Գործ No ԵԱՔԴ/0056/01/14

ՈՐՈՇՈՒՄ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

ՙ20՚ հունիսի 2014թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը`

նախագահությամբ` դատավոր Ա.Մկրտչյանի
քարտուղարությամբ Հ.Արտաշեսյանի
մասնակցությամբ`
մեղադրող Լ.Մանուկյանի
պաշտպան Է.Չինարյանի
տուժողի ներկայացուցիչներ Վ.Զուռնաչյանի
Գ.Պետրոսյանի

Դռնբաց դատական նիստում, արագացված դատաքննության կարգով, քննեց քրեական գործն ըստ մեղադրանքի Ռուբեն Ազատի Չիբուխչյանի (ծնված 17.08.1955թ. ք.Երևանում, ազգությամբ հայ, ՀՀ քաղաքացի, բարձրագույն կրթությամբ, ՀՀ փաստաբանների պալատի փաստաբան` արտոնագիր N760, չամուսնացած, չդատված, հաշվառված` ք.Երևան, Կոմիտաս 54/1 շենք, 15 բնակարան, բնակվող` ք.Երևան, Դավթաշեն 4-րդ թաղ., 18 շենք, 8 բնակարան), մեղադրվում է ՀՀ քրեական օրենսգրքի 178-րդ հոդվածի 1-ին մասով:

Պ Ա Ր Զ Ե Ց

Նախաքննության մարմինն ամբաստանյալ Ռուբեն Չիբուխչյանին ՀՀ քրեական օրենսգրքի 178-րդ հոդվածի 1-ին մասով մեղադրանք է առաջադրել այն արարքի համար, որ ՙնա, 2012թ. մայիս ամսին չարաշահելով Մերուժան Զարզանդի Պետրոսյանի վստահությունը, Շենգավիթ վարչական շրջանի դատարանում քաղաքացիական գործով 22.000 ԱՄՆ դոլարի հայցապահանջի 2 տոկոսի չափով պետական տուրքի վճարելու պատրվակով, նրանից խաբեությամբ վերցրել է 178.970 ՀՀ դրամին համարժեք 440 ԱՄՆ դոլար, սակայն չվճարելով պետական տուրքը` տիրացել է նշված գումարին՚:
Դատական քննության նախապատրաստական փուլում պաշտպան Է.Չինարյանը միջնորդեց Ռուբեն Չիբուխչյանի նկատմամբ ՀՀ քրեական օրենսգրքի 178-րդ հոդվածի 1-ին մասով քրեական հետապնդումը դադարեցնել` տուժողի ներկայացուցիչներ Վ.Զուռնաչյանի ու Գ.Պետրոսյանի և ամբաստանյալի փոխադարձ հաշտության հիմքով:
Ամբաստանյալ Ռուբեն Չիբուխչյանը դատական քննության նախապատրաստական փուլում հայտարարեց, որ ամբողջությամբ հատուցել է տուժողին հանցագործության հետևանքով անմիջականորեն պատճառված 178.970 ՀՀ դրամին համարժեք 440 ԱՄՆ դոլար գույքային վնասը և միաժամանակ հայտարարեց, որ հաշտվել է տուժողի ներկայացուցիչների հետ ու այդ կապակցությամբ ներկայացրեց գրավոր դիմում:
Տուժողի ներկայացուցիչներ Վ.Զուռնաչյանը ու Գ.Պետրոսյանը նույնպես հայտարարեցին, որ հաշտվել են ամբաստանյալ Ռուբեն Չիբուխչյանի հետ, պատճառված վնասն ամբողջությամբ հատուցվել է և նրանից որևէ բողոք կամ պահանջ չունեն, ինչի մասին ներկայացվեց նաև գրավոր դիմում:
ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի համաձայն` ՙքրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե սույն օրենսգրքով նախատեսված դեպքերում տուժողը հաշտվել է կասկածյալի կամ մեղադրյալի հետ՚:
ՀՀ քրեական դատավարության օրենսգրքի 183-րդ հոդվածի համաձայն` ՀՀ քրեական օրենսգրքի 178-րդ հոդվածի 1-ին մասով նախատեսված հանցագործության վերաբերյալ գործերը հարուցվում են ոչ այլ կերպ, քան տուժողի բողոքի հիման վրա և ամբաստանյալի հետ նրա հաշտվելու դեպքում ենթակա է կարճման:
ՀՀ քրեական օրենսգրքի 73-րդ հոդվածի համաձայն` ոչ մեծ ծանրության հանցանք կատարած անձը կարող է ազատվել քրեական պատասխանատվությունից, եթե նա հաշտվել է տուժողի հետ և հատուցել կամ այլ կերպ հարթել է նրան պատճառած վնասը:
Այսպիսով, դատարանը գտնում է, որ թիվ 61203413 քրեական գործի վարույթը պետք է կարճել և Ռուբեն Ազատի Չիբուխչյանի նկատմամբ քրեական հետապնդումը պետք է դադարեցնել` տուժողի ներկայացուցիչներ Վ.Զուռնաչյանի ու Գ.Պետրոսյանի և ամբաստանյալ Ռուբեն Չիբուխչյանի փոխադարձ հաշտության հիմքով:
Ղեկավարվելով ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետով, 183-րդ հոդվածի 1-ին մասով և 379-րդ հոդվածով դատարանը`


Ո Ր Ո Շ Ե Ց

ՀՀ քրեական օրենսգրքի 178-րդ հոդվածի 1-ին մասով հարուցված թիվ 61203413 քրեական գործի վարույթը կարճել և Ռուբեն Ազատի Չիբուխչյանի նկատմամբ քրեական հետապնդումը դադարեցնել` տուժողի ներկայացուցիչներ Վ.Զուռնաչյանի ու Գ.Պետրոսյանի և ամբաստանյալ Ռուբեն Չիբուխչյանի փոխադարձ հաշտության հիմքով:
Որոշումը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո` մեկամսյա ժամկետում:





ԴԱՏԱՎՈՐ Ա.ՄԿՐՏՉՅԱՆ