Տարոն Գալուստովի կողմից օգտագործված 099-40-40-24 բջջային հեռախոսահամարից կատարված մուտքային և ելքային հեռախոսազանգերի վերծանումների զննության արձանագրության համաձայն` 2014 թվականի հոկտեմբերի 11-ին` ժամը 00:57:15-ին կատարել է ելքային` 0:11 րոպե տևողությամբ հեռախոսազանգ 043 09-26-27 հեռախոսահամարին, որը սպասարկել է Երևան քաղաքի Արամի 1 հասցեի ալեհավաք կայանը, որը սպասարկել է նաև նույն հեռախոսահամարից 00:57:20-ին ստացված SMS կարճ հաղորդագրություն:
Ժամը 01:09:03-ին և 01:09:08-ին ստացել է SMS կարճ հաղորդագրություններ համապատասխանաբար 2 և 099 12-03-50 հեռախոսահամարներից, որոնք սպասարկել է Երևան քաղաքի Կոմիտաս 49 հասցեի ալեհավաք կայանը:
Ժամը 02:04:31-ին կատարել է 5:34 րոպե տևողությամբ հեռախոսազանգ 077 34-30-70 հեռախոսահամարին, որը սպասարկել է Երևան քաղաքի Հանրապետության 67 հասցեի ալեհավաք կայանը:
Նշված հեռախոսազանգերը սպասարկած կայանների տեղակայման վայրերով հիմնավորվել է, որ Տարոն Գալուստովը 2014 թվականի հոկտեմբերի 11-ին` ժամը 00.57-ի սահմաններում, Լևոն Բունիաթյանի և Նարեկ Գասպարյանի հետ միասին վերջիններս միասին Երևան քաղաքի Աբովյան փողոցում նստել են տաքսի ավտոմեքենա, որից հետո Նարեկ Գասպարյանին իջեցրել են և շարունակել ճանապարհը դեպի Զեյթուն թաղամաս:

Հատոր 3 գ.թ. էջ 85-90

Ամբաստանյալ Տարոն Գալուստովին վերագրվող արարքը հիմնավորվել է նաև.

Իրեղեն ապացույց ճանաչված` դեպքի վայրի զննության ընթացքում վերցված քարի 3 կտորներով, մետաղի կտորով, փայտի կտորով, ոսկրի կտորով, հողի նմուշներով, ՙՕպել՚ մակնիշի 34 AQ 054 հաշվառման համարանիշի ավտոմեքենայի մառլայի խծուծներով, սրբիչով, 4 գորգերով, առջևի աջ և ձախ նստատեղերից ու հենակներից վերցված միկրամասնիկներով կպչուն մակերեսներով դակտոժապավեններով, Ա.Եղիազարյանի և Լևոն Բունիաթյանի հագուստներով ու կոշիկներով:

Հատոր 4 գ.թ. 206-208

Իրեղեն ապացույց ճանաչված` Լևոն Բունիաթյանի դիակից առգրավված գնդակով:

Հատոր 4 գ.թ. 209

ՙMontblanc՚ տեսակի ձեռքի ժամացույցը ճանաչման ներկայացնելու արձանագրությամբ:

Հատոր 4 գ.թ. 221-222

Իրեղեն ապացույց ճանաչված և վկա Վահե Սաղաթելյանի պատասխանատու պահպանությանը հանձնված` ՙMontblanc՚ տեսակի ձեռքի ժամացույցով, որով հիմնավորվել է, որ Տարոն Գալուստովը 2014 թվականի հոկտեմբերի 11-ին գտնվել է Արթուր Եղիազարյանի կողմից վարվող տաքսի ավտոմեքենայի մեջ և Լևոն Բունիաթյանին սպանելուց հետո հիշյալ ժամացույցը տվել է Արթուր Եղիազարյանին:

Հատոր 4 գ.թ. 223

Դատարանի իրավական վերլուծությունները

Դատարանը գործով ձեռք բերված յուրաքանչյուր ապացույց գնահատելով թույլատրելիության վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, գտնում է, որ ամբաստանյալ Տարոն Գալուստովի մեղավորությունը` սպանություն կատարելու` ապօրինաբար Լևոն Բունիաթյանին դիտավորությամբ կյանքից զրկելու մեջ, նախատեսված ՀՀ քրեական օրենսգրքի 104-րդ հոդվածի 1-ին մասով, ապացուցված է:
Վերոհիշյալ հանցանքի կատարման համար ամբաստանյալը ենթակա է քրեական պատասխանատվության և պատժի, որը նա պետք է կրի:
ՀՀ քրեական օրենսգրքի 10-րդ հոդվածի համաձայն` ՙՀանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար՚:
ՀՀ քրեական օրենսգրքի 48-րդ հոդվածի համաձայն`
ՙ1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից ու ազատություններից օրենքով նախատեսված զրկմամբ կամ դրանց սահմանափակմամբ:
2. Պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61-րդ հոդվածի համաձայն`
ՙ1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում է հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով՚:
ՀՀ Վճռաբեկ դատարանը 2012թ. նոյեմբերի 1-ին Սերոբ Սարգսյանի վերաբերյալ թիվ ՍԴ/0109/01/12 գործով արտահայտել է հետևյալ իրավական դիրքորոշումը. ՙ(…) պատիժ նշանակելու ընդհանուր սկզբունքները քրեական օրենքով նախատեսված այն հիմնադրույթներն են, որոնցով պետք է ղեկավարվի դատարանը պատիժ նշանակելիս: Այդ սկզբունքներն են`
ա) օրինականությունը,
բ) արդարությունը,
գ) պատժի անհատականացումը,
դ) մարդասիրությունը:
Պատիժ նշանակելու վերոնշյալ սկզբունքները սահմանում են այն հիմնական դրույթները, որոնցով ղեկավարվում է դատարանը յուրաքանչյուր քրեական գործով պատժի տեսակն ու չափն ընտրելիս:
(…) պատժի նշանակման իրավական շրջանակները սահմանված են ՀՀ քրեական օրենսգրքով: Դրա հետ մեկտեղ, սակայն, վերոնշյալ օրենքը դատարանին հնարավորություն է տվել որոշակի սկզբունքների (…) պահպանմամբ, իր ներքին համոզմանը և իրավագիտակցությանը համապատասխան, ՀՀ քրեական օրենսգրքի Ընդհանուր և Հատուկ մասերով նախատեսված սահմաններում որոշել պատժի տեսակն ու չափը: Այլ կերպ` ուրվագծելով կոնկրետ հանցանքի համար նշանակման ենթակա պատժի առավելագույն և նվազագույն սահմանները` ՀՀ քրեական օրենքը դատարանին տվել է այդ շրջանակում հայեցողություն դրսևորելու հնարավորություն:
Վճռաբեկ դատարանը գտել է, որ ՀՀ քրեական օրենսգրքի Հատուկ մասի գրեթե բոլոր հոդվածների սանկցիաներում ամրագրված վերոնշյալ մոտեցումը պայմանավորված է այն տրամաբանությամբ, որ քրեական օրենքը համընդհանուր բնույթ ունի, իսկ արարքը և հանցավորի անձը կոնկրետ են: Ուստի կոնկրետ արարքի և անձի նկատմամբ համընդհանուր քրեական օրենքով նախատեսված սանկցիան կիրառելիս դատարանը պետք է որոշակի հայեցողություն դրսևորի:
Այնսինքն` առանց դատարանի հայեցողության պատժի անհատականացումն անհնար է:
(…) Պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության աստիճանի ու բնույթի, հանցավորի անձի, պատիժը մեղմացնող և ծանրացնող հանգամանքների վերլուծության հիման վրա: Նշված հանգամանքների հայեցողական և ոչ երբեք կամային գնահատման ժամանակ դատարանը պետք է ելնի ՀՀ քրեական օրենսգրքի 48-րդ հոդվածով նախատեսված` պատժի նպատակների իրացումն ապահովելու անհրաժեշտությունից (տե'ս Նարեկ Գևորգի Սարգսյանի գործով Վճռաբեկ դատարանի 2011 թվականի դեկտեմբերի 22-ի թիվ ԵԿԴ/0042/01/11 որոշման 14-րդ, 22-23-րդ կետերը)՚:

Ամբաստանյալ Տարոն Գալուստովի անձը բնութագրող տվյալներ չկան:
Դատարանն ամբաստանյալի պատասխանատվությունը և պատիժը մեղմացնող հանգամանք է դիտում, որ նա ընդունել է մեղքը և անկեղծորեն զղջացել կատարած արարքի համար, ինքնակամ ներկայացել է ոստիկանություն, դեպքի հանգամանքների վերաբերյալ տվել է խոստովանական ցուցմունքներ, աջակցել է հանցագործությունը բացահայտելուն:
Որպես ամբաստանյալ Տարոն Գալուստովի պատասխանատվությունն ու պատիժը մեղմացնող հանգամանք դատարանը հաշվի է առնում նաև տուժողի վարքագծի հակաօրինականությունը և հակաբարոյականությունը, որով պայմանավորվել է հանցագործությունը, քանի որ, ըստ դեպքի կոնկրետ հանգամանքների` տուժող Լևոն Բունիաթյանը հրաժարվել է ամբաստանյալ Տարոն Գալուստովի պարտքը, ինքն է սկզբում հրահրել վիճաբանությունը և սպառնալիքներ տվել:
ՀՀ վճռաբեկ դատարանը Ն.Չաքմազյանի գործով որոշման շրջանակներում փաստել է. ՙ(…) Դատարանը անձին մեղսագրվող հանցագործության` հանրության համար վտանգավորության աստիճանի ու բնույթի, ինչպես նաև պատասխանատվությունն ու պատիժը մեղմացնող հանգամանքների համատեքստում պետք է պատշաճ գնահատման ենթարկի նաև հանցանքի կատարումից առաջ և դրա ընթացքում տուժողի դրսևորած վարքագիծը: Նշված հանգամանքի գնահատումը կարևոր է հանցավորի և տուժողի վարքագծի հնարավոր փոխպայմանավորվածությունը և հանցավոր վարքագծի մեխանիզմում տուժողի դերակատարությունը պարզելու համար (…)՚ (տե՛ս Նիկոլայ Չաքմազյանի գործով Վճռաբեկ դատարանի` 2014 թվականի մայիսի 31-ի թիվ ԵԱՆԴ/0060/01/13 որոշումը):
Մ.Ախնոյանի վերաբերյալ 05.06.2015թ. ՍԴ3/0174/01/14 որոշմամբ Վճռաբեկ դատարանն արձանագրել է, որ ՙցանկացած հանցագործություն հանցավորի և որոշակի իրադրության փոխներգործության արդյունք է, հետևաբար հանցավոր վարքագծի մեխանիզմում վճռորոշ դերը պատկանում է ոչ միայն հանցավորին, այլև կոնկրետ իրադրությանը, որի բաղկացուցիչ մաս է կազմում նաև տուժողի վարքագիծը: Այլ կերպ ասած` հանցավորի գործողությունները հաճախ պայմանավորված են լինում ոչ թե նրա անձնական առանձնահատկություններով, հակումներով կամ ձգտումներով, այլ տուժողի վարքագծով: Մասնավորապես, տուժողն իր սադրիչ` հակաօրինական կամ հակաբարոյական վարքագծով որոշ դեպքերում նպաստում է հանցավոր իրադրության ստեղծմանը` ՙդրդելով՚ այլ անձի կամ անձանց կողմից հանցագործություն կատարելուն: Նման դեպքերում վերջինս հանրորեն վտանգավոր արարքի և հետևանքների առաջացման հարցում բավականին ակտիվ դերակատարություն է ցուցաբերում և հանցավոր վարքագծի մեխանիզմում ՙմեղքի՚ համեմատաբար մեծ չափաբաժին ունի, ինչը պետք է համարժեք գնահատականի արժանանա դատարանի կողմից պատիժ նշանակելիս (…):՚:
Ամբաստանյալի պատասխանատվությունը և պատիժը ծանրացնող հանգամանքներ չկան:
ՀՀ վճռաբեկ դատարանը Կարեն Հարությունյանի վերաբերյալ գործով վերլուծելով ՀՀ քրեական օրենսգրքի Ընդհանուր մասի մի շարք դրույթներ, մասնավորապես` ՀՀ քրեական օրենսգրքի 10-րդ, 48-րդ և 61-րդ հոդվածները հանգել է այն հետևության, որ պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, անձին բնութագրող բոլոր տվյալները և քրեական օրենքով նախատեսված պահանջներից ելնելով` հանցագործության մեջ մեղավոր անձի նկատմամբ նշանակում է այնպիսի պատիժ, որն անհրաժեշտ և բավարար է այդ անձին ուղղելու և նրա կողմից նոր հանցանքի կատարումը կանխելու համար (տե'ս ՀՀ վճռաբեկ դատարանի` Կարեն Հարությունյանի վերաբերյալ գործով 2007 թվականի նոյեմբերի 30-ի ՎԲ-201/07 որոշումը):
Հաշվի առնելով ամբաստանյալ Տարոն Գալուստովի կատարած հանցագործության բնույթը և հանրության համար վտանգավորության աստիճանը, դրա կատարման եղանակը, հանցավոր մտադրության իրականացման աստիճանը, հանցագործությունը կատարելուց հետո նրա դրսևորած վարքագիծը, խախտված հասարակական հարաբերության սոցիալական նշանակությունը և այդ ոլորտում պետության քրեական քաղաքականության ուղղվածությունը, դատարանը գտնում է, որ Տարոն Գալուստովը ՀՀ քրեական օրենսգրքի 104-րդ հոդվածի 1-ին մասով նախատեսված հանցագործության կատարման համար ենթակա է պատժի ազատազրկման ձևով:
Դատարանը, քննության առնելով ամբաստանյալ Տարոն Գալուստովի նկատմամբ ՀՀ քրեական օրենսգրքի 64-րդ հոդվածի կիրառման հնարավորության և ՀՀ քրեական օրենսգրքի 48-րդ հոդվածով ամրագրված պատժի նպատակների իրացվելիության հարցը և հաշվի առնելով Տարոն Գալուստովին մեղսագրված արարքի հանրային վտանգավորության աստիճանը և բնույթը, հանցավորի անձը, հանգում է հետևության, որ տվյալ դեպքում նրա նկատմամբ օրենքով նախատեսվածից ավելի մեղմ պատիժ նշանակելը չի համապատասխանի արդարության և պատասխանատվության անհատականացման քրեաիրավական սկզբունքներին:
Վերոգրյալի հիման վրա դատարանը գտնում է, որ նշանակված պատիժն ամբաստանյալ Տարոն Գալուստովը պետք է կրի, քանի որ դրան խոչընդոտող հանգամանքներ առկա չեն:
Անդրադառնալով Տարոն Գալուստովի նկատմամբ կիրառված խափանման միջոցին` դատարանը գտնում է, որ նրա նկատմամբ կիրառված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Անդրադառնալով իրեղեն ապացույցների տնօրինման հարցին, դատարանը գտնում է, որ իրեղեն ապացույց ճանաչված քարի երեք, մետաղի, փայտի, ոսկրի կտորները, հողի նմուշները, ՙՕպել՚ մակնիշի 34 AQ 054 հաշվառման համարանիշի ավտոմեքենայի մառյայի խծուծները, սրբիչը, չորս գորգերը, առջևի աջ և ձախ նստատեղերից ու հենակներից վերցված միկրոմասնիկներով կպչուն մակերեսներով դակտոժապավենները, Արթուր Եղիազարյանի և Լևոն Բունիաթյանի հագուստներն ու կոշիկները` փաթեթավորված և կնիքված փորձագետների համապատասխան կնիքներով, Լևոն Բունիաթյանի դիակից առգրավված գնդակը, դատավճիռն օրինական ուժի մեջ մտնելուց հետո, պետք է ոչնչացնել, իսկ Վահե Սաղաթելյանին պատկանող և նրա պահպանությանը հանձնված ՙMontblanc՚ տեսակի ձեռքի ժամացույցը` թողնել նրա տնօրինմանը:
Նկատի ունենալով, որ տուժողի իրավահաջորդ Հովհաննես Հմայակյանը չի ներկայացել դատական նիստերին և հանցագործության հետևանքով պատճառված վնասի հատուցման պահանջ և քաղաքացիական հայց չի ներկայացրել, ուստի դատարանը գտնում է, որ նրան պետք է վերապահել քաղաքացիական հայցի իրավունք` քաղաքացիական դատավարության կարգով հանցագործության հետևանքով անմիջականորեն պատճառված վնասի հատուցման հարցը լուծելու համար:
Ղեկավարվելով ՀՀ քրեական դատավարության օրենսգրքի 119-րդ, 357-360-րդ, 365-րդ, 366-րդ, 369-373-րդ և 379-րդ հոդվածներով, դատարանը`

ՎՃՌԵՑ

Տարոն Գեորգիի Գալուստովին մեղավոր ճանաչել ՀՀ քրեական օրենսգրքի 104-րդ հոդվածի 1-ին մասով նախատեսված հանցագործության կատարման մեջ և նրա նկատմամբ պատիժ նշանակել ազատազրկում 10 /տասը/ տարի ժամկետով:
Պատժի սկիզբը հաշվել 2014 թվականի հոկտեմբերի 12-ից:
Տարոն Գեորգիի Գալուստովի նկատմամբ կիրառված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Իրեղեն ապացույց ճանաչված քարի երեք, մետաղի, փայտի, ոսկրի կտորները, հողի նմուշները, ՙՕպել՚ մակնիշի 34 AQ 054 հաշվառման համարանիշի ավտոմեքենայի մառյայի խծուծները, սրբիչը, չորս գորգերը, առջևի աջ և ձախ նստատեղերից ու հենակներից վերցված միկրոմասնիկներով կպչուն մակերեսներով դակտոժապավենները, Արթուր Եղիազարյանի և Լևոն Բունիաթյանի հագուստներն ու կոշիկները` փաթեթավորված և կնիքված փորձագետների համապատասխան կնիքներով, Լևոն Բունիաթյանի դիակից առգրավված գնդակը, դատավճիռն օրինական ուժի մեջ մտնելուց հետո ոչնչացնել, իսկ Վահե Սաղաթելյանին պատկանող և նրա պահպանությանը հանձնված ՙMontblanc՚ տեսակի ձեռքի ժամացույցը թողնել նրա տնօրինմանը:
Տուժողի իրավահաջորդ Հովհաննես Հմայակյանին վերապահել քաղաքացիական հայցի իրավունք` քաղաքացիական դատավարության կարգով հանցագործության հետևանքով անմիջականորեն պատճառված վնասի հատուցման հարցը լուծելու համար:

Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո` մեկամսյա ժամկետում:



ԴԱՏԱՎՈՐ Ա.ՄԿՐՏՉՅԱՆ