ԵԱՔԴ/0174/01/14

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության դատարանը`

նախագահող դատավոր` Լ. Ավետիսյան
քարտուղարությամբ` Ե. Կարապետյանի, Ն. Այվազյանի
մասնակցությամբ
մեղադրողներ` Տ. Կարապետյանի, Ա. Մնացականյանի
պաշտպան` Լ. Գրիգորյանի
տուժողներ՝ Գ. Դավթյանի, Լ. Գրիգորյանի
Հ. Իսրայելյանի

2015 թվականի նոյեմբերի 13-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի Գուրգեն Ալեքսանի Ասատրյանի, ծնված 1985 թվականի հունվարի 07-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին չորս անձ, աշխատել է ՙՍինդի՚ գիշերային ակումբում որպես անվտանգության աշխատակից, նախկինում դատված՝ Էրեբունի և Նուբարաշեն վարչական շրջանների ընդհանուր իրավասության դատարանի 14.02.2011թ. դատավճռով ՀՀ քրեական օրենսգրքի 176 հոդվածի 1-ին մասով դատապարտվել է տուգանքի 250.000 ՀՀ դրամի չափով, Շենգավիթ վարչական շրջանի ընդհանուր իրավասության դատարանի 13.07.2011թ. որոշմամբ տուգանքը փոխարինվել է հանրային աշխատանքներովª 1250 ժամ, հանրային աշխատանքները կատարված են, դատվածությունը մարված, հաշվառված և բնակվել է Երևան քաղաքի Շևչենկոյի փողոցի 4 շենքի թիվ 26 բնակարան հասցեում, մեղադրվում է ՀՀ քրեական օրենսգրքի 176 հոդվածի 1-ին մասով /4 դրվագ/ և ՀՀ քրեական օրենսգրքի 176 հոդվածի 2-րդ մասի 2-րդ կետով, որպես խափանման միջոց է ընտրվել չհեռանալու մասին ստորագրությունը /այլ գործով կալանքի տակ է 18.09.2015թ.-ից/
Պ Ա Ր Զ Ե Ց

1.Գործի դատավարական նախապատմությունը.
2014 թվականի հուլիսի 11-ին Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 176 հոդվածի 1-ին մասի հատկանիշներով հարուցվել է թիվ 14148714 քրեական գործը:
2014 թվականի հուլիսի 26-ին Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 176 հոդվածի 1-ին մասի հատկանիշներով հարուցվել է թիվ 14801714 քրեական գործը:
2014 թվականի օգոստոսի 31-ին Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 176 հոդվածի 1-ին մասի հատկանիշներով հարուցվել է թիվ 14812714 քրեական գործը:
2014 թվականի հունիսի 27-ին Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 34-176 հոդվածի 1-ին մասի հատկանիշներով հարուցվել է թիվ 14145414 քրեական գործը:
2014 թվականի օգոստոսի 20-ին Երևան քաղաքի քննչական վարչության Քանաքեռ-Զեյթուն քննչական բաժնում ՀՀ քրեական օրենսգրքի 176 հոդվածի 1-ին մասի հատկանիշներով հարուցվել է թիվ 09123614 քրեական գործը:
2014 թվականի սեպտեմբերի 3-ին Գուրգեն Ալեքսանի Ասատրյանի նկատմամբ որպես խափանման միջոց է ընտրվել չհեռանալու մասին ստորագրությունը:
2014 թվականի սեպտեմբերի 4-ի որոշմամբ թիվ 14145414, 14801714 և 14812714 քրեական գործերը միացվել են թիվ 14148714 քրեական գործին:
2014 թվականի սեպտեմբերի 5-ի որոշմամբ թիվ 09123614 քրեական գործը միացվել է թիվ 14148714 քրեական գործին:
Նախաքննության մարմնի 2014 թվականի սեպտեմբերի 9-ի որոշմամբ Գուրգեն Ալեքսանի Ասատրյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 176 հոդվածի 1-ին մասով /4 դրվագ/ և 176 հոդվածի 2-րդ մասի 2-րդ կետով: Նրա նկատմամբ որպես խափանման միջոց ընտրված չհեռանալու մասին ստորագրությունը թողնվել է անփոփոխ:
2014 թվականի նոյեմբերի 10-ին թիվ 14148714 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթույն վարչական շրջանների ընդհանուր իրավասության դատարանª ըստ էության քննելու համար:
2.Գործի փաստական հանգամանքները.
Նախնական քննության մարմինը Գուրգեն Ալեքսանի Ասատրյանին ՀՀ քրեական օրենսգրքի ՀՀ քրեական օրենսգրքի 176 հոդվածի 1-ին մասով /4 դրվագ/ և 176 հոդվածի 2-րդ մասի 2-րդ կետով մեղադրանք է առաջադրել այն արարքների կատարման համար, որ նա ուրիշի գույքի բացահայտ հափշտակություն կատարելու դիտավորությամբ, 2014թ. հունիսի 25-ին ժամը 13:30-ից 13:40-ն ընկած ժամանակահատվածում, Երևան քաղաքի Կոմիտասի պողոտայի թիվ 9 հասցեում գտնվող ՙ1+1՚ խանութի դիմաց, քաշել-պոկել է Հասմիկ Սուրենի Իսրայելյանի պարանոցի ոսկյա շղթան, որի հետևանքով շղթան պոկվել և ընկել է Հ.Իսրայելյանի հագուստների մեջ, որից հետո բացահայտ հափշտակելով Հ.Իսրայելյանի շղթայի վրա անցկացված 80.000 ՀՀ դրամ արժողության կախազարդը դիմել է փախուստի` Հ.Իսրայելյանին պատճառելով զգալի չափերի` 80.000 ՀՀ դրամի գույքային վնաս:
Բացի այդ, Գուրգեն Ասատրյանը ուրիշի գույքի բացահայտ հափշտակություն կատարելու դիտավորությամբ, 2014թ. հուլիսի 11-ին ժամը 15.00-ի սահմաններում, Հր.Քոչարի փողոցի 14 շենքի բակում, քաշել-պոկելու եղանակով հափշտակել է Անահիտ Վլադիմիրի Հարությունյանի պարանոցի ընդհանուր 500.000 ՀՀ դրամ արժողության ոսկյա շղթան և խաչը ու դիմել փախուստի` Ա.Հարությունյանին պատճառելով զգալի չափի` 500.000 ՀՀ դրամ գույքային վնաս:
Այնուհետև, Գուրգեն Ասատրյանը ուրիշի գույքի բացահայտ հափշտակություն կատարելու դիտավորությամբ, 2014թ հուլիսի 26-ին ժամը 14-ի սահմաններում, Երևան քաղաքի Վաղարշ Վաղարշյան փողոցի թիվ 18 շենքի 3-րդ շքամուտքի դիմաց Լուսիկ Սմբատի Գրիգորյանի պարանոցից քաշել-պոկելու եղանակով բացահայտ հափշտակել է վերջինիս պատկանող, ընդհանուր 32 գրամ քաշով, 500.000 ՀՀ դրամ արժողությամբ ոսկյա շղթան իր ոսկյա կախազարդով և դիմել փախուստի` Լ.Գրիգորյանին պատճառելով զգալի չափի` 500.000 ՀՀ դրամի գույքային վնաս:
Դրանից հետո, Գուրգեն Ասատրյանը ուրիշի գույքի բացահայտ հափշտակություն կատարելու դիտավորությամբ, 2014թ. օգոստոսի 20-ին ժամը 07:15-ի սահմաններում Երևան քաղաքի Բաբայան 8 հասցեի մոտակայքում քաշել-պոկելու եղանակով բացահայտ հափշտակել է Թամարա Գեորգիի Սինանովայի պարանոցի ընդհանուր 250.000 ՀՀ դրամ արժողության ոսկյա շղթան իր արծաթյա խաչով և դիմել փախուստիª վերջինիս պատճառելով զգալի չափի` 250.000 ՀՀ դրամի գույքային վնաս:
Բացի այդ, Գուրգեն Ասատրյանը ուրիշի գույքի բացահայտ հափշտակություն կատարելու դիտավորությամբ, 2014թ. օգոստոսի 31-ին ժամը 10:00-ի սահմաններում, Վաղարշ Վաղարշյան փողոցի թիվ 18 շենքի 6-րդ շքամուտքում բացահայտ հափշտակել է Գայանե Ազատի Դավթյանի պարանոցի` ընդհանուր 35 գրամ քաշով ոսկյա շղթայի մի մասը և դիմել փախուստի` Գ.Դավթյանին, պատճառելով 1.700 ԱՄՆ դոլարին համարժեք 699.000 ՀՀ դրամի գույքային վնաս:

3.Ապացույցների հետազոտում.
Ամբաստանյալ Գուրգեն Ասատրյանն առաջադրված մեղադրանքում իրեն մեղավոր է ճանաչել և խոստովանական ցուցմունք է տվել այն մասին, որ ամուսնացած է և ամուսնական համատեղ կյանքի ընթացքում ունի երկու անչափահաս երեխա, ծնողները վատառողջ են և ընտանիքի միակ աշխատողը, ընտանիքի մասին հոգ տանողն ինքն է հանդիսանում: Նշել է, որ ֆինանսական վատ վիճակի պատճառով մի քանի կանանցից հափշտակել է վերջիններիս պարանոցից կախված ոսկյա շղթաները: Առաջին անգամ 2014թ. հունիս ամսվա վերջերին, երբ իրեն գումար է անհրաժեշտ եղել ընտանիքի կարիքները հոգալու համար, որոշել է կատարել հափշտակություն: Այդ օրը, հստակ չի կարող հիշել դեպքի օրը, ժամը 13-ի սահմաններում, երբ գտնվել է Կոմիտասի պողոտայում` Կոմիտաս/Վաղարշյան փողոցների խաչմերուկից մոտ 50-100 մետր դեպի ներքև` դեպի Կասյան փողոց, աջ մայթի վրա նկատել է, որ մոտ 40-45 տարեկան մի կին է քայլում, ում պարանոցին տեսել է կախված ոսկյա շղթա: Իր մոտ ցանկություն է առաջացել հափշտակել այն: Այդ նպատակով սկսել է քայլել այդ կնոջ հետևից: Վերջինս մտել է այնտեղ գտնվող հագուստի խանութ: Ինքը սպասել է մինչև նա դուրս է եկել և դուրս գալուց անմիջապես հետո մոտեցել է նրան դիմացի հատվածից, աջ ձեռքով քաշել այդ կնոջ պարանոցի ոսկյա շղթան, որի հետևանքով շղթան պոկվել և ընկել է նրա ծոցը, իսկ դրա վրա առկա ոսկյա կուլոնը մնացել է իր ձեռքին: Ինքը դիմել է փախուստի և մտնելով շենքերի բակ` հեռացել է: Դեպքից մոտ մեկ կամ երկու օր հետո այդ ոսկյա կուլոնը, որն ուներ քառակուսի տեսք, վաճառել է Երևան քաղաքի ՙԲաղնիքի՚ ոսկու շուկայում: Ոսկու շուկա է մտել առաջին մուտքից և բարձրանալով երկրորդ հարկի սրահ, մոտեցել տաղավարներից մեկին, որի աշխատակիցը աղջիկ էր: Այդ կուլոնը մոտ 20.000-25.000 ՀՀ դրամով վաճառել է նրան: Այդ աղջիկն իր ներկայությամբ կշռել է կուլոնը, այն իր հիշելով մոտ 3 գրամ էր: Դրանից հետո դուրս է եկել ոսկու շուկայից և գումարը ծախսել ընտանիքի կարիքների համար: Չի կարող կոնկրետ հիշել, թե ում է վաճառել այդ ոսկյա կուլոնը, քանի որ այդ ամենը տևել է րոպեներ և իր մեջ չի տպավորվել ոչ աշխատակիցը, ոչ էլ նրա սեղանի տեղը: Երկրորդ անգամ կողոպուտ կատարել է 2014թ. հուլիս ամսվա սկզբերին, կոնկրետ օրը և ժամը չի հիշում, երբ գտնվել է Հր. Քոչարի փողոցի վրա` Քոչար-Վաղարշյան փողոցների խաչմերուկում, տեսել է մայր ու աղջկա, ովքեր քայլում էին դեպի Գյուլբենկյան-Քոչար փողոցների խաչմերուկ: Տեսնելով, որ մոր պարանոցից կախված է ոսկյա շղթա, քայլել է նրանց հետևից, որից հետո նրանք ՙԲռավո՚ ռեստորանային համալիրի հակառակ մայթից, թեքվել են շենքերի բակ, իսկ ինքը գնացել է նրանց հետևից: Այդ շենքերի բակում թիկունքի կողմից մոտեցել է այդ կնոջը և աջ ձեռքով պոկելով նրա պարանոցի ոսկյա շղթան դիմել փախուստի, շենքերի արանքներով փախել է դեպի Գյուլբեկյան-Հր.Քոչար փողոցների խաչմերուկ և նստելով պատահական տաքսի ավտոմեքենա գնացել է Սեբաստյա փողոցի վրա` Երևան Սիթի սուպերմարկետի դիմաց գտնվող ոսկու շուկա: Տաքսու մեջ տեսել է, որ այդ շղթայի վրա կա նաև փոքր խաչ: Մտնելով ոսկու շուկա մոտեցել է մի սեղանի, որի աշխատակիցը տղամարդ էր և նրան է տվել շղթան ու խաչը և ասել, որ վաճառում է: Այդ տղան կշռել է խաչն ու շղթան, որը կազմել է մոտ 18-20 գրամ և ասել, որ կարող է վճարել 200.000 ՀՀ դրամ գումար, ինքը համաձայնել է և վերցնելով գումարը հեռացել: Դրանից հետո 2014թ. հուլիսի վերջերին, կոնկրետ օրը չի հիշում, երբ նորից գտնվել է Հր.Քոչար-Վաղարշյան փողոցների խաչմերուկում, նկատել է, որ մի կին Վաղարշյան փողոցի վրա դրսում առկա բանջարեղենի տաղավարից առևտուր է կատարում: Նկատել է, որ նրա պարանոցին եղել է ոսկյա շղթա, որոշել է հափշտակել այն: Հետևելով այդ կնոջը տեսել է, որ նա վերջացրել է առևտուրը և քայլում է դեպի փողոցի հակառակ կողմը` շենքի բակ: Ինքը սկսել է հետևել նրան, երբ այդ կինը մտել է շենքի բակ, նրան մոտեցել է ևս մի կին, որից հետո նրանք երկուսով քայլել են դեպի շքամուտք: Այդ շենքի 2-րդ կամ 3-րդ շքամուտքի մոտ ինքն արագ քայլերով թիկունքի կողմից մոտեցել է այդ կանանց, աջ ձեռքով քաշել գեր կնոջ պարանոցից կախված ոսկյա շղթան և այն պոկելուց և վերցնելուց հետո, շենքերի բակով դիմել է փախուստի: Դուրս գալով Հր.Քոչարի փողոց, նստել է պատահական տաքսի ավտոմեքենա և նորից գնացել Սեբաստիա փողոցի վրա գտնվող նույն ոսկու շուկան: Այս անգամ մոտեցել մեկ այլ տաղավարի, որի աշխատակիցը նույնպես տղամարդ էր, նրան ցույց տվել շղթան, որի վրա կար նաև տերևանման կուլոն և ասել, որ վաճառում է: Այդ տղան կշռելով շղթան և կուլոնը, ասել, որ դրանք ընդհանուր մոտ 20 գրամ են և առաջարկել դրա դիմաց 185.000 ՀՀ դրամ գումար, ինքը համաձայնել է և վերցնելով գումարը հեռացել: Նշել է, որ այն կինը ումից հափշտակել է վերը նշված ոսկյա շղթան տերևաձև կուլոնով, կլիներ մոտ 50 տարեկան, ուներ գեր կազմվածք: Չորրորդ անգամ ոսկյա շղթա է հափշտակել 2014թ. օգոստոս ամսվա կեսերին, նորից կոնկրետ օրը չի հիշում, առավոտյան ժամը 07:30-ից 08-ի սահմաններում գտնվել է ՙՀաղթանակ՚ զբոսայգու հետևի հատվածում` Բաբայան փողոցի վրա, Պաշտպանության նախարարության գլխավոր շտաբի դիմաց: Այդ ժամանակ տեսել է, որ մոտ 65 տարեկան մի կին է քայլում այդ փողոցով, ում պարանոցից կախված է ոսկյա շղթա: Տեսնելով, որ շրջակայքում այլ անձ չկա, արագ քայլերով թիկունքի կողմից մոտեցել է այդ կնոջը և կրկին աջ ձեռքով քաշելով և պոկելով նրա պարանոցից կախված շղթան, դիմել է փախուստի: Փախել դեպի Ազատության պողոտայի և Բաբայան փողոցի խաչմերուկ և մտնելով միջանցիկ մուտք, շենքերի բակով դիմել է փախուստի: Նստելով պատահական տաքսի ավտոմեքանա նորից գնացել է Սեբաստիա փողոցի վրա գտնվող ոսկու շուկա, սպասել, որ շուկան բացվի: Բացվելուց հետո մոտեցել է մեկ այլ տաղավարի և դրա աշխատակցին, ով տղամարդ էր, տվել է շղթան և ասել, որ վաճառում է: Այդ տղան կշռել է շղթան, այն իր հիշելով 12 գրամ էր և դրա դիմաց առաջարկել է մեկ գրամի դիմաց 24 դոլար գումար: Ինքը համաձայել է և վերցնելով մոտ 290 դոլար գումարը հեռացել է: Նշված շղթայի վրա եղել է նաև խաչ: Ոսկու շուկայի աշխատակիցը ստուգելով ասել է, որ այն արծաթից է, ինքն էլ չի վաճառել այն: Վերջին անգամ կողոպուտ է կատարել 2014թ. օգոստոս ամսվա վերջերին, նորից օրը չի հիշում: Այդ օրը ժամը 08-ի սահմաններում դուրս է եկել աշխատանքից և գնացել նորից Հր.Քոչար և Վաղարշյան փողոցների խաչմերուկ: Ժամը 10:00-ի սահմաններում, երբ ինքը նստած է եղել Հր.Քոչար փողոցի վրա գտնվող ՙԿրպակ՚ սուպերմարկետի դիմացի կանգառի նստարանին, այդ ժամանակ տեսել, որ մոտ 45 տարեկան մի կին մտնում է ՙԿրպակ՚ սուպերմարկետ և նրա պարանոցից կախված է ոսկյա շղթա: Տեսնելով այդ կնոջը, որոշել է գողանալ նրա ոսկյա շղթան: Սպասել է մինչև վերջինս դուրս է եկել խանութից, որից հետո հետևել է նրան, տեսել, որ մածուն է գնել ու քայլել է դեպի այն շենքը, որի դիմաց ինքը նախկինում կողոպտել էր այն գեր կնոջը, մտել այդ շենքի առաջին մուտք, սակայն ինքը չի հասցրել այդ անգամ հափշտակել նրա շղթան: Դրանից մոտ մեկ րոպե հետո այդ կինը նորից դուրս է եկել տանից և գնացել շենքի հակառակ մայթում գտնվող միրգ-բանջարեղենի վաճառքի կետ, կատարել գնումներ և նորից վերադարձել նույն շքամուտք: Այդ ողջ ընթացքում ինքը նորից հետևել է նրան և տեսնելով, որ նորից գնում է տուն, արագ առաջ է անցել նրանից և մտել վերը նշված շքամուտք: Երբ այդ կինը նորից մտել է շքամուտք, հենց առաջին հարկի աստիճանների վրա ինքը դուրս է եկել նրա դիմաց և պոկելով նրա պարանոցի ոսկյա շղթան, դիմել է փախուստի` դեպի Կոմիտասի պողոտա և նստելով երթուղային տաքսի ավտոմեքենա գնացել Սեբաստիա փողոցի վրա գտնվող ոսկու շուկա: Ճանապարհին տեսել է, որ շղթայի մի մասն է հափշտակել, իսկ մյուս մասը հավանաբար մնացել էր այդ կնոջ մոտ: Նշված ոսկյա շղթան վաճառել է Սեբաստիա փողոցի վրա գտնվող ոսկու շուկայի այն աշխատակցին, որին վաճառել էր նաև վերը նշված կանանցից մեկից հափշտակված ոսկյա շղթաներից մեկը: Նշված շղթան կշռելուց հետո պարզվել է, որ 3.03 գրամ է և դրա դիմաց ոսկու շուկայի աշխատակիցն իրեն տվել է մոտ 30.000 ՀՀ դրամ գումար: Նշել է, որ իր կողմից պատճառած վնասը պատրաստ է վերականգնել: Նշել է նաև, որ այդ ոսկյա շղթաների վաճառքից ստացված գումարները ծախսել է ընտանիքի կարիքների համար: Ընդհանուրից վերականգնել է միայն արծաթե խաչը և Հասմիկ Իսրայելյանի 50.000 դրամ գումարը: Գայանե Դավթյանի վզնոցը եղել է 585 հարգի: Հարգը հայտնել է գնողը: Պատրաստ է վերականգնել ինչքան որ հափշտակել է:
Ամբաստանյալին մեղսագրված հանցանքը, հիմնավորվել է նաև հետևյալ ապացույցներով.
Տուժող Գայանե Դավթյանի ցուցմունքով այն մասին, որ բնակվում է Երևանի Վաղարշյան փողոցի թիվ 18 շենքում: Բնակարանը գտնվում է շենքի 2-րդ հարկում: 2014թ. օգոստոսի 31-ին, ժամը 10-ի սահմաններում շուկայից գնումներ կատարելուց հետո տուն գնալիս մտել է շքամուտք և աստիճաններով վեր բարձրացել: Այդ ընթացքում շքամուտքի աստիճաններից ներքև է իջել մի տղամարդ, ով մի ձեռքով փակել է դեմքը և հարձակվելով իր վրա մյուս ձեռքով քաշել պոկել է իր պարանոցի ոսկյա շղթան ու իրեն հրելով վայր է գցել և դիմել է փախուստի: Շղթան կշռել է 35 գրամ և պատրաստված է եղել 750 հարգի ոսկուց: Շղթան քաշել պոկելու հետևանքով դրա մի մասըª 8 գրամ քաշով մնացել է իր մոտ, իսկ մնացած 27 գրամը հափշտակվել է, որի հետևանքով իրեն պատճառվել է 699.000 ՀՀ դրամի նյութական վնաս: Հետագայումª քրեական գործի նախաքննության ընթացքում ինքը ճանաչել է ամբաստանյալին, որպես իր նկատմամբ կողոպուտ կատարողի: Ամբաստանյալ Գուրգեն Ասատրյանն իր հերթին ճանաչել է իրեն և հայտնել, որ նա է եղել իր նկատմամբ կողոպուտ կատարողը: Տուժողը հայտնեց նաև, որ ամբաստանյալի կողմից իր պարանոցի շղթան քաշել պոկելու և իրեն հրելու և վայր գցելու հետևանքով պարանոցի և ծնկների շրջանում ստացել է մարմնական վնասվածքներ: Ներկայացրել է 1620 ԱՄՆ դոլարին համարժեք ՀՀ դրամ գումարի վնասի փոխհատուցման պահանջի քաղաքացիական հայց, որպես ապացույց ներկայացնելով ոսկյա շղթայի գնման հաշիվ-ֆակտուրան:
Տուժող Հասմիկ Սուրենի Իսրայելյանի ցուցմունքով այն մասին, որ 2014թ. հունիսի 25-ին ժամը 13.30-ի սահմաններում աշխատանքից դուրս է եկել ընդմիջման, գնացել Կոմիտաս 5 հասցեում գտնվող ՙԴոմանի՚ խանութ: Այնուհետև մի 50 քայլ բարձրացել է վերև, 5 հարկանի շենքի դիմաց, իրեն է մոտեցել Գուրգեն Ասատրյանը, ձեռքը գցել իր պարանոցից գցված շղթային և քաշել: Շղթան կոճկված էր դեպի ներքև: Փականը բացվել է և նրա ձեռքին մնացել էր միայն կուլոնը: Գ.Ասատրյանը վարանել կանգնել էր, մտադրություն ուներ վերցնելու նաև վզնոցը: Ինքն այդ ժամանակ բռնել է վզնոցը և բղավել: Դա տեղի է ունեցել 1+1 խանութի դիմաց և վաճառողուհին և բոլորը դա տեսել են: Երբ բղավել է, ամբաստանյալը դիմել է փախուստի` դեպի շենքի բակ: Ինքը հանել է վզնոցը և դրել պայուսակի մեջ: Վազել է նրա հետևից, սակայն չի հասել: Զանգահարել է ոստիկանություն: Ամբաստանյալին ճանաչել է ճանաչման ժամանակ: Կատարված հափշտակությամբ իրեն պատճառվել է 80.000 ՀՀ դրամի գույքային վնաս: Ամբաստանյալը վերականգնել է պատճառված վնասը, ինքն այլևս նրանից որևէ նյութական պահանջ չունի:
Տուժող Լուսիկ Սմբատի Գրիգորյանի ցուցմունքով այն մասին, 2014թ. հուլիսի 26-ին ժամը 14.00-ի սահամաններում դուրս է եկել տանից` գնումներ կատարելու նպատակով: Տուն վերադառնալիս Վ.Վաղարշյան փողոցի 18 շենքի բակում հանդիպել է հարևանուհուն` Մարինե Վարդանյանին: Երբ հասել են շքամուտքի մոտ թիկունքից Գուրգեն Ասատրյանը մոտեցել է իրեն, պոկել պարանոցին գցված ոսկյա շղթան և դիմել փախուստի: Ինքը վազել է Գ.Ասատրյանի հետևից, սակայն չի հասել: Վերջինս շենքի բակով փախել է դեպի Հր.Քոչարի փողոց: Ճանաչման ժամանակ ինքը ճանաչել է ամբաստանյալին: Կատարված հափշտակությամբ իրեն պատճառվել է 500.000 ՀՀ դրամի գույքային վնաս: Ոսկին եղել է 32 գրամ, կուլոնը` 5 գրամ, շղթան` 28 գրամ, հարգը` 580: Իր տղաներն էին վզնոցը գնել իր համար մեկ տարի առաջ: Նշել է, որ ամբաստանյալի մոտ ինչ-որ կտրող բան կար, նա չի քաշել, կտրելով է պոկել: Հաստ է եղել շղթան, եթե քաշեր իրեն ինչ որ մի վնաս կտար: Միանգամից կտրել է և փախել: Ամբաստանյալը ինչ որ բանով կտրել-պոկել է շղթան, իր կարծիքով շիպցիով է կտրել: Պահանջում է իրեն պատճառված վնասը:
Վկա Մարինե Խաչիկի Վարդանյանի ցուցմունքով այն մասին, դեպքը տեղի է ունեցել վարդավառից մեկ օր առաջ: Խանութից դուրս գալիս հանդիպել է Լուսիկ Գրիգորյանին, միասին գնացել են դեպի իրենց շենքի մուտքը: Վզնոցը գողանալու պահին միասին են եղել: Ինքը այդ տղայի դեմքը չի տեսել: Նա կանգնած հեռախոսով խոսում էր, սովորական անցորդ էր: Հետո երբ արդեն շքամուտք պետք է մտնեին, Լուսիկը գոռաց, որ վզնոցը տարավ: Ինքը շրջվել է և տեսել, որ այդ գողացողը վազել է, բայց ինքը նրա դեմքը չի տեսել: Լուսիկը վազել է նրա հետևից, սակայն չի հասել: Այդ տղան շենքերի արանքով փախել է դեպի Հր.Քոչարի փողոց:
Տուժող Թամարա Գյորգիի Սինանովայի նախաքննության ժամանակ տված ցուցմունքով այն մասին, որ 2014թ. օգոստոսի 20-ին, ժամը 07.15-ի սահմաններում, միայնակ զբոսնել է ՙՀաղթանակի՚ զբոսայգու մոտակայքում` Պաշպանության նախարարության դիմացի հատվածում: Զբոսնելու ժամանակ հանկարծակի իր հետևից ոտնաձայներ է լսել, սակայն ուշադրություն չդարձնելով շարունակել է քայլել: Հանկարծակի իր թիկունքից ինչ-որ անձ քաշել-պոկելու եղանակով հափշտակել է պարանոցից գցված ոսկյա շղթան` արծաթյա խաչով և դիմել փախուստի: Այդ տղան հաղթանդամ էր, ճաղատ, հագին եղել է սև գույնի տաբատ, սպիտակ երկարաթև վերնաշապիկ: Նշել է, որ այդ տղային տեսնելուն պես չի կարող ճանաչել: Կատարված հափշտակությամբ իրեն պատճառվել է 250.000 ՀՀ դրամի գույքային վնաս:
Տուժող Անահիտ Վլադիմիրի Հարությունյանի նախաքննության ժամանակ տված ցուցմունքով այն մասին, որ 2014թ. հուլիսի 11-ին ժամը 14.00-ի սահմաններում աղջկա` Տաթևիկ Մուրադյանի հետ իրենց` Սունդուկյան 15 շենքի դիմացով քայլելով գնացել է Հր.Քոչար փողոցի խաչմերուկում գտնվող շուկա, կատարել գնումներ և աղջկա հետ զրուցելով վերադարձել տուն: Տուն վերադառնալու ճանապարհին Հր.Քոչարի 14 շենքի բակում, բարձունքն իջնելիս ժամը 15.00-ի սահմաններում հանկարծակի իր հետևից ինչ-որ անձ երկու ձեռքերով բռնել է պարանոցը, ձեռքերով քաշել ոսկյա շղթան: Ինքն այդ ժամանակ ձեռքին առկա տոպրակներով հարվածել է այդ տղային` վզնոցը թողելու նպատակով: Մի քանի անգամ քաշելուց հետո, այդ տղան հափշտակել է իր ոսկյա վզնոցը խաչով և իրենց եկած ճանապարհով փախել դեպի Հր.Քոչարի փողոցի կողմ, այնուհետև անհետացել է իր տեսադաշտից: Նշել է, որ այդ տղան կլիներ 35-ից 40 տարեկան, սպիտակ մազերով, հագին եղել է սպիտակ վերնաշապիկ, մուգ գույնի տաբատ, սպիտակ մաշկով, կլորավուն դեմքով, մոտ 1.80 մետր հասակով: Վերջինիս տեսնելու դեմքում հնարավոր է ճանաչի: Կատարված հափշտակությամբ իրեն պատճառվել է 500.000 ՀՀ դրամի գույքային վնաս:
Վկա Տաթևիկ Արմենի Մուրադյանի ցուցմունքով այն մասին, որ 2014թ. հուլիսի 11-ին ժամը 14.00-ին մոր` Անահիտ Հարությունյանի հետ իրենց շենքի դիմացով քայլելով գնացել են դեպի Հր.Քոչար փողոց` գնումներ կատարելու նպատակով: Տուն վերադառնալու ճանապարհինª Հր.Քոչարի 14 շենքի բակում ժամը 15.00-ի սահմաններում մի տղա հանկարծակի իր մոր հետևից ձեռքերով բռնել է մոր պարանոցին գցված վզնոցից և քաշել: Մի քանի անգամ քաշելով, վերջինս պոկել է ոսկյա շղթան իր խաչով և փախել դեպի Հր.Քոչարի փողոցի կողմը: Այդ տղան կլիներ 35-ից 40 տարեկան, մոտ 1.80 մետր հասակով, գլուխն իջացրած դեպի ներքև: Նշել է, որ այդ տղային տեսնելու դեպքում չի կարող ճանաչել, քանի որ այդ պահին վախեցել է և չի հիշում վերջինիս:
Գուրգեն Ասատրյանին տուժող Գայանե Դավթյանին ճանաչման ներկայացնելու արձանագրությունով, որի ժամանակ Գ.Դավթյանը ճանաչել է իր ոսկյա վզնոցի մի մասը հափշտակած Գ.Ասատրյանին:
Գուրգեն Ասատրյանին տուժող Հասմիկ Իսրայելյանին ճանաչման ներկայացնելու արձանագրությունով, որի ժամանակ Հ.Իսրայելյանը ճանաչել է իր ոսկյա կուլոնը հափշտակած Գ.Ասատրյանին:
Գուրգեն Ասատրյանին տուժող Լուսիկ Գրիգորյանին ճանաչման ներկայացնելու արձանագրությունով, որի ժամանակ Լ.Գրիգորյանը ճանաչել է իր ոսկյաշ ղթան հափշտակած Գ.Ասատրյանին:
Գ.Ասատրյանից առգրավված արծաթե խաչը տուժող Թ.Սինանովային ճանաչման ներկայացնելու արձանագրությունով, որի ժամանակ տուժող Թ.Սինանովան ճանաչել է իրենից հափշտակված արծաթե խաչը:
Գ.Ասատրյանից առգրավված, զննված և տուժող Թ.Սինանովային ի պահ հանձնված արծաթե խաչն իրեղեն ապացույց ճանաչելու մասին որոշմամբ:
Դեպքի օրերը Գ.Ասատրյանի հագին եղած, վերջինից առգրավված, զննված հագուստներն իրեղեն ապացույց ճանաչելու մասին որոշմամբ:
Դատաապրանքագիտական փորձաքննության թիվ 41981404 եզրակացությամբ, համաձայն որի, փորձաքննությանը ներկայացված խաչ-կախազարդի միջին շուկայական արժեքը, առկա ապրանքային վիճակի հաշվառմամբ, 2014թ. օգոստոսի 20-ի դրությամբ, կարող էր կազմել մոտ 10.000 ՀՀ դրամ:
Դատաբժշկական փորձաքննության թիվ 2618 եզրակացությամբ, համաձայն որի, Գ.Դավթյանի մարմնական վնասվածքներն ըստ բժշկական փասթաթղթերի և օբյեկտիվ ուսումնասիրության տվյալների` ձախ ուսահոդի, ձախ նախաբազկի, ձախ ծնկանհոդի շրջանների քերծվածքների ձևով հասցվել են բութ, կոշտ առարկաներով, հնարավոր է որոշմամբ նշված ժամկետում, որոնք առողջությանը թեթև վնասի հատկանիշներ չեն պարունակում:
Դատաբժշկական փորձաքննության թիվ 2430 եզրակացությամբ, համաձայն որի, Թ.Սինանովայի մարմնական վնասվածքը` պարանոցի ձախ կեսի ստորին երրորդական առաջակողմնային մակերեսի արյունազեղման ձևով հետևանք է բութ կոշտ առարկայի ներգործության, հնարավոր է նշված ժամկետին և հանգամանքներում, որը առողջության թեթև վնասի հատկանիշներ չի պարունակում:
Վերծանումը զննության ենթարկելու արձանագրությունով, այլ փաստաթուղթն ապացույց ճանաչելու մասին որոշումով, համաձայն որի, Գ.Ասատրյանն իր բջջային հեռախոսահամարը` 099 55-75-52 օգտագործել է հանցագործության կատարման վայրերում:
11.07.2014թ. Անահիտ Հարությունյանից հաղորդում ընդունելու մասին արձանագրությամբ այն մասին, որ 2014թ. հուլիսի 11-ին ժամը 15.00-ի սահմաններում Հր.Քոչար 14 շենքի բակում անհայտ անձը քաշել-պոկելու եղանակով պարանոցից հափշտակել է ոսկյա շղթան իր խաչով և դիմել փախուստի` պատճառելով 500.000 ՀՀ դրամի գույքային վնաս:
26.07.2014թ. Լուսիկ Գրիգորյանից հաղորդում ընդունելու մասին արձանագրությամբ այն մասին, որ 2014թ. հուլիսի 26-ին ժամը 14.00-ի սահմաններում Վ.Վաղարշյան 18 շենքի մոտ անհայտ անձը քաշել-պոկելու եղանակով պարանոցից հափշտակել է ոսկյա շղթան կուլոնով և դիմել փախուստի` պատճառելով 500.000 ՀՀ դրամի գույքային վնաս:
31.08.2014թ. Գայանե Դավթյանից հաղորդում ընդունելու մասին արձանագրությամբ այն մասին, որ 2014թ. օգոստոսի 31-ին ժամը 10.00-ից 10.30-ն ընկած ժամանակահատվածում Վ.Վաղարշյան 18 շենքի 6-րդ շքամուտքի դիմաց անհայտ անձը քաշել-պոկելու եղանակով պարանոցից հափշտակել է ոսկյա շղթայի մի մասը և դիմել փախուստի` պատճառելով 493.400 ՀՀ դրամի գույքային վնաս:
05.06.2014թ. Հասմիկ Իսրայելյանից հաղորդում ընդունելու մասին արձանագրությամբ այն մասին, որ 2014թ. հունիսի 25-ին ժամը 13.30-ից 13.40-ն ընկած ժամանակահատվածում Կոմիտասի 5 հասցեում գտնվող խանութի դիմաց անհայտ անձը քաշել-պոկելու եղանակով պարանոցից հափշտակել է ոսկյա կուլոնը և դիմել փախուստի` պատճառելով 80.000 ՀՀ դրամի գույքային վնաս:
20.08.2014թ. Թամարա Սինանովայից հաղորդում ընդունելու մասին արձանագրությամբ այն մասին, որ 2014թ. օգոստոսի 20-ին ժամը 07.15-ին Բաբայան 8 շենքի դիմաց ՙՀաղթանակ՚ զբոսայգու մոտ անհայտ անձը քաշել-պոկելու եղանակով պարանոցից հափշտակել է ոսկյա շղթան իր արծաթյա խաչով և դիմել փախուստի` պատճառելով 250.000 ՀՀ դրամի գույքային վնաս:
Դեպքի վայրերի զննության արձանագրություններով, համաձայն որի, Գ.Ասատրյանը դեպքի վայրի զնության ժամանակ մատնացույց է արել 5 դրվագ կատարած հափշտակության և գողոնի վաճառելու վայրերը:
4.Դատարանի իրավական վերլուծությունները.
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ` դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալ Գուրգեն Ասատրյանը ուրիշի գույքի բացահայտ հափշտակություն կատարելու դիտավորությամբ, 2014թ. հունիսի 25-ին ժամը 13:30-ից ժամը 13:40-ն ընկած ժամանակահատվածում, Երևան քաղաքի Կոմիտասի պողոտայի թիվ 9 հասցեում գտնվող ՙ1+1՚ խանութի դիմաց, քաշել-պոկել է Հասմիկ Սուրենի Իսրայելյանի պարանոցի ոսկյա շղթան, որի հետևանքով շղթան պոկվել և ընկել է Հ.Իսրայելյանի հագուստների մեջ, որից հետո բացահայտ հափշտակելով Հ.Իսրայելյանի շղթայի վրա անցկացված 80.000 ՀՀ դրամ արժողության կախազարդը դիմել է փախուստի` Հ.Իսրայելյանին պատճառելով զգալի չափի` 80.000 ՀՀ դրամի գույքային վնաս:
Բացի այդ, Գուրգեն Ասատրյանը ուրիշի գույքի բացահայտ հափշտակություն կատարելու դիտավորությամբ, 2014թ. հուլիսի 11-ին ժամը 15.00-ի սահմաններում, Հր.Քոչարի փողոցի թիվ 14 շենքի բակում, քաշել-պոկելու եղանակով հափշտակել է Անահիտ Վլադիմիրի Հարությունյանի պարանոցի ոսկյա շղթան և խաչը ու դիմել փախուստի` Ա.Հարությունյանին պատճառելով զգալի չափի` 500.000 ՀՀ դրամ գույքային վնաս:
Այնուհետև, Գուրգեն Ասատրյանը ուրիշի գույքի բացահայտ հափշտակություն կատարելու դիտավորությամբ, 2014թ հուլիսի 26-ին ժամը 14-ի սահմաններում, Երևան քաղաքի Վաղարշ Վաղարշյան 18 շենքի 3-րդ շքամուտքի դիմաց Լուսիկ Սմբատի Գրիգորյանի պարանոցից քաշել-պոկելու եղանակով բացահայտ հափշտակել է վերջինիս պատկանող, ընդհանուր 32 գրամ քաշով ոսկյա շղթան իր ոսկյա կախազարդով և դիմել փախուստի` Լ.Գրիգորյանին պատճառելով զգալի չափի` 500.000 ՀՀ դրամի գույքային վնաս:
Դրանից հետո, Գուրգեն Ասատրյանը ուրիշի գույքի բացահայտ հափշտակություն կատարելու դիտավորությամբ, 2014թ. օգոստոսի 20-ին ժամը 07:15-ի սահմաններում Երևան քաղաքի Բաբայան 8 հասցեի մոտակայքում քաշել-պոկելու եղանակով բացահայտ հափշտակել է Թամարա Գեորգիի Սինանովայի պարանոցի ոսկյա շղթան իր արծաթյա խաչով և դիմել փախուստի` վերջինիս պատճառելով զգալի չափի` 250.000 ՀՀ դրամի գույքային վնաս:
Բացի այդ, Գուրգեն Ասատրյանը ուրիշի գույքի բացահայտ հափշտակություն կատարելու դիտավորությամբ, 2014թ. օգոստոսի 31-ին ժամը 10:00-ի սահմաններում, Վաղարշ Վաղարշյան 18 շենքի 6-րդ շքամուտքում բացահայտ հափշտակել է Գայանե Ազատի Դավթյանի պարանոցի` ընդհանուր 35 գրամ քաշով ոսկյա շղթայի մի մասը և դիմել փախուստի` Գ.Դավթյանին պատճառելով խոշոր չափի` 1.700 ԱՄՆ դոլարին համարժեք 699.000 ՀՀ դրամի գույքային վնաս:
Այսինքնª Գ.Ասատրյանը կատարել է հանցավոր արարքներ, որոնք համապատասխանում են ՀՀ քրեական օրենսգրքի 176 հոդվածի 1-ին մասով և 176 հոդվածի 2-րդ մասի 2-րդ կետով նախատեսված հանցագործության հատկանիշներին:
Կատարած արարքի համար ամբաստանյալ Գուրգեն Ալեքսանի Ասատրյանը ենթակա է քրեական պատասխանատվության և պատժի:
ՀՀ քրեական օրենսգրքի 48 հոդվածի համաձայն`
ՙ1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից ու ազատություններից օրենքով նախատեսված զրկմամբ կամ դրանց սահմանափակմամբ:
2. Պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61 հոդվածի համաձայն`
ՙ1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործության՝ հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում՝ պատասխանատվությունը և պատիժը մեղմացնող կամ ծանրացնող հանգամանքներով:
3. Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները՚:
Ամբաստանյալի նկատմամբ պատիժ նշանակելիս, դատարանը հաշվի է առնում նրա կատարած արարքների հանրության համար վտանգավորության աստիճանը և բնույթը, ինչպես նաև հանցավորի անձը:
Որպես ամբաստանյալի անձը բնութագրող տվյալներ, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա բնութագրվում է դրական, նրա խնամքին են գտնվում երկու անչափահաս երեխաները /Ալեքս Գուրգենի Ասատրյանª ծնված 28.12.2009թ.-ին, Սուսաննա Գուրգենի Ասատրյանª ծնված 27.07.2006թ.-ին/ և ծնողները:
Ամբաստանյալի պատասխանատվությունը և պատիժը ծանրացնող հանգամանքներ առկա չեն:
Հաշվի առնելով Գուրգեն Ասատրյանի կատարած արարքների հանրության համար վտանգավորության աստիճանը և բնույթը, նրա անձը բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 176 հոդվածի 1-ին և 2-րդ մասի սանկցիաներով նախատեսված է պատիժ նաև ազատազրկման ձևով, դատարանը գտնում է, որ պատժի նպատակներին հասնելու համար ամբաստանյալ Գուրգեն Ալեքսանի Ասատրյանի նկատմամբ ՀՀ քրեական օրենսգրքի 176 հոդվածի 1-ին մասով և 176 հոդվածի 2-րդ մասի 2-րդ կետով նախատեսված հանցավոր արարքներ կատարելու համար պատիժ պետք է նշանակել ազատազրկման ձևով:
Նկատի ունենալով, որ ամբաստանյալ Գուրգեն Ասատրյանը կատարել է մեկից ավելի հանցագործություններ, դատարանը գտնում է, որ նրա նկատմամբ պատիժ պետք է նշանակել ՀՀ քրեական օրենսգրքի 66 հոդվածով նախատեսված կարգով` հանցանքների համակցությամբª ազատազրկման ձևով նշանակված պատիժները մասնակիորեն գումարելու սկզբունքով։
Ամբաստանյալ Գ.Ասատրյանը նշանակվող պատիժը պետք է կրի ՀՀ ԱՆ համապատասխան քրեակատարողական հիմնարկում:
Անդրադառնալով Գուրգեն Ասատրյանի խափանման միջոցի հարցին, դատարանը գտնում է, որ նրա նկատմամբ որպես խափանման միջոց ընտրված չհեռանալու մասին ստորագրությունը պետք է վերացնել, նկատի ունենալով, որ վերջինիս նկատմամբ մեկ այլ քրեական գործով որպես խափանման միջոց է կիրառվել կալանավորումը և սույն թվականի սեպտեմբերի 18-ից նա գտնվում է կալանքի տակ:
Դատարանը գտնում է, որ տուժող Անահիտ Հարությունյանին պետք է իրավունք վերապահել քաղաքացիական հայց հարուցել քաղաքացիական դատավարության կարգով:
Տուժող Հասմիկ Իսրայելյանի քաղաքացիական հայցի հարցը պետք է համարել լուծված, նկատի ունենալով, որ նա ամբաստանյալից որևէ նյութական պահանջ չունի, որի մասին տուժողը հայտնել է դատաքննության ժամանակ:
Անդրադառնալով տուժողներ Գայանե Դավթյանի, Լուսիկ Գրիգորյանի կողմից ներկայացված քաղաքացիական հայցերին, դատարանը գտնում է, որ դրանք ենթակա են բավարարման հետևյալ պատճառաբանությամբ.
Համաձայն ՀՀ քրեական դատավարության օրենսգրքի 158 հոդվածի 2-րդ մասի, քաղաքացիական հայց հարուցվում է կասկածյալի, մեղադրյալի կամ նրա դեմ, ում վրա կարող է գույքային պատասխանատվություն դրվել մեղադրյալի գործողությունների համար:
Քրեական դատավարությունում քաղաքացիական հայցի առարկան է կազմում հանցագործությամբ անմիջականորեն պատճառված գույքային վնասը, որի հատուցման մասին պահանջը հայցվորը ներկայացնում է մեղադրյալին կամ նրա գործողությունների համար պատասխանատվություն կրող անձին: Քաղաքացիական հայցի առարկայի որոշման համար անհրաժեշտ է, որպեսզի վնասն անմիջականորեն հանցագործությամբ պատճառված լինի:
Տվյալ դեպքում հանցագործությամբ անմիջականորեն Գայանե Դավթյանին պատճառված վնասը կազմում է 1620 ԱՄՆ դոլար: Լուսիկ Գրիգորյանին պատճառված վնասը կազմում է 500.000 ՀՀ դրամ: Թամարա Սինանովային պատճառված վնասը կազմում է 250.000 ՀՀ դրամ:
Համաձայն ՀՀ քրեական դատավարության օրենսգրքի 164 հոդվածի, բացառիկ դեպքերում, երբ քաղաքացին զրկված է իր գույքային շահերն անձամբ պաշտպանելու հնարավորությունից, դատարանն իրավունք ունի սեփական նախաձեռնությամբ որոշում կայացնել հանցագործության հետևանքով պատճառված վնասը հատուցելու մասին:
Դատարանը հաշվի առնելով, որ տուժող Թամարա Սինանովան վատառողջ է և զրկված է իր գույքային շահերն անձամբ պաշտպանելու հնարավորությունից, գտնում է որ Գուրգեն Ասատրյանից պետք է բռնագանձել նաև հանցագործությամբ անմիջականորեն Թամարա Սինանովային պատճառված նյութական վնասը:
Դատարանը գտնում է, որ ամբաստանյալ Գուրգեն Ասատրյանից հօգուտ տուժող Գայանե Դավթյանի պետք է բռնագանձել 1620 ԱՄՆ դոլարին համարժեք 777.600 (յոթ հարյուր յոթանասունյոթ հազար վեց հարյուր) ՀՀ դրամ գումար, հօգուտ տուժող Լուսիկ Գրիգորյանի պետք է բռնագանձել 500.000 (հինգ հարյուր հազար) ՀՀ դրամ գումար, հօգուտ Թամարա Սինանովայի պետք է բռնագանձել 250.000 (երկու հարյուր հիսուն հազար) ՀՀ դրամ գումար:
Անդրադառնալով իրեղեն ապացույցների տնօրինման հարցին, դատարանը գտնում է, որ Արաբկիրի քննչական բաժնի քննիչի 04.09.2014թ. որոշմամբ իրեղեն ապացույց ճանաչված Գուրգեն Ասատրյանից առգրավված փիրուզագույն մայկան, սպիտակ երկարաթև վերնաշապիկը, սև տաբատը և սև կոշիկները պետք է վերադարձնել նրան: Արաբկիրի քննչական բաժնի քննիչի 09.09.2014թ. որոշմամբ իրեղեն ապացույց ճանաչված Գուրգեն Ասատրյանից առգրավված և տուժող Թ.Սինանովային ի պահ հանձնված արծաթե խաչը պետք է թողնել վերջինիս տնօրինությանը:
Դատարանը գտնում է, որ քննիչի 07.10.2014թ.-ի որոշմամբ այլ փաստաթուղթն ապացույց ճանաչված ՙԱրմենՏել՚ ՓԲԸ-ից ստացված, զննության արձանագրությանը կցված լազերային սկավառակը պետք է պահել սույն քրեական գործի հետ:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 365, 369-372 հոդվածներով, դատարանը

Վ Ճ Ռ Ե Ց

Գուրգեն Ալեքսանի Ասատրյանին մեղավոր ճանաչել ՀՀ քրեական օրենսգրքի 176 հոդվածի 1-ին մասով /4 դրվագ/ և ՀՀ քրեական օրենսգրքի 176 հոդվածի 2-րդ մասի 2-րդ կետով նախատեսված հանցանքներ կատարելու մեջ:
ՀՀ քրեական օրենսգրքի 176 հոդվածի 1-ին մասով (Հասմիկ Իսրայելյանից զգալի չափերով գույքի բացահայտ հափշտակություն կատարելու դրվագով) Գուրգեն Ալեքսանի Ասատրյանին դատապարտել ազատազրկման մեկ (1) տարի ժամկետով:
ՀՀ քրեական օրենսգրքի 176 հոդվածի 1-ին մասով (Անահիտ Հարությունյանից զգալի չափերով գույքի բացահայտ հափշտակություն կատարելու դրվագով) Գուրգեն Ալեքսանի Ասատրյանին դատապարտել ազատազրկման մեկ (1) տարի ժամկետով:
ՀՀ քրեական օրենսգրքի 176 հոդվածի 1-ին մասով (Լուսիկ Գրիգորյանից զգալի չափերով գույքի բացահայտ հափշտակություն կատարելու դրվագով) Գուրգեն Ալեքսանի Ասատրյանին դատապարտել ազատազրկման մեկ (1) տարի ժամկետով:
ՀՀ քրեական օրենսգրքի 176 հոդվածի 1-ին մասով (Թամարա Սինանովայից զգալի չափերով գույքի բացահայտ հափշտակություն կատարելու դրվագով) Գուրգեն Ալեքսանի Ասատրյանին դատապարտել ազատազրկման մեկ (1) տարի ժամկետով:
ՀՀ քրեական օրենսգրքի 176 հոդվածի 2-րդ մասի 2-րդ կետով (Գայանե Դավթյանից խոշոր չափերով գույքի բացահայտ հափշտակություն կատարելու դրվագով) Գուրգեն Ալեքսանի Ասատրյանին դատապարտել ազատազրկման երեք (3) տարի վեց (6) ամիս ժամկետով:
ՀՀ քրեական օրենսգրքի 66 հոդվածի համաձայն, հանցանքների համակցությամբ պատիժները մասնակիորեն գումարելու միջոցով Գուրգեն Ալեքսանի Ասատրյանի նկատմամբ վերջնական պատիժ նշանակել ազատազրկում չորս (4) տարի ժամկետով:
Գուրգեն Ալեքսանի Ասատրյանի նկատմամբ ազատազրկման ձևով նշանակված պատժի սկիզբը հաշվել 18.09.2015թ.-ից, որը պետք է կրի ՀՀ ԱՆ համապատասխան քրեակատարողական հիմնարկում:
Գուրգեն Ալեքսանի Ասատրյանի նկատմամբ սույն քրեական գործով ընտրված խափանման միջոցը` չհեռանալու մասին ստորագրությունը, վերացնել:
Տուժող Գայանե Դավթյանի կողմից ամբաստանյալ Գուրգեն Ասատրյանի դեմ ներկայացված քաղաքացիական հայցը բավարարել. Գուրգեն Ալեքսանի Ասատրյանից հօգուտ Գայանե Դավթյանի բռնագանձել 1620 ԱՄՆ դոլարին համարժեք 777.600 (յոթ հարյուր յոթանասունյոթ հազար վեց հարյուր) ՀՀ դրամ գումար, որպես հանցագործությամբ պատճառված նյութական վնասի հատուցում:
Տուժող Լուսիկ Գրիգորյանի կողմից ամբաստանյալ Գուրգեն Ասատրյանի դեմ ներկայացված քաղաքացիական հայցը բավարարել Գուրգեն Ալեքսանի Ասատրյանից հօգուտ Լուսիկ Գրիգորյանի բռնագանձել 500.000 (հինգ հարյուր հազար) ՀՀ դրամ գումար, որպես հանցագործությամբ պատճառված նյութական վնասի հատուցում:
Տուժող Թամարա Սինանովայի կողմից ամբաստանյալ Գուրգեն Ասատրյանի դեմ ներկայացված քաղաքացիական հայցը բավարարել. Գուրգեն Ալեքսանի Ասատրյանից հօգուտ Թամարա Սինանովայի բռնագանձել 250.000 (երկու հարյուր հիսուն հազար) ՀՀ դրամ գումար, որպես հանցագործությամբ պատճառված նյութական վնասի հատուցում:
Տուժող Անահիտ Հարությունյանին իրավունք վերապահել քաղաքացիական հայց հարուցել քաղաքացիական դատավարության կարգով:
Տուժող Հասմիկ Իսրայելյանի քաղաքացիական հայցի հարցը համարել լուծված:
Դատավճիռն օրինական ուժի մեջ մտնելուց հետո, իրեղեն ապացույց հանդիսացողª Գուրգեն Ասատրյանից առգրավված փիրուզագույն մայկան, սպիտակ երկարաթև վերնաշապիկը, սև տաբատը և սև կոշիկները վերադարձնել նրան: Գ.Ասատրյանից առգրավված և տուժող Թ.Սինանովային ի պահ հանձնված արծաթե խաչը թողնել վերջինիս տնօրինությանը:
Ապացույց ճանաչված այլ փաստաթուղթ հանդիսացող` ՙԱրմենՏել՚ ՓԲԸ-ից ստացված, զննության արձանագրությանը կցված լազերային սկավառակը պահել սույն քրեական գործի հետ:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է`
Դատավոր` Լ. Ավետիսյան