Գործ No ԵԱՔԴ/0212/01/14

ԴԱՏԱՎՃԻՌ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՙ21՚ նոյեմբերի 2016 թվական քաղաք Երևան

Երևան քաղաքի Արաբկիր և Քանաքեռ-Զեյթուն վարչական շրջանների առաջին ատյանի ընդհանուր իրավասության դատարանը,

նախագահությամբ` դատավոր Արթուր Մկրտչյանի
քարտուղարությամբ` Շուշան Վանոյանի
Միլենա Սարգսյանի
մասնակցությամբ`
մեղադրողներ Նելլի Աշրաֆյանի
Լիլիթ Մանուկյանի
պաշտպաններ Էդուարդ Աղաջանյանի
Ռուզաննա Սիրեկանյանի

դատարանում, դռնբաց դատական նիստում քննեց քրեական գործն ըստ մեղադրանքի
Արմեն Ազատի Մանուկյանի /ծնված 1966 թվականի հոկտեմբերի 31-ին` Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, չի աշխատում, հաշվառում չունի, փաստացի բնակվող` քաղաք Երևան, Մոլդովական փողոց 60 շենք, 16 բնակարան, նախկինում դատված` 1) Աջափնյակ և Դավթաշեն վարչական շրջանի ընդհանուր իրավասության դատարանի 06.07.2004թ. դատավճռով, ՀՀ քրեական օրենսգրքի 178-րդ հոդվածի 3-րդ մասի 1-ին կետով պատիժ է նշանակվել ազատազրկում 4 տարի ժամկետով, պատժից պայմամական վաղաժամկետ ազատվել է 01.03.2006թ., պատժի չկրած մասը կազմել է 1 տարի 8 ամիս 22 օր, 2) Երևանի քրեական դատարանի 30.07.2008թ. դատավճռով` ՀՀ քրեական օրենսգրքի 178-րդ հոդվածի 2-րդ մասի 3-րդ կետով պատիժ է նշանակվել ազատազրկում 4 տարի ժամկետով, պատժից ազատվել է 21.03.2012թ., դատվածությունը չմարված, ՀՀ ԱՆ ՙԱրմավիր՚ ՔԿՀ դատապարտյալ/, մեղադրվում է ՀՀ քրեական օրենսգրքի 38-312-րդ հոդվածի 1-ին մասով:

Արմինե Ազատի Մանուկյանի /ծնված 1971 թվականի հուլիսի 01-ին` Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնալուծված, դատվածություն չունեցող, աշխատում է ՀՀ միջազգային ասպետաց ակադեմիայում` որպես իրավաբանական բաժնի պետ, հաշվառված` քաղաք Երևան, Ավան, Իսահակյան փողոց, 2/2 շենք, 8-րդ բնակարան, փաստացի բնակվող` քաղաք Երևան, Պ.Տիչինայի 3-րդ նրբանցք, 2/3 տուն/, մեղադրվում է ՀՀ քրեական օրենսգրքի 38-312-րդ հոդվածի 2-րդ մասով և 178-րդ հոդվածի 2-րդ մասի 2-րդ կետով:

Գոհար Սարիբեկի Գյոզալյանի /ծնված 1955 թվականի փետրվարի 17-ին` Երևան քաղաքում, ազգությամբ հայ, ՀՀ քաղաքացի, թերի բարձրագույն կրթությամբ, այրի, չդատված, չի աշխատում, հաշվառված` քաղաք Երևան, Գոգոլի նրբանցք 72, փաստացի բնակվող` քաղաք Երևան, Լեփսիուսի 2-րդ փողոց, 34 տուն, քաղաք Երևան, Վ.Փափազյան փողոց, 1-ին տուն/, մեղադրվում է ՀՀ քրեական օրենսգրքի 34-312-րդ հոդվածի 1-ին և 2-րդ մասերով:

Գործի դատավարական նախապատմությունը

2014 թվականի հունիսի 27-ին ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում ՀՀ քրեական օրենսգրքի 178-րդ հոդվածի 2-րդ մասի 2-րդ կետով հարուցվել է թիվ 09119014 քրեական գործը:
2014 թվականի հուլիսի 10-ին ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վարչական շրջանի քննչական բաժնում ՀՀ քրեական օրենսգրքի 178-րդ հոդվածի 1-ին մասով հարուցվել է թիվ 09120514 քրեական գործը:
2014 թվականի հուլիսի 10-ին թիվ 09120514 քրեական գործը միացվել է թիվ 09119014 քրեական գործին:
2014 թվականի հոկտեմբերի 22-ին Արմինե Ազատի Մանուկյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով, նրա նկատմամբ որպես խափանման միջոց է ընտրվել ստորագրություն` չհեռանալու մասին և հայտարարվել է հետախուզում: Նույն օրը Արմինե Մանուկյանն ինքնակամ ներկայացել է ՀՀ ոստիկանության Քանաքեռ-Զեյթունի բաժին:
2014 թվականի դեկտեմբերի 12-ին Արմինե Մանուկյանին առաջադրված մեղադրանքը փոփոխվել է, նրան նոր մեղադրանք է առաջադրվել ՀՀ քրեական օրենսգրքի 38-312-րդ հոդվածի 2-րդ մասով և 178-րդ հոդվածի 2-րդ մասի 2-րդ կետով և նա ներգրավվել է որպես մեղադրյալ:
2014 թվականի դեկտեմբերի 12-ին Գոհար Սարիբեկի Գյոզալյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 34-312-րդ հոդվածի 1-ին և 2-րդ մասերով և նրա նկատմամբ որպես խափանման միջոց է ընտրվել ստորագրություն` չհեռանալու մասին:
2014 թվականի դեկտեմբերի 12-ին Արմեն Ազատի Մանուկյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 38-312-րդ հոդվածի 1-ին մասով և նրա նկատմամբ որպես խափանման միջոց է ընտրվել ստորագրություն` չհեռանալու մասին:
2014 թվականի դեկտեմբերի 16-ին Արմինե Մանուկյանին առաջադրված մեղադրանքի բովանդակությունը փոփոխվել է և 2014 թվականի դեկտեմբերի 17-ին նա ներգրավվել է որպես մեղադրյալ:
2014 թվականի դեկտեմբերի 16-ին Գոհար Գյոզալյանին առաջադրված մեղադրանքի բովանդակությունը փոփոխվել է և 2014 թվականի դեկտեմբերի 17-ին նա ներգրավվել է որպես մեղադրյալ:
2014 թվականի դեկտեմբերի 26-ին թիվ 09119014 ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների առաջին ատյանի ընդհանուր իրավասության դատարան:

Գործի փաստական հանգամանքները

Նախաքննության մարմինն ամբաստանյալ Արմեն Մանուկյանին ՀՀ քրեական օրենսգրքի 38-312-րդ հոդվածի 1-ին մասով մեղադրանք է առաջադրել, որ ՙԳոհար Սարիբեկի Գյոզալյանին ներկայանալով որպես ԱԱԾ աշխատակից, վերջինիս համոզելով դրդել է 2014թ. ապրիլ ամսին, պաշտոնատար անձին զգալի չափերի` 123.300 ՀՀ դրամին համարժեք 300 ԱՄՆ դոլար գումար կաշառք տալ ՙՍևան՚ ՔԿՀ-ում ազատազրկման մեջ գտնվող նրա որդի Նարեկ Հայրապետի Գյոզալյանին հատուկ պատժախցից ազատելու համար: Այդ պատրվակով 2014թ. ապրիլ ամսին Գ.Գյոզալյանից ստացել է զգալի չափերի` 82.870 ՀՀ դրամին համարժեք 200 ԱՄՆ դոլար և 30.000 ՀՀ դրամ գումար, որևէ պաշտոնատար անձի կաշառք չի տվել և Ն.Գյոզալյանին հատուկ պատժախցից չի ազատել՚:

Ամբաստանյալ Արմինե Մանուկյանին ՀՀ քրեական օրենսգրքի 38-312-րդ հոդվածի 2-րդ մասով և 178-րդ հոդվածի 2-րդ մասի 2-րդ կետով մեղադրանք է առաջադրվել, որ ՙՉունենալով փաստաբանի արտոնագիր, 2014թ. փետրվար ամսին Գոհար Սարիբեկի Գյոզալյանին ներկայանալով որպես փաստաբան, վերջինիս համոզելով դրդել է պաշտոնատար անձին խոշոր չափերի 2.671.500 ՀՀ դրամին համարժեք 6.500 ԱՄՆ դոլար գումար կաշառք տալ` ՙՍևան՚ ՔԿՀ-ում ազատազրկման մեջ գտնվող նրա որդի Նարեկ Հայրապետի Գյոզալյանին պատժից ազատելու համար: Այդ պատրվակով 2014թ. փետրվարի 13-ից մինչև 2014թ. ապրիլի 18-ն ընկած ժամանակահատվածում, չարաշահելով Գ.Գյոզալյանի վստահությունը, վերջինիցս Երևան քաղաքի տարբեր վայրերում, միասնական դիտավորությամբ մաս-մաս վերցրել է խոշոր չափերի հասնող 2.753.700 ՀՀ դրամին համարժեք 6.700 ԱՄՆ դոլար գումար, խարդախությամբ հափշտակել այն և որևէ պաշտոնատար անձի կաշառք չի տվել և Գ.Գյոզալյանին իրավաբանական ծառայություն չի մատուցել՚:

Ամբաստանյալ Գոհար Գյոզալյանին ՀՀ քրեական օրենսգրքի 34-312-րդ հոդվածի 1-ին և 2-րդ մասերով մեղադրանք է առաջադրվել, որ ՙԿաշառք տալու դիտավորությամբ ՙՍևան՚ ՔԿՀ-ում ազատազրկման մեջ գտնվող իր որդի Նարեկ Հայրապետի Գյոզալյանին ազատելու նպատակով, 2014թ. փետրվարի 13-ից մինչև 2014թ. ապրիլի 18-ն ընկած ժամանակահատվածում ցանկացել է Արմինե Ազատի Մանուկյանի միջոցով խոշոր չափերի` 2.671.500 ՀՀ դրամին համարժեք 6.500 ԱՄՆ դոլար գումար կաշառք տալ պաշտոնատար անձին, սակայն իր կամքից անկախ հանգամանքներում հանցագործությունը ավարտին չի հասցրել: Բացի այդ նույն ժամանակահատվածում ցանկացել է նաև Արմեն Ազատի Մանուկյանի միջոցով զգալի չափերի` 82.870 ՀՀ դրամին համարժեք 200 ԱՄՆ դոլար և 30.000 ՀՀ դրամ գումար կաշառք տալ պաշտոնատար անձին` իր որդուն հատուկ պատժախցից ազատելու համար, սակայն իր կամքից անկախ հանգամանքներում հանցագործությունը ավարտին չի հասցրել:

Ապացույցների հետազոտում և գնահատում

Դատաքննության փուլում ամբաստանյալ Արմեն Մանուկյանն առաջադրված մեղադրանքում իրեն մեղավոր չի ճանաչել և դատաքննության փուլում ցուցմունք է տվել, որ ինքը Գ.Գյոզալյանից 300 ԱՄՆ դոլար գումարը չի վերցրել` նրա որդուն ՙկարցեր՚-ից ազատելու համար, ինչպես մեղադրանքում է նշված: Գոհարն իրեն տվել է 270 ԱՄՆ դոլար, սակայն ոչ այդ նպատակով: Ինքը Գոհար Գյոզալյանից պարտքով 7000 ԱՄՆ դոլար գումար է վերցրել և Վրաստանից ավտոմեքենա է գնել, սակայն այն ամբողջությամբ չի վերադարձրել, վերադարձրել է միայն 2500 ԱՄՆ դոլարը: Ամբաստանյալը նշել է, որ Գոհար Գյոզալյանի հետ ծանոթացել է Մարիամի միջոցով, Մարիամը պատմել է Գոհար Գյոզալյանի խնդիրների մասին ինքն էլ Գոհարին ծանոթացրել է Արմինե Մանուկյանի հետ` որպես իրավաբանի, ով կարող է օգնել դիմումներ գրելու հարցում: Ինքը նաև Գոհարին խորհուրդ է տվել` դիմում ուղարկել ՀՀ նախագահին` որդուն ներում շնորհելու խնդրանքով: Ինքը Գոհար Գյոզալյանին պաշտոնատար անձին կաշառք տալուն չի դրդել:
Նախաքննության փուլում Արմեն Ազատի Մանուկյանն իրեն առաջադրված մեղադրանքում մեղավոր է ճանաչել և ցուցմունք է տվել, որ ճանաչում է Գոհար Գյոզալյանին իր ծանոթ Մարինեի միջոցով` 2014թ. հունվար-փետրվար ամիսներրից: Նրանից տեղեկացել է, որ Գ.Գյոզալյանի որդին գտնվում է ազատազրկման մեջ: 2014թ. ապրիլ ամսին ՙՍևան՚ ՔԿՀ-ում ազատազրկման մեջ գտնվող Նարեկ Գյոզալյանին հատուկ պատժախցից ազատելու համար, պաշտոնատար անձին կաշառք տալու պատրվակով Գոհարին դրդել է իրեն 200 ԱՄՆ դոլար և 30.000 ՀՀ դրամ գումար տալ, որը վերցրել է:
գ.թ. 84-89, 331, 350

Ամբաստանյալ Արմինե Մանուկյանն առաջադրված մեղադրանքում իրեն մեղավոր չի ճանաչել և դատաքննության փուլում ցուցմունք է տվել, որ ի սկզբանե չի ճանաչել Գոհար Գյոզալյանին, Արմենի միջոցով տեղեկացել է, որ Գ.Գյոզալյանը ցանկանում է իր հետ խորհրդակցել, ինքը հանդիպել է, խորհրդակցել, նա ցույց է տվել իր փաստաթղթերը, հայտնել է, որ իր տանը եղած գողության վերաբերյալ ցանկանում է բողոքներ ներկայացնել, ինքն էլ պատրաստակամություն է հայտնել օգնելու և բողոքները ներկայացնելու համար: Բացի այդ, օգնել է Գ.Գյոզալյանին դիմումներ գրելու` որդուն ազատելու կամ որոշակի չափով նրա պատիժը մեղմացնելու խնդրանքով: Գ.Գյոզալյանը ցանկացել է լիազորագիր տրամադրել իրեն, սակայն չի ստացվել, ինքը վերադարձրել է Գ.Գյոզալյանի տված 1500 ԱՄՆ դոլարը և ասել, որ ցանկացած պահի պատրաստ է օգնել: Ինքը 1500 ՄԱՆ դոլարը վերցրել է դիմումներ գրելու, խորհրդատվություն տալու և լիազորագրի հետ կապված հարցերը լուծելու համար, սակայն հետագայում այն վերադարձրել է: Դրանից հետո տեղեկացել է, որ Գոհարն Արմենին պարտքով գումար է տվել, որի հետ միասին տվել է նաև իր տված 1500 ԱՄՆ դոլարը: Արմենն ուշացրել է գումարները վերադարձնելը և իրենց միջև վեճ է առաջացել:
Արմինե Մանուկյանը նշել է նաև, որ երբևէ Գ.Գյոզալյանին պաշտոնատար անձին կաշառք տալուն չի դրդել, նրանից գումարներ չի վերցրել:

Նախաքննության փուլում Արմինե Մանուկյանը ցուցմունք է տվել, որ Գոհար Գյոզալյանին ճանաչում է Մարինեի և Արմենի միջոցով: Ինքը Գ.Գյոզալյանից 6.700 ԱՄՆ դոլար գումար չի վերցրել, Գ.Գյոզալյանն իրեն տվել է ընդամենը 1500 ԱՄՆ դոլար, որպեսզի ինքը ներկայացնի Գ.Գյոզալյանի շահերը Մարինեի ծանոթ ոմն Գագիկին տված 6.000 ԱՄՆ դոլարը ետ ստանալու և Գ.Գյոզալյանի բնակարանային գողության հետ կապված: Գ.Գյոզալյանը այդ գործով բողոք ներկայացնելու համար է իրեն տվել այդ գումարը` 10.000 ՀՀ դրամը` Զեյթունում, իսկ 1.400 ԱՄՆ դոլար գումարը Շահումյանում` նոտարական գրասենյակի մոտ: Իրենք ուշացել են, նոտարն արդեն դուրս գալուց է եղել լիազորագրի համար և իրենք Գ.Գյոզալյանի հետ պայմանավորվել են հաջորդ օրը գնալ նոտարական գրասենյակ: Սակայն Գ.Գյոզալյանը իրեն ասել է, որ այդ օրը չի կարող գնալ, հավատքի է: Հետո Գ.Գյոզալյանը իրեն ասել է, որ զանգեն Գագիկին ասեն, որ բողոքելու են, միգուցե վախենա գումարը բերի, իսկ ինքն էլ պատասխանել է, որ իր գործողությունները լինելու են միայն օրենքի սահմաններում և անհիմն զանգեր չի կատարելու: Գ.Գյոզալյանի կողմից իրեն գումարները տալուց ոչ ոք ներկա չի եղել, միայն 10.000 ՀՀ դրամը տալուց ներկա է եղել եղբայրը` Արմենը: Հետագայում Գ.Գյոզալյանը ևս 30.000 ՀՀ դրամ իրեն տվել է Շենգավիթի դատարանում: Այն հարցին, թե ինչ իրավաբանական ծառայություններ է մատուցել Գ.Գյոզալյանին, պատասխանել է, որ ունի դիմում-բողոք գրված Գագիկի գործողությունների դեմ կատարվածի մասին, /որը նախաքննության ընթացքում չի ներկայացրել/, իսկ հետագայում հրաժարվել է Գ.Գյոզալյանին որևէ ծառայություն մատուցելուց, հասկանալով, որ Գ.Գյոզալյանը ցանկանում է իրեն օգտագործել ՙշանտաժներ՚ կատարելու համար` օրինակ, որ Գ.Գյոզալյանը խնդրել է իր անունից դիմում ներկայացնի, որ իր տան գողության գործով քննիչը իբր իրեն ծեծել է, իսկ ինքը նման քայլի չի գնացել, քանի որ չէր կարող սուտ հաղորդում տար: Ինքը Ջ.Հ.-ին չի ճանաչում Գ.Գյոզալյանից 6.700 ԱՄՆ դոլար գումար չի վերցրել, առավելևս Ջ.Հ.-ին տալու միջոցով Նարեկ Գյոզալյանին ՙՍևան՚ ՔԿՀ-ից ազատելու համար: Նրան պետք է ազատեր ոմն Գագիկը, որը հանդիսացել էր ՀՀ վարչության աշխատակից: Ինքը ընդամենը Գ.Գյոզալյանին խորհուրդ է տվել, այսինքն իրեն ընդամենը հարցրել է, թե ով է զբաղվում նման հարցերով, ինքն էլ պատասխանել է, որ Ջ.Հ.-ն, ով հանդիսանում է հանձնաժողովի նախագահ: Գ.Գյոզալյանից է տեղեկացված Գագիկի մասին, ով աշխատում է ՀՀ քաղաքային վարչությունում, հետո հասկացել է, որ նա դասախոս է: Նրա մասին այլ տեղեկություններ չգիտի: Իր իմանալով Գ.Գյոզալյանը 5.000 ԱՄՆ դոլար 10 տոկոս հավելյալ տոկոսադրույքով գումար տվել է իր եղբորը, որպեսզի վերջինս ՎՀ-ից մեքենա ներկրի Հայաստան և որքան իրեն հայտնի է Գ.Գյոզալյանը շատերին է տոկոսային հարաբերությամբ գումարներ տվել: Իրեն հայտնի է նաև, որ Արմեն Մանուկյանը Գ.Գյոզալյանին 20.000, 40.000 և 400 ԱՄՆ դոլար գումարներ է տվել` որպես տոկոս:
գ.թ. 101-104, 245, 305, 342

