գործ` ԵԱՔԴ/0137/01/13
Ո Ր Ո Շ Ո Ւ Մ

ՙՀամաներում հայտարարելու մասին՚ որոշումը կիրառելու, քրեական
գործի վարույթը կարճելու և քրեական հետապնդումը դադարեցնելու վերաբերյալ միջնորդությունը քննության առնելու մասին


Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը

Նախագահությամբ դատավոր` Ա. Բեկթաշյանի
քարտուղարությամբ` Հ. Արտաշեսյանի
մասնակցությամբ` մեղադրող` Ա. Հարությունյանի
պաշտպան` Ա. Ալիխանյանի
ամբաստանյալ` Ս. Չատալյանի

2013 թվականի հոկտեմբերի 14-ին, դռնբաց դատական նիստում, քննության առնելով քրեական գործով ըստ մեղադրանքի Սարգիս Անդրանիկի Չատալյանի (ծնված 09.12.1989 թվականին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, նախկինում չդատված, ծառայել է ՀՀ ՊՆ 31549 զորամասում` որպես նորոգման դասակի կուտակչարանի պետ, կոչումով կրտսեր սերժանտ, հաշվառված է Երևան քաղաքի Ն.Չարբախի 2-րդ փողոցի 7-րդ նրբանցքի 26 տանը, մեղադրվում է ՀՀ քրեական օրենսգրքի 361-րդ հոդվածի 1-ին մասով, 2013 թվականի օգոստոսի 09-ի որոշմամբ Սարգիս Անդրանիկի Չատալյանի նկատմամբ որպես խափանման միջոց է ընտրվել ստորագրություն չհեռանալու մասին), ամբաստանյալ Սարգիս Անդրանիկի Չատալյանի միջնորդությունը ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ ՀՀ Ազգային ժողովի 2013 թվականի հոկտեմբերի 03-ի որոշման կիրառմամբ իր վերաբերյալ քրեական գործի վարույթը կարճելու և քրեական հետապնդումը դադարեցնելու մասին,

Պ Ա Ր Զ Ե Ց

2013 թվականի օգոստոսի 02-ին Երևանի կայազորի զինվորական դատախազությունում ՀՀ քրեական օրենսգրքի 361-րդ հոդվածի 1-ին մասի հատկանիշներով հարուցվել է թիվ 90211613 քրեական գործը:
2013 թվականի օգոստոսի 09-ի որոշմամբ Սարգիս Անդրանիկի Չատալյանը թիվ 90211613 քրեական գործով ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 361-րդ հոդվածի 1-ին մասով և նրա նկատմամբ որպես խափանման միջոց է ընտրվել ստորագրություն չհեռանալու մասին:
Սարգիս Անդրանիկի Չատալյանին ՀՀ քրեական օրենսգրքի 361-րդ հոդվածի 1-ին մասով մեղադրանք է առաջադրվել այն բանի համար, որ նա երեք ամսվա ընթացքում, երեք և ավելի անգամ, մեկ ժամից մինչև երեք օր տևողությամբ, առանց հարգելի պատճառների ծառայության չի ներկայացել.
Սարգիս Անդրանիկի Չատալյանը, հանդիսանալով ՀՀ ՊՆ 31549 զորամասի պայմանագրային զինծառայող` նորոգման դասակի կուտակչարանի պետ, կոչումով կրտսեր սերժանտ, իր անձնական խնդիրների հետ կապված` 2013 թվականի հունիսի 27-ին մեկ ու կես ժամ տևողությամբ առանց հարգելի պատճառների ժամանակին չի ներկայացել ծառայության, 2013 թվականի հուլիսի 03-ին և 2013 թվականի հուլիսի 12-ին առանց հարգելի պատճառների ժամանակին չի ներկայացել ծառայության, իսկ 2013 թվականի հուլիսի 16-ին մոտ երկու ժամ տևողությամբ նույնպես առանց հարգելի պատճառների ժամանակին չի ներկայացել ծառայության: 2013 թվականի հուլիսի 24-ին ժամը 08:45-ից առանց հարգելի պատճառների ժամանակին չի ներկայացել ծառայության, այլ ծառայության է ներկայացել 2013 թվականի հուլիսի 26-ին ժամը 14:30-ին: Բացի այդ, Ս.Չատալյանը 2013 թվականի հուլիսի 29-ին ժամը 08:45-ից առանց հարգելի պատճառների ժամանակին չի ներկայացել ծառայության, այլ ծառայության է ներկայացել 2013 թվականի հուլիսի 31-ին ժամը 09:00-ին:
2013 թվականի սեպտեմբերի 02-ին թիվ 90211613 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
2013 թվականի հոտեմբերի 14-ին ամբաստանյալ Սարգիս Անդրանիկի Չատալյանի կողմից միջնորդություն է ներկայացվել դատարան` իր նկատմամբ ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ ՀՀ Ազգային ժողովի 2013 թվականի հոկտեմբերի 03-ի որոշման կիրառման մասին:
Դատական նիստի ընթացքում ամբաստանյալ Սարգիս Անդրանիկի Չատալյանը պնդեց իր միջնորդությունը և խնդրեց իր նկատմամբ կիրառել ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 03-ին Ազգային ժողովի կողմից ընդունված որոշման 1-ին կետի 2-րդ ենթակետը:

Սույն քրեական գործով ամբաստանյալ Սարգիս Անդրանիկի Չատալյանին մեղադրանք է առաջադրվել ՀՀ քրեական օրենսգրքի 361-րդ հոդվածի 1-ին մասով, որի սանկցիան նախատեսում է հետևյալ պատժատեսակները` կալանք` առավելագույնը երեք ամիս ժամկետով, կամ կարգապահական գումարտակում պահելը` առավելագույնը երկու տարի ժամկետով, կամ ազատազրկում` առավելագույնը երկու տարի ժամկետով:
ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի համաձայն` ՙՔրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ընդունվել է համաներման ակտ՚, իսկ նույն հոդվածի 5-րդ մասը սահմանում է` ՙԴատարանը, հայտնաբերելով քրեական հետապնդումը բացառող հանգամանքներ, լուծում է ամբաստանյալի նկատմամբ քրեական հետապնդումը դադարեցնելու հարցը՚:
ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ ՀՀ Ազգային ժողովի 2013 թվականի հոկտեմբերի 03-ի որոշման 5-րդ կետի 2-րդ ենթակետի համաձայն` ՙՔրեական հետապնդում պետք է չհարուցել և քրեական հետապնդում չիրականացնել, ինչպես նաև կարճել մինչև 2013 թվականի սեպտեմբերի 1-ը կատարած հանցագործությունների վերաբերյալ հետաքննության մարմինների, նախաքննության մարմինների կամ դատարանի վարույթում գտնվող քրեական գործերը, բացառությամբ սույն որոշման 8-րդ կետի, 4-րդ և 5-րդ ենթակետերով նախատեսված դեպքերի, որոնցով անձինք կարող են մեղադրվել կամ մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ` ոչ ավելի, քան երեք տարի ժամկետով ազատազրկում՚:
Նույն որոշման 9-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը: Մասնավորապես` Համաներման որոշման 9-րդ կետի 7-րդ ենթակետում թվարկված են ՀՀ քրեական օրենսգրքի այն հոդվածները և հոդվածների մասերը, որոնցով նախատեսված արարքները կատարած անձանց նկատմամբ համաներումը կիրառելի չէ: Սակայն հարկ է նկատել, որ թվարկված հոդվածների և հոդվածների մասերի շարքից բացակայում է ՀՀ քրեական օրենսգրքի 361 հոդվածի 1-ին մասը, այսինքն` ՀՀ քրեական օրենսգրքի 361 հոդվածի 1-ին մասով նախատեսված արարքներ կատարած անձանց նկատմամբ համաներման կիրառումը սահմանափակված չէ:
Նույն որոշման 13-րդ կետի 1-ին ենթակետի ՙա՚ կետի համաձայն` սույն որոշման կատարումը վերապահել` Հայաստանի Հանրապետության ընդհանուր իրավասության առաջին ատյանի և վերաքննիչ քրեական դատարաններին` այն անձանց նկատմամբ, որոնց վերաբերյալ գործերը Հայաստանի Հանրապետության ընդհանուր իրավասության առաջին ատյանի կամ վերաքննիչ քրեական դատարաններում են, սակայն մինչև սույն որոշումն ուժի մեջ մտնելը չեն քննվել, կամ այն անձանց նկատմամբ, որոնց վերաբերյալ գործերը քննվել են, բայց դատավճիռներն օրինական ուժի մեջ չեն մտել:
Նույն որոշման 15-րդ կետի համաձայն` սույն որոշումը կիրառվում է այն անձանց նկատմամբ, որոնք հանցագործություն են կատարել մինչև 2013 թվականի սեպտեմբերի 1-ը ներառյալ:
Համաներման որոշման 17-րդ կետի համաձայն` համաներման կիրառման դեպքում դատվածության մարման հարցը լուծվում է օրենքով սահմանված կարգով:
Նկատի ունենալով այն հանգամանքը, որ ամբաստանյալ Սարգիս Անդրանիկի Չատալյանը հանցանքը կատարել է մինչև 2013 թվականի սեպտեմբերի 01-ը, ինչպես նաև այն, որ սույն քրեական գործի նյութերում բացակայում են Համաներման որոշման 9-րդ կետի մյուս ենթակետերում նշված այն սահմանափակումները, որոնք կարող են արգելք հանդիսանալ Սարգիս Անդրանիկի Չատալյանի նկատմամբ Համաներման որոշման կիրառման համար, և հիմք ընդունելով ամբաստանյալ Սարգիս Անդրանիկի Չատալյանի միջնորդությունը, դատարանը գտնում է, որ այն պետք է բավարարել` ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ ՀՀ Ազգային ժողովի 2013 թվականի հոկտեմբերի 03-ի թիվ ԱԺՈ-080-Ն որոշման 5-րդ կետի 2-րդ ենթակետի կիրառմամբ Սարգիս Անդրանիկի Չատալյանի նկատմամբ ՀՀ քրեական օրենսգրքի 361 հոդվածի 1-ին մասով քրեական գործի վարույթը պետք է կարճել և քրեական հետապնդումը պետք է դադարեցնել:
Քննության առնելով Սարգիս Անդրանիկի Չատալյանի նկատմամբ ընտրված խափանման միջոցի հարցը, դատարանը գտնում է, որ ընտրված խափանման միջոցը` ստորագրություն չհեռանալու մասին, պետք է վերացնել` որոշումն օրինական ուժի մեջ մտնելու պահից:

Եզրափակիչ մաս.

Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ և 313-րդ հոդվածներով և հիմք ընդունելով ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ ՀՀ Ազգային ժողովի 2013 թվականի հոկտեմբերի 03-ի որոշումը, դատարանը

Ո Ր Ո Շ Ե Ց

Սարգիս Անդրանիկի Չատալյանի վերաբերյալ` ՀՀ քրեական օրենսգրքի 361-րդ հոդվածի 1-ին մասով քրեական գործի վարույթը կարճել և քրեական հետապնդումը դադարեցնել` նրա նկատմամբ կիրառելով ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ ՀՀ Ազգային ժողովի 2013 թվականի հոկտեմբերի 03-ի որոշման 5-րդ կետի 2-րդ ենթակետը:
Սարգիս Անդրանիկի Չատալյանի նկատմամբ ընտրված խափանման միջոցը` ստորագրությունը չհեռանալու մասին, վերացնել` որոշումն օրինական ուժի մեջ մտնելու պահից:
Որոշումը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակման պահից տասնօրյա ժամկետում:



ԴԱՏԱՎՈՐ` Ա.ԲԵԿԹԱՇՅԱՆ