Գործ No ԵԱՔԴ/0152/01/13

ՈՐՈՇՈՒՄ

ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

25 նոյեմբերի 2013թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը`

նախագահությամբ` դատավոր Ա.Մկրտչյանի
քարտուղարությամբ` Օ.Կիրակոսյանի
Շ.Վանոյանի
մասնակցությամբ`
մեղադրող Կ.Բարսեղյանի
տուժող Ա.Գրիգորյանի

Դատարանում, դռնբաց դատական նիստում քննեց քրեական գործն ըստ մեղադրանքի Սահակ Աշոտի Հակոբյանի /ծնված 1964 թվականի հուլիսի 29-ին Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած, խնամքին 2 անձ, նախկինում չդատված, աշխատում է ՙԱրաբկիրի՚ թաղապետարանում` որպես առևտրի և գովազդի բաժնի 1-ին կարգի մասնագետ, բնակվող Երևան քաղաքի Նորք-Նորքի 6-րդ զանգվածի Լյուքսեմբուրգի 2-րդ նրբանցքի 5-րդ շենքի թիվ 10 բնակարանում/:
Մեղադրվում է ՀՀ քրեական օրենսգրքի 117-րդ հդվածով:

Պ Ա Ր Զ Ե Ց

Նախաքննության մարմինն ամբաստանյալ Սահակ Հակոբյանին ՀՀ քրեական օրենսգրքի 117-րդ հոդվածով մեղադրանք է առաջադրել այն արարքի համար, որ ՙնա 2013թ օգոստոսի 22-ին, ժամը 16:30-ի սահմաններում Երևան քաղաքի Կոմիտասի 16 հասցեում գտնվող ՙԱրևելյան խոհանոց՚ սրճարանում կենցաղային հարցերի շուրջ տեղի ունեցած վիճաբանության ժամանակ ձեռերով և ոտքերով հարվածներ է հասցրել Անուշավան Գրիգորյանի մարմնի տարբեր մասերին` պատճառելով վերջինիս առողջությանը թեթև վնաս` առողջության կարճատև քայքայումով՚:
Տուժող Անուշավան Գրիգորյանը դատաքննության փուլում հայտարարեց, որ հաշտվել է Սահակ Հակոբյանի հետ, որևէ բողոք կամ նյութական վնասի պահանջ չունի, և խնդրեց Ս.Հակոբյանի նկատմամբ քրեական հետապնդումը դադարեցնել:
Ամբաստանյալ Սահակ Հակոբյանը նույնպես հայտարարեց, որ առաջադրված մեղադրանքում իրեն մեղավոր է ճանաչում, հաշտվել է տուժող Ա.Գրիգորյանի հետ:
Դատարանը գտնում է, որ նշված պայմաններում քրեական հետապնդումը ենթակա է դադարեցման հետևյալ պատճառաբանությամբ.
ՀՀ քրեական օրենսգրքի 35-րդ հոդվածի 1-ին մասի 5-րդ կետի համաձայն` ՙքրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե սույն օրենսգրքով նախատեսված դեպքերում տուժողը հաշտվել է կասկածյալի կամ մեղադրյալի հետ՚:
ՀՀ քրեական դատավարության օրենսգրքի 183-րդ հոդվածի համաձայն` ՀՀ քրեական օրենսգրքի 117-րդ հոդվածի 1-ին մասով նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա և ամբաստանյալի հետ նրա հաշտվելու դեպքում ենթակա է կարճման:
ՀՀ քրեական օրենսգրքի 73-րդ հոդվածի համաձայն` ոչ մեծ ծանրության հանցանք կատարած անձը կարող է ազատվել քրեական պատասխանատվությունից, եթե նա հաշտվել է տուժողի հետ և հատուցել կամ այլ կերպ հարթել է նրան պատճառած վնասը:
Ղեկավարվելով ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետով, 183-րդ հոդվածի 1-ին մասով, 379-րդ հոդվածներով դատարանը`

Ո Ր Ո Շ Ե Ց

ՀՀ քրեական օրենսգրքի 117-րդ հոդվածով հարուցված թիվ 14146913 քրեական գործի վարույթը կարճել և ամբաստանյալ Սահակ Աշոտի Հակոբյանի նկատմամբ քրեական հետապնդումը դադարեցնել` տուժող Անուշավան Յուրիի Գրիգորյանի` ամբաստանյալի հետ հաշտվելու հիմքով:
Որոշումը մեկամսյա ժամկետում կարող է բողոքարկվել ՀՀ վերաքննիչ քրեական դատարան:




ԴԱՏԱՎՈՐ Ա.ՄԿՐՏՉՅԱՆ