ԵԱՔԴ/0132/01/13

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
16.10.2013թ. ք. Երևան
Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության դատարանըª

նախագահությամբ դատավոր` Արմեն Խաչատրյանի,
քարտուղարությամբ` Մագդա Գրիգորյանի,
մասնակցությամբ մեղադրող` Արայիկ Մնացականյանի,
տուժողի ներկայացուցիչ` Գեղամ Հակոբյանի,
քաղաքացիական հայցվոր` Ալբերտ Աթանյանի,

դատարանում, դռնբաց դատական նիստում քննեց քրեական գործն ըստ մեղադրանքի

Արայիկ Սուրենի Փիրումյանի` ծնված 25.11.1965թ.-ին, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին անչափահաս որդին, չի աշխատում, նախկինում չդատված, հաշվառված և բնակվում է ք. Երևան, Զ. Քանաքեռցու 123 շենք, բնակարան 35 հասցեում, մեղադրանք է առաջադրվել ՀՀ քրեական օրենսգրքի 242-րդ հոդվածի 1-ին մասով նախատեսված հանցանք կատարելու համար, որպես խափանման միջոց է կիրառվել չհեռանալու մասին ստորագրությունը:

2013 թվականի մայիսի 25-ին ՀՀ ոստիկանության ՔԳՎ Երևան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 242-րդ հոդվածի 1-ին մասի հատկանիշներով հարուցվել է թիվ 60114213 քրեական գործը:
2013 թվականի օգոստոսի 21-ին Արայիկ Սուրենի Փիրումյանը որպես մեղադրյալ է ներգրավվել ՀՀ քրեական օրենսգրքի 242-րդ հոդվածի 1-ին մասով նախատեսված այն արարքի կատարման համար, որ ՙնա 2013թ. մայիսի 15-ին, ժամը 13:20-ի սահմաններում իրեն վստահված ՙԼեքսուս՚ մակնիշի 35 ST 647 պ/հ ավտոմեքենան վարել է Երևան քաղաքի Դ. Անհաղթ փողոցով` Կոմիտասի պողոտայի կողմից դեպի Կ. Ուլնեցի փողոցի ուղղությամբ: Հասնելով Դ. Անհաղթ 7 շենքի դիմացի ճանապարհահատվածին թույլ է տվել ՃԵԿ-ի 36, 39 կետերի և ՙՃանապարհային երթևեկության անվտանգության ապահովման մասին՚ ՀՀ օրենքի 23-րդ հոդվածի 3 կետի պահանջին հակասող գործողություններ, այն է` երթևեկության անվտանգությունն ապահովելու նպատակով վերադասավորվելուց առաջ պետք է ոչ միայն նախօրոք միացներ դեպի ձախ շրջադարձի լուսային ցուցիչները, այլև հետևելով ողջ ճանապարհատրանսպորտային իրադրության զարգացմանը, ճանապարհը զիջեր համընթաց ուղղությամբ ձախ կողմից ընթացող տրանսպորտային միջոցներին, մասնավորապես ՙՖոլկսվագեն՚ մակնիշի 34 VU 599 պ/հ ավտոմեքենային այն հաշվով, որպեսզի վերջինիս վարորդին չստիպեր փոխելու ավտոմեքենայի ընթացքի ուղղությունն ու արագությունը, որից հետո միայն համոզվելով վերադասավորվելու առումով շարժման ուղղության փոփոխության անվտանգության մեջ, իրականացներ մանևրը, դրանով իսկ ստեղծել է վթարային իրադրություն, պայմանավորել իր վարած ավտոմեքենայի և ՙՖոլկսվագեն՚ մակնիշի 34 VU 599 պ/հ ավտոմեքենայի միջև տեղի ունեցած ավտովթարի առաջացումը` ինքն իրեն զրկելով այն կանխելու տեխնիկական հնարավորութունից, որի հետևանքով ՙՖոլկսվագեն՚ մակնիշի 34 VU 599 պ/հ ավտոմեքենայի ուղևոր Մարինե Վանուշի Աթանյանին անզգուշությամբ պատճառել է առողջության տևական քայքայումով միջին ծանրության մարմնական վնասվածքներ՚:
2013 թվականի օգոստոսի 24-ին թիվ 60114213 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան` ըստ էության քննելու համար:
Դատաքննությամբ և գործով ձեռք բերված ապացույցներով դատարանը հաստատված համարեց հետևյալը.
Արայիկ Փիրումյանը 2013թ. մայիսի 15-ին, ժամը 13:20-ի սահմաններում իրեն վստահված ՙԼեքսուս՚ մակնիշի 35 ST 647 պ/հ ավտոմեքենան վարել է Երևան քաղաքի Կոմիտասի պողոտայի կողմից Դ. Անհաղթ փողոցով` դեպի Կ. Ուլնեցի փողոցի ուղղությամբ: Հասնելով Դ. Անհաղթ 7 շենքի դիմացի ճանապարհահատվածին` չնախատեսված տեղից հետադարձ կատարելու նպատակով միացրել է ձախակողմյան լուսային թարթիչը` ձախ եզրային գոտի վերադասավորվելու համար ու քանի որ մինչ դա չի նայել ու տեսել, որ համընթաց, երրորդ գոտով, իրենից հետ ավտոմեքենա է ընթանում, սկսել է դեպի ձախ վերադասավորվել երրորդ գոտի ու դեպի ձախ շեղությամբ անցել է մոտ 6-7 մետր տարածություն և մուտք գործել երրորդ ուղեգոտի, դրանով իսկ ստեղծել է վթարային իրադրություն, պայմանավորել իր վարած ավտոմեքենայի և համընթաց երթևեկող ՙՖոլկսվագեն՚ մակնիշի 34 VU 599 պ/հ ավտոմեքենայի միջև տեղի ունեցած ավտովթարի առաջացումը` ինքն իրեն զրկելով այն կանխելու տեխնիկական հնարավորութունից: Արդյունքում Ա. Փիրումյանը թույլ է տվել ՃԵԿ-ի 36, 39 կետերի և ՙՃանապարհային երթևեկության անվտանգության ապահովման մասին՚ ՀՀ օրենքի 23-րդ հոդվածի 3-րդ կետի պահանջին հակասող գործողություններ, իսկ վթարի հետևանքով ՙՖոլկսվագեն՚ մակնիշի 34 VU 599 պ/հ ավտոմեքենայի ուղևոր Մարինե Վանուշի Աթանյանին անզգուշությամբ պատճառել է առողջության տևական քայքայումով միջին ծանրության մարմնական վնասվածքներ:
Առաջադրված մեղադրանքում ամբաստանյալ Արայիկ Փիրումյանն իրեն լիովին մեղավոր ճանաչեց և ցուցմունք տվեց այն մասին, որ ունի վարորդական իրավունքի B կարգի վկայական և 2013թ. մայիսի 15-ին, ժամը 13:20-ի սահմաններում Հռիփսիկ Սահրադյանին պատկանող, ժամանակավորապես իրեն վստահված ՙԼեքսուս՚ մակնիշի 35 ST 647 պ/հ ավտոմեքենան վարել է Երևան քաղաքի Դ. Անհաղթ փողոցով` Կոմիտաս պողոտայի կողմից դեպի Կ. Ուլնեցի փողոցի ուղղությամբ, ուղեմասի կենտրոնական գոտով, փողոցի զույգ հոծ գծանշումից մոտ 4 մետր հեռավորությամբ, շուրջ 40 կմ/ժ արագությամբ: Նույն ուղղությամբ և արագությամբ մոտենալով թիվ 7 շենքի դիմացի ճանապարհահատվածին` չնախատեսված տեղից հետադարձ կատարելու նպատակով միացրել է ձախակողմյան լուսային թարթիչը` ձախ եզրային գոտի վերադասավորվելու համար ու քանի որ մինչ այդ չի նայել ու տեսել, որ համընթաց, երրորդ գոտով իրենից հետ ավտոմեքենա է ընթանում, սկսել է դեպի ձախ վերադասավորվել երրորդ գոտի ու երբ դեպի ձախ շեղությամբ անցել է մոտ 6-7 մետր տարածություն և մուտք գործել երրորդ ուղեգոտի, ավտոմեքենայի ձախակողմյան դռների շրջանին է ընդհարվել համընթաց ընթացող ՙՖոլկսվագեն՚ մակնիշի 34 VU 599 պ/հ ավտոմեքենան` առջևի մասով: Մինչ վթարն արգելակման չի դիմել ու վթարից հետո մեքենան դեպի ձախ թեքությամբ հատել է հոծ գծանշումները, մուտք գործել հանդիպակաց ուղեմաս: Վթարի պահին, իր մեքենայում է գտնվել մեքենայի սեփականատեր Հռիփսիկ Սահրադյանի որդին` Հակոբ Դավթյանը: Վթարի արդյունքում ՙՖոլկսվագեն՚ մակնիշի ավտոմեքենայի 2 ուղևորները` Ալբերտը և Մարինեն ստացել են մարմնական վնասվածքներ: ՙՌոսգոսստրախ-Արմենիա՚ ԱՓԲԸ-ի կողմից Ալբերտ Աթանյանին փոխհատուցվել է մոտ 390-400.000 ՀՀ դրամի չափով գումար, ինքը ընդհանուր առմամբ հոգացել է հիվանդանոցային ծախսերը, որոնք կազմում են մոտ 150.000 ՀՀ դրամ: Որպես վնասի հատուցում Մարինե Աթանյանին առաջարկել է 1.500 ԱՄՆ դոլար գումար, սակայն վերջինս հրաժարվել է:
Ամբաստանյալ Արայիկ Փիրումյանի կողմից տված խոստովանական ցուցմունքներից բացի, նրան մեղսագրված արարքը հիմնավորվել է նաև հետևյալ ապացույցներով.
Տուժող Մարինե Աթանյանի նախաքննության ընթացքում տված ցուցմունքով այն մասին, որ հանդիսանում է երկքաղաքացի` ՀՀ և ՌԴ, սակայն հիմնականում բնակվում է Մոսկվա քաղաքում: 2013թ. ապրիլի 30-ին ժամանակավոր այցելել է ՀՀ և բնակվել եղբոր` Ալբերտ Աթանյանի տանը: 2013թ. մայիսի 15-ին, ժամը 13:20-ի սահմաններում, եղբոր հետ միասին, նստել են ՙՖոլկսվագեն՚ մակնիշի 34 VU 599 պ/հ տաքսի ավտոմեքենան` դեպի Զեյթուն թաղամաս գնալու համար: Ավտոմեքենայի վարորդը մեքենան վարել է Դ. Անհաղթ փողոցով` Կոմիտաս պողոտայի կողմից դեպի Կ. Ուլնեցի փողոցի ուղղությամբ, մոտ 60 կմ/ժ արագությամբ, ուղեմասի ձախ եզրային գոտով, որի ընթացքում ինքը նստած է եղել հետևի աջ նստատեղին, իսկ եղբայրը` առջևի աջ նստատեղին: Դ. Անհաղթ փողոցով ընթանալիս տեսել է, որ իրենց համընթաց, աջ կողմից դեպի ձախ թեքությամբ, ՙԼեքսուս՚ մակնիշի 35 ST 647 պ/հ ավտոմեքենան դուրս է եկել իրենց ընթացքի ուղղությամբև տաքսու վարորդը դիմել է կտրուկ արգելակման, սակայն չկարողանալով խուսափել վթարից, ավտոմեքենայի առջևի աջ մասով ընդհարվել է ՙԼեքսուս՚ մակնիշի ավտոմեքենայի ձախակողմյան դռների շրջանին, որի հետևանքով իր աջ ձեռքը կոտրվել է: Շտապ բուժօգնության մեքենայով իրեն և եղբորը տարել են հիվանդանոց, որտեղ պարզվել է, որ եղբոր ձեռքը նույնպես կոտրվել է: Բողոք է ներկայացրել ավտովարորդ Արայիկ Փիրումյանի դեմ և ցանկանում է, որ իրեն պատճառված մարմնական վնասվածքների համար վերջինս ենթարկվի քրեական պատասխանատվության:
Վկա և քաղաքացիական հայցվոր Ալբերտ Աթանյանի ցուցմունքով այն մասին, որ տուժող Մարինե Աթանյանը հանդիսանում է իր քույրը, վերջինս պատրաստվել է 2013թ. մայիսի 15-ին մեկնել Ռուսաստանի Դաշնություն: Այդ օրը, ժամը 13:20-ի սահմաններում ինքն ու քույրը Կոմիտասի շուկայի մոտ հանդիպել են Արմեն Պետրոսյանին և նստել նրա կողմից վարվող ՙՖոլկսվագեն՚ մակնիշի 34 VU 599 պ/հ ավտոմեքենան` Զեյթուն թաղամաս գնալու համար: Նախկինում ևս Արմենն իր վերը նշված ավտոմեքենայով իրենց մատուցել է տաքսի ծառայություններ: Այդպիսով, Արմենն իր մեքենան վարել է Դ. Անհաղթ փողոցով` Կոմիտաս պողոտայի կողմից դեպի Կ. Ուլնեցի փողոցի ուղղությամբ, ուղեմասի ձախ եզրային գոտով, մոտ 60 կմ/ժ արագությամբ: Ինքը նստած է եղել առջևի աջ նստատեղին, իսկ քույրը` հետևի նստատեղին: Դ. Անհաղթ փողոցով ընթանալիս` իր համար անսպասելի, տեսել է, որ համընթաց աջից ընթացող ՙԼեքսուս՚ մակնիշի ավտոմեքենան դեպի ձախ թեքությամբ դուրս է եկել իրենց ընթացքի ուղղությամբ, Արմենը դիմել է կտրուկ արգելակման, սակայն չկարողանալով խուսափել վթարից, ավտոմեքենայի առջևի աջ հատվածով ընդհարվել է ՙԼեքսուս՚ մակնիշի ավտոմեքենայի ձախակողմյան դռների շրջանին, որի հետևանքով ինքը և քույրը` Մարինեն ստացել են մարմնական վնասվածքներ: Իրեն պատճառված մարմնական վնասվածքների համար Արայիկ Փիրումյանին քրեական պատասխանատվության ենթարկելու համար դեռևս նախաքննության ընթացքում բողոք չի ներկայացրել, վերջինիս նկատմամբ ունի միայն նյութական պահանջ` 1.000.000 ՀՀ դրամի չափով:
Վկա Արմեն Պետրոսյանի ցուցմունքով այն մասին, որ վարում է իր անձնական օգտագործման ՙՖոլկսվագեն գոլֆ՚ մակնիշի 34 VU 599 պ/հ ավտոմեքենան, որով իրականացնում է նաև տաքսի ծառայություններ: 2013թ. մայիսի 15-ին ժամը 13:20-ի սահմաններում Կոտմիտասի շուկայի մոտ հանդիպել է Ալբերտին և Մարինեին, որոնք նստել են իր մեքենան և պատվիրել ուղևորվել դեպի Զեյթուն թաղամաս: Նախկինում ևս ինքը նրանց մատուցել է տաքսի ծառայություններ: Այդպես, մեքենան վարել է Երևան քաղաքի Դ. Անհաղթ փողոցով` Կոմիտասի պողոտայից դեպի Կ. Ուլնեցի փողոցի ուղղությամբ, ուղեմասի ձախ եզրային գոտով, փողոցի բաժանարար զույգ հոծ գծերից մոտ 0,5-1 մետր հեռավորությամբ, շուրջ 60 կմ/ժ արագությամբ: Ուղևորներից Ալբերտը նստած է եղել առջևի աջ նստատեղին, իսկ Մարինեն` հետևի նստատեղին: Նույն ուղղությամբ և արագությամբ երբ մոտեցել է թիվ 7 շենքի դիմացի ճանապարհահատվածին, տեսել է, որ իրենից աջ, համընթաց ուղղությամբ, մոտ 1 մետր միջկողային տարածությամբ, իրենից դանդաղ ընթանում է ՙԼեքսուս՚ մակնիշի ավտոմեքենան ու երբ իր ավտոմեքենայի առջևի մասը գրեթե հավասարվել է նշված ՙԼեքսուս՚ մակնիշի ավտոմեքենայի հետևի մասին, տեսել է, որ նշված ավտոմեքենայի վարորդը, միացնելով ձախ լուսային թարթիչը, որոշակի տարածություն ընթանալով` դեպի ձախ է սկսել ընթանալ ու դուրս է եկել իր ընթացքի ուղղությամբ: Տեսնելով ձախակողմյան թարթիչի միանալը և հասկանալով, որ իր դիմաց է դուրս գալու, կտրուկ արգելակել է, սակայն արգելակված անցնելով մոտ 10 մետր տարածություն, ավտոմեքենայի առջևի աջ մասով ընդհարվել է վերը նշված ՙԼեքսուս՚ մակնիշի ավտոմեքենայի ձախակողմյան դռների շրջանին: Վթարի հետևանքով իր ուղևորները ստացել են մարմնական վնասվածքներ, վերջիններիս շտապ բուժօգնության ավտոմեքենան տեղափոխել է հիվանդանոց: Ինքը անվտանգության բարձիկի և ամրագոտու շնորհիվ մարմնական վնասվածք չի ստացել: Մինչ վթարը, ՙԼեքսուս՚ մակնիշի ավտոմեքենան ձախ մանևրման սկզբնապահից մինչ ընդհարման տեղը, իր տեսադաշտում, դեպի ձախ կորագծով անցել է մոտ 7 մետր տարածություն:
Վկա Հակոբ Դավթյանի ցուցմունքով այն մասին, որ ճանաչում է Արայիկ Փիրումյանին և վերջինիս հետ գտնվում է ընկերական հարաբերությունների մեջ: 2013թ. մայիսի սկզբներին մայրը` Հռիփսիկ Սահրադյանը ձեռք է բերել ՙԼեքսուս՚ մակնիշի 35 ST 647 պ/հ ավտոմեքենան, որը չեն շահագործել, քանի որ ո’չ ինքը և ո’չ էլ մայրը չունեն վարորդական իրավունքի վկայական: 2013թ. մայիսի 10-ին Արայիկն իրենից ժամանակավոր օգտագործման համար խնդրել է ՙԼեքսուս՚ մակնիշի 35 ST 647 պ/հ ավտոմեքենան ու ինքը, ստանալով մոր թույլտվությունը, Արայիկին է հանձնել նշված մեքենան: 2013թ. մայիսի 15-ին ժամը 13:20-ի սահմաններում Արայիկի կողմից վարվող վերը նշված մեքենայով ընթացել են Երևան քաղաքի Դ. Անհաղթ փողոցով` Կոմիտաս պողոտայից դեպի Ուլնեցի փողոցի ուղղությամբ: Ինքը նստած է եղել մեքենայի առջևի աջ նստատեղին: Արայիկը մեքնենան վարել է ուղեմասի կենտրոնական գոտով, շուրջ 40 կմ/ժ արագությամբ, որի ընթացքում ցանկանալով չնախատեսված հատվածից հետադարձ կատարել, միացրել է ձախակողմյան լուսային թարթիչը և սկսել է ձախ ընթանալ, սակայն երբ դեպի ձախ թեքությամբ ընթացել են մոտ 6-7 մետր տարածություն, ավտոմեքենայի ձախակողմյան դռների շրջանին է ընդհարվել համընթաց, երրորդ գոտով ընթացող ՙՖոլկսվագեն՚ մակնիշի 34 VU 599 պ/հ ավտոմեքենան: Վթարի արդյունքում ՙՖոլկսվագեն՚ մակնիշի ավտոմքենայի ուղևորները ստացել են մարմնական վնասվածքներ և շտապ բուժօգնության ավտոմեքենայով տեղափոխվել հիվանդանոց:
Վկա Հռիփսիկ Սահրադյանի ցուցմունքով այն մասին, որ ամբաստանյալ Արայիկ Փիրումյանին ճանաչում է վաղուց և նրա ընտանիքի հետ գտնվում է մտերիմ հարաբերությունների մեջ: ՙԼեքսուս՚ մակնիշի 35 ST 647 պ/հ ավտոմեքենան պատկանում է իրեն: Տեղյակ է, որ Արայիկը հանդիսանում է լավ վարորդ և քանի որ ինքն առողջական խնդիրներից ելնելով դժվար է տեղաշարժվում, այդ իսկ պատճառով որոշել է վերջինիս տրամադրել մեքենան իրեն ըստ անհրաժեշտության ցանկացած վայր տեղափոխելու համար: Մեքենան տրամադրել է նաև Արայիկին, երբ անհարժեշտ է եղել նրան կամ նրա ընտանիքին: Այդպես, 2013թ. մայիսի 10-ին ժամանակավոր մեքենան տրամադրել է Արայիկին: 2013թ. մայիսի 15-ին որդուց` Հակոբ Դավթյանից տեղեկացել է, որ այդ օրը Արայիկը նշված ավտոմեքենայով Երևան քաղաքի Դ. Անհաղթ փողոցում վթարի է ենթարկվել և նա է մեղավոր եղել ավտովթարում, որի հետևանքով վթարին մասնակից մյուս մեքենայի ուղևորները ստացել են կոտրվածքներ: Տեղյակ է նաև, որ վթարի պահին որդին գտնվել է մեքենայում, որպես ուղևոր: Ինքն Արայիկի նկատմամբ նյութական պահանջ չունի:
Դատաբժշկական փորձաքննության փորձագետի թիվ 803/հ եզրակացությամբ, ըստ որի Մ. Աթանյանի մարմնական վնասվածքները` դեմքի, ստորին վերջույթների շջանների արյունազեղումների, քերծվածքների, աջ բազկոսկրի փակ կոտրվածքի ձևով, պատճառվել են բութ կոշտ առարկաներով, հնարավոր է նշված ժամկետում և առողջությանը պատճառել են միջին ծանրության վնաս` առողջության տևական քայքայումով, նկատի ունենալով վնասվածքների հետ անմիջական պատճառական կապի մեջ գտնվող հետևանքների տևողությունը ոչ պակաս քսանմեկ օրից: Եթե հետագայում Մ. Աթանյանը ներկայանա ՀՀ ԱՆ ԴԲԳԳԿ և ի հայտ գան նոր տվյալներ, հնարավոր է ՙհետևություններ՚-ում լինեն փոփոխություններ:
Դատաբժշկական փորձաքննության փորձագետի թիվ 804/հ եզրակացությամբ, ըստ որի Ա. Աթանյանի մարմնական վնասվածքները` ճակատային շրջանի քերծվածքի /ներկայումս ապապիգմենտացված տեղամաս/, մեծ թմբկության պոկումով աջ բազկոսկրի վզիկի փակ կոտրվածքի ձևով, պատճառվել են բութ կոշտ առարկաներով, հնարավոր է նշված ժամկետում: Ինչ վերաբերվում է առողջությանը պատճառված վնասի չափին, ապա այն կորոշվի լրացուցիչ` վնասվածքների ելքը պարզ չլինելու պատճառով, ինչի հետ կապված անհրաժեշտ է ապահովել Ա. Աթանյանի ներկայությունը ՀՀ ԱՆ ԴԲԳԳԿ-ում` ապաքինվելուց հետո:
Դատաավտոտեխնիկական փորձաքննության փորձագետի թիվ 21151308 եզրակացությամբ, ըստ որի 1. և 2. Փորձաքննությանը տրամադրված վիճակում ՙLEXUS LS 460L՚ մակնիշի 35 ST 647 հ/հ ավտոմոբիլի բանվորական արգելակային համակարգը գտնվում է աշխատունակ վիճակում և դրա այնպիսի անսարքություններ, որպիսիք գոյություն ունեցած լինեին մինչև տվյալ պատահարը և առաջ բերեին ավտոմոբիլի անկառավարելիություն` ավտոմոբիլի ընթացքի արագությունը կարգավորելու առումով, չհայտնաբերվեցին:
Փորձաքննությանը տրամադրված վիճակում ՙLEXUS LS 460L՚ մակնիշի 35 ST 647 հ/հ ավտոմոբիլի ղեկային կառավարման համակարգը գտնվում է աշխատունակ վիճակում և այդ համակարգի այնպիսի վնասվածքներ կամ անսարքություններ, որպիսիք գոյություն ունեցած լինեին մինչև տվյալ պատահարը և առաջ բերեին ավտոմոբիլի անկառավարելիություն` շարժման ուղղությունը փոխելու առումով, չհայտաբերվեցին:
Փորձաքննությանը տրամադրված վիճակում ՙLEXUS LS 460L՚ մակնիշի 35 ST 647 հ/հ ավտոմոբիլի ընթացային մասը` կախոցներն ու անիվները, գտնվում են աշխատունակ վիճակում և դրանց այնպիսի անսարքություններ, որպիսիք գոյություն ունեցած լինեին մինչև տվյալ պատահարը և առաջ բերեին ավտոմոբիլի ընթացքի անկայունություն կամ անկառավարելիություն, չհայտաբերվեցին:
Փորձաքննությանը տրամադրված վիճակում ՙVOLKSWAGEN GOLF 1.6՚ մակնիշի 34 VU 599 հ/հ ավտոմոբիլի բանվորական արգելակային համակարգը գտնվում է աշխատունակ վիճակում և դրա այնպիսի անսարքություններ, որպիսիք գոյություն ունեցած լինեին մինչև տվյալ պատահարը և առաջ բերեին ավտոմոբիլի անկառավարելիություն` ավտոմոբիլի ընթացքի արագությունը կարգավորելու առումով, չհայտնաբերվեցին:
Փորձաքննությանը տրամադրված վիճակում ՙVOLKSWAGEN GOLF 1.6՚ մակնիշի 34 VU 599 հ/հ ավտոմոբիլի ղեկային կառավարման համակարգն` ի հաշիվ վթարային բնույթի վնասվածքների առկայության, գտնվում է տեխնիկապես անսարք վիճակում, սակայն նշված համակարգի այնպիսի վնասվածքներ կամ անսարքություններ, որպիսիք գոյություն ունեցած լինեին մինչև տվյալ պատահարը և առաջ բերեին ավտոմոբիլի անկառավարելիություն` շարժման ուղղությունը փոխելու առումով, չհայտաբերվեցին:
Փորձաքննությանը տրամադրված վիճակում ի հաշիվ վթարային բնույթի վնասվածքների առկայության` ՙVOLKSWAGEN GOLF 1.6՚ մակնիշի 34 VU 599 հ/հ ավտոմոբիլի առջևի կախոցը գտնվում է տեխնիկապես անաշխատունակ վիճակում, իսկ առջևի աջ կողմի անիվը` ճնշազրկված վիճակում, սակայն ավտոմոբիլի ընթացային մասի` կախոցների և անիվների, այնպիսի վնասվածքներ կամ անսարքություններ, որպիսիք գոյություն ունեցած լինեին մինչև տվյալ պատահարը և առաջ բերեին ավտոմոբիլի ընթացքի անկայունություն կամ անկառավարելիություն, չհայտանբերվեցին:
3. Պատահարից առաջ` մինչ ՙVOLKSWAGEN GOLF 1.6՚ մակնիշի 34 VU 599 հ/հ ավտոմոբիլի կողմից արգելակման հետքերի թողնվելը, այդ ավտոմոբիլի ընթացքի արագությունը եղել է շուրջ 41 կմ/ժ-ից ավելի:
4. և 5. Առաջադրված պայմաններում ՙLEXUS LS 460L՚ մակնիշի ավտոմոբիլի վարորդը, վերադասավորվելու նպատակով ավտոմոբիլի ընթացքի ուղղությունը դեպի ձախ շեղելուց առաջ ճանապարհը չզիջելով համընթաց ուղղությամբ, ձախ կողմից ընթացող ՙVOLKSWAGEN GOLF 1.6՚ մակնիշի ավտոմոբիլին, տեխնիկական տեսակետից թույլ է տվել ՃԵԿ-ի 36 ու 39 կետերի ու ՙՃանապարհային երթևեկության անվտանգության ապահովման մասին՚ ՀՀ օրենքի հոդված 23-ի 3 կետի պահանջներին հակասող գործողություններ, տեխնիկական տեսակետից ստեղծել վթարային իրադրություն, դրանով իսկ պայմանավորել տվյալ պատահարի առաջացումն` ինքն իրեն զրկելով այն կանխելու տեխնիկական հնարավորությունից:
Առաջադրված պայմաններում ՙLEXUS LS 460L՚ մակնիշի ավտոմոբիլի վարորդը, երթևեկության անվտանգությունն ապահովելու նպատակով վերադասավորվելուց առաջ պետք է ոչ միայն նախօրոք միացներ դեպի ձախ շրջադարձի լուսային ցուցիչները ¥ինչը, ընդ որում, երթևեկության մյուս մասնակիցների նկատմամբ դեռևս առավելություն չի տալիս), այլև, հետևելով ողջ ճանապարհատրանսպորտային իրադրության զարգացմանը, ճանապարհը զիջեր համընթաց ուղղությամբ ձախ կողմից ընթացող տրանսպորտային միջոցներին, մասնավորապես, ՙVOLKSWAGEN GOLF 1.6՚ մակնիշի ավտոմոբիլին, այն հաշվով, որպեսզի վերջինիս վարորդին չստիպեր փոխելու ավտոմոբիլի ընթացքի ուղղությունը կամ արագությունը, որից հետո միայն համոզվելով վերադասավորվելու առումով շարժման ուղղության փոփոխության անվտանգության մեջ, իրականացներ մանևրը:
ՙVOLKSWAGEN GOLF 1.6՚ մակնիշի 34 VU 599 հ/հ ավտոմոբիլի վարորդի կողմից ընդհարումը կանխելու տեխնիկական հնարավորության հարցը պարզաբանելու, ինչպես նաև վարորդի գործողությունները Հայաստանի Հանրապետության ճանապարհային երթևեկության կանոնների ու ՙՃանապարհային երթևեկության անվտանգության ապահովման մասին՚ ՀՀ օրենքի պահանջների տեսանկյունից գնահատելու համար, անհրաժեշտ է քննությամբ ճշտել ՙVOLKSWAGEN GOLF 1.6 մակնիշի ավտոմոբիլի վարորդի գործողությունների տեխնիկական վերլուծություն՚ մասում նշված հակասությունը և ձեռք բերել ու փորձաքննությանն առաջադրել ընդհարմանը նախորդող պահին դրան մասնակից ավտոմոբիլների շարժումը բնութագրող այնպիսի պարամետրեր, որոնք համապատասխանում են տվյալ պատահարի առաջացման մեխանիզմին:
Դատաավտոտեխնիկական փորձաքննության փորձագետի թիվ 25411308 եզրակացությամբ, ըստ որի 1. Առաջադրված պայմաններում ՙVOLKSWAGEN GOLF 1.6՚ մակնիշի 34 VU 599 հ/հ ավտոմոբիլի վարորդի կողմից թույլ տրված այնպիսի գործողություններ, որպիսիք տեխնիկական տեսակետից հակասեին ՃԵԿ-ի պահանջներին և պայմանավորած լինեին տվյալ ընդհարման առաջացումը, չեն դիտվում:
2.Առաջադրված պայմաններում ՙVOLKSWAGEN GOLF 1.6՚ մակնիշի 34 VU 599 հ/հ ավտոմոբիլի վարորդը տվյալ ընդհարումը կանշելու տեխնիկական հնարավորություն չի ունեցել:
Ճանապարհատրանսպորտային դեպքի վայրի զննության մասին արձանագրությամբ այն մասին, որ դեպքը տեղի է ունեցել Երևան քաղաքի Դ. Անհաղթ փողոցում` թիվ 7 շենքի դիմաց, որտեղ փողոցն ասֆալտապատ է, հարթ, ուղիղ և հորիզոնական: Դ. Անհաղթ փողոցը զույգ հոծ գծանշումներով բաժանված է երթևեկելի երկու ուղեմասերի, որոնք իրենց հերթին բաժանված են երեք ուղեգոտիների: Դ. Անհաղթ փողոցի Կ. Ուլնեցի փողոցի կողմ տանող ուղեմասը, որով մինչ դեպքը երթևեկել են վթարին մասնակից ավտոմեքենաները, բաժանված է երեք ուղեգոտիների, համապատասխանաբար` 5,9, 4 և 3,5 մետր չափերով: Դեպքի վայրի զննությամբ հայտնաբերվել են ՙՖոլկսվագեն՚ մակնիշի ավտոմեքենայի կողմից թողնված զույգ արգելակային հետքեր` 4,6 և 10,3 մետր երկարություններով: Դեպքի պահին եղանակը եղել է պարզ, առանց տեղումների, ասֆալտը չոր, տեսանելությունը բավարար: Վթարին մասնակից վարորդները գտնվել են սթափ վիճակում: Դեպքի վայրում ճանապարհային նշաններ չկան: Հետվթարային դիրքում ՙՖոլկսվագեն՚ մակնիշի ավտոմեքենան կանգնած է եղել Դ. Անհաղթ փողոցում` թիվ 7 շենքի դիմաց, փողոցի կենտրոնական հատվածում` առջևի մասով դեպի Կ. Ուլնեցի փողոցի ուղղությամբ, 0,7 մետրի չափով մուտք գործած Դ. Անհաղթ փողոցի դեպի Կոմիտաս պողոտայի կողմ տանող ուղեմաս: Նշված ավտոմեքենայից 1,4 մետր առաջ, երթևեկությանը թեքությամբ, դեպի Կ. Ուլնեցի փողոցի կողմ տանող ուղեմասում, ուղեգոտիները բաժանող գծանշումներից 0,6 և 1,6 մետր հեռավորությամբ, կանգնած է ՙԼեքսուս՚ մակնիշի ավտոմեքենան:
ՙՖոլկսվագեն՚ մակնիշի 34 VU 599 պ/հ ավտոմեքենայի զննության արձանագրությամբ այն մասին, որ վթարի հետևանքով կոտրված են առջևի աջ և ձախ լուսարձակները, առջևի պաշտպանիչ և դեկորատիվ վահանակները, առջևի դիմապակին, դեֆորմացված են շարժիչի ծածկոցը, առջևի աջ և ձախ անվաթևերը, առջևի աջ դուռը բացված են սրահի անվտանգության բարձիկները:
ՙԼեքսուս՚ մակնիշի 35 ST 647 պ/հ ավտոմեքենայի զննության արձանագրությամբ այն մասին, որ վթարի հետևանքով դեֆորմացված է ձախակողմյան առջևի և հետևի դռները, բացված են սրահի անվտանգության բարձիկները:
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ` դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալ Ա. Փիրումյանը կատարել է հանցավոր արարք, որը համապատասխանում է ՀՀ քրեական օրենսգրքի 242-րդ հոդվածի 1-ին մասի հատկանիշներին, որով էլ նա ենթակա է քրեական պատասխանատվության:
Ամբաստանյալի նկատմամբ պատիժ նշանակելիս դատարանը հաշվի է առնում ինչպես կատարած հանցագործության բնույթն ու հանրության համար վտանգավորության աստիճանը, այնպես էլ ամբաստանյալի անձը բնութագրող տվյալները` այն, որ ամբաստանյալը նախկինում դատված ու արատավորված չի եղել:
Որպես ամբաստանյալի պատասխանատվությունը և պատիժը մեղմացնող հանգամանքներ դատարանը դիտում է այն, որ ամբաստանյալն առաջին անգամ հանգամանքների պատահական զուգորդմամբ է կատարել ոչ մեծ ծանրության հանցանքը, ինչպես նաև այն, որ նրա խնամքի տակ է գտնվում անչափահաս որդին /ծնված 21.11.1997թ.-ին/:
Որպես ամբաստանյալի պատասխանատվությունը և պատիժը ծանրացնող հանգամանք դատարանը չի հայտնաբերել:
Նման պայմաններում դատարանը գտնում է, որ ամբաստանյալ Արայիկ Փիրումյանն իր կատարած հանցանքի համար ենթակա է պատժի, որը պետք է կրի, իսկ նրա նկատմամբ որպես խափանման միջոց կիրառված չհեռանալու մասին ստորագրությունը պետք է թողնել անփոփոխ` մինչև դատավճռի օրինական ուժի մեջ մտնելը:
Անդրադառնալով տուժողի ներկայացուցիչ Գեղամ Հակոբյանի և քաղաքացիական հայցվոր Ալբերտ Աթանյանի կողմից ներկայացված քաղաքացիական հայցերին` դատարանը գտնում է, որ դրանք պետք է թողնել առանց քննության, քանի որ ըստ ամբաստանյալի ցուցմունքի ՙՌոսգոսստրախ-Արենիա՚ ԱՓԲ ընկերության կողմից կատարվել են փոխհատուցումներ, սակայն գործում բացակայում են տվյալներ այն մասին, թե ինչ չափով և ինչի համար են կատարվել այդ փոխհատուցումները, և միաժամանակ նկատի ունենալով, որ ներկայացված քաղաքացիական հայցերը վերաբերվում են նաև հանցագործությամբ անմիջականորեն չպատճառված վնասին /բաց թողնված օգուտներին/, ուստի դատարանը գտնում է, որ այս հիմքով տուժողի ներկայացուցիչ Գեղամ Հակոբյանի և քաղաքացիական հայցվոր Ալբերտ Աթանյանի կողմից ներկայացված քաղաքացիական հայցերը պետք է թողնել առանց քննության: Միաժամանակ, դատարանը գտնում է, որ նրանց պետք է իրավունք վերապահել քաղաքացիական հայցերը լուծել քաղաքացիական դատավարության կարգով, քանի որ ՀՀ քրեական դատավարության օրենսգրքի 155-րդ հոդվածի 3-րդ մասի համաձայնª քրեական դատավարությունում հարուցված քաղաքացիական հայցը, որը դատարանի կողմից թողնվել է առանց քննության, կարող է հետագայում հարուցվել քաղաքացիական դատավարության կարգով:
Դատարանն անդրադառնալով ՀՀ ոստիկանության ՔԳՎ Երևան քաղաքի քննչական վարչության ՃՏՀ քննության բաժնի ավագ քննիչ Ա. Մարգարյանի 21.08.2013թ.-ի գույքի վրա կալանք դնելու մասին որոշմամբ Հռիփսիկ Սարգսի Սահրադյանին պատկանող, ավտովթարին մասնակից ՙԼեքսուս՚ մակնիշի 35 ST 647 պ/հ ավտոմեքենայի վրա դրված կալանքին` գտնում է, որ նշված ավտոմեքենայի վրա դրված կալանքը պետք է պահպանել նաև դատավճիռն օրինական ուժի մեջ մտնելուց հետո մեկ ամսվա ընթացքում:
Նկատի ունենալով, որ սույն քրեական գործով նախաքննության ընթացքում անցկացված թիվ 21151308 դատաավտոտեխնիկական փորձաքննության արժեքը կազմել է 55.800 /հիսունհինգ հազար ութ հարյուր/ ՀՀ դրամ, թիվ 25411308 դատաավտոտեխնիկական փորձաքննության արժեքը կազմել է 13.950 /տասներեք հազար ինը հարյուր հիսուն/ ՀՀ դրամ, թիվ 804/հ դատաբժշկական փորձաքննության արժեքը` 8000 /ութ հազար/ ՀՀ դրամ և թիվ 803/հ դատաբժշկական փորձաքննության արժեքը` 8000 /ութ հազար/ ՀՀ դրամ, իսկ համաձայն ՀՀ քրեական դատավարության օրենսգրքի 168-րդ հոդվածի դատական ծախսերը բաղկացած են`... 3/ մասնագետի, փորձագետի, թարգմանչի վարձատրության գումարներից ... և այլն ու, բացի այդ, ՀՀ քրեական դատավարության օրենսգրքի 169-րդ հոդվածի 1-ին մասի համաձայն նույն օրենսգրքի 168-րդ հոդվածի առաջին մասի 1-6-րդ կետերում թվարկված դատական ծախսերը կարող են դատարանի կողմից դրվել դատապարտյալի վրա, ուստի դատարանը գտնում է, որ փորձաքննությունների ընդհանուր արժեք կազմող 85.750 /ութսունհինգ հազար յոթ հարյուր հիսուն/ ՀՀ դրամ գումարը, հօգուտ պետական բյուջեի ենթակա է բռնագանձման ամբաստանյալ Արայիկ Փիրումյանից:
Ղեկավարվելով ՀՀ քրեական դատավարության օրենսգրքի 155-րդ,163-րդ, 168-169-րդ, 238-րդ, 357-360-րդ, 365-րդ, 367-րդ, 369-373-րդ հոդվածներով` դատարանը

Վ Ճ Ռ Ե Ց

Ամբաստանյալ Արայիկ Սուրենի Փիրումյանին մեղավոր ճանաչել ՀՀ քրեական օրենսգրքի 242-րդ հոդվածի 1-ին մասով նախատեսված հանցանք կատարելու մեջ և դատապարտել տուգանքի` նվազագույն աշխատավարձի երկուհարյուրապատիկի` 200.000 /երկու հարյուր հազար/ ՀՀ դրամի չափով:
Արայիկ Փիրումյանի նկատմամբ որպես խափանման միջոց կիրառված չհեռանալու մասին ստորագրությունը թողնել անփոփոխ` մինչև դատավճռի օրինական ուժի մեջ մտնելը:
Տուժող Մարինե Աթանյանի ներկայացուցիչ Գեղամ Հակոբյանի և քաղաքացիական հայցվոր Ալբերտ Աթանյանի կողմից ներկայացված քաղաքացիական հայցերը թողնել առանց քննության, նրանց իրավունք վերապահելով քաղաքացիական հայցերը լուծելու քաղաքացիական դատավարության կարգով:
ՀՀ ոստիկանության ՔԳՎ Երևան քաղաքի քննչական վարչության ՃՏՀ քննության բաժնի ավագ քննիչ Ա. Մարգարյանի 21.08.2013թ.-ի գույքի վրա կալանք դնելու մասին որոշմամբ Հռիփսիկ Սարգսի Սահրադյանին պատկանող, ավտովթարին մասնակից ՙԼեքսուս՚ մակնիշի 35 ST 647 պ/հ ավտոմեքենայի վրա դրված կալանքը` պահպանել նաև դատավճիռն օրինական ուժի մեջ մտնելուց հետո մեկ ամսվա ընթացքում:
Արայիկ Փիրումյանից, որպես դատական ծախս, հօգուտ պետական բյուջեի բռնագանձել ընդհանուր 85.750 /ութսունհինգ հազար յոթ հարյուր հիսուն/ ՀՀ դրամը:
Դատավճիռը կարող է բողոքարկվել ՀՀ քրեական վերաքննիչ դատարան հրապարակվելու օրվանից հետո մեկամսյա ժամկետում:

դատավոր` ստորագրություն
Բնագրի հետ ճիշտ է`
դատավոր` Ա. Խաչատրյան