Գործ No ԵԱՔԴ/0219/01/14

ՈՐՈՇՈՒՄ

ՔՐԵԱԿԱՆ ՊԱՏԱՍԽԱՆԱՏՎՈՒԹՅՈՒՆԻՑ ԱԶԱՏԵԼՈՒ ԵՎ
ԲԺՇԿԱԿԱՆ ԲՆՈՒՅԹԻ ՀԱՐԿԱԴՐԱԿԱՆ ՄԻՋՈՑՆԵՐ ԿԻՐԱՌԵԼՈՒ ՄԱՍԻՆ

ՙ20՚ հունվարի 2015թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը

նախագահությամբ` դատավոր Ա.Մկրտչյանի
քարտուղարությամբ` Օ.Կիրակոսյանի
մասնակցությամբ`
դատախազ Լ.Մանուկյանի
պաշտպան Ի.Պետրոսյանի
օրինական ներկայացուցիչ Գ.Ավագյանի

Դռնբաց դատական նիստում քննեց Գարի Գրիգորի Մխիթարյանի /ծնված 27.01.1970թ. Վրաստանի Հանրապետությունում, հայ, ՀՀ քաղաքացի, թերի-բարձրագույն կրթությամբ, ամուսնացած, չի աշխատում, հաշվառված ք.Երևան, Օրբելի 33ա շենք 32 բնակարան/ նկատմամբ բժշկական բնույթի հարկադրական միջոցներ կիրառելու մասին վարույթը:

Վարույթի դատավարական նախապատմությունը
2014 թվականի օգոստոսի 21-ին հարուցվել է, թիվ 14807814 քրեական գործը:
2014 թվականի օգոստոսի 22-ին Գարի Մխիթարյանը ձերբակալվել է:
2014 թվականի սեպտեմբերի 24-ին Գ.Մխիթարյանին մեղադրանք է առաջադրվել, նրա նկատմամբ որպես խափանման միջոց է ընտրվել կալանավորումը:
2014 թվականի հոկտեմբերի 25-ին Գ.Մխիթարյանի անմեղսունակության վերաբերյալ ստացիոնար դատահոգեբուժական փորձաքննության եզրակացությունը ստացվել է, նրա նկատմամբ ընտրված խափանման միջոցը վերացվել է:
2014 թվականի դեկտեմբերի 26-ին բժշկական բնույթի հարկադրական միջոցներ կիրառելու մասին որոշում է կայացվել Երևան քաղաքում:
2014 թվականի դեկտեմբերի 29-ին Գարի Մխիթարյանի նկատմամբ բժշկական բնույթի հարկադրական միջոցներ կիրառելու վերաբերյալ գործն ուղարկվել է Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:

Վարույթի փաստական հանգամանքները
2014 թվականի օգոստոսի 21-ին Գուրգեն Ալեքսանդրի Հակոբյանը առանց իրացնելու նպատակի, Երևան քաղաքի Օրբելի փողոցում բնակվող ոմն Գարիկից 18.000 ՀՀ դրամով ապօրինի ձեռք է բերել և իր մոտ պահել զգալի չափերով 0,8 գրամ հաստատուն քաշով մարիխուանա տեսակի թմրամիջոց:
Նույն օրը ժամը 13.30-ին ոստիկանության Արաբկիրի բաժնի աշխատակիցների կողմից Գուրգեն Ալեքսանդրի Հակոբյանը թմրամիջոց պահելու և օգտագործելու կասկածանքով բերման է ենթարկվել ոստիկանության բաժին և անձնական խուզարկությամբ նրա հագին եղած տաբատի հետևի աջ գրպանում առկա սև կաշվե դրամապանակից հայտնաբերվել է զգալի չափի` 0,8 գրամ հաստատուն քաշով չորացված մարիխուանա տեսակի թմրամիջոց:


Ապացույցների հետազոտում և գնահատում
Վկա Գուրգեն Հակոբյանը ցուցմունք է տվել այն մասին, որ ինքը միայնակ ապրում է Երևան քաղաքի Մխիթար Հերացի 24 շենքի 34-րդ բնակարանում: Ներկայումս աշխատանք չունի, իսկ նախկինում աշխատել է որպես տաքսի մեքենայի վարորդ: 2014 թվականի հուլիս և օգոստոս ամիսներին 2 անգամ օգտագործել է մարիխուանա տեսակի թմրամիջոց, իսկ նախկինում որևէ թմրամիջոց չի օգտագործել: Ինքը ճանաչում է Երևան քաղաքի Օրբելի 33 հասցեի բնակիչ Գարի Մխիթարյանին, որը հիշյալ շենքի հարևանությամբ ունի ավիատոմսերի վաճառք իրականացնող գրասենյակ: Վերջինիս շատերը, այդ թվում ինքը դիմում են Գարիկ անունով: Նրան ինքը ճանաչում է շուրջ 3-4 տարի, քանի որ նախկինում բնակվել է Օրբելի 33 շենքում և Գարին եղել է իր հարևանը: Ինքը շուրջ մեկ ամիս առաջ ցանկացել է մարիխունա տեսակի թմրամիջոց օգտագործել: Լսել էի Օրբելիի թաղամասում պտտվող լուրերից, ստույգ ումից չի հիշում, որ Գարին ունենում է մարիխուանա տեսակի թմրամիջոց և վաճառում այն: 2014 թվականի օգոստոսի 21-ին նա ցանկացել է մարիխուանա ծխել: Թմրամիջոց ձեռք բերելու նպատակով հեռախոսակապի միջոցով կապնվել է Գարիի հետ: Հեռախոսազրույցի ժամանակ Գարին ի պատասխան հայտնել է, որ կարող է իրեն թմրամիջոց տալ: Դրանց հետ ինքը պատահական տաքսի մեքենայով, ժամը 13-ի սահմաններում գնացել է Գարիի ավիատոմսերի վաճառքի գրասենյակ, որտեղ երկուսով հանդիպել են: Ինքը հարցրել է որքան թմրամիջոց կարող է վերցնել, Գարին էլ պատասխանել է, որ մի փաթեթ կարող է տալ: Ինքը համաձայնվել է, գրասենյակում Գարին իրեն է տվել մի թափանցիկ պոլիէթիլենային փաթեթ, որի մեջ առկա է եղել չորացված և մանրացված մարիխուանա տեսակի թմրամիջոց: Ինքն այն վերցրել ու 18.000 դրամ տալով Գարին դուրս է եկել: Գարին իրենից գումար չի պահանջել, ինքը այդքան է տվել կարծելով, որ բավական է: Վաճառակետից դուրս գալուց և քիչ հեռանալուց անմիջապես հետո իրեն են մոտեցել ոստիկանության աշխատակիցները, ներկայացել են, ապա բերման ենթարկել ոստիկանության Արաբկիրի բաժին: Ինքը թմրամիջոցը պահել էր գրպանում` դրամապանակի մեջ, որն իր անձնական խուզարկությամբ հայտնաբերել են: Ինքն էլ հայտնել է, որ հայտնաբերված բուսական զանգվածը հանդիսանում է մաիրխուանա տեսակի թմրամիջոց է և այն ինքը սեփական օգտագործաման համար ձեռք է բերել Գարի Մխիթարյանից:
/Հատոր 1 գ.թ. 30-32; 228/

24.08.2014 թվականին Գուրգեն Հակոբյանի և Գարի Մխիթարյանի միջև կատարված առերես հարցաքննության ժամանակ Գուրգեն Հակոբյանը պնդել է իր ցուցմունքները:
/Հատոր 1 գ.թ. 169-171/

Գործով վկա որպես մեղադրյալ հարցաքննված Արամ Ղազարյանի ցուցմունքով այն մասին, որ, ինքն ընտանիքի հետ ապրում է Երևան քաղաքի Մազմանյան 5/9 շենք 79 հասցեում գտնվող բնակարանում: Ներկա պահին չի աշխատում: Սովորում է Երևան քաղաքի պետական ագրարային համալսարանի ագրոբիզնես-շուկայաբանություն ֆակուլտետում` 1-ին կուրսում: Վերջին մեկ ամսում օգտագործել է մարիխուանա տեսակի թմրամիջոց: Նախկինում նման հակումներ չի ունեցել: Ճանաչում է Երևան քաղաքի Օրբելի 33ա հասցեի բնակիչ Գարի Մխիթարյանին, որին շատերը Գարիկ են կոչում: Իրեն հայտնի է, որ Գարին ավիատոմսերի վաճառակետ ունի Երևան քաղաքի Օրբելի 33 շենքի հարևանությամբ: Նրան ճանաչում է մանկուց, քանի որ նախկինում ինքը ևս բնակվել է Օրբելի 33ա շենքում: Թաղամասում պտտվող լուրերից, ստույգ ումից չի մտաբերում, տեղեկացել է, որ Գարի Մխիթարյանը մարիխուանա տեսակի թմրամիջոց է վաճառում: Որոշել է փորձել մարիխուանա ծխելը և մի քանի անգամ Գարի Մխիթարյանից, յուրաքանչյուր անգամ 15.000 ՀՀ դրամի դիմաց գնել է թմրամիջոց, արդեն չորացված և մանրացված վիճակում` թափանցիկ պոլիէթիլենային փաթեթի մեջ լցված: 2014 թվականի օգոստոսի 21-ին, երեկոյան կրկին թմրամիջոց գնելու նպատակով գնացել է Գարիի հիշյալ գրասենյակ ու նույն նախապայմաններով` 15.000 ՀՀ դրամով գնել է մարիխուանա տեսակի թմրամիջոց: Երբ դուրս է եկել գրասենյակից Օրբելի 33 հասցեի մոտակայքում պատահմամբ հանդիպել է ընկերոջը` Հայկ Բադալյանին, զրուցել են և խոսակցության ժամանակ ասել է, որ ինքը Գարիից մարիխուանա է գնել: Հայկը հարցրել է կարող են Գարիից կրկին մարիխուանա գնել իր համար, ի պատասխան նա ասել է, որ չգիտի, սակայն կարող են գնալ և ճշտել թմրամիջոց կա, թե ոչ: Հայկը համաձայնվել է: Այնուհետև իրենք միասին գնացել են վերը նշված գրասենյակ: Գարի Մխիթարյանին հանդիպել են գրասենյակի մուտքի մոտ: Ինքը հարցրել է Գարին մարիխուանա ունի, կարող է վաճառել, նա էլ պատասխանել է այո, ինչը լսելով Հայկը նրան տվել է` 15.000 ՀՀ դրամ գումար, որից հետո երեքով մտել են գրասենյակ և Գարիին Հայկին տվել է մեկ թափանցիկ պոլիէթիլենային փաթեթով չորացված, մանրացված մարիխուանա տեսակի թմրամիջոց: Որը վերցնելով իրենք դուրս են եկել, փոքր-ինչ զրուցել են, ապա բաժանվել: Դրանից հետո իրեն են մոտեցել ոստիկանության աշխատակիցները, ներկայացել են և բերման ենթարկել Արաբկիրի ոստիկանության բաժին, որտեղ իր մոտից անձնական խուզարկությամբ հայտնաբերել են Գարի Մխիթարյանից գնած մարիխուանա տեսակի թմրամիջոցը:
/Հատոր 1 գ.թ. 102-104; 240/

Գործով վկա որպես մեղադրյալ հարցաքննված Հայկ Բադալյանի ցուցմունքով այն մասին, որ ընտանիքի հետ ապրում է Երևան քաղաքի Դավթաշեն 3 թաղամասի 24 շենքի 3ա բնակարանում: Ինքը ճանաչում է Արամ Ղազարյանին և նրա հետ գտնվում է մտերիմ` ընկերական փոխհարաբերությունների մեջ: 2014 թվականի օգոստոսի 21-ին երեկոյան, ստույգ ժամը չի հիշում, անձնական գործերով այցելել է Երևան քաղաքի Օրբելի փողոց: Նույն ժամանակ Օրբելի 33 շենքի մոտակայքում հանդիպել է Արամ Ղազարյանին: Բարևել են, խոսել առօրեական թեմաներից: Խոսակցության մեջ Արամը հայտնել է, որ ոմն Գարիկից մարիխուանա է գնել, ինքն էլ պատասխանել է, որ նույնպես կցանկանա թմրամիջոց գնել, արդյոք հնարավոր է Գարիկը իրեն էլ մարիխուանա վաճառի: Արամը պատասխանել է, որ չգիտի, սակայն մոտ է կարող են միասին գնալ, հանդիպել Գարիկին և հարցնել: Ինքը համաձայնվել է և միասին գնացել են Օրբելի 33 շենքի մոտ ավիատոմսերի վաճառքով զբաղվող գրասենյակ, երբ հասել են գրասենյակի մոտ նկատել է մուտքի դիմաց կանգնած է մի տղամարդու: Արամը խոսել է նրա հետ և ինքը խոսակցությունից հասկացել է, որ այդ տղամարդը հանդիսանում է Գարիկը, որը ինչպես հետագայում իմացել է Գարի Մխիթարյանն է: Ինքը ոչինչ չի ասել, խոսել է Արամը, ներկայացրել իրեն որպես իր ընկեր` հարցրել արդյոք կարող են մարիխուանա գնել և Գարի Մխիթարյանը պատասխանել է, որ կարող են: Ինքը նախապես Արամից տեղեկանալով, որ Գարին մարիխուանա տեսակի թմրամիջոցը վաճառում է մի փաթեթը 15.000 ՀՀ դրամով և լսելով, որ վերջինս պատրաստակամ է թմրամիջոց վաճառել 15.000 ՀՀ դրամ գումար է տվել նրան, որն էլ Գարին առանց որևէ բան ասելու վերցրել է, ապա երեքով մտել են հիշյալ գրասենյակ, որտեղ ոչ ոք չի եղել և գրասենյակում Գարին իրեն է տվել պոլիէթիլենային թափանցիկ փաթեթի մեջ լցված չորացված, մանրացված մարիխուանա տեսակի թմրամիջոց: Այն վերցնելով ինքը և Արամը դուրս են եկել: Գնած թմրամիջոցը ինքը դրել է տաբատի գրպանը: Դրանից հետո Արամի հետ փոքր-ինչ զրուցել են, ապա բաժանվել: Այնուհետև իր ՙՕպել՚ մակնիշի, 29 SU 163 հաշվառման համարանիշի ավտոմեքենայով միայնակ ուղևորվել է Կիևյան փողոց և այնտեղ կայանել մեքենան, հենց այդ պահին իրեն մոտեցել են ոստիկանները, ներկայացել և բերման են ենթարկել Արաբկիրի ոստիկանության բաժին, որտեղ իր մոտ անձնական խուզարկությամբ հայտնաբերել են Գարիկից գնած 1 գրամ հաստատուն քաշով մարիխուանա տեսակի թմրամիջոցը:
Միաժամանակ Հայկ Բադալյանը իր ցուցմունքում նշել է, որ մինչ 21.08.2014 թվականին թմրամիջոց գնելը չի ճանաչել Գարի Մխիթարյանին և նրան հայտնի չի եղել, որ վերջինս ավիատոմսերի վաճառքի գրասենյակում թմրամիջոց է վաճառում:
/Հատոր 1 գ.թ. 140-141; 214/

19.09.2014 թվականին Հայկ Բադալյանի և Գարի Մխիթարյանի միջև կատարված առերես հարցաքննության ժամանակ Հայկ Բադալյանը պնդել է իր ցուցմունքները:
/Հատոր 2 գ.թ. 30-31/

Գործով վկա Վահագն Մխիթարյանի ցուցմունքով այն մասին, որ ինքը 2014 թվականի օգոստոսի 21-ին գիշերը իր ավտոմեքենայով երթևեկելիս է եղել Երևան քաղաքի Օրբելի փողոցով, այդ ժամանակ իրեն կանգնացրել են ոստիկանության աշխատակիցները և խնդրել որպես ընթերակա մասնակցել խուզարկության: Ինքը համաձայնվել է և գնացել ոստիկանների հետ: Դրանից հետո ինքը ոստիկանների հետ մտել է Երևան քաղաքի Օրբելի 33 հասցեում գտնվող շենքի մոտակայքում առկա ավատոմսերի վաճառքի գրասենյակ, որտեղ իրեն և մեկ այլ անծանոթ անձի բացատրել են ընթերակայի իրավունքները: Դրանից հետո գրասենյակի տնօրեն ոմն Գարիկի մասնակցությամբ ոստիկանները խուզակել են հիշյալ գրասենյակը ու այդ ժամանակ գրասենյակի հետնամասում առկա 2-րդ սենյակում գտնվող բազկաթոռի միջից հայտնաբերել են 7 փոքր փաթեթներով կանաչավուն զանգված, դրանք հենց այդ փաթեթեներվ կշռել են և քաշը կազմել է 9.3 գրամ: Այդ փաթեթները ոստիկանների կողմից փաթեթավորվել և կնիքվել են, խուզարկության մասին կազմվել է արձանագրություն, որի տակ ստորագրելուց հետո ինքը հեռացել է:
/Հատոր 1 գ.թ. 159-161/

2014 թվականի օգոստոսի 21-ին փաստացի Գարի Մխիթարյանին պատկանող Երևան քաղաքի Օրբելի 33 շենքի հարևանությամբ գտնվող ավիատոմսերի վաճառքի գրասենյակում կատարված խուզարկության արձանագրությամբ, գրասենյակի հետնամասում գտնվող սենյակում առկա բազկաթոռի ձախ բռնակի և նստատեղի միջև առկա հատվածից հայտնաբերվել և առգրավվել է խոշոր չափ հանդիսացող 7.22 գրամ հաստատուն քաշով 7 թափանցիկ պոլիէթիլենային փաթեթներում փաթեթավորված մարիխուանա տեսակի թմրամիջոց:
/Հատոր 1 գ.թ. 51-52/

2014 թվականի օգոստոսի 21-ին Արաբկիրի ոստիկանության բաժնում կատարված Գուրգեն Հակոբյանի անձնական խուզարկության արձանագրությամբ, որի ժամանակ վերջինիս հագին եղած սև ջինսե տաբատի հետևի աջ գրպանում առկա սև կաշվե դրամապանակի միջից հայտնաբերվել է զգալի չափի` 0,8 գրամ հաստատուն քաշով չորացված մարիխուանա տեսակի թմրամիջոց: Գուրգեն Հակոբյանը նույն ժամանակ հայտնել է, որ հայտնաբերված զանգվածը հանդիսանում է մարիխուանա տեսակի թմրամիջոց, այն ինքը սեփական օգտագործման համար 18.000 ՀՀ դրամի դիմաց ձեռք է բերել Երևան քաղաքի Օրբելի 33 հասցեի բնակիչ` ոմն Գարիկից:
/Հատոր 1 գ.թ. 6/

2014 թվականի օգոստոսի 21-ին Արաբկիրի ոստիկանության բաժնում կատարված Արամ Արթուրի Ղազարյանի անձնական խուզարկության արձանագրությամբ, վերջինիս մոտից հայտնաբերվել է զգալի չափ հանդիսացող` 1.21 գրամ հաստատուն քաշով չորացված մարիխուանա տեսակի թմրամիջոց: Արամ Ղազարյանը նույն ժամանակ հայտնել է, որ հայտնաբերված զանգվածը հանդիսանում է մարիխուանա տեսակի թմրամիջոց և այն ինքը սեփական օգտագործման համար 21.08.2014 թվականին 15.000 ՀՀ դրամի դիմաց ձեռք է բերել Երևան քաղաքի Օրբելի 33 հասցեի բնակիչ` ոմն Գարիկից:
/Հատոր 1 գ.թ. 76/

2014 թվականի օգոստոսի 21-ին Արաբկիրի ոստիկանության բաժնում կատարված Հայկ Սուրենի Բադալյանի անձնական խուզարկության արձանագրությամբ, վերջինիս հագին եղած կապույտ ջինսե տաբատի աջ գրպանից հայտնաբերվել է զգալի չափ հանդիսացող` 1 գրամ հաստատուն քաշով չորացված մարիխուանա տեսակի թմրամիջոց: Հայկ Բադալյանը հայտնել է, որ հայտնաբերված զանգվածը հանդիսանում է մարիխուանա տեսակի թմրամիջոց, այն ինքը սեփական օգտագործման համար 15.000 ՀՀ դրամի դիմաց ձեռք է բերել Երևան քաղաքի Օրբելի 33 հասցեի բնակիչ` ոմն Գարիկից:
/Հատոր 1 գ.թ. 114/

Համաձայն դատաքիմիական փորձաքննության թիվ 521 Ք-14 եզրակացության, փորձաքննությանը ներկայացված փաստացի Գարի Մխիթարյանին պատկանող ավիատոմեսրի վաճառքի գրասենյակից հայտնաբերված ընդհանուր 7.22 գրամ հաստատուն քաշով բուսական զանգվածը հանդիսանում է մարիխուանա տեսակի թմրամիջոց:
/Հատոր 1 գ.թ. 248-249/

Դատաքիմիական փորձաքննության թիվ 501 Ք-14 եզրակացության, համաձայն Գուրգեն Հակոբյանից հայտնաբերված և փորձաքննությանը ներկայացված 0.8 գրամ հաստատուն քաշով բուսական մանրացված զանգվածը հանդիսանում է մարիխուանա տեսակի թմրամիջոց:
/Հատոր 1 գ.թ. 14-15/

Դատաքիմիական փորձաքննության թիվ 503 Ք-14 եզրակացության, համաձայն Արամ Ղազարյանի մոտից հայտնաբերված և փորձաքննությանը ներկայացված 1.21 գրամ հաստատուն քաշով բուսական մանրացված զանգվածը հանդիսանում է մարիխուանա տեսակի թմրամիջոց:
/Հատոր 1 գ.թ 90-91/


Դատաքիմիական փորձաքննության թիվ 502 Ք-14 եզրակացության, համաձայն Հայկ Բադալյանի մոտից հայտնաբերված և փորձաքննությանը ներկայացված 1 գրամ հաստատուն քաշով բուսական մանրացված զանգվածը հանդիսանում է մարիխուանա տեսակի թմրամիջոց:
/Հատոր 1 գ.թ. 126-127/

Դատատոքսիկոքիմիական փորձաքննության թիվ 0579 եզրակացության, համաձայն փորձաքննությանը տրամադրված 22.08.2014 թվականի Գաիր Գրիգորի Մխիթարյանի մեզի փորձանմուշում հայտնաբերվել են կանաբինոիդների խմբի թմրամիջոցների թմրալկոլոիդներ:
/Հատոր 2 գ.թ. 106/

Դատատոքսիկոքիմիական փորձաքննության թիվ 0577 եզրակացության, համաձայն փորձաքննությանը տրամադրված 22.08.2014 թվականի Գուրգեն Ալեքսանդրի Հակոբյանի մեզի փորձանմուշում հայտնաբերվել են կանաբինոիդների խմբի թմրամիջոցների թմրալկոլոիդներ:
/Հատոր 2 գ.թ. 104/

Դատատոքսիկոքիմիական փորձաքննության թիվ 0576 եզրակացության, համաձայն փորձաքննությանը տրամադրված 22.08.2014 թվականի Արամ Արթուրի Ղազարյանի մեզի փորձանմուշում հայտնաբերվել են կանաբինոիդների խմբի թմրամիջոցների թմրալկոլոիդներ:
/Հատոր 2 գ.թ. 102/

Դատատոքսիկոքիմիական փորձաքննության թիվ 0575 եզրակացության, համաձայն, փորձաքննությանը տրամադրված 22.08.2014 թվականի Հայկ Սուրենի Բադալյանի մեզի փորձանմուշում հայտնաբերվել են կանաբինոիդների խմբի թմրամիջոցների թմրալկոլոիդներ:
/Հատոր 2 գ.թ. 100/

Ստացիոնար դատահոգեբուժական փորձաքննության թիվ 108 եզրակացության, համաձայն փորձագիտական հանձնաժողովի կողմից վերլուծվելով քրեական գործի նյութերը, առկա բուժփաստաթղթերը և ներկա հետազոտման արդյունքները փորձագիտական հանձնաժողովը եզրակացրել է, որ Գարի Գրիգորի Մխիթարյանը 1997 թվականից տառապել և տառապում է ՙԽրոնիկական զառանցական /շիզոֆրենանման/ խանգարում՚ հոգեկան հիվանդությամբ: Ինչպես հանցանքը կատարելուց առաջ, այնպես էլ հանցանքի պահին և դրանից հետո նա գտնվել է վերը նշված հիվանդագին խանգարված վիճակում, որը կրում է խրոնիկ ընթացք, իսկ լավացումները /ռեմիսիաները/ նրա մոտ կրում են դեղորայքային ոչ ստաբիլ բնույթ: Այդ մասին են վկայում ինչպես անամնեստիկ տվյալները, այնպես էլ ներկա հետազոտման արդյունքները: Իրավախախտումը կատարելիս փորձաքննվողը գտնվել է վերը նշված հիվանդագին խանգարված վիճակում, որը զրկել է նրան իր գործողությունների վտանգավորությունը գիտակցելու և դրանք ղեկավարելու ընդունակություններից: Ներկայումս նա նույնպես չի կարող գիտակցել իր գործողությունների վտանգավորությունը և ղեկավարել դրանք: Ոստի իրեն մեղսագրվող արարքում Գարի Մխիթարյանին հարկ է ճանաչել անմեղսունակ: Ներկա հոգեկան վիճակով նա չի կարող մասնակցել դատաքննչական գործողություններին, կարիք ունի հարկադիր բուժման ընդհանուր հսկողության հոգեբուժական բաժանմունքի պայմաններում, որի համար հակացուցումներ չկան:
/Հատոր 2 գ.թ. 128-132/

21.08.2014 թվականին, ժամը 22:20-ին թմրամիջոց ապօրինի իրացնելու կասկածանքով Երևան քաղաքի Օրբելի 33 հասցեից Գարի Մխիթարյանին ոստիկանության Արաբկիրի բաժին բերման ենթարկելու մասին արձանագրությամբ:
/Հատոր 21 գ.թ. 43/

21.08.2014 թվականին, ժամը 13:30-ին թմրամիջոց պահելու և օգտագործելու կասկածանքով Երևան քաղաքի Օրբելի 33 շենքի մոտակայքից Գուրգեն Հակոբյանին ոստիկանության Արաբկիրի բաժին բերման ենթարկելու մասին արձանագրությամբ:
/Հատոր 1 գ.թ. 5/

21.08.2014 թվականին, ժամը 22:00-ին թմրամիջոց պահելու և օգտագործելու կասկածանքով Երևան քաղաքի Օրբելի 33 հասցեում գտնվող շենքի մոտակայքից Արամ Ղազարյանին ոստիկանության Արաբկիրի բաժին բերման ենթարկելու մասին արձանագրությամբ:
/Հատոր 1 գ.թ. 75/

21.08.2014 թվականին, ժամը 21:00-ին թմրամիջոց պահելու և օգտագործելու կասկածանքով Երևան քաղաքի Կիևյան 2 շենքի մոտակայքից Հայկ Բադալյանին ոստիկանության Արաբկիրի բաժին բերման ենթարկելու մասին արձանագրությամբ:
/Հատոր 1 գ.թ. 113/

Դեպքի վայր հանդիսացող Երևան քաղաքի Օրբելի 33 հասցեում գտնվող շենքի հարևանությամբ առկա, փաստացի Գարի Մխիթարյանին պատկանող ավիատոմսերի վաճառքի գրասենյակում 2308.2014 թվականին կատարված զննության արձանագրությամբ:
/Հատոր 1 գ.թ. 143-146/

Իրեղեն ապացույց ճանաչված և քրեական գործին կցված, 21.08.2014 թվականին փաստացի Գարի Մխիթարյանին պատկանող Երևան քաղաքի Օրբելի 33 շենքի հարևանությամբ գտնվող ավիատոմսերի վաճառքի գրասենյակում կատարված խուզարկության հայտնաբերված խոշոր չափ հանդիսացող 7.22 գրամ հաստատուն քաշով մարիխուանա տեսակի թմրամիջոցով:
/Հատոր 2 գ.թ. 182-184/

Դատարանի իրավական վերլուծությունները
Վերոգրյալ ապացույցների հիման վրա դատարանը գալիս է այն եզրահանգման, որ Գարի Մխիթարյանը 2014 թվականի օգոստոսի 21-ին Հայկ Սուրենի Բադալյանը Արամ Ղազարայնի օժանդակությամբ առանց իրացնելու նպատակի, Երևան քաղաքի Օրբելի 33 հասցեում գտնվող ավիատոմսերի վաճառքի գրասենյակում ոմն Գարիկից 15.000 ՀՀ դրամով ապօրինի ձեռք է` բերել և իր մոտ պահել զգալի չափերով 1 գրամ հաստատուն քաշով մարիխուանա տեսակի թմրամիջոց: Նույն օրը ժամը 21:00-ին ոստիկանության Արաբկիրի բաժնի աշխատակիցների կողմից Հայկ Բադալյանը թմրամիջոց պահելու և օգտագործելու կասկածանքով բերման է ենթարկվել ոստիկանության բաժին, ում անձնական խուզարկությամբ հագին եղած տաբատի աջ գրպանից հայտնաբերվել և վերցվել է ընդհանուր 1 գրամ հաստատուն քաշով մարիխուանա տեսակի թմրամիջոց:
Այսպիսով, դատարանը Գ.Մխիթարյանի կողմից կատարած քրեական օրենքով չթույլատրված արարքը ապացուցված է համարում:
Քննության առնելով հանրորեն վտանգավոր արարք կատարելու ժամանակ Գարի Մխիթարյանի մեղսունակության հարցը` դատարանը գտնում է, որ իրավախախտումը կատարելիս վերջինս գտնվել է հիվանդագին խանգարված վիճակում, որը զրկել է նրան իր գործողությունների վտանգավորությունը գիտակցելու և դրանք ղեկավարելու հնարավորությունից և իրեն մեղսագրվող արարքի նկատմամբ Կարեն Մեհրաբյանն անմեղսունակ է:
ՀՀ քրեական դատավարության օրենսգրքի 450-րդ հոդվածի 1-ին մասի համաձայն` բժշկական բնույթի հարկադրական միջոցները դատարանը կիրառում է այն անձանց նկատմամբ, ովքեր քրեական օրենքով չթույլատրված արարքը կատարել են անմեղսունակ վիճակում, եթե այդ անձինք շարունակում են վտանգավոր լինել հասարակության համար:
ՀՀ քրեական դատավարության օրենսգրքի 463-րդ հոդվածի 4-րդ կետի համաձայն` դատարանը պետք է լուծի նաև այն հարցը, թե անձը կարիք ունի արդյոք իր նկատմամբ բժշկական բնույթի հարկադրական միջոցներ կիրառելու և հատկապես ինչպիսի միջոցներ:
ՀՀ քրեական դատավարության օրենսգրքի 464-րդ հոդվածի 1-ին մասի համաձայն` անձի կողմից քրեական օրենքով չթույլատրված արարքն անմեղսունակության վիճակում կատարելն ապացուցված համարելով` դատարանը որոշում է կայացնում անձին քրեական պատասխանատվությունից և պատժից ազատելու ու նրա նկատմամբ բժշկական բնույթի հարկադրական միջոցներ կիրառելու մասին:
ՀՀ քրեական օրենսգրքի 97-րդ հոդվածի 1-ին մասի 1-ին կետի համաձայն` բժշկական բնույթի հարկադրական միջոցներ դատարանը կարող է նշանակել այն անձի նկատմամբ, ով հանցանքը կատարել է անմեղսունակության վիճակում:
ՀՀ քրեական օրենսգրքի 98-րդ հոդվածով դատարանը գտնում է, որ Գարի Մխիթարյանն անմեղսունակության վիճակում կատարել է քրեական օրենքով չթույլատրված արարք և կարիք ունի իր նկատմամբ բժշկական բնույթի հարկադրական միջոցներ կիրառելու:
Նկատի ունենալով, որ Գարի Մխիթարյանն անմեղսունակ է և կարիք ունի հարկադիր բուժման` դատարանը գտնում է, որ նրան պետք է ազատել քրեական պատասխանատվությունից և կիրառել հարկադիր բուժում` հատուկ տիպի հոգեբուժական բաժանմունքի պայմաններում:
Անդրադառնալով իրեղեն ապացույցների տնօրինման հարցին, դատարանը գտնում է, որ իրեղեն ապացույց հանդիսացող 7,22 գրամ հաստատուն քաշով ՙմարիխուանա՚ տեսակի թմրամիջոցը պետք է ոչնչացնել:
Ղեկավարվելով ՀՀ քրեական դատավարության օրենսգրքի 119-րդ, 379-րդ, 450-րդ և 462-464-րդ հոդվածներով` դատարանը



ՈՐՈՇԵՑ

Գարի Գրիգորի Մխիթարյանին ազատել ՀՀ քրեական օրենսգրքի 266-րդ հոդվածի 1-ին և 268-րդ հոդվածի 2-րդ մասի 2-րդ կետով նախատեսված քրեական պատասխանատվությունից և նրա նկատմամբ կիրառել հարկադիր բուժում` հատուկ հսկողության հոգեբուժական բաժանմունքի պայմաններում:
Գործով իրեղեն ապացույց հանդիսացող 7,22 գրամ հաստատուն քաշով ՙմարիխուանա՚ տեսակի թմրամիջոցը ոչնչացնել:
Որոշումը կարող է բողոքարկվել ՀՀ վերաքննիչ քրեական դատարան` հրապարակելու օրվանից հետո մեկամսյա ժամկետում:




ԴԱՏԱՎՈՐ Ա.ՄԿՐՏՉՅԱՆ