ԵԱՔԴ/0026/01/15

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության դատարանը՝

նախագահող դատավոր՝ Լ. Ավետիսյան
քարտուղարությամբ` Ե. Կարապետյանի, Ն. Ղազարյանի, Ն. Այվազյանի
մասնակցությամբ
մեղադրող` Գ. Մարգարյանի
պաշտպան` Լ. Բալյանի
տուժող` Ա. Մանուկյանի
տուժողի ներկայացուցիչ՝ Ա. Խաչատրյանի

2014 թվականի հունիսի 18-ին, Երևան քաղաքում, դռնբաց դատական նիստում քննեց քրեական գործն ըստ մեղադրանքի Արշակ Մանուկի Սվազյանի, ծնված 1973թ. հունիսի 16-ին, Արագածոտնի մարզի Թալին քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին ոչ ոք, դատվածություն չունեցող, չի աշխատում, հաշվառված է Արագածոտնի մարզի Թաթուլ գյուղի 7-րդ փողոցի թիվ 28 տուն հասցեում, բնակվում է Երևան քաղաքի Հարավ Արևմտյան Բ1 թաղամասի 73 շենքի թիվ 2 բնակարան հասցեում, մեղադրվում է ՀՀ քրեական օրենսգրքի 117 հոդվածով, որպես խափանման միջոց է ընտրվել չհեռանալու մասին ստորագրությունը,
Պ Ա Ր Զ Ե Ց

1.Գործի դատավարական նախապատմությունը.
2014 թվականի դեկտեմբերի 12-ին ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնում ՀՀ քրեական օրենսգրքի 117 հոդվածով նախատեսված հանցագործության հատկանիշներով հարուցվել է թիվ 14834214 քրեական գործը:
2014 թվականի դեկտեմբերի 13-ին թիվ 14834214 քրեական գործը՝ նախաքննությունը շարունակելու համար ուղարկվել է ՀՀ քննչական կոմիտեի Երևան քաղաքի քննչական վարչություն:
2014 թվականի դեկտեմբերի 14-ին Արշակ Մանուկի Սվազյանի նկատմամբ որպես խափանման միջոց է ընտրվել չհեռանալու մասին ստորագրությունը:
2014 թվականի դեկտեմբերի 19-ին Արշակ Մանուկի Սվազյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 117 հոդվածով:
2015 թվականի մարտի 23-ին թիվ 14834214 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան՝ ըստ էության քննեուլ համար:
2.Գործի փաստական հանգամանքները.
Նախնական քննության մարմինն ամբաստանյալ Արշակ Մանուկի Սվազյանին ՀՀ քրեական օրենսգրքի 117 հոդվածով մեղադրանք է առաջադրել այն արարքի կատարման համար, որ նա նա 2014թ. դեկտեմբերի 11-ին, ժամը 20:00-ի սահմաններում Երևան քաղաքի Սոսեի փողոցի թիվ 2/2 շենքի շքամուտքում բռունցքով հարվածել է Արամ Մանուկյանի դեմքին` դիտավորությամբ վերջինիս առողջությանը պատճառելով թեթև վնաս: Այսպես`
Արշակ Սվազյանը 2014թ. դեկտեմբերի սկզբին Ռուսաստանի Դաշնության Մոսկվա քաղաքում գտնվելու ժամանակ ՙՅու Թուբ՚ ինտերնետային կայքում տեսել է տեսագրություն, որում Արամ Մանուկյանը հայհոյանք է հնչեցրել Հայաստանի Հանրապետության Նախագահի հասցեին, ինչից վիրավորվելով որոշել է վրեժխնդիր լինել: Այնուհետև, 2014թ. դեկտեմբերի 06-ին Ռուսաստանի Դաշնությունից վերադառնալով Հայաստանի Հանրապետություն, Արամ Մանուկյանին հարվածելու և մարմնական վնասվածք պատճառելու դիտավորությամբ, 2014թ. դեկտեմբերի 11-ին, ժամը 20:00-ի սահմաններում գնացել է վերջինիս բնակության վայր հանդիսացող, Երևան քաղաքի Սոսեի փողոցի թիվ 2/2 շենք և թաքնվել շքամուտքում : Ժամը 20:04-ին բռունցքով մեկ անգամ հարվածել է շենքի շքամուտք մուտք գործող Արամ Մանուկյանի դեմքին` դիտավորությամբ վերջինիս առողջությանը պատճառելով թեթև վնաս, ապա դիմել է փախուստի:
3.Ապացույցների հետազոտում.
Դատաքննության ժամանակ Արշակ Մանուկի Սվազյանը հրաժարվեց ցուցմունք տալ, պնդեց նախաքննության ընթացքում տված իր ցուցմունքները:
Նախաքննության ժամանակ առաջադրված մեղադրանքում Արշակ Սվազյանն իրեն լիովին մեղավոր է ճանաչել և խոստովանական ցուցմունք է տվել այն մասին, որ 1989 թվականից մինչև 1992 թվականն ընկած ժամանակահատվածում ՙԹալին՚ ջոկատի կազմում` Հայաստանի Հանրապետության Նախագահ Սերժ Սարգսյանի հրամանատարության ներքո մասնակցել է Լեռնային Ղարաբաղի Հանրապետության ազատագրական պայքարին: Հայաստանի Հանրապետությունում աշխատանք չունենալու պատճառով պարբերաբար մեկնել է Ռուսաստանի Դաշնություն` արտագնա աշխատանք կատարելու: 2014թ. դեկտեմբեր սկզբներին գտնվել է Ռուսաստանի Դանշնությունում, որտեղ այլազգի անձանց ներկայությամբ ՙՅու Թուբ՚ ինտերնետային կայքով Հայաստանի Հանրապետության վերաբերյալ լրատվական հաղորդաշարեր դիտելիս տեսել է տեսագրություն, որում Արամ Մանուկյանը հայհոյանք է հնչեցրել Հայաստանի Հանրապետության Նախագահի հասցեին: Այլազգի անձանց ներկայությամբ տեսագրությունը դիտելիս վիրավորվել է, որոշել վրեժխնդիր լինել: 2014թ. դեկտեմբերի 06-ին Ռուսաստանի Դաշնությունից վերադարձել է Հայաստանի Հանրապետություն: Պատահական տաքսի ավտոմեքենայով, անձնական գործերով գնացել է Կոմիտասի պողոտա: Ճանապարհին` Բաղրամյան պողոտայում տաքսի ավտոմեքենայի վարորդը խնդրել է անվադողերի վերանորոգման կետից վերցնել վերանորոգման հանձնած ավտոմեքենայի անվադողը, որից հետո գնացել են նշված անվադողերի վերանորոգման կետ: Ժամը 20:00-ի սահմաններում, մինչև վարորդը անվադողը դրել է ավտոմեքենայի բեռնախցիկը, դրսում նկատել է Արամ Մանուկյանին, ով քայլելով մուտք է գործել Սոսեի փողոցի 2/2 շենքի շքամուտք: Հասկացել է, որ Արամ Մանուկյանը բնակվում է նշված շենքում: Վրեժխնդիր լինելու և Արամ Մանուկյանին հարվածելու նպատակով 2014թ. դեկտեմբերի 11-ին, ժամը 20:00-ի սահմաններում պատահական տաքսի ավտոմեքենայով գնացել է վերջինիս բնակության վայր հանդիսացող, Երևան քաղաքի Սոսեի փողոցի 2/2 շենք և թաքնվել շքամուտքում : Ժամը 20:04-ին բռունցքով մեկ անգամ հարվածել է շենքի շքամուտք մուտք գործող Արամ Մանուկյանի դեմքին և դիմել է փախուստի: Վազքով գնացել է Վաղարշյան փողոցում գտնվող ՙՊարմա՚ սուպերմարկետի մոտ, նստել է պատահական տաքսի ավտոմեքենա և գնացել տուն: Հանդերձափոխվել է, հագին եղած սև կտորե բաճկոնը, սև կոշիկները, տաբատը, մուգ կապույտ վերնազգեստը և մոխրագույն գլխարկը այլ հագուստների հետ միասին դրել է սպորտային պայուսակի մեջ, վերցրել անձնագրերը և ՀՀ-ից մեկնելու նպատակով դուրս եկել տանից: Մտափոխվել է սպորտային պայուսակը վերցնել իր հետ, որից հետո Երևան քաղաքի Ծովակալ Իսակովի պողոտայում գտնվող կամրջի տակ պահել է սպորտային պայուսակը, ապա պատահական տաքսի ավտոմեքենայով գնացել է Բագրատաշենի մաքսային անցակետ և անցել Վրաստանի Հանրապետության տարածք, որտեղից օդանավով մեկնել է Ռուսաստանի Դաշնություն: Ինտերնետով տեղեկացել է, որ ոստիկանությունը դեռևս չի պարզել հանցանք կատարած անձի ինքնությունը, որից հետո 2014թ. դեկտեմբերի 14-ին Ռուսաստանի Դաշնությունից օդանավով վերադարձել է Հայաստանի Հանրապետություն: Զվարթնոց օդանավակայանից ժամը 05:30-ի սահմաններում նստել է պատահական տաքսի ավտոմեքենա և գնացել տուն: Ճանապարհին` Ծովակալ Իսակովի պողոտայում, իջել է տաքսի ավտոմեքենայից` պահած սպորտային պայուսակը վերցնելու և տուն գնալու նպատակով, սակայն նույն վայրից ոստիկանության աշխատակիցները բերման են ենթարկել ՀՀ ոստիկանության Երևան քաղաքի վարչություն:
Ամբաստանյալին մեղսագրված հանցանքը, բացի նրա խոստովանական ցուցմունքներից հիմնավորվել է նաև հետևյալ ապացույցներով.
Տուժող Արամ Մանուկյանը ցուցմունք է տվել այն մասին, որ 2014թ. դեկտեմբերի 11-ի երեկոյան դուրս է եկել ՀԱԿ կուսակցության գրասենյակից և ոտքով Սարյան փողոցից գնացել է դեպի Մաշտոցի պողոտա: Այնտեղ գտնվող ՙՕրանժ՚-ի գրասենյակում մուծումներ է կատարել և քայլել դեպի փակ շուկա: Շուկայում մոտ մի տաս րոպե գնումներ է կատարել և շուկայի դիմացից տաքսի է նստել: Ընդ որում, տաքսին ոչ թե շուկայի դիմաց կայանած տաքսիներից էր, այլ՝ ընթացքի մեջ գտնվող տաքսիներից: Իջել է Սոսե փողոցի թիվ 2/2 շենքի բակում, որտեղ բնակվում է: Դա եղել է մոտավորապես ժամը 2020-ին: Շքամուտքում տեսել է ամբաստանյալին: Նա գաղտագողի մոտեցել է: Ինքը չէր սպասում, որ հարված կստանա, հակառակ դեպքում հետևանքն այդպես ծանր չէր լինի: Մեկ հարված է ստացել, ընկել է և մի քանի վայրկյան կորցրել գիտակցությունը, որից հետո ուշքի է եկել, նկատել է նրան փախչելուց: Այնուհետև ինքն իջել է ներքևում գտնվող գրասենյակ և այնտեղից անմիջապես ոստիկանություն է զանգահարել: Ոստիկանները շուտ են եկել: Ընկերոջ հետ հիշել են, որ շենքի դիմացի մայթում տեսանկարահանման խցիկ կա: Հետո այդ նկարահանող սարքերը, նկարահանված նյութերը ոստիկանությունը վերցրել է: Դրանից հետո իրեն տարել են հիվանդանոց: 10 օր բուժվել է հիվանդանոցում: Սկզբում հետևանքները քիչ էին, հետո գնալով ցավերը շատացան: Ավելի լուրջ հետևանքեր է ունեցել դուրս գրվելուց հետո: Տաս օր ինքն ընդունել է ներերակային ներարկումներ, մոտ 40 դեղ է ընդունել: Այդ ժամանակ առաջացել էին արյան ճնշման տատանումներ: Չէր կարգավորվում իր արյան ճնշումը և տեսողության հետ խնդիր կար: Այդ ինտենսիվ բուժումը տևել է մոտ 3 ամիս, հիմա որևէ հետք չկա:
Տուժողը հայտնել է նաև, որ սովորաբար աշխատանքից վերադառնալու որևէ ժամ ինքը չունի, տարբեր ժամեր կարող է լինել, կախված աշխատանքային ծանրաբեռնվածությունից, հանդիպումների քանակից, գրաֆիկից և այլն: Չի եղել երկու օր, որ նույն ժամին վերադառնա տուն: Վերադառնում է տարբեր մեքենաներով` տաքսիներով, ընկերների մեքենաներով, երթուղային ավտոբուսներով: Թե ինչ տաքսի ավտոմեքենա է նստել, չի հիշում: Նստած է եղել վարորդի կողքին նստատեղին: Չի հիշում մեքենայի ապակիները մգեցված էին, թե՝ ոչ: Ամբաստանյալին տեսել է այն պահին, երբ մոտենում էր վերելակին, տարածքը մոտ 5-7 մետր է: Երբ ինքը մտել է շքամուտք, ամբաստանյալն արդեն շքամուտքում էր և սպասում էր, որպեսզի ինքը ներս մտնի: Նրա հագին եղել է մուգ բաճկոն, գործած գլխարկ, մուգ շորեր: Դեմքը եղել է մազածածկույթով: Ամբաստանյալն էր, ինքը նրա դեմքը տեսել է: Ինքը թշնամիներ չունի: Չի եղել դեպք որ ինքը հրապարակային հայհոյանք հնչեցնի ՀՀ նախագահի հասցեին: Իրենց թաղամասում մի քանի տներ, խանութներ, սպասարկման կենտրոններ կան, որտեղ նկարահանող սարքեր կան: Ինքը համոզված է, որ սա կազմակերպված էր և իրեն հետևել են երկար ժամանակ և ոչ մեկ հոգի: Ինքը քննիչներին խնդրել է հավաքել բոլոր տեսանյութերը և եթե դրանք նույնացնեին, ապա ինքը վստահ է, որ կգտնեին այն մարդկանց, որոնք կազմակերպել են այս գործը: Հետևողը չէր կարող լիներ այլ տեղ քան այդ շենքի մոտ որտեղից ինքը դուրս է եկել՝ իրենց կուսակցության վարչության շենքի մասին է խոսքը: Այդտեղ նույնպես նակարահանող սարք կա: Ամբաստանյալը փախել է այն մասով, որտեղ կան նկարահանող սարքեր: Այդ 4-5 տեսախցիկների տվյալները եթե նույնացվեին և միացվեին, ապա կգտնեին կազմակերպիչներին և նրանց, ովքեր սպասում, կամ հրահանգ են ստանում կամ հեռախոսով են խոսում: Այն, որ ամբաստանյալը հեռախոս չի ունեցել, իրեն համար զարմանալի է: Եթե մարդը կազակերպված այդպիսի բանի է գնում, հնարավոր չէ, որ հեռախոս չունենա: Հեռախոսը քննության ժամանակ անհետացել է: Եթե իրենց կուսակցության շենքի դիմացի նկարահանող սարքի տեսանյութը կցվեր մնացած տեսանյութերին, ապա ամեն ինչ պարզ կդառնար: Սա է, որ նախաքննությունը չի արել: Ինքը գտնում է, որ դա միանաշանակ քաղաքական պատվեր է իր քաղաքական գործունեության համար, ինչը բացահայտ ասվել է և կրկնվել է խորհրդարանի արտահերթ նիստում: Նախաքննության մարմինը հաշվի չի առել փաստերը, անունները որոնք հնչել են խորհրդարանում: Իր գործունեությունն ակնհայտ է, բաց և թափանցիկ է ՀՀ բոլոր քաղաքացիների համար, որովհետև ինքը հաճախակի հեռուստատեսությամբ կամ ինտերնետային ալիքներով քննադատում է այս իշխանություններին: Ինքը ներկայացնում է ամենամեծ ընդդիմադիր քաղաքական ուժը: Քաղաքական ուժի քարտուղարն է և կուսակցության նախագահի տեղակալը: 25 տարի քաղաքականության մեջ է: Իր քննադատությունները միշտ եղել են շատ սուր, բայց ինքը երբեք չի կաշկանդվել իրերը կամ մարդկանց իրենց անուններով կոչելուց: Եվ միայն իր հետ տեղի ունեցած այս դեպքը չէ, որ ինքն այդպիսի եզրակացության է եկել: 2014թ. նոյեմբեր ամսից սկսած մեր երկրում հետապնդումներ կան քաղաքական գործիչների նկամամբ: Ընդ որում, դրանք բոլորը մնում եմ անպատիժ, այն դեպքում, երբ հայտնի են կատարողները: Դեպքից հետո ինքը ստացել է հետևյալ մարմնական վնասվածքները՝ ցնցում, տեսողության վատացում, մեխանիկական վնասվածքներ, արյան ճնշման տատանումներ: Չնայած դրան, վնասվածքը ձևակերպվել է որպես թեթև վնաս: Ինքը 10 օր հիվանդանոցում է եղել, 2 ամիս 20 օր ամբուլատոր բուժման վիճակում է եղել: Չի ցանկանում քաղ. հայց ներկայացնել: Իր խնդիրը իրականացնողի հետ չէ, այլ՝ պատվիրողի: Ամբաստանյալի հետ հաշտվելու և գործը կարճելու միջնորդություն չունի, չի ցանկանում, որպեսզի ամբաստանյալի նկատմամբ քրեական հետապնդումը դադարեցվի: Ամբաստանյալ Ա.Սվազյանից նյութական պահանջ չունի:
Դեպքի վայր հանդիսացող` Երևան քաղաքի Սոսեի փողոցի 2/2 շենքի շքամուտքը և դրան հարակից տարածքը զննելու մասին արձանագրությամբ, համաձայն որի առգրավվել են դեպքի վայրում առկա, շենքի շքամուտքը տեսանկարահանող սարքի դեպքի ժամանակահատվածի վերաբերյալ տեսագրությունները:
ՙԱրմենիա հանրապետական բժշկական կենտրոն՚ ՓԲ ընկերության կրիմինալ դեպքերի մատյանը զննելու մասին արձանագրությամբ, համաձայն որի 2014թ. դեկտեմբերի 11-ին, ժամը 22:55-ին, նշված բժշկական կենտրոն բուժօգնության է դիմել Արամ Մանուկյանը:
Դեպքի վայր հանդիսացող, Երևան քաղաքի Սոսեի փողոցի 2/2 շենքի շքամուտքը տեսանկարահանող սարքի դեպքի ժամանակահատվածի վերաբերյալ տեսագրությունների զննությամբ, համաձայն որի 2014թ. դեկտեմբերի 11-ին` ժամը 20:03:25-ին, Արշակ Սվազյանը մուտք է գործել Երևան քաղաքի Սոսեի փողոցի 2/2 շենքի շքամուտք և թաքնվել վերելակի դռների կողքին: Ժամը 20:03:51-ին շքամուտք է մուտք գործել Արամ Մանուկյանը, որից հետո ժամը 20:04:04-ին շքամուտքում Արշակ Սվազյանը բռունցքով հարվածել է Արամ Մանուկյանի դեմքին և դիմել փախուստի:
Անձին բերման ենթարկելու մասին արձանագրությամբ, համաձայն որի 2014թ. դեկտեմբերի 14-ին` ժամը 06:30-ին, Երևան քաղաքի Ծովակալ Իսակովի պողոտայի թիվ 30 հասցեի մոտակայքից ՀՀ ոստիկանության Երևան քաղաքի վարչություն բերման է ենթարկվել Արշակ Մանուկի Սվազյանը:
Քննչական փորձարարություն կատարելու մասին արձանագրությամբ և կազմված լուսանկարչական հավելվածով, համաձայն որի Արշակ Սվազյանը մատնացույց է արել դեպքի վայրը, դեպքի վայրը գնալու և փախուստի ճանապարհը: Երևան քաղաքի Ծովակալ Իսակովի պողոտայում առկա, դեպի Հարավ-Արևմտյան թաղամաս գնացող ճանապարհի կամրջի տակից հայտնաբերվել և առգրավվել է սպորտային պայուսակ, որի մեջ ի թիվս այլ հագուստների առկա են եղել նաև դեպքի օրը Ա.Սվազյանի հագին եղած հագուստները:
Քննչական փորձարարություն կատարելու ժամանակ հայտնաբերված և առգրավված սպորտային պայուսակը զննելու մասին արձանագրությամբ և կազմված լուսանկարչական հավելվածով, համաձայն որի սպորտային պայուսակում ի թիվս այլ հագուստների առկա են եղել նաև դեպքի օրը Արշակ Սվազյանի հագին եղած սև կտորե բաճկոնը, սև կոշիկները, տաբատը, մուգ կապույտ վերնազգեստը և մոխրագույն գլխարկը:
Քննչական փորձարարություն կատարելու մասին արձանագրությամբ և կազմված լուսանկարչական հավելվածով, համաձայն որի Արշակ Սվազյանը մատնացույց է արել Երևան քաղաքի Սոսեի փողոցի 4/2 հասցեում գտնվող ավտոմեքենաների անվադողերի վերանորոգման կետը, որտեղից 2014թ. դեկտեմբերի սկզբին ժամը 20:00-ի սահմաններում նկատել է Սոսեի փողոցի 2/2 շենք մուտք գործող Արամ Մանուկյանին:
ՙՅու Թուբ՚ ինտերնետային կայքը զննելու մասին արձանագրությամբ, համաձայն որի կայքում հայտնաբերվել է 2014թ. սեպտեմբերի 25-ին ՙwww. 1in. am՚ լրատվական ընկերության կողմից տեղադրված 6 րոպե 35 վարկյան տևողությամբ տեսագրություն, որում Արամ Մանուկյանը հայհոյանք է հնչեցրել Հայաստանի Հանրապետության նախագահի հասցեին:
Դատաբժշկական փորձաքննության թիվ 2185/հ եզրակացությամբ, համաձայն որի Արամ Մանուկյանի ստացած մարմնական վնասվածքները գլխուղեղի ցնցման, վերին շրթունքի, աջ ակնակապճի վերին և ստորին կոպերի փափուկ հյուսվածքների, սալջարդերի և արյունազեղումների ձևերով պատճառվել են բութ առարկայի ներգործության հետևանքով, հնարավոր է նշված ժամանակին և հանգամանքներում: Գլխուղեղի ցնցման ելքի ոչ պարզ լինելու հետ կապված առողջության պատճառած վնասի աստիճանը կորոշվի դեպքի օրվանից երեք շաբաթ հետո` 31.12.2014թ.-ին, որի համար անհրաժեշտ է ապահովել փորձաքննվողի ներկայությունը ԴԲԳԳԿ ամբուլատոր քարտով:
Արամ Մանուկյանի ստացած մարմնական վնասվածքները` գլխուղեղի ցնցման, վերին շրթունքի, աջ ակնակապճի վերին և ստորին կոպերի փափուկ հյուսվածքների սալջարդերի և արյունազեղումների ձևերով, պատճառվել են բութ առարկայի/ների/ ներգործության հետևանքով, հնարավոր է նշված ժամանակին և հանգամանքներում, որոնք պատճառել են առողջությանը թեթև վնաս` առողջության կարճատև քայքայումով, նկատի ունենալով վնասվածքների հետ անմիջական պատճառական կապի մեջ եղած հետևանքների տևողության վեց օրից ավելի, բայց ոչ ավելի քան 21 օրից:
Կրկնակի դատաբժշկական փորձաքննության թիվ 15-0211 եզրակացությամբ, համաձան որի վերը շարադրվածից ելնելով, առաջադրված հարցերին համապատասխան, հանգում ենք հետևյալ հետևությունների. I, II. Ըստ ներկայացված բժշկական փաստաթղթերի տվյալների և սույն փորձաքննության իրականացման ընթացքում կատարված հետազոտությունների արդյունքների՝ Արամ Մանուկյանի մոտ եղել է փակ բութ գանգուղեղային վնասվածք՝ աջ ակնակապճի շրջանի փափուկ հյուսվածքների արյունազեղման, վերին շրթունքի աջ կեսի շրջանի վնասվածքային այտուցի, արյունազեղման և գլխուղեղի ցնցման ձևով, որը պատճառվել է սահմանափակ ազդեցության մակերես ունեցող բութ առարկայի ներգործությամբ, որի վնասող ուժը տեղակայվել է Ա.Մանուկյանի դեմքի աջ կեսի՝ աջ ակնակապճի և վերին շրթունքի աջ կեսի շրջաններում, հնարավոր է որոշմամբ նշված ժամկետում և հանգամանքներում, որոնց ծանրության աստիճանը միմյանցից չի տարանջատվում և դրանք Արամ Մանուկյանի առողջությանը պատճառել են թեթև վնաս՝ առողջության կարճատև քայքայման հատկանիշով, այսինքն վնասվածքների հետ անմիջական կապի մեջ գտնվող հետևանքների տևողությունը 21 օրից ոչ ավելի£ III. Ըստ սույն փորձաքննության իրականացման շրջանակներում ՙէրեբունի՚ ԲԿ-ում կատարված նեղ մասնագիտական հետազոտությունների արդյունքների՝ Արամ Մանուկյանի մոտ հայտնաբերվել են վեգետո-անոթային դիստոնիայի երևույթներ, որոնց առաջացման իրական պատճառը և վաղեմությունը ստույգ տարբերակել հնարավոր չէ, այն կարող է ունենալ առաջացման տարբեր՝ նաև ոչ վնասվածքային պատճառներ (մշտական խրոնիկական ստրեսներ, մտավոր, ֆիզիկական և էմոցիոնալ գերհոգնածություն, աշխատանքի և հանգստի ռեժիմի խանգարումներ, վնասակար սովորություններ, էնդոկրին, նյարդաբանական և սոմատիկ հիվանդությունների սրացումներ, ժառանգական գործոններ և այլն), որից ելնելով 11.12.2014թ-ին կրած գլխուղեղի ցնցման հետ վերջինիս պատճառա-հետևանքային կապը հաստատել հնարավոր չէ£
Դատատեսաձայնագրային փորձաքննության թիվ 14-3718 եզրակացությամբ, համաձայն որի փորձաքննության ներկայացված էլեկտրոնային կրիչի հիմնական բնութագրիչ հատկանիշները բերված են աղյուսակ 1-ում£
Փորձաքննության ներկայացված ֆլեշ հիշողության կրիչում առկա տեսագրություն պարունակող ֆայլերը փոխակերպվել են տեսաձայնագրային ՙavi՚ ձևատեսակի ֆայլերի (հետազոտության համակարգչատեխնիկական մասի աղյուսակ 4) և տրամադրվել են սույն եզրակացության անբաժանելի մասը կազմող, ՙ14-3718՚ գրառումով թվով 1 լազերային սկավառակի վրա£ /ՙMD5՚ տեսակի անհատականացման արժեքը՝ ՙ7F24B24C4228DA5B1EA7BB404E340087՚£/
Համակարգչատեխնիկական բաժնի կողմից տրամադրված թվով 1՝ ՙVerbatim CD-R 14-3718՚ գրառմամբ լազերային սկավառակում առկա թվով 3 տեսանյութերը բավարար որակի չեն, քանի որ դրանց նախահիմքը կատարվել է հոսքային եղանակով՝ կոդավորման տեսակը AVC (Advanced Video Codec), կոդավորիչ ID-ին Н264 կծկման եղանակը կատարվել է կորստով£ Տեսագրումները կատարվել են բարձրությունից, վատ լուսավորության պայմաններում և տեսանյութում առկա են արտաքին միջավայրի պատճառով աղճատումներ£ Նման պայմաններում ստացված տեսագրություններից հնարավոր չէ ստանալ անձի (անձանց) բնութագրող որակյալ տեսապատկերներ՝ դեմք, դիմագծեր, հագուստ, տարբերանշաններ, գույն և այլ անհատականացման տվյալներ£
Նման տեսաֆայլերից ստացված տեսապատկերները պիտանի չեն ավտոմատացված եղանակով դիմանկարային և այլ նույնականացումների համար (առաջնորդվելով ГОСТ Р ИСО/МЭК 19794-5-2006 ստանդարտով) և պիտանի չեն հետագա փորձաքրեագիտական հետազոտությունների համար£
Համակարգչատեխնիկական բաժնի կողմից տրամադրած թվով մեկ՝ ՙVerbatim CD-R 14-3718՚ գրառմամբ լազերային սկավառակում առկա թվով 3 տեսանյութերը ձայնային մաս չեն պարունակում£
Տեսաֆայլերից՝ անջատված հնարավորինս պարզեցված և մեծացված թվով 75 տեսապատկերները նախաձեռնողին են տրամադրվում եզրակացության անբաժանելի մաս կազմող ՙVerbatim՚ ֆիրմայի ՙCD-R՚ տեսակի ՙ14-2743՚ գրառումն ունեցող լազերային սկավառակով, որի MD5 տեսակի անհատականացման արժեքն է (MD5: 6879381767D006D0F5D8EC06178B6691):
10.03.2015թ. որոշմամբ ապացույց ճանաչված, այլ փաստաթուղթ հանդիսացող` Երևան քաղաքի Սոսեի փողոցի 2/2 շենքի շքամուտքը նկարահանող տեսախցիկի դեպքի ժամանակահատվածի տեսագրության վերաբերյալ էլեկտրոնային կրիչով և լազերային սկավառակով, դատատեսաձայնագրային փորձաքննության ընթացքում տեսագրությունից առանձնացված 75 տեսապատկերնների վերաբերյալ լազերային սկավառակով:
Դեպքի օրը Արշակ Սվազյանի հագին եղած սև կտորե բաճկոնը, սև կոշիկները, տաբատը, մուգ կապույտ վերնազգեստը և մոխրագույն գլխարկը իրեղեն ապացույց ճանաչելու և քրեական գործին կցելու մասին 11.03.2015թ. որոշմամբ:
4.Դատարանի իրավական վերլուծությունները.
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ` դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալ Արշակ Սվազյանը 2014թ. դեկտեմբերի սկզբին Ռուսաստանի Դաշնության Մոսկվա քաղաքում գտնվելու ժամանակ ՙՅու Թուբ՚ ինտերնետային կայքում տեսել է տեսագրություն, որում Արամ Մանուկյանը հայհոյանք է հնչեցրել Հայաստանի Հանրապետության Նախագահի հասցեին, ինչից վիրավորվելով որոշել է վրեժխնդիր լինել: Այնուհետև, 2014թ. դեկտեմբերի 06-ին Ռուսաստանի Դաշնությունից վերադառնալով Հայաստանի Հանրապետություն, Արամ Մանուկյանին հարվածելու և մարմնական վնասվածք պատճառելու դիտավորությամբ, 2014թ. դեկտեմբերի 11-ին, ժամը 20:00-ի սահմաններում գնացել է վերջինիս բնակության վայր հանդիսացող, Երևան քաղաքի Սոսեի փողոցի 2/2 շենք և թաքնվել շքամուտքում: Ժամը 20:04-ին բռունցքով մեկ անգամ հարվածել է շենքի շքամուտք մուտք գործող Արամ Մանուկյանի դեմքին` դիտավորությամբ վերջինիս առողջությանը պատճառելով թեթև վնաս, ապա դիմել է փախուստի:
Այսինքն` Արշակ Սվազյանը կատարել է հանցավոր արարք, որը համապատասխանում է ՀՀ քրեական օրենսգրքի 117 հոդվածին:
Կատարած արարքի համար ամբաստանյալ Արշակ Մանուկի Սվազյանը ենթակա է քրեական պատասխանատվության և պատժի:
ՀՀ քրեական օրենսգրքի 48 հոդվածի համաձայն`
ՙ1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից ու ազատություններից օրենքով նախատեսված զրկմամբ կամ դրանց սահմանափակմամբ:
2. Պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61 հոդվածի համաձայն`
ՙ1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործության՝ հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում՝ պատասխանատվությունը և պատիժը մեղմացնող կամ ծանրացնող հանգամանքներով:
3. Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները՚:
Ամբաստանյալ Արշակ Սվազյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ Արշակ Սվազյանի անձը բնութագրող, պատասխանատվությունը և պատիժը մեղմացնող հանգամանք դատարանը դիտում է այն, որ նա հանցանք ընդունել և զղջում է կատարած արարքի համար:
Ամբաստանյալի պատասխանատվությունը և պատիժը ծանրացնող հանգամանքներ առկա չեն:
Հաշվի առնելով ամբաստանյալ Ա.Սվազյանի կատարած արարքի հանրության համար վտանգավորության աստիճանը և բնույթը, նրա անձը բնութագրող տվյալները, պատասխանատվությունը և պատիժը մեղմացնող հանգամանքները, ինչպես նաև այն, որ ՀՀ քրեական օրենսգրքի 117 հոդվածի սանկցիայով նախատեսված է պատիժ նաև կալանքի ձևով, դատարանը գտնում է, որ պատժի նպատակներին հասնելու համար ամբաստանյալ Արշակ Սվազյանի նկատմամբ ՀՀ քրեական օրենսգրքի 117 հոդվածով նախատեսված հանցավոր արարք կատարելու համար պատիժ պետք է նշանակել կալանքի ձևով:
Ամբաստանյալ Ա.Սվազյանը նշանակվող պատիժը պետք է կրի ՀՀ ԱՆ համապատասխան քրեակատարողական հիմնարկում, իսկ նրա նկատմամբ կիրառված խափանման միջոցը` չհեռանալու մասին ստորագրությունը, պետք է թողնել անփոփոխ, մինչև դատավճռի օրինական ուժի մեջ մտնելը:
Դատարանը գտնում է, որ տուժող Արամ Մանուկյանի քաղաքացիական հայցի հարցը պետք է համարել լուծված, նկատի ունենալով, որ նա ամբաստանյալի նկատմամբ նյութական պահանջ չունի, որի մասին տուժողը հայտնել է դատաքննության ժամանակ:
Անդրադառնալով իրեղեն ապացույցների տնօրինման հարցին, դատարանը գտնում է, որ ՀՀ քննչական կոմիտեի Երևան քաղաքի քննչական վարչության հատկապես կարևոր գործերով քննիչի 11.03.2015թ. որոշմամբ իրեղեն ապացույց ճանաչված և քրեական գործի կցված՝ սպորտային պայուսակում առկա, դեպքի օրը Արշակ Սվազյանի հագին եղած սև կտորե բաճկոնը, սև կոշիկները, տաբատը, մուգ կապույտ վերնազգեստը և մոխրագույն գլխարկը պետք է վերադարձնել նրան:
ՀՀ քննչական կոմիտեի Երևան քաղաքի քննչական վարչության հատկապես կարևոր գործերով քննիչի 10.03.2015թ. որոշմամբ ապացույց ճանաչված այլ փաստաթուղթ հանդիսացող՝ Երևան քաղաքի Սոսեի փողոցի 2/2 շենքի շքամուտքը նկարահանող տեսախցիկի դեպքի ժամանակահատվածի վերաբերալ տեսագրության էլեկտրոնային կրիչը, լազերային սկավառակը և փորձաքննության ընթացքում տեսագրությունից առանձնացված 75 տեսապատկերների վերաբերյալ լազերային սկավառակը պետք է պահել քրեական գործի հետ:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 365, 369-372 հոդվածներով, դատարանը

Վ Ճ Ռ Ե Ց

Արշակ Մանուկի Սվազյանին մեղավոր ճանաչել ՀՀ քրեական օրենսգրքի 117 հոդվածով նախատեսված հանցանք կատարելու մեջ և նրան դատապարտել կալանքի մեկ (1) ամիս ժամկետով:
Արշակ Մանուկի Սվազյանի նկատմամբ նշանակված պատժի սկիզբը հաշվել նրան արգելանքի վերցնելու օրվանից: Պատիժը պետք է կրի ՀՀ ԱՆ համապատասխան քրեակատարողական հիմնարկում:
Արշակ Մանուկի Սվազյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ, մինչև դատավճռի օրինական ուժի մեջ մտնելը:
Տուժող Արամ Մանուկյանի քաղաքացիական հայցի հարցը համարել լուծված:
Դատավճիռն օրինական ուժի մեջ մտնելուց հետո իրեղեն ապացույց հանդիսացող և քրեական գործին կցված՝ սպորտային պայուսակը և դրանում առկա սև կտորե բաճկոնը, սև կոշիկները, տաբատը, մուգ կապույտ վերնազգեստը և մոխրագույն գլխարկը վերադարձնել Արշակ Սվազյանին:
Ապացույց ճանաչված այլ փաստաթուղթ հանդիսացող՝ Երևան քաղաքի Սոսեի փողոցի 2/2 շենքի շքամուտքը նկարահանող տեսախցիկի դեպքի ժամանակահատվածի վերաբերալ տեսագրության էլեկտրոնային կրիչը, լազերային սկավառակը և փորձաքննության ընթացքում տեսագրությունից առանձնացված 75 տեսապատկերների վերաբերյալ լազերային սկավառակը պահել քրեական գործի հետ:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է`
Դատավոր՝ Լ. Ավետիսյան