Գործ No ԵԱՔԴ/0120/01/14

ԴԱՏԱՎՃԻՌ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՙ21՚ հոկտեմբերի 2014թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը`

նախագահությամբ` դատավոր Ա.Մկրտչյանի
քարտուղարությամբ` Օ.Կիրակոսյանի
Հ.Արտաշեսյանի
մասնակցությամբ`
մեղադրող Վ.Մկրտչյանի
տուժող Ա.Բազինյանի

Դատարանում, դռնբաց դատական նիստում քննեց քրեական գործն ըստ մեղադրանքի Գևորգ Լևոնի Ավագյանի /ծնված 1991 թվականի ապրիլի 20-ին ԼՂՀ-ում, ազգությամբ հայ, ՀՀ քաղաքացի, յոթամյա կրթությամբ, չամուսնացած, չի աշխատում, նախկինում դատված` Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 09.07.2011թ. դատավճռով ՀՀ քրեական օրենսգրքի 177-րդ հոդվածի 3-րդ մասի 1-ին կետով, 177-րդ հոդվածի 2-րդ մասի 1-ին և 3-րդ կետերով, դատապարտվել է ազատազրկման 6 տարի ժամկետով, պատժից ազատվել է ՀՀ ԱԺ 03.10.2013թ. համաներման որոշման 3-րդ կետի 1-ին ենթակետի հիման վրա, դատվածությունը չմարված, հաշվառված Կոտայքի մարզի Չարենցավան քաղաքի 4-րդ թաղամասի 24-րդ շենքի թիվ 4 բնակարանում/, մեղադրվում է ՀՀ քրեական օրենսգրքի 177-րդ հոդվածի 2-րդ մասի 2-րդ և 3-րդ կետերով:

Գործի դատավարական նախապատմությունը
2014 թվականի հունիսի 27-ին Քանաքեռ-Զեյթունի քննչական բաժնում ՀՀ քրեական օրենսգրքի 177-րդ հոդվածի 2-րդ մասի 3-րդ կետի հատկանիշներով հարուցվել է թիվ 09118914 քրեական գործը:
2014 թվականի հունիսի 27-ին Գևորգ Լևոնի Ավագյանի նկատմամբ խափանման միջոց է ընտրվել ստորագրություն` չհեռանալու մասին:
2014 թվականի հուլիսի 04-ին Գևորգ Ավագյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 177-րդ հոդվածի 2-րդ մասի 3-րդ կետով:
2014 թվականի օգոստոսի 05-ին Գևորգ Ավագյանին առաջադրված մեղադրանքի ծավալը փոփոխվել է, լրացվել, նրան նոր մեղադրանք է առաջադրվել ՀՀ քրեական օրենսգրքի 177-րդ հոդվածի 2-րդ մասի 2-րդ և 3-րդ կետերով և նա ներգրավվել է որպես մեղադրյալ:
2014 թվականի օգոստոսի 08-ին թիվ 09118914 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
2014 թվականի հոկտեմբերի 07-ի որոշմամբ Գևորգ Ավագյանի նկատմամբ ընտրված խափանման միջոցը փոփոխվել է և որպես խափանման միջոց ընտրվել կալանավորումը, նրա նկատմամբ հայտարարվել է հետախուզում, իսկ թիվ ԵԱՔԴ/0120/01/14 քրեական գործի վարույթը կասեցվել է:
2014 թվականի հոկտեմբերի 15-ին ՀՀ ոստիկանության Երևան քաղաքի վարչության Քանաքեռ-Զեյթունի բաժնի կողմից գրություն է ստացվել այն մասին, որ ամբաստանյալ Գևորգ Լևոնի Ավագյանը 2014թ. հոկտեմբերի 09-ին հայտնաբերվել է, բերման ենթարկվել ՀՀ ոստիկանության Քանաքեռ-Զեյթունի բաժին և տեղափոխվել ՀՀ ԱՆ ՙՆուբարաշեն՚ ՔԿՀ:
2014 թվականի հոկտեմբերի 15-ի որոշմամբ թիվ ԵԱՔԴ/0120/01/14 քրեական գործի վարույթը վերսկսվել է:

Գործի փաստական հանգամանքները
Նախաքննության մարմինն ամբաստանյալ Գևորգ Լևոնի Ավագյանին ՀՀ քրեական օրենսգրքի 177-րդ հոդվածի 2-րդ մասի 2-րդ և 3-րդ կետերով մեղադրանք է առաջադրել այն արարքի համար, որ ՙնա 2014թ. հունիսի 23-ի լույս 24-ի գիշերը տեխնիկական միջոցի գործադրման եղանակով ապօրինի մուտք է գործել Երևան քաղաքի Ազատության պողոտայի թիվ 24 հասցեում գտնվող և Անվտանգության միջազգային հատուկ ակադեմիայի ՙՍԻԱՍ՚ ՍՊԸ-ի տնօրեն Արայիկ Սարգիսի Բազինյանին պատկանող աշխատասենյակ և գաղտնի հափշտակել է 460.000 ՀՀ դրամ կանխիկ գումար, ձեռքի ժամացույց և այլ առարկաներ Ա.Բազինյանին պատճառելով խոշոր չափերի` ընդհանուր 625.000 ՀՀ դրամ գույքային վնաս՚:

Ապացույցների հետազոտում
Առաջադրված մեղադրանքում ամբաստանյալ Գևորգ Ավագյանն իրեն լիովին մեղավոր է ճանաչել և դատաքննության փուլում ցուցմունք է տվել, որ իր կենցաղային ծախսերը հոգալու համար որոշել է իր ուսման վայրից գողություն կատարել: Այդ նպատակով 2014թ. հունիսի 23-ի լույս 24-ի գիշերը, նախապես թաքնվելով թաքստոցում, տեխնիկական միջոցի գործադրման եղանակով ապօրինի մուտք է գործել Երևան քաղաքի Ազատության պողոտայի թիվ 24 հասցեում գտնվող և ՙԱնվտանգության միջազգային հատուկ ակադեմիա ՙՍԻԱՍ՚ ՍՊԸ-ի տնօրեն Արայիկ Բազինյանին և փոխտնօրեն Սարգիս Բազինյանին պատկանող աշխատասենյակներ և գաղտնի հափշտակել 460.000 ՀՀ դրամ կանխիկ գումար, ձեռքի ժամացույց, բանկային քարտեր, օդաճնշիչ ատրճանակ և այլ առարկաներ՚ :

Ամբաստանյալ Գևորգ Ավագյանին վերագրվող արարքը հիմնավորվել է նաև դատաքննությամբ հետազոտված հետևյալ ապացույցներով.

Գործով տուժող Անվտանգության միջազգային հատուկ ակադեմիա ՙՍԻԱՍ՚ ՍՊԸ-ի տնօրեն Արայիկ Բազինյանը ցուցմունք է տվել, որ իր ղեկավարած ուսումնական հաստատությունը ուսուցում և պատրաստում է պահնորդներ և անվտանգության աշխատակիցներ: 2014թ. ապրիլ ամսին որպես ուսանող է ընդունվել նաև Գ.Ավագյանը: 2014թ. հունիսի 23-ի երեկոյան ժամը 22-ին փակել է ակադեմիայի մուտքի դուռն ու հեռացել: Հաջորդ օրը հունիսի 24-ին, կրկին սովորականի պես առավոտյան ժամը 09-ին մոտ ինքը գնացել է աշխատանքի նկատել է, որ ակադեմիայի աստիճանավանդակի առաջին և երկրորդ հարկերի միջնամասում գտնվող պատուհանի փեղկը բաց վիճակում է, որտեղից կախված է եղել պարանի կտոր: Ինքն ամիջապես բացել է մուտքի դուռն ու բարձարացել իր աշխատասենյակ: Աշխատասենյակում տեսել է, որ մուտքի դռան փականը, ինչպես նաև հարակից գտնվող փոխտնօրեն Ս.Բազինյանի աշխատասենյակի մուտքի դռան փականը վնասված են: Մտնելով այդ աշխատասենյակներ` իր որդի Ս.Բազինյանի հետ պարզել են, որ իր աշխատասենյակից բացակայում է 460.000 ՀՀ դրամ կանխիկ գումար, ՙFREDERIC M՚ ֆիրմայի ձեռքի ժամացույց և սպորտային պայուսակ , որի գրպաններում եղել են չորս հատ կրիչներ և Ս.Բազինյանի անվամբ թվով յոթ հատ պլաստիկ քարտեր՚:

Գործով վկա Անվտանգության միջազգային հատուկ ակադեմիա ՙՍԻԱՍ՚ ԱՊԸ-ի փոխտնօրեն Սարգիս Արայիկի Բազինյանը նախաքննության փուլում ցուցմունք է տվել, որ 2014թ.-ի հունիսի 24-ի առավոտյան ժամը 09:30-իմ մոտ, աշխատանքի գնալիս իր հայրիկից` Ա.Բազինյանից տեղեկացել է, որ մուտքի դուռը բաց է, իսկ աշխատասենյակից բացակայում են 460.000 ՀՀ դրամ կանխիկ գումարը, ՙFREDERIC M՚ ֆիրմային ձեռքի ժամացույցը և սպորտային պայուսակը, որի գրպաններում եղել են չորս հատ կրիչներ և իր անվամբ թվով յոթ հատ պլաստիկ քարտեր, իսկ Ա.Բազինյանի աշխատասենյակից գողացել են օդաճնշիչ ատրճանակ, ձեռնաշղթա և այլ առականեր:

Մեղադրյալ Գևորգ Ավագյանի մասնակցությամբ կատարված դեպքի վայրի զննության ընթացքում Գ.Ավագյանը մատնացույց է արել ակադեմիայի այն վայրերը, որտեղից կատարել է գողություն:
/գ.թ. 42-43/

Գևորգ Ավագյանի անձնական խուզարկությամբ նրա մոտ հայտնաբերվել են գողացված ՙՄակարով՚ տեսակի օդաճնշիչ ատրճանակը, ձեռնաշղթան, Ս.Բազինյանին պատկանող թվով յոթ հատ բանկային և այցեքարտաերը և ՙFREDERIC M՚ ֆիրմայի ձեռքի ժամացույցը:
/գ.թ. 5/

Ամբաստանյալ Գևորգ Ավագյանին մեղսագրվող արարքը հիմնավորվել է նաև.

Տուժող Ա.Բազինյանի կողմից ՙFREDERIC M՚ ֆիրմայի ձեռքի ժամացույցը ճանաչելու մասին կազմված արձանագրությամբ:
/գ.թ. 53/

Գևորգ Ավագյանի անձնական խուզարկությամբ հայտնաբերված և իրեղեն ապացույց ճանաչաված Ա.Բազինյանին պատկանող ՙՄակարով՚ տեսակի օդաճնշիչ ատրճանակով, ձեռնաշղթայով, Ս.Բազինյանին պատկանող թվով յոթ հատ բանկային այցեքարտերով և ՙFREDERIC M՚ ֆիրմայի ձեռքի ժամացույցով:
/գ.թ. 45, 60/

Գևորգ Ավագյանի կողմից ակադեմիայի աշխատասենյակների մուտքի դռները բացելու համար գործադրված և իրեղեն ապացույց ճանաչված բացող բանալիով:
/գ.թ. 46/

Դատարանի իրավական վերլուծությունները
Դատարանը գործով ձեռք բերված յուրաքանչյուր ապացույց գնահատելով թույլատրելիության վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, գտնում է, որ ամբաստանյալ Գևորգ Լևոնի Ավագյանի մեղավորությունը` շինություն ապօրինի մուտք գործելով ուրիշի գույքի խոշոր չափերի գաղտնի հափշտակություն` գողություն կատարելու մեջ, որը նախատեսված է ՀՀ քրեական օրենսգրքի 177-րդ հոդվածի 2-րդ մասի 2-րդ և 3-րդ, կետերով, ապացուցված է:
Վերոհիշյալ հանցանքի կատարման համար ամբաստանյալը ենթակա է քրեական պատասխանատվության և պատժի, որը նա պետք է կրի:
ՀՀ քրեական օրենսգրքի 10-րդ հոդվածի համաձայնª ՙՀանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացիª համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար՚:
ՀՀ քրեական օրենսգրքի 48-րդ հոդվածի 1-ին մասի համաձայնª ՙպատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից ու ազատություններից օրենքով նախատեսված զրկմամբ կամ դրանց սահմանափակմամբ՚:
ՀՀ քրեական օրենսգրքի 48-րդ հոդվածի 2-րդ մասի համաձայնª ՙՊատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61-րդ հոդվածի 1-ին մասի համաձայն` ՙՀանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները՚:
ՀՀ քրեական օրենսգրքի 61-րդ հոդվածի 2-րդ մասի համաձայնª ՙՊատժի տեսակը և չափը որոշվում է հանցագործությանª հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվումª պատասխանատվությունը և պատիժը մեղմացնող կամ ծանրացնող հանգամանքներով՚:
ՀՀ Վճռաբեկ դատարանը 2012թ. նոյեմբերի 1-ին Սերոբ Սարգսյանի վերաբերյալ թիվ ՍԴ/0109/01/12 գործով արտահայտել է հետևյալ իրավական դիրքորոշումը. ՙ(…) պատիժ նշանակելու ընդհանուր սկզբունքները քրեական օրենքով նախատեսված այն հիմնադրույթներն են, որոնցով պետք է ղեկավարվի դատարանը պատիժ նշանակելիս: Այդ սկզբունքներն են`
ա) օրինականությունը,
բ) արդարությունը,
գ) պատժի անհատականացումը,
դ) մարդասիրությունը:
Պատիժ նշանակելու վերոնշյալ սկզբունքները սահմանում են այն հիմնական դրույթները, որոնցով ղեկավարվում է դատարանը յուրաքանչյուր քրեական գործով պատժի տեսակն ու չափն ընտրելիս:
(…) պատժի նշանակման իրավական շրջանակները սահմանված են ՀՀ քրեական օրենսգրքով: Դրա հետ մեկտեղ, սակայն, վերոնշյալ օրենքը դատարանին հնարավորություն է տվել որոշակի սկզբունքների (…) պահպանմամբ, իր ներքին համոզմանը և իրավագիտակցությանը համապատասխան, ՀՀ քրեական օրենսգրքի Ընդհանուր և Հատուկ մասերով նախատեսված սահմաններում որոշել պատժի տեսակն ու չափը: Այլ կերպ՝ ուրվագծելով կոնկրետ հանցանքի համար նշանակման ենթակա պատժի առավելագույն և նվազագույն սահմանները՝ ՀՀ քրեական օրենքը դատարանին տվել է այդ շրջանակում հայեցողություն դրսևորելու հնարավորություն:
Վճռաբեկ դատարանը գտել է, որ ՀՀ քրեական օրենսգրքի Հատուկ մասի գրեթե բոլոր հոդվածների սանկցիաներում ամրագրված վերոնշյալ մոտեցումը պայմանավորված է այն տրամաբանությամբ, որ քրեական օրենքը համընդհանուր բնույթ ունի, իսկ արարքը և հանցավորի անձը կոնկրետ են: Ուստի կոնկրետ արարքի և անձի նկատմամբ համընդհանուր քրեական օրենքով նախատեսված սանկցիան կիրառելիս դատարանը պետք է որոշակի հայեցողություն դրսևորի:
Այնսինքն` առանց դատարանի հայեցողության պատժի անհատականացումն անհնար է:
(…) Պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության աստիճանի ու բնույթի, հանցավորի անձի, պատիժը մեղմացնող և ծանրացնող հանգամանքների վերլուծության հիման վրա: Նշված հանգամանքների հայեցողական և ոչ երբեք կամային գնահատման ժամանակ դատարանը պետք է ելնի ՀՀ քրեական օրենսգրքի 48-րդ հոդվածով նախատեսված՝ պատժի նպատակների իրացումն ապահովելու անհրաժեշտությունից (տե'ս Նարեկ Գևորգի Սարգսյանի գործով Վճռաբեկ դատարանի 2011 թվականի դեկտեմբերի 22-ի թիվ ԵԿԴ/0042/01/11 որոշման 14-րդ, 22-23-րդ կետերը)՚:
ՀՀ քրեական օրենսգրքի 22-րդ հոդվածի 1-ին մասի համաձայն` ՙհանցագործությունների ռեցիդիվ է համարվում դիտավորությամբ հանցանք կատարելն այն անձի կողմից, ով դատվածություն ունի նախկինում դիտավորությամբ կատարված հանցանքի համար:
Դատարանն արձանագրում է, որ առկա է հանցագործությունների ռեցիդիվ, քանի որ ամբաստանյալ Գևորգ Ավագյանը Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 16.03.2011թ. դատավճռով ՀՀ քրեական օրենսգրքի 177-րդ հոդվածի 3-րդ մասի 1-ին կետով, 177-րդ հոդվածի 2-րդ մասի 1-ին կետով, 177-րդ հոդվածի 2-րդ մասի 3-րդ կետով դատապարտվել է ազատազրկման 6 տարի ժամկետով և պատժի կրումից ազատվել է 18.03.2014թ.-ին` ՀՀ ԱԺ համաներում հայտարարելու մասին 03.10.2013թ. որոշման 3-րդ կետի 1-ին ենթակետի համաձայն, այսինքն` ամբաստանյալ Գևորգ Ավագյանը նախկինում դիտավորությամբ կատարված հանցանքի համար դատապարտված լինելով և դատվածություն ունենալով, դարձյալ կատարել է դիտավորյալ հանցագործություն:
Նշված պայմաններում պատիժ նշանակելիս դատարանը պետք է ղեկավարվի ՀՀ քրեական օրենսգրքի 67.1 հոդվածի 2-րդ մասի կանոններով:
ՀՀ քրեական օրենսգրքի 67.1 հոդվածի 2-րդ մասի համաձայն` ՙ(...) Հանցագործությունների ռեցիդիվի համար նշանակված պատիժը չի կարող պակաս լինել սույն օրենսգրքի Հատուկ մասի համապատասխան հոդվածի սանկցիայով նախատեսված առավելագույն պատժի կեսից՚:
Ամբաստանյալ Գևորգ Ավագյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում, որ նա ընդունել է մեղքը և անկեղծորեն զղջացել կատարած արարքի համար, աջակցել է հանցագործությունը բացահայտելուն:
Ամբաստանյալ Գևորգ Ավագյանի պատասխանատվությունը ու պատիժը ծանրացնող հանգամանքներ դատարանը չի արձանագրել:
Քննության առնելով տուժող Արայիկ Բազինյանի կողմից ներկայացված քաղաքացիական հայցը, դատարանը գտնում է, որ այն պետք է բավարարել և Գևորգ Ավագյանից հօգուտ տուժող Արայիկ Բազինյանի պետք է բռնագանձել 460.000 /չորս հարյուր վաթսուն հազար/ ՀՀ դրամ` որպես հանցագործության հետևանքով անմիջականորեն պատճառված գույքային վնասի հատուցում:
Անդրադառնալով իրեղեն ապացույցների տնօրինման հարցին, դատարանը գտնում է, որ քրեական գործով իրեղեն ապացույց ճանաչված Սարգիս Բազինյանի անվամբ ՙԱրարատբանկ՚ ՓԲԸ-ի, ՙԱրդշինինվեստբանկ՚ ՓԲԸ-ի երկուական, ՙՀայէկոնոմբանկ՚ ՓԲԸ-ի, ՙԿայզեր՚ կոնտակային, և ՙԻմպրեսսիոն սուվինիրս՚ առևտրի կենտրոնի զեղչի մեկական քարտերը, Ա.Բազինյանին պատկանող ՙՄակարով՚ տեսակի օդաճնշիչ ատրճանակը, ձեռնաշղթան, ՙFREDERIC M՚ ֆիրմայի ձեռքի ժամացույցը և բացող բանալին պետք է վերադարձնել տուժող Արայիկ Բազինյանին:
Ղեկավարվելով ՀՀ քրեական դատավարության օրենսգրքի 119-րդ, 163-րդ, 357-360-րդ, 365-րդ, 366-րդ, 369-373-րդ և 379-րդ հոդվածներով, դատարանը`

ՎՃՌԵՑ

Գևորգ Լևոնի Ավագյանին մեղավոր ճանաչել ՀՀ քրեական օրենսգրքի 177-րդ հոդվածի 2-րդ մասի 2-րդ և 3-րդ կետերով նախատեսված հանցագորության կատարման մեջ և նրա նկատմամբ պատիժ նշանակել ազատազրկում 2 /երկու/ տարի 6 /վեց/ ամիս ժամկետով:
Պատժի սկիզբը հաշվել 2014 թվականի հոկտեմբերի 09-ից:
Գևորգ Ավագյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Տուժող Արայիկ Բազինյանի կողմից ներկայացված քաղաքացիական հայցը բավարարել և Գևորգ Լևոնի Ավագյանից հօգուտ տուժող Արայիկ Սարգսի Բազինյանի բռնագանձել 460.000 /չորս հարյուր վաթսուն հազար/ ՀՀ դրամ` որպես հանցագործության հետևանքով անմիջականորեն պատճառված գույքային վնասի հատուցում:
Քրեական գործով իրեղեն ապացույց ճանաչված, Սարգիս Բազինյանի անվամբ ՙԱրարատբանկ՚ ՓԲԸ-ի, ՙԱրդշինինվեստբանկ՚ ՓԲԸ-ի երկուական, ՙՀայէկոնոմբանկ՚ ՓԲԸ-ի, ՙԿայզեր՚ կոնտակտային և ՙԻմպրեսսիոն սուվինիրս՚ առևտրի կենտրոնի զեղչի մեկական քարտերը, Արայիկ Բազինյանին պատկանող ՙՄակարով՚ տեսակի օդաճնշիչ ատրճանակը, ձեռնաշղթան, ՙFREDERIC M՚ ֆիրմայի ձեռքի ժամացույցը և բացող բանալին վերադարձնել տուժող Արայիկ Բազինյանին:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո` մեկամսյա ժամկետում:





ԴԱՏԱՎՈՐ Ա.ՄԿՐՏՉՅԱՆ