գործ` ԵԱՔԴ/0182/01/13



Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը

Նախագահությամբ դատավոր` Արմեն Բեկթաշյանի
քարտուղարությամբ` Հասմիկ Արտաշեսյանի

մասնակցությամբ` մեղադրող` Գայանե Աղաջանյանի

պաշտպան` Սիրանուշ Հարությունյանի
ամբաստանյալ` Արման Թովմասյանի

2014 թվականի հունվարի 31-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի`

Արման Սաղաթելի Թովմասյանի` ծնված 09.09.1989 թվականին, Ծաղկաձոր քաղաքում, ազգությամբ հայ, ՀՀ քաղաքացի, միջնակարգ-մասնագիտական կրթությամբ, ամուրի, խնամքին ոչ ոք, չի աշխատում, դատվածություն չունեցող, բնակվում է Երևան քաղաքի Ռուբինյանց փողոցի 19/1 շենքի, թիվ 39 բնակարանում:

Արման Սաղաթելի Թովմասյանը մեղադրվում է ՀՀ քրեական օրենսգրքի 258-րդ հոդվածի 1-ին մասով:
2013 թվականի դեկտեմբերի 26-ի որոշմամբ Արման Սաղաթելի Թովմասյանի նկատմամբ որպես խափանման միջոց է ընտրվել ստորագրություն չհեռանալու մասին:

Գործի դատավարական նախապատմությունը.

2013 թվականի նոյեմբերի 18-ին ՀՀ ոստիկանության Քանաքեռ-Զեյթուն քննչական բաժնում ՀՀ քրեական օրենսգրքի 258-րդ հոդվածի 1-ին մասի հատկանիշներով հարուցվել է թիվ 09131613 քրեական գործը:
2013 թվականի դեկտեմբերի 26-ի որոշմամբ Արման Սաղաթելի Թովմասյանը ՀՀ քրեական օրենսգրքի 258-րդ հոդվածի 1-ին մասով նախատեսված հանցանք կատարեկու համար ներգրավվել է որպես մեղադրյալ և նույն օրը վերջինիս նկատմամբ որպես խափանման միջոց է ընտրվել ստորագրություն չհեռանալու մասին:

Նախաքննական մարմնի կողմից Արման Սաղաթելի Թովմասյանին ՀՀ քրեական օրենսգրքի 258-րդ հոդվածի 1-ին մասով մեղադրանք է առաջադրվել այն բանի համար, որ նա դիտավորությամբ կոպիտ կերպով խախտելով հասարակական կարգը և բացահայտ անհարգալից վերաբերմունք արտահայտելով հասարակության նկատմամբ կատարել է խուլիգանություն.
Ամբաստանյալ Արման Սաղաթելի Թովմասյանը 2013 թվականի նոյեմբերի 04-ին ժամը 0300-ին, իրեն պատկանող` Երևան քաղաքի Ռուբինյանց փողոցի 19/1 շենքի 39 բնակարանից դուրս է եկել բակ, որտեղ գտնվող տաղավարում նկատել է քննությամբ չպարզված համբուրվող մի զույգի: Իր մոտ է կանչել համբուրվող տղային և նկատողություն անելով ասել է, որ հեռանան իրենց բակից, որից հետո գնացել է ՙԵրևան Սիթի՚ սուպերմարկետ` ծխախոտ գնելու: Քիչ անց վերադառնալով տուն` շենքի բակում դարձյալ նկատել է նույն զույգին` կրկին համբուրվելիս: Այդ ժամանակ Արման Սաղաթելի Թովմասյանը դիտավորությամբ կոպիտ կերպով խախտելով հասարակական կարգը և բացահայտ անհարգալից վերաբերմունք արտահայտելով հասարակության նկատմամբ, խուլիգանական մղումներով, հասարակության և բարոյականության նորմերի նկատմամբ անթաքույց արհամարհանքի հողի վրա, շրջապատին հակադրվելու, վերջինիս հանդեպ արհամարհական վերաբերմունք ցուցադրելու ցանկությամբ, վրդովվել ու բարկացել է, շուրջ 30 րոպե տևողությամբ սկսել է բղավել, սեռական բնույթի հայհոյանքներ տալ նշված զույգի հասցեին ու պահանջել, որ հեռանան իրենց բակից: Արման Սաղաթելի Թովմասյանի հայհոյանքի ձայներից տան պատուհանից դուրս նայելով` առաջացած աղմուկին միջամտել են նույն շենքի բնակիչներ` գործով վկաներ Սեդա Գասպարի Հակոբյանն ու Վահան Պերճի Խաչատրյանը, դիտողություն արել, ինչին ի պատասխան` Արման Թովմայանը շարունակելով իր խուլիգանական գործողությունները հայհոյանքներ է ուղղել ինչպես Սեդա Հակոբյանի և Վահան Խաչատրյանի, այնպես էլ Ռուբինյանց 19/1 շենքի բնակիչների հասցեին: Դրանից հետո Վահան Խաչատրանն իջել է շենքի բակ, հանգստացրել Արման Թովմասյանին ու փորձել է բարձրացնել տուն, սակայն տուն բարձրանալիս Արման Թովմասյանը կրկին վեճի է բռնվել Սեդա Հակոբյանի հետ, պահանջել նրանից մտնել տուն` այդ ընթացքում սեռական բնույթի հայհոյանքներ հնչեցնելով Սեդա Հակոբյանի հասցեին: Դրանից հետո Վահան Խաչատրյանը հանգստացրել է Արման Թովմասյանին և միասին բարձրացել են վերջինիս տուն:
2013 թվականի դեկտեմբերի 28-ին քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:

Արագացված դատական քննություն.

Մինչ դատաքննության սկսվելը` ամբաստանյալ Արման Սաղաթելի Թովմասյանը միջնորդություն է ներկայացրել` դատական քննությունն արագացված կարգով անցկացնելու` հայտարարելով, որ առաջադրված մեղադրանքն իրեն պարզ է, համաձայն է մեղադրանքի հետ և առաջադրված մեղադրանքում իրեն մեղավոր է ճանաչում, գիտակցում է արագացված կարգով դատական քննություն անցկացնելու հետևանքները, միջնորդությունը ներկայացնում է կամավոր, պաշտպանի հետ խորհրդակցելուց հետո:
Դատարանը պարզելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, 31.01.2014 թվականին որոշում է կայացրել արագացված կարգով դատական քննություն անցկացնելու մասին:
Այսպիսով, քրեական գործով ձեռք բերված ապացույցների ընդհանուր կարգով սահմանված հետազոտություն չկատարելով, արագացված դատաքննությամբ հիմք ընդունելով մեղադրանքի հիմքում դրված ապացույցները, դատարանը հանգեց այն համոզման, որ ամբաստանյալ Արման Սաղաթելի Թովմասյանը դիտավորությամբ կոպիտ կերպով խախտելով հասարակական կարգը և բացահայտ անհարգալից վերաբերմունք արտահայտելով հասարակության նկատմամբ կատարել է խուլիգանություն` որպիսի արարքի համար նա պետք է պատասխանատվության ենթարկվի ՀՀ քրեական օրենսգրքի 258 հոդվածի 1-ին մասով:
Արման Սաղաթելի Թովմասյանը ենթակա է պատժի կատարած արարքի համար:

Դատարանի իրավական վերլուծությունները.

ՀՀ քրեական օրենսգրքի 61 հոդվածի 2-րդ մասի համաձայնª ՙՊատժի տեսակը և չափը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով՚:
Ամբաստանյալ Արման Սաղաթելի Թովմասյանն անկեղծորեն խոստովանեց և զղջաց կատարած արարքների համար, նախկինում եղել է երկու անգամ դատապարտված` 1. Երևանի Մալաթիա-Սեբաստիա համայնքի ընդհանւոր իարվասության դատարանի 18.12.2008 թվականի դատավճռով ՀՀ քրեական օրենսգրքի 361 հոդվածի 1-ին մասով դատապարտվել է կարգապահական գումարտակում պահելով 1 /մեկ/ տարի ժամկետով, ՀՀ քրեական օրենսգրքի 70 հոդվածի կիրառմամբ սահմանված պատիժը պայմանականորեն չի կիրառվել` սահմանելով փորձաշրջան 1 /մեկ/ տարի ժամանակով, դատվածությունը մարված, 2. Կոտայքի մարզի ընդհանուր իրավասության դատարանի 30.08.2011 թվականի դատավճռով ՀՀ քրեական օրենսգրքի 34-105 հոդվածի 1-ին մասով դատապարտվել է ազատազրկման 2 /երկու/ տարի ժամկետով, ՙՀՀ անկախության հռչակման 20-րդ տարեդարձի կապակցությամբ համաներում հայտարարելու մասին՚ ՀՀ Ազգային ժողովի 26.05.2011 թվականի որոշման 1-ին կետի 1-ին ենթակետի կիրառմամբ ազատվել է պատժից, դատվածությունը մարված, ՀՀ ոստիկանության Կենտրոնի բաժնի կողմից 09.10.2013 թվականի որոշմամբ ՀՀ քրեական դատավարության օրենսգրքի 35 հոդվածի 1-ին մասի 4-րդ կետի կիրառմամբ ՀՀ քրեական օրենսգրքի 117 հոդվածով նախապատրաստված նյութերով քրեական գործի հարուցումը մերժվել է` դիմողի բողոքի բացակայության հիմքով, երիտասարդ է:
Ամբաստանյալ Արման Սաղաթելի Թովմասյանի պատասխանատվությունը և պատիժը մեղմացնող ու ծանրացնող հանգամանքներ չկան:

ՀՀ քրեական օրենսգրքի 10-րդ հոդվածի 1-ին մասը սահմանում է` ՙՀանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար՚:
ՀՀ քրեական օրենսգրքի 48-րդ հոդվածի 2-րդ մասը սահմանում է` ՙՊատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61-րդ հոդվածը սահմանում է` ՙՀանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները: (....): Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները:

Սույն քրեական գործով ամբաստանյալ Արման Սաղաթելի Թովմասյանին մեղադրանք է առաջադրվել ՀՀ քրեական օրենսգրքի 258 հոդվածի 1-ին ամսով, որի սանկցիան նախատեսում է հետևյալ պատժատեսակները` տուգանք` նվազագույն աշխատավարձի առավելագույնը հիսնապատիկի չափով, կամ կալանք՝ մինչև մեկ ամիս ժամկետով:
Հաշվի առնելով, որ ամբաստանյալ Արման Սաղաթելի Թովմասյանը չի աշխատում, ցանկություն է հայտնել պաշտպան ունենալու, սակայն հայտնել է, որ միջոցներ չունի և միջնորդել է իրեն ազատել իրավաբանական օգնության վճարից, ուստի դատարանը նպատակահարմար չի գտնում վերջինիս նկատմամբ ՀՀ քրեական օրենսգրքի 258-րդ հոդվածի 1-ին մասի սանկցիայով նախատեսված ՙտուգանք՚ պատժատեսակի նշանակումը, քանի որ հիմնավոր կասկածներ կան, որ դատարանի կողմից մինչև 50.000 ՀՀ դրամ գումարի սահմաններում նշանակված տուգանքի գումարը նա չի կարող միանվագ վճարել, բացի այդ էլ, հաշվի առնելով ամբաստանյալի անձը բնութագրող տվյալները, Ա.Թովմասյանի կատարած արարքի բնույթն ու հասարակական վտանգավորության աստիճանը, այն որ վերջինս կատարել է հասարակական կարգի և բարոյականության դեմ ուղղված հանցագործություն, դատարանը հանգում է այն հետևության, որ ՀՀ քրեական օրենսգրքի 258-րդ հոդվածի 1-ին մասի սանկցիայով նախատեսված պատիժատեսակներից նվազ խիստ տեսակը նշանակելով չի կարող ապահովել պատժի նպատակները և ամբաստանյալ Արման Սաղաթելի Թովմասյանի ուղղվելը հնարավոր է միայն նրան հասարակությունից մեկուսացնելու միջոցով, հետևաբար նրա նկատմամբ պատիժ պետք է նշանակել կալանքի ձևով` որոշակի ժամկետով, որով հնարավոր կլինի հասնել ՀՀ քրեական օրենսգրքի 48-րդ հոդվածով սահմանված պատժի նպատակներին` սոցիալական արդարության վերականգնմանը, պատժի ենթարկված անձի ուղղմանը և հանցագործությունների կանխմանը:
Քննության առնելով ամբաստանյալ Արման Սաղաթելի Թովմասյանի նկատմամբ ընտրված խափանման միջոցի հարցը` դատարանը գտնում է, որ վերջինիս նկատմամբ ընտրված խափանման միջոցը` ստորագրություն չհեռանալու մասին, պետք է թողնել անփոփոխ` մինչև դատավճռի օրինական ուժի մեջ մտնելը և նրան պետք է վերցնել կալանքի դատավճիռն օրինական ուժի մեջ մտնելու պահից: Արման Սաղաթելի Թովմասյանի պատժի կրման սկիզբը պետք է հաշվել նրան փաստացի կալանքի վերցնելու պահից:

Եզրափակիչ մաս.

Ղեկավարվելով ՀՀ քրեական օրենսգրքի 10-րդ, 48-րդ, 61-րդ հոդվածներով, ՀՀ քրեական դատավարության օրենսգրքի 357-360-րդ, 3753 հոդվածներով` դատարանը

Վ Ճ Ռ Ե Ց`

Արման Սաղաթելի Թովմասյանին մեղավոր ճանաչել ՀՀ քրեական օրենսգրքի 258-րդ հոդվածի 1-ին մասով և նրան դատապարտել կալանքի 15 /տասնհինգ/ օր ժամկետով:
Արման Սաղաթելի Թովմասյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ` մինչև դատավճռի օրինական ուժի մեջ մտնելը և նրան վերցնել կալանքի դատավճիռն օրինական ուժի մեջ մտնելու պահից:
Արման Սաղաթելի Թովմասյանի պատժի կրման սկիզբը հաշվել նրան փաստացի կալանքի վերցնելու պահից:
Սույն դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան ` հրապարակման պահից մեկ ամսվա ընթացքում:


ԴԱՏԱՎՈՐ` Ա.ԲԵԿԹԱՇՅԱՆ