գործ` ԵԱՔԴ/0146/01/13



Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը

Նախագահությամբ դատավոր` Արմեն Բեկթաշյանի
քարտուղարությամբ` Հասմիկ Արտաշեսյանի

մասնակցությամբ` մեղադրող` Կարեն Բարսեղյանի

պաշտպաններ` Անժելա Հոբոսյանի
Սերգեյ Մկրտչյանի
թարգմանիչ` Հրանուշ Թախմասյանի
ամբաստանյալներ` Մեհրդատ Կազեմի Սանիի
Փեյման Էբրահիմի Բախշիի

2013 թվականի դեկտեմբերի 28-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի`

Մեհրդատ Յաղուբալի Կազեմի Սանիի` ծնված 04.12.1990 թվականին, Իրանի Իսլամական Հանրապետության Թեհրան քաղաքում, ազգությամբ պարսիկ, Իրանի Իսլամական Հանրապետության քաղաքացի, միջնակարգ կրթությամբ, ամուրի, խնամքին ոչ ոք, չի աշխատել, նախկինում չդատված, հաշվառված է Իրանի Իսլամական Հանրապետությունում, բնակվել է Երևան քաղաքի Սոսեի փողոցի 76 տանը, այժմ գտնվում է ՀՀ ԱՆ ՙՆուբարաշեն՚ ՔԿՀ-ում, կալանքի տակ է 25.05.2013 թվականից:

Մեհրդատ Յաղուբալի Կազեմի Սանին մեղադրվում է ՀՀ քրեական օրենսգրքի 177-րդ հոդվածի 3-րդ մասի 1.1 կետով և 178-րդ հոդվածի 1-ին մասով:
2012 թվականի դեկտեմբերի 26-ի որոշմամբ Մեհրդատ Յաղուբալի Կազեմի Սանիի նկատմամբ որպես խափանման միջոց է ընտրվել կալանավորումը:
2013 թվականի մայիսի 27-ի որոշմամբ Մեհրդատ Յաղուբալի Կազեմի Սանիի նկատմամբ որպես խափանման միջոց ընտրված կալանավորումը վերահաստատվել է:

Փեյման Էբրահիմի Բախշիի` ծնված 15.10.1991 թվականին, Իրանի Իսլամական Հանրապետության Թեհրան քաղաքում, ազգությամբ պարսիկ, Իրանի Իսլամական Հանրապետության քաղաքացի, միջնակարգ կրթությամբ, ամուրի, խնամքին ոչ ոք, չի աշխատել, նախկինում չդատված, հաշվառված է Իրանի Իսլամական Հանրապետությունում, բնակվել է Երևան քաղաքի Սոսեի փողոցի 76 տանը, այժմ գտնվում է ՀՀ ԱՆ ՙՆուբարաշեն՚ ՔԿՀ-ում, կալանքի տակ է 25.05.2013 թվականից:

Փեյման Էբրահիմի Բախշին մեղադրվում է ՀՀ քրեական օրենսգրքի 177-րդ հոդվածի 3-րդ մասի 1.1 կետով:
2012 թվականի դեկտեմբերի 26-ի որոշմամբ Փեյման Էբրահիմի Բախշիի նկատմամբ որպես խափանման միջոց է ընտրվել կալանավորումը:
2013 թվականի մայիսի 27-ի որոշմամբ Փեյման Էբրահիմի Բախշիի նկատմամբ որպես խափանման միջոց ընտրված կալանավորումը վերահաստատվել է:

Գործի դատավարական նախապատմությունը.

2012 թվականի օգոստոսի 26-ին ՀՀ ոստիկանության Արաբկիրի քննչական բաժնում ՀՀ քրեական օրենսգրքի 177 հոդվածի 3-րդ մասի 1.1 կետի հատկանիշներով հարուցվել է թիվ 14123512 քրեական գործը:
2012 թվականի օգոստոսի 28-ի որոշմամբ Թահերե Ղոլամհասսանի Բարաթին թիվ 14123512 քրեական գործով ճանաչվել է որպես տուժող և նույն օրը որոշում է կայացվել Թահերե Բարաթիին որպես քաղաքացիական հայցվոր ճանաչելու մասին:
2012 թվականի օգոստոսի 28-ի որոշմամբ Մեհդի Մուհամադխալի Ջամուռը թիվ 14123512 քրեական գործով ճանաչվել է որպես տուժող և նույն օրը որոշում է կայացվել Մեհդի Ջամուռին որպես քաղաքացիական հայցվոր ճանաչելու մասին:
2012 թվականի դեկտեմբերի 26-ի որոշմամբ Մեհրդատ Յաղուբալի Կազեմի Սանին ՀՀ քրեական օրենգրքի 177 հոդվածի 3-րդ մասի 1.1 կետով և ՀՀ քրեական օրենսգրքի 178 հոդվածի 1-ին մասով հանցանքներ կատարելու համար ներգրավվել է որպես մեղադրյալ, նույն օրը նրա նկատմամբ որպես խափանման միջոց է ընտրվել կալանավորումը` 2 /երկու/ ամիս ժամկետով և մեղադրյալ Մեհրդատ Կազեմի Սանիի գտնվելու վայրը հայտնի չլինելու պատճառով նրա նկատմամբ հայտարարվել է հետախուզում:
2012 թվականի դեկտեմբերի 26-ի որոշմամբ Փեյման Էբրահիմի Բախշին ՀՀ քրեական օրենսգրքի 177 հոդվածի 3-րդ մասի 1.1 կետով նախատեսված հանցանք կատարելու համար ներգրավվել է որպես մեղադրյալ, նույն օրը նրա նկատմամբ որպես խափանման միջոց է ընտրվել կալանավորումը` 2 /երկու/ ամիս ժամկետով և մեղադրյալ Փեյման Էբրահիմի Բախշիի գտնվելու վայրը հայտնի չլինելու պատճառով նրա նկատմամբ հայտարարվել է հետախուզում:
2012 թվականի դեկտեմբերի 26-ի որոշմամբ ՀՀ քրեական դատավարության օրենսգրքի 31 հոդվածի 1-ին մասի 2-րդ կետի հիմքով թիվ 14123512 քրեական գործի վարույթը կասեցվել է` մինչև հանցագործություն կատարած անձանց` Մեհրդատ Յաղուբալի Կազեմի Սանիին և Փեյման Էբրահիմի Բախշիին հայտնաբերելը:
2013 թվականի մայիսի 25-ին ժամը 0600-ին ՀՀ ոստիկանության Մեղրիի բաժնի ՔՀԲ աշխատակիցների կողմից Մեղրիի մաքսակետից ոստիկանության Մեղրիի բաժին է բերման ենթարկվել ՀՀ քրեական օրենսգրքի 177 հոդվածի 3-րդ մասի 1.1 կետի հատկանիշներով ոստիկանության Արաբկիրի բաժնի կողմից հետախուզվող, ԻԻՀ քաղաքացի Փեյման Էբրահիմի Բախշին:
2013 թվականի մայիսի 25-ին ժամը 0600-ին ՀՀ ոստիկանության Մեղրիի բաժնի ՔՀԲ աշխատակիցների կողմից Մեղրիի մաքսակետից ոստիկանության Մեղրիի բաժին է բերման ենթարկվել ՀՀ քրեական օրենսգրքի 177 հոդվածի 3-րդ մասի 1.1 կետի հատկանիշներով ոստիկանության Արաբկիրի բաժնի կողմից հետախուզվող, ԻԻՀ քաղաքացի Մեհրդատ Յաղուբալի Կազեմի Սանին:
2013 թվականի մայիսի 26-ին Փեյման Էբրահիմի Բախշին և Մեհրդատ Յաղուբալի Կազեմի Սանին բերման են ենթարկվել ՀՀ ոստիկանության Արաբկիրի բաժին:
2013 թվականի մայիսի 26-ի որոշմամբ թիվ 14123512 քրեական գործի կասեցված վարույթը վերսկսվել է:
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2013 թվականի մայիսի 27-ի որոշմամբ` Փեյման Էբրահիմի Բախշիի նկատմամբ 2012 թվականի դեկտեմբերի 26-ի որոշմամբ որպես խափանման միջոց ընտրված կալանավորումը վերահաստատվել է:
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2013 թվականի մայիսի 27-ի որոշմամբ` Մեհրդատ Յաղուբալի Կազեմի Սանի նկատմամբ 2012 թվականի դեկտեմբերի 26-ի որոշմամբ որպես խափանման միջոց ընտրված կալանավորումը վերահաստատվել է:
2013 թվականի օգոստոսի 31-ի որոշմամբ Ալիրեզա Բեհռուզի Հասսանին ՀՀ քրեական օրենսգրքի 177 հոդվածի 3-րդ մասի 1.1 կետով նախատեսված հանցանք կատարելու համար ներգրավվել է որպես մեղադրյալ, և մեղադրյալ Ալիրեզա Բեհռուզի Հասսանիի գտնվելու վայրը հայտնի չլինելու պատճառով վերջինիս նկատմամբ հայտարարվել է հետախուզում, նույն օրը լիրեզա Բեհռուզի Հասսանիի նկատմամբ որպես խափանման միջոց է ընտրվել կալանավորումը` 2 /երկու/ ամիս ժամկետով:
2013 թվականի սեպտեմբերի 09-ի որոշմամբ Մեհրդատ Յաղուբալի Կազեմի Սանիին` 26.05.2013 թվականին առաջադրված մեղադրանքը փոփոխվել ու լրացվել է և նրան նոր մեղադրանք է առաջադրվել ՀՀ քրեական օրենսգրքի 177 հոդվածի 3-րդ մասի 1.1 կետով, ՀՀ քրեական օրենսգրքի 178 հոդվածի 1-ին մասով:
2013 թվականի սեպտեմբերի 12-ի որոշմամբ Փեյման Էբրահիմի Բախշիին` 26.05.2013 թվականի առաջադրված մեղադրանքը փոփոխվել ու լրացվել է և նրան նոր մեղադրանք է առաջադրվել ՀՀ քրեական օրենսգրքի 177 հոդվածի 3-րդ մասի 1.1 կետով:
2013 թվականի սեպտեմբերի 19-ի որոշմամբ թիվ 14123512 քրեական գործով քաղաքացիական հայցի, գույքի հնարավոր բռնագրավման և դատական ծախսերն ապահովելու նպատակով կալանք է դրվել մեղադրյալ Փեյման Բախշիի մոտից անձնական խուզարկությամբ հայտնաբերված օպտիկական մեկ ակնոցի, ՙԳուչչի՚ մոդելի ձեռքի մեկ ժամացույցի, ՙՍոնի Էրիքսոն՚ մոդելի բջջային հեռախոսի, մեկ ուսապարկի ու դրա մեջ առկա մեկ տուփ օճառի, վեց տուփ տուրիստական այցեքարտերի, երեք զույգ հողաթափերի, մեկ ճամպրուկի ու դրա մեջ առկա հիգիենայի պարագաների, մեկ նոթատետրի, մեկ զույգ կոշիկի, երկու դրամապանակի, մեկ պահածոյի, պոլիէթիլենյային տոպրակով բրնձի, մեկ լիցքավորիչի, երեք հողաթափի, երկու զույգ սպորտային կոշիկների, երեք շամպունի, ձեռքի մեկ հեղուկի, զուգարանի մեկ թղթի, ամանի մեկ հեղուկի, մեկ տուփ աղի, մեկ ամանի մածուկի, ձեռքի մեկ օճառի, մեկ տուփ լվացքի փոշու, օգտագործած տարբեր հագուստների, Մեհրդատ Կազեմի Սանիի անձնական խուզարկությամբ հայտնաբերված ՙՍոնի Էրիքսոն՚ մոդելի մեկ բջջային հեռախոսի, ՙՍամսունգ՚ մոդելի մեկ բջջային հեռախոսի, ՙm՚ տառով մեկ արծաթագույն վզնոցի, ձեռքի մեկ պայուսակի ու դրա մեջ առկա երեք 100 ԱՄՆ դոլարանոց թղթադրամի, մեկ 20.000 ՀՀ դրամանոց թղթադրամի, մեկ 10.000 ՀՀ դրամանոց թղթադրամի, երկու 1000 ՀՀ դրամանոց թղթադրամի, վարորդական իրավունքի վկայականի, երկու սոցիալական քարտի, մեկ այցեքարտի, բանկային երեք քարտերի, զինվորական վկայականի, մեկ ռադիոընդունիչի իր մարտկոցով, 10 կգ բրնձով մեկ պայուսակի, սև գույնի մեկ պայուսակի ու դրա մեջ առկա մեկ տուփ թթու լավաշի, երեք սանրի, մեկ զույգ ամառային լաթերի, սեղանի մեկ ժամացույցի, մեկ վարսահարդարիչի, մազի երկու լաքի, դեմքի մեկ կրեմի, մեկ լիտրանոց տարայի մեջ լցված ՙԲարֆ՚ հեղուկի, մեկ եղունգկտրիչի, մեկ ճամպրուկի ու դրա մեջ առկա օգտագործված տարբեր տեսակի հագուստների, վրա:
Նկատի ունենալով, որ Մեհրդատ Յաղուբալի Կազեմի Սանիին և Փեյման Էբրահիմի Բախշիին մեղսագրվող հանցանքները հիմնավորվել են նախաքննությամբ ձեռք բերված բավարար ապացույցների համակցությամբ և վերջիններիս վերաբերյալ քրեական գործի մասը ենթակա է մեղադրական եզրակացությամբ դատարան ուղարկելու, իսկ վերջիններիս հետ Թ.Բարաթիի բնակարանից գողություն կատարող Ալիրեզա Բեհռուզի Հասսանիին հայտնաբերելու, հանցագործությանը մասնակից հնարավոր այլ անձանց ի հայտ բերելու, գործով օբյեկտիվությունը, լրիվությունն ու բազմակողմանիությունն ապահովելու նպատակով դեռևս անհրաժեշտ է կատարել մի շարք քննչական և դատավարական գործողություններ և քրեական գործից Ալիրեզա Բեհռուզի Հասսանիի վերաբերյալ մասն անջատելը չի կարող բացասաբար անդրադառնալ գործի վարույթի լրիվության և օբյեկտիվության վրա, ուստի 2013 թվականի սեպտեմբերի 23-ի որոշմամբ թիվ 14123512 քրեական գործից մաս է անջատվել և ՀՀ քրեական օրենսգրքի 177 հոդվածի 3-րդ մասի 1.1 կետով նոր քրեական գործ է հարուցվել, անջատված մասին շնորհվել է թիվ 14149613 համարը և կատարվել է նախաքննություն:

Նախաքննական մարմնի կողմից Մեհրդատ Յաղուբալի Կազեմի Սանիին ՀՀ քրեական օրենսգրքի 178 հոդվածի 1-ին մասով և ՀՀ քրեական օրենսգրքի 177 հոդվածի 3-րդ մասի 1.1 կետով մեղադրանքներ է առաջադրվել այն բանի համար, որ նա խաբեության և վuտահությունը չարաշահելու եղանակով հափշտակելով ուրիշի զգալի չափերով գույքը, կատարել է խարդախություն, ինչպես նաև մի խումբ անձանց կողմից նախնական համաձայնությամբ բնակարան ապօրինի մուտք գործելով կատարել է ուրիշի գույքի խոշոր չափերով գաղտնի հափշտակություն` գողություն.
Նախաքննական մարմնի կողմից Փեյման Էբրահիմի Բախշիին ՀՀ քրեական օրենսգրքի 177 հոդվածի 3-րդ մասի 1.1 կետով մեղադրանք է առաջադրվել այն բանի համար, որ նա մի խումբ անձանց կողմից նախնական համաձայնությամբ բնակարան ապօրինի մուտք գործելով կատարել է ուրիշի գույքի խոշոր չափերով գաղտնի հափշտակություն` գողություն.
Մեհրդատ Կազեմի Սանին, Փեյման Բախշին և Ալիրեզա Հասսանին միմյանց հետ նախնական համաձայնության գալով, ուրիշի գույքի գաղտնի հափշտակություն կատրելու դիտավորություն հետապնդելով կազմակերպել, դերաբաշխումները կատարելով, կատարել են հանցավոր արարքներ: Այսպես`
2012 թվականի օգոստոսի 25-ին ժամը 21:30-ի սահմաններում Մեհրդատ Կազեմի Սանին նարգիլեի համար նախատեսված ածուխ բերելու պատրվակով գործով տուժող Թահերե Բարաթիից վերցրել է վերջինիս պատկանող ՙՖոլկսվագեն Գոլֆ՚ մակնիշի ավտոմեքենայի բանալիները, ավտոմեքենայի դիմացի նստատեղերի արանքից գաղտնի վերցրել է Թահերե Բարաթիի բնակության վայր հանդիսացող Երևան քաղաքի Հր.Քոչար 18 շենքի 62 բնակարանի բանալիները, որից հետո, խարդախությամբ Թ.Բարաթիից վերցնելով 15.000 ՀՀ դրամ արժողությամբ բջջային հեռախոսը և 20.000 ՀՀ դրամ գումար, ժամը 22:00-ի սահմաններում հեռացել է ՙԱՅՍ՚ ակումբից: Այդ ժամանակահատվածից սկսած մինչև 26.08.2012 թվականը ժամը 06:26-ն ընկած ժամանակահատվածում Մեհրդատ Կազեմի Սանին, Փեյման Բախշին և Ալիրեզա Հասսանին իրար հետ միասին, Մեհրդատ Կազեմի Սանիի կողմից Թահիրե Բարաթիի ավտոմեքենայից վերցրած բնակարանի բանալիներով բացել են Երևան քաղաքի Հ.Քոչարի 18 շենքի 62 բնակարանի մուտքի դուռը, ապօրինի մուտք են գործել այնտեղ և ննջասենյակի պահարանից գաղտնի հափշտակել են Թահերե Բարաթիին պատկանող 1.227.000 ՀՀ դրամին համարժեք 3000 ԱՄՆ դոլար գումար և Մեհդի Ջամուռին պատկանող 10.000 ՀՀ դրամ արժողությամբ դրամապանակը, որի մեջ եղել է 449.000 ՀՀ դրամ գումարին համարժեք 1100 ԱՄՆ դոլար գումար: Հանցագործությունը ավարտին հասցնելուց հետո Փեյման Բախշիի և Ալիրեզա Հասսանիի հետ միասին 26.08.2012 թվականին ժամը 06:26-ին ՀՀ պետական սահմանի ՙՄեղրի՚ սահմանային անցակետով մեկնել է ՀՀ-ից: Կատարված հանցագործությամբ Թահերե Բարաթիին պատճառվել է 1.227.000 ՀՀ դրամ գումարի գույքային վնաս, իսկ Մ.Ջամուռին` 459.000 ՀՀ դրամ գումարի գույքային վնաս:
2013 թվականի հոկտեմբերի 09-ին քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:

Ապացույցների հետազոտում և գնահատում.

Ամբաստանյալ` Մեհրդատ Յաղուբալի Կազեմի Սանին ՀՀ քրեական օրենսգրքի 177 հոդվածի 3-րդ մասի 1.1 կետով առաջադրված մեղադրանքում իրեն մեղավոր է ճանաչել, իսկ 178 հոդվածի 1-ին մասով իրեն մեղավոր չի ճանաչել և ցուցմունք է տվել այն մասին, որ նախաքննութան ընթացքում մեղքը մասնակի խոստովանելը եղել է անխելքության և իր ընտանիքի մոտ պատիվը չգցելու պատճառով: 2012 թվականի օգոստոսի 25-ին ժամը 21:00-ի սահմաններում ինքը գտնվել է Երևան քաղաքի Տերյան փողոցում գտնվող ՙԱՅՍ՚ ակումբում: Քանի որ ակումբի համար նարգիլեի ածուխ է անհրաժեշտ եղել, ժամը 22:15-ի սահմաններում ինքը մոտեցել է Թահերե Բարաթիին, նրանից վերցրել նրա ավտոմեքենայի բանալիները, դուրս է եկել ակումբից, ավտոմեքենայի բեռնախցիկից հանել նարգիլեի համար նախատեսված ածուխը, այնուհետև ավտոմեքենայի նստատեղերի մեջտեղից վերցրել է Թահերե Բարաթիի բնակարանի բանալին, այն հանձնել Ալիրեզա Հասնիին և Փեյման Բախշիին: Իրենք նախապես չեն պլանավորել Թահերե Բարաթիի բնակարանից գողություն կատարել, սակայն հետո երեքով` ինքը, Ալիրեզա Հասսանին և Փեյման Բախշին, համաձայնության են եկել Թահերե Բարաթիի բնակարանից գողություն կատարելու շուրջ: Գողացված գումարից կոնկրետ մասնաբաժիններ չեն առանձնացրել, դրա մի մասը ծախսել են երեքով, իսկ մնացած գումարի մի մասը փոխանցել են Թահերե Բարաթիի քրոջ հաշվեհամարին, իսկ մյուս մասը, երբ Մեհդի Ջամուռը գնացել է Իրան, վերադարձրել են նրան: Թ.Բարաթիից 20.000 ՀՀ դրամ գումարը և բջջային հեռախոսը վերցրել է ինքը` Ալիրեզա Հասսանիին օգնություն ցույց տալու պատրվակով, սակայն ինքը դրանք չի վերցրել հափշտակելու նպատակով, քանի որ գումարն ու հեռախոսը մեծ արժեք չեն ունեցել: Այդ պահին չի ունեցել ոչ հեռախոսի, ոչ էլ 20.000 ՀՀ դրամ գումարի կարիք: Սուտ տեղեկություններ է հայտնել այն նպատակով, որպեսզի իր կողմից ակումբից դուրս գալը բնական թվա: Զղջում է իր կողմից կատարված արարքի, ինչպես նաև նախաքննության ժամանակ իր մեղավորությունը չընդունելու համար:
Ամբաստանյալ` Փեյման Էբրահիմի Բախշին ՀՀ քրեական օրենսգրքի 177 հոդվածի 3-րդ մասի 1.1 կետով առաջադրված մեղադրանքում իրեն մեղավոր է ճանաչել և ցուցմունք տվել այն մասին, որ իրենք որոշել են, որ 2012 թվականի օգոստոսի 24-ին Մեհրդատը մեկ ժամ ավելի շուտ պետք է գնա ակումբ, որ նարգիլեները կարգավորի, հետո միանգամից իրենց մտքով անցել է այդ գործն անել` ինքը, Ալիրեզա Հասսանին և Մեհրդատ Կազեմի Սանին որոշել են Թահերե Բարաթիի բնակարանից գողություն կատարել: Մեհրդատը ինչ-որ պատճառաբանությամբ Թահերե Բարաթիից վերցրել է ավտոմեքենայի բանալին, որպեսզի տեսնի տան բանալիներն այնտեղ են, թե ոչ: Ինքն ու Ալիրեզա Հասսանին ևս չեն իմացել բանալիները ավտոմեքենայի մեջ են, թե ոչ: Մոտ մեկուկես ժամ անց, երբ ինքը Ալիրեզա Հասսանիի հետ գտնվել է Հանրապետության հրապարակում, Մեհրդատ Կազեմի Սանին զանգել է իրեն և ասել, որ բանալիներն իր մոտ են և իրենք կարող են գնալ վերցնել: Դրանից հետո ինքն ու Ալիրեզա Հասսանին տաքսի են վերցրել, գնացել են ակումբի մոտ, մի քանի րոպե անց Մեհրդատը մոտեցել և բանալիները հանձնել է իրենց: Թահերե Բարաթիի բնակարանի հասցեն իմացել են թե ինքը, թե Ալիրեզա Հասսանին և ավտոմեքենայով գնացել են Թահերե Բարաթիի տան մոտ: Ինքը սպասել է ներքևում, իսկ Ալիրեզա Հասսանին մուտք է գործել բնակարան` պայմանավորվելով, որ եթե ինչ-որ ծանոթ մարդ հանդիպի ինքը պետք է զանգահարի ու տեղեկացնի Ալիրեզա Հասսանիին: Մոտ 15-20 րոպե անց Ալիրեզա Հասսանին դուրս է եկել Թահերե Բարաթիի տանից և ասել, որ որոշ գումար է վերցրել Թահերե Բարաթիի դարակից ու Մեհդի Ջամուռի պայուսակից, սակայն կոնկրետ գումարի չափը չի հիշել: Գողացված գումարը իրանական գումարով մոտավորապես եղել է 6.000.000 թուման: Դրանից հետո իրենք գնացել են ակումբի մոտ, զանգել Մեհրդատ Կազեմի Սանիին, վերջինս միացել է իրենց: Մինչ Թահերե Բարաթիի բնակարան մտնելն իրենք հստակ չեն իմացել բնակարանում գումար կա, թե ոչ և ծրագրած չեն եղել, թե ինչ պետք է անեն դրանից հետո, բայց, քանի որ վախեցել են, որ Ալիրեզա Հասսանիի մատնահետքերը հնարավոր է մնացած լինեն բնակարանում, որոշել են հենց այդ գիշեր մեկնել Իրան: Այդ նպատակով ինքն ու Ալիրեզա Հասսանին գնացել են իրենց տուն` իրերը հավաքելու, իսկ Մեհրդատ Կազեմի Սանին պետք է ինչ-որ պատճառաբանությամբ դուրս գար ակումբից, որպեսզի իրար հետ մեկնեին Իրան: Գողացված գումարն իրենք իրար մեջ չեն բաժանել: Իր պատիվը չգցելու համար որոշել է ասել, որ հանցագործությունը կատարել է Ալիրեզա Հասսանին` միայնակ: Ներողություն է խնդրել դատարանի դահլիճում գտնվողներից և խդրել է դատարանից կիառել առավել մեղմ պատիժ:
Ամբաստանյալներ Մեհրդատ Յաղուբալի Կազեմի Սանիի` ՀՀ քրեական օրենսգրքի 177 հոդվածի 3-րդ մասի 1.1 կետով, ՀՀ քրեական օրենսգրքի 178 հոդվածի 1-ին մասով և Փեյման Էբրահիմի Բախշիի` ՀՀ քրեական օրենսգրքի 177 հոդվածի 3-րդ մասի 1.1 կետով կատարած արարքները հիմնավորվել են նաև հետևյալ ապացույցներով.
Տուժող` Թահերե Ղոլամհասանի Բարաթիի ցուցմունքով այն մասին, որ ինքը աշխատեցնում է Երևան քաղաքի Տերյան փողոցի վրա գտնվող ՙԱՅՍ՚ ակումբը: 2012 թվականի օգոստոսի 25-ին ժամը 21:00-ի սահմաններում դուրս է եկել բնակարանից և, նստելով իրեն պատկանող ՙՖոլկսվագեն Գոլֆ՚ մակնիշի ավտոմեքենան, մեկնել է Երևան քաղաքի Տերյան փողոցի վրա գտնվող ՙԱՅՍ՚ ակումբը: Հասնելով ակումբ` բնակարանի բանալիները սովորության համաձայն թողել է ավտոմեքենայի դիմացի երկու նստատեղերի արանքում և, փակելով ավտոմեքենայի դռները մուտք է գործել ակումբ: Մոտ 30 րոպե անց իրեն է մոտեցել Մեհրդատ Կազեմի Սանին և հայտնել, որ նարգիլեի համար ածուխ է անհրաժեշտ ու, քանի որ ածուխը գտնվել է իր ավտոմեքենայի բեռնախցիկում, ինքը Մ.Կազեմի Սանիին տրամադրել է ավտոմեքենայի բանալիները: Մեհրդատ Կազեմի Սանին վերցնելով ավտոմեքենայի բանալիները հեռացել է և մի քանի րոպե անց վերադառնալով ակումբ, վերադարձրել է ավտոմեքենայի բանալիները: Որոշ ժամանակ անց Մեհրդատ Կազեմի Սանին կրկին մոտեցել է իրեն և հայտնել է, որ իր ընկերը` Ալիրեզա Հասսանին, խնդիրներ ունի, վերջինիս դանակահարել են, և թույլտվություն է խնդրել ակումբից հեռանալու համար: Միաժամանակ, հայտնել է, որ իր հեռախոսի մեջ գումար չկա և խնդրել է, որպեսզի իրեն տրամադրի իր բջջային հեռախոսը, ինչպես նաև 20.000 ՀՀ դրամ գումար` ծախսերը հոգալու համար: Իրենից վերցնելով բջջային հեռախոսը և 20.000 ՀՀ դրամ գումար` Մ.Կազեմի Սանին հեռացել է ակումբից: Մի քանի ժամ անց ինքը զանգահարել է իր բջջային հեռախոսին, որը տրամադրած է եղել Մ.Կազեմի Սանիին, ու հարցրել է, թե ինչ է պատահել, օգնության կարիք ունեն, թե ոչ, իսկ Մ.Կազեմի Սանին պատասխանել է, որ օգնության կարիք չունեն, ինքը Փեյման Բախշին և Ալիրեզա Հասսանին գտնվում են իրենց ընկերոջ բնակարանում և ինքը երկու ժամից կվերադարձնի բջջային հեռախոսը: Դրանից մի քանի ժամ անց ինքը կրկին զանգահարել է Մեհրդատ Կազեմի Սանիին, սակայն վերջինս սկսել է չպատասխանել հեռախոսազանգերին: Ժամը 05:00-ի սահմաններում ինքը և Մեհդի Ջամուռը փակել են ակումբը և, նստելով իրեն պատկանող ՙՖոլկսվագեն Գոլֆ՚ մակնիշի ավտոմեքենան, գնացել են տուն: Հասնելով շենքի մոտ` ինքը ցանկացել է վերցնել բնակարանի բանալիները, սակայն դրանք բացակայել են ավտոմեքենայի միջից, ինչի պատճառով այդ օրը գիշերել են իրենց ընկերոջ բնակարանում: Հաջորդ օրը ինքը պարզել է բնակարանի սեփականատիրոջ հեռախոսահամարը, զանգահարել է վերջինիս, որն էլ հայտնել է, որ բացակայում է քաղաքից և կվերադառնա երեկոյան ժամը 20:00-ի սահմաններում: Բնակարանի սեփականատիրոջ վերադառնալուց հետո` ժամը 20:00-ի սահմաններում, վերջինիս հետ մտնելով բնակարան և զննելով բնակարանը, նկատել են, որ բնակարանի ննջասենյակի պահարանից բացակայում են իրեն պատկանող 3000 ԱՄՆ դոլար գումարը և Մեհդի Ջամուռին պատկանող 1.100 ԱՄՆ դոլար գումարը: Հասկանալով, որ բնակարանից գողություն է կատարվել, իրենք զանգահարել են ոստիկանություն: Հաջորդ օրը Մեհդի Ջամուռի բջջային հեռախոսահամարին Իրանի Իսլամական Հանրապետությունից իրանական հեռախոսահամարից հաղորդագրություններ են ուղարկվել իր բջջային հեռախոսահամարին: Սկզբնական շրջանում ինքը և Մեհդի Ջամուռը կարծել են, որ հաղորդագրությունն ուղարկել է Ալիրեզա Հասսանին, սակայն հետագայում պարզ է դարձել, որ դրանք ուղարկել է Փեյման Բախշին: Հաղորդագրությունների մեջ նշված է եղել, որ իրենք զղջացել են կատարածի համար, ներողություն են խնդրել և պարտավորվել են վերադարձնելգողացված գումարն ու հարցրել են, թե որքան գումարն է պատկանել իրեն և որքանը` Մեհդի Ջամուռին: Այդ հաղորրդագրությունները ստանալուց հետո իրենց համար պարզ է դարձել, որ իր բնակարանից 4100 ԱՄՆ դոլար գումարի գողությունը կատարել են Մեհրդատ Կազեմին, Փեյման Բախշին և Ալիրեզա Հասսանին: Այնուհետև, մոտ երկու ամիս անց Մեհդի Ջամուռը մեկնել է ԻԻՀ, հանդիպել է Մեհրդատ Կազեմիի, Փեյման Բախշիի և Ալիրեզա Հասսանիի հետ, վերջիններս ներողություն են խնդրել կատարված գողության համար և պարտավորվել են վերադարձնել գումարը: Մեհդի Ջամուռը այցելել է Փեյման Բախշիի բնակարան, այնտեղ հանդիպել է Փեյման Բախշիի, Մեհրդատ Կազեմի Սանիի և Փեյման Բախշիի մոր` Զեյնաբ Մահմուդիյանի հետ: Հանդիպման ժամանակ Զ.Մահմուդիյանը Մեհդի Ջամուռին է տրամադրել մոտ 1.950.000 թուման, իսկ մոտ 2.000.000 թուման գումար էլ ուղարկել է իր քրոջ հաշվեհամարին, ներողություն է խնդրել տղաների կատարած արարքի համար և հայտնել է, որ մնացած գումարը` 1.850.000 թումանը կվերադարձնի մեկ շաբաթվա ընթացքում: Փեյման Բախշին վերադարձրել է նաև Մեհրդատ Կազեմի Սանիի կողմից խարդախությամբ հափշտակած բջջային հեռախոսը և 20.000 ՀՀ դրամ գումարը: Սպասելով մեկ շաբաթ ու տեսնելով, որ Զեյնաբ Մահմուդիյանը խոստացած գումարը չի ուղարկում, ինքը զանգահարել է վերջինիս, սակայն Զեյնաբ Մահմուդիյանը հայտնել է, որ իր որդու` Փեյման Բախշիի մասնաբաժինը ինքը վերադարձրել է և այլևս գումար չունի տալու, մնացած գումարը պետք է վերադարձնեն Մեհրդատ Կազեմի Սանին և Ալիրեզա Հասսանին: Ինքը վստահ է եղել, որ իր բնակարանից կատարված 4100 ԱՄՆ դոլար գումարի գողությունը կատարել են Մեհրդատ Կազեմի Սանին, Փեյման Բախշին և Ալիրեզա Հասսանին, քանի որ Մեհրդատ Կազեմի Սանին իր ավտոմեքենայի միջից վերցրել է բնակարանի բանալիները, իսկ Փեյման Բախշին գողությունից մոտ մեկ շաբաթ առաջ գիշերել է իր բնակարանում, հաջորդ օրը առավոտյան ինքը և Մեհդի Ջամուռը, Փեյման Բախշիի վրա փակելով բնակարանի դուռը, հեռացել են բնակարանից իրենց գործերով և այդ ընթացքում էլ Փեյման Բախշին հնարավորություն է ունեցել զննելու բնակարանն ու պարզելու, թե որտեղ է գտնվել գումարը: Դա հիմնավորվել է նաև նրանով, որ երբ ինքը 26.08.2012 թվականին ժամը 20:00-ի սահմաններում մուտք է գործել բնակարան, բնակարանում որևէ իր ձեռք տված չի եղել և բացակայել է միայն բնակարանի ննջասենյակի պահարանում պահված գումարը, այսինքն` գողությունը կատարող անձինք կոնկրետ տեղյակ են եղել, թե որտեղ է պահվում գումարները: Իրեն պատճառված վնասի մի մասը` 2.000.000 թումանը նախաքննության ընթացքում վերադարձրել են իրեն, իսկ մնացած մասը` մոտ 1.850.000 թումանը վերականգնվել է գործի դատաքննության ընթացքում, ուստի ամբաստանյալների նկատմամբ բողոք և քաղաքացիական հայցի պահանջ չունի:
Տուժող` Մեհդի Մուհամադխալի Ջամուռի ցուցմունքով այն մասին, որ ինքը նախկինում բնակվել է Փեյման Բախշիի, Մեհրդատ Կազեմի Սանիի և Ալիրեզա Հասսանիի հետ: Ինքը տվյալ բնակարանում ունեցել է 1100 ԱՄՆ դոլար գումար և քանի որ վերը նշված երեք անձինք այդ բնակարան անընդհատ հյուրեր են բերել, որոշել է իր գումարը պահել Թահերե Բարաթիի բնակարանում: 2012 թվականի օգոստոսի 25-ին ինքը Թ.Բարաթիի հետ միասին գտնվել են Երևան քաղաքի ՙԱՅՍ՚ ակումբում: Ակումբում գտնվելու ժամանակ Մեհրդատ Կազեմի Սանին մոտեցել է Թ.Բարաթիին և նրանից խնդրել է ավտոմեքենայի բանալիները, որպեսզի բեռնախցիկից նարգիլեի համար ածուխ բերի: Որոշ ժամանակ անց վերադարձել է ակումբ և հետ է վերադարձրել բանալիները: Այնուհետև` 30 րոպե անց, մոտեցել է Թ.Բարաթիին և հայտնել է, որ իր ընկերոջ բնակարանում են, որից հետո բջջային հեռախոսը գտնվել է անհասանելի վիճակում: 26.08.2012 թվականին պարզ է դարձել, որ Թ.Բարաթիի բնակարանից կատարվել է գողություն, որտեղից գողացվել է իրեն պատկանող 1100 ԱՄՆ դոլար գումարը և Թ.Բարաթիին պատկանող 3000 ԱՄՆ դոլար գումարը: Գողությունից մեկ օր անց իր բջջային հեռախոսահամարին հաղորդագրություններ են ուղարկվել ԻԻՀ-ից: Սկզբնական շրջանում ինքը կարծել է, որ հաղորդագրությունները ուղարկել է Ալիրեզա Հասսանին, սակայն հետագայում խոսքերից պարզ է դարձել, որ հաղորդագրություններն ուղարկել է Փեյման Բախշին: Հաղորդագրությունների մեջ վերջինս հետաքրքրվել է, թե որքան գումարն է եղել իրենը, որքանը` Թ.Բարաթիինը: Քանի որ Փեյման Բախշին իրենց շատ է օգնել այդ գործում, ինքը մտածել է, որ գողությունը չէր կարող կատարված լինել վերջինիս կողմից: Գողությունից մի քանի օր անց ինքը մեկնել է ԻԻՀ, ռեստորանում հանդիպել է Փեյման Բախշիին, Մեհրդատ Կազեմի Սանին, Ալիրեզա Հասսանիին: Նրանք իրենից ներողություն են խնդրել և հայտնել են, որ պարտավորվում են վերադարձնել իրենցից գողացված գումարը: Որոշ ժամանակ անց ռեստորանից հեռացել է Ալիրեզա Հասսանին և իրենք Մեհրդատ Կազեմի Սանի և Փեյման Բախշիի հետ միասին վերջիններիս խնդրանքով գնացել են Փեյման Բախշիի բնակարան: Բնակարանում է գտնվել Փեյման Բախշիի մայրը` Զեյնաբ Մահմուդիյանը, և վերջինս իրեն է տվել 1.950.000 թուման գումար, մոտ այդքան էլ մինչ հանդիպումը ուղարկել է Թ.Բարաթիի քրոջ հաշվեհամարին: Գումարը տալու ժամանակ ինքը ստացական է գրել ու հանձնել է Զ.Մահմուդիյանին: Վերջինս խոստացել է մնացած գումարը վերադարձնել մեկ շաբաթվա ընթացքում: Զ.Մահմուդիյանը ներողություն է խնդրել տղաների կատարած արարքի համար: Այդ ժամանակ իրեն վերադարձրել են նաև Թ.Բարաթիից խարդախությամբ հափշտակած բջջային հեռախոսը և 20.000 ՀՀ դրամ գումարը, որը եղել է Զ.Մահմուդիյանի վերադարձրած գումարի մեջ: Ինքը վերադարձել է Հայաստանի Հանրապետություն: ԻԻՀ-ում գտնվելու ժամանակ հանդիպել է Ալիրեզա Հասսանիի հետ: Վերջինս պատմել է, որ գողությունը կատարելիս ինքը եղել է բնակարանում Փեյման Բախշիի հետ, իսկ Մեհրդատ Կազեմի Սանին ավտոմեքենա է բերել, որպեսզի հեռանան բնակարանից: Մեկ շաբաթ անց Թ.Բարաթին զանգահարել է Զ.Մահմուդիյանին, սակայն վերջինս հայտնել է, որ ինքը այլևս գումար չունի և որևէ գումար չի կարող վերադարձնել, բացի այդ ինքը վերադարձրել է իր որդու` Փեյման Բախշիի մասնաբաժինը, իսկ մնացած գումարը պետք է վերադարձնեն Մեհրդատ Կազեմի Սանին և Ալիրեզա Հասսանին: Իրեն պատճառված վնասն ամբողջությամբ վերականգնվել է նախաննության ընթացքում, ուստի ամբաստանյալների նկատմամբ բողոք և քաղաքացիական հայցի պահանջ չունի:
Վկա` Զեյնաբ Մահմուդիյանի ցուցմունքով այն մասին, որ հանդիսանում է Փեյման Բախշիի մայրը և բնակվում է ԻԻՀ Թեհրան քաղաքում: Ալիրեզա Հասսանիին և Մեհրդատ Կազեմի Սանիին ճանաչել է սույն գործի շրջանակներում: Ինքը նախկինում չի ճանաչել տուժողներ Թահերե Բարաթիին և Մեհդի Ջամուռին, միայն հեռախոսով է խոսել Մեհդի Ջամուռի հետ: 2012 թվականի հունիս ամսվա սկզբին իր որդին Մեհրդատի հետ միասին զբոսաշրջության և ակումբում աշխատելու նպատակով եկել է Հայաստան: Հայաստանում գտնվելու ժամանակ ինքն ամեն օր խոսել է իր որդու հետ: 2012 թվականի օգոստոսի 24-ին երեկոյան կողմ հեռախոսազրույց է ունեցել Փեյման Բախշիի հետ, վեջինս ասել է, որ վերադառնում է Իրան և ասել է, որ հարսանիքի պետք է մասնակցեն: Իր տղան երբևէ իրեն սուտ չի ասել: 2012 թվականի օգոստոսի վերջերին Փեյման Բախշին Մեհրդատ Կազեմի Սանիի հետ վերադարձել է Իրան և մոտ 2-3 օր անց ինքը լսել է, որ իր որդին ինչ-որ գողության հետ կապված հեռախոսազրույց է ունեցել տուժողների հետ, ինքն իր որդուն հարցրել է արդյոք նա կապ ունի գողության հետ, վերջինս էլ պատասխանել է, որ կապ չունի: Ինքը տեղյակ չէ, թե ով է Թահերե Բարաթիի բնակարանից կոնկրետ գողություն կատարել, սակայն վստահ է եղել, որ իր որդին առնչություն չի ունեցել գողության հետ, գիտի միայն, որ գողացված գումարն իրեն է հանձնել Ալիրեզա Հասսանին: Ինքը հաղորդագրություն է ուղարկել տուժողներից մեկին, սակայն չի հիշում Մեհդի Ջամուռին, թե Թահերե Բարաթիին, բայց հիշում է, որ հեռախոսազրույց ունեցել է Մեհդի Ջամուռի և Թահերե Բարաթիի հետ և նրանց զանգահարել է իր հեռախոսահամարից: Իր տղան կապի մեջ է եղել տուժողների հետ, իսկ Ալիրեզա Հասսանին և Մեհրդատ Կազեմի Սանին կապի մեջ եղել են, թե ոչ` տեղյակ չէ: Հայաստանից վերադառնալու օրը Ալիրեզա Հասսանին և Մեհրդատ Կազեմի Սանին իրենց տուն են եկել, մեկ անգամ էլ եկել են իրենց տուն, երբ ինքն իմացել է գողության մասին և մեկ անգամ էլ` գումարը փոխանցելու ժամանակ: Երբ Կազեմի Սանին և Ալիրեզա Հասսանին գնացել են իրենց տանից, իր որդի Փեյման Բախշին իրեն պատմել է հանցանքի մասին: Փեյման Բախշին իրեն ասել է որ սահմանից անցնելու ժամանակ Ալիրեզա Հասսանիի մոտ տեսել է մեծ գումար ու երբ հարցրել է, թե որտեղից նրան այդ գումարը նա պատասխանել է, որ գողացել է: Ալիրեզա Հասսանին իր որդուն գումար չի տվել: Ինքը հեռախոսով զրուցել է և Թահերե Բարաթիի, և Մեհդի Ջամուռի հետ: Քանի որ ինքը տեղեկացվել է, որ իր որդին գողության հետ կապ չի ունեցել, խոսել է միայն Ալիրեզա Հասսանիի և Մեհրդատ Կազեմի Սանիի հետ և նախատել է վերջիններիս գողություն կատարելու համար: Երբ իր տղան ասել է, որ Ալիրեզան գումար է գողացել, ինքը չի հարցրել որտեղից և ինչպես` մտածելով, որ դա կատակ է եղել: Ալիրեզային ինքն է կանչել իրենց տուն, որպեսզի ճշտի գողության մանրամասները: Երբ Ալիրեզա Հասսանին եկել է իրենց տուն, Փեյման Բախշին և Կազեմի Սանի եղել են տանը: Մինչև Ալիրեզա Հասսանիին կանչելը` ինքը տուժողների հետ չի խոսել, միայն խոսել է իր որդու` Փեյման Բախշիի հետ: Ալիրեզան չի ասել իրեն, որ գողություն է արել, բայց քանի որ խնդրել է, որ Մեհդի Ջամուռին չթողնի գնալ իրենց տուն և ասել է, որ գումարը կբերի կտա իրեն, մտածել է, որ գողությունը կատարել է Ալիրեզա Հասսանին: Չի հիշում ինքը հարցրել է գողության մեջ իր որդու մասնակցության մասին, թե ոչ, քանի որ վստահ է եղել, որ նա առնչություն չի ունեցել գողության հետ: 2012 թվականի սեպտեմբերի 11-ին իրենց տուն է եկել Մեհդի Ջամուռը` գողացված գումարը վերցնելու համար, որը նրան է տվել Ալիրեզա Հասսանին: Մեհդի Ջամուռը զրույցի ընթացքում ասել է որ բանալին Մեհրդատ Կազեմի Սանին է վերցրել: Ինքն անձամբ ներողություն է խնդրել Մեհդի Ջամուռից: Մոտ 2.000.000 թուման տրվել է Մեհդի Ջամուռին, այդքան էլ փոխանցել է տիկին Բարաթիին: Ալիրեզան իրեն, ընդհանուր առմամբ, տվել է 4.000.000 թուման գումար, առավոտյան 2.000.000 թումանը փոխանցել է տիկին Բարաթիին և Մեհդի Ջամուռին: Ինքը Կազեմի Սանիից ոչ մի գումար չի վերցրել, իրեն գումար տվել է միայն Ալիրեզա Հասսանին: Ինքը Մեհդի Ջամուռից բողոք է ստացել, որում բոլոր երեքի անուններն են եղել և իր հարցին, թե ինչու է նրանց անունները գրել բողոքում Մեհդի Ջամուռը պատասխանել է, որ դա իր գումարները վերադարձնելու համար է արել: Ինքը տեղյակ չի եղել Կազեմի Սանիի կողմից հեռախոս և գումար վերցնելու մասին, իրեն ոչինչ չեն ասել:

Դատահամակարգչային փորձաքննության թիվ 12-3760 եզրակացությամբ այն մասին, որ փորձաքննությանը ներկայացված ՙLG gx500՚ մակնիշի բջջային հեռախոսի ՙimei՚ անհատականացման արժեքներն են ՙ539784031322635՚, ՙ359890031322626՚: Փորձաքննությանը ներկայացված ՙLG gx500՚ մակնիշի բջջային հեռախոսի հիշողության մեջ` կարճ հաղորդագրությունների ցանկում առկա են թվով 173 հաղորդագրություններ, հեռախոսային գրքույկում առկա են թվով 136 գրառումներ, իսկ վերջին զանգերի ցանկում առկա տեղեկատվությունը չհաջողվեց վերլուծել: Հեռախոսի հիշողության մեջ գործածողի կողմից ստեղծված ֆայլեր չհայտնաբերվեցին: Բջջային հեռախոսի հիշողության տեղեկատվության վերականգնման աշխատանքներ ներկայումս չեն կատարվում` համապատասխան մեթոդիկաների և տեխնիկական միջոցների բացակայության պատճառով: Փորձաքննությանը ներկայացված ՙLG gx500՚ մակնիշի բջջային հեռախոսի մեջ առկա ՙvivacell՚, ՙprepaid՚, ՙ8937493309046262659՚ գրառումներով հեռախոսային քարտի մեջ` կարճ հաղորդագրությունների ցանկում հաղորդագրությունները բացակայում են, հեռախոսային գրքույկում առկա է թվով մեկ գրառում, վերջին զանգերի ցանկում գրառումները բացակայում են:
Քրեական գործով ապացույց ճանաչված Մեհդի Ջամուռից առգրավված ՙLG gx500՚ մոդելի բջջային հեռախոսով, համակարգչատեխնիկական փորձաքննությունից ստացված եզրակացության թարգմանությամբ, որպես այլ ապացույց ճանաչված և ԻԻՀ դեսպանատնից ուղարկված նամակում առկա փաստաթղթերով:
ՀՀ-ում ԻԻՀ դեսպանության հյուպատոսական բաժնի ղեկավար` Հոսեյն Մանուչեհրիի կողմից հաստատված` տուժող Թահերե Բարաթիի կողմից 2013 թվականի դեկտեմբերի 23-ին դատարան ներկայացված դիմումով այն մասին, որ. ՙՀայտնում եմ, որ ես` Թահերե Բարաթիս /անձնագիր` 18445797/, 2013 թվականի դեկտեմբերի 23-ին Փեյման Բախշիից, Մեհրդատ Քազեմի Սանիից և Ալիռեզա Հասանիից ամբողջովին ստացա ինձ պատճառված վնասի գումարը և այլևս որևէ պարտք և բողոք չունեմ նրանցից՚:
ՀՀ-ում ԻԻՀ դեսպանության հյուպատոսական բաժնի ղեկավար` Հոսեյն Մանուչեհրիի կողմից հաստատված` տուժող Մեհդի Ջամուրի կողմից 2013 թվականի դեկտեմբերի 23-ին դատարան ներկայացված դիմումով այն մասին, որ. ՙՀայտնում եմ, որ ես` Թահերե Բարաթիս /անձնագիր` 23389168/, 2013 թվականի դեկտեմբերի 23-ին Փեյման Բախշիից, Մեհրդատ Քազեմի Սանիից և Ալիռեզա Հասանիից ամբողջովին ստացա ինձ պատճառված վնասի գումարը և այլևս որևէ պարտք և բողոք չունեմ նրանցից՚:
Դատարանը, հետազոտելով քրեական գործով ձեռք բերված ապացույցները և գնահատելով դրանց վերաբերելիության, թույլատրելիության, իսկ ամբողջ ապացույցներն իրենց համակցությամբ գործի լուծման համար բավարարության տեսանկյունից, հանգում է այն հետևության, որ ամբաստանյալ Մեհրդատ Յաղուբալի Կազեմի Սանին ՀՀ քրեական օրենսգրքի 178 հոդվածի 1-ին մասով առաջադրված մեղադրանքում իրեն մեղավոր չճանաչելը նպատակ է հետապնդում խույս տալ քրեական պատասխանատվությունից ու պատժից և նրա մեղավորությունը ՀՀ քրեական օրենսգրքի 178 հոդվածի 1-ին մասով նախատեսված հանցանք կատարելու մեջ ապացուցված է ինչպես իր իսկ դատաքննական ցուցմունքով այն մասին, որ Թ.Բարաթիից 20.000 ՀՀ դրամ գումարը և բջջային հեռախոսը վերցրել է ինքը` Ալիրեզա Հասսանիին օգնություն ցույց տալու պատրվակով, սուտ տեղեկություններ է հայտնել այն նպատակով, որպեսզի իր կողմից ակումբից դուրս գալը բնական թվա, այնպես էլ տուժող Թահերե Ղոլամհասանի Բարաթիի նախաքննական ու դատաքննական ցուցմունքներով այն մասին, որ Մեհրդատ Կազեմի Սանին մոտեցել է իրեն և հայտնել է, որ իր ընկերը` Ալիրեզա Հասսանին, խնդիրներ ունի, վերջինիս դանակահարել են, և թույլտվություն է խնդրել ակումբից հեռանալու համար, միաժամանակ, հայտնել է, որ իր հեռախոսի մեջ գումար չկա և խնդրել է, որպեսզի իրեն տրամադրի իր բջջային հեռախոսը, ինչպես նաև 20.000 ՀՀ դրամ գումար` ծախսերը հոգալու համար և իրենից վերցնելով բջջային հեռախոսն ու 20.000 ՀՀ դրամ գումարը` Մ.Կազեմի Սանին հեռացել է ակումբից: Մի քանի ժամ անց ինքը զանգահարել է իր բջջային հեռախոսին, որը տրամադրած է եղել Մ.Կազեմի Սանիին, ու հարցրել է, թե ինչ է պատահել, օգնության կարիք ունեն, թե ոչ, իսկ Մ.Կազեմի Սանին պատասխանել է, որ օգնության կարիք չունեն, ինքը Փեյման Բախշին և Ալիրեզա Հասսանին գտնվում են իրենց ընկերոջ բնակարանում և ինքը երկու ժամից կվերադարձնի բջջային հեռախոսը, իսկ դրանից մի քանի ժամ անց ինքը կրկին զանգահարել է Մեհրդատ Կազեմի Սանիին, սակայն վերջինս սկսել է չպատասխանել հեռախոսազանգերին, ինչպես նաև այն հանգամանքով, որ Մեհրդատ Յաղուբալի Կազեմի Սանին տեղյակ լինելով, որ իր ընկերոջ` Ալիրեզա Հասսանիի հետ կապված որևէ խնդիր, այդ թվում նաև գումարային խնդրի չկա և նրան օգնելու անհրաժեշտություն ևս չկա, խաբեությամբ վերցրել է տուժող Թահերե Ղոլամհասանի Բարաթիի 15.000 ՀՀ դրամ արժողությամբ ՙLG՚ մոդելի բջջային հեռախոսը և 20.000 ՀՀ դրամ գումար ու հեռացել ակումբից:
Դատարանն արժանահավատ չի համարում նաև վկա Զեյնաբ Մահմուդիյանի նախաքննական ու դատաքննական ցուցմունքերն այն մասին, որ Ալիրեզա Հասսանիին և Մեհրդատ Կազեմի Սանիին ճանաչել է սույն գործի շրջանակներում: 2012 թվականի հունիս ամսվա սկզբին իր որդին Մեհրդատի հետ միասին զբոսաշրջության և ակումբում աշխատելու նպատակով եկել է Հայաստան: 2012 թվականի օգոստոսի վերջերին Փեյման Բախշին Մեհրդատ Կազեմի Սանիի հետ վերադարձել է Իրան և մոտ 2-3 օր անց ինքը լսել է, որ իր որդին ինչ-որ գողության հետ կապված հեռախոսազրույց է ունեցել տուժողների հետ, ինքն իր որդուն հարցրել է արդյոք նա կապ ունի գողության հետ, վերջինս էլ պատասխանել է, որ կապ չունի: Ինքը տեղյակ չէ, թե ով է Թահերե Բարաթիի բնակարանից կոնկրետ գողություն կատարել, վստահ է եղել, որ Փեյման ԲԱխշին առնչություն չի ունեցել գողության հետ, գիտի միայն, որ գողացված գումարն իրեն է հանձնել Ալիրեզա Հասսանին, և գտնում է, որ վկա Զեյնաբ Մահմուդիյանի ցուցմունքները նպատակ են հետապնդում օգնելու իր որդուն` ամբաստանյալ Փեյման Բախշիին խույս տալ քրեական պատասխանատվությունից ու պատժից և նրա ցուցմունքը ժխտվում է իր իսկ նախաքննական ցուցմունքով այն մասին, որ ճանաչում է Ալիրեզա Հասսանիին և Մեհրդատ Կազեմի Սանիին` որպես իրենց թաղամասի բնակիչների, ինչպես ամբաստանյալ Փեյման Բախշիի ինքնախոստովանական ցուցմունքով այն մասին, որ ինքը, Ալիրեզա Հասսանին և Մեհրդատ Կազեմի Սանին որոշել են Թահերե Բարաթիի բնակարանից գողություն կատարել: Մեհրդատը ինչ-որ պատճառաբանությամբ Թահերե Բարաթիից վերցրել է ավտոմեքենայի բանալին, որպեսզի տեսնի տան բանալիներն այնտեղ են, թե ոչ, մոտ մեկուկես ժամ անց, երբ ինքը Ալիրեզա Հասսանիի հետ գտնվել է Հանրապետության հրապարակում, Մեհրդատ Կազեմի Սանին զանգել է իրեն և ասել, որ բանալիներն իր մոտ են և իրենք կարող են գնալ վերցնել: Դրանից հետո ինքն ու Ալիրեզա Հասսանին տաքսի են վերցրել, գնացել են ակումբի մոտ, մի քանի րոպե անց Մեհրդատը մոտեցել և բանալիները հանձնել է իրենց, որից հետո ինքը և Ալիրեզա Հասսանին ավտոմեքենայով գնացել են Թահերե Բարաթիի տան մոտ, որտեղ ինքը սպասել է ներքևում, իսկ Ալիրեզա Հասսանին մուտք է գործել բնակարան` պայմանավորվելով, որ եթե ինչ-որ ծանոթ մարդ հանդիպի ինքը պետք է զանգահարի ու տեղեկացնի Ալիրեզա Հասսանիին: Մոտ 15-20 րոպե անց Ալիրեզա Հասսանին դուրս է եկել Թահերե Բարաթիի տանից և ասել, որ որոշ գումար է վերցրել Թահերե Բարաթիի դարակից ու Մեհդի Ջամուռի պայուսակից, սակայն կոնկրետ գումարի չափը չի հիշել: Գողացված գումարը իրանական գումարով մոտավորապես եղել է 6.000.000 թուման: Դրանից հետո իրենք գնացել են ակումբի մոտ, զանգել Մեհրդատ Կազեմի Սանիին, վերջինս միացել է իրենց: Դրանից հետո վախենալով, որ Ալիրեզա Հասսանիի մատնահետքերը հնարավոր է մնացած լինեն բնակարանում, որոշել են հենց այդ գիշեր մեկնել Իրան: Այդ նպատակով ինքն ու Ալիրեզա Հասսանին գնացել են իրենց տուն` իրերը հավաքելու, իսկ Մեհրդատ Կազեմի Սանին պետք է ինչ-որ պատճառաբանությամբ դուրս գար ակումբից, որպեսզի իրար հետ մեկնեին Իրան: Գողացված գումարն իրենք իրար մեջ չեն բաժանել: Իր պատիվը չգցելու համար որոշել է ասել, որ հանցագործությունը կատարել է Ալիրեզա Հասսանին` միայնակ, ինչպես նաև այն հանգամանքով, որ Հայաստանի Հանրապետությունից հեռանալու հաջորդ օրը Փեյման Բախշին Ալիրեզա Հասսանիի բջջային հեռախոսահամարից հաղորդագրություն է ուղարկել Մեհդի Ջամուռի բջջային հեռախոսահամարին, որով հայտնել է, որ իրենք զղջում են կատարածի համար, ներողություն խնդրում և պարտավորվում են վերադարձնել գողացված գումարն ու հարցրել է, թե որքան գումարն է պատկանել Մեհդի Ջամուռին և որքանը` Թահերե Բարաթիին:
Դատաքննությամբ հիմնավորվեց, որ ամբաստանյալ Մեհրդատ Յաղուբալի Կազեմի Սանին մի խումբ անձանց կողմից նախնական համաձայնությամբ բնակարան ապօրինի մուտք գործելով կատարել է ուրիշի գույքի խոշոր չափերով գաղտնի հափշտակություն` գողություն, ինչպես նաև խաբեության և վuտահությունը չարաշահելու եղանակով հափշտակելով ուրիշի զգալի չափերով գույքը, կատարել է խարդախություն.
Դատաքննությամբ հիմնավորվեց, որ ամբաստանյալ Փեյման Էբրահիմի Բախշին մի խումբ անձանց կողմից նախնական համաձայնությամբ բնակարան ապօրինի մուտք գործելով կատարել է ուրիշի գույքի խոշոր չափերով գաղտնի հափշտակություն` գողություն.
Մեհրդատ Կազեմի Սանին, Փեյման Բախշին և Ալիրեզա Հասսանին ուրիշի գույքի գաղտնի հափշտակություն կատրելու դիտավորություն հետապնդելով միմյանց հետ նախնական համաձայնության գալով, կազմակերպելով ու դերաբաշխումները կատարելով, կատարել են գողություն:
Այսպես`
Իրանի Իսլամական Հանրապետության քաղաքացիներ` ամբաստանյալներ Փեյման Էբրահիմի Բախշին, Մեհրդատ Յաղուբալի Կազեմի Սանին և գործով մեղադրյալ Ալիրեզա Բեհռուզի Հասսանին Հայաստանի Հանրապետության Երևան քաղաքի Տերյան փողոցում գտնվող, տուժող Թահերե Ղոլամհասանի Բարաթիին պատկանող ՙԱՅՍ՚ ակումբում աշխատելու նպատակով եկել են Հայաստանի Հանրապետություն: 2012 թվականի օգոստոսի 25-ին ժամը 21:30-ի սահմաններում Մեհրդատ Կազեմի Սանին, Փեյման Բախշին և Ալիրեզա Հասսանին նախնական համաձայնության գալով Թահերե Բարաթիի բնակարանից գողություն կատարելու շուրջ, Թահերե Բարաթիի ավտոմեքենայի բեռնախցիկից իբր նարգիլեի համար նախատեսված ածուխ բերելու պատրվակով Մեհրդատ Յաղուբալի Կազեմի Սանին նրանից վերցրել է վերջինիս պատկանող ՙՖոլկսվագեն Գոլֆ՚ մակնիշի ավտոմեքենայի բանալիները, ավտոմեքենայի բեռնախցիկից ածուխ վերցրել, այնուհետև ավտոմեքենայի դիմացի նստատեղերի մեջտեղի հատվածից գաղտնի վերցրել է նաև Թահերե Բարաթիի բնակության վայր հանդիսացող Երևան քաղաքի Հր.Քոչար 18 շենքի 62 բնակարանի բանալիները, որից հետո ավտոմեքենայի բանալիները վերադարձրել է Թահերե Բարաթիին, իսկ Թահերե Բարաթիի բնակարանի բանալիները տվել է Փեյման Բախշիին ու Ալիրեզա Հասսանին: Դրանից հետո Փեյման Բախշին և Ալիրեզա Հասսանին գնացել են Թահիրե Բարաթիի Երևան քաղաքի Հ.Քոչարի 18 շենքի 62 բնակարանի մոտ, ըստ նախապես ընտրված դերաբաշխումների, Փեյման Բախշին սպասել է ներքևում, որպեսզի ծանոթ մարդու հանդիպելու դեպքում զանգահարի ու տեղեկացնի Ալիրեզա Հասսանիին, իսկ Ալիրեզա Հասսանին բնակարանի դուռը բանալիի օգնությամբ բացելու միջոցով ապօրինի մուտք է գործել Թահերե Բարաթիի բնակարան, և ննջասենյակի պահարանից գաղտնի հափշտակելով Թահերե Բարաթիին պատկանող 1.227.000 ՀՀ դրամին համարժեք 3000 ԱՄՆ դոլար գումար ու գործով տուժող Մեհդի Մուհամադխալի Ջամուռին պատկանող 10.000 ՀՀ դրամ արժողությամբ դրամապանակը, որի մեջ եղել է 449.000 ՀՀ դրամ գումարին համարժեք 1100 ԱՄՆ դոլար գումար, նույն ճանապարհով դուրս է եկել այնտեղից, և հանցագործությունն ավարտին հասցնելուց հետո Փեյման Բախշին ու Ալիրեզա Հասսանին զանգահարել և այդ մասին տեղեկացրել են Մեհրդատ Կազեմի Սանիին: Տեղեկանալով, որ հանցագործությունն ավարտին է հասցվել, որոշ ժամանակ անց Մեհրդատ Կազեմի Սանին կրկին մոտեցել է Թահերե Բարաթիին ու նրան հայտնել է, որ իր ընկերը` Ալիրեզա Հասսանին խնդիրներ ունի, վերջինիս դանակահարել են, և թույլտվություն է խնդրել ակումբից հեռանալու համար: Այնուհետև խաբեությամբ և Թահերե Բարաթիի վստահությունը չարաշահելու եղանակով Մեհրդատ Կազեմի Սանին նրան ստել է` ասելով, թե իր հեռախոսի մեջ գումար չկա, խնդրել է նաև նրա բջջային հեռախոսը, ինչպես նաև 20.000 ՀՀ դրամ գումար` ծախսերը հոգալու համար և Թահերե Բարաթիից վերցնելով 15.000 ՀՀ դրամ արժողությամբ ՙLG՚ մոդելի բջջային հեռախոսն ու 20.000 ՀՀ դրամ գումար` Մեհրդատ Կազեմի Սանին ժամը 22:00-ի սահմաններում հեռացել է ՙԱՅՍ՚ ակումբից և միացել Փեյման Բախշիին ու Ալիրեզա Հասսանիին, որից հետո միասին դիմել են փախուստի` 2012 թվականի օգոստոսի 26-ին ժամը 06:26-ին ՀՀ պետական սահմանի ՙՄեղրի՚ սահմանային անցակետով մեկնել են Հայաստանի Հարնապետությունից: Հաջորդ օրը Փեյման Բախշին Ալիրեզա Հասսանիի բջջային հեռախոսահամարից հաղորդագրություն է ուղարկել Մեհդի Ջամուռի բջջային հեռախոսահամարին, որով հայտնել է, որ իրենք զղջում են կատարածի համար, ներողություն խնդրում և պարտավորվում են վերադարձնել գողացված գումարն ու հարցրել է, թե որքան գումարն է պատկանել Մեհդի Ջամուռին և որքանը` Թահերե Բարաթիին: 2013 թվականի մայիսի 25-ին 06:00- ին ՀՀ ոստիկանության Մեղրիի բաժնի ՔՀԲ աշխատակիցների կողմից Փեյման Բախշին ու Մեհրդատ Կազեմի Սանին հայտնաբերվել ու բերման են ենթարկվել ՀՀ ոստիկանության Արաբկիրի բաժին: Կատարված հանցագործությամբ Թահերե Բարաթիին պատճառվել է 1.227.000 ՀՀ դրամ գումարի գույքային վնաս, իսկ Մեհդի Ջամուռին` 459.000 ՀՀ դրամ գումարի գույքային վնաս, որից 2.000.000 թումանը նախաքննության ընթացքում, իսկ 1.850.000 թումանը դատաքննության ընթացքում վերադարձվել է տուժող` Թահերե Ղոլամհասանի Բարաթիին, իսկ տուժող Մեհդի Մուհամադխալի Ջամուռին պատճառված` 1.850.000 թումանը նախաքննության ընթացքում վերադարձվել է տուժող Մեհդի Մուհամադխալի Ջամուռին:
Այսպիսով, ընդհանուր կարգով սահմանված դատաքննությամբ հետազոտված ապացույցների հիման վրա դատարանն ապացուցված է համարում, որ ամբաստանյալ Մեհրդատ Յաղուբալի Կազեմի Սանին կատարել է ՀՀ քրեական օրենսգրքի 177 հոդվածի 3-րդ մասի 1.1 կետով և ՀՀ քրեական օրենսգրքի 178 հոդվածի 1-ին մասով նախատեսված հանցագործություններ` որպիսի արարքների համար նա պետք է պատասխանատվության ենթարկվի:
Մեհրդատ Յաղուբալի Կազեմի Սանին ենթակա է պատժի կատարած արարքների համար:
Այսպիսով, ընդհանուր կարգով սահմանված դատաքննությամբ հետազոտված ապացույցների հիման վրա դատարանն ապացուցված է համարում, որ ամբաստանյալ Փեյման Էբրահիմի Բախշին կատարել է ՀՀ քրեական օրենսգրքի 177 հոդվածի 3-րդ մասի 1.1 կետով նախատեսված հանցագործություն` որպիսի արարքի համար նա պետք է պատասխանատվության ենթարկվի:
Փեյման Էբրահիմի Բախշին ենթակա է պատժի կատարած արարքի համար:

Դատարանի իրավական վերլուծությունները.

ՀՀ քրեական օրենսգրքի 61 հոդվածի 2-րդ մասի համաձայնª ՙՊատժի տեսակը և չափը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով՚:
Ամբաստանյալ Մեհրդատ Յաղուբալի Կազեմի Սանին անկեղծորեն խոստովանեց և զղջաց կատարած արարքների համար, բնութագրվում է դրականորեն, նախկինում դատապարտված չի եղել, երիտասարդ է:
Որպես ամբաստանյալ Մեհրդատ Յաղուբալի Կազեմի Սանիի պատասխանատվությունը և պատիժը մեղմացնող հանգամանք դատարանը դիտում է հանցագործությամբ պատճառված գույքային վնասը կամովին հատուցելը:
Ամբաստանյալ Մեհրդատ Յաղուբալի Կազեմի Սանիի պատասխանատվությունը և պատիժը ծանրացնող հանգամանքներ չկան:
Ամբաստանյալ Փեյման Էբրահիմի Բախշին անկեղծորեն խոստովանեց և զղջաց կատարած արարքի համար, բնութագրվում է դրականորեն, նախկինում դատապարտված չի եղել, երիտասարդ է:
Որպես ամբաստանյալ Փեյման Էբրահիմի Բախշիի պատասխանատվությունը և պատիժը մեղմացնող հանգամանք դատարանը դիտում է հանցագործությամբ պատճառված գույքային վնասը կամովին հատուցելը:
Ամբաստանյալ Փեյման Էբրահիմի Բախշիի պատասխանատվությունը և պատիժը ծանրացնող հանգամանքներ չկան:
ՀՀ քրեական օրենսգրքի 10-րդ հոդվածի 1-ին մասը սահմանում է` ՙՀանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար՚:
ՀՀ քրեական օրենսգրքի 48-րդ հոդվածի 2-րդ մասը սահմանում է` ՙՊատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61-րդ հոդվածը սահմանում է` ՙՀանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները: (....): Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները:
ՀՀ քրեական օրենսգրքի 62-րդ հոդվածի 1-ին մասի 10-րդ կետը սահմանում է` ՙՊատասխանատվությունը և պատիժը մեղմացնող հանգամանքներ են հանցագործությունից անմիջապես հետո տուժողին բժշկական կամ այլ օգնություն ցույց տալը, հանցագործությամբ պատճառված գույքային և բարոյական վնասը կամովին հատուցելը կամ վերացնելը, տուժողին պատճառված վնասը հարթելուն ուղղված այլ գործողությունները՚:
Սույն քրեական գործով ամբաստանյալ Մեհրդատ Յաղուբալի Կազեմի Սանիին մեղադրանք է առաջադրվել ՀՀ քրեական օրենսգրքի 177 հոդվածի 3-րդ մասի 1.1 կետով, որի սանկցիան նախատեսում է հետևյալ պատժատեսակը` ազատազրկում` չորսից ութ տարի ժամկետով` գույքի բռնագրավմամբ կամ առանց դրա և ՀՀ քրեական օրենսգրքի 178 հոդվածի 1-րդ մասով, որի սանկցիան նախատեսում է հետևյալ պատժատեսակը` տուգանք` նվազագույն աշխատավարձի երեքհարյուրապատիկից հինգհարյուրապատիկի չափով, կամ կալանք` առավելագույնը երկու ամիս ժամկետով, կամ ազատազրկում` առավելագույնը երկու տարի ժամկետով:
Հաշվի առնելով, որ ամբաստանյալ Մեհրդատ Յաղուբալի Կազեմի Սանիին անկեղծորեն խոստովանեց և զղջաց կատարած արարքի համար, բնութագրվում է դրականորեն, նախկինում դատապարտված չի եղել, պատասխանատվությունը և պատիժը մեղմացնող հանգամանքի առկայությունը` հանցագործությամբ պատճառված գույքային վնասը կամովին հատուցելը, և նկատի ունենալով Մեհրդատ Յաղուբալի Կազեմի Սանիի կատարած արարքի բնույթն ու հանրային վտանգավորության աստիճանը, ինչպես նաև այն, որ հանցանքը կատարելուց հետո թաքնվել է վարույթն իրականացնող մարմնից, ինչի հետևանքով հետախուզում է հայտարարվել և միայն 2013 թվականի մայիսի 25-ին Մեղրի մաքսակետից ՀՀ ոստիկանության Մեղրիի բաժնի աշխատակիցների կողմից հայտնաբերվել ու բերման է ենթարկվել ոստիկանության Արաբկիրի բաժին, և ղեկավարվելով օրինականության, արդարության, պատժի անհատականացման ու մարդասիրության սկզբունքներով, դատարանը հանգում է այն համոզման, որ Մեհրդատ Յաղուբալի Կազեմի Սանիի նկատմամբ ՀՀ քրեական օրենսգրքի 177 հոդվածի 3-րդ մասի 1.1 կետի և ՀՀ քրեական օրենսգրքի 178 հոդվածի 1-ին մասով պատիժ պետք է նշանակել ազատազրկման ձևով` որոշակի ժամկետով, որով հնարավոր կլինի հասնել ՀՀ քրեական օրենսգրքի 48-րդ հոդվածով սահմանված պատժի նպատակներին` սոցիալական արդարության վերականգնմանը, պատժի ենթարկված անձի ուղղմանը և հանցագործությունների կանխմանը:
ՀՀ քրեական օրենսգրքի 66 հոդվածի 1-ին մասը սահմանում է` ՙՀանցանքների համակցությամբ յուրաքանչյուր հանցագործության համար առանձին պատիժ (հիմնական և լրացուցիչ) նշանակելով` դատարանը վերջնական պատիժը որոշում է նշանակված պատիժները լրիվ կամ մասնակիորեն գումարելու միջոցով՚, իսկ նույն հոդվածի 4-րդ մասի համաձայն` ՙԵթե հանցանքների համակցությունն ընդգրկում է ծանր կամ առանձնապես ծանր հանցանքներ, ապա վերջնական պատիժը նշանակվում է պատիժները լրիվ կամ մասնակիորեն գումարելու միջոցով: Ընդ որում, ազատազրկման ձևով վերջնական պատիժը չի կարող գերազանցել քսանհինգ տարին: Եթե համակցության մեջ մտնող հանցանքներից մեկի համար դատարանը նշանակում է ցմահ ազատազրկում, ապա վերջնական հիմնական պատիժը որոշվում է կլանելու միջոցով՚, ուստի նկատի ունենալով, որ ՀՀ քրեական օրենսգրքի 177-րդ հոդվածի 3-րդ մասը դասվում է ծանր հանցագործությունների շարքին, դատարանը գտնում է, որ Մեհրդատ Յաղուբալի Կազեմի Սանիի նկատմամբ պատիժ նշանակելիս պետք է կիրառել ՀՀ քրեական օրենսգրքի 66 հոդվածի 4-րդ մասը և յուրաքանչյուր հանցագործության համար առանձին պատիժ նշանակելով, վերջնական պատիժ պետք է նշանակել պատիժները մասնակիորեն գումարելու միջոցով:
Սույն քրեական գործով ամբաստանյալ Փեյման Էբրահիմի Բախշիին մեղադրանք է առաջադրվել ՀՀ քրեական օրենսգրքի 177 հոդվածի 3-րդ մասի 1.1 կետով, որի սանկցիան նախատեսում է հետևյալ պատժատեսակը` ազատազրկում` չորսից ութ տարի ժամկետով` գույքի բռնագրավմամբ կամ առանց դրա:
Հաշվի առնելով, որ ամբաստանյալ Փեյման Էբրահիմի Բախշին անկեղծորեն խոստովանեց և զղջաց կատարած արարքի համար, բնութագրվում է դրականորեն, նախկինում դատապարտված չի եղել, պատասխանատվությունը և պատիժը մեղմացնող հանգամանքի առկայությունը` հանցագործությամբ պատճառված գույքային վնասը կամովին հատուցելը, և նկատի ունենալով Փեյման Էբրահիմի Բախշիի կատարած արարքի բնույթն ու հանրային վտանգավորության աստիճանը, ինչպես նաև այն, որ հանցանքը կատարելուց հետո թաքնվել է վարույթն իրականացնող մարմնից, ինչի հետևանքով հետախուզում է հայտարարվել և միայն 2013 թվականի մայիսի 25-ին Մեղրի մաքսակետից ՀՀ ոստիկանության Մեղրիի բաժնի աշխատակիցների կողմից հայտնաբերվել ու բերման է ենթարկվել ոստիկանության Արաբկիրի բաժին, և ղեկավարվելով օրինականության, արդարության, պատժի անհատականացման ու մարդասիրության սկզբունքներով, դատարանը հանգում է այն համոզման, որ Փեյման Էբրահիմի Բախշիի նկատմամբ ՀՀ քրեական օրենսգրքի 177 հոդվածի 3-րդ մասի 1.1 կետով պատիժ պետք է նշանակել ազատազրկման ձևով` որոշակի ժամկետով, որով հնարավոր կլինի հասնել ՀՀ քրեական օրենսգրքի 48-րդ հոդվածով սահմանված պատժի նպատակներին` սոցիալական արդարության վերականգնմանը, պատժի ենթարկված անձի ուղղմանը և հանցագործությունների կանխմանը:
Քննության առնելով քրեական գործին կցված` Փեյման Բախշիի մոտից անձնական խուզարկությամբ հայտնաբերված և առգրավված օպտիկական մեկ ակնոցի, ՙԳուչչի՚ մոդելի ձեռքի մեկ ժամացույցի, ՙՍոնի Էրիքսոն՚ մոդելի բջջային հեռախոսի, մեկ ուսապարկ, նրա մեջ առկա մեկ տուփ օճառի, վեց տուփ տուրիստական այցեքարտերի, երեք զույգ հողաթափերի, մեկ ճամպրուկն ու դրա մեջ առկա հիգիենայի պարագաների, մեկ նոթատետրի, մեկ զույգ կոշիկի, երկու դրամապանակի, մեկ պահածոյի, պոլիէթիլենյային տոպրակով բրնձի, մեկ լիցքավորիչի, երեք հողաթափի, երկու զույգ սպորտային կոշիկների, երեք շամպունի, մեկ ձեռքի հեղուկի, մեկ զուգարանի թղթի, մեկ ամանի հեղուկի, մեկ տուփ աղի, մեկ ամանի մածուկի, ձեռքի մեկ օճառի, մեկ տուփ լվացքի փոշու, օգտագործած տարբեր հագուստների, Մեհրդատ Կազեմի Սանիի անձնական խուզարկությամբ հայտնաբերված և առգրավված ՙՍոնի Էրիքսոն՚ մոդելի մեկ բջջային հեռախոսի, ՙՍամսունգ՚ մոդելի մեկ բջջային հեռախոսի, ՙm՚ տառով մեկ արծաթագույն վզնոցի, ձեռքի մեկ պայուսակի ու դրա մեջ առկա երեք 100 ԱՄՆ դոլարանոց թղթադրամի, մեկ 20.000 ՀՀ դրամանոց թղթադրամի, մեկ 10.000 ՀՀ դրամանոց թղթադրամի, երկու 1000 ՀՀ դրամանոց թղթադրամի, վարորդական իրավունքի վկայականի, երկու սոցիալական քարտի, մեկ այցեքարտի, բանկային երեք քարտերի, զինվորական վկայականի, մեկ ռադիոընդունիչի իր մարտկոցով, 10 կգ բրնձով մեկ պայուսակի, սև գույնի մեկ պայուսակի ու դրա մեջ առկա մեկ տուփ թթու լավաշի, երեք սանրի, մեկ զույգ ամառային լաթերի, սեղանի մեկ ժամացույցի, մեկ վարսահարդարիչի, մազի երկու լաքի, մեկ դեմքի կրեմի, մեկ լիտրանոց տարայի մեջ լցված ՙԲարֆ՚ հեղուկի, մեկ եղունգկտրիչի, մեկ ճամպրուկի, նրա մեջ առկա օգտագործված տարբեր տեսակի հագուստների, տնօրինման հարցը, դատարանը գտնում է, որ դատավճիռն օրինական ուժի մեջ մտնելու պահից նշված ապրանքները պետք է վերադարձվեն օրինական տիրապետողներին` Փեյման Բախշիին և Մեհրդատ Կազեմի Սանիին:
Դատարանը գտնում է, որ քրեական գործով ապացույց ճանաչված և քրեական գործին կցված համակարգչատեխնիկական փորձաքննությունից ստացված եզրակացության թարգմանությունը պարսկերենից հայերեն լեզվով, ԻԻՀ դեսպանատնից ստացված փաստաթղթերը պետք է թողնել քրեական գործին կցված և պահել գործի հետ` վերջինիս պահելու ամբողջ ժամանակամիջոցում:
Քննության առնելով ամբաստանյալների նկատմամբ ընտրված խափանման միջոցների հարցը` դատարանը գտնում է, որ Մեհրդատ Կազեմի Սանի և Փեյման Էբրահիմի Բախշիի նկատմամբ ընտրված խափանման միջոցը` կալանավորումը, պետք է թողնել անփոփոխ:

Եզրափակիչ մաս.

Ղեկավարվելով ՀՀ քրեական օրենսգրքի 10-րդ, 48-րդ, 61-րդ, 62-րդ և 66-րդ հոդվածներով, ՀՀ քրեական դատավարության օրենսգրքի 357-360-րդ հոդվածներով` դատարանը

Վ Ճ Ռ Ե Ց`

Մեհրդատ Յաղուբալի Կազեմի Սանիին մեղավոր ճանաչել ՀՀ քրեական օրենսգրքի 177-րդ հոդվածի 3-րդ մասի 1.1 կետով և 178-րդ հոդվածի 1-ին մասով և նրան` ՀՀ քրեական օրենսգրքի 177-րդ հոդվածի 3-րդ մասի 1.1 կետով դատապարտել ազատազրկման 4 /չորս/ տարի ժամկետով` առանց գույքի բռնագրավման, ՀՀ քրեական օրենսգրքի 178-րդ հոդվածի 1-ին մասով` ազատազրկման 1 /մեկ/ տարի ժամկետով: ՀՀ քրեական օրենսգրքի 66-րդ հոդվածի 4-րդ մասի կիրառմամբ` պատիժները մասնակիորեն գումարելու միջոցով ՀՀ քրեական օրենսգրքի 177-րդ հոդվածի 3-րդ մասի 1.1 կետով նշանակված 4 /չորս/ տարի ժամկետով ազատազրկմանը մասնակիորեն գումարել ՀՀ քրեական օրենսգրքի 178 հոդվածի 1-ին մասով նշանակված 1 /մեկ/ տարի ժամկետով ազատազրկումից 3 /երեք/ ամիս ժամկետով ազատազրկումը և Մեհրդատ Յաղուբալի Կազեմի Սանիի նկատմամբ վերջնական պատիժ նշանակել ազատազրկում` 4 /չորս/ տարի 3 /երեք/ ամիս ժամկետով` առանց գույքի բռնագրավման:
Մեհրդատ Յաղուբալի Կազեմի Սանիի պատժի սկիզբը հաշվել 2013 թվականի մայիսի 25-ից, ընտրված խափանման միջոցը` կալանավորումը, թողնել անփոփոխ:
Փեյման Էբրահիմի Բախշիին մեղավոր ճանաչել ՀՀ քրեական օրենսգրքի 177-րդ հոդվածի 3-րդ մասի 1.1 կետով և նրան դատապարտել ազատազրկման 4 /չորս/ տարի ժամկետով` առանց գույքի բռնագրավման:
Փեյման Էբրահիմի Բախշիի պատժի սկիզբը հաշվել 2013 թվականի մայիսի 25-ից, ընտրված խափանման միջոցը` կալանավորումը, թողնել անփոփոխ:
Քրեական գործին կցված Մեհրդատ Յաղուբալի Կազեմի Սանիի անձնական խուզարկությամբ հայտնաբերված և առգրավված ՙՍոնի Էրիքսոն՚ մոդելի մեկ բջջային հեռախոսը, ՙՍամսունգ՚ մոդելի մեկ բջջային հեռախոսը, ՙm՚ տառով մեկ արծաթագույն վզնոցը, ձեռքի մեկ պայուսակը, նրա մեջ առկա երեք 100 ԱՄՆ դոլարանոց թղթադրամը, մեկ 20.000 ՀՀ դրամանոց թղթադրամը, մեկ 10.000 ՀՀ դրամանոց թղթադրամը, երկու 1000 ՀՀ դրամանոց թղթադրամը, վարորդական իրավունքի վկայականը, երկու սոցիալական քարտը, մեկ այցեքարտը, բանկային երեք քարտերը, զինվորական վկայականը, մեկ ռադիոընդունիչի իր մարտկոցով, 10 կգ բրնձով մեկ պայուսակը, սև գույնի մեկ պայուսակը, նրա մեջ առկա մեկ տուփ թթու լավաշը, երեք սանրը, մեկ զույգ ամառային լաթերը, սեղանի մեկ ժամացույցը, մեկ վարսահարդարիչը, մազի երկու լաքը, մեկ դեմքի կրեմը, մեկ լիտրանոց տարայի մեջ լցված ՙԲարֆ՚ հեղուկը, մեկ եղունգկտրիչը, մեկ ճամպրուկը, նրա մեջ առկա օգտագործված տարբեր տեսակի հագուստները վերադարձնել Մեհրդատ Յաղուբալի Կազեմի Սանիին` դատավճիռն օրինական ուժի մեջ մտնելու պահից:
Քրեական գործին կցված Փեյման Էբրահիմի Բախշիի անձնական խուզարկությամբ հայտնաբերված և առգրավված օպտիկական մեկ ակնոցը, ՙԳուչչի՚ մոդելի ձեռքի մեկ ժամացույցը, ՙՍոնի Էրիքսոն՚ մոդելի բջջային հեռախոսը, մեկ ուսապարկը, դրա մեջ առկա մեկ տուփ օճառը, վեց տուփ տուրիստական այցեքարտերը, երեք զույգ հողաթափերը, մեկ ճամպրուկը, նրա մեջ առկա հիգիենայի պարագաները, մեկ նոթատետրը, մեկ զույգ կոշիկը, երկու դրամապանակը, մեկ պահածոն, պոլիէթիլենյային տոպրակով բրինձը, մեկ լիցքավորիչը, երեք հողաթափը, երկու զույգ սպորտային կոշիկները, երեք շամպունը, մեկ ձեռքի հեղուկը, մեկ զուգարանի թուղթը, մեկ ամանի հեղուկը, մեկ տուփ աղը, մեկ ամանի մածուկը, ձեռքի մեկ օճառը, մեկ տուփ լվացքի փոշին, օգտագործած տարբեր հագուստները վերադարձնել Փեյման Էբրահիմի Բախշիին` դատավճիռն օրինական ուժի մեջ մտնելու պահից:
Քրեական գործով ապացույց ճանաչված համակարգչատեխնիկական փորձաքննությունից ստացված եզրակացության թարգմանությունը պարսկերենից հայերեն լեզվով և ԻԻՀ դեսպանատնից ստացված փաստաթղթերը թողնել քրեական գործին կցված և պահել գործի հետ` վերջինիս պահելու ամբողջ ժամանակամիջոցում:
Սույն դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան ` հրապարակման պահից մեկ ամսվա ընթացքում:


ԴԱՏԱՎՈՐ` Ա.ԲԵԿԹԱՇՅԱՆ