գործ ԵԱՔԴ/0160/01/13

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ


Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը

Նախագահությամբ դատավոր` Արմեն Բեկթաշյանի
քարտուղարությամբ` Հասմիկ Արտաշեսյանի

մասնակցությամբ`
մեղադրող` Կարեն Թորոսյանի

տուժողի ներկայացուցիչ` Խորեն Քերոբյանի

պաշտպան` Ռուզաննա Սիրեկանյանի
ամբաստանյալ` Հայկ Բաղդասարյանի


2013 թվականի դեկտեմբերի 18-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի`

Հայկ Ռոբերտի Բաղդասարյանի` ծնված 02.06.1989 թվականին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, չի աշխատում, նախկինում չդատված, բնակվում է Երևան քաղաքի, Ֆուչիկի 14 շենքի թիվ 38 բնակարանում:

Հայկ Ռոբերտի Բաղդասարյանը մեղադրվում է ՀՀ քրեական օրենսգրքի 325 հոդվածի 2-րդ մասով:
2013 թվականի հոկտեմբերի 17-ի որոշմամբ Հայկ Ռոբերտի Բաղդասարյանի նկատմամբ որպես խափանման միջոց է ընտրվել ստորագրություն չհեռանալու մասին:

Գործի դատավարական նախապատմությունը.

2011 թվականի մայիսի 06-ին ՀՀ ոստիկանության ՔԳՎ Արաբկիրի քննչական բաժնում ՀՀ քրեական օրենսգրքի 325 հոդվածի 1-ին մասի հատկանիշներով հարուցվել է թիվ 14111711 քրեական գործը:
2011 թվականի հունիսի 01-ի որոշմամբ ՙՆոր Հորիզոն՚ ունիվերսալ վարկային կազմակերպություն ՍՊ ընկերությունը ճանաչվել է որպես տուժող, իսկ Խորեն Ենոքի Քերոբյանը ճանաչվել է որպես տուժողի ներկայացուցիչ: Նույն օրը որոշում է կայացվել ՙՆոր Հորիզոն՚ ունիվերսալ վարկային կազմակերպություն ՍՊ ընկերությանը որպես քաղաքացիական հայցվոր ճանաչելու:
2011 թվականի հոկտեմբերի 28-ի որոշմամբ Արմեն Նապոլեոնի Մարկոսյանը ՀՀ քրեական օրենսգրքի 178 հոդվածի 2-րդ մասի 2-րդ կետով և ՀՀ քրեական օրենսգրքի 325 հոդվածի 1-ին մասով նախատեսված հանցանքներ կատարելու համար ներգրավվել է որպես մեղադրյալ, որպես խափանման միջոց է ընտրվել ստորագրություն չհեռանալու մասին և Արմեն Նապոլեոնի Մարկոսյանի գտնվելու վայրը հայտնի չլինելու պատճառով նույն օրը վերջինիս նկատմամբ հայտարարվել է հետախուզում:
2011 թվականի հոկտեմբերի 28-ի որոշմամբ թիվ 14111711 քրեական գործի վարույթը կասեցվել է մեղադրյալ Արմեն Մարկոսյանի գտնվելու վայրը հայտնի չլինելու և քննությունից թաքնվելու պատճառաբանությամբ:
2013 թվականի հունիսի 27-ին ժամը 0430-ին Զվարթնոց օդանավակայանից ՀՀ ոստիկանության Մեծամորի բաժնի աշխատակիցների կողմից Արմեն Նապոլեոնի Մարկոսյանը հայտնաբերվել ու բերման է ենթարկվել Մեծամորի բաժին և նույն օրը ներկայացվել է ՀՀ ոստիկանության Արաբկիրի քննչական բաժին:
2013 թվականի հունիսի 27-ի որոշմամբ թիվ 14111711 քրեական գործի կասեցված վարույթը վերսկսվել է:
2013 թվականի օգոստոսի 14-ի որոշմամբ Արմեն Նապոլեոնի Մարկոսյանին 2011 թվականի հոկտեմբերի 28-ին առաջադրված մեղադրանքի ծավալը փոփոխվել է և նրան նոր մեղադրանք է առաջադրվել միայն ՀՀ քրեական օրենսգրքի 325 հոդվածի 2-րդ մասով նախատեսված հանցագործություն կատարելու համար:
2013 թվականի օգոստոսի 22-ի որոշմամբ Հայկ Ռոբերտի Բաղդասարյանը ՀՀ քրեական օրենսգրքի 325 հոդվածի 2-րդ մասով նախատեսված հանցանք կատարելու համար ներգրավվել է որպես մեղադրյալ և նրա նկատմամբ որպես խափանման միջոց է ընտրվել ստորագրություն չհեռանալու մասին: Նույն օրը որոշում է կայացվել թիվ 14111711 քրեական գործով մեղադրյալ Հայկ Ռոբերտի Բաղդասարյանի նկատմամբ հետախուզում հայտարարելու մասին:
Նախաքննության մարմնի կողմից Հայկ Ռոբերտի Բաղդասարյանին ՀՀ քրեական օրենսգրքի 325 հոդվածի 2-րդ մասով մեղադրանք է առաջադրվել այն բանի համար, որ նա մի խումբ անձանց կողմից նախնական համաձայնությամբ, նյութական շահագրգռվածությունից ելնելով օգտագործել է այլ անձի կողմից նախապես կեղծված իրավունք վերապահող ակնհայտ կեղծ փաստաթուղթ.

Ամբաստանյալ Հայկ Ռոբերտի Բաղդասարյանի ընկերը` Արմեն Նապոլեոնի Մարկոսյանը ՙՆոր Հորիզոն՚ ունիվերսալ վարկային կազմակերպություն ՍՊ ընկերությունից վարկ ստանալու նպատակով, նախնական համաձայնության գալով իր ընկերոջ` ամբաստանյալ Հայկ Ռուբիկի Բաղդասարյանի հետ, 2011 թվականի հունվար ամսին, քննությամբ չպարզված օրը կեղծել է թվով երկու տեղեկանք` լրացնելով իր և իր ընկեր` Հայկ Ռուբիկի Բաղդասարյանի տվյալները, համաձայն որի իբր ինքը աշխատում է ՙԱշխատանք՚ ՍՊ ընկերությունում որպես կահույքագործ-դիզայներ և ամսեկան ստանում է 170.000 ՀՀ դրամ աշխատավարձ, իսկ Հայկ Բաղդասարյանը իբր աշխատում է նույն` ՙԱշխատանք՚ ՍՊ ընկերությունում որպես կահույքագործ և ամսեկան ստանում է 110.000 ՀՀ դրամ աշխատավարձ, որից հետո` 2011 թվականի փետրվարի 20-ին Արմեն Նապոլեոնի Մարկոսյանը այդ տեղեկանքները ներկայացրել է ՙՆոր հորիզոն ունիվերսալ վարկային կազմակերպություն՚ ՍՊ ընկերություն` ակնհայտ կեղծ փաստաթղթերով վարկ ստանալու դիտավորությամբ: Հայկ Ռոբերտի Բաղդասարյանը հանդիսանալով որպես Արմեն Նապոլեոնի Մարկոսյանի երաշխավոր` 2011 թվականի մարտի 04-ին օգտագործել է Ա.Մարկոսյանի կողմից նախապես իր աշխատելու վերաբերյալ կեղծված տեղեկանքը` այն ներկայացրել ՙՆոր Հորիզոն՚ ունիվերսալ վարկային կազմակերպություն ՍՊ ընկերություն, և այդ երկու տեղեկանքների առկայության պայմաններում էլ 2011 թվականի մարտի 04-ին, Արմեն Նապոլեոնի Մարկոսյանին թիվ Ե-59-11 վարկային պայմանագրի հիման վրա տրամադրվել է 600.000 ՀՀ դրամ գումարի չափով վարկի գումար, իսկ Հայկ Բաղդասարյանը հանդիսացել է որպես երաշխավոր:
2013 թվականի օգոստոսի 22-ի որոշմամբ թիվ 14111711 քրեական գործից Հայկ Բաղդասարյանի վերաբերյալ ՀՀ քրեական օրենսգրքի 325 հոդվածի 2-րդ մասով մասն անջատվել է, անջատված մասին շնորհվել է 14141413 հերթական համարը և նախաքննությունը շարունակվել է առանձին վարույթում` նկատի ունենալով, որ մեղադրյալ Արմեն Նապոլեոնի Մարկոսյանի վերաբերյալ քրեական գործի մասը ենթակա է մեղադրական եզրակացությամբ դատարան ուղարկելու, իսկ վերջինիս հետ նախնական համաձայնությամբ իրավունք վերապահող ակնհայտ կեղծ փաստաթուղթ օգտագործած Հայկ Բաղդասարյանին հայտնաբերելու, գործով օբյեկտիվությունը, լրիվությունը և բազմակողմանիությունը ապահովելու նպատակով դեռևս անհրաժեշտ է կատարել մի շարք քննչական և դատավարական գործողություններ, ուստի քրեական գործից Հայկ Բաղդասարյանի մասն անջատելը բացասաբար չի անդրադառնա քրեական գործի ելքի վրա:
Արմեն Նապոլեոնի Մարկոսյանը Երևան քաղաքի Արաբկիրև Քանաքեռ-Զեյթուն վարչական շրջանների ընդհանուր իրավասության դատարանի 2013 թվականի սեպտեմբերի 23-ի թիվ ԵԱՔԴ/0133/01/13 դատավճռով մեղավոր է ճանաչվել ՀՀ քրեական օրենսգրքի 325 հոդվածի 2-րդ մասի 1-ին կետով նախատեսված հանցանք կատարելու մեջ և դատապարտվել է տուգանքի 600.000 ՀՀ դրամ գումարի չափով և Հայաստանի Հանրապետության Ազգային ժողովի ՙՀայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին՚ 2011 թվականի մայիսի 26-ի թիվ ԱԺՈ-277-Ն որոշման 1-ին կետի 3-րդ ենթակետի համաձայն ազատվել է պատիժը կրելուց:
2013 թվականի օգոստոսի 29-ի որոշմամբ թիվ 14141413 քրեական գործի վարույթը կասեցվել է` մեղադրյալ Հայկ Բաղդասարյանի գտնվելու վայրը հայտնի չլինելու հիմքով:
2013 թվականի հոկտեմբերի 17-ին Հայկ Ռոբերտի Բաղդասարյանն ինքնակամ ներկայացել է ՀՀ ոստիկանության Արաբկիրի բաժին և նույն օրը որոշում է կայացվել թիվ 14141413 քրեական գործի կասեցված վարույթը վերսկսելու մասին:
2013 թվականի նոյեմբերի 12-ին թիվ 14141413 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:


Արագացված դատական քննություն.

Մինչ դատաքննության սկսվելը` ամբաստանյալ Հայկ Ռոբերտի Բաղդասարյանը միջնորդություն է ներկայացրել` դատական քննությունն արագացված կարգով անցկացնելու` հայտարարելով, որ առաջադրված մեղադրանքն իրեն պարզ է, համաձայն է մեղադրանքի հետ և առաջադրված մեղադրանքում իրեն մեղավոր է ճանաչում, գիտակցում է արագացված կարգով դատական քննություն անցկացնելու հետևանքները, միջնորդությունը ներկայացնում է կամավոր, պաշտպանի հետ խորհրդակցելուց հետո:
Դատարանը պարզելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, 2013 թվականի դեկտեմբերի 18-ին որոշում է կայացվել արագացված կարգով դատական քննություն անցկացնելու մասին:
Այսպիսով, քրեական գործով ձեռք բերված ապացույցների ընդհանուր կարգով սահմանված հետազոտություն չկատարելով, արագացված դատաքննությամբ հիմք ընդունելով մեղադրանքի հիմքում դրված ապացույցները, դատարանը հանգեց այն համոզման, որ ամբաստանյալ Հայկ Ռոբերտի Բաղդասարյանը մի խումբ անձանց կողմից նախնական համաձայնությամբ, նյութական շահագրգռվածությունից ելնելով օգտագործել է այլ անձի կողմից նախապես կեղծված իրավունք վերապահող ակնհայտ կեղծ փաստաթուղթ` որպիսի արարքի համար նա պետք է պատասխանատվության ենթարկվի ՀՀ քրեական օրենսգրքի 325 հոդվածի 2-րդ մասով:
Հայկ Ռոբերտի Բաղդասարյանը ենթակա է պատժի կատարած արարքի համար:

Դատարանի իրավական վերլուծությունները.

ՀՀ քրեական օրենսգրքի 61 հոդվածի 2-րդ մասի համաձայն ՙՊատժի տեսակը և չափը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով՚:
Ամբաստանյալ Հայկ Ռոբերտի Բաղդասարյանն անկեղծորեն խոստովանեց և զղջաց կատարած արարքի համար, բնութագրվում է դրականորեն, նախկինում դատապարտված չի եղել:
Որպես ամբաստանյալ Հայկ Ռոբերտի Բաղդասարյանի պատասխանատվությունը և պատիժը մեղմացնող հանգամանք դատարանը դիտում է մեղայականով ներկայանալը:
Ամբաստանյալ Հայկ Ռոբերտի Բաղդասարյանի պատասխանատվությունը և պատիժը ծանրացնող հանգամանքներ չկան:
ՀՀ քրեական օրենսգրքի 10-րդ հոդվածի 1-ին մասը սահմանում է ՙՀանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար՚:
ՀՀ քրեական օրենսգրքի 48-րդ հոդվածի 2-րդ մասը սահմանում է ՙՊատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61-րդ հոդվածը սահմանում է ՙՀանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները: (….): Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները՚:
Սույն քրեական գործով ամբաստանյալ Հայկ Ռոբերտի Բաղդասարյանին մեղադրանք է առաջադրվել ՀՀ քրեական օրենսգրքի 325-րդ հոդվածի 2-րդ մասով, որի սանկցիան նախատեսում է հետևյալ պատժատեսակները` տուգանք` նվազագույն աշխատավարձի չորսհարյուրապատիկից ութհարյուրապատիկի չափով, կամ ազատազրկում` առավելագույնը չորս տարի ժամկետով:
Հաշվի առնելով, որ ամբաստանյալ Հայկ Ռոբերտի Բաղդասարյանն անկեղծորեն խոստովանեց և զղջաց կատարած արարքի համար, բնութագրվում է դրականորեն, նախկինում դատապարտված չի եղել, պատասխանատվությունը և պատիժը մեղմացնող հանգամանքը` մեղայականով ներկայանալը, պատասխանատվությունը և պատիժը ծանրացնող հանգամանքների բացակայությունը, դատարանը հանգում է այ համոզման, որ Հայկ Ռոբերտի Բաղդասարյանի նկատմամբ ՀՀ քրեական օրենսգրքի 325-րդ հոդվածի 2-րդ մասով նախատեսված սանկցիաներից նվազ խիստ տեսակը նշանակելով կարող է ապահովել պատժի նպատակները, հետևաբար դատարանը գտնում է, որ ամբաստանյալ Հայկ Ռոբերտի Բաղդասարյանի նկատմամբ պատիժ պետք է նշանակել տուգանքի ձևոց, որով հնարավոր կլինի հասնել ՀՀ քրեական օրենսգրքի 48-րդ հոդվածով սահմանված պատժի նպատակներին` սոցիալական արդարության վերականգնմանը, պատժի ենթարկված անձի ուղղմանը և հանցագործությունների կանխմանը:
Տուժող` ՙՆոր Հորիզոն՚ ունիվերսալ վարկային կազմակերպություն ՍՊ ընկերության կողմից ամբաստանյալ Հայկ Ռոբերտի Բաղդասարյանի նկատմամբ բողոք և քաղաքացիական հայցի պահանջ չի ներկայացվել:

ՙՀայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին՚ ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման 1-ին կետի 3-րդ ենթակետի համաձայն` ՙՊատժից ազատել, բացառությամբ սույն որոշման 8-րդ կետի 4-րդ և 5-րդ ենթակետերով նախատեսված դեպքերի` այն անձանց, որոնց նկատմամբ նշանակվել է առավելագույնը երեք տարի ժամկետով ազատությունից զրկելու հետ կապված պատիժ՚:
Նույն որոշման 9-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը: Մասնավորապես` Համաներման որոշման 9-րդ կետի 7-րդ ենթակետում թվարկված են ՀՀ քրեական օրենսգրքի այն հոդվածները և հոդվածների մասերը, որոնցով նախատեսված արարքները կատարած անձանց նկատմամբ համաներումը կիրառելի չէ, իսկ 9-րդ կետի 4-րդ ենթակետի համաձայն` Համաներումը կիրառելի չէ` ՙմինչև սույն որոշումն ընդունելը հետախուզման մեջ գտնվող անձանց նկատմամբ, բացառությամբ այն անձանց, որոնք մինչև 2013 թվականի սեպտեմբերի 21-ը ներառյալ կամովին կներկայանան Հայաստանի Հանրապետության իրավապահ մարմիններ, իսկ եթե գործը դատարանի վարույթում է` դատարան՚:
Հարկ է նկատել, որ թվարկված հոդվածների և հոդվածների մասերի շարքից բացակայում է ՀՀ քրեական օրենսգրքի 325-րդ հոդվածի 2-րդ մասը, այսինքն` ՀՀ քրեական օրենսգրքի 325-րդ հոդվածի 2-րդ մասով նախատեսված արարքներ կատարած անձանց նկատմամբ համաներման կիրառումը սահմանափակված չէ:
Նույն որոշման 13-րդ կետի 1-ին ենթակետի ա կետի համաձայն` ՙՍույն որոշման կատարումը վերապահել` դատարաններին` այն անձանց նկատմամբ, որոնց վերաբերյալ գործերը գտնվում են դատարաններում, սակայն մինչև սույն որոշումն ուժի մեջ մտնելը չեն քննվել, կամ այն անձանց նկատմամբ, որոնց վերաբերյալ գործերը քննվել են, բայց դատավճիռներն օրինական ուժի մեջ չեն մտել՚:
Նույն որոշման 15-րդ կետի համաձայն` սույն որոշումը կիրառվում է այն անձանց նկատմամբ, որոնք հանցագործություն են կատարել մինչև 2011 թվականի մայիսի 1-ը ներառյալ:
Նույն որոշման 17-րդ կետի համաձայն` համաներման կիրառման դեպքում դատվածության մարման հարցը լուծվում է օրենքով սահմանված կարգով:
Նկատի ունենալով այն հանգամանքը, որ ամբաստանյալ Հայկ Ռոբերտի Բաղդասարյանը հանցանքը կատարել է մինչև 2011 թվականի մայիսի 1-ը, իսկ սույն քրեական գործով որպես մեղադրյալ է ներգրավվել 2013 թվականի օգոստոսի 22-ին, ինչպես նաև այն, որ սույն քրեական գործի նյութերում բացակայում են Համաներման որոշման 8-րդ կետի 4-րդ և 5-րդ ենթակետերում, 9-րդ կետի մյուս ենթակետերում նշված այն սահմանափակումները, որոնք կարող են արգելք հանդիսանալ Հայկ Ռոբերտի Բաղդասարյանի նկատմամբ Համաներման որոշման 1-ին կետի 3-րդ ենթակետի կիրառման համար, ուստի դատարանը գտնում է, որ Հայկ Ռոբերտի Բաղդասարյանի նկատմամբ մինչև երեք տարի ժամկետով ազատազրկման ձևով պատիժ նշանակելու դեպքում կարող է կիրառել ՙՀայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին՚ ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշման 1-ին կետի 3-րդ ենթակետը և նրան ազատել պատժից:
Դատարանը գտնում է, որ ամբաստանյալի նկատմամբ ընտրված խափանման միջոցը` ստորագրություն չհեռանալու մասին, պետք է վերացնել դատավճռի օրինական ուժի մեջ մտնելու պահից:
Քննության առնելով իրեղեն ապացույցի տնօրինման հարցը` դատարանը գտնում է, որ քրեական գործով իրեղեն ապացույց ճանաչված 2011 թվականի հոկտեմբերի 18-ին թիվ 33121101 փաստաթղթաբանական փորձաքննության եզրակացությամբ զննված Արմեն Մարկոսյանի կողմից իր և Հայկ Բաղդասարյանի անվամբ կեղծված տեղեկանքները պետք է թողնել քրեական գործին կցված:
Դատարանը գտնում է, որ քրեական գործով որպես այլ փաստաթուղթ ճանաչված Արմեն Նապոլեոնի Մարկոսյանի դատավճիռը պետք է թողնել քրեական գործին կցված:

Եզրափակիչ մաս.

Ղեկավարվելով ՀՀ քրեական օրենսգրքի 10-րդ, 48-րդ, 61-րդ, 62-րդ հոդվածներով, ՀՀ քրեական դատավարության օրենսգրքի 357-360, 3753 հոդվածներով, ՙՀայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին՚ ՀՀ Ազգային ժողովի 2011 թվականի մայիսի 26-ի թիվ ԱԺՈ-277-Ն որոշմամբ, դատարանը

Վ Ճ Ռ Ե Ց`


Հայկ Ռոբերտի Բաղդասարյանին մեղավոր ճանաչել ՀՀ քրեական օրենսգրքի 325 հոդվածի 2-րդ մասով և նրան դատապարտել տուգանքով` նվազագույն աշխատավարձի չորսհարյուրապատիկի` 400.000 /չորս հարյուր հազար/ ՀՀ դրամ գումարի չափով:
Հայաստանի Հանրապետության Ազգային ժողովի ՙՀայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին՚ 2011 թվականի մայիսի 26-ի թիվ ԱԺՈ-277-Ն որոշման 1-ին կետի 3-րդ ենթակետի համաձայն ամբաստանյալ Հայկ Ռոբերտի Բաղդասարյանին ազատել պատժից:
Հայկ Ռոբերտի Բաղդասարյանի նկատմամբ ընտրված խափանման միջոցը` ստորագրություն չհեռանալու մասին, վերացնել դատավճիռն օրինական ուժի մեջ մտնելու պահից:
Քրեական գործով իրեղեն ապացույց ճանաչված Արմեն Մարկոսյանի կողմից իր և Հայկ Բաղդասարյանի անվամբ կեղծված տեղեկանքները թողնել քրեական գործին կցված:
Քրեական գործով որպես այլ փաստաթուղթ ճանաչված Արմեն Նապոլեոնի Մարկոսյանի դատավճիռը թողնել քրեական գործին կցված:
Սույն դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակման պահից մեկ ամսվա ընթացքում:


ԴԱՏԱՎՈՐ` Ա. ԲԵԿԹԱՇՅԱՆ