ԵԱՔԴ/0008/01/15

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության դատարանը`

նախագահող դատավոր` Լ. Ավետիսյան
քարտուղարությամբ` Ն. Այվազյանի
մասնակցությամբ
մեղադրող` Վ. Մկրտչյանի
տուժող` Ա. Հակոբյանի


2016 թվականի մարտի 16-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի Արտյոմ Հմայակի Ամրոյանի, ծնված 1976 թվականի հունիսի 27-ին, Գյումրի քաղաքում, ազգությամբ հայ, ՀՀ քաղաքացի, միջնակարգ-մասնագիտական կրթությամբ, ամուրի, չի աշխատել, նախկինում դատված` 1.Երևան քաղաքի Մալաթիա-Սեբաստիա վարչական շրջանի ընդհանուր իրավասության դատարանի 18.09.2010թ. դատավճռով ՀՀ քրեական օրենսգրքի 112 հոդվածի 1-ին մասով դատապարտվել է ազատազրկման 4 տարի 6 ամիս ժամկետով, 09.10.2013թ. ՀՀ ԱԺ 03.10.2013թ. համաներման որոշմամբ ազատվել է պատժի կրումից, 2.Արագածոտնի մարզի ընդհանուր իրավասության դատարանի 05.02.2015թ. դատավճռով ՀՀ քրեական օրենսգրքի 34-138 հոդվածի 1-ին մասով դատապարտվել է ազատազրկման 3 տարի 3 ամիս ժամկետով, հանդիսանում է ՀՀ ԱՆ ՙԱրթիկ՚ ՔԿՀ-ի դատապարտյալ, հաշվառված և բնակվել է Գյումրի քաղաքի Մազմանյան փողոցի 203 տուն հասցեում, մեղադրվում է ՀՀ քրեական օրենսգրքի 34-177 հոդվածի 2-րդ մասի 3-րդ կետով և ՀՀ քրեական օրենսգրքի 258 հոդվածի 1-ին մասով, սույն քրեական գործով որպես խափանման միջոց է ընտրվել
Պ Ա Ր Զ Ե Ց

1.Գործի դատավարական նախապատմությունը.
2015 թվականի փետրվարի 12-ին ՀՀ ՔԿ Երևան քաղաքի քննչական վարչության Արաբկիր վարչական շրջանի քննչական բաժնում ՀՀ քրեական օրենսգրքի 34-177 հոդվածի 2-րդ մասի 3-րդ կետով նախատեսված հանցագործության հատկանիշներով հարուցվել է թիվ 14107715 քրեական գործը:
2015 թվականի փետրվարի 12-ին կասկածյալ Արտյոմ Հմայակի Ամրոյանի նկատմամբ որպես խափանման միջոց է ընտրվել ստորագրություն չհեռանալու մասին:
Նախաքննության մարմնի 2015 թվականի փետրվարի 16-ի որոշմամբ Արտյոմ Հմայակի Ամրոյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 34-177 հոդվածի 2-րդ մասի 3-րդ կետով:
2015 թվականի փետրվարի 27-ին թիվ 14107715 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան` ըստ էության քննելու համար:
2015 թվականի հունիսի 02-ին ՀՀ ՔԿ Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում ՀՀ քրեական օրենսգրքի 258 հոդվածի 1-ին մասով նախատեսված հանցագործության հատկանիշներով հարուցվել է թիվ 09110315 քրեական գործը:
Նախաքննության մարմնի 2015 թվականի հունիսի 23-ի որոշմամբ Արտյոմ Հմայակի Ամրոյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 258 հոդվածի 1-ին մասով:
2015 թվականի հուլիսի 3-ին թիվ 09110315 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան` ըստ էության քննելու համար:
Դատարանի 07.08.2015թ.-ի որոշմամբ, ՀՀ քրեական դատավարության օրենսգրքի 28 հոդվածի 1-ին մասով Արտյոմ Հմայակի Ամրոյանի վերաբերյալ թիվ ԵԱՔԴ/0008/01/15 և թիվ ԵԱՔԴ/0118/01/15 քրեական գործերը միացվել են մեկ վարույթում` գործի քննությունը շարունակվել է թիվ ԵԱՔԴ/0008/01/15 համարով:
2.Գործի փաստական հանգամանքները.
Նախնական քննության մարմինը Արտյոմ Հմայակի Ամրոյանին ՀՀ քրեական օրենսգրքի 34-177 հոդվածի 2-րդ մասի 3-րդ կետով և ՀՀ քրեական օրենսգրքի 258 հոդվածի 1-ին մասով մեղադրանք է առաջադրել այն արարքների կատարման համար, որ նա 2015 թվականի փետրվարի 12-ին, ժամը 04:00-ի սահմաններում, Հր. Քոչար 23 շենքի 2-րդ մուտքի նկուղ ապօրինի մուտք գործելու և ուրիշի գույքի զգալի չափերի` 10.000 ՀՀ դրամի գույքի հափշտակություն կատարելու դիտավորությամբ, ամրանի գործադրմամբ փորձել է կոտրել նշված նկուղի դռան փականը, սակայն իր կամքից անկախ հանգամանքներում հանցագործությունը ավարտին չի հասցրել, քանի որ հանցագործությունը կատարելու պահին նկատվել է ոստիկանության աշխատակիցների կողմից և բերման է ենթարկվել ոստիկանության Արաբկիրի բաժին:
Ա.Ամրոյանը 2015թ.-ի մայիսի 12-ին, ժամը 10:30-ի սահմաններում, Երևան քաղաքի Հր.Ներսիսյան 10 հասցեում գտնվող Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի նախասրահում, այնուհետև նաև նույն դատարանի մուտքի դռների դիմաց, խուլիգանություն կատարելու դիտավորությամբ կոպիտ կերպով խախտել է հասարակական կարգը՝ շուրջ 15 րոպե տևողությամբ բղավել և բարձրաձայն հայհոյանքներ է հնչեցրել դատարանի աշխատակիցների՝ կարգադրիչների հասցեին չենթարկվելով վերջիններիս օրինական պահանջներին, ապա քաշքշել նրանց, խաթարել դատարանի բնականոն գործունեությունը՝ հասարակության նկատմամբ դրսևորելով բացահայտ անհարգալից վերաբերմունք:
3.Ապացույցների հետազոտում.
Դատաքննության ժամանակ ամբաստանյալ Արտյոմ Հմայակի Ամրոյանը չընդունեց իրեն առաջադրված մեղադրանքը և ցուցմունք տվեց այն մասին, որ ժամանել է Երևան` վերաքննիչ դատարան բողոք ներկայացնելու նպատակով: Երևանում բնակության վայր չունենալու պատճառով՝ գիշերել է դրսում: Իր վիճակից ելնելով օգտագործել է ալկոհոլ: Գիշերը ցրտից արթնացել է և նկատել, որ գտնվում է տաղավարում, սակայն թե ինչպես է հայտնվել այդտեղ չի հիշում: Մտածել է մի տաք տեղ գտնել, մինչև լույսը բացվի, որպեսզի վերադառնա տուն: Կոմիտասի պողոտայով անցնելիս մտել է մի անծանոթ շենքի մուտք, տեսնելով, որ նստելու համար հարմար չէ, դուրս է եկել: Ոստիկանները նկատել են և երբ մտել դուրս է եկել, շքամուտքի դռնից 10-15 մետր հեռավորության վրա բռնել են իր թևերից, հարցրել են ով է և ինչ է անում այդտեղ: Բացարտել է թե ով է և ինչ է անում: Ոստիկաններն ասել են, որ իրեն են ման գալիս, նստացրել են ավտոմեքենան և տարել բաժին: Բաժնում ոստիկաններն իրեն տարբեր գողությունների մեջ են մեղադրել և ստիպել են, որ գոնե 5-6 գործ ՙվիզ՚ վերցնի, դրանց վերաբերյալ ցուցմունք տա, սակայն ինքը հրաժարվել է: Ժամը 11:00-ի սահմաններում իրեն տարել են քննիչի մոտ: Վերջինս իրեն համոզել է գրել, որ ցանկացել է գողություն կատարել, ասելով նաև, որ միևնույն է համաներում է լինելու և գործը դատարան չի հասնելու: Սպառնացել է, որ վկաներ կգտնի և գողության հոդված կդնի իր վրա: Ինքը ստիպված համաձայնել է, բայց ոչ մի գողություն կամ գողության փորձ չի եղել: Արմատուրան և ոստիկան վկաների ցուցմունքներն ամբողջությամբ սարքված է: Ինքը գողություն չի արել, հրաժարվում է իր տված նախաքննական ցուցմունքներից: Քննիչն իրեն խաբել է:
Խուլիգանության վերաբերյալ դրվագի մասին հայտնել է, որ եկել էր դատարան իմանալու թե երբ է նշանակվել նիստը, քանի որ նիստը հետաձգվել էր: Կարգադրիչների պետը քաղաքացիական հագուստով մոտեցել է իրեն և սկսել հայհոյել և պահանջել, որ հեռանա, քանի որ ինքը խմած էր: Ինքը նրան ասել է, որ նիստը հետաձգվել է և երբ իրեն կասեն թե երբ է հետաձգվել, կհեռանա: Երբ նա սկսել է իրեն հրել և հայհոյել, ինքն այդ պահին բորբոքվել է և սկսել նրան հայհոյել: Նա չի ներկայացել, որ կարգադրիչների պետն է կամ աշխատող, աշխատողի տպավորություն չի թողել:
Քննիչն իրեն ասել է որ գրի, ինքն էլ գրել է, որ փորձել է գողություն կատարել 10.000 դրամի սահմանում: Իր մոտ անձնական խուզարկության ժամական ամրան չի հայտնաբերվել, ոստիկաններն են բերել: Իր մոտ երկաթյա ամրան չի եղել: Արմատուրան բերել դրել են, ասել են արմատուրան էլ է հետը եղել, ինքը ստորագրել է, թողել գնացել: Ավելի ծանր հոդվածով են ցանկացել իրեն մեղադրել, դա ամենամեղմ հանցանքն էր, որ վերցրել է իր վրա: Ինքը գողության փորձը չի ընդունում, քանի որ անմեղ է, իսկ կռվի համար կարգադրիչներն էին մեղավոր: Ճիշտ է ինքը խմած է եկել դատարան, բայց այդ ամենը Բարսամյանի սարքածն է: Նա էր մեղավոր, նա իրեն հրել է:
Ամբաստանյալին մեղսագրված հանցանքը հիմնավորվել է հետևյալ ապացույցներով.
Տուժող Արմեն Հակոբի Հակոբյանի ցուցմունքով այն մասին, որ բնակվում է Երևան քաղաքի Հր. Քոչար փողոցի 23 շենքի 14 բնակարանում: Դեպքի օրը գիշերը ժամը 4-ից 5-ի սահմաններում իր բնակարանի դուռը թակել են Արաբկիրի բաժնի ոստիկանները, հարցրել են, թե արդյոք ձայներ չի լսել: Լսելով բացասական պատասխան, ոստիկանության աշխատակիցները տեղեկացրել են, որ իրեն պատկանող նկուղի մուտքի դռան կախովի փականը կոտրելու միջոցով փորձել են գողություն կատարել: Նրանք բռնել են գողության փորձ կատարողին: Բնակարանը նկուղից գտնվում է երկու հարկ հեռավորության վրա: Նշված շենքի 2-րդ մուտքի նկուղի դուռը տանում է դեպի իրեն պատկանող նկուղ, որտեղ առկա են տարբեր իրեր, այդ թվում հեղուկ գազի բալոն, շինարարական ապրանք, ապակյա տարաններ և այլ իրեր: Նկուղում առկա է մոտ 20.000 ՀՀ դրամի գույք: Երբ իջել է նկուղ վնասված փական չի տեսել: Ոստիկանների խնդրանքով ինքն իր բանալիով բացել է կողպեքները, որոնք աշխատել են: Ինքը դեպքի մասին իմացել է ոստիկանության աշխատակիցներից: Ինքը բողոք, պահանջ չունի:
Վկա Էրիկ Մարտինի Ղուկասյանի ցուցմունքով այն մասին, որ 2013 թվականից աշխատում է ոստիկանության Արաբկիրի բաժնում որպես ՔՀ բաժանմունքի օպերլիազոր, կոչումով լեյտենանտ է: Դեպքի օրը նույն բաժանմունքի օպերլիազորներ Տ.Պողոսյանի և Կ.Հովսեփյանի հետ միասին ծառայություն են իրականացրել Արաբկիր վարչական շրջանում: Հ.Քոչարի փողոցի 23 շենքի մոտով անցնելիս կոտրելու ձայն են լսել, մոտեցել և տեսել են, որ Ա.Ամրոյանը, իր ձեռքում գտնվող ամրանի օգնությամբ փորձում է կոտրել նշված մուտքի նկուղի դռան կախովի փականը: Այդ պահին Տ.Պողոսյանը և Կ.Հովսեփյանը բռնել են նրան: Քանի որ մեքենան հեռվում էր գտնվում, ինքը շտապել է մեքենան մոտեցնել: Նշված մուտքի մոտ է բերել ավտոմեքենան, որով Ա.Ամրոյանին բերման են ենթարկել ոստիկանության Արաբկիրի բաժին: Մինչև բաժին հասնելը վերջինս ասել է ՙտղերք թարգեք, ամոթա, եղածը մի պադվալա, ամոթ չի, դրա համար ու±մ են բաժին տանում՚: Ասել է, որ տեղ չունի մնալու, Լենինականից է, սոված է, հացի փող չունի: Վերջինիս անձնական խուզարկությամբ ընթերակաների ներկայությամբ հայտնաբերվել և առգրավվել է երկաթյա ամրանը, ինչի օգնությամբ նա փորձել է կոտրել նշված նկուղի դռան փականը: Անձնական խուզարկության ժամանակ ամրանը ձեռքում բռնած էր: Ա.Ամրոյանը ոստիկանության Արաբկիրի բաժնում խոստովանել է կատարած արարքը և հայտնել է, որ նյութական ծանր վիճակից ելնելով, գողություն կատարելու նպատակով փորձել է իր մոտ գտնվող ամրանի օգնությամբ կոտրել նկուղի փականը և մուտք գործել նկուղ: Եթե իրենց կողմից Ա.Ամրոյանը չնկատվեր, ապա վերջինս հանցագործությունը կհասցներ ավարտին:
Վկա Կարեն Վարդանի Հովսեփյանի ցուցմունքով այն մասին, 2004 թվականից աշխատում է ՀՀ ոստիկանությունում: 2014 թվականից աշխատում է ոստիկանության Արաբկիրի բաժնում, որպես ՔՀ բաժանմունքի ավագ օպերլիազոր, կոչումով ոստիկանության մայոր է: 2015 թվականի փետրվարի 12-ին, ժամը 4-ի սահմաններում, նույն բաժանմունքի օպերլիազորներ Տ.Պողոսյանի և Է.Ղուկասյանի հետ միասին ծառայություն են իրականացրել Արաբկիր վարչական շրջանում: Հր.Քոչարի փողոցի շենքներից մեկի բակով անցնելիս ձայն են լսել և անաղմուկ մոտեցել են ձայնի ուղղությամբ, զգացել են որ ինչ-որ բան են ուզում կոտրել: Շքամուտքում նկատել են Ա.Ամրոյանին, ով ձեռքում գտնվող ամրանի օգնությամբ փորձել է կոտրել նշված մուտքի նկուղի դռան կախովի փականը: Այդ պահին իրենք մոտեցել են Ա. Ամրոյանին և բռնել նրան: Բռնելու ժամանակ նա վախեցած խնդրում էր, որ ներեն և բաց թողնեն նրան: Ասում էր, որ եկել է Լենինականից, սոված է, մնալու տեղ չունի: Է. Ղուկասյանը նշված մուտքի մոտ է բերել ավտոմեքենան, որով և իրենք Ա.Ամրոյանին բերման են ենթարկել ոստիկանության Արաբկիրի բաժին: Վերջինիս անձնական խուզարկությամբ առգրավվել է երկաթյա ամրանը, ինչի օգնությամբ նա փորձել է կոտրել նշված նկուղի դռան փականը: Ա.Ամրոյանը ոստիկանության Արաբկիրի բաժնում ընթերակաների ներկայությամբ խոստովանել է կատարած արարքը և հայտնել է, որ երկաթյա ձողը ճանապարհին է գտել, կանխամտածված չի ուզել հանցագործություն անել, սոված է եղել, դրա համար ուզեցել է գողություն անի: Ճանապարհին գտած երկաթա ձողով փորձել է կոտրել կողպեքը: Տեղազննության ժամանկ տեսել են, որ կողպեքը չի կոտրվել, բայց վնասված է եղել:
Վկա Տիգրան Ֆրանդի Պողոսյանի ցուցմունքով այն մասին, որ 2009 թվականից աշխատում է ՀՀ ոստիկանությունում: 2013 թվականից զբաղեցնում է ոստիկանության Արաբկիրի բաժնի ՔՀ բաժանմունքի օպերլիազորի պաշտոնը, կոչումով ավագ լեյտենանտ է: 2015 թվականի փետրվարի 12-ին, ժամը 04-ի սահմաններում, նույն բաժանմունքի օպերլիազորներ Է.Ղուկասյանի և Կ.Հովսեփյանի հետ միասին ծառայություն են իրականացրել Արաբկիր վարչական շրջանում: Հր. Քոչարի 23 շենքի մոտ շքամուտքից ձայներ են լսել և անմիջապես մոտենալով նկատել են, որ նշված շենքի 2-րդ մուտքում Ա.Ամրոյանը ձեռքում գտնվող ամրանի օգնությամբ փորձում է կոտրել նշված մուտքի նկուղի դռան կախովի փականը: Այդ պահին իրենք մոտեցել են Ա. Ամրոյանին և բռնել նրան: Է.Ղուկասյանը նշված մուտքի մոտ է բերել ավտոմեքենան և Ա. Ամրոյանին բերման են ենթարկել ոստիկանության Արաբկիրի բաժին: Վերջինս ասել է, որ Լենինականից է եկել, սոված է, ուտելու բան չունի և ցանկացել է նկուղը բացել, որպեսզի հոգա իր կարիքները: Ա.Ամրոյանի անձնական խուզարկությամբ առգրավվել է երկաթյա ամրանը, ինչի օգնությամբ Ա.Ամրոյանը փորձել է կոտրել նշված նկուղի դռան փականը: Ա. Ամրոյանը ոստիկանության Արաբկիրի բաժնում խոստովանել է կատարված արարքը և հայտնել է, որ սոցիալական ծանր վիճակից ելնելով, գողություն կատարելու նպատակով փորձել է իր մոտ գտնվող ամրանի օգնությամբ կոտրել նկուղի փականը և մուտք գործել նկուղ:
Վկա Ֆերդինանտ Վարուժանի Սոլակյանի ցուցմունքով այն մասին, որ դեպքի օրը չի հիշում: Գիշերը ուշ ժամի Արաբկիրի ոստիկանության աշխատողները խնդրել են որպես ընթերակա ներկա գտնվել անձնական խուզարկությանը: Տաքսի էր վարում այդ ժամանակ մոտեցել են ոստիկանության աշխատակիցները և պարզաբանել թե ինչ պետք է արվի: Անձնական խուզարկության ժամանակ Ա.Ամրոյանի մոտից ինչ գտնվել է, աձանագրվել է և ինքը որպես ընթերակա, ստորագրել է: Ինչ-որ երկաթյա ամրան էր, թաշկինակ, կրակայրիչ և այդ տիպի անձնական իրեր: Ամբաստանյալը հայտարարել է, որ տնից ուշ դուրս է եկել և քանի որ շներից վախենում է, պաշտպանվելու համար իր մոտ է պահել երկաթի կտորը: Մոտավորապես գիշերվա ժամը 4-ի սահմաններում էր: Խուզարկությունը կատարվել է Արաբկիրի ոստիկանության բաժնում: Դա երկաթյա ձող էր, կողքից էլ ինչ-որ կպած արմատուրա: Ոստիկանության աշխատակիցներն ասել են, որ հայտնաբերվել է Ա.Ամրոյանի մոտից, նա հաստատել է: Ներկա էր նաև երկրորդ ընթերակա: Ինքը հարցրել է, ասել են, որ տվյալ անձին բռնել են գողության փորձ կատարելուց: Ինչ-որ նկուղային տարածք ներխուժելու ժամանակ բռնել են և բերել բաժին: Պետք է նրան խուզարկեին և այդ ամենը պետք է կատարվեր ընթերակաների ներկայությամբ: Անձնական խուզարկությունը կատարվել է իրենց ներկայությամբ: Երկաթյա ձողը, ինչքանով որ ինքը հասկացել է, արդեն նրա հետ բերել էին: Խուզարկության կապակցությամբ կազմվել է արձանագրություն, ստորագրել են: Ա.Ամրոյան էլ է ստորագրել, որևէ առարկություն չի եղել: Երկաթե ամրանը ոստիկանության աշխատողների կողմից չափվել և փաթեթավորվել է: Ամրանը մատի հաստության էր:
Նախաքննական ցուցմունքի հրապարակումից հետո վկա Ֆ.Սոլակյանը հայտնել է, որ Ա.Ամրոյանը հաստատել է, որ ամրանը վերցրել է ինչ որ դռան կողպեք բացելու համար: Ա.Ամրոյանը նաև հայտնել է, որ ոչ թե նպատակ է ունեցել գողություն կատարելու, այլ քանի որ գիշեր էր և ցուրտ էր, ցանկացել է պատսպարվելու համար մտել նկուղ: Ֆերդինանտ Սոլակյանը պնդեց նախաքննության ընթացքում տված ցուցմունքը, հայտնելով, որ հակասությունները կապված են նրա հետ, որ շատ ժամանակ է անցել և մանրամասները մոռացել է:
Վկա Ֆերդինանտ Վարուժանի Սոլակյանի նախաքննության ընթացքում տված ցուցմունքով այն մասին, որ բնակվում է Մասիս քաղաքի Հովտաշատ գյուղի Կոմիտասի փողոցի 8 տանը: Ներկայումս աշխատում է որպես ՙտաքսի՚ ավտոմեքենայի վարորդ: 2015 թվականի փետրվարի 12-ին, ժամը 04:20-ի սահմաններում, երբ իր ավտոմեքենայով կանգնած է եղել Երևան քաղաքի Մամիկոնյանց և Ազատության փողոցների հատման վայրում, իրեն է մոտեցել ոստիկանության աշխատակից և հրավիրել ոստիկանության Արաբկիրի բաժին, որպես ընթերակա մասնակցելու անձնական խուզարկության ենթարկելու գործողությանը: Ինքը համաձայնել է: Բարձրանալով ոստիկանության Արաբկիրի բաժնի 2-րդ հարկում գտնվող աշխատասենյակ, տեսել է Ա.Ամրոյանին, ում պետք է ենթարկեին անձնական խուզարկության և Հ.Վարդանյանին, ով պետք է մասնակցեր նույն գործողությանը որպես երկրորդ ընթերակա: Գործողությունը սկսելուց առաջ բոլոր մասնակիցներին պարզաբանվել են նրանց իրավունքները և պարտականությունները, որից հետո Ա.Ամրոյանը ենթարկվել է անձնական խուզարկության: Խուզարկության ժամանակ վերջինիս մոտից հայտնաբերվել և առգրավվել է երկաթյա ամրան: Այդ ժամանակ Ա.Ամրոյանը հայտարարել է, որ նշված ամրանը պատկանում է իրեն, դրա օգնությամբ փորձել է կոտրել նկուղի դռան փականը, որպեսզի նկուղից գողություն կատարի: Գործողության ավարտից հետո բոլոր մասնակիցները ծանոթացել են համապատասխան արձանագրությանը և ստորագրել այն:
Վկա Հովհաննես Երջանիկի Վարդանյանի նախաքննության ընթացքում տված ցուցմունքով այն մասին, որ բնակվում է Երևան քաղաքի Դրոյի 4 շենքի 5-րդ բնակարանում: Ներկայումս աշխատում է որպես ՙտաքսի՚ ավտոմեքենայի վարորդ: 2015 թվականի փետրվարի 12-ին ժամը 04:20-ի սահմաններում, երբ իր ավտոմեքենայով կանգնած է եղել Երևան քաղաքի Մամիկոնյանց և Ազատության փողոցների հատման վայրում, իրեն է մոտեցել ոստիկանության աշխատակից և հրավիրել ոստիկանության Արաբկիրի բաժին, որպես ընթերակա մասնակցելու անձնական խուզարկության ենթարկելու գործողությանը: Ինքը համաձայնել է և բարձրանալով ոստիկանության Արաբկիրի բաժնի 2-րդ հարկում գտնվող աշխատասենյակ, տեսել է Արտյոմ Ամրոյանին, ում պետք է ենթարկեին անձնական խուզարկության: Որոշ ժամանակ անց այդտեղ է եկել Ֆ.Սոլակյանը, ով պետք է մասնակցեր նույն գործողությանը որպես երկրորդ ընթերակա: Գործողությունն սկսելուց առաջ բոլոր մասնակիցներին պարզաբանվել են նրանց իրավունքները և պարտականությունները, որից հետո Ա. Ամրոյանը ենթարկվել է անձնական խուզարկության: Խուզարկության ժամանակ վերջինիս մոտից հայտնաբերվել և առգրավվել է երկաթյա ամրան: Այդ ժամանակ Ա.Ամրոյանը հայտարարել է, որ նշված ամրանը պատկանում է իրեն, դրա օգնությամբ փորձել է կոտրել նկուղի դռան փականը, որպեսզի նկուղից գողություն կատարի: Գործողության ավարտից հետո բոլոր մասնակիցները ծանոթացել են կազմված համապատասխան արձանագրությանը և ստորագրել այն:
Վկա Ռաֆիկ Արշակի Բարսամյանի ցուցմունքով այն մասին, որ աշխատում է Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանում, որպես դատական կարգադրիչների ծառայության պետ: 2015թ.-ի մայիսի 12-ին, առավոտյան ժամը 10:30-ի սահմաններում, երբ մտել է դատարանի նախասրահ, տեսել է կարգադրիչներ Հրաչյա Ռուբենյանին և Արմեն Մարգարյանին, ովքեր խոսելիս են եղել Արտյոմ Ամրոյանի հետ: Մոտենալով նրանց հարցրել է, թե ինչ է պատահել: Նրանք պատասխանել են, որ Արտյոմ Ամրոյանը եկել է դատական նիստի, որը պետք է սկսվեր ժամը 12-ին: Վերջինս գտնվում էր ոգելից խմիչքի ազդեցության տակ: Ինքը ներկայացել է, որ ստորաբաժանման պետն է: Արտյոմ Ամրոյանին բացատրել է, որ շուտ է եկել և կարող է դրսում սպասել: Չենթարկվելով իրենց պահանջներին, Արտյոմ Ամրոյանը հենց դատարանի նախասրահում սկսել է իրենց հետ բարձրաձայն բղավելով խոսել: Իրենք նրան բացատրելով դուրս են հրավիրել նախասրահից: Դատարանի բակում Արտյոմ Ամրոյանը շարունակել է բարձրաձայն բղավել, հայհոյանքներ հնչեցնել և չենթարկվել իրենց պահանջներին, որի պատճառով իրենք ձեռնաշղթաներ են հագցրել նրա ձեռքերին, ապա զանգահարել ոստիկանություն: Ձեռնաշղթաներով Արտյոմ Ամրոյանը մնացել է մոտ մեկ րոպեի չափով, որից հետո հանգստացել է: Նրա այդ վարքագիծը տևել է մոտ 15-20 րոպե, որի ընթացքում նա բացահայտ անհարգալից վերաբերմունք է դրսևորել իրենց նկատմամբ՝ խանգարելով իրենց և դատարանի աշխատանքը: Ինքը համազգեստով չի եղել: Երբ ոստիկանության աշխատակիցները ժամանել են, նրան հանգստացրել և գնացել են: Ա.Ամրոյանին դատարանի աշխատակիցներից որևիցե մեկը չի հարվածել և ծեծի չի ենթարկել:
Վկա Հակոբ Արարատի Մոսիկյանի ցուցմունքով այն մասին, որ աշխատում է Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանում որպես դատական կարգադրիչ: Դեպքի օրը առավոտյան ժամը 10:00-ի սահմաններում գտնվել է դատական նիստերի դահլիճում: Նիստի ավարտից հետո, երբ բարձրացել է դատարանի նախասրահ, տեղեկացել է, որ կոնֆլիկտ է եղել: Դուրս գալով դատարանի բակ, տեսել է, որ Արտյոմ Ամրոյանը, որը ոգելից խմիչքի ազդեցության տակ է եղել, կարգադրիչներ Արմեն Մարգարյանի և Հրաչ Ռուբենյանի հետ բարձրաձայն վիճաբանում է: Չի հիշում ամբաստանյալը հայհոյանքներ տալիս էր, թե` ոչ, քանի որ վերջում է գնացել: Իրենք նրան չեն հայհոյել, բռնություն չեն գործադրել: Վիճաբանությունը տևել է մոտ 10 րոպե:
Վկա Հակոբ Արարատի Մոսիկյանի նախաքննության ընթացքում տված ցուցմունքով այն մասին, որ աշխատում է Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանում որպես դատական կարգադրիչ: 2015թ.-ի մայիսի 12-ին՝ առավոտյան ժամը 10:00-ի սահմաններում գտնվել է դատական նիստերի դահլիճում և նիստի ավարտից հետո, երբ դուրս է եկել բակ, տեսել է, որ դատարանի բակում Արտյոմ Ամրոյանը, որը ոգելից խմիչքի ազդեցության տակ է գտնվել, նույն դատարանի աշխատակիցներ Արմեն Մարգարյանի և Հրաչ Ռուբենյանի հետ բարձրաձայն վիճաբանում է, դրսևորելով վատ պահվածք և անհարգալից վերաբերմունք: Ինքը մոտեցել է և փորձել հանդարտացնել Արտյոմ Ամրոյանին, սակայն վերջինս բարձրաձայն բղավել է և հայհոյանքներ հնչեցրել: Այդ ամենը տևել է մոտ 20 րոպե, որի ընթացքում, ինքը և դատարանի մյուս կարգադրիչները Արտյոմ Ամրոյանին չեն հարվածել: Վերջինս նույնպես իրենց չի հարվածել:
Վկա Հրաչյա Ռուբենի Ռուբենյանի ցուցմունքով այն մասին, որ աշխատում է Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանում որպես դատական կարգադրիչ: Դեպքի օրը առավոտյան ժամը 10:00-ի սահմաններում գտնվել է աշխատանքի վայրում: Այդ ժամանակ դատարանի նախասրահ է մտել Արտյոմ Ամրոյանը, ով գտնվելով ոգելից խմիչքի ազդեցության տակ, սկսել է բարձրաձայն բղավելով խանգարել դատարանի բնականոն աշխատանքը: Երբ մոտեցել են նրան և զգուշացրել, որ չբղավի և դրսում սպասի, նա չի ենթարկվել իրենց պահանջներին և շարունակել է աղմկել դատարանի ներսում: Մի քանի անգամ նրան զգուշացնելուց հետո, նրա հետ միասին դուրս են եկել դատարանի հարակից տարածք, որտեղ Արտյոմ Ամրոյանը սկսել է հայհոյել և բղավել: Այդ պահին դրսում եղել են նաև այլ քաղաքացիներ: Իրենք փորձել են նրան հանգստացնել, սակայն նա կրկին չի ենթարկվել և այդ պատճառով նրա ձեռքերին ձեռնաշղթաներ են ամրացրել, որից հետո միայն նա հանգստացել է: Այնուհետև իրենք ոստիկանություն են կանչել: Հ.Ռուբենյանը նշել է, որ այդ ամենը տևել է մոտ 15-20 րոպե: Արտյոմ Ամրոյանին դատարանի կարգադրիչներից որևէ մեկը չի հարվածել, ծեծի չի ենթարկել և չի քաշքշել: Նա նույնպես իրենց չի հարվածել:
Վկա Հռիփսիմե Հակոբի Ջերեջյանի նախաքննության ընթացքում տված ցուցմունքով այն մասին, որ աշխատում է ՙԱռավոտ՚ օրաթերթում որպես լրագրող: 2015թ.-ի մայիսի 12-ին, առավոտյան ժամը 10:00-ի սահմաններում, գտնվել է Արաբկիր և Քանաքեռ վարչական շրջանների ընդհանուր իրավասության առաջին ատյանի դատարանում և միջանցքից լսելով բղավոցի ձայներ, դուրս է եկել, որպեսզի տեսնի, թե ինչ է պատահել: Դատարանի նախասրահում տեսել է կարգադրիչներին, որոնք փորձում էին Արտյոմ Ամրոյանին դուրս հրավիրել, քանի որ վերջինս հայհոյում և բարձրաձայն աղմկում էր: Դատական կարգադրիչները նրան բացատրում էին, որ դատական նիստի ժամանակից շուտ է եկել և առաջարկել, որպեսզի դրսում սպասի: Արտյոմ Ամրոյանին դատական կարգադրիչները դուրս են հրավիրել, սակայն դրսում նա նույնպես շարունակել է բղավել և հայհոյանքներ հնչեցնել: Ինքն այդ ընթացքում պարբերբար ներս է մտել և դուրս եկել: Հերթական անգամ դուրս գալու ժամանակ տեսել է, որ Արտյոմ Ամրոյանը կրկին չի ենթարվում դատական կարգադրիչների պահանջներին, շարունակում է բարձրաձայն բղավել: Այդ ժամանակ իր բջջային հեռախոսով սկսել է նկարահանել տեղի ունեցածը, քանի որ հենց իր դուրս գալու պահին՝ դրսում, փաստաբաններ Արգիշտի Կիվիրյանն ու Լուսինե Սահակյանը կարգադրիչներին ասել են, թե ինչու են նրանք ծեծի ենթարկում քաղաքացուն: Այդ ժամանակ կարգադրիչների ծառայության ղեկավարը Արտյոմ Ամրոյանի ձեռքերին ամրացրել է ձեռնաշղթաներ և նստեցրել գետնին: Այդ ամենը տևել է մոտ 10-15 րոպե, որի ընթացքում Արտյոմ Ամրոյանը անդադար բարձրաձայն հայհոյանքներ է հնչեցրել և բղավել:
Հռիփսիմե Ջերջյանը նշել է, որ ինքը չի տեսել, որ Արտյոմ Ամրոյանին դատական կարգադրիչները ծեծի ենթարկեն կամ հարվածեն, միայն տեսել է, որ նա չի ենթարկվում նրանց և այդ պատճառով նրան նստացրել էին գետնին և ձեռնաշղթաներ են ամրացրել ձեռքերին:
Որպես այլ փաստաթուղթ ճանաչված և քրեական գործին կցված ՙPRINCO՚ տեսակի լազերային սկավառակով և այն զննության ենթարկելու մասին արձանագրությամբ, որում առկա են Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի դիմաց Արտյոմ Ամրոյանի մասնակցությամբ տեղի ունեցած միջադեպից հատվածներ, որտեղ նշվում է, որ վերը նշված դատարանի աջ կողմում հավաքված թվով վեց տղամադիկ, որոնցից երեքը դատարանի կարգադրիչների հագուստով են և վերջիններս ձեռքերով բռնել են մի քաղաքացու և ուժ գործադրելով նստեցրել են կանաչապատ տարածքի պատնեշին: Հավաքված անձանցից բաց մոխրագույն հագուստով տղամարդը դիմում է հավաքված անձանց, ասելով, որ չծեծեն այդ նստած տղամարդուն, սակայն նրանք պատասխանում են, որ ոչ-ոք նրան չի ծեծում, իսկ նստած տղամարդը հայհոյում է նրանց:
Արմեն Հակոբի Հակոբյանի կողմից ոստիկանության Արաբկիրի բաժին տրված գրավոր հաղորդման արձանագրությամբ այն մասին, որ 12.02.2015 թվականին` ժամը 04:00-ից մինչև 05:00-ն ընկած ժամանակահատվածում, անհայտ անձը տեխնիկական գործիքների միջոցով փորձել է բացել Քոչարի փողոցի 23 շենքի 2-րդ մուտքի իրեն պատկանող նկուղի մուտքի դուռը:
Արտյոմ Հմակայի Ամրոյանին անձնական խուզարկության ենթարկելու մասին արձանագրությամբ այն մասին, որ 12.02.2015 թվականին` ժամը 04:25-ից մինչև 04:37-ն ընկած ժամանակահատվածում, ոստիկանության Արաբկիրի բաժնում, ներկայությամբ ընթերականեր` Հովհաննես Վարդանյանի և Ֆերդինանդ Սոլակյանի, ոստիկանության Արաբկիրի բաժնի ՔՀԲ-ի օ/լ` Է. Ղուկասյանը, անձնական խուզարկության է ենթարկել` Արտյոմ Ամրոյանին, ում մոտից հայտնաբերվել է` 49 սմ. երկարությամբ երկաթյա ամրան, որին եռակցված է եղել 18 սմ. երկարության մեկ այլ` ավելի բարակ ամրան: Անձնական խուզարկության ընթացքում Ա. Ամրոյանը հայտարարել է, որ նշված ամրանը պատկանում է իրեն և նա փորձել է դրա օգնությամբ կոտրել շենքի նկուղի փականը` գողություն կատարելու նպատակով:
Դեպքի վայրի զննության արձանագրությամբ այն մասին, որ դեպքի վայր է հանդիսանում Երևան քաղաքի Հ. Քոչար 23 շենքի 2-րդ մուտքի նկուղը: Ըստ դեպքի վայրի զննության մասնակից Ա. Ամրոյանի հայտարարության վերջինս ամրանի օգնությամբ փորձել է կոտրել նշված նկուղի դռան փականը, որպեսզի այդտեղից գողանա իրեն անհրաժեշտ 10.000 ՀՀ դրամի չափով գույք: Նշված նկուղի կախովի փականի վրա հայտնաբերվել է տեխնիկական միջոցների գործադրման հետքեր: Փականը առգրավվել է:
Արտյոմ Ամրոյանի անձնական խուզարկությամբ առգրավված երկաթյա ամրանը և դեպքի վայրի զննությամբ առգրավված կախովի փականը զննելու մասին արձանագրությամբ այն մասին, որ երկաթյա ամրանի և կախովի փականի վրա հայտնաբերվել են ներգործության հետքեր:
Ամրանը և փականը, որոնցից ամրանն առգրավվել է Ա. Ամրոյանից անձնական խուզարկության ժամանակ, իսկ փականը առգրավվել է դեպքի վայրի զննության ընթացքում, իրեղեն ապացույց ճանաչելու մասին որոշմամբ:
ՀՀ ոստիկանության ինֆորմացիոն կենտրոնից ստացված տեղեկանքով, համաձայն որի Արտյոմ Ամրոյանը դատապարտված է եղել 25.10.1995թ. ՀԽՍՀ քրեական օրենսգրքի 254 հոդվածով, 25.02.2003թ. ՀԽՍՀ քրեական օրենսգրքի 222 հոդվածի 3-րդ մասով, 18.09.2010թ. ՀՀ քրեական օրենսգրքի 112 հոդվածի 1-ին մաս, 29.05.2015թ. ՀՀ քրեական օրենսգրքի 34-138 հոդվածի 1-ին մասով:
4.Դատարանի իրավական վերլուծությունները.
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ, դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալ Արտյոմ Ամրոյանը 2015 թվականի փետրվարի 12-ին, ժամը 04:00-ի սահմաններում, Հր. Քոչար 23 շենքի 2-րդ մոտքի նկուղ ապօրինի մուտք գործելու և ուրիշի գույքի զգալի չափերի` 10.000 ՀՀ դրամի գույքի հափշտակություն կատարելու դիտավորությամբ, ամրանի գործադրմամբ փորձել է կոտրել նշված նկուղի դռան փականը, սակայն իր կամքից անկախ հանգամանքներում հանցագործությունը ավարտին չի հասցրել, քանի որ հանցագործությունը կատարելու պահին նկատվել է ոստիկանության աշխատակիցների կողմից և բերման է ենթարկվել ոստիկանության Արաբկիրի բաժին:
Ա.Ամրոյանը 2015թ.-ի մայիսի 12-ին, ժամը 10:30-ի սահմաններում, Երևան քաղաքի Հր.Ներսիսյան 10 հասցեում գտնվող Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի նախ նախասրահում, այնուհետև նաև դատարանի մուտքի դռների դիմաց, խուլիգանություն կատարելու դիտավորությամբ կոպիտ կերպով խախտել է հասրակական կարգը՝ շուրջ 15 րոպե տևողությամբ բղավել և բարձրաձայն հայհոյանքներ է հնչեցրել դատական կարգադրիչների հասցեին չենթարկվելով վերջիններիս օրինական պահանջներին, ապա քաշքշել նրանց, խաթարել դատարանի բնականոն գործունեությունը՝ հասարակության նկատմամբ դրսևորելով բացահայտ անհարգալից վերաբերմունք:
Այսինքն` Ա.Ամրոյանը կատարել է հանցավոր արարքներ, որոնք համապատասխանում են ՀՀ քրեական օրենսգրքի 34-177 հոդվածի 2-րդ մասի 3-րդ կետով և 258 հոդվածի 1-ին մասով նախատեսված հանցագործության հատկանիշներին:
Կատարած արարքի համար ամբաստանյալ Արտյոմ Հմայակի Ամրոյանը ենթակա է քրեական պատասխանատվության և պատժի:
ՀՀ քրեական օրենսգրքի 48 հոդվածի համաձայն`
ՙ1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից ու ազատություններից օրենքով նախատեսված զրկմամբ կամ դրանց սահմանափակմամբ:
2. Պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61 հոդվածի համաձայն`
ՙ1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործության՝ հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում՝ պատասխանատվությունը և պատիժը մեղմացնող կամ ծանրացնող հանգամանքներով:
3. Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները՚:
Ամբաստանյալ Արտյոմ Ամրոյանի նկատմամբ պատիժ նշանակելիս, դատարանը հաշվի է առնում նրա կատարած արարքների հանրության համար վտանգավորության աստիճանը և բնույթը, ինչպես նաև հանցավորի անձը:
Ամբաստանյալի անձը բնութագրող տվյալներ, պատասխանատվությունը և պատիժը մեղմացնող հանգամանքներ առկա չեն:
Որպես ամբաստանյալի պատասխանատվությունը և պատիժը ծանրացնող հանգամանք դատարանը դիտում է հանցանք կատարելու վտանգավոր ռեցիդիվը: Ամբաստանյալ Արտյոմ Ամրոյանը նախկինում երկու անգամ դիտավորյալ հանցագործության համար ազատազրկման դատապարտված լինելով և դատվածություն ունենալով, դիտավորությամբ հանցանք է կատարել: Ինչպես նաև այն, որ հանցանքը կատարել է ալկոհոլի ազդեցության տակ:
ՀՀ քրեական օրենսգրքի 22 հոդվածի 2-րդ մասի 1-ին մասի համաձայն ՙՀանցագործությունների ռեցիդիվը վտանգավոր է համարվում դիտավորությամբ հանցանք կատարելու դեպքում, եթե անձը նախկինում երկու անգամից ոչ պակաս ազատազրկման է դատապարտվել դիտավորյալ հանցագործության համար՚:
Հաշվի առնելով Արտյոմ Ամրոյանի կատարած արարքների հանրության համար վտանգավորության աստիճանը և բնույթը, նրա անձը բնութագրող տվյալների, պատասխանատվությունը և պատիժը մեղմացնող հանգամանքների բացակայությունը, պատասխանատվությունը և պատիժը ծանրացնող հանգամանքները, ինչպես նաև այն, որ ՀՀ քրեական օրենսգրքի 177 հոդվածի 2-րդ մասի սանկցիայով նախատեսված է պատիժ նաև ազատազրկման ձևով, իսկ ՀՀ քրեական օրենսգրքի 258 հոդվածի 1-ին մասի սանկցիայով նախատեսված է պատիժ նաև կալանքի ձևով, դատարանը գտնում է, որ պատժի նպատակներին հասնելու համար ամբաստանյալ Արտյոմ Հմայակի Ամրոյանի նկատմամբ ՀՀ քրեական օրենսգրքի 34-177 հոդվածի 2-րդ մասի 3-րդ կետով նախատեսված հանցանք կատարելու համար պատիժ պետք է նշանակել ազատազրկման ձևով, իսկ ՀՀ քրեական օրենսգրքի 258 հոդվածի 1-ին մասով նախատեսված հանցավոր արարք կատարելու համար պատիժ պետք է նշանակել կալանքի ձևով:
Դատարանը գտնում է, որ ամբաստանյալ Արտյոմ Ամրոյանի նկատմամբ պատիժ նշանակելիս պետք է ղեկավարվել ՀՀ քրեական օրենսգրքի 67.1 հոդվածի 2-րդ մասով, համաձայն որի ՙ … Հանցագործությունների վտանգավոր ռեցիդիվի համար նշանակված պատիժը չի կարող պակաս լինել սույն օրենսգրքի Հատուկ մասի համապատասխան հոդվածի սանկցիայով նախատեսված առավելագույն պատժի երկու երրորդից՚:
ՀՀ քրեական օրենսգրքի 177 հոդվածի 2-րդ մասի սանկցիայով նախատեսված առավելագույն պատիժը հինգ տարի ժամկետով ազատազրկումն է:
ՀՀ քրեական օրենսգրքի 258 հոդվածի 1-ին մասի սանկցիայով նախատեսված առավելագույն պատիժը մեկ ամիս ժամկետով կալանքն է:
ՀՀ քրեական օրենսգրքի 65 հոդվածի 3-րդ մասի համաձայն, հանցափորձի համար ազատազրկման ձևով պատժի ժամկետը չի կարող գերազանցել սույն օրենսգրքի Հատուկ մասի համապատասխան հոդվածով կամ հոդվածի մասով որոշակի ժամկետով ազատազրկման ձևով նախատեսված պատժի առավելագույն ժամկետի երեք քառորդը:
Նույն հոդվածի 4.1 մասի համաձայն, սույն հոդվածի երկրորդ և երրորդ մասերով նախատեսված կանոնները չեն կիրառվում հանցագործությունների ռեցիդիվի, վտանգավոր և առանձնապես վտանգավոր ռեցիդիվի դեպքում պատիժ նշանակելիս:
Համաձայն Արագածոտնի մարզի ընդհանուր իրավասության դատարանի թիվ ԱՐԱԴ/0028/01/14 քրեական գործով 2015 թվականի փետրվարի 5-ին կայացված դատավճռի, Արտյոմ Հմայակի Ամրոյանը մեղավոր է ճանաչվել ՀՀ քրեական օրենսգրքի 34-138 հոդվածի 1-ին մասով և դատապարտվել ազատազրկման 3 (երեք) տարի 3 (երեք) ամիս ժամկետով: Արտյոմ Հմայակի Ամրոյանի նկատմամբ ՀՀ քրեական օրենսգրքի 34-138 հոդվածի 1-ին մասով ազատազրկման ձևով նշանակված` 3/երեք/ տարի 3/երեք/ ամիս ժամկետով պատժին ՀՀ քրեական օրենսգրքի 69-րդ հոդվածով սահմանված կարգով հաշվակցվել է 3/երեք/ օր արգելանքի տակ գտնվելու ժամկետը և վերջնական թողնվել է կրելու ազատազրկում` 3 /երեք/ տարի 2 /երկու/ ամիս 27 /քսանյոթ օր/:
Նման պայմաններում դատարանը գտնում է, որ Արտյոմ Ամրոյանի նկատմամբ վերջնական պատիժ պետք է նշանակել ՀՀ քրեական օրենսգրքի 67 հոդվածի կանոններով:
ՀՀ քրեական օրենսգրքի 67 հոդվածի համաձայն` եթե դատավճիռ կայացնելուց հետո, բայց մինչև պատժի լրիվ կրելը դատապարտյալը նոր հանցանք է կատարել, ապա դատարանը նոր դատավճռով նշանակված պատժին լրիվ կամ մասնակիորեն գումարում է նախորդ դատավճռով նշանակված պատժի չկրած մասը:
Ամբաստանյալ Արտյոմ Ամրոյանը նշանակվող պատիժը պետք է կրի ՀՀ ԱՆ համապատասխան քրեակատարողական հիմնարկում:
Անդրադառնալով Արտյոմ Ամրոյանի խափանման միջոցի հարցին, դատարանը գտնում է, որ նրա նկատմամբ որպես խափանման միջոց ընտրված չհեռանալու մասին ստորագրությունը պետք է վերացնել, նկատի ունենալով, որ վերջինս արդեն իսկ գտնվում է անազատության մեջ` կրելով Արագածոտնի մարզի ընդհանուր իրավասության առաջին ատյանի դատարանի 05.02.2015թ.-ի դատավճռով ազատազրկման ձևով նշանակված պատիժը:
Անդրադառնալով իրեղեն ապացույցների տնօրինման հարցին, դատարանը գտնում է, որ Արաբկիր վարչական շրջանի քննչական բաժնի քննիչի 2015թ. փետրվարի 15-ի որոշմամբ իրեղեն ապացույց ճանաչված, Երևան քաղաքի Հր.Քոչարի փողոցի 23 շենքի 2-րդ մուտքի նկուղի դռան վրայից առգրավված կախովի փականը և Ա.Ամրոյանի մոտից առգրավված ամրանը պետք է ոչնչացնել:
Դատարանը գտնում է, որ տուժող Արմեն Հակոբյանի քաղաքացիական հայցի հարցը պետք է համարել լուծված, նկատի ունենալով, որ նա ամբաստանյալի նկատմամբ որևէ նյութական պահանջ չունի, որի մասին տուժողը հայտնել է դատաքննության ժամանակ:
Դատարանը գտնում է, որ Քանաքեռ-Զեյթուն վարչական շրջանի քննչական բաժնի ավագ քննիչի 19.06.2015թ.-ի որոշմամբ ապացույց ճանաչված այլ փաստաթուղթ հանդիսացող` քրեական գործի նյութերում առկա ՙPRINCO՚ տեսակի լազերային սկավառակը պետք է պահել սույն քրեական գործի հետ:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 365, 369-372 հոդվածներով, դատարանը

Վ Ճ Ռ Ե Ց


Արտյոմ Հմայակի Ամրոյանին մեղավոր ճանաչել ՀՀ քրեական օրենսգրքի 34-177 հոդվածի 2-րդ մասի 3-րդ կետով և ՀՀ քրեական օրենսգրքի 258 հոդվածի 1-ին մասով նախատեսված հանցանքներ կատարելու մեջ:
ՀՀ քրեական օրենսգրքի 34-177 հոդվածի 2-րդ մասի 3-րդ կետով Արտյոմ Հմայակի Ամրոյանին դատապարտել ազատազրկման 3 (երեք) տարի 6 (վեց) ամիս ժամկետով: ՀՀ քրեական օրենսգրքի 258 հոդվածի 1-ին մասով Արտյոմ Հմայակի Ամրոյանին դատապարտել կալանքի 1 (մեկ) ամիս ժամկետով:
ՀՀ քրեական օրենսգրքի 66 հոդվածի համաձայն, հանցանքների համակցությամբ ազատազրկման և կալանքի ձևով նշանակված պատիժները լրիվ գումարելու միջոցով, Արտյոմ Հմայակի Ամրոյանի նկատմամբ պատիժ նշանակել ազատազրկում 3 (երեք) տարի 7 (յոթ) ամիս ժամկետով:
ՀՀ քրեական օրենսգրքի 67 հոդվածի համաձայն, դատավճիռների համակցությամբ նշանակված պատժին մասնակիորեն գումարել Արագածոտնի մարզի ընդհանուր իրավասության առաջին ատյանի դատարանի 2015 թվականի փետրվարի 5-ի դատավճռով նշանակված պատիժը` 3 (երեք) տարի 2 (երկու) ամիս 27 (քսանյոթ օր) ժամկետով ազատազրկումը և Արտյոմ Հմայակի Ամրոյանի նկատմամբ վերջնական պատիժ նշանակել ազատազրկում 4 (չորս) տարի ժամկետով:
Արտյոմ Հմայակի Ամրոյանի նկատմամբ նշանակված պատժի սկիզբը հաշվել 2015 թվականի մայիսի 29-ից, որը պետք է կրի ՀՀ ԱՆ համապատասխան քրեակատարողական հիմնարկում:
Արտյոմ Ամրոյանի նկատմամբ սույն քրեական գործով ընտրված խափանման միջոցը` չհեռանալու մասին ստորագրությունը, վերացնել:
Տուժող Արմեն Հակոբյանի քաղաքացիական հայցի հարցը համարել լուծված:
Դատավճիռն օրինական ուժի մեջ մտնելուց հետո, իրեղեն ապացույց հանդիսացող` Երևան քաղաքի Հր.Քոչար փողոցի 23 շենքի 2-րդ մուտքի նկուղի դռան վրայից առգրավված կախովի փականը և Ա.Ամրոյանի մոտից առգրավված ամրանը ոչնչացնել:
Ապացույց ճանաչված, այլ փաստաթուղթ հանդիսացող` քրեական գործի նյութերում առկա ՙPRINCO՚ տեսակի լազերային սկավառակը պահել սույն քրեական գործի հետ:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր` Լ. Ավետիսյան