գործ` ԵԱՔԴ/0147/01/13


Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը

Նախագահությամբ` դատավոր` Արմեն Բեկթաշյանի
քարտուղարությամբ` Հասմիկ Արտաշեսյանի

մասնակցությամբ` մեղադրող` Ազատ Մարգարյանի
ամբաստանյալ` Գարիկ Ամոլիկյանի

2013 թվականի նոյեմբերի 14-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի`

Գարիկ Աղասու Ամոլիկյանի` ծնված 17.01.1995 թվականին Երևան քաղաքում, ազգությամբ հայ, ՀՀ քաղաքացի, ութամյա կրթությամբ, խնամքին ոչ ոք, նախկինում չդատված, հաշվառված է Երևան քաղաքի Մ.Ավետիսյան 4-րդ փողոցի 3-րդ տանը:

Գարիկ Աղասու Ամոլիկյանը մեղադրվում է ՀՀ քրեական օրենսգրքի 333 հոդվածի 2-րդ մասի 3-րդ կետով:
2013 թվականի սեպտեմբերի 18-ի որոշմամբ Գարիկ Աղասու Ամոլիկյանի նկատմամբ որպես խափանման միջոց է ընտրվել ստորագրություն չհեռանալու մասին:

Գործի դատավարական նախապատմությունը.

2013 թվականի ապրիլի 02-ին ՀՀ ոստիկանության ՔԳ վաչության Երևան քաղաքի քննչական վարչության Քանաքեռ-Զեյթուն քնննչական բաժնում ՀՀ քրեական օրենսգրքի 118 հոդվածով նախատեսված հանցագործության հատկանիշներով հարուցվել է թիվ 09107213 քրեական գործը:
2013 թվականի սեպտեմբերի 18-ի որոշմամբ ՀՀ քրեական օրենսգրքի 333 հոդվածի 2-րդ մասով նախատեսված հանցանք կատարելու համար Գարիկ Աղասու Ամոլիկյանը ներգրավվել է որպես մեղադրյալ և նույն օրը նրա նկատմամբ որպես խափանման միջոց է ընտրվել ստորագրություն չհեռանալու մասին:
Նախաքննական մարմնի կողմից Գարիկ Աղասու Ամոլիկյանին մեղադրանք է առաջադրվել այն բանի համար, որ նա գիտակցելով, որ իր տրամադրած տեղեկատվությունը կեղծ է, շահադիտական դրդումներով հանցագործության մասին սուտ մատնություն է կատարել.
Գարիկ Աղասու Ամոլիկյանը 2013 թվականի մարտի 09-ին, ՙԶնակոմստվա.ռու՚ կայքի միջոցով ՙԿառա Կառալևա՚ պայմանական անունով իր կողմից օգտագործվող էջով ծանոթանալով Սասուն Նվերի Մանուկյանի հետ, վերջինիս առաջարկել է գումարովª 100 ԱՄՆ դոլարի դիմաց սեռական հարաբերություն ունենալ իր հետª նշելով, որ ինքը տրանսսեքսուալ է: Խաբեությամբ հրավիրել է Երևան քաղաքի Ա.Ահարոնյան 5 շենքի 8 բնակարանª խոստանալով ծանոթացնել նրան 19 տարեկան գեղեցիկ աղջկա հետ, որը նույնպես 100 ԱՄՆ դոլարի դիմաց վերջինիս հետ սեռական հարաբերություն կունենա: Այնուհետև Ս.Մանուկյանը գնացել է Երևան քաղաքի Ա.Ահարոնյան 5 շենքի 8 բնակարան այն նպատակով, որ 100 ԱՄՆ դոլարի դիմաց սեռական հարաբերություն ունենա 19 տարեկան աղջկա հետ: Սակայն Ս.Մանուկյանը բնակարանում տեսնելով, որ պայմանավորված երիտասարդ աղջիկը չկա, ցանկացել է հեռանալ: Այդ ժամանակ Գ.Ամոլիկյանը Ս.Մանուկյանին առաջարկել է իր և Գևորգ Թոքմաջյանի (Վիկա) հետ սեռական հարաբերություն ունենալ: Ս.Մանուկյանը հրաժարվել է Գ.Ամոլիկյանի առաջարկից ու ցանկացել է հեռանալ: Այդ ժամանակ Գ.Ամոլիկյանը Ս.Մանուկյանից պահանջել է 200 ԱՄՆ դոլար, սակայն վերջինս հրաժարվել է վճարել: Այնուհետև վերջիններիս է մոտեցել Գ.Ամոլիկյանի ընկեր Գևորգ Թոքմաջյանը և այն հարցին, թե ինչ է պատահել, Գ.Ամոլիկյանն ասել է, թե իբր Ս.Մանուկյանն իրեն հարվածել է: Գ.Թոքմաջյանն անմիջապես զանգահարել է իր ծանոթ, ոստիկանության նախկին աշխատակից Վարդան Ղուկասյանին ու ասել, որ իրենց հաճախորդ Ս.Մանուկյանը ծեծի է ենթարկել Գ.Ամոլիկյանին: Դրանից հետո Վարդան Ղուկասյանը զանգահարել է ոստիկանություն ու հայտնել, որ վերոհիշյալ հասցեի բնակարանում Ս.Մանուկյանը ծեծի է ենթարկել Գ.Ամոլիկյանին: Ահազանգից հետո ոստիկանության աշխատակիցները Ս.Մանուկյանին բերման են ենթարկել ոստիկանության Քանաքեռ-Զեյթուն բաժին: Նույն ժամանակ Գ.Ամոլիկյանը շահադիտական դրդումներով Ս.Մանուկյանից 200 ԱՄՆ դոլար ստանալու նպատակով ոստիկանության Քանաքեռ-Զեյթուն բաժնում հաղորդում է տվել, թե իբր Ս.Մանուկյանը պարտք ու պահանջի շուրջ առաջացած վիճաբանության ժամանակ ձեռքով հարվածել է իր դեմքին և ձախ ուսին: Հաղորդում տալու ժամանակ Գ.Ամոլիկյանը նախազգուշացվել է սուտ մատնություն կատարելու համար նախատեսված քրեական պատասխանատվության մասին, որի կապակցությամբ հաղորդման արձանագրությունը ստորագրել է:
Նախաքննական մարմնի 2013 թվականի սեպտեմբերի 18-ի որոշմամբ Սասուն Նվերի Մանուկյանի նկատմամբ ՀՀ քրեական օրենսգրքի 118 հոդվածով քրեական հետապնդում չի իրականացվել` նրա արարքում հանցագործության դեպքի բացակայության հիմքով:
2013 թվականի հոկտեմբերի 08-ին քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:

Ապացույցների հետազոտում և գնահատում.

Ամբաստանյալ Գարիկ Աղասու Ամոլիկյանը ՀՀ քրեական օրենսգրքի 333 հոդվածի 2-րդ մասի 3-րդ կետով առաջադրված մեղադրանքում դատաքննության սկզբում իրեն մեղավոր չճանաչեց և ցուցմունք տվեց այն մասին, որ իր ծնողների և ընտանիքի մյուս անդամների հետ ունեցած վիճաբանության պատճառով, երբ լրացել է իր տասնութ տարին, ինքը սկսել է ինքնուրույն ապրել` վարելով ՙտրանսի՚ կյանք: Ելնելով իր կարգավիճակից` իրեն աշխատանքի չեն ընդունել, թեև աշխատել է որպես մատուցող: Մարմնավաճառությամբ զբաղվելով ինքը գումար է վաստակել, որով հոգացել է ինտերնետի և կոմունալ ծախսերը, ճանապարհածախսերը: Գումար կորզելու համար ինքը երբեք մարդկանց ՙշանտաժի՚ չի ենթարկել, իսկ Սասուն Մանուկյանից ուզել է այն գինը, որի վերաբերյալ պայմանավորվածություն են ունեցել: 2013 թվականի մարտի 09-ին կամ մարտի 12-ին ինքը զանգել է իր ընկերներից Կարենին` հյուր գնալու նպատակով: Երեկոյան ժամը 16-ի սահմաններում գնացել է Կարենի տուն, ՙՎիկայի՚` Գևորգ Թոքմաջյանի համակարգչով մտել ՙԶնակոմստվա.ռու՚ կայքում ՙԿառա՚ մականունով գրանցված իր էջ, ծանոթացել Սասուն Մանուկյանի հետ: Ծանոթությունից հետո վերջինիիս հետ պայմանավորվել են հանդիպել երեկոյան ժամը 17-ի սահմաններում: Նրան ասել է, որ ինքը ՙտրանս՚ է, 19 տարեկան է: Սասունի հարցին, թե աղջիկ կա, ինքը դրական պատասխան տալով ասել է, որ աղջիկը նույնպես 19 տարեկան է: Այնուհետև Սասունի խնդրանքով ինքը տվել է իր հեռախոսահամարը, որից հետո վերջինս զանգել է իրեն և հեռախոսազրույցի ընթացքում իրենք պայմանավորվել են 100 ԱՄՆ դոլարով սեռական հառաբերություն ունենալ: Ինքն ասել է, որ ունի նաև ՙտրանս՚ ընկերուհի: Մինչև Սասուն Մանուկյանի գալը` ինքը ՙՎիկային՚ ասել է, որ կարող է հաճախորդ լինի և հնարավոր է նա էլ մասնակցի: Հեռախոսազանգի ընթացքում ինքը Սասուն Մանուկյանին ասել է, որ աղջկան հարմար չի եղել, նա չի գալու, բայց կա քառասուն տարեկանին մոտ մի գեր կին և իր տրանս ընկերուհին, ինչին Սասուն Մանուկյանը պատասխանել է, որ ինքը քառասուն տարեկան կին չի ցանկանում, բայց խնդիր չկա, էլի կգա 200 դոլարով: Ինքը չի հավատացել, որ Սասուն Մանուկյանը կգա, որի համար էլ չի պատրաստվել` աղջկա հագուստ չի հագել: Տեսնելով, որ Սասուն Մանուկյանը իրենց բակում է, զանգել է նրան, ասել, որ իջնի ավտոմեքենայից, որից հետո ձեռքով ցույց է տվել տունը և ասել, որ բարձրանա: Ինքը բացել է դուռը, Սասուն Մանուկյանին ներս հրավիրել և սուրճ հյուրասիրել: Ներս մտնելուց հետո Սասուն Մանուկյանն ասել է, որ լավ կլիներ, եթե աղջիկ լիներ, որից հետո նստել է, սկսել ձեռնաշարժությամբ զբաղվել, մոտեցել է իրեն և ցանկացել է իջեցնել իր ներքնազգեստը: Ինքն ասել է, որ գումարը վճարի, որից հետո նոր կշարունակեն խոսակցությունն ու գործողությունները, ինչին Սասուն Մանուկյանը պատասխանել է, որ տվյալ պահին ինքը գումար չունի, բայց փոխարենը կարող է տալ իր վարորդական վկայականը կամ այլ փաստաթուղթ: Ինքը նյարդայնացել է Սասուն Մանուկյանի պատասխանից, քանի որ ինքը ժամանակ է կորցրել նրա համար պատրաստվելով, թանկարժեք կոսմետիկա օգտագործելով, նյարդայնացել է նաև նրանից, որ Սասուն Մանուկյանը որպես ոստիկան է ներկայացել: Տան դուռը բանալիով փակելուց հետո Սասուն Մանուկյանն իրեն հայհոյել է ու հրել, ինչի հետևանքով ինքն ընկել է հեռուստացույցի վրա: Իրենց լեզվակռիվը լսելով` սենյակից դուրս է եկել ՙՎիկան՚, հետաքրքրվել, թե ինչ է կատարվում, որից հետո ՙՎիկան՚ զանգել է իր ծանոթին` Վարդանին, նրան ասել, որ իրենց հաճախորդը իրեն խփել է և գումարը չի տալիս, ինչի հիման վրա էլ ՙՎիկայի՚ ծանոթ Վարդանը Սասուն Մանուկյանին ասել է, որ գումարը վճարի, որից հետո Սասուն Մանուկյանը Վարդանին ասել է, որ նա երևի ՙօրգանում՚ նոր է աշխատում, մինչդեռ ինքը տասնմեկ տարվա փորձ ունի, որի համար Վարդանը բարկացել է, սակայն ինքը Վարդանից անհարգալից բառեր չի լսել: Սասունն ու Մառան երևի որոշակի հարաբերությունների մեջ են, միմյանց հետ պայմանավորվածություն ունեն, քանի որ Մառան պաշտպանում է Սասունին, քննիչի մոտ անհեթեթ բաներ պատմում: Վարդանի զանգից հետո ոստիկանությունից երեք ոստիկան են ժամանել:
Սակայն դատաքննության ավարտին Գարիկ Աղասու Ամոլիկյանը ՀՀ քրեական օրենսգրքի 333 հոդվածի 2-րդ մասի 3-րդ կետով առաջադրված մեղադրանքում իրեն մեղավոր ճանաչեց, անկեղծորեն խոստովանեց և զղջաց կատարած արարքի համար և ցուցմունք տվեց այն մասին, որ ոստիկանությունում ինքը ցուցմունք է տվել, որ Սասուն Մանուկյանը խփել է իրեն, սակայն հետո ասել է, որ իրականում չի խփել, այլ իր գումարը չտալու համար է սուտ հայտարարություն տվել:
Ամբաստանյալ Գարիկ Աղասու Ամոլիկյանի ՀՀ քրեական օրենսգրքի 333 հոդվածի 2-րդ մասի 3-րդ կետով կատարած արարքը հիմնավորվել է նաև հետևյալ ապացույցներով.
Վկա` Սասուն Նվերի Մանուկյանի ցուցմունքով այն մասին, որ 2013 թվականի մարտի 09-ին երեկոյան, ՙԶնակոմստվա.ռու՚ սոցիալական կայքի իր ՙԱրմեին Մանուկյան՚ անձնական օգտագործման էջով ծանոթացել է ՙԿառա Կառալեվա Կառոնա՚ օգտագործման էջով հանդես եկող անձի հետ, որի էջին տեղադրված է եղել աղջկա նկար, սակայն հետագայում իմացել է, որ նա Գարիկ Աղասու Ամոլիկյանն է: Խոսակցության ընթացքում ամբաստանյալն իրեն ասել է, որ ինքը տրանսսեքսուալ է, առաջարկել է իրեն 100 ԱՄՆ դոլա գումարով սեռական հարաբերություն ունենալ: Ինքը հայտնել է, որ կցանկանա հանդիպել աղջկա հետ, ինչին Գարիկ Ամոլիկյանը պատասխանել է, որ իր հետ 19 տարեկան շատ գեղեցիկ աղջիկ կա, որը նույնպես պատրաստ է 100 ԱՄՆ դոլար գումարով սեռական հարաբերություն ունենալ: Այդ ժամանակ ինքն ամբաստանյալից վերցրել է նրա 099-90-95-92 բջջային հեռախոսահամարը, զանգահարել նրան և հեռախոսազրույցի ընթացքում պայմանավորվել են հանդիպել Երևան քաղաքում: Պայմանավորվածության համաձայն ինքն ավտոմեքենայով գնացել է Երևան քաղաք, ճանապարհին զանգահարել է Գարիկ Ամոլիկյանին, հարցրել աղջկա մասին և իմացել, որ ամբաստանյալ Գարիկ Ամոլիկյանի հետ կա նաև 19 տարեկան գեղեցիկ արտաքինով աղջիկ: Հետո ճշտել է տան հասցեն, իմացել, որ այն գտնվում է Ռայկոմի մոտակայքում: Հասնելով Ռայկոմի տարածք` ևս մեկ անգամ զանգել է Գարիկին` շենքի տեղը ճշտելու համար: Ա.Ահարոնյան փողոցի 5-րդ շենքի բակ հասնելով` նորից է զանգել ամբաստանյալին, որը պատշգամբից ցույց է տվել շենքի մուտքը, սակայն ասել է, որ պետք է սպասի, քանի որ ինքը դեռ պատրաստ չէ: Մոտ տասը րոպե սպասելուց հետո ինքը բարձրացել է 4-րդ հարկ, ամբաստանյալը բացել է դուռը, որը եղել է աղջկա հագուստով և կեղծամով: Ինքը հարցրել է, թե աղջիկն ուր է, ինչին Գարիկ Ամոլիկյանը, որն իրեն ներկայացել է ՙԿառա՚ անունով, պատասխանել է, որ աղջիկը լոգարանում է, պատրաստվում է և իրեն սուրճ է հյուրասիրել: Հետո լոգարանից կանացի հագուստով և կեղծամով մի տղա է դուրս եկել, ներկայացել ՙՎիկա՚ անունով, որից հետո իրեն ասել են, որ յուրաքանչյուրին 100 դոլար վճարելով սեռական հարաբերություն ունենա իր և լոգարանից դուրս եկած անձնավորության հետ: Ինքը հրաժարվել է և ասել, որ ուզում է դուրս գալ, ինչից ամբաստանյալը բորբոքվել է և ասել, որ դուրս կգա միայն իրենց գումարը տալուց հետո, ապա փակել է տան դուռը: Ամբաստանյալն իրենից գումար է պահանջել` ասելով, որ իր համար ժամանակ է ծախսել, պատրաստվել: Իրենից գումար պահանջելու համար ինքը ամբաստանյալին չի հարվածել, իրենց միջև քաշքշուկ և վիրավորանքներ չեն եղել, այդ մասին է ասել նաև ամբաստանյալը առերես հարցաքննության ժամանակ: Այնուհետև սենյակներից մեկից խալաթով մի տղա է դուրս եկել և ասել` ՙէս ինչ փողի կռիվ եք անում, խի փողը չես տալիս՚, ինքն էլ ասել է, թե ինչի համար պետք է փող տա, ապա այդ տղան իրեն ասել է` ՙդու ես եկել, չգիտես ինչի համար՚: Ինքը պատասխանել է, որ իրեն ասել են աղջիկ է լինելու, դրա համար էլ եկել է: Հետո Գարիկ Ամոլիկյանը բացել է սենյակի դուռը և ցույց տալով մի գեր կնոջ` ասել է` ՙաղջիկ ես ուզում, հեսա աղջիկը՚: Երբ նա բացել է սենյակի դուռը, այդ կինը արթուն է եղել և լսել է իրենց խոսակցությունները, քանի որ սենյակը մոտ է եղել իրենց: Այդ ընթացքում մյուս տղան ասել է, որ կզանգի ոստիկանություն և զանգել է ոմն Վարդանին ու ասել, որ մի հոգի է եկել և իրենց գումարը չի տալիս: Այդ Վարդանն ասել է, որ հեռախոսը փոխանցեն իրեն, ինքը խոսել է Վարդանի հետ, որը հարցրել է իր տարիքի և ամուսնացած լինելու մասին և ասել` ինչ-որ է գումարը տա ու գնա: Ինքն ասել է, որ իրենց մեջ ոչինչ տեղի չի ունեցել, ինչու պետք է գումար տա, սակայն Վարդանը հեռախոսն անջատել է, հետո չի հիշում, թե ով է կրկին զանգել Վարդանին, թե հենց Վարդանն է զանգել, ինքը երկրորդ անգամ է խոսել նրա հետ, որն իրեն ասել է` ՙինչ որ է, հասկանում եմ, շառ ու փորձանքից հեռու մնալու համար փողը տուր և գնա՚: Ինքը հարցրել է Վարդանին նա ոստիկան է, թե ոչ ու դրական պատասխան ստանալով ասել է, որ նրա կարիքն ունի և անմիջապես գա: Վերջինս ասել է, ինքը չի գա, բայց մարդ կուղարկի, ինքն էլ ասել է, որ անմիջապես ուղարկի, ապա հեռախոսն անջատել է: Մոտ տասը րոպե անց ոստիկաններ են եկել և իրենք գնացել են ոստիկանության բաժանմունք, որտեղ ինքը պահանջել է իրեն ուղարկել դատական բժշկի մոտ` իր և ամբաստանյալի միջև սեռական հարաբերություն ունենալու մասին տվյալը հերքելու համար, սակայն այդպես էլ չեն ուղարկել: Գարիկ Ամոլիկյանի կողմից ոստիկանությունում հայտարարություն տալու նպատակը եղել է գումար աշխատելը:
Վկա` Մարինե Միքայելի Միրիջանյանի ցուցմունքով այն մասին, որ բնակվում է Աշտարակ քաղաքում: 2002 թվականից Կարեն Թորոսյանի առաջարկով վարձատրության դիմաց ամեն օր մաքրել է Երևան քաղաքի Ա.Ահարոնյան փողոցի 5-րդ շենքի 8-րդ բնակարանը, ճաշ եփել ու տնային այլ աշխատանքներ կատարել: Ճանաչում է ամբաստանյալ Գարիկ Ամոլիկյանին` որպես Կարենի ընկերոջ: 2013 թվականի մարտի 09-ին, ինքը գտնվել է Կարենի տանը, տունն է մաքրել, ճաշ պատրաստել և քանի որ ուշ է եղել, չի վերադարձել Աշտարակ: Այդ օրը Կարենի տանն են եղել նաև նրա ընկերները` Գարիկ Ամոլիկյանը և ՙՎիկա Սվարովսկի՚ մականունով Գևորգ Թոքմաջյանը: Ինքը տեսել է, որ Գարիկը համակարգչով ՙԶնակոմստվա.ռու՚ կայքով ծանոթացել է մի տղամարդու հետ, հետագայում իմացել է, որ նա Սասուն Մանուկյանն է: Ինքը տեսել է նաև, որ Գարիկը և Սասունը հաղորդաագրություններ են գրել միմյանց, որի ժամանակ Գարիկը նրան գումարի դիմաց սեռական հարաբերության առաջարկություն է արել, սակայն Սասուն Մանուկյանն էլ ցանկություն է հայտնել հանդիպել աղջկա հետ, Գարիկ Ամոլիկյանն էլ նրան ասել է, որ աղջիկ ևս կա, որը նույնպես գումարի դիմաց կարող է նրա հետ սեռական հարաբերություն ունենալ: Այնուհետև նրանք փոխանակվել են հեռախոսահամարներով և հեռախոսազրույցի ընթացքում Գարիկն այդ տղամարդուն հրավիրել է Կարենի տուն: Հեռախոսազրույցի ընթացքում Գարկը Սասունին ասել է, որ իրենք երկու ՙտրանս են՚, իրենց հետ նաև երիտասարդ աղջիկ կա: Ինքը երբևէ չի նկատել, որ Կարենը, գումարով սեռական հարաբերություն ունենալու համար իր բնակարանը տրամադրի որևէ մեկի, սակայն քանի որ Գարիկ Ամոլիկյանը շատ է խնդրել և ասել, որ հաճախորդն իր ծանոթն է, Կարենը չի մերժել նրան: Որոշ ժամանակ անց, երբ ինքը գտնվել է հյուրասենյակին կից գտնվող ննջասենյակում, Կարենի բնակարան է եկել Սասունը, որին դիմավորել է Գարիկը` աղջկա կերպարանքով: Մտնելով ննջասենյակ` Սասուն Մանուկյանը Գարիկին ասել է, որպեսզի կանչի աղջկան, սակայն այդ ժամանակ Գարիկը նրան ասել է, որ աղջիկ չկա և առաջարկել է սեռական հարաբերություն ունենալ իր ու իր ընկերոջ հետ: Սակայն Սասուն Մանուկյանը հրաժարվել է, որից հետո Գարիկը բացել է իր սենյակի դուռը և ցույց տալով իրեն ասել, որ սա է 19 տարեկան աղջիկը: Ինքը զարմացած հարցրել է, թե ինչ 19 տարեկան աղջկա մասին է խոսքը, ինքը տարիքով կին է և նրան խնդրել է սենյակից հեռանալ: Այդ ժամանակ Սասուն Մանուկյանը ցանկացել է հեռանալ, սաայն Գարիկը նրան թույլ չի տվել` պահանջելով իր 100 ԱՄՆ դոլար գումարը: Ինքը լսել է, որ Գարիկը հյուրին ասել է իրեն պետք է 100 դոլար գումարը վճարի` պատրաստվելու ու նրան սպասելու համար, սակայն հյուրը հրաժարվել է գումարը տալուց` ասելով, որ ինքը գումար չունի, իրեն խաբել են, քանի որ ինքը եկել է 19 տարեկան աղջկա հետ սեռական հարաբերություն ունենալու համար, ինչից հետո Գարիկը բանալիով փակել է տան դուռը, ասել, որ ոչ մի տեղ չի գնա և գումարի շուրջ բարձր խոսելով վիճել է հյուրի հետ: Գարիկը 100 ԱՄՆ դոլար է պահանջել նաև Գևորգի համար` ասելով, որ նա էլ է պատրաստվել, շպարվել ուժամանակ կորցրել: Գումարային հարցի շուրջ Գարիկի և Սասունի միև առաջացել է վիճաբանություն և նրանց բարձր ձայները լսելով ննջասենյակից խալաթով դուրս է եկել Գևորգը, հարցրել, թե ինչ է եղել, ինչին Գարիկը պատասխանել է, որ հյուրն իրեն խփել է և չի տալիս հարաբերության համար պայմանավորված գումարը: Այնուհետև ՙՎիկան՚ բարկացել ու զանգել է իր ծանոթ ոստիկանին` Վարդանին, ասել, որ մի մարդ է եկել, որը ներկայացել է որպես ՙօրգանի աշխատող՚, չի ցանկանում վճարել ծառայության համար և ՙխփել է մեր երեխեքից մեկին՚` Գարիկին: Հետո հյուրն է հեռախոսը վերցրել, խոսել այդ մարդու հետ և ասել, որ ինքը չի հարվածել Գարիկին: Այդ ժամանակ ներս է մտել Կարեն Թորոսյանը, Գարիկին ասել, որ իր տանը չվիճեն և իրենց հարցերը դրսում լուծեն, իսկ ՙՎիկան՚ ասել է, որ հիմա ՙքաղմասից՚ են գալու: Մոտ հինգ րոպե անց եկել են ոստիկանության աշխատակիցները և Սասունը նրանց հետ գնացել է բաժին: Այդ օրը Գարիկը տղայի հագուստով է եկել Կարեն Թորոսյանի տուն, իսկ աղջկա հագուստը հագել է տանը: Դեպքի օրը Սասուն Մանուկյանը Կարեն Թորոսյանի տանն է մնացել մոտ 10-15 րոպե, որի ընթացքում նրա կողմից վիրավորանք, հայհոյանք, ծեծ չի եղել, նրա և որևէ մեկի միջև սեռական հարաբերություն կամ քաշքշուկ չի եղել, եթե լիներ, ապա ինքը կլսեր Ոստիկանությունից վերադառնալուց հետո, երբ ինքը զրուցել է Գարիկի հետ, վերջինս իրեն ասել է, որ Սասուն Մանուկյանն իր հետ սեռական հարաբերություն չի ունեցել ու չի հարվածել իրեն, բայց ոստիկանությունում պատմել է, թե Սասուն Մանուկյանն իրեն խփել է, և Սասուն Մանուկյանի կողմից իրեն խփելու մասին հայտարարությունը տվել է նրա համար, որ Սասուն Մանուկյանն իր գումարը չի տվել:
Վկա` Գևորգ Սամվելի Թոքմաջյանի ցուցմունքով այն մասին, որ իր նախաքննական ցուցմունքի այն մասը, երբ ինքը Գարիկին ու հյուրին տեսել է հյուրասենյակում, նրանք եղել են հագնված նստած վիճակում, ճիշտ չէ և չի համապատասխանում իրականությանը, քանի որ այն գրվել է քննիչի թելադրանքով: ճանաչում է ամբաստանյալ Գարիկ Ամոլիկյանին, Կարեն Թորոսյանին, Մարինե Միրիջանյանին, որոնց հետ գտնվում է ընկերական հարաբերությունների մեջ: Կարենին ճանաչում է հինգ-վեց տարվի և հաճախակի է լինում նրա տանը թե աղջկա և, թե տղայի կերպարով, սակայն չի կարող ասել, թե Գարիկը ինչ հարաբերությունների մեջ է Կարենի հետ: 2013 թվականի մարտի 09-ին ինքն այցելել է Կարեն Թորթսյանին, ում բնակարանում են գտնվել նաև Գարիկ Ամոլիկյանը և Մարինե Միրիջանյանը` Մառան: Այդ օրը Գարիկը համացանցի ՙԶնակոմստվա.ռու՚ կայքով ծանոթացել է մի տղամարդու հետ, հետագայում իմացել է, որ այդ տղամարդը Սասուն Նվերի Մանուկյանն է: Գարիկը Կարենին ասել է, որ Սասունի հետ սեռական հարաբերություն ունենալու նպատակով նրան հրավիրել է իր բնակարան: Կարենը մերժել է Գարիկին, սակայն երկար համոզելուց հետո Կարենը համաձայնվել է: Երբ Սասուն Մանուկյանը եկել է Կարենի բնակարան, դուռը բացել է Գարիկը, իսկ ինքը գտնվել է իր սենյակում: Մառան, որը հավանաբար քնած է եղել, քանի որ երկար ժամանակ իր սենյակից դուրս չի եկել: Որոշ ժամանակ անց ինքը հյուրասենյակից բարձր ձայներ է լսել և դուրս գալով սենյակից, հյուրասենյակում տեսել է, որ գումարային հարցի հետ կապված Գարիկը վիճում է Սասունի հետ, իսկ վերջինս էլ ներկայացել է որպես ոստիկանության աշխատակից: ԻՆքը հարցրել է, թե ինչ է պատահել, Գարիկն էլ իրեն ասել է, որ Սասուն Մանուկյանը սեռական հարաբերություն է ունեցել իր հետ, սակայն չի ցանկանում վճարել, բացի այդ էլ հարվածել է իրեն: Այդ ամենը լսելով` ինքը զանգահարել է իր ծանոթ ոստիկան Վարդան Ղուկասյանին, նրան ասել, որ հաճախորդը հրաժարվում է վճարել իր ընկերոջ գումարը, ասել է նաև, որ հաճախորդը ծեծել է իր ընկերոջը: Դրանից հետո, քանի որ ինքը Զեյթունի ոստիկանության համարը չի իմացել, զանգել է իր ծանոթ, ոստիկանության աշխատակից Վարդան Ղուկասյանին, նրան պատմել Սասուն Մանուկյանի մասին, ապա հեռախոսը փոխանցել է Սասունին, որը հեռախոսազրույց է ունեցել Վարդանի հետ: Վարդանը Սասունին ասել է, որ վճարի սեռական հարաբերության դիմաց, իսկ Սասունն ասել է, քանի որ նա ոստիկան է, գա, բայց Վարդանը պատասխանել է, որ ինքը չի կարող գալ, այլ կզանգի Զեյթունի ոստիկանություն և ոստիկանները կմոտենան: Քանի որ Սասունն իրեն անկառավարելի է պահել, ինքը ոստիկանությունում նախ հայտնել է, որ Սասուն Մանուկյանի հետ ինքն էլ է սեռական հարաբերություն ունեցել և որ տեսել է Սասունին` Գարիկին խփելուց, սակայն հետո խոստովանել է, որ նման բան չի եղել: Վիճաբանության բարձր ձայների պատճառով հարևաններից մեկն է դուռը թակել և քանի որ Կարենն իր սենյակում է եղել, ինքն է դուռը բացել և ասել, որ ամեն ինչ նորմալ է: Գարիկն իրեն նախապես չի ասել, որ ինքը ևս մասնակցելու է սեռական հարաբերությանը, դրա համար էլ ինքը կանացի կերպարով չի եղել, 19 տարեկան աղջկա վերաբերյալ ևս խոսակցություն չի լսել, իսկ 200 ԱՄՆ դոլարն էլ Գարիկը պահանջել է միայն իր համար: Իր ներկայությամբ լսել է միայն հայհոյանքը, չի տեսել Սասունին` Գարիկին խփելուց, Գարիկն է իրեն ասել, որ Սասունը խփել է իրեն: Այն, որ 19 տարեկան աղջկա փոխարեն Գարիկը Մառային է առաջարկել, ինքը տեղյակ չէ այդ մասին:
Վկա` Կարեն Թորոսի Թորոսյանի ցուցմունքով այն մասին, որ բնակվում է միայնակ` Երևան քաղաքի Ահարոնյան փողոցի 5-րդ շենքի 8-րդ բնակարանում: Գարիկ Ամոլիկյանն ու Գևորգ Թոքմաջյանն իր ընկերներն են, նրանք հաճախ են իր տուն հյուր եկել, սակայն նրանք հաճախորդներ չեն ընդունել իր տանը: 2013 թվականի մարտ ամսին, կոնկրետ օրը չի հիշում, բացի իրենից, Մարինեից` որն իր տան մաքրությամբ է զբաղվում, Գարիկ Ամոլիկյանից և Գևորգ Թոքմաջյանից, այլ անձինք տանը չեն եղել: Այդ օրը ինքը Գարիկի խնդրանքով նրան թույլ է տվել իր տուն հրավիրել նրա ծանոթ հաճախորդին, քանի որ տեղյակ է, որ Գարիկը գումարի կարիք է ունեցել, իսկ ինքն էլ ցանկացել է նրան օգնել, որի համար Գարիկն իրեն գումար չի տվել: Նախկինում նման հյուրեր իր տուն չեն եկել: Ինքը Գարիկ Ամոլիկյանից իմացել է, որ նրա հետ միասին հնարավոր է Գևորգը ևս ծառայություն մատուցի հաճախորդին: Երբ Գարիկի հաճախորդը` Սասուն Մանուկյանը այցելել է իր բնակարան, այդ ժամանակ ինքը իր ննջասենյակում քնած է եղել և արթնացել է բարձր ձայներից` լսելով Գարիկի վիճաբանությունը դուրս է եկել հյուրասենյակ և տեսել է, որ Գարիկ Ամոլիկյանը կանացի հագուստով ու կեղծամով է եղել, իսկ Գևորգ Թոքմաջյանը` ՙխալաթով՚, միայն նկատել է, որ Գարիկի հագուստը ՙթափթփված վիճակում է եղել՚: Լսել է, որ Գարիկը Սասունից 200 ԱՄՆ դոլար գումար է պահանջել, սակայն Սասունն ասել է, որ գումար չունի: Այդ ժամանակ Գևորգը ևս հյուրասենյակում է եղել: Ինքը Գարկից պահանջել է, որ իր բնակարանում չվիճեն ու հեռանան: Այդ ժամանակ Գարիկն ասել է, որ հաճախորդը մինչ տուն մտնելն ասել է, որ գումար ունի և վճարելու է, սակայն վերջում չի ցանկացել վճարել, ապա հարվածել է իրեն: Իր ընկերներն իրեն պատմել են, որ Սասուն Մանուկյանը հանվել է և երեսուն-քառասուն րոպեի ընթացքում ամեն ինչ հնարավոր է եղել: Ինքը Գարիկի ու Սասունի խոսակցությանը չի միջամտել, քանի որ Գարիկ Ամոլիկյանն իրեն ասել է, որ Գևորգ Թոքմաջյանը ոստիկանություն է կանչել, որից հետո ինքը մտել է իր սենյակ: Ինքը չի տեսել Սասուն Մանուկյանը հարվածել է Գարիկին, թե ոչ, թեև ամեն ինչ հնարավոր է: Ինքը քաշքշոցի, կռվի ականատես չի եղել, այլ հետագայում Գևորգ Թոքմաջյանն է իրեն ասել, որ Գարիկ Ամոլիկյանը և Սասուն Մանուկյանը միմյանց հրել են, սակայն հարված չի եղել:
Դատաբժշկական փորձաքննության թիվ 701 եզրակացությամբ այն մասին, որ Գ.Ամոլիկյանի անձնական քննությամբ փորձաքննության պահին մարմնական վնասվածքներին բնորոշ օբյեկտիվ հատկանիշներ չեն հայտնաբերվել:
Քրեական գործով ապացույց ճանաչված և քրեական գործին կցված Գարիկ Աղասու Ամոլիկյանի կողմից 2013 թվականի մարտի 09-ին ՀՀ ոստիկանության Քանաքեռ-Զեյթուն բաժնում տրված հաղորդմամբ:

Դատարանը գտնում է, որ գործով վկա Գևորգ Սամվելի Թոքմաջյանի դատաքննական ցուցմունքի այն մասը, որ նախաքննական ցուցմունքի այն մասը, երբ ինքը Գարիկին ու հյուրին տեսել է հյուրասենյակում, նրանք եղել են հագնված նստած վիճակում, ճիշտ չէ և չի համապատասխանում իրականությանը, քանի որ այն գրվել է քննիչի թելադրանքով, արժանահավատ չէ և չի համապատասխանում իրականությանը, այլ նպատակ է հետապնդում օգնելու իր ընկեր Գարիկ Ամոլիկյանին խույս տալ քրեական պատասխանատվությունից ու պատժից ու նրա ցուցմունքի այդ հատվածը ժխտվում է, քանի որ վկան նախաքննության ընթացքում 2012 թվականի մայիսի 15-ին ցուցմունքը գրել է իր ձեռքով, իսկ վերջում էլ գրել է հետևյալ նախադասությունը. ՙՑուցմունքը գրված է իմ ձեռքով, ճիշտ է, որի համար ստորագրում եմ՚ և ստորագրել է այն, բացի այդ էլ, վկան երբևէ չի դիմել իրավապահ մարմիններին ու չի հայտնել քննիչի կողմից իր նկատմամբ բռնություն գործադրելու մասին:
Դատարանը, հետազոտելով քրեական գործով ձեռք բերված ապացույցները և գնահատելով դրանց վերաբերելիության, թույլատրելիության, իսկ ամբողջ ապացույցներն իրենց համակցությամբ գործի լուծման համար բավարարության տեսանկյունից, հանգում է այն հետևության, որ ամբաստանյալ Գարիկ Աղասու Ամոլիկյանը գիտակցելով, որ իր տրամադրած տեղեկատվությունը կեղծ է, շահադիտական դրդումներով հանցագործության մասին սուտ մատնություն է կատարել.
Ամբաստանյալ Գարիկ Աղասու Ամոլիկյանը 2013 թվականի մարտի 09-ին ՙԶնակոմստվա.ռու՚ կայքի միջոցով ՙԿառա տղա եմ՚ պայմանական անունով իր կողմից օգտագործվող էջով ծանոթացել է Կոտայքի մարզի Արգել գյուղի բնակիչ` գործով վկա Սասուն Նվերի Մանուկյանի հետ, վերջինիս առաջարկել 100 ԱՄՆ դոլար գումարով սեռական հարաբերություն ունենալ իր հետ` հայտնելով, որ ինքը տրանսսեքսուալ է, սակայն Սասուն Մանուկյանը ցանկություն է հայտնել հանդիպել աղջկա հետ, ինչին Գարիկ Ամոլիկյանը պատասխանել է, որ իր հետ 19 տարեկան շատ գեղեցիկ աղջիկ կա, որը նույնպես պատրաստ է 100 ԱՄՆ դոլար գումարով սեռական հարաբերություն ունենալ: Այդ ժամանակ Սասուն Մանուկյանն ու Գարիկ Ամոլիկյանն փոխանավել են հեռախոսահամարներով, որից հետո ժամը 2220-ի սահմաններում Սասուն Մանուկյանն իր 094-54-08-88 բջջային հեռախոսահամարից զանգահարել է Գարիկ Ամոլիկյանի 099-90-95-92 բջջային հեռախոսահամարին, հեռախոսազրույցի ընթացքում կրկին ասել, որ ցանկանում է սեռական հարաբերություն ունենալ աղջկա հետ, Գարիկ Ամոլիկյանն էլ շահադիտական դրդումներով խաբեությամբ հրավիրել է իր ընկերոջ` գործով վկա Կարեն Թորոսի Թորոսյանի Երևան քաղաքի Ա.Ահարոնյան փողոցի 5-րդ շենքի թիվ 8 բնակարան` խոստանալով ծանոթացնել նրան 19 տարեկան գեղեցիկ աղջկա հետ: 100 ԱՄՆ դոլար գումարով 19 տարեկան աղջկա հետ սեռական հարաբերություն ունենալու նպատակով նույն օրը Սասուն Մանուկյանը գնացել է Գարիկ Ամոլիկյանի նշաց հասցեով` Երևան քաղաքի Ա.Ահարոնյան փողոցի 5-րդ շենքի 8-րդ բնակարան և ժամը 2240-ի սահմաններում հասնելով այնտեղ, շենքի մուտքն ու բնակարանի հարկը պաչզելու նպատակով զանգահարել է Գարիկ Ամոլիկյանին: Այդ ժամանակ Կարեն Թորոսյանի հետ մաիսին նրա տանն են գտնվել նաև վերջինիս տան մաքրությամբ զբաղվող` գործով վկա Մարինե Միքայելի Միրիջանյանը, Կարեն Թորոսյանի ընկեր` ՙՎիկա՚ մականունով Գևորգ Սամվելի Թոքմաջյանը: Պարզելով բնակարանի տեղը` Սասուն Մանուկյանը բարձրացել է չորրորդ հարկ, որտեղ կանացի հագուստով և կեղծամով կերպարանափոխված Գարիկ Ամոլիկյանը բացել է բնակարանի դուռն ու դիմավորել նրան, սուրճ հյուրասիրել և Սասուն Մանուկյանի հարցին, թե որտեղ է 19 տարեկան աղջիկը, Գարիկ Ամոլիկյանը պատասխանել է, որ աղջիկ չկա, սակայն կարող է իր և իր ընկերոջ` ՙՎիկա՚ մականունով Գևորգ Թոքմաջյանի հետ սեռական հարաբերություն ունենալ: Սասուն Մանուկյանը հրաժարվել է Գարիկ Ամոլիկյանի առաջարկից և տեսնելով, որ պայմանավորված երիտասարդ աղջիկը բնակարանում չէ, ցանկացել է հեռանալ, սակայն Գարիկ Ամոլիկյանը թույլ չի տվել` նրանից պահանջելով 200 ԱՄՆ դոլար գումար, ասելով, որ ինքը և իր ընկերը ժամանակ ու միջոցներ են ծախսել նրան ընդունելու համար: Սասուն Մաուկյանը հրաժարվել է գումար վճարելուց` պատճառաբանելով, որ ինքը որևէ միկի հետ սեռական հարաբերություն չի ունեցել և պարտավոր չէ գումար վճարել, սակայն Գարիկ Ամոլիկյանը բանալիով կողպել է բնակարանի դուռը և ասել, որ նա դուրս կգա միայն իրենց գումարը տալուց հետո, ապա բանալիով փակել է տան դուռը: Նրանց բարձր ձայներից ննջասենյակից հյուրասենյակ է գնացել Գևորգ Թոքմաջյանը, հարցրել ինչ է պատահել, Գարիկ Ամոլիկյանն էլ պատասխանել է, որ Սասուն Մանուկյանը չի վճարել մատուցած ծառայության գումարը, բացի այդ էլ ասել է նաև, թե իբր Սասուն Մանուկյանն իրեն հարվածել է: Գևորգ Թոքմաջյանն անմիջապես զանգահարել է իր ծանոթ, ոստիկանության նախկին աշխատակից` գործով վկա Վարդան Յուրիկի Ղուկասյանին և հայտնել, որ իրենց հաճախորդ Սասուն Մանուկյանը հրաժարվում է վճարել մատուցած ծառայության դիմաց, բացի այդ էլ ծեծի է ենթարկել Գարիկ Ամոլիկյանին: Այդ ժամանակ Վարդան Ղուկասյանն ասել է, որ հեռախոսը փոխանցեն Սասուն Մանուկյանին: Վերջինս խոսել է Վարդան Ղուկասյանի հետ, որը Սասուն Մանուկյանին հարցրել է նրա տարիքի և ամուսնացած լինելու մասին և ասել` ՙինչ որ է, հասկանում եմ, շառ ու փորձանքից հեռու մնալու համար փողը տուր և գնա՚: Սակայն Սասուն Մանուկյանը դարձյալ հրաժարվել է` պատճառաբանելով, որ ինքը որևէ մեկի հետ սեռական հարաբերություն չի ունեցել, այնուհետև, որպռս ոստիկանության աշխատակցի, օգնություն է խնդրել նրանից: Դրանից հետո Վարդան Ղուկասյանը զանգահարել է ՀՀ ոստիկանության Քանաքեռ-Զեյթուն բաժին և հայտնել, որ Երևան քաղաքի Ա.Ահարոնյան փողոցի 5-րդ շենքի 8-րդ հասցեի բնակարանում Սասուն Մանուկյանը ծեծի է ենթարկել Գարիկ Ամոլիկյանին: Քիչ անց Կարեն Թորոսյանի բնակարան են այցելել ՀՀ ոստիկանության Քանաքեռ-Զեյթուն բաժնի աշխատակիցները և Սասուն Մանուկյանին բերման ենթարկել ՀՀ ոստիկանության Քանաքեռ-Զեյթուն բաժին, Գարիկ ԱՄոլիկյանին և Գևորգ Թոքմաջյանին նույնպես հրավիրել են ոստիկանության բաժին, որտեղ Գարիկ Ամոլիկյանը շահադիտական դրդումներով` Սասուն Մանուկյանից 200 ԱՄՆ դոլար ստանալու նպատակով, նախազգուշացված լինելով սուտ մատնություն կատարելու համար նախատեսված քրեական պատասխանատվության մասին, հաղորդում է տվել այն մասին, թե իբր 2013 թվականի մարտի 09-ին ժամը 2230-ի սահմաններում Երևան քաղաքի Ա.Ահարոնյան 5-րդ շենքի 8-րդ բնակարանում պարտք ու պահանջի շուրջ առաջացած վեճի ընթացքում Սասուն Մանուկյանը ձախ ձեռքով հարվածել է իր դեմքին և բռունցքով հարվածել է աջ ուսի շրջանում` պատճառելով ֆիզիկական ցավ, որից հետո ստորագրել է հաղորդում ընդունելու մասին արձանագրությունը: Հետագայում Գարիկ Աղասու Ամոլիկյանը ՀՀ ոստիկանության Քանաքեռ-Զեյթուն քննչական բաժնում հայտնել է, որ ինքն ի սկզբանե սուտ հաղորդում է տվել, թե իբր իրեն ծեծի են ենթարկել, Սասուն Մանուկյանը միայն հրել է իրեն, սուտ հաղորդումը տվել է պահի ազդեցության տակ, քանի որ վրդովված է եղել իրեն սպասեցնելու, ժամանակը կորցնելու և գումար չտալու համար, ինքը դրանով պարզապես ցանկացել է Սասուն Մանուկյանից գումար ստանալ` նպատակ ունենալով դրանից շահույթ ստանալ, իր և Սասուն Մանուկյանի միջև սեռական հարաբերություն տեղի չի ունեցել:
Այսպիսով, ընդհանուր կարգով սահմանված դատաքննությամբ հետազոտված ապացույցների հիման վրա դատարանն ապացուցված է համարում, որ Գարիկ Աղասու Ամոլիկյանը կատարել է ՀՀ քրեական օրենսգրքի 333 հոդվածի 2-րդ մասի 3-րդ կետով նախատեսված հանցագործություն` որպիսի արարքի համար նա պետք է պատասխանատվության ենթարկվի:
Գարիկ Աղասու Ամոլիկյանը ենթակա է պատժի կատարած արարքի համար:

Դատարանի իրավական վերլուծությունները.

ՀՀ քրեական օրենսգրքի 61 հոդվածի 2-րդ մասի համաձայնª ՙՊատժի տեսակը և չափը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով՚:
Ամբաստանյալ Գարիկ Աղասու Ամոլիկյանն անկեղծորեն խոստովանեց և զղջաց կատարած արարքի համար, նախկինում դատապարտված չի եղել, սակայն ոստիկանության Քանաքեռ-Զեյթուն բաժնի 2011 թվականի մարտի 31-ի որոշմամբ ՀՀ քրեական դատավարության օրենսգրքի 35 հոդվածի 1-ին մասի 4-րդ կետի կիրառմամբ Գարիկ Աղասու Ամոլիկյանի նկատմամբ ՀՀ քրեական օրենսգրքի 34-177 հոդվածի 1-ին մասով քրեական գործի վարույթը կարճվել է` դիմողի բողոքի բացակայության հիմքով:
Ամբաստանյալ Գարիկ Աղասու Ամոլիկյանի պատասխանատվությունը և պատիժը մեղմացնող ու ծանրացնող հանգամանքներ չկան:

ՀՀ քրեական օրենսգրքի 10-րդ հոդվածի 1-ին մասը սահմանում էª ՙՀանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար՚:
ՀՀ քրեական օրենսգրքի 48-րդ հոդվածի 2-րդ մասը սահմանում էª ՙՊատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61-րդ հոդվածը սահմանում էª ՙՀանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները: (...)՚: Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները:
Սույն քրեական գործով Գարիկ Աղասու Ամոլիկյանին մեղադրանք է առաջադրվել ՀՀ քրեական օրենսգրքի 333 հոդվածի 2-րդ մասի 3-րդ կետով, որի սանկցիան նախատեսում է հետևյալ պատժատեսակը` ազատազրկում` առավելագույնը հինգ տարի ժամկետով:
Հաշվի առնելով ամբաստանյալ Գարիկ Աղասու Ամոլիկյանի անձը բնութագրող տվյալները, և ղեկավարվելով օրինականության, արդարության, պատժի անհատականացման ու մարդասիրության սկզբունքներով, դատարանը հանգում է այն համոզման, որ Գարիկ Աղասու Ամոլիկյանի նկատմամբ պատիժ պետք է նշանակել ազատազրկման ձևով` որոշակի ժամկետով, որով հնարավոր կլինի հասնել ՀՀ քրեական օրենսգրքի 48-րդ հոդվածով սահմանված պատժի նպատակներին` սոցիալական արդարության վերականգնմանը, պատժի ենթարկված անձի ուղղմանը և հանցագործությունների կանխմանը:

ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ ՀՀ Ազգային ժողովի 2013 թվականի հոկտեմբերի 03-ի թիվ ԱԺՈ-080-Ն որոշման 1-ին կետի 3-րդ ենթակետի համաձայն` ՙՊատժից ազատել, բացառությամբ սույն որոշման 8-րդ կետի 4-6-րդ ենթակետերով և 9-րդ կետով նախատեսված դեպքերի` այն անձանց, որոնց նկատմամբ նշանակվել է առավելագույնը երեք տարի ժամկետով ազատությունից զրկելու հետ կապված պատիժ՚:
Համաներման որոշման 9-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը: Մասնավորապես` Համաներման որոշման 9-րդ կետի 7-րդ ենթակետում թվարկված են ՀՀ քրեական օրենսգրքի այն հոդվածները և հոդվածների մասերը, որոնցով նախատեսված արարքները կատարած անձանց նկատմամբ համաներումը կիրառելի չէ: Սակայն հարկ է նկատել, որ թվարկված հոդվածների և հոդվածների մասերի շարքից բացակայում է ՀՀ քրեական օրենսգրքի 333 հոդվածի 2-րդ մասի 3-րդ կետը, այսինքն` ՀՀ քրեական օրենսգրքի 333 հոդվածի 2-րդ մասի 3-րդ կետով նախատեսված արարքներ կատարած անձանց նկատմամբ համաներման կիրառումը սահմանափակված չէ:
Նույն որոշման 13-րդ կետի 1-ին ենթակետի համաձայն` ՙա. սույն որոշման կատարումը վերապահել` Հայաստանի Հանրապետության ընդհանուր իրավասության առաջին ատյանի և վերաքննիչ քրեական դատարաններին` այն անձանց նկատմամբ, որոնց վերաբերյալ գործերը Հայաստանի Հանրապետության ընդհանուր իրավասության առաջին ատյանի կամ վերաքննիչ քրեական դատարաններում են, սակայն մինչև սույն որոշումն ուժի մեջ մտնելը չեն քննվել, կամ այն անձանց նկատմամբ, որոնց վերաբերյալ գործերը քննվել են, բայց դատավճիռներն օրինական ուժի մեջ չեն մտել՚:
Նույն որոշման 15-րդ կետի համաձայն` սույն որոշումը կիրառվում է այն անձանց նկատմամբ, որոնք հանցագործություն են կատարել մինչև 2013 թվականի սեպտեմբերի 1-ը ներառյալ:
Նույն որոշման 17-րդ կետի համաձայն` համաներման կիրառման դեպքում դատվածության մարման հարցը լուծվում է օրենքով սահմանված կարգով:
Նկատի ունենալով այն հանգամանքը, որ ամբաստանյալ Գարիկ Աղասու Ամոլիկյանը հանցանքը կատարել է մինչև 2013 թվականի սեպտեմբերի 01-ը, այն, որ սույն քրեական գործի նյութերում բացակայում են Համաներման որոշման 8-րդ կետի 4-6-րդ ենթակետերի, 9-րդ կետի մյուս ենթակետերում նշված այն սահմանափակումները, որոնք կարող են արգելք հանդիսանալ Գարիկ Աղասու Ամոլիկյանի նկատմամբ Համաներման որոշման կիրառման համար, ուստի դատարանը գտնում է, որ Գարիկ Աղասու Ամոլիկյանի նկատմամբ մինչև երեք տարի ժամկետով ազատազրկման ձևով պատիժ նշանակելու դեպքում կարող է կիրառել ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ ՀՀ Ազգային ժողովի 2013 թվականի հոկտեմբերի 03-ի թիվ ԱԺՈ-080-Ն որոշման 1-ին կետի 3-րդ ենթակետը և նրան ազատել պատժից:
Դատարանը գտնում է, որ քրեական գործով ապացույց ճանաչված և քրեական գործին կցված Գարիկ Աղասու Ամոլիկյանի կողմից 2013 թվականի մարտի 09-ին ՀՀ ոստիկանության Քանաքեռ-Զեյթուն բաժնում տրված հաղորդումը պետք է թողնել քրեական գործին կցված և պահել գործի հետ` վերջինիս պահելու ամբողջ ժամանակամիջոցում:
Քննության առնելով Գարիկ Աղասու Ամոլիկյանի նկատմամբ ընտրված խափանման միջոցի հարցը, դատարանը գտնում է, որ ընտրված խափանման միջոցը` ստորագրություն չհեռանալու մասին, պետք է վերացնել` դատավճիռն օրինական ուժի մեջ մտնելու պահից:

Եզրափակիչ մաս.

Ղեկավարվելով ՀՀ քրեական դատավարության օրենսգրքի 357-360-րդ հոդվածներով, ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ ՀՀ Ազգային ժողովի 2013 թվականի հոկտեմբերի 03-ի թիվ ԱԺՈ-080-Ն որոշմամբ` դատարանը

Վ Ճ Ռ Ե Ց`

Գարիկ Աղասու Ամոլիկյանին մեղավոր ճանաչել ՀՀ քրեական օրենսգրքի 333 հոդվածի 2-րդ մասի 3-րդ կետով և նրան դատապարտել ազատազրկման՝ 1 /մեկ/ տարի 6 /ամիս/ ժամկետով:
ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ ՀՀ Ազգային ժողովի 2013 թվականի հոկտեմբերի 03-ի թիվ ԱԺՈ-080-Ն որոշման 1-ին կետի 3-րդ ենթակետի կիրառմամբ Գարիկ Աղասու Ամոլիկյանին ազատել պատժից:
Գարիկ Աղասու Ամոլիկյանի նկատմամբ ընտրված խափանման միջոցը` ստորագրությունը չհեռանալու մասին, վերացնել դատավճռի օրինական ուժի մեջ մտնելու պահից:
Քրեական գործով ապացույց ճանաչված և քրեական գործին կցված Գարիկ Աղասու Ամոլիկյանի կողմից 2013 թվականի մարտի 09-ին ՀՀ ոստիկանության Քանաքեռ-Զեյթուն բաժնում տրված հաղորդումը թողնել քրեական գործին կցված և պահել գործի հետ` վերջինիս պահելու ամբողջ ժամանակամիջոցում:
Սույն դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակման պահից մեկ ամսվա ընթացքում:


ԴԱՏԱՎՈՐ` Ա.ԲԵԿԹԱՇՅԱՆ