գործ` ԵԱՔԴ/0154/01/13



Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը

Նախագահությամբ դատավոր` Արմեն Բեկթաշյանի
քարտուղարությամբ` Հասմիկ Արտաշեսյանի

մասնակցությամբ`
մեղադրող` Վարազդատ Բադալյանի

պաշտպան` Հունան Բաբայանի

ամբաստանյալ` Վահե Խաչատրյանի

2013 թվականի նոյեմբերի 20-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի`

Վահե Հակոբի Խաչատրյանի` ծնված 04.07.1987 թվականին Սևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուրի, խնամքին ոչ ոք, նախկինում չդատված, գտնվում է ՀՀ ոստիկանության ռեզերվում, բնակվում է` Երևան քաղաքի Նոր-Նորքի 7-րդ զանգվածի 6-րդ շենքի 9-րդ բնակարանում:

Վահե Հակոբի Խաչատրյանը մեղադրվում է ՀՀ քրեական օրենսգրքի 314-րդ հոդվածի 1-ին մասով:
2013 թվականի հոկտեմբերի 07-ի որոշմամբ կասկածյալ Վահե Հակոբի Խաչատրյանի նկատմամբ որպես խափանման միջոց է ընտրվել ստորագրություն չհեռանալու մասին:

Գործի դատավարական նախապատմությունը.

2013 թվականի սեպտեմբերի 11-ին ՀՀ ոստիկանության Երևան քաղաքի վարչության Արաբկիրի բաժնի հետաքննության բաժանմունքում ՀՀ քրեական օրենսգրքի 314-րդ հոդվածի 1-ին մասի հատկանիշներով հարուցվել է թիվ 62209113 քրեական գործը:
2013 թվականի հոկտեմբերի 14-ի որոշմամբ Վահե Հակոբի Խաչատրյանը ՀՀ քրեական օրենսգրքի 314-րդ հոդվածի 1-ին մասով նախատեսված հանցանք կատարելու համար ներգրավվել է որպես մեղադրյալ:
Նախաքննության մարմնի կողմից Վահե Հակոբի Խաչատրյանին ՀՀ քրեական օրենսգրքի 314-րդ հոդվածի 1-ին մասով մեղադրանք է առաջադրվել այն բանի համար, որ նա աշխատելով ՀՀ ոստիկանության Երևան քաղաքի վարչության Արաբկիրի բաժնի հետաքննության բաժանմունքում որպես տեսուչ, ՙՈստիկանության մասին՚ ՀՀ օրենքի, ՀՀ քրեական դատավարության օրենսգրքի 56-րդ հոդվածի համաձայն հանդիսանալով հետաքննության մարմնի աշխատակից և օժտված լինելով համապատասխան իրավունքներով ու պարտականություններով, ինչպես նաև ՀՀ քրեական դատավարության օրենսգրքի 17-րդ հոդվածի համաձայն` նյութերով և քրեական գործերով քննության օբյեկտիվության, բազմակողմանիության և լրիվության ապահովման համար պատասխանատվություն կրող, մշտապես իշխանության ներկայացուցչի գործառույթներ իրականացնող պաշտոնատար անձ, իր ծառայողական գործունեության ընթացքում կազմված, իրավաբանական նշանակություն ունեցող փաստեր և իրադարձություններ հավաստող պաշտոնեական փաստաթուղթ հանդիսացող` դեպքի վայրի զննության մասին արձանագրությունում, անձնական դրդումներով մտցրել է ակնհայտ կեղծ տեղեկություններ և գրառումներ, այն է` Երևան քաղաքի Բաղրամյան պողոտայի 6-րդ շենքի 1-ին բնակարանից կատարված գողության փաստի առթիվ նշված բնակարանի սեփականատեր Մարգարիտա Սիմոնյանի 2011 թվականի հուլիսի 15-ին ՀՀ ոստիկանության Արաբկիրի բաժնում տրված հաղորդման հիման վրա նյութերի նախապատրաստման ընթացքում` 2011 թվականի հուլիսի 16-ին ժամանելով վերը նշված բնակարան, առանց ընթերակաների մասնակցության կատարել է դեպքի վայր հանդիսացող նշված բնակարանի զննություն և այդ առթիվ կազմել արձանագրություն: Այնուհետև` արդեն իր աշխատասենյակում, նշված քննչական գործողությունը ժամանակին, լիարժեք և սահմանված կարգով կատարելու մասին ղեկավարության մոտ տպավորություն, գործով բազմակողմանի, լրիվ և օբյեկտիվ քննություն կատարելու պատրանք ստեղծելու, հետագայում կարգապահական պատասխանատվությունից խուսափելու անձնական դրդումներով, նախապես ունենալով նույն գործի շրջանակներում հարցաքննված Արմենուհի Ավետիսյանի և Լուիզա Մաթևոսյանի կենսագրական տվյալները և ստորագրությունների նմուշները դեպքի վայրի զննության արձանագրությունում մտցրել է իրականությանը չհամապատասխանող կեղծ տեղեկություններ նշված գործողությունը որպես ընթերականեր հրավիրված վերը նշված անձանց մասնակցությամբ կատարելու վերաբերյալ և նմանեցված եղանակով կեղծելով վերջիններիս ստորագրությունները արձանագրությունում մտցրել կեղծ գրառումներ:
2013 թվականի հոկտեմբերի 30-ին թիվ 62209113 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:

Արագացված դատական քննություն.

Մինչ դատաքննության սկսվելը` ամբաստանյալ Վահե Հակոբի Խաչատրյանը միջնորդություն է ներկայացրել` դատական քննությունն արագացված կարգով անցկացնելու` հայտարարելով, որ առաջադրված մեղադրանքն իրեն պարզ է, համաձայն է մեղադրանքի հետ և առաջադրված մեղադրանքում իրեն մեղավոր է ճանաչում, գիտակցում է արագացված կարգով դատական քննություն անցկացնելու հետևանքները, միջնորդությունը ներկայացնում է կամավոր, պաշտպանի հետ խորհրդակցելուց հետո:
Դատարանը պարզելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, 2013 թվականի նոյեմբերի 20-ին որոշում է կայացրել արագացված կարգով դատական քննություն անցկացնելու մասին:
Այսպիսով, քրեական գործով ձեռք բերված ապացույցների ընդհանուր կարգով սահմանված հետազոտություն չկատարելով, արագացված դատաքննությամբ` հիմք ընդունելով մեղադրանքի հիմքում դրված ապացույցները, դատարանը հանգեց այն համոզման, որ ամբաստանյալ Վահե Հակոբի Խաչատրյանը կատարել է պաշտոնեական կեղծիք` հանդիսանալով պաշտոնատար անձ, անձնական այլ դրդումներով՝ պաշտոնական փաստաթղթերում ակնհայտ կեղծ տեղեկություններ է մտցրել` որպիսի արարքի համար նա պետք է պատասխանատվության ենթարկվի ՀՀ քրեական օրենսգրքի 314-րդ հոդվածի 1-ին մասով:
Վահե Հակոբի Խաչատրյանը ենթակա է պատժի կատարած արարքի համար:

Դատարանի իրավական վերլուծությունները.

ՀՀ քրեական օրենսգրքի 61 հոդվածի 2-րդ մասի համաձայն ՙՊատժի տեսակը և չափը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով՚:
Ամբաստանյալ Վահե Հակոբի Խաչատրյանն անկեղծորեն խոստովանեց և զղջաց կատարած արարքի համար, բնութագրվում է դրականորեն, նախկինում դատապարտված չի եղելք:
Ամբաստանյալ Վահե Հակոբի Խաչատրյանի պատասխանատվությունը և պատիժը մեղմացնող ու ծանրացնող հանգամանքներ չկան:
Սույն քրեական գործով ամբաստանյալ Վահե Հակոբի Խաչատրյանին մեղադրանք է առաջադրվել ՀՀ քրեական օրենսգրքի 314-րդ հոդվածի 1-ին մասով, որի սանկցիան նախատեսում է հետևյալ պատժատեսակները` տուգանք` նվազագույն աշխատավարձի երկուհարյուրապատիկից հինգհարյուրապատիկի չափով, կամ ազատազրկում` առավելագույնը չորս տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով:
ՀՀ քրեական օրենսգրքի 10-րդ հոդվածի 1-ին մասը սահմանում է ՙՀանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար՚:
ՀՀ քրեական օրենսգրքի 48-րդ հոդվածի 2-րդ մասը սահմանում է ՙՊատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61-րդ հոդվածը սահմանում է ՙՀանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները: (….): Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները՚:
Հաշվի առնելով ամբաստանյալ Վահե Հակոբի Խաչատրյանի անձը բնութագրող տվյալները, դատարանը գտնում է, որ վերջինիս նկատմամբ ՀՀ քրեական օրենսգրքի 314-րդ հոդվածի 1-ին մասի սանկցիայով նախատեսված պատիժներից նվազ խիստ տեսակը նշանակելով չի կարող ապահովել պատժի նպատակները, Վահե Հակոբի Խաչատրյանի ուղղումը հնարավոր կլինի միայն նրան հասարակությունից մեկուսացնելու միջոցով, ուստի դատարանը գտնում է, որ վերջինիս նկատմամբ պատիժ պետք է նշանակել ազատազրկման ձևով` որոշակի ժամկետով, ինչպես նաև որպես լրացուցիչ պատիժ պետք է նշանակել որոշակի ժամկետով պետական և տեղական ինքնակառավարման մարմիններում ու կազմակերպություններում որոշակի պաշտոններ զբաղեցնելու իրավունքից զրկումով, որով հնարավոր կլինի հասնել ՀՀ քրեական օրենսգրքի 48-րդ հոդվածով սահմանված պատժի նպատակներին` սոցիալական արդարության վերականգնմանը, պատժի ենթարկված անձի ուղղմանը և հանցագործությունների կանխմանը:
ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ ՀՀ Ազգային Ժողովի 2013 թվականի հոկտեմբերի 03-ի թիվ ԱԺՈ-080-Ն որոշման 1-ին կետի 3-րդ ենթակետի համաձայն` ՙՊատժից ազատել, բացառությամբ սույն որոշման 8-րդ կետի 4-6-րդ ենթակետերով և 9-րդ կետով նախատեսված դեպքերի, այն անձանց, որոնց նկատմամբ նշանակվել է առավելագույնը երեք տարի ժամկետով ազատությունից զրկելու հետ կապված պատիժ՚:
Նույն որոշման 9-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը: Մասնավորապես` Համաներման որոշման 9-րդ կետի 7-րդ ենթակետում թվարկված են ՀՀ քրեական օրենսգրքի այն հոդվածները և հոդվածների մասերը, որոնցով նախատեսված արարքները կատարած անձանց նկատմամբ համաներումը կիրառելի չէ: Սակայն հարկ է նկատել, որ թվարկված հոդվածների և հոդվածների մասերի շարքից բացակայում է ՀՀ քրեական օրենսգրքի 314-րդ հոդվածի 1-ին մասը, այսինքն` ՀՀ քրեական օրենսգրքի 314-րդ հոդվածի 1-ին մասով նախատեսված արարքներ կատարած անձանց նկատմամբ համաներման կիրառումը սահմանափակված չէ:
Նույն որոշման 10-րդ կետի համաձայն` ՙՀամաներման որոշումը չի ազատում դատարանների դատավճիռներով նշանակված լրացուցիչ պատիժներից՚:
Համաներման որոշման 13-րդ կետի 1-ին ենթակետի ՙբ՚ կետի համաձայն` ՙUույն որոշման կատարումը վերապահել` Հայաստանի Հանրապետության ընդհանուր իրավասության առաջին ատյանի և վերաքննիչ քրեական դատարաններին` այն անձանց նկատմամբ, որոնց հանդեպ պատիժը պայմանականորեն չի կիրառվել, կամ պատժի կրումը հետաձգվել է: Նշված անձանց նկատմամբ սույն որոշման կիրառման հարցը լուծում է դատարանը` այլընտրանքային պատիժների կատարման uտորաբաժանման կամ դատապարտյալի վարքագծի նկատմամբ վերահuկողություն իրականացնող այլ իրավաuու մարմնի միջնորդության հիման վրա՚:
Նույն որոշման 15-րդ կետի համաձայն` սույն որոշումը կիրառվում է այն անձանց նկատմամբ, որոնք հանցագործություն են կատարել մինչև 2013 թվականի սեպտեմբերի 1-ը ներառյալ:
Համաներման որոշման 17-րդ կետի համաձայն` համաներման կիրառման դեպքում դատվածության մարման հարցը լուծվում է օրենքով սահմանված կարգով:
Նկատի ունենալով այն հանգամանքը, որ ամբաստանյալ Վահե Հակոբի Խաչատրյանը հանցանքը կատարել է մինչև 2013 թվականի սեպտեմբերի 1-ը, ինչպես նաև այն, որ սույն քրեական գործի նյութերում բացակայում են Համաներման որոշման 8-րդ կետի 4-6-րդ ենթակետերում, 9-րդ կետի մյուս ենթակետերում նշված այն սահմանափակումները, որոնք կարող են արգելք հանդիսանալ Վահե Հակոբի Խաչատրյանի նկատմամբ Համաներման որոշման 1-ին կետի 3-րդ ենթակետի կիրառման համար, ուստի դատարանը գտնում է, որ Վահե Հակոբի Խաչատրյանի նկատմամբ մինչև երեք տարի ժամկետով ազատազրկման ձևով պատիժ նշանակելու դեպքում կարող է կիրառել ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ ՀՀ ազգային ժողովի 2013 թվականի հոկտեմբերի 03-ի թիվ ԱԺՈ-080-Ն որոշման 1-ին կետի 3-րդ ենթակետը և նրան ազատել պատժից:
Դատարանը գտնում է, որ ամբաստանյալի նկատմամբ ընտրված խափանման միջոցը` ստորագրություն չհեռանալու մասին, պետք է վերացնել դատավճռի օրինական ուժի մեջ մտնելու պահից:
Քննության առնելով իրեղեն ապացույցի տնօրինման հարցը` դատարանը գտնում է, որ քրեական գործով իրեղեն ապացույց ճանաչված Մարգարիտա Սիմոնյանին պատկանող Երևան քաղաքի Բաղրամյան փողոցի 6-րդ շենքի 1-ին բնակարանում 2011 թվականի հուլիսի 16-ին կատարված դեպքի վայրի զննության առթիվ կազմված արձանագրությունը պետք է թողնել քրեական գործին կցված և պահել քրեական գործի հետ` վերջինիս պահելու ամբողջ ժամանակամիջոցում:
Եզրափակիչ մաս.

Ղեկավարվելով ՀՀ քրեական դատավարության 357-360-րդ, 3753-րդ, հոդվածներով, ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ ՀՀ Ազգային ժողովի 2013 թվականի հոկտեմբերի 03-ի թիվ ԱԺՈ-080-Ն որոշմամբ, դատարանը


Վ Ճ Ռ Ե Ց`


Վահե Հակոբի Խաչատրյանին մեղավոր ճանաչել ՀՀ քրեական օրենսգրքի 314 հոդվածի 1-ին մասով և նրան դատապարտել ազատազրկման՝ 1 /մեկ/ տարի 6 /վեց/ ամիս ժամկետով և պետական և տեղական ինքնակառավարման մարմիններում ու կազմակերպություններում որոշակի պաշտոններ զբաղեցնելու իրավունքից զրկմամբ` 2 /երկու/ տարի ժամկետով:
ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ ՀՀ Ազգային ժողովի 2013 թվականի հոկտեմբերի 03-ի թիվ ԱԺՈ-080-Ն որոշման 1-ին կետի 3-րդ ենթակետի կիրառմամբ Վահե Հակոբի Խաչատրյանին ազատել հիմնական պատժից:
Վահե Հակոբի Խաչատրյանի նկատմամբ ընտրված խափանման միջոցը` ստորագրություն չհեռանալու մասին, վերացնել դատավճռի օրինական ուժի մեջ մտնելու պահից:
Քրեական գործով իրեղեն ապացույց ճանաչված Մարգարիտա Սիմոնյանին պատկանող Երևան քաղաքի Բաղրամյան փողոցի 6-րդ շենքի 1-ին բնակարանում 2011 թվականի հուլիսի 16-ին կատարված դեպքի վայրի զննության առթիվ կազմված արձանագրությունը պետք է թողնել քրեական գործին կցված և պահել քրեական գործի հետ` վերջինիս պահելու ամբողջ ժամանակամիջոցում:
Սույն դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակման պահից մեկ ամսվա ընթացքում:





ԴԱՏԱՎՈՐ` Ա.ԲԵԿԹԱՇՅԱՆ