Գործ No ԵԱՔԴ/0115/01/14

ԴԱՏԱՎՃԻՌ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՙ27՚ հունվարի 2015թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը

նախագահությամբ` դատավոր Ա.Մկրտչյանի
քարտուղարությամբ` Օ.Կիրակոսյանի
Շ.Վանոյանի
Հ.Արտաշեսյանի
մասնակցությամբ`
մեղադրող Կ.Բարսեղյանի
պաշտպան Ա.Ալվանդյանի

Դատարանում, դռնբաց դատական նիստում քննեց քրեական գործն ըստ մեղադրանքի Հայկ Արայիկի Հարությունյանի /ծնված 29.07.1987թ. Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, չի աշխատում, չամուսնացած, նախկինում չդատված, հաշվառված և բնակվող` ք.Երևան, Բաշինջաղյան փողոցի 163-րդ շենքի թիվ 37 բնակարանում/, մեղադրվում է ՀՀ քրեական օրենսգրքի 258-րդ հոդվածի 3-րդ մասի 1-ին կետով:

Գործի դատավարական նախապատմությունը
2013 թվականի օգոստոսի 07-ին Երևան քաղաքի Արաբկիր և Քանաքեռ-Զեյթուն վարչական շրջանների դատախազությունում ՀՀ քրեական օրենսգրքի 258-րդ հոդվածի 3-րդ մասի 1-ին կետով հարուցվել է թիվ 14139413 քրեական գործը:
2013 թվականի դեկտեմբերի 06-ին Հայկ Արայիկի Հարությունյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով և նրա նկատմամբ որպես խափանման միջոց է ընտրվել ստորագրություն` չհեռանալու մասին:
2014 թվականի օգոստոսի 04-ին թիվ 14139413 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:

Գործի փաստական հանգամանքները
Նախաքննության մարմինն ամբաստանյալ Հայկ Արայիկի Հարությունյանին ՀՀ քրեական օրենսգրքի 258-րդ հոդվածի 3-րդ մասի 1-ին կետով մեղադրանք է առաջադրել այն արարքի համար, որ ՙնա ալկոհոլ օգտագործած վիճակում, 2013թ. օգոստոսի 4-ին ժամը 02.30-ի սահմաններում, Բաղրամյան 25-րդ հասցեում գործող ՙՇառլոտ՚ գիշերային ակումբում, խուլիգանական մղումներով, իր սեփական անձի առավելությունն ու գերակայությունն ընդգծելու նպատակով բացահայտորեն հակադրվելով մարդկային փոխհարաբերությունների հանրորեն ընդունված նորմերին, իր ընկերոջª Գևորգ Գրիգորյանի հետ միասին, խմբի կազմում խուլիգանություն կատարելու դիտավորությամբ` ՙՇառլոտ՚ գիշերային ակումբի աշխատակիցների և հաճախորդների նկատմամբ բացահայտ անհարգալից վերաբերմունք դրսևորելով, հակադրվելով բարոյական նորմերին և հասարակության մեջ ընդունված վարքագծի կանոներին, չենթարկվելով ակումբի տնօրեն Արմեն Դավթյանիª խուլիգանական գործողությունները դադարեցնելու պահանջներին, չնչին առիթից վիճաբանություն է հրահրել հիշյալ գիշերային ակումբի մեկ այլ հաճախորդ Արամ Քարաջյանի հետ, հարձակվել վերջինիս նկատմամբ բռնություն գործադրել և տվել բռնություն գործադրելու սպառնալիքներ, հնչեցրել սեռական բնույթի հայհոյանքներ, որի հետևանքով էլ խաթարվել է գիշերային ակումբի բնականոն աշխատանքը՚:

Ապացույցների հետազոտում
Առաջադրված մեղադրանքում ամբաստանյալ Հայկ Հարությունյանն իրեն մեղավոր չի ճանաչել:
Դատաքննության փուլում ամբաստանյալ Հայկ Հարությունյանը ցուցմունք է տվել, որ ինքը խուլիգանություն չի կատարել, Արամ Քարաջյանին չի հարվածել, նրա նկատմամբ բռնություն կամ բռնության սպառնալիք չի գործադրել: Ամբաստանյալը նշել է, որ դեպքի օրը Գևորգ Գրիգորյանի և Դավիթ Բաղդասարյանի հետ գնացել է ՙՇառլոտ՚ գիշերային ակումբ, տեսել է, որ իր ընկեր Գևորգը զրուցում է Արամ Քարաջյանի հետ, որը վերջինիս հյուրասիրության առաջարկ էր անում: Այդ ժամանակ Արամ Քարաջյանի կողմից փողերը Գևորգի վրա շպրտելու պատճառով խոսակցություն և վիճաբանություն է առաջացել և դրանից հետո Արամ Քարաջյանը հանել է զենքը և կրակել: Ինքը հանդարտացրել է նրան և բռնել է նրա ձեռքից և ընկել Ա.Քարաջյանի վրա, մինչ այդ նրան չի հարվածել և մատով չի կպել: Ինչ վերաբերում է տեսագրությանը, որտեղ երևում է, որ ինքը բռնում է Ա.Քարաջյանի ձեռքից և ընկնում է նրա վրա, ապա նա այդ գործողությունները կատարել է, որպեսզի Ա.Քարաջյանը չշարունակեր կրակել: Ամբաստանյալը միաժամանակ նշել է, որ իրոք դեպքի օրը եղել են փոխադարձ հայհոյանքներ, սակայն այն որևէ մեկին ուղղված չի եղել:

Ամբաստանյալ Հայկ Հարությունյանին վերագրվող արարքը հիմնավորվել է դատաքննությամբ հետազոտված հետևյալ ապացույցներով.

Վկա Արամ Քարաջյանը նախաքննության փուլում ցուցմունք է տվել, որ 2013թ. օգոստոսի 4-ին, գիշերը ՙՇառլոտ՚ գիշերային ակումբում խուլիգանություն չի կատարել, հասարակական կարգը չի խախտել, նախահարձակ չի եղել, որևէ մեկին վիճաբանության չի դրդել: Իր, Գևորգ Գրիգորյանի և Հայկ Հարությունյանի միջև վիճաբանություն է առաջացել, որի ժամանակ ինքը վախեցած լինելու պաճառով իր մոտ գտնվող օդաճնշիչ ատրճանակից կրակել է անկանոն ուղղություններով, որևէ մեկին վնասելու նպատակ և ցանկություն չի ունեցել: Վկան միաժամանակ նշել է, որ ինքը չի հիշում, թե ինչ հանգամանքներում է, մարմնական վնասվածք ստացել:
Հ. 2 գ.թ 146-149, 200

Վկա Դավիթ Բաղդասարյանը նախաքննության փուլում ցուցմունք է տվել, որ 2013թ. օգոստոսի 4-ին իր բարեկամ Գևորգ Գրիգորյանի և նրա ընկեր Հայկ Հարությունյանի հետ գնացել են ՙՇառլոտ՚ գիշերային ակումբ, որտեղ ծխախոտն այլ սեղանին դրված մոխրամանի մեջ հանգցնելու պատճառով վիճաբանություն է առաջացել ակումբի հաճախորդների և իրենց միջև, որի ժամանակ էլ հնչել են փոխադարձ հայհոյանքներ և վիրավորանքներ:
Հ.1 գ.թ 107-110
Հ.2 գ.թ. 138-141
Հ.3 գ.թ. 16:

Վկա Արմեն Դավթյանը դատաքննության փուլում ցուցմունք է տվել, որ մինչև 2014 թվականի հունվար ամիսը աշխատել է ՙՇառլոտ՚ գիշերային ակումբում որպես տնօրեն: 2013թ. օգոստոսի 4-ին գտնվել է աշխատանքի վայրում, երբ իրեն է մոտեցել մատուցողուհին և տեղյակ պահել այն մասին, որ ակումբի հաճախորդներիª երկրորդ սեղանի մոտ և բարմենի սեղանի մոտ նստած անձանց միջև վիճաբանություն է առաջացել: Ինքը մոտեցել է ակումբի երկրորդ սեղանի մոտ կանգնած տղաներին և խոսակցությունից հասկացել է, որ վիճաբանության պատճառն այն է, որ բարմենի սեղանի մոտ նստած տղաներից մեկը ծխախոտ է հանգցրել 2-րդ սեղանին դրված մոխրամանի մեջ: Նա մոտեցել է, ակումբի երկրորդ սեղանի մոտ հավաքված հաճախորդներին և նրանց ասել է, որ հանգստանան, սակայն վիճաբանողներն իրեն չեն լսել, տվել են հայհոյանքներ, որի պատճառով վիճաբանությունը սրվել է, իսկ հաճախորդները հեռացել են ակումբից և այդ տղաների գործողության հետևանքով խանգարվել է ակումբի բնականոն աշխատանքը: Վկան միաժամանակ նշել է, որ կրակոցներ արձակվել են երկրորդ սեղանին նստած անձի կողմից, որին նախկինում չի ճանաչել: Միջադեպը առաջացել է երկրորդ սեղանի վրա սիգարետ հանգցնելու պատճառով: Նշել է, որ չի կարող ասել, թե Հայկ Հարությունյանը, որևէ մեկին հարվածել է, բռնություն գործադրել կամ սպառնալիքներ տվել է, թե ոչ: Սակայն վկան նշել է, որ կրակոցից հետո Հայկ Հարությունյանը վիճաբանել է ատրճանակից կրակողի հետ և նրանք հայհոյել և քաշքշել են միմյանց:

Վկա Հայկ Մկրտչյանը դատաքննության փուլում ցուցմունք է տվել, որ աշխատում է ՙՇառլոտ՚ գիշերային ակումբում որպես հնչյունային օպերատոր: Հայկ Հարությունյանին ճանաչում է որպես մշտական հաճախորդի: 2013թ. օգոստոսի 4-ին ժամը 02:30-ի սահմաններում աշխատանքի վայրում տեսել է, որ ակումբի սրահի երկրորդ սեղանի մոտ վիճաբանություն է առաջացել: Վիճաբանում էին երկրորդ սեղանի և բառի հաճախորդները: Լսել է բաժակի կոտրվելու ձայն և փոխադարձ հայհոյանքներ: Դուրս է եկել իր աշխատասենյակից և մոտեցել վիճաբանողներին ու տեսել է, որ երկորդ սեղանի մոտ նստած տղաներից մեկի և բարմենի սեղանին նստած տղաների միջև վիճաբանությունը շարունակվում է: Քանի որ ակումբում եղել են այլ հաճախորդներ, որոնք վիճաբանության պատճառով անհանգստացել են, ուստի տնօրեն Արմեն Դավթյանը փորձել է սաստել նրանց և ասել է, որ հայհոյանքներ չտան, սակայն վիճաբանողները նրան չեն լսել, շարունակել են հայհոյանքներ տալ և խանգարել ակումբի բնականոն աշխատանքը: Այդ ընթացքում վիճաբանություն ավելի է լարվել և ինքը տեսել է, որ երկրորդ սեղանի ուղությամբ բաժակներ են նետվել, իսկ երկրորդ սեղանի մոտ կանգնած տղան ատրճանակով սկսել է անկանոն կրակել:

Վկա Աշոտ Ալեքսանյանը դատաքննության փուլում պնդել է նախաքննության փուլի ցուցմունքներն այն մասին, որ ՙՇառլոտ՚ գիշերային ակումբի տնօրեն Արմեն Դավթյանի ընկերն է: 2013թ. օգոստոսի 4-ին գնացել է գիշերային ակումբ և ժամը 02:30-ի սահմաններում ակումբի սրահի երկրորդ սեղանի մոտ վիճաբանություն է սկսվել, ինքը և Արմենը մոտեցել են վիճաբանողներին ու տեսել է, որ երկորդ սեղանի մոտ նստած տղաներից մեկի և բարմենի սեղանին նստած տղաների միջև վիճաբանություն է առաջացել, որի ժամանակ նրանք փոխադարձ հայհոյանքներ են տվել: Քանի որ ակումբում եղել են այլ հաճախորդներ, որոնք վիճաբանության պատճառով անհանգստացել են, ուստի Արմեն Դավթյանը փորձել է սաստել նրանց և ասել է, որ հայհոյանքներ չտան, սակայն վիճաբանողները նրան չեն լսել, շարունակել են հայհոյանքներ տալ և խանգարել ակումբի բնականոն աշխատանքը: Այդ ընթացքում վիճաբանություն ավելի է լարվել և ինքը տեսել է, որ երկրորդ սեղանի ուղությամբ բաժակներ են նետվել, իսկ երկրորդ սեղանի մոտ կանգնած տղան ատրճանակով սկսել է անկանոն կրակել:
Հ. 2 գ.թ 56-61

Վկա Միքայել Գալստյանը նախաքննության ընթացքում ցուցմունք է տվել, որ աշխատում է ՙՇառլոտ՚ գիշերային ակումբում որպես բարմեն: 2013թ. օգոստոսի 4-ին ժամը 02:30-ի սահմաններում աշխատաքի վայրում տեսել է, որ ակումբի սրահի երկրորդ սեղանի մոտ վիճաբանություն է սկսվել նույն սեղանի հաճախորդների և մինչ այդ բարմենի սեղանի մոտ նստած հաճախորդների միջև: Ինքը մոտեցել է վիճաբանողներին և լսել է, որ նրանք փոխադարձ հայհոյանքներ են տալիս, որոնք կրել են ընդհանուր բնույթª իրենց ասածն ավելի ազդեցիկ դարձնելու համար: Քանի որ ակումբում եղել են այլ հաճախորդներ, որոնք վիճաբանության պատճառով անհանգստացել են, ուստի տնօրեն Արմեն Դավթյանը փորձել է սաստել նրանց և ասել է, որ հայհոյանքներ չտան, սակայն վիճաբանողները նրան չեն լսել և շարունակել են հայհոյանքներ տալ և խանգարել ակումբի բնականոն աշխատանքը: Այդ ընթացքում վիճաբանությունն ավելի է լարվել և ինքը տեսել է, որ երկրորդ սեղանի ուղությամբ բաժակներ են նետվել, իսկ երկրորդ սեղանի մոտ կանգնած տղան ատրճանակով սկսել է անկանոն կրակել:
Հ. 2 գ.թ. 65-69, 78-80

Վկա Աննա Գաբրիելյանը նախաքննության փուլում ցուցմունք է տվել, որ աշխատում է ՙՇառլոտ՚ գիշերային ակումբում որպես մենեջեր և 2013թ. օգոստոսի 4-ին Ժամը 02:30-ի սահմաններում աշխատաքի վայրում տեսել է, որ ակումբի հաճախորդներից բարմենի սեղանի մոտ նստած հաճախորդներից մեկը ծխախոտը հանգցրել է երկրորդ սեղանի մոխրամանի մեջ, իսկ երկրորդ սեղանին նստած տղաներից մեկը դա լավ չի ընդունել, որի պատճառով նրանց միջև վիճաբանություն է առաջացել և նրանք սկսել են իրար հրել և բարձրաձայն հայհոյանքներ տալ: Վիճաբանության պատճառով ակումբի աշխատանքը խաթարվել է և հաճախորդները հեռացել են:
Հ.1, գ.թ. 81-83:

Վկա Աստղիկ Ամիրջանյանը նախաքննության փուլում ցուցմունք է տվել, որ աշխատում է ՙՇառլոտ՚ գիշերային ակումբում որպես մենեջեր և 2013թ. օգոստոսի 4-ին ժամը 02:30-ի սահմաններում աշխատաքի վայրում սրահից լսել է բղավոցի ձայներ և երբ մտել է սրահ, տեսել է, որ ակումբի հաճախորդները գտնվում են վախեցած, շփոթված վիճակում և նրանք գոռալով ցանկացել են լքել ակումբը: Ինքը մոտեցել է հաճախորդներին և խնդրել է վճարել և նոր հեռանալ: Հետագայում իմացել է, որ ակումբի 2-րդ սեղանի մոտ նստած և բարմենի սեղանի մոտ նստած հաճախորդների միջև վիճաբանություն է առաջացել այն պատճառով, որ բարմենի սեղանի մոտ նստած անձիք ծխախոտի մոխիրը հանգցրել է երկրորդ սեղանի մոխրամանի մեջ:
Հ.1 գ.թ 87-89
Հ.2 գ.թ. 37-39:

Վկա Վիգեն Գյուլնազարյանը և Հրանտ Թոխատյանը նախաքննության փուլում նույնաբովանդակ ցուցմունքներ են տվել, որ 2013թ. օգոստոսի 4-ին իրենց ընկերներ Արամ Քարաջյանի հետ միասին գնացել են ՙՇառլոտ՚ գիշերային ակումբ, որտեղ ակումբի հաճախորդներից մի տղա ծխախոտը հանգցրել է իրենց սեղանին դրված մոխրամանի մեջ: Այդ պատճառով Արամի և այդ տղայի ու նրա ընկերներոջ միջև տհաճ խոսակցություն է սկսվել, որի ժամանակ ակումբի աշխատակիցները և տնօրենը խնդրել են Արամին և մյուս երկու տղաներին հանգստանալ, քանի որ նրանք խանգարել են ակումբի աշխատանքը: Արամը ոչինչ չի արել, սակայն խոսակցությունը լարվել է և հանկարծ իրենք լսել են կրակոցի ձայներ, և տեսել, որ հաճախորդները վախից դուրս են վազում սրահից: Երբ կրակոցները դադարել են և վառել են սրահի լույսերը, իրենք տեսել են, որ Արամի ձեռքին ատրճանակ կա, որի գոյության մասին մինչ այդ չեն իմացել և հասկացել են, որ Արամն է կրակել: Հետագայում Արամի մարմնի վրա տեսել են վնասվածք և երբ նրան հարցրել են դա ինչ վնասվածք է, Արամը պատասխանել է, որ ակումբում է ստացել, սակայն դրա մասին, որևէ մեկի չասեն:
Իրենց ցուցմունքում նշված հանգամանքները վկաները պնդել են նաև գիշերային ակումբի անվտանգության տեսախցիկների զննության ժամանակ:
Հ.2 գ.թ 13-16, 30-33, 87-90, 91-94, 126-131

Վկա Սահակ Աբրահամյանը դատաքննության փուլում ցուցմունք է տվել, որ աշխատում է ՙՇառլոտ՚ գիշերային ակումբում որպես դռնապան: 2013թ. օգոստոսի 4-ին ժամը 01.30-ի սահմաններում ակումբ են եկել երկու տղաներ, որոնցից մեկի հագին եղել է կապույտ վերնաշապիկ, իսկ մյուսի հագին եղել է ծաղկավոր վերնաշապիկ: Այդ տղաների գալուց հետո ակումբ են եկել նաև երեք այլ տղաներ: Երեք տղաների գալուց մոտ 20-25 րոպե անց տեսել է, որ ակումբի հաճախորդները վախեցած ու գոռալով դուրս են գալիս ակումբից և հեռանում, դժգոհելով ակումբում տիրող իրավիճակից: Հետագայում իմացել է, որ ակումբում վիճաբանություն է առաջացել սկզբում եկած տղաների և նրանցից հետո եկած երեք տղաների միջև, որի ընթացքում եղել են հայհոյանքներ ու խանգարել են ակումբի բնականոն աշխատանքը: Վկան միաժամանակ նշել է, որ սկզբում լսել է աղմուկ-աղաղակի, այնուհետև նաև կրակոցի ձայներ:

Վկա Անի Սահակյանը դատաքննության փուլում ցուցմունք է տվել, որ 2012-2014թթ աշխատել է ՙՇառլոտ՚ գիշերային ակումբում, որպես մատուցողուհի: Ամբաստանյալ Հայկ Հարությունյանին ճանաչել է, որպես ակումբի մշտական հաճախորդ: Դեպքի օրը` Հ.Հարությունյանը ընկերների հետ եկել է գիշերային ակումբ: Երբ ինքը Հայկ Հարությունյանի հետ պարելիս է եղել, Արամ Քարաջյանը կանգնած է եղել սեղանի մոտ: Գևորգ Գրիգոյանի և Արամ Քարաջյանի միջև վիճաբանություն է առաջացել, Հայկը մոտեցել է նրանց պարզելու, թե ինչ է պատահել: Հետո տեսել է, թե ինչպես է Արամը հանել ատրճանակը և կրակել, փամփուշտը կպել է Հայկի գլխին: Կրակոցից հետո քաշքշոց է առաջացել: Հայհոյաքներ չի լսել, քանի որ կրակոցից վախեցել և դուրս է եկել:

Դեպքի վայրի զննության արձանագրության համաձայն ՙՇառլոտ՚ գիշերային ակումբի սրահի երկրորդ սեղանի մոտ հայտնաբերվել են կոտրված ապակու կտորներ:
Հ.1 գ.թ 3-8:

Նախաքննության մարմնի կողմից Արմեն Դավթյանի մասնակցությամբ կատարված գիշերային ակումբի անվտանգության տեսախցիկների զննության արձանագրության համաձայն Արմեն Դավթյանը զննության ժամանակ հայտարարել է, որ ձայնագրության 33-րդ րոպեի 12-րդ վայրկյանին գալիս է սրահ, քանի որ մինչ այդ մատուցաողուհիներից մեկն իրեն ասել է, որ սրահում կռիվ է: Երբ մտել է սրահ, այնտեղ տեսել է բարմենի սեղանի մոտ նստածներից մեկինª Գևորգին, որին փորձել են հանգստացնել, սակայն նա ոչ մի կերպ չի հանգստացել: Այդ ընթացքում Գևորգը մոտեցել է Արամ Քարաջյանին, նրան գոռալով ասել է, որ դուրս գան դրսում խոսեն, սակայն Արամը նրան չի պատասխանել: Այնուհետև Գևորգի հետ եկած տղաներից մեկը Գևորգին տանում է դեպի բեմի կողմ, նրան ասում է, որ չբորբոքվի, ինքը մոտեում է Գևորգին ասում է, որ հանգստանա, պետք չէ վրդովվել, ձայնը չբարձրացնի, քանի որ նրանք խանգարում են ակումբի աշխատանքին, սակայն Գևորգն իրեն չի լսում, քանի որ վրդովված է, ու ինչ որ բաներ է գոռում, այնուհետև գոռալով մոտենում է Արամ Քարաջյանին, որի հետ խոսում է Գևորգի ընկերը: Այնուհետև Գևորգը գոռալով ինչ որ բան է ասում Արամին, չի հիշում, թե ինչ: Գևորգին կրկին հետ են տանում բեմի մոտ, սակայն Գևորգը ագրեսիվ ձևով փորձում է մոտենալ Արամին, սակայն նրան չեն թողնում մոտենալª ակումբի հաճախորդներից մեկը, Գևորգի կարճահասակ ընկերը, սակայն Գևորգը գոռալով փորձում է մոտենալ Արամին, նրան դա հաջողվում է և ձայնագրության 34-րդ րոպեի 3-րդ վայրկյանին Գևորգը մոտենում է Արամին, հրում է իր ընկերոջը, այդ ժամանակ նաև հրում է Արամին, կանգնում է Արամի առջև, սակայն ակումբի հաճախորդներից մեկը, ով նստած է 15-րդ սեղանին` նրան հրում է մի կողմ, թույլ չի տալիս, որ Գևորգը մոտենա Արամին: Այդ ընթացքում Գևորգի ընկերը նույնպես քաշում է նրան մի կողմ, որ նա չմոտենա Արամին, իսկ Արամը ձայն չի հանում, Գևորգը ագրեսիվ տոնով ասում է` ՙհելնենք դուրս խոսանք՚, ընթացքում Գևորգը կրկին մոտենում է Արամին ինչ որ բան ասում, որից հետո նրան քաշում են մի կողմ, որ կռիվը չթեժանա: Այնուհետև չի իմանում ինչ է կատարվում, Արամ Քարաջյանը հանում է զենքը, իր ընկեր Աշոտը բռնում է նրա ձեռքը, պառկեցնում աթոռին, Գևորգի ընկերն օգնում է Արամին պառկեցնելուն, և Արամը պառկած տեղից սկսում է անկանոն կրակել, որից հետո սկսվում է խառնաշփոթ, ակումբի հաճախորդներն ու աշխատողների մեջ խուճապ է սկսվում, նրանք վախից փախնում են ամեն մեկը մի կողմ, իսկ Գևորգի ընկերը վազում է Արամի վրայից դեպի բարմենի սեղանի կողմ: Այդ ընթացքում Գևորգը 13-րդ սեղանի վրայից Արամի և մնացածների ուղությամբ նետում է կանչի զանգը, իսկ մյուս սեղանից բաժակ, բացի դա Գևորգի ընկերը, որը խոսում էր Արամի հետ, բարմենի սեղանի կողմից ձեռքին ինչ որ բանª կամ° շիշ, կամ° բաժակ, գալիս և ընկնում է ամբոխի մեջ, որից մի քանի վայրկյան անց վեր է կենում Արամի վրայից ու գնում:
Հատոր 2Գ.Թ 150-152:

Քննիչի կողմից կազմված սկավառակը զննելու արձանագրության համաձայն` քննությանը ներկայացված ՙՇառլոտ՚ գիշերային ակումբի անվտանգության տեսախցիկների ձայնագրությունը նկարահանել է պարադահլիճը և սեղանները` ձախ և աջ երկայնքով տեղադրված: Ձայնագրությունը 44 րոպե տևողության է: Միջնամասում առկա է համեմատաբար բարձրադիր ամբիոն, որը հավանաբար նախատեսված է պարուհիների պարելու համար: Բարձրադիր հատվածում կան թվով 2 մետաղյա ամրացված ձողեր` նախատեսված մերկապարի համար: Ձայնագրության անմիջապես սկզբից դահլիճի` տեսախցիկի կողմից պարահրապարակի սկզբնամասում, պարում է սպիտակ ներքնազգեստով իգական սեռի ներկայացուցիչ, իսկ հարթակի վրա մյուս կողմում, պարում են ևս երեք հոգի` ձողի վրա: Տեսախցիկի տեղակայումից անմիջապես աջ` առաջին սեղանի շուրջ, աղոտ երևում են մարդիկ, հավանաբար երկուսը: Նույն ուղությամբ վերջին սեղանին նույնպես աղոտ երևում են անձինք: Ձախ առաջին սեղանի մոտ երևում է ևս մեկ անձ` մուգ գույնի վերնաշապիկով, ով կանգնած է սեղանի մոտ: Ձայնագրության 25-րդ վայրկյանին տեսախցիկի կողմ է մոտենում մի աղջիկ, իսկ նրան ընդառաջ է դուրս գալիս մյուսը և նրանք սկսում են զրուցել: Ձայնագրության 49-րդ վայրկյանին միմյանց հետ զրուցող աղջիկները քայլում են սրահի հակառակ կողմը: Ընթացքում տարբեր պարուհիներ քայլում են պարահրապարակի տարբեր կողմերում: Ձախից առաջին սեղանին նստած երկու տղաները սկսում են կանգնած տեղում պարել: Ձայնագրության 1:53-րդ վայրկյանին սրահի դիմացի հատվածից երկու տղա պարելով առաջանում են տեսախցիկի կողմ, որոնցից մեկը ողջունում է տեսախցիկի ներքևում գտնվող անձի: Հենց այդ պահին նույն ուղությամբ է քայլում ևս մեկ տղամարդ: Ձայնագրության ընթացքում տարբեր մարդիկ քայլում են այս ու այն կողմ, զվարճանում: 20:19-րդ րոպեին տեսախցիկի ներքևի հատվածից երկու տղամարդ արագ քայլերով շարժվում են սրահի դիմացի կողմ, իսկ 20:26-րդ վայրկյանին ևս մեկ հոգի հետևում է նրանց, արագ քայլերով: Սրահում խառնաշփոթ չի նկատվում, մյուսները շարունակում են զվարճանալ: 22:46-րդ վայրկյանին տեսախցիկի կողմ է քայլում տղամարդ, ով նստում է դրա տակ: Ձայնագրության 31:04-րդ վայրկյանին պարասրահի տղաներից մեկը բարձրանում է ամբիոնի վրա և սկսում է պարել, իսկ այդ պահին ձախ առաջին սեղանի մոտի կանգնած տղան գումար է նետում պարուհու կողմ: Ամբիոնին բարձրացած տղան ներքև է իջնում և այդ պահին նրան է մոտենում սպիտակ տաբատով մի մարդ, ով հավանաբար անվտանգության աշխատակից է և նրանք զրուցում են: 32:12-րդ վայրկյանին պարահարթակին բարձրացած տղան մոտենում է ձախ կողմի առաջին սեղանի մոտ կանգնած երկու տղաներին և սկսում զրուցել: Նրանց շուրջ են հավաքվում մի քանի անձինք, այդ թվում նաև ամբիոնին բարձրացած տղայի հետ սրահ եկած անձնավորությունը: 32:50-րդ վայրկյանին խոսակցությանը մոտեցած տղան ձեռքով ժեստեր է անում, իսկ նրա կողքին կանգնած պայմանականորեն նշված անվտանգության աշխատակիցներից երկուսը, փորձում են հանգստացնել նրան և մի կողմի են տանում, սակայն վերջինս կրկին առաջ է գալիս և ձեռքերի ժեստերով զրուցում սեղանի շուրջ կանգնած տղաների հետ: Դրանից հետո, երբ արդեն վիճաբանող անձին մի կողմ են տանում, նույն տղաներին է մոտենում վերջինիս հետ եկած տղան, ով նույնպես սկսում է զրուցել նրանց հետ: Այդ պահին խոսակցությունը սկսած տղան նորից է մոտենում սեղանին և արդեն երկուսով են խոսում նշված անձանց հետ, իսկ այդ ընթացքում պայմանականորեն նշված անվտանգության աշխատակիցները կանգնած են նրանց կողքին: 33:24-րդ վայրկյանին սեղանին մոտեցած տղաներն իրար են հրում: Դրանից հետո շարունակում են վիճաբանել սեղանի մոտ կանգնած երկու տղաների հետ, իսկ անվտանգության աշխատողները փորձում են մի կողմ տանել նրանց: 34:16-րդ վայրկյանին սեղանի մոտ կանգնած տղաներից մեկը` մուգ վերնաշապիկով, աջ ձեռքով ներքևից վերև է հանում ատրճանակի նմանվող իր/ չի երևում որտեղից/, որի պատճառով իրարանցում է սկսվում նրանց միջև: Անմիջապես հաջորդ վայրկյանին վիճաբանության սկզբում սեղանին մոտեցած տղան ձեռքը տանում է կոնքատեղին: Այդ ընթացքում ատրճանակի նման առարկա հանած տղայի կողքը հավաքված մարդիկ փորձում են բռնել նրան, նմանատիպ իրավիճակ է առաջանում նաև կոնքատեղին ձեռքը տարած անձի շուրջ: Այնուհետև նրան մի կողմ է քաշում մի աղջիկ, սակայն վերջինս կրկին առաջանում է դեպի վիճբանության և քաշքշուկի վայր: 34:28-րդ վայրկյանին տարօրինակ խառնաշփոթ է սկսվում, որի արդյունքում սրահում գտնվող որոշ անձինք կռանում են, հեռու փախչում ձախից առաջին սեղանի մոտից: Վիճաբանող տղաներից մեկը, ով վերը նշված` ձեռքը կոնքատեղին տարած անձն է, աջից երրորդ սեղանից վերցնում է ինչ որ առարկա և նետում ձախից առաջին սեղանի շուրջ իրար քաշքշող անձանց կողմ, այն դիպչում է ինչ որ բանի, կամ ինչ որ մեկի և ընկնում գետնին` մասնատվում: Դրանից հետո գրեթե բոլորը փախչում են ատրճանականման առարկան հանած անձի մոտից: Սրահում ենթադրաբար մնում են անվտանգության աշխատակիցները, ովքեր փորձում են հանգստացնել վերջինիս: 34:58-րդ վայրկյանին սրահի լույսերը վառվում են: 35:20-րդ վայրկյանին ձախից առաջին սեղանի մոտ նստած մուգ վերնաշապիկով անձը առաջանում է, սակայն նրա ձեռքին ոչինչ չի երևում: 35:23-րդ վայրկյանին նա կրկին ձեռքը տանում է գոտկատեղին և հանում ատրճանականման իրը` աջ ձեռքով, իսկ ձախ ձեռքին բռնած է ծխախոտ: 35:30-րդ վայրկյանին գեր կազմվածքով մի անձ մոտենում է և փորձում վերցնել ձեռքից զենքանման իրը, սակայն դա նրան չի հաջողվում: Նույն պահին անմիջապես տեսախցիկի տակ հայտնվում են գլխի գագաթային մասը ճաղատ մի մարդ և սև հագուստով կարճահասակ անձնավորությունը, ովքեր փորձում են կանգնեցնել մի տղայի, ով առաջանում է զենքանման առարկան բռնած տղայի կողմ և փորձում է վերցնել այն, սակայն դա նրան չի հաջողվում: Այնուհետև անվտանգության աշխատողները նրան մի կողմ են տանում: Այդ պահին զենքը պահած տղան նորից պահում է ատրճանակը կոնքատեղում: Դրանից հետո վերջինս զրույցի է բռնվում ակումբի աշխատակիցներից մեկի հետ: Ձայնագրության 39:04-րդ վայրկյանին զենքը բռնած տղան զանգ է կատարում, որը տեսախցիկների ժամանակացույցի հետ համընկնում է 04.08.2013 02:55:05-ին:
Հ.2 գ.թ 26-29

Հայկ Հարությունյանին մեղսագրվող արարքը հիմնավորվել է նաև.

Ապացույց ճանաչված, ոստիկանության Արաբկիրի բաժնի կողմից քննությանը տրամադրված լազերային սկավառակովª ՙՇառլոտ՚ գիշերային ակումբում 2013թ. օգոստոսի 4-ին տեղի ունեցած միջադեպի տեսաձայնագրությամբ:
Հ.3 գ.թ 69

Դատարանի իրավական վերլուծությունները
Դատարանը գործով ձեռք բերված յուրաքանչյուր ապացույց գնահատելով թույլատրելիության վերաբերելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, ղեկավարվելով օրենքով, ներքին համոզմամբ, գտնում է, որ ամբաստանյալ Հայկ Արայիկի Հարությունյանի մեղավորությունը` դիտավորությամբ հասարակական կարգը կոպիտ կերպով խախտելու, որը դրսևորվել է հասարակության նկատմամբ բացահայտ անհարգալից վերաբերմունքով խմբի անձանց կողմից բռնություն գործադրելով կամ դա գործադրելու սպառնալիքով խուլիգանություն կատարելու մեջ նախատեսված ՀՀ քրեական օրենսգրքի 258-րդ հոդվածի 3-րդ մասի 1-ին կետով, ապացուցված է:
ՀՀ քրեական օրենսգրքի 258-րդ հոդվածի համաձայն՝
ՙ1.Խուլիգանությունը դիտավորությամբ հասարակական կարգը կոպիտ կերպով խախտել[ն է], որն արտահայտվել է հասարակության նկատմամբ բացահայտ անհարգալից վերաբերմունքով (…):
2. Նույն արարքը, որը զուգորդվել է անձի նկատմամբ բռնություն գործադրելով կամ դա գործադրելու սպառնալիքով, ինչպես նաև ուրիշի գույքը ոչնչացնելով կամ վնասելով (…):
3. Սույն հոդվածի երկրորդ մասով նախատեսված արարքը, որը`
1) կատարվել է մի խումբ անձանց կամ կազմակերպված խմբի կողմից (…)
Մեջբերված հոդվածի վերլուծությունից երևում է, որ խուլիգանությունը հասարակական կարգի և բարոյականության դեմ ուղղված հանցագործություն է, որի հիմնական, անմիջական օբյեկտն այն հասարակական հարաբերություններն են, որոնք կազմում են հասարակական կարգի բովանդակությունը, իսկ պարտադիր լրացուցիչ օբյեկտն անձի անձեռնմխելիության, պատվի և արժանապատվության, առողջության, քաղաքացիների և կազմակերպությունների գույքային շահերի պաշտպանությանն ուղղված հասարակական հարաբերություններն են:
15. Խուլիգանության հիմնական հանցակազմն ունի մեկ, իսկ որակյալ հանցակազմը՝ երկու օբյեկտ: Մասնավորապես, հասարակական կարգը կոպիտ կերպով խախտելը, որն արտահայտվել է հասարակության նկատմամբ բացահայտ անհարգալից վերաբերմունքով, ենթակա է որակման որպես հասարակ խուլիգանություն, մինչդեռ նույն արարքը, որը զուգորդվում է անձի առողջությանը, գույքային իրավունքներին և այլին վնաս պատճառելով, ենթակա է որակման խուլիգանության որակյալ հանցակազմով:
Խուլիգանության հիմնական հանցակազմի վերոշարադրյալ վերլուծության հիման վրա Վճռաբեկ դատարանը ԱՎԴ/0014/01/11 քրեական գործով իրավական դիրքորոշում է արտահայտել, որ նշված հանցակազմի օբյեկտի մեկնաբանման համար էական նշանակություն ունի« հասարակական կարգը հասկացության պարզաբանումը: Այս կապակցությամբ Վճռաբեկ դատարանն արձանագրել է, որ հասարակական կարգն ընկալվում է երկու իմաստով՝ լայն և նեղ:
Լայն իմաստով հասարակական կարգը հասարակության մեջ առկա սոցիալական կապերի և հարաբերությունների համակցությունն է, որը ձևավորվում է սոցիալական, իրավական և բարոյական նորմերի գործողության արդյունքում, և յուրաքանչյուր հանցագործություն, զանցանք կամ այլ իրավախախտում այս կամ այն չափով հանգեցնում է դրա խախտման:
Խուլիգանության հիմնական հանցակազմի անմիջական օբյեկտն այն հասարակական հարաբերություններն են, որոնք կազմում են նեղ իմաստով հասարակական կարգի բովանդակությունը:
Նեղ իմաստով հասարակական կարգն ընկալվում է որպես հասարակական նշանակության վայրերում, այն է՝
1) տրանսպորտային միջոցների կայանատեղիներում,
2) օդանավակայաններում,
3) շուկաներում,
4) պուրակներում,
5) այգիներում,
6) կինոթատրոններում,
7) ցուցասրահներում,
8) մարզադաշտերում,
9) փողոցներում,
10) հիմնարկ-ձեռնարկություններում,
11) ուսումնական հաստատություններում,
12) հասարակական տրանսպորտում,
13) հասարակական սննդի սպասարկման վայրերում,
14) հասարակական նշանակության այլ վայրերում
այնպիսի իրադրության առկայություն, որի պայմաններում ապահովված է քաղաքացիների արժանավայել վարքագիծը, կազմակերպությունների, հիմնարկների և հասարակական նշանակության այլ օբյեկտների բնականոն աշխատանքը, ինչպես նաև այդ վայրերում գտնվող անձի (անձանց) ֆիզիկական և հոգեկան անձեռնմխելիությունը:
16. Խուլիգանության հիմնական հանցակազմի օբյեկտիվ կողմը դրսևորվում է հասարակական նշանակության վայրերում, ինչպես նաև հասարակական նշանակություն չունեցող այլ վայրերում, որտեղ առկա է հանրություն, սահմանված կարգի կոպիտ խախտման մեջ, որն արտահայտվում է այդ վայրերում գտնվող հասարակության անդամների նկատմամբ բացահայտ անհարգալից վերաբերմունքով: Խուլիգանության որակյալ հանցակազմի պարագայում վերոնշյալ արարքները զուգորդում են բռնությամբ, գույքը վնասելով կամ ոչնչացնելով և այլն:
Վճռաբեկ դատարանն արձանագրել է, որ արարքը ենթակա է որակման որպես խուլիգանություն միայն այն դեպքում, երբ գործով ձեռք բերված ապացույցներով կհիմնավորվի հասարակական կարգի խախտման կոպիտ լինելը և միաժամանակ, հասարակության նկատմամբ այդ խախտմամբ արտահայտված անհարգալից վերաբերմունքի բացահայտ լինելը:
Վերոհիշյալ հանցանքի կատարման համար ամբաստանյալը ենթակա է քրեական պատասխանատվության և պատժի, որը նա պետք է կրի:
ՀՀ քրեական օրենսգրքի 10-րդ հոդվածի համաձայնª ՙՀանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացիª համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար՚:
ՀՀ քրեական օրենսգրքի 48-րդ հոդվածի 1-ին մասի համաձայնª ՙպատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից ու ազատություններից օրենքով նախատեսված զրկմամբ կամ դրանց սահմանափակմամբ՚:
ՀՀ քրեական օրենսգրքի 48-րդ հոդվածի 2-րդ մասի համաձայնª ՙՊատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61-րդ հոդվածի 1-ին մասի համաձայն` ՙՀանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները՚:
ՀՀ քրեական օրենսգրքի 61-րդ հոդվածի 2-րդ մասի համաձայնª ՙՊատժի տեսակը և չափը որոշվում է հանցագործությանª հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվումª պատասխանատվությունը և պատիժը մեղմացնող կամ ծանրացնող հանգամանքներով՚:
ՀՀ Վճռաբեկ դատարանը 2012թ. նոյեմբերի 1-ին Սերոբ Սարգսյանի վերաբերյալ թիվ ՍԴ/0109/01/12 գործով արտահայտել է հետևյալ իրավական դիրքորոշումը. ՙ(…) պատիժ նշանակելու ընդհանուր սկզբունքները քրեական օրենքով նախատեսված այն հիմնադրույթներն են, որոնցով պետք է ղեկավարվի դատարանը պատիժ նշանակելիս: Այդ սկզբունքներն են`
ա) օրինականությունը,
բ) արդարությունը,
գ) պատժի անհատականացումը,
դ) մարդասիրությունը:
Պատիժ նշանակելու վերոնշյալ սկզբունքները սահմանում են այն հիմնական դրույթները, որոնցով ղեկավարվում է դատարանը յուրաքանչյուր քրեական գործով պատժի տեսակն ու չափն ընտրելիս:
(…) պատժի նշանակման իրավական շրջանակները սահմանված են ՀՀ քրեական օրենսգրքով: Դրա հետ մեկտեղ, սակայն, վերոնշյալ օրենքը դատարանին հնարավորություն է տվել որոշակի սկզբունքների (…) պահպանմամբ, իր ներքին համոզմանը և իրավագիտակցությանը համապատասխան, ՀՀ քրեական օրենսգրքի Ընդհանուր և Հատուկ մասերով նախատեսված սահմաններում որոշել պատժի տեսակն ու չափը: Այլ կերպ՝ ուրվագծելով կոնկրետ հանցանքի համար նշանակման ենթակա պատժի առավելագույն և նվազագույն սահմանները՝ ՀՀ քրեական օրենքը դատարանին տվել է այդ շրջանակում հայեցողություն դրսևորելու հնարավորություն:
Վճռաբեկ դատարանը գտել է, որ ՀՀ քրեական օրենսգրքի Հատուկ մասի գրեթե բոլոր հոդվածների սանկցիաներում ամրագրված վերոնշյալ մոտեցումը պայմանավորված է այն տրամաբանությամբ, որ քրեական օրենքը համընդհանուր բնույթ ունի, իսկ արարքը և հանցավորի անձը կոնկրետ են: Ուստի կոնկրետ արարքի և անձի նկատմամբ համընդհանուր քրեական օրենքով նախատեսված սանկցիան կիրառելիս դատարանը պետք է որոշակի հայեցողություն դրսևորի:
Այնսինքն` առանց դատարանի հայեցողության պատժի անհատականացումն անհնար է:
(…) Պատիժ նշանակելիս դատարանի ներքին համոզմունքը ձևավորվում է կատարված արարքի հանրային վտանգավորության աստիճանի ու բնույթի, հանցավորի անձի, պատիժը մեղմացնող և ծանրացնող հանգամանքների վերլուծության հիման վրա: Նշված հանգամանքների հայեցողական և ոչ երբեք կամային գնահատման ժամանակ դատարանը պետք է ելնի ՀՀ քրեական օրենսգրքի 48-րդ հոդվածով նախատեսված՝ պատժի նպատակների իրացումն ապահովելու անհրաժեշտությունից (տես Նարեկ Գևորգի Սարգսյանի գործով Վճռաբեկ դատարանի 2011 թվականի դեկտեմբերի 22-ի թիվ ԵԿԴ/0042/01/11 որոշման 14-րդ, 22-23-րդ կետերը)՚:
Ամբաստանյալ Հայկ Հարությունյանի անձը բնութագրող տվյալներ, պատասխանատվությունն ու պատիժը մեղմացնող հանգամանքներ դատարանը հաշվի է առնում այն, որ նա բնութագրվում է դրական, նախկինում դատված չի եղել:
Դատարանը որպես ամբաստանյալի պատասխանատվությունն ու պատիժը ծանրացնող հանգամանք է դիտում հանցանքն ալկոհոլի ազդեցության տակ կատարելը:
Ղեկավարվելով ՀՀ քրեական դատավարության օրենսգրքի 357-360-րդ, 365-րդ, 366-րդ, 369-373-րդ և 379-րդ հոդվածներով, դատարանը`

ՎՃՌԵՑ

Հայկ Արայիկի Հարությունյանին մեղավոր ճանաչել ՀՀ քրեական օրենսգրքի 258-րդ հոդվածի 1-ին մասով նախատեսված հանցագործության կատարման մեջ և նրա նկատմամբ պատիժ նշանակել տուգանք` նվազագույն աշխատավարձի երկուհարյուրհիսնապատիկի` 250.000 /երկու հարյուր հիսուն հազար/ ՀՀ դրամի չափով:
Կիրառել ՀՀ Ազգային Ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշման 1-ին կետի 2-րդ ենթակետը և նրան ազատել նշանակված պատժից:
Հայկ Հարությունյանի նկատմամբ ընտրված խափանման միջոցը` ստորագրություն` չհեռանալու մասին, վերացնել:
Ապացույց ճանաչված լազերային սկավառակը պահել քրեական գործի հետ միասին:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո` մեկամսյա ժամկետում:




ԴԱՏԱՎՈՐ Ա.ՄԿՐՏՉՅԱՆ