Դատաքննության փուլում ամբաստանյալ Գոհար Գյոզալյանն իրեն առաջադրված մեղադրանքում մեղավոր չի ճանաչել և ցուցմունք է տվել, որ իր ծանոթ Մարիամ Բաղդասարյանի միջոցով ծանոթացել է Արմեն Մանուկյանի և Արմինե Մանուկյանի հետ: Մ.Բաղդասարյանն ասել է, որ նրանք կարող են օգնել` որդուն ազատազրկման վայրից ազատելու հարցում: Սակայն իր ծանոթներն ասել են, որ որդուն հնարավոր չի լինի ազատել, քանի որ հոդվածը ծանր է: Այդ ընթացքում Արմեն Մանուկյանն իրենից պարտքով գումար է խնդրել, ինքը չի մերժել, Արմենին մաս-մաս տվել է շուրջ 7000 ԱՄՆ դոլար գումար: Սակայն գումարը չի վերադարձրել, Արմինեն խոստացել է, որ իր տունը կվաճառի և պարտքը կվերադարձնի: Ինքը տեղյակ է եղել, որ Արմինեն իրավաբանական որոշ գիտելիքներ ունի, նա իր ծառայությունների դիմաց գումար չի պահանջել, ինքն է իր կամքով ասել, որ եթե կարողանան որդուն օգնեն, ինքը նրանց ՙլավության տակից դուրս կգա՚: Հետագայում իմացել է, որ որդուն ՙկարցեր՚ են տարել, այդ մասին ասել է Արմենին, ով որդուն ՙկարցերից՚ հանելու համար պահանջել և ստացել է 300 ԱՄՆ դոլար գումար, սակայն չի ազատել: Ընդհանուր առմամբ ինքն Արմենին տվել է 7000 ԱՄՆ դոլար գումար, սակայն ոչ թե որդուն ազատելու համար, այլ պարտքով:
Նախաքննության փուլում Գոհար Գյոզալյանն առաջադրված մեղադրանքում իրեն մեղավոր է ճանաչել և ցուցմունք տվել, որ իր ծանոթ Մարիամ Բաղդասարյանի միջոցով, ում ճանաչում է 2006-2007թթ, ծանոոթացել է եղբայր և քույր Արմեն և Արմինե Մանուկյանների հետ: Նրանց հանդիպել է 2014թ. փետրվարի 11-ին` Զեյթունի իր տանը: Արմինե Մանուկյանն իրեն ներկայացել է` որպես գործող փաստաբան: Ինքն այդ ժամանակ Արմինեին ներկայացրել է որդու ազատման հարցը, նրան հայտնել Գագիկի կողմից իրեն խաբելու վերաբերյալ: Արմինեն իրեն հավատացրել է, որ կարող է զբաղվել որդու ազատման հարցով, ինչի համար իրենից սկզբից ուզել է 5.500 ԱՄՆ դոլար` հայտնելով, որ 5.000 ԱՄՆ դոլարը պետք է տա նախագահի աշխատակազմին, ավելի կոնկրետ` Ջ.Հ-ին, իսկ իրեն վերցնելու է 500 ԱՄՆ դոլար` իրավաբանական ծառայություններ մատուցելու համար: Ինքը համաձայնվել է և առաջին 1500 ԱՄՆ դոլար գումարը նրան տվել է առձեռն` Մալաթիայի նախկին ՙՏորնադո՚-ի մոտ` փողոցում, որին այլ անձինք ներկա չեն եղել: Երկրորդ 1500 ԱՄՆ դոլարը տվել է ՙԶեյթուն՚-ի շուկայի մոտ` կրկին փողոցում և առանց այլ անձի ներկայության: Հաջորդ 1500 ԱՄՆ դոլարը տվել է Արգավանդի խաչմերուկի կանգառում, առանց այլ անձի ներկայության: Դրանից հետո Արմինեին 1.700 ԱՄՆ դոլարը տվել է ՙԵրիտասարդական՚-ի մոտ` ՙՍԱՍ՚ մարկետի կողքը` առանց այլ անձի ներկայության: Այնուհետև ևս 500 ԱՄՆ դոլար` ՙԶեյթուն՚-ի ՙԵրևան Սիթի՚-ի մոտ: Իրենց միջև որևէ գրավոր գործարք չի եղել, այդ ամենը եղել է բանավոր կարգով: Արմինեին 1700 ԱՄՆ դոլար տալուց առաջ որդին գաղութից զանգել է իրեն և ասել, որ իրեն ՙկարցեր՚ են նստեցնում: Ինքն էլ մտահոգվելով դիմել է Արմինեի եղբորը, ով իրեն ներկայացել էր ՙլավ կապեր՚ ունեցող ԱԱԾ-ի շախատակից: Վերջինս իրեն ասել էր, որ որդուն ՙկարցերից՚ ազատելու համար 300 ԱՄՆ դոլար գումար է պետք, գաղութի աշխատողներին տալու համար, ինչին ինքը համաձայնվել է և ՙՄասիվի՚ շուկայի մոտ հանդիպել է Արմենին: Իրենք տաքսիով գնացել են իր տուն, և ինքը միայնակ մտել է տուն, վերցրել եղած ողջ գումարը` 200 ԱՄՆ դոլարը և 30.000 ՀՀ դրամը և այն տվել Արմենին: Վերջինս իրեն ասել է, որ այդքան գումարով չի լինի, քանի որ մարդիկ սպասում են` նկատի ունենալով գաղութի աշխատակիցներին: Իրեն ասել է նաև, որ որդուն կարելի է տանել և պահել ԱԱԾ-ի ՙպադվալում՚, քանի որ այնտեղ ավելի ապահով է, իսկ ինքը բնականաբար չի համաձայնվել նրա առաջարկին: Սակայն Արմենը խաբել է իրեն և կարցերից չի ազատել որդուն և երբ այդ գումարը հետ է պահանջել, Արմենն իրեն ասել է, թե իբր տվել է գաղութի աշխատողներին: Իսկ Արմինե Մանուկյանը մինչև ս/թ մայիսի 5-ը իրեն տարբեր պատճառաբանություններով խաբել է և ի օգուտ իր որդու ոչինչ չի արել և երբ նրանից ետ է պահանջել իր տված գումարները, Արմինեն իրեն ասել է, թե այդ գումարներն արդեն բաժանել է ում որ պետք է և իրեն տալու համար, պետք է հետ հավաքի: Այդ ընթացքում իր կողմից Արմինեին պարբերաբար զանգելուց և անհանգստացնելուց հետո, վերջինս իրեն ՙԶեյթունի՚ շուկայի մոտ տվել է 500 ԱՄՆ դոլար` առանց այլ անձի ներկայության: Հանդիպման ժամանակ Արմինեն իրեն ասել է, որ մի 2 օրից նորից գումար կտա, սակայն խաբել է, այնուհետև մի քանի օրից նրան հանդիպել է Մաշտոցի պողոտայում` ՙԱգենստվո,,-ի մոտ, որտեղ Արմինեն իրեն տվել է 600 Ամն դոլար: Այդ ժամանակ Արմինեն իրեն խոսք է տվել, որ մի քանի օրից տված գումարները կհավաքի և 2.000 ԱՄՆ դոլար իրեն կտա: Մի քանի օրից Արմինեն գնացել է Մարիամի տուն` Լեփսիուսի 2փ. 34 տուն, որտեղ բնակվում է նաև ինքը և Մարիամի ներկայությամբ իրեն տվել է 200 ԱՄՆ դոլար` ասելով, որ չի կարողացել ավելի շատ գումար հավաքել և կրկին խոստացել է, որ մի քանի օրից նորից գումար կտանի: Մի քանի օր անց Արմինեն կրկին գնացել է Մարիամի տուն և խոստացած շատ գումարի փոխարեն տվել է 200 ԱՄՆ դոլար` ասելով, որ չի կարողացել շատ հավաքել: Դրանից հետո Արմինեն մաս-մաս 1500 ԱՄՆ դոլար իրեն վերադարձրել է առձեռն` առանց գրավոր որևէ փաստաթղթի, իսկ մնացած գումարի մասով ասել է, որ պետք է ՙբիրիք՚ փող հավաքեն, որ տան: Դրանից հետո` մոտ 4 օր անց, Արմինեն Մարիամի տանը իրեն ասել, որ 3.500 ԱՄՆ դոլարը Ջ.Հ.-ի մոտ է, որի փեսան վթարից մահացել է և Ջ.Հ.-ն գնացել է Ղարաբաղ և վաղը ժամը 10-ին այնտեղից վերադառնալուց հետո, ինքը Ջ-ի մոտից գումարը կվերցնի և կտա իրեն: Սակայն այդ անգամ էլ այդպես է խաբել և ամեն անգամ մի նոր սուտ էր հնարել ու գումարը չի վերադարձրել և սպառնացել, ասելով, որ չգիտի, թե ում հետ է գործ բռնել: Ինքն էլ իր ապահովության համար իր անձնական օգտագործման ՙՍամսունգ՚ մոդելի հեռախոսավ ձայնագրել և տեսանկարահանել է իր և Արմինեի խոսակցությունները, որպեսզի Արմինեն հետագայում չհերքի իր կողմից նրան տված 6.700 դոլարի հանգամանքը: Նախաքննության ընթացքում Արմենը իրեն կանչել է 2-րդ Մասիվում գտնվող իրենց տուն և տվել 400 ԱՄՆ դոլար` նախապես խոստացած ողջ գումարի փոխարեն` ասելով, որ իր և Արմինեի պարտքը ընդհանուր է և այդ պարտքից մարում է 400 դոլար: Երբ ինքը Արմենին հարցրել է, թե ինչու է Արմինեի պարտքը իր վրա վերցնում, Արմենը պատասխանել է, թե իր քույրը իբր իրեն խայտառակ է արել և այդ պատճառով պարտքը վերցնում է նաև իր վրա: Սակայն ինքը մտածում է, որ Արմենը նույնպես օգտվել է իր կողմից Արմինեին տված 6.700 ԱՄՆ դոլարից, այդ իսկ պատճառով նման դիրքորոշում էր ընտրել:
Գ.Գյոզալյանը իր ցուցմունքներում նշել է նաև, որ իր անունով հաշվառված և իր կողմից օգտագործվող 091-27-49-86 հեռախոսահամարից բազմիցս զանգեր է կատարել Արմինե Մանուկյանի կողմից օգտագործվող 096-70-06-30 և 098-18-28-39 հեռախոսահամարներին: Վերջինիս հիմնականում զանգել է իր 094-27-49-86 հեռախոսահամարով` 098-18-28-39 հեռախոսահամարին/ ներկայացրել է իր դիմումի հիման վրա իրեն համապատասխան ընկերություններից տրված ելքային զանգերի մանրամասն տեղեկատվությունը/: Նախաքննության ընթացքում Արմիենե Մանուկյանը իրեն վերադարձրել է ևս 100 ԱՄՆ դոլար գումար և դեռ պետք է վերադարձնի 5.000 ԱՄՆ դոլար գումար:
գ.թ. 48-53, 136, 186-188, 203-204, 206, 228-229, 253, 257-258, 289-291, 318-319

Համադրելով Ամբաստանյալներ Արմեն Մանուկյանի, Արմինե Մանուկյանի և Գոհար Գյոզալյանի դատաքննության փուլում տված ցուցմունքները վերջիններիս նախաքննության փուլում տված ցուցմունքների և դատաքննությամբ հետազոտված մյուս ապացույցների հետ, դատարանն արժանահավատ է համարում ամբաստանյալների նախաքննության փուլի ցուցմունքները, քանի որ դրանք ձեռք են բերվել օրենքով սահմանված քրեադատավարական նորմերի պահպանմամբ և չեն հակասում միմյանց և հաստատվել են դատաքննությամբ հետազոտված մյուս ապացույցներով:

Ամբաստանյալներին վերագրվող արարքները հիմնավորվել են դատաքննությամբ հետազոտված հետևյալ ապացույցներով.

Վկա Մարիամ Արամայիսի Բաղդասարյանը դատաքննության փուլում ըստ էության պնդել է նախաքննության փուլում տված ցուցմունքները, որ Գոհար Գյոզալյանի հետ մտերիմ է եղել և տեղյակ է եղել, որ նրա որդին դատվել է հանցագործության համար: 2014թ. փետրվար ամսին Գ.Գյոզալյանը զանգահարել է իրեն, այդ ժամանակ զրույցին ներկա է եղել Արմեն Մանուկայնը, ով լսելով, իրենց խոսակցությունը` հետաքրքրվել է, թե ինչ հարց է: Ինքն Արմենին պատմել է, որ Գոհարի տղան ՙնստած է՚, դատվել է անմեղ տեղը 6 տարի և ասել է, որ վերջինս ուզում է, որ տղային ազատեն: Արմենն էլ ասել է, որ կարող են հանդիպել, գործերը տեսնեն, քույրը լավ փաստաբան է, ինչով կարող է կօգնի: Դրանից հետո ինքն ընդամենը ծանոթացրել է միմյանց հետ և նրանք արդեն պայմանավորվել են հաջորդ օրը հանդիպելու և Գոհարենց տուն գնալու վերաբերյալ: Հանդիպելուց հետո Գոհարը գնացել է իրենց տուն և ասել, որ գործերը տվել է և պետք է գնան նոտարական գրասենյակ` Արմինե Մանուկյանին վստահագիր տալու համար: Երկու օր անց Արմենից տեղեկացել է, որ Գոհարը 1500 ԱՄՆ դոլար գումար է տվել Արմինեին: Ինքը մի քանի անգամ Գոհարին շեշտել է, որ նրան տուն կանչի գումարը տալու համար, իսկ Գոհարը պատասխանել է, որ Արմինեն չի ուզում գալ: Այդպես շարունակ ինքը Գոհարի կողմից Արմինեին գումարները տալուց հետո է իմացել այդ մասին: Տեղյակ է, որ Գոհարը 1500 ԱՄՆ դոլար գումար Արմինեին տվել է Արգավանդում, 1700 ԱՄն դոլար` ՙԵրիտասարդական՚ մետրոկայարանի մոտ, 500 ԱՄՆ դոլար` Զեյթունի ՙՍիթիի՚ մոտ, ինչպես նաև Զեյթունի շուկայի մոտ: Այնուհետև, Արմենն իրեն և Գոհարին ասել է, որ ոչ մի գործ էլ չի արվել, դրա համար էլ ձգձգվում են գործերը, որից հետո Գոհարը հետ է պահանջել գումարը: Արմինեն ասել է, որ խնդիր չկա, գումարը բաժանված է, ժամանակ է պետք հավաքելու համար, որից հետո մաս-մաս նաև իր ներկայությամբ տվել է 1500 ԱՄՆ դոլար: Այդ հանգամանքների մասին իրեն հիմնականում հայտնել է Գոհարը, որոնք հավաստել են Արմենը և Արմինեն` նրանց հետ տեղի ունեցած խոսակցությունների ժամանակ: Արմինեն իր տանը Գոհարին հայտնել է, թե իբր գումար պետք է բերեր, սակայն պատճառաբանել է, որ 3.500 ԱՄՆ դոլարը գտնվում է Ջ.Հ-ի մոտ, ում փեսան վթարից մահացել է և նա գտնվում է Ղարաբաղում` փեսայի հուղարկավորությանը և քաղաքում կլինի առավոտյան ժամը 10-ին: Իր ներկայությամբ իր տանն Արմինեն Գոհարին գումարներ է վերադարձրել, որոնց քանակը չի հիշում, սակայն գիտի, որ 6.700 ԱՄՆ դոլարից 1.500-ը վերադարձրել է: Արմենից տեղեկացել է նաև, որ վերջինս ապրիլ ամսին 200 ԱՄՆ դոլար և 30.000 ՀՀ դրամ է վերցրել` Գոհարի որդուն ՙկարցերից՚ ազատելու համար, իսկ գործը չստացվելու հետ կապված Արմենը պատճառաբանել է, որ կալանավայրի այդ հերթափոխը չէր, որը կարող է ազատել, գումարը տվել է նրանց և հետո պետք է նրանցից գումարը հետ վերցնի և վերադարձնի: Արմեն և Արմինե Մանուկյաններն ընդհանուր մոտ 7.000 ԱՄՆ դոլար գումար Գ.Գյոզալյանից վերցրել են նրա տղային վաղաժամկետ ազատելու համար, իսկ Արմեն Մանուկյանը` ՙկարցերից՚ ազատելու համար, և խաբելով յուրացրել այդ գումարները: Արմինեն ամեն անգամ պնդել է, որ Արմենը պետք է տա, իսկ Արմենն ամեն անգամ խոսելուց խոստումներ է տվել, որ այսօր կամ վաղը կբերի գումարը, սակայն խաբել է:

Ամբաստանյալներ Արմեն Մանուկյանն, Արմինե Մանուկյանին և Գոհար Գյոզալյանին մեղսագրվող արարքները հիմնավորվել են նաև.

Գոհար Գյոզալյանի և Արմինե Մանուկյանի միջև կատարված առերես հարցաքննության արձանագրության համաձայն` Գ.Գյոզալյանն առերես պնդել է նախաքննության ընթացքում որպես տուժող տված իր ցուցմունքները:
գ.թ. 161-164

Գոհար Գյոզալյանի և Արմեն Մանուկյանի միջև կատարված առերես հարցաքննության արձանագրության համաձայն` Գ.Գյոզալյանը առերես պնդել է նախաքննության ընթացքում որպես տուժող տված իր ցուցմունքները:
գ.թ. 171-173

Արմեն Մանուկյանի և Մարիամ Բաղդասարյանի միջև կատարված առերես հարցաքննության արձանագրության համաձայն` Մ.Բաղդասարյանն առերես պնդել է նախաքննության ընթացքում որպես վկա տված իր ցուցմունքները:
գ.թ. 177-179

Ձայնասկավառակները զննելու մասին արձանագրությունների համաձայն` Գ.Գյոզալյանը գումարներ է տրամադրել Արմինե Մանուկյանին` որդու ազատման հետ կապված, իսկ վերջինս էլ չի հերքել, ընդունել է այդ հանգամանքը և անգամ խոստացել է վերադարձնել մնացած 5.000 ԱՄՆ դոլար գումարը:
գ.թ. 110-111, 332

Գ.Գյոզալյանի կողմից ներկայացված համապատասխան ընկերությունների հեռախոսային խոսակցությունների ելքային զանգերի վերծանումների համաձայն` դրանցում առկա է Գ.Գյոզալյանի կողմից օգտագործված 094-27-49-86, 091-27-49-86 հեռախոսահամարներից Արմեն և Արմինե Մանուկյանների կողմից օգտագործված 096-70-06-30, 093-30-06-40, 098-18-28-39 հեռախոսահամարներին 2014թ. փետրվար ամսից 2014թ. մայիս ամիսն ընկած ժամանակահատվածում բազմիցս կատարված և ֆիքսված հեռախոսազանգերի մանրամասն տեղեկատվությունը:
գ.թ. 194-202,207-219

Գ.Գյոզալյանի կողմից ՙԱրդշինինվեստբանկ՚ ՓԲԸ-ի ՙԿոմիտաս՚ մասնաճյուղի ելքի դրամարկղային օրդերի համաձայն` Գ.Գյոզալյանը 14.04.2014թ. ստացել է 2456 ԱՄՆ դոլար գումար:
գ.թ. 288

Դատարանի իրավական վերլուծությունները

Դատարանը գործով ձեռք բերված յուրաքանչյուր ապացույց գնահատելով թույլատրելիության վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, գտնում է, որ ամբաստանյալ Արմեն Մանուկյանը կատարել է իրեն մեղսագրվող` ՀՀ քրեական օրենսգրքի 38-312-րդ հոդվածի 1-ին մասով նախատեսված արարքը, այն է` պաշտոնատար անձին կաշառք տալուն դրդելը: Արմինե Ազատի Մանուկյանը կատարել է իրեն մեղսագրվող` ՀՀ քրեական օրենսգրքի ՀՀ քրեական օրենսգրքի 38-312-րդ հոդվածի 2-րդ մասով և 178-րդ հոդվածի 2-րդ մասի 2-րդ կետով նախատեսված արարքները, այն է` պաշտոնատար անձին խոշոր չափերով կաշառք տալուն դրդելը և խարդախությունը` վստահությունը չարաշահելու եղանակով Գ.Գյոզալյանի գույքի խոշոր չափերով հափշտակությունը: Գոհար Գյոզալյանը կատարել է իրեն մեղսագրվող` ՀՀ քրեական օրենսգրքի 34-312-րդ հոդվածի 1-ին և 2-րդ մասերով նախատեսված արարքները, այն է` պաշտոնատար անձին կաշառք տալու և պաշտոնատար անձին խոշոր չափերով կաշառք տալու փորձը:
Վերոհիշյալ հանցանքների կատարման համար ամբաստանյալները ենթակա են քրեական պատասխանատվության և պատժի, որը նրանք պետք է կրեն:
ՀՀ քրեական օրենսգրքի 10-րդ հոդվածի համաձայնª ՙՀանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացիª համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար՚:
ՀՀ քրեական օրենսգրքի 48-րդ հոդվածի համաձայնª
ՙ1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից ու ազատություններից օրենքով նախատեսված զրկմամբ կամ դրանց սահմանափակմամբ:
2. Պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61-րդ հոդվածի համաձայն`
ՙ1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում է հանցագործությանª հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվումª պատասխանատվությունը և պատիժը մեղմացնող կամ ծանրացնող հանգամանքներով՚:
ՀՀ Վճռաբեկ դատարանը 2012թ. նոյեմբերի 1-ին Սերոբ Սարգսյանի վերաբերյալ թիվ ՍԴ/0109/01/12 գործով արտահայտել է հետևյալ իրավական դիրքորոշումը. ՙ(…) պատիժ նշանակելու ընդհանուր սկզբունքները քրեական օրենքով նախատեսված այն հիմնադրույթներն են, որոնցով պետք է ղեկավարվի դատարանը պատիժ նշանակելիս: Այդ սկզբունքներն են`
ա) օրինականությունը,
բ) արդարությունը,
գ) պատժի անհատականացումը,
դ) մարդասիրությունը:
Պատիժ նշանակելու վերոնշյալ սկզբունքները սահմանում են այն հիմնական դրույթները, որոնցով ղեկավարվում է դատարանը յուրաքանչյուր քրեական գործով պատժի տեսակն ու չափն ընտրելիս:
(…) պատժի նշանակման իրավական շրջանակները սահմանված են ՀՀ քրեական օրենսգրքով: Դրա հետ մեկտեղ, սակայն, վերոնշյալ օրենքը դատարանին հնարավորություն է տվել որոշակի սկզբունքների (…) պահպանմամբ, իր ներքին համոզմանը և իրավագիտակցությանը համապատասխան, ՀՀ քրեական օրենսգրքի Ընդհանուր և Հատուկ մասերով նախատեսված սահմաններում որոշել պատժի տեսակն ու չափը: Այլ կերպ` ուրվագծելով կոնկրետ հանցանքի համար նշանակման ենթակա պատժի առավելագույն և նվազագույն սահմանները` ՀՀ քրեական օրենքը դատարանին տվել է այդ շրջանակում հայեցողություն դրսևորելու հնարավորություն:
Վճռաբեկ դատարանը գտել է, որ ՀՀ քրեական օրենսգրքի Հատուկ մասի գրեթե բոլոր հոդվածների սանկցիաներում ամրագրված վերոնշյալ մոտեցումը պայմանավորված է այն տրամաբանությամբ, որ քրեական օրենքը համընդհանուր բնույթ ունի, իսկ արարքը և հանցավորի անձը կոնկրետ են: Ուստի կոնկրետ արարքի և անձի նկատմամբ համընդհանուր քրեական օրենքով նախատեսված սանկցիան կիրառելիս դատարանը պետք է որոշակի հայեցողություն դրսևորի:
Այնսինքն` առանց դատարանի հայեցողության պատժի անհատականացումն անհնար է:
(…) Պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության աստիճանի ու բնույթի, հանցավորի անձի, պատիժը մեղմացնող և ծանրացնող հանգամանքների վերլուծության հիման վրա: Նշված հանգամանքների հայեցողական և ոչ երբեք կամային գնահատման ժամանակ դատարանը պետք է ելնի ՀՀ քրեական օրենսգրքի 48-րդ հոդվածով նախատեսված` պատժի նպատակների իրացումն ապահովելու անհրաժեշտությունից (տե'ս Նարեկ Գևորգի Սարգսյանի գործով Վճռաբեկ դատարանի 2011 թվականի դեկտեմբերի 22-ի թիվ ԵԿԴ/0042/01/11 որոշման 14-րդ, 22-23-րդ կետերը)՚:

Ամբաստանյալ Արմեն Մանուկյանի անձը բնութագրող տվյալներ դատարանը հաշվի է առնում, որ նա ամուսնացած է:
Ամբաստանյալի պատասխանատվությունը և պատիժը մեղմացնող և ծանրացնող հանգամանքներ առկա չեն:

Ամբաստանյալ Արմինե Մանուկյանի անձը բնութագրող տվյալներ դատարանը հաշվի է առնում, որ նա նախկինում դատված չէ:
Ամբաստանյալ Արմինե Մանուկյանի պատասխանատվությունը և պատիժը մեղմացնող հանգամանքներ դատարանը հաշվի է առնում, որ նա ֆիզիկապես վատառողջ է, ունի ուղեղի արյան շրջանառության սուր խանգարում, հիպերտոնիկ հիվանդություն:
Ամբաստանյալի պատասխանատվությունն և պատիժը ծանրացնող հանգամանքներ առկա չեն:

Ամբաստանյալ Գոհար Գյոզալյանի անձը բնութագրող տվյալներ դատարանը հաշվի է առնում, որ նա նախկինում դատված չէ:
Ամբաստանյալ Գոհար Գյոզալյանի պատասխանատվությունը և պատիժը մեղմացնող հանգամանքներ դատարանը հաշվի է առնում, որ նա ֆիզիկապես վատառողջ է, ունի զարկերակային հիպերտենզիա, նևրոգեն ռեակցիա:
Ամբաստանյալի պատասխանատվությունն և պատիժը ծանրացնող հանգամանքներ առկա չեն:

ՀՀ վճռաբեկ դատարանը Կարեն Հարությունյանի վերաբերյալ գործով վերլուծելով ՀՀ քրեական օրենսգրքի Ընդհանուր մասի մի շարք դրույթներ, մասնավորապես` ՀՀ քրեական օրենսգրքի 10-րդ, 48-րդ և 61-րդ հոդվածները հանգել է այն հետևության, որ պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, անձին բնութագրող բոլոր տվյալները և քրեական օրենքով նախատեսված պահանջներից ելնելով` հանցագործության մեջ մեղավոր անձի նկատմամբ նշանակում է այնպիսի պատիժ, որն անհրաժեշտ և բավարար է այդ անձին ուղղելու և նրա կողմից նոր հանցանքի կատարումը կանխելու համար (տե'ս ՀՀ վճռաբեկ դատարանի` Կարեն Հարությունյանի վերաբերյալ գործով 2007 թվականի նոյեմբերի 30-ի ՎԲ-201/07 որոշումը):
Հաշվի առնելով ամբաստանյալների կատարած հանցագործությունների բնույթը և հանրության համար վտանգավորության աստիճանը, դրանց կատարման եղանակը, հանցավոր մտադրության իրականացման աստիճանը, հանցագործությունը կատարելուց հետո նրանց դրսևորած վարքագիծը, խախտված հասարակական հարաբերության սոցիալական նշանակությունը և այդ ոլորտում պետության քրեական քաղաքականության ուղղվածությունը, դատարանը գտնում է, որ Արմեն Մանուկյանը ՀՀ քրեական օրենսգրքի 38-312-րդ հոդվածի 1-ին մասով նախատեսված և Արմինե Մանուկյանը` ՀՀ քրեական օրենսգրքի 38-312-րդ հոդվածի 2-րդ մասով և 178-րդ հոդվածի 2-րդ մասի 2-րդ կետով հանցագործությունների կատարման համար ենթակա են պատժի ազատազրկման, իսկ Գոհար Գյոզալյանը` ՀՀ քրեական օրենսգրքի 34-312-րդ հոդվածի 1-ին և 2-րդ մասերով նախատեսված հանցագործությունների կատարման համար` ենթակա է պատժի տուգանքի ձևով:

ՀՀ քրեական օրենսգրքի 22-րդ հոդվածի համաձայն`
ՙ2. Հանցագործությունների ռեցիդիվը վտանգավոր է համարվում՝
1) դիտավորությամբ հանցանք կատարելու դեպքում, եթե անձը նախկինում երկու անգամից ոչ պակաս ազատազրկման է դատապարտվել դիտավորյալ հանցագործության համար (...)՚:
Դատարանն արձանագրում է, որ ամբաստանյալ Արմեն Մանուկյանը, նախկինում դիտավորյալ հանցագործության համար երկու անգամից ոչ պակաս ազատազրկման դատապարտված լինելով` դարձյալ կատարել է դիտավորյալ հանցագործություն, այսինքն` առկա է հանցագործությունների վտանգավոր ռեցիդիվ:
ՀՀ քրեական օրենսգրքի 67.1-րդ հոդվածի 2-րդ մասի համաձայն`
ՙ(...) Հանցագործությունների վտանգավոր ռեցիդիվի համար նշանակված պատիժը չի կարող պակաս լինել սույն օրենսգրքի Հատուկ մասի համապատասխան հոդվածի սանկցիայով նախատեսված առավելագույն պատժի երկու երրորդից: (...)՚:
Այսպիով, Արմեն Մանուկյանի նկատմամբ պատիժ նշանակելիս դատարանը պետք է ղեկավարվի նաև ՀՀ քրեական օրենսգրքի 67.1-րդ հոդվածի 2-րդ մասի կանոններով:
Դատարանը միաժամանակ արձանագրում է, որ ամբաստանյալ Արմեն Մանուկյանը, Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 2015 թվականի հուլիսի 09-ի դատավճռով մեղավոր է ճանաչվել ՀՀ քրեական օրենսգրքի 34-329-րդ հոդվածի 2-րդ մասով և նրա նկատմամբ պատիժ է նշանակվել 5 /հինգ/ տարի 6 /վեց/ ամիս ժամկետով: Դատարանն արձանագրում է, որ Արմեն Մանուկյանը սույն` ՀՀ քրեական օրենսգրքի 38-312-րդ հոդվածի 1-ին մասով նախատեսված հանցանքը կատարել է նախքան Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի գործով դատավճիռ կայացնելը, ուստի, նշված պայմաններում, դատարանը, Ա.Մանուկյանի նկատմամբ պատիժ նշանակելիս, պետք է ղեկավարվի ՀՀ քրեական օրենսգրքի 66-րդ հոդվածի 6-րդ մասի կանոններով, համաձայն որի` ՙՊատիժը նշանակվում է սույն հոդվածի կանոններով, եթե դատավճիռ կայացնելուց հետո պարզվի, որ դատապարտյալը մեղավոր է նաեւ մեկ այլ հանցանքի համար, որը նա կատարել է նախքան առաջին գործով դատավճիռ կայացնելը: Այս դեպքում վերջնական պատժի ժամկետին հաշվակցվում է առաջին դատավճռով նշանակված պատժի կրած մասը:՚:
Դատարանը միաժամանակ արձանագրում է, որ Արմեն Մանուկյանը փաստացի արգելանքի է վերցվել 2016 թվականի մայիսի 10-ին, ուստի նրա նկատմամբ ազատազրկման ձևով նշանակված պատժի սկիզբը պետք է հաշվել նրան կալանավորելու օրվանից:
Քննության առնելով խափանման միջոցի հարցը, դատարանը գտնում է, որ ամբաստանյալներ Արմինե Մանուկյանի և Գոհար Գյոզալյանի նկատմամբ ընտրված խափանման միջոցը` ստորագրություն` չհեռանալու մասին, պետք է թողնել անփոփոխ` մինչև դատավճռի օրինական ուժի մեջ մտնելը:
Անդրադառնալով Արմինե Ազատի Մանուկյանի գույքի վրա 06.11.2014թ. որոշմամբ դրված կալանքին, դատարանը փաստում է հետևյալը.
ՀՀ քրեական դատավարության օրենսգրքի 232-րդ հոդվածի 1-ին մասի համաձայն`
ՙԳույքի վրա կալանք դնելը կիրառվում է քաղաքացիական հայցը, գույքի հնարավոր բռնագրավումը, բռնագանձումը և դատական ծախսերն ապահովելու համար՚:
ՀՀ քրեական դատավարության օրենսգրքի 238-րդ հոդվածի համաձայն`
ՙ1. Գույքը, քրեական վարույթն իրականացնող մարմնի որոշմամբ, ազատվում է կալանքից, եթե քաղաքացիական հայցը հետ վերցվելու, կասկածյալին կամ մեղադրյալին վերագրվող արարքի որակումը փոխվելու հետևանքով կամ այլ պատճառներով վերացել է գույքի վրա կալանք դնելուց բխող սահմանափակումների կիրառման անհրաժեշտությունը:
2. Քաղաքացիական հայցվորի կամ այլ շահագրգիռ անձանց միջնորդությամբ դատարանն իրավունք ունի գույքի վրա դրված կալանքը պահպանել նաև քրեական գործով վարույթի ավարտից հետո` մեկ ամսվա ընթացքում՚:
Դատարանն արձանագրում է, որ Արմինե Մանուկյանի կողմից չի հատուցվել հանցագործության հետևանքով անմիջականորեն պատճառված գույքային վնասը, ուստի Արմինե Ազատի Մանուկյանի գույքի վրա 06.11.2014թ. որոշմամբ դրված կալանքը պետք է թողնել անփոփոխ:
Նկատի ունենալով, որ դատական քննության ընթացքում Գ.Գյոզալյանի կողմից քաղաքացիական հայց չի հարուցվել, ուստի Գոհար Գյոզալյանին պետք է վերապահել քաղաքացիական հայցի իրավունք` քաղաքացիական դատավարության կարգով պատճառված գույքային վնասի հատուցման հարցը լուծելու համար:

Ղեկավարվելով ՀՀ քրեական դատավարության օրենսգրքի 134-րդ, 155-րդ, 163-րդ, 238-րդ, 357-360-րդ, 365-րդ, 366-րդ, 369-373-րդ և 379-րդ հոդվածներով, դատարանը`

ՎՃՌԵՑ

Արմեն Ազատի Մանուկյանին մեղավոր ճանաչել ՀՀ քրեական օրենսգրքի 38-312-րդ հոդվածի 1-ին մասով նախատեսված հանցագործության կատարման մեջ և նրա նկատմամբ պատիժ նշանակել ազատազրկում 3 /երեք/ տարի 6 /վեց/ ժամկետով:
ՀՀ քրեական օրենսգրքի 66-րդ հոդվածի կանոններով, հանցանքների համակցությամբ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 2015 թվականի հուլիսի 09-ի դատավճռով նշանակված պատժից` 5 /հինգ/ տարի 6 /վեց/ ամիս ժամկետով ազատազրկումից, մասնակիորեն գումարել 3/երեք/ տարի 6 /վեց/ ամիս և Արմեն Ազատի Մանուկյանի նկատմամբ վերջնական պատիժ նշանակել ազատազրկում 7 /յոթ/ տարի ժամկետով:
Նշանակված պատժի ժամկետին հաշվակցել Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 2015 թվականի հուլիսի 09-ի դատավճռով նշանակված պատժի կրած մասը և Արմեն Մանուկյանի պատժի սկիզբը հաշվել 2016 թվականի մայիսի 10-ից:

Արմինե Ազատի Մանուկյանին մեղավոր ճանաչել ՀՀ քրեական օրենսգրքի 38-312-րդ հոդվածի 2-րդ մասով և 178-րդ հոդվածի 2-րդ մասի 2-րդ կետով նախատեսված հանցագործությունների կատարման մեջ:
ՀՀ քրեական օրենսգրքի 38-312-րդ հոդվածի 2-րդ մասով նրա նկատմամբ պատիժ նշանակել ազատազրկում 2 /երկու/ տարի ժամկետով:
ՀՀ քրեական օրենսգրքի 178-րդ հոդվածի 2-րդ մասի 2-րդ կետով` պատիժ նշանակել ազատազրկում 2 /երկու/ տարի ժամկետով:
ՀՀ քրեական օրենսգրքի 66-րդ հոդվածի կանոններով հանցանքների համակցությամբ պատիժները մասնակիորեն գումարելու միջոցով Արմինե Ազատի Մանուկյանի նկատմամբ վերջնական պատիժ նշանակել ազատազրկում 3 /երեք/ տարի ժամկետով:
Արմինե Ազատի Մանուկյանի նկատմամբ ընտրված խափանման միջոցը` ստորագրություն` չհեռանալու մասին, թողնել անփոփոխ մինչև դատավճռի օրինական ուժի մեջ մտնելը:

Գոհար Սարիբեկի Գյոզալյանին մեղավոր ճանաչել ՀՀ քրեական օրենսգրքի 34-312-րդ հոդվածի 1-ին և 2-րդ մասերով նախատեսված հանցագործությունների կատարման մեջ:
ՀՀ քրեական օրենսգրքի 34-312-րդ հոդվածի 1-ին մասով նրա նկատմամբ պատիժ նշանակել տուգանք նվազագույն աշխատավարձի հարյուհիսնապատիկի` 150.000 /մեկ հարյուր հիսուն հազար/ ՀՀ դրամի չափով:
ՀՀ քրեական օրենսգրքի 34-312-րդ հոդվածի 2-րդ մասով` պատիժ նշանակել տուգանք` նվազագույն աշխատավարձի երկուհարյուհիսնապատիկի` 250.000 /երկու հարյուր հիսուն հազար/ ՀՀ դրամի չափով:
ՀՀ քրեական օրենսգրքի 66-րդ հոդվածի կանոններով հանցանքների համակցությամբ պատիժները մասնակիորեն գումարելու միջոցով Գոհար Սարիբեկի Գյոզալյանի նկատմամբ վերջնական պատիժ նշանակել տուգանք` նվազագույն աշխատավարձի երեքհարյուրապատիկի` 300.000 /երեք հարյուր հազար/ ՀՀ դրամի չափով:
Գոհար Սարիբեկի Գյոզալյանի նկատմամբ ընտրված խափանման միջոցը` ստորագրություն` չհեռանալու մասին, թողնել անփոփոխ մինչև դատավճռի օրինական ուժի մեջ մտնելը:

Արմինե Ազատի Մանուկյանի գույքի վրա 06.11.2014թ. որոշմամբ դրված կալանքը թողնել անփոփոխ` մինչև դատավճռի օրինական ուժի մեջ մտնելը:
Գոհար Գյոզալյանին վերապահել քաղաքացիական հայցի իրավունք` քաղաքացիական դատավարության կարգով իրեն պատճառված գույքային վնասի հատուցման հարցը լուծելու համար:

Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո` մեկամսյա ժամկետում:



ԴԱՏԱՎՈՐ Ա.ՄԿՐՏՉՅԱՆ