Գործ No ԵԱՔԴ/0164/01/13

ՈՐՈՇՈՒՄ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

23 հունվարի 2014թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը`

նախագահությամբ` դատավոր Ա.Մկրտչյանի
քարտուղարությամբ` Օ.Կիրակոսյանի
Շ.Վանոյանի
մասնակցությամբ`
մեղադրող Կ.Բարսեղյանի
տուժող Ս.Շմիդերի

Դատարանում, դռնբաց դատական նիստում քննեց քրեական գործն ըստ մեղադրանքի Գեորգի Վահագի Գաբոյանի /ծնված 07.12.1977թ. Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, դատվածություն չունեցող, չի աշխատում, հաշվառված` Երևան քաղաքի Վաղարշյան փողոցի 19/1 շենքի 23 բնակարանում/:
Մեղադրվում է ՀՀ քրեական օրենսգրքի 117-րդ հդվածով:


Պ Ա Ր Զ Ե Ց

Նախաքննության մարմինն ամբաստանյալ Գեորգի Գաբոյանին ՀՀ քրեական օրենսգրքի 117-րդ հոդվածով մեղադրանք է առաջադրել այն արարքի համար, որ ՙնա 2013 թվականի օգոստոսի 20-ին ժամը 19:30-ի սահմաններում, Վաղարշյան 19/1-րդ շենքի բակում բռունցքով և ոտքերով հարվածներ է հասցրել Սվետլանա Շմիդերի մարմնի տարբեր մասերին, պատճառել առողջության թեթև վնասի հատկանիշներ պարունակող մարմնական վնասվածքներ, որոնք արտահայտվել են` ձախ ազդրի վերին միջին երրորդականների կողմնային մակերեսի, ձախ նստատեղի վերին դրսային քառակուսու, ձախ դաստակի երրորդ մատի միջին ֆալանգի թիկնային մակերեսի արյունազեղումների ձևով՚:
Տուժող Սվետլանա Շմիդերը դատական վիճաբանությունների փուլում հայտարարեց, որ հաշտվել է ամբաստանյալ Գեորգի Գաբոյանի հետ, նրանից որևէ բողոք կամ նյութական վնասի հատուցման պահանջ չունի:
Ամբաստանյալ Գեորգի Գաբոյանը նույնպես հայտարարեց, որ առաջադրված մեղադրանքում իրեն մեղավոր է ճանաչում, զղջում է կատարածի համար, լիովին հատուցել է հանցագործության հետևանքով անմիջականորեն պատճառված գույքային վնասը, հաշտվել է տուժող Ս.Շմիդերի հետ:
Դատարանը գտնում է, որ նշված պայմաններում քրեական հետապնդումը ենթակա է դադարեցման հետևյալ պատճառաբանությամբ.
ՀՀ քրեական օրենսգրքի 35-րդ հոդվածի 1-ին մասի 5-րդ կետի համաձայն` ՙքրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե սույն օրենսգրքով նախատեսված դեպքերում տուժողը հաշտվել է կասկածյալի կամ մեղադրյալի հետ՚:
ՀՀ քրեական դատավարության օրենսգրքի 183-րդ հոդվածի համաձայն` ՀՀ քրեական օրենսգրքի 117-րդ հոդվածով նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա և ամբաստանյալի հետ նրա հաշտվելու դեպքում ենթակա է կարճման:
ՀՀ քրեական օրենսգրքի 73-րդ հոդվածի համաձայն` ոչ մեծ ծանրության հանցանք կատարած անձը կարող է ազատվել քրեական պատասխանատվությունից, եթե նա հաշտվել է տուժողի հետ և հատուցել կամ այլ կերպ հարթել է նրան պատճառած վնասը:
Ղեկավարվելով ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետով, 183-րդ հոդվածի 1-ին մասով, 379-րդ հոդվածներով դատարանը`

Ո Ր Ո Շ Ե Ց

ՀՀ քրեական օրենսգրքի 117-րդ հոդվածով հարուցված թիվ 14141513 քրեական գործի վարույթը կարճել և ամբաստանյալ Գեորգի Վահագի Գաբոյանի նկատմամբ քրեական հետապնդումը դադարեցնել` տուժող Սվետլանա Անձորի Շմիդերի և ամբաստանյալ Գեորգի Գաբոյանի փոխադարձ հաշտության հիմքով:
Գ.Գաբոյանի նկատմամբ ընտրված խափանման միջոցը` ստորագրություն չհեռանալու մասին, վերացնել:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:




ԴԱՏԱՎՈՐ Ա.ՄԿՐՏՉՅԱՆ