Գործ No ԵԱՔԴ/0093/01/14

ՈՐՈՇՈՒՄ

ՔՐԵԱԿԱՆ ՊԱՏԱՍԽԱՆԱՏՎՈՒԹՅՈՒՆԻՑ ԱԶԱՏԵԼՈՒ ԵՎ
ԲԺՇԿԱԿԱՆ ԲՆՈՒՅԹԻ ՀԱՐԿԱԴՐԱԿԱՆ ՄԻՋՈՑՆԵՐ ԿԻՐԱՌԵԼՈՒ ՄԱՍԻՆ

ՙ12՚ օգոստոսի 2014թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը

նախագահությամբ` դատավոր Ա.Մկրտչյանի
քարտուղարությամբ` Հ.Արտաշեսյանի
Օ.Կիրակոսյանի
մասնակցությամբ`
դատախազ Վ.Մկրտչյանի
պաշտպան Կ.Մանուչարյանի
օրինական ներկայացուցիչ Ս.Պետրոսյանի

Դռնբաց դատական նիստում քննեց Կարեն Արշակի Մեհրաբյանի (ծնված 28.06.1978թ. Երևան քաղաքում, ազգությամբ հայ, ՀՀ քաղաքացի, ութամյա կրթությամբ, չի աշխատում, չամուսնացած, նախկինում չդատված, երրորդ կարգի հաշմանդամ, հաշվառված Երևան, Զեյթուն 5ա փողոց 38 տուն, ներկայումս գտնվում է ՀՀ ԱՆ ՙՀոգեբուժական բժշկական կենտրոն՚ ՓԲԸ Նուբարաշենի կլինիկայի հատուկ հսկողության հոգեբուժական բաժանմունքում) նկատմամբ բժշկական բնույթի հարկադրական միջոցներ կիրառելու մասին վարույթը:

Վարույթի դատավարական նախապատմությունը
2014 թվականի ապրիլի 28-ին ՀՀ քրեական օրենսգրքի 112-րդ հոդվածի 1-ին մասի հատկանիշներով հարուցվել է թիվ 09114814 քրեական գործը:
2014 թվականի ապրիլի 30-ին Կ.Մեհրաբյանը ներգրավվել է որպես մեղադրյալ և նրա նկատմամբ որպես խափանման միջոց է ընտրվել կալանավորումը:
2014 թվականի հունիսի 11-ին ստացվել է ստացիոնար դատահոգեբուժական փորձաքննության թիվ 54 եզրակացությունը:
2014 թվականի հունիսի 11-ին Կ.Մեհրաբյանի նկատմամբ բժշկական բնույթի հարկադրական միջոցներ կիրառելու մասին վարույթ է հարուցվել, նրա նկատմամբ կիրառված խափանաման միջոցը վերացվել է և կիրառվել է հոգեբուժական հիվանդանոցում տեղավորելու անվտանգության միջոց:
2014 թվականի հունիսի 27-ին Կարեն Մեհրաբյանի նկատմամբ բժշկական բնույթի հարկադրական միջոցներ կիրառելու վերաբերյալ գործն ուղարկվել է Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:

Վարույթի փաստական հանգամանքները
2014 թվականի ապրիլի 28-ին ժամը 00:10-ի սահմաններում Երևան քաղաքի Զեյթուն 5ա փողոցի թիվ 38 տան բակում Կարեն Արշակի Մեհրաբյանը, ալկոհոլ օգտագործելու համար նախազգուշացում ստանալով իր հարևան Արտակ Արարատի Ադուրյանից, վիճաբանության մեջ է մտել նրա և վերջինիս հորաքրոջ որդի Նաիրի Խաչիկի Միրզոյանի հետ, որից հետո դուրս գալով բակից` տան մերձակայքում, շարունակել է վիճաբանությունը, որի ընթացքում կտրող-ծակող գործիքով տասը հարված է հասցրել Ա.Ադուրյանի մեջքի հատվածում և մեկ հարված Ն.Միրզոյանի կրծքավանդակի շրջանում: Նույն օրը Ա.Ադուրյանը և Ն.Միրզոյանը տեղափոխվել են ՙՄիքայելյանի անվան վիրաբուժության ինստիտուտ՚ ՓԲԸ՝ համապատասխանաբար ՙկրծքավանդակի պատի բազմաթիվ կտրած-ծակած վերքեր՚ և ՙկրծքավանդակի աջ կեսի առաջին մակերեսի կտրած-ծակած վերք՚ ախտորոշումներով:

Ապացույցների հետազոտում և գնահատում
Տուժող Արտակ Արարատի Ադուրյանը նախաքննության փուլում ցուցմունք է տվել, որ 2014թ. ապրիլի 27-ին, ժամը 18-ի սահմաններում ինքը և իր հորաքրոջ որդի Ն.Միրզոյանը` Երևան քաղաքի Զեյթուն 5ա փողոցի թիվ 50 տանը ընտանիքով հաց են կերել և ոգելից խմիչքներ են օգտագործել, որից հետո ժամը 23:30-ի սահմաններում Նաիրին դուրս է եկել իրենց տնից և գնացել է իր քրոջ տուն: Իսկ 2014թ. ապրիլի 28-ին ժամը 00:10-ի սահմաններում արդեն ինքն է դուրս եկել տնից և ծխախոտ գնելու նպատակով ոտքով քայլել դեպի ՙԵրևան Սիթի՚ սուպերմարկետ: Այդ ընթացքում իր կինը զանգահարել է Նաիրիին և խնդրել որպեսզի Նաիրին վերադառնա և իր հետ լինի: Սուպերմարկետ գնալու ճանապարհին ինքը նկատել է, որ իրենց հարևան Կարեն Արշակի Մեհրաբյանը վիճաբանում է ինչ-որ անծանոթ տաքսու վարորդի հետ, մոտեցել է նրանց և փորձել հանդարտեցնել վեճը: Այդ ընթացքում իրենց է մոտեցել նաև Նաիրին և ինքն ու Նաիրին տաքսու վարորդին ճանապարհել են, իսկ Կարենին տարել են նրա տան բակ, որտեղ ալկոհոլ օգտագործելու համար նախազգուշացում ստանալով իրենից, Կարենը վիճաբանության մեջ է մտել իր և Նաիրիի հետ, որից հետո դուրս գալով բակից` տան մերձակայքում, շարունակել է վիճաբանությունը, որի ընթացքում կտրող-ծակող գործիքով բազմաթիվ հարվածներ է հասցրել իր մեջքի հատվածին և մեկ հարված Նաիրիի կրծքավանդակի շրջանում:
գ.թ. 21-24

Գործով տուժող Նաիրի Խաչիկի Միրզոյանը նախաքննության փուլում ցուցմունք է տվել, որ 2014թ. ապրիլի 27-ին, ժամը 18-ի սահմաններում ինքը և իր քեռու որդի Ա.Ադուրյանը Արտակենց տանը ընտանիքով հաց են կերել և ոգելից խմիչքներ են օգտագործել, որից հետո ժամը 23:40-ի սահմաններում ինքը դուրս է եկել Արտակի տանից և գնացել իր քրոջ տուն: Այդ ընթացքում իրեն է զանգահարել Արտակի կինը՝ Սյուզաննան և խնդրել որպեսզի ինքը վերադառնա և Արտակի հետ լինի, քանի որ Արտակը դուրս է եկել տնից և ծխախոտ գնելու նպատակով գնացել է ՙԵրևան Սիթի՚ սուպերմարկետ: Դրանից հետո ինքը իր քրոջ տնից դուրս է եկել և գնացել Արտակի մոտ: Կ. Մեհրաբյանենց տան մոտ ինքը նկատել է, որ Կարենը վիճաբանում է ինչ որ անծանոթ տաքսու վարորդի հետ, մոտեցել է նրանց և Արտակի հետ միասին փորձել է հանդարտեցնել վեճը: Այնուհետև ինքն ու Արտակը տաքսու վարորդին ճանապարհել են, իսկ Կարենին տարել են իրենց բակ, որտեղ ալկոհոլ օգտագործելու համար նախազգուշացում ստանալով Արտակից Կարենը վիճաբանության մեջ է մտել իր և Արտակի հետ, որից հետո դուրս գալով բակից` տան մերձակայքում, շարունակել է վիճաբանությունը, որի ընթացքում կտրող-ծակող գործիքով բազմաթիվ հարվածներ է հասցրել Արտակի մեջքի հատվածում և մեկ հարված իր կրծքավանդակի շրջանում:
գ.թ. 96-97

Գործով վկա Կարեն Մեհրաբյանի օրինական ներկայցուցիչ Սեդա Զագևոսի Պետրոսյանը դատաքննության փուլում ցուցմունք է տվել, որ ինքը իր որդի Կ.Մեհրաբյանի հետ միասին բնակվել է Երևան քաղաքի Զեյթուն 5ա փողոցի թիվ 38 տանը: Իր որդի Կարենը շուրջ 9-ը տարի է ինչ հաշվառված է Ավանի հոգեբուժարանում: Կարենը ոգելից խմիչքներ օգտագործելուց հետո դառնում է ագրեսիվ: 2014թ. ապրիլի 27-ի լույս 28-ի գիշերը Կարենը տնից դուրս է եկել և տան բակ է վերադարձել արդեն ոգելից խմիչք օգտագործած վիճակում, նրա հետևից իրենց տան բակ են մտել իրենց հարևան Արտակը և նրա ազգական Նաիրին, որոնք ևս գտնվել են ոգելից խմիչք օգտագործած վիճակում: Իրենց տան բակում Կարենը, Արտակը և Նաիրին նստել են բակում գտնվող աթոռների վրա և զրուցել են, որի ընթացքում Արտակը Կարենին ասել է, թե ոգելից խմիչքներ մի օգտագործի, քանի որ դու հիվանդ ես և քեզ չի թույլատրվում ոգելից խմիչքներ, իսկ Կարենը ընդդիմացել է Արտակին և ասել, որ դու չպետք է ասես, թե ես ոգելից խմիչքներ ոգտագործեմ, թե ոչ: Այդ խասակցության շուրջ նրանք սկսել են վիճաբանել և ինչի արդյունքում Արտակն ու Կարենը սկսել են քաշքշել միմյանց և ընկել են գետնին, այդ ընթացքում Նաիրին Կարենին է բռնել որպեսզի Կարենը Արտակին չհարվածի: Դրանից հետո Արտակն ու Նաիրին իր խնդրանքով դուրս են եկել իրենց բակից, սակայն Կարենը ևս դուրս է եկել նրանց հետևից: Կարենի դուրս գալուց մոտ 15 րոպե հետո ինքը դուրս է եկել բակից դուրս և տեսել է, որ Կարենը պառկած է իրենց և Արտակենց տների միջնամասում՝ փողոցի մայթին, և ինքն իրեն խոսում է: Պետրոսյանը նշել է որի իր որդի իրոք բուժման կարիք ունի, սակայն ոչ հատուկ հսկողության պայմաններում:

Գործով վկա Սյուզաննա Հենրիկի Ստեփանյանը նախաքննության փուլում ցուցմունք է տվել, որ ինքը ամուսնացած է Ա. Ադուրյանի հետ: 2014թ. ապրիլի 27-ին իր ամուսինը տանն է եղել, երբ ժամը 19:00-ի սահմաններում իրենց տուն է եկել Արտակի հորաքրոջ որդին՝ Ն.Միրզոյանը: Որից հետո իրենք հաց են կերել, և Արտակն ու Նաիրին ոգելից խմիչքներ են օգտագործել: Ժամը 24:00-ի սահմաններում Նաիրին դուրս է եկել իրենց տնից, որպեսզի գնա իր քրոջ տուն: Իսկ 2014թ. ապրիլի 28-ին ժամը 00:10-ի սահմաններում արդեն Արտակն է դուրս եկել տնից և ծխախոտ գնելու նպատակով ոտքով քայլել դեպի ՙԵրևան Սիթի՚ սուպերմարկետ: Այդ ընթացքում ինքը հեռախոսազրույց է ունեցել Նաիրիի հետ և խնդրել որպեսզի Նաիրին հետ վերադառնա և Արտակի հետ լինի: Արտակի դուրս գալուց մոտ 50 րոպե հետո Արտակն ու Նաիրին ամբողջովին արյունոտված վիճակում վերադարձել են տուն, Արտակի մեջքին եղել են մի քանի վնասվածքներ, իսկ Նաիրիի կրծքավանդակին եղել է մեկ վնասվածք: Արտակի և Նաիրիի խոսակցություններից ինքը հասկացել է, որ նրանց ինչ որ կտրող-ծակող գործիքով հարվածել է իրենց հարևան Կարենը, ով ունի ցլիկ մականունը, մասնավորապես Նաիրին Արտակի հետ խոսակցության ընթացքում ասել է, թե դա ով է, որ մեզ խփի, իսկ Արտակը հանգստացրել է Նաիրիին ասելով, որ Կարենը մեղք է հիվանդ տղա է: Երբ նրանք արնաքամ եկել են տան բակ Արտակը գնացել է տանը հարակից ատամնաբուժարան, իսկ Նաիրին սկզբից բարձրացել է տուն և ապա նոր գնացել ատամնաբուժարան: Այդ ամբողջ ընթացքում ինքը, ինչպես նաև իրենց հարևան Զախարյան Կարենը, Արշակը, Արշակի որդի Կարենը խնամել են Արտակին և Նաիրիին փորձելով շորերի միջոցով դադարեցնել նրանց արյունահոսությունը, սակայն տեսնելուվ, որ արյունահոսությունը չի դադարում Կարեն Զախարյանը իր խնդրանքով զանգահարել է շտապ օգնություն: Որից հետո եկել է շտապ օգնության բրիգադը և Արտակին ու Նաիրիին տեղափոխել Միքայելյան բժշկական կենտրոն:
գ.թ. 29-30

Գործով վկա Արշակ Վաղինակի Կարապետյանը նախաքննության փուլում ցուցմունք է տվել, որ ինքն իր ընտանիքի հետ միասին բնակվում է Երևան քաղաքի Վերին Զեյթուն 5ա փողոցի թիվ 52 տանը: Իրենց տան հարևանությամբ գտնվում է ատամնաբույժ Ա.Ադուրյանենց տունը: 2014թ. ապրիլի 28-ին, ժամը 01:00-ի սահմաններում ինքը իրենց տանը համակարգչով է զբաղվելիս եղել, երբ իրենց հարևան Արտակենց բակից բարձր լացի և գոռգոռոցի ձայներ է լսել, իր որդու հետ միասին անմիջապես շտապել է Արտակենց տուն և տան բակում տեսել է Արտակին և Նաիրիին ովքեր ամբողջությամբ արյան մեջ են եղել: Արտակի մեջքին բազմաթիվ վնասվածքներ են եղել, իսկ Նաիրիի կրծքավանդակին մեկ վնասվածք է եղել, դրանից հետո իրենք ատամնաբուժարանում խնամել են Արտակի և Նաիրիին, սակայն տեսնելուվ, որ արյունահոսությունը չի դադարում, զանգահարել են շտապ օգնություն, որից հետո եկել է շտապ օգնության բրիգադը և Արտակին ու Նաիրիին տեղափոխել հիվանդանոց: Այնուհետև, երբ Արտակը հիվանդանոցից դուրս է եկել իր հետ խոսակցության ընթացքում ասել է, որ իրեն և Նաիրիին ինչ-որ կտրող-ծակող գործիքով Կ. Մեհրաբյանն է հարվածել և վնասվածքներ պատճառել:
գ.թ. 106-107

Գործով վկա Կարեն Արշակի Կարապետյանը նախաքննության փուլում ցուցմունք է տվել, որ ինքն իր ընտանիքի հետ միասին բնակվում է Երևան քաղաքի Վերին Զեյթուն 5ա փողոցի թիվ 52 տանը: Իրենց տան հարևանությամբ գտնվում է ատամնաբույժ Ա.Ադուրյանենց տունը: 2014թ. ապրիլի 28-ին, ժամը 01:00-ի սահմաններում ինքը և իր հայրը իրենց տանը համակարգչով էին զբաղված, երբ իրենց հարևան Արտակենց բակից բղավոցների ձայներ են լսել, իրենք անմիջապես շտապել են Արտակենց տուն և տան բակում տեսել են Արտակին և Նաիրիին ովքեր ամբողջությամբ արյան մեջ են եղել: Այնուհետև իրենք, ինչպես նաև իրենց հարևան Կարեն Զախարյանը սկսել են խնամել Արտակին և Նաիրիին, մասնավորապես թրջոցներով մշակել են նրանց վերքերը, սակայն տեսնելով, որ արյունահոսությունը չի դադարում, զանգահարել են շտապ օգնություն, որից հետո եկել է շտապ օգնության բրիգադը և Արտակին ու Նաիրիին տեղափոխել են Միքայելյան հիվանդանոց: Այնուհետև, երբ Արտակը հիվանդանոցից դուրս է եկել իր հետ խոսակցության ընթացքում ասել է, որ իրեն և Նաիրիին ինչ-որ կտրող-ծակող գործիքով Կ. Մեհրաբյանն է հարվածել և վնասվածքներ պատճառել:
գ.թ. 109-110

Գործով վկա Կարեն Թաթուլի Զախարյանը նախաքննության փուլում ցուցմունք է տվել, որ ինքն իր ընտանիքի հետ միասին բնակվում է Երևան քաղաքի Վերին Զեյթուն 5ա փողոցի թիվ 46 տանը: Իրենց տան հարևանությամբ գտնվում է ատամնաբույժ Ա.Ադուրյանեի և Կ.Մեհրաբյանի տները: 2014թ. ապրիլի 28-ին, ժամը 01:00-ի սահմաններում ինքը իրենց տանը քնած է եղել, երբ Արտակի կինը Սյուզին զանգահարել է իրեն և հայտնել, որ Արտակն ու Նաիրին արնաքամ են լինում: Դրանից հետո ինքը անմիջապես շտապել է Արտակենց տուն և տան բակում տեսել է Արտակին և Նաիրիին ովքեր ամբողջությամբ արյան մեջ են եղել: Արտակի մեջքին բազմաթիվ վնասվածքներ են եղել, իսկ Նաիրիի կրծքավանդակին մեկ վնասվածք է եղել, դրանից հետո իրենք ատամնաբուժարանում խնամել են Արտակի և Նաիրիին, սակայն տեսնելուվ, որ արյունահոսությունը չի դադարում զանգահարել են շտապ օգնություն, որից հետո եկել է շտապ օգնության բրիգադը և Արտակին ու Նաիրիին տեղափոխել Միքայելյան հիվանդանոց: Այնուհետև, երբ Արտակը հիվանդանոցից դուրս է եկել իր հետ խոսակցության ընթացքում ասել է, որ իրեն և Նաիրիին ինչ-որ կտրող-ծակող գործիքով Կ. Մեհրաբյանն է հարվածել և վնասվածքներ պատճառել:
գ.թ. 111-112

Դատակենսաբանական փորձաքննության թիվ 176 եզրակացության համաձայն փորձաքննությանը ներկայացված Նաիրի Խաչիկի Միրզոյանի հագուստների՝ վերնաշապիկի, անդրավարտիքի կաշվե գոտու վրա տեղակայված կասկածելի հետքերում հաստատվել է արյան առկայություն, որը կարող էր առաջանալ տուժող Նաիրի Խաչիկի Միրզոյանից: Փորձաքննությանը ներկայացված Արտակ Ադուրյանի հագուստների՝ վերնաշապիկի, ջինսե անդրավարտիքի, կաշվե գոտու, սպորտային կոշիկների վրա տեղակայված կասկածելի հետքերում հաստատվեց արյան առկայություն, որը կարող էր առաջանալ տուժող Արտակ Արարատի Ադուրյանից: Փորձաքննությանը ներկայացված /ատամնաբուժարանից առգրավված/ 3 սրբիչների վրա տեղակայված կասկածելի հետքերում հաստատվեց արյան առկայություն, որոնք կարող էին առաջանալ՝ 60x40սմ չափսերով սրբիչի վրա Ն.Միրզոյանից, 68x41սմ և121x61սմ չափսերով սրբիչների վրա Ա. Ադուրյանից: Փորձաքննությանը ներկայացված /ասֆալտի վրայից/ 3 խծուծներով և /ատամնաբուժարանի հատակից/ 2 խծուծներով վերցրած կասկածելի հետքերում հաստատվեց արյան առկայություն, որը կարող էր առաջանալ Ա. Ադուրյանից: Փորձաքննությանը ներկայացված ասֆալտի վրայից և ատամնաբուժարանի հատակից 1-ական խծուծներով վերցրած կասկածելի հետքերում հաստատվեց արյան առկայություն, որը կարող էր առաջանալ Ն. Միրզոյանից: ՙՓորձաքննությանը ներկայացված /Վերին Զեյթուն 5ա փող. 50 տան լոգարանից/ առգրավված սրբիչի վրա տեղակայված կասկածելի հետքերում հաստատվեց արյան առկայություն, որը կարող էր առաջանալ Ն.Միրզոյանից՚:
գ.թ. 158-165

Դատակենսաբանական փորձաքննության թիվ 184 եզրակացության, համաձայն փորձաքննությանը ներկայացված սպորտային բաճկոնի վրա տեղակայված կասկածելի հետքերում հաստատվեց արյան առկայություն, որը կարող էր առաջանալ Ա. Ադուրյանից:
գ.թ. 166-169

Դատաբժշկական փորձագետի թիվ 716 եզրակացության, համաձայն Ն.Միրզոյանի մարմնական վնասվածքներն ըստ բժշկական փաստաթղթերի և օբյեկտիվ ուսումնասիրության տվյալների՝ կրծքավանդակի աջ կեսի առաջային մակերեսի ծակած-կտրած թափանցող վերքի ձևով, որն ուղեկցվել է թոքի, լյարդի, միջկողային զարկերակի վնասումով, ներորովայնային արյունահոսությունով՝ հասցվել է սուր ծակող-կտրող գործիքով /առարկայով/, հնարավոր է որոշման մեջ նշված ժամկետում և հանգամանքում, որոնք առաջացրել են առողջությանը ծանր վնաս՝կյանքին վտանգ սպառնացող:
գ.թ. 129-130

Դատաբժշկական փորձագետի թիվ 737 եզրակացության, համաձայն Ա.Ադուրյանի մարմնական վնասվածքներն ըստ բժշկական փաստաթղթերի և օբյեկտիվ ուսումնասիրության տվյալների՝ ձախ ակնակապիճի շրջանի փաձուկ հյուսվածքների սալջարդի, արյունազեղման, կրծքավանդակի և զույգ ուսագոտիների շրջանների ծակած-կտրած չթափանցող վերքերի ձևով, հասցվել են արյունազեղումը և սալջարդերը՝ բութ, կոշտ առարկաներով, իսկ վերքերը՝ սուր ծակող-կտրող գործիքով /առարկայով/, հնարավոր է որոշման մեջ նշված ժամկետում և հանգամանքում, որոնք առաջացրել են առողջությանը թեթև վնաս, առողջության կարճատև քայքայումով:
գ.թ. 131-132
Դատաբժշկական փորձաքննության թիվ 1132 եզրակացության համաձայն` Կ.Մեհրաբյանի ստացված մարմնական վնասվածքները՝ ձախ 2-րդ մատի եղնգային ֆալանգի և 2-րդ մատի եղնգային ֆալանգի և 3-րդ մատի հիմային ֆալանգի թիկնային մակերեսների, աջ դաստակի 3-րդ մատի հիմային ֆալանգի, ձախ նախաբազկի վ/3-րդ մատի հիմային ֆալանգի, ձախ նախաբազկի վ/3-ի հետին մակերեսի քերծվածքների, գոտկային շրջանի աջ կեսի կողմնային մակերեսի ճանկռվածքների, ձևերով հասցվել են ճանկռվացքները սուր եզր ունեցող բութ, իսկ քերծվածքները բութ առարկաներով, որոնք նչպես ընդհանուր, այնպես էլ առանձին-առանձին վերվրած առողջությանը թեթև վնասի հատկանիշներ չեն պարունակում: Ելնելով վնասվածքների բնույթից, ձախ դաստակի և աջ դաստակի քերձվածքները հնարավոր է պատճառված լինեն որոշման մեջ նշված ժամկետում և գործի հանգամանքներում, իսկ ձախ նախաբազկի քերծվածքը և գոտկայն աջ կեսի ճանկռվածքները իրենց բնույթով ավելի հին են և չեն համապատասխանում որոշման մեջ նշված ժամկետին:
գ.թ. 133-134

Ստացիոնար դատահոգեբուժական փորձաքննություն թիվ 54 եզրակացության, համաձայն որի Կարեն Արշակի Մեհրաբյանը տառապել և տառապում է /անձի օրգանական խանգարում՝ փսիխոտիկ դրվագներով/ հոգեկան հիվանդությամբ: Այդ մասին են վկայում ինչպես անամնեստիկ տվյալները, այնպես էլ ներկա հետազոտման արդյունքները:
Իրավախախտումը կատարելիս փորձաքննվողը գտնվել է հոգեկան գործունեյության վերը նշված հիվանդագին խանգարված վիճակում, որը զրկել է նրան իր գործողությունների բնույթն ու վտանգավորությունը գիտակցելու և դրանք ղեկավարելու հնարավորությունից:
Ներկայումս նա նույնպես չի կարող գիտակցել իր գործողությունների վտանգավորությունը և ղեկավարել դրանք:
Ուստի, իրեն մեղսագրվող արարքի նկատմամբ Կարեն Արշակի Մեհրաբյանին հարկ է ճանաչել անմեղսունակ:
Իր ներկա հոգեկան վիճակով նա չի կարող մասնակցել դատաքննչական գործողություններին, վտանգ է ներկայացնում ինչպես իր, այնպես էլ շրջապատի նկատմամբ, կարիք ունի հարկադրական բուժման հատուկ հսկողության հոգեբուժական բաժանմունքի պայմաններում:
գ.թ. 140-143

Դատարանի իրավական վերլուծությունները
Վերոգրյալ ապացույցների հիման վրա դատարանը գալիս է այն եզրահանգման, որ Կարեն Արշակի Մեհրաբյանը 2014 թվականի ապրիլի 28-ին ժամը 00:10-ի սահմաններում Երևան քաղաքի Զեյթուն 5ա փողոցի թիվ 38 տան բակում, ալկոհոլ օգտագործելու համար նախազգուշացում ստանալով իր հարևան Արտակ Արարատի Ադուրյանից, վիճաբանության մեջ է մտել նրա և վերջինիս հորաքրոջ որդի Նաիրի Խաչիկի Միրզոյանի հետ, որից հետո դուրս գալով բակից` տան մերձակայքում, շարունակել է վիճաբանությունը, որի ընթացքում կտրող-ծակող գործիքով տասը հարված է հասցրել Ա.Ադուրյանի մեջքի հատվածում և մեկ հարված Ն.Միրզոյանի կրծքավանդակի շրջանում: Նույն օրը Ա.Ադուրյանը և Ն.Միրզոյանը տեղափոխվել են ՙՄիքայելյանի անվան վիրաբուժության ինստիտուտ՚ ՓԲԸ՝ համապատասխանաբար ՙկրծքավանդակի պատի բազմաթիվ կտրած-ծակած վերքեր՚ և ՙկրծքավանդակի աջ կեսի առաջին մակերեսի կտրած-ծակած վերք՚ ախտորոշումներով:
Այսպիսով, դատարանը Կ.Մեհրաբյանի կողմից կատարած քրեական օրենքով չթույլատրված արարքը ապացուցված է համարում:
Քննարկելով հանրորեն վտանգավոր արարք կատարելու ժամանակ Կարեն Մեհրաբյանի մեղսունակության հարցը` դատարանը գտնում է, որ իրավախախտումը կատարելիս վերջինս գտնվել է հիվանդագին խանգարված վիճակում, որը զրկել է նրան իր գործողությունների վտանգավորությունը գիտակցելու և դրանք ղեկավարելու հնարավորությունից և իրեն մեղսագրվող արարքի նկատմամբ Կարեն Մեհրաբյանն անմեղսունակ է:
ՀՀ քրեական դատավարության օրենսգրքի 450-րդ հոդվածի 1-ին մասի համաձայն` բժշկական բնույթի հարկադրական միջոցները դատարանը կիրառում է այն անձանց նկատմամբ, ովքեր քրեական օրենքով չթույլատրված արարքը կատարել են անմեղսունակ վիճակում, եթե այդ անձինք շարունակում են վտանգավոր լինել հասարակության համար:
ՀՀ քրեական դատավարության օրենսգրքի 463-րդ հոդվածի 4-րդ կետի համաձայն` դատարանը պետք է լուծի նաև այն հարցը, թե անձը կարիք ունի արդյոք իր նկատմամբ բժշկական բնույթի հարկադրական միջոցներ կիրառելու և հատկապես ինչպիսի միջոցներ:
ՀՀ քրեական դատավարության օրենսգրքի 464-րդ հոդվածի 1-ին մասի համաձայն` անձի կողմից քրեական օրենքով չթույլատրված արարքն անմեղսունակության վիճակում կատարելն ապացուցված համարելով` դատարանը որոշում է կայացնում անձին քրեական պատասխանատվությունից և պատժից ազատելու ու նրա նկատմամբ բժշկական բնույթի հարկադրական միջոցներ կիրառելու մասին:
ՀՀ քրեական օրենսգրքի 97-րդ հոդվածի 1-ին մասի 1-ին կետի համաձայն` բժշկական բնույթի հարկադրական միջոցներ դատարանը կարող է նշանակել այն անձի նկատմամբ, ով հանցանքը կատարել է անմեղսունակության վիճակում:
Այսպիսով` դատարանը գտնում է, որ Կարեն Մեհրաբյանն անմեղսունակության վիճակում կատարել է քրեական օրենքով չթույլատրված արարք և կարիք ունի իր նկատմամբ բժշկական բնույթի հարկադրական միջոցներ կիրառելու:
Նկատի ունենալով, որ Կարեն Մեհրաբյանն անմեղսունակ է և կարիք ունի հարկադիր բուժման` դատարանը գտնում է, որ նրան պետք է ազատել քրեական պատասխանատվությունից և կիրառել հարկադիր բուժում` հատուկ տիպի հոգեբուժական բաժանմունքի պայմաններում:
Անդրադառնալով իրեղեն ապացույցների տնօրինման հարցին, դատարանը գտնում է, որ իրեղեն ապացույց հանդիսացող Ն.Միրզոյանի և Ա.Ադուրյանի հագուստները, Կ.Մեհրաբյանից առգրավված սպորտային վերնազգեստը և դեպքի վայրից առգրավված երեք սրբիչը պետք է վերադարձնել ըստ պատկանելության:
Ղեկավարվելով ՀՀ քրեական դատավարության օրենսգրքի 119-րդ, 379-րդ, 450-րդ և 462-464-րդ հոդվածներով` դատարանը:

ՈՐՈՇԵՑ

Կարեն Արշակի Մեհրաբյանին ազատել ՀՀ քրեական օրենսգրքի 112-րդ հոդվածի 1-ին մասով նախատեսված քրեական պատասխանատվությունից և նրա նկատմամբ կիրառել հարկադիր բուժում` հատուկ հսկողության հոգեբուժական բաժանմունքի պայմաններում:
ՀՀ ոստիկանության Արաբկիրի քննչական բաժնում պահվող իրեղեն ապացույց հանդիսացող Ն.Միրզոյանի և Ա.Ադուրյանի հագուստը, Կ.Մեհրաբյանից առգրավված սպորտային վերնազգեստը և դեպքի վայրից առգրավված երեք սրբիչը վերադարձնել ըստ պատկանելության:
Որոշումը կարող է բողոքարկվել ՀՀ վերաքննիչ քրեական դատարան` հրապարակելու օրվանից հետո մեկամսյա ժամկետում:




ԴԱՏԱՎՈՐ Ա.ՄԿՐՏՉՅԱՆ