ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ՔՐԵԱԿԱՆ ՎԵՐԱՔՆՆԻՉ ԴԱՏԱՐԱՆ


Երևան քաղաքի Արաբկիր և Քանաքեռ-Զեյթուն
վարչական շրջանների ընդհանուր իրավասության
դատարանի դատավճիռ գործ թիվ ԵԱՔԴ/0126/01/13
նախագահող դատավոր` Լ.Ավետիսյան


Ո Ր Ո Շ ՈՒ Մ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

10 դեկտեմբերի 2013թ. ք.Երևան


ՀՀ ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆԸ
/այսուհետ` Վերաքննիչ դատարան/ հետևյալ կազմով`

ՆԱԽԱԳԱՀՈՂ ԴԱՏԱՎՈՐ` Ե.ԴԱՐԲԻՆՅԱՆ
ԴԱՏԱՎՈՐՆԵՐ` Գ.ԱՎԵՏԻՍՅԱՆ
Ս.ՉԻՉՈՅԱՆ
ՔԱՐՏՈՒՂԱՐՈՒԹՅԱՄԲ` Տ.Հակոբյանի

ՄԱՍՆԱԿՑՈՒԹՅԱՄԲ`
ԲՈՂՈՔ ԲԵՐԱԾ ԱՆՁ ՄԵՂԱԴՐՈՂ` Տ.Կարապետյանի
ԱՄԲԱՍՏԱՆՅԱԼ` Գ.Վարդապետյանի

Դռնբաց դատական նիստում, Երևանի կայազորի զինվորական դատախազության դատախազ Տ.Կարապետյանի վերաքննիչ բողոքի հիման վրա, քննության առնելով քրեական գործն ըստ մեղադրանքի Գերասիմ Գեղամի Վարդապետյանի` ՀՀ քրեական օրենսգրքի 364-րդ հոդվածի 1-ին մասով,

Պ Ա Ր Զ Ե Ց

ԳՈՐԾԻ ԴԱՏԱՎԱՐԱԿԱՆ ՆԱԽԱՊԱՏՄՈՒԹՅՈՒՆԸ
1. 2013 թվականի հունիսի 27-ին Երևանի կայազորի զինվորական դատախազությունում ՀՀ քրեական օրենսգրքի 364-րդ հոդվածի 1-ին մասով նախատեսված հանցագործության հատկանիշներով հարուցվել է թիվ 90209713 քրեական գործը:
2. 2013 թվականի հունիսի 28-ին թիվ 90209713 քրեական գործը ՀՀ ՊՆ քննչական ծառայության 4-րդ կայազորային քննչական բաժնում ընդունվել է վարույթ և կատարվել նախաքննություն:
3. Նախաքննության մարմնի 2013 թվականի հուլիսի 23-ի որոշմամբ Գերասիմ Գեղամի Վարդապետյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 364-րդ հոդվածի 1-ին մասով:
4. Նույն օրը նրա նկատմամբ որպես խափանման միջոց է ընտրվել զորամասի հրամանատարության հսկողությանը հանձնելը:
5. 2013 թվականի հուլիսի 31-ին թիվ 90209713 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան (այսուհետև նաև` Դատարան):
6. Առաջին ատյանի դատարանն իր 17.09.2013թ. դատավճռով վճռել է`
<<Գերասիմ Գեղամի Վարդապետյանին մեղավոր ճանաչել ՀՀ քրեական օրենսգրքի 364 հոդվածի 1-ին մասով նախատեսված հանցանք կատարելու մեջ և նրան դատապարտել կալանքի տասնհինգ (15) օր ժամկետով:
Պատիժը պետք է կրի համապատասխան քրեակատարողական հիմնարկում:
Պատժի սկիզբը հաշվել Գերասիմ Վարդապետյանին կալանքի վերցնելու օրվանից:
Գերասիմ Վարդապետյանի նկատմամբ կիրառված խափանման միջոցը` հրամանատարության հսկողությանը հանձնելը, թողնել անփոփոխ, մինչև դատավճռի օրինական ուժի մեջ մտնելը:>>
7. Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանն իր <<Համաներման կիրառմամբ պատժից ազատելու մասին>> 2013թ. հոկտեմբերի 17-ի որոշմամբ` Գերասիմ Գեղամի Վարդապետյանին ՀՀ Ազգային ժողովի <<Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին>> 2013 թվականի հոկտեմբերի 3-ի որոշման 1-ին կետի 3-րդ ենթակետի կիրառմամբ ազատել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 2013 թվականի սեպտեմբերի 17-ի դատավճռով նշանակված պատժից` տասնհինգ (15) օր ժամկետով կալանքից:
8. Առաջին ատյանի դատարանի 17.10.2013թ. որոշման դեմ վերաքննիչ բողոք է բերել Երևանի կայազորի զինվորական դատախազության դատախազ Տ.Կարապետյանը:
9. Վերաքննիչ դատարանի 2013թ. նոյեմբերի 22-ի որոշմամբ բողոքն ընդունվել է վարույթ և քրեական գործը նշանակվել է քննության վճռաբեկության կարգով:
10. Վերաքննիչ բողոքի դեմ գրավոր պատասխան չի ներկայացվել:

ԳՈՐԾԻ ՓԱՍՏԱԿԱՆ ՀԱՆԳԱՄԱՆՔՆԵՐԸ.
11. Նախնական քննության մարմինն ամբաստանյալ Գերասիմ Գեղամի Վարդապետյանին ՀՀ քրեական օրենսգրքի 364-րդ հոդվածի 1-ին մասով մեղադրանք է առաջադրել այն արարքի կատարման համար, որ նա, հանդիսանալով ՀՀ ՊՆ 31549 զորամասի ժամկետային զինծառայող, կոչումով շարքային, գումարտակի հրամանատարի կողմից նախապես հաստատված գրաֆիկի համաձայն 14.06.2013թ. ժամը 18:00-ից մինչև 15.06.2013թ. ժամը 18:00-ն ընդգրկված լինելով ճաշարանի վերակարգում, 14.06.2013թ. ժամը 19:00-ից մինչև 14.06.2013թ. ժամը 23:15-ը հրաժարվել է զինվորական ծառայության առանձին պարտականությունները կատարելուց, որը զուգորդվել է դրանց փաստացի դադարեցմամբ` առանց թույլտվության զորամասի տարածքը ինքնակամ թողնելով:

ՎԵՐԱՔՆՆԻՉ ԲՈՂՈՔԻ ՀԻՄՔԵՐԸ, ՀԻՄՆԱՎՈՐՈՒՄՆԵՐԸ, ԵՎ ՊԱՀԱՆՋԸ.
12. Վերաքննիչ բողոքը բերվել է հետևյալ հիմքերի սահմաններում, ներքոհիշյալ հիմնավորումներով.
Երևանի կայազորի զինվորական դատախազության դատախազ Տ.Կարապետյանը վերաքննիչ բողոքում նշել է, որ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի պատժից ազատելու մասին 17.10.2013