ԵԱՔԴ/0144/01/13
Ո Ր Ո Շ ՈՒ Մ

քրեական հետապնդումը դադարեցնելու և քրեական գործի վարույթը կարճելու մասին

21 հոկտեմբերի 2013թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների առաջին ատյանի դատարանը` նախագահությամբ դատավոր Լ.Ավետիսյանի, քարտուղարությամբ Ե.Կարապետյանի, մասնակցությամբ ամբաստանյալ Ա.Դեմիրճյանի, մեղադրող Հ.Մկրտչյանի, տուժող Լ.Ծատուրյանի, դռնբաց դատական նիստում քննեց քրեական գործն ըստ մեղադրանքի Արմեն Խաչատուրի Դեմիրճյանի (ծնված 1986 թվականի օգոստոսի 19-ին, Կոտայքի մարզի Չարենցավան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին մեկ մանկահասակ երեխա, նախկինում չդատված, չի աշխատում, հաշվառված է Կոտայքի մարզի Չարենցավան քաղաքի 1Ա թաղամասի 2 շենքի թիվ 10 բնակարան հասցեում, բնակվում է Կոտայքի մարզի Չարենցավան քաղաքի 4 թաղամասի 21 շենքի թիվ 13 բնակարան հասցեում) ՀՀ քրեական օրենսգրքի 176 հոդվածի 1-ին մասով, որպես խափանման միջոց է ընտրվել չհեռանալու մասին ստորագրությունը:

Պ Ա Ր Զ Ե Ց

2013 թվականի օգոստոսի 19-ին ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 176 հոդվածի 1-ին մասով նախատեսված հանցագործության հատկանիշներով հարուցվել է թիվ 14141013 քրեական գործը:
2013 թվականի օգոստոսի 21-ին կասկածյալ Արմեն Խաչատուրի Դեմիրճյանի նկատմամբ որպես խափանման միջոց է ընտրվել չհեռանալու մասին ստորագրությունը:
2013 թվականի օգոստոսի 28-ին Արմեն Խաչատուրի Դեմիրճյանը ներգրավվել է որպես մեղադրյալ ՀՀ քրեական օրենսգրքի 176 հոդվածի 1-ին մասով այն արարքի կատարման համար, որ նա 2013թ. օգոստոսի 19-ին, ժամը 1440-ի սահմաններում ուրիշի գույքի բացահայտ հափշտակություն կատարելու դիտավորությամբ Երևան քաղաքի Կոմիտասի պողոտայի 65 շենքի մոտ մոտեցել է Լիլիթ Լյովայի Ծատուրյանին, քաշել-պոկելու եղանակով բացահայտ հափշտակել է նրա պարանոցի ոսկյա շղթան` ոսկյա կախազարդով և դիմել փախուստի, Լ.Ծատուրյանին պատճառելով զգալի չափի` 220.000 ՀՀ դրամի գույքային վնաս:
2013 թվականի հոկտեմբերի 3-ին թիվ 14141013 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
Դատական նիստի ժամանակ ամբաստանյալ Արմեն Դեմիրճյանը լիովին ընդունեց իր կատարած հանցանքը, հայտնեց, որ տուժողին պատճառված նյութական վնասը հատուցել է և խնդրեց իր նկատմամբ կիրառել համաներման մասին որոշումը և քրեական գործի վարույթը կարճել:
Մեղադրող Հ.Մկրտչյանը միջնորդեց ՀՀ Ազգային Ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշման 5-րդ կետի 2-րդ ենթակետի համաձայն, Արմեն Խաչատուրի Դեմիրճյանի նկատմամբ քրեական հետապնդումը դադարեցնել և նրա վերաբերյալ ՀՀ քրեական օրենսգրքի 176 հոդվածի 1-ին մասով քրեական գործի վարույթը կարճել:
Տուժող Լիլիթ Ծատուրյանը հայտնեց, որ ամբաստանյալ Արմեն Դեմիրճյանն ամբողջությամբ հատուցել է իրեն պատճառված վնասը, ինքը նրա նկատմամբ որևէ նյութական պահանջ չունի և համաձայն է, որպեսզի ամբաստանյալի նկատմամբ կիրառվի համաներում:
Դատարանը գտնում է, որ Արմեն Դեմիրճյանի վերաբերյալ քրեական գործի վարույթը պետք է կարճել և նրա նկատմամբ քրեական հետապնդումը դադարեցնել` հետևյալ պատճառաբանությամբ.
ՀՀ ոստիկանության ինֆորմացիոն կենտրոնի կողմից տրված պահանջագրի համաձայն, Արմեն Խաչատուրի Դեմիրճյանը նախկինում դատապարտված չի եղել:
ՀՀ Ազգային ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշման 15-րդ կետի համաձայն, սույն որոշումը կիրառվում է այն անձանց նկատմամբ, ովքեր հանցագործություն են կատարել մինչև 2013 թվականի սեպտեմբերի 1-ը ներառյալ: Արմեն Դեմիրճյանը հանրորեն վտանգավոր արարքը կատարել է 2013թ. օգոստոսին:
Նույն որոշման 5-րդ կետի 2-րդ ենթակետի համաձայն, պետք է կարճել այն անձանց կողմից կատարված հանցագործությունների վերաբերյալ քրեական գործերը, ովքեր մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ ոչ ավելի, քան երեք տարի ժամկետով ազատազրկում:
ՀՀ քրեական օրենսգրքի 176 հոդվածի 1-ին մասով նախատեսված պատժի առավելագույն չափը երեք տարի ժամկետով ազատազրկումն է:
Համաներման որոշման 9-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը: Մասնավորապես` համաներման որոշման 9-րդ կետի 7-րդ ենթակետում թվարկված են ՀՀ քրեական օրենսգրքի այն հոդվածները և հոդվածների մասերը, որոնցով նախատեսված արարքները կատարած անձանց նկատմամբ համաներումը կիրառելի չէ: Թվարկված հոդվածների և հոդվածների մասերի թվում ընդգրկված չէ ՀՀ քրեական օրենսգրքի 176 հոդվածի 1-ին մասը: Արմեն Խաչատուրի Դեմիրճյանի պարագայում բացակայում են նաև համաներման որոշման 9-րդ կետում նշված այն սահմանափակումները, որոնք կարող են արգելք հանդիսանալ համաներման ակտի կիրառման համար:
Համաներման որոշման 13-րդ կետի 1.ա ենթակետի համաձայն, որոշման կատարումը վերապահվել է դատարաններին` այն անձանց նկատմամբ, որոնց վերաբերյալ գործերը գտնվում են դատարաններում, սակայն մինչև սույն որոշումն ուժի մեջ մտնելը չեն քննվել, կամ այն անձանց նկատմամբ, որոնց վերաբերյալ գործերը քննվել են, բայց դատավճիռներն օրինական ուժի մեջ չեն մտել:
Հիմք ընդունելով վերը նշվածը, դատարանը գտնում է, որ ամբաստանյալ Արմեն Խաչատուրի Դեմիրճյանի նկատմամբ կիրառելի է ՀՀ Ազգային ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշումը:
Համաձայն ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի, հարուցված քրեական գործի վարույթը ենթակա է կարճման, եթե` ընդունվել է համաներման ակտ:
Դատարանը գտնում է, որ քննիչի 11.09.2013թ.-ի որոշմամբ ապացույց ճանաչված և քրեական գործին կցված Ա.Դեմիրճյանից առգրավված մեկ ջինսե տաբատը և կիսաթև վերնաշապիկը պետք է վերադարձնել նրան:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 35 հոդվածի 1-ին մասի 13-րդ կետով, 313 հոդվածով և ՀՀ Ազգային ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշման 5-րդ կետի 2-րդ ենթակետով, 13-րդ կետի 1.ա ենթակետով, դատարանը

Ո Ր Ո Շ Ե Ց

Արմեն Խաչատուրի Դեմիրճյանի նկատմամբ ՀՀ քրեական օրենսգրքի 176 հոդվածի 1-ին մասով քրեական հետապնդումը դադարեցնել և թիվ ԵԱՔԴ/0144/01/13 քրեական գործի վարույթը կարճել` ՀՀ Ազգային ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշման 5-րդ կետի 2-րդ ենթակետի համաձայն:
Արմեն Խաչատուրի Դեմիրճյանի նկատմամբ կիրառված խափանման միջոցը` չհեռանալու մասին ստորագրությունը, վերացնել:
Ապացույց ճանաչված և քրեական գործին կցված Ա.Դեմիրճյանից առգրավված մեկ ջինսե տաբատը և կիսաթև վերնաշապիկը վերադարձնել նրան:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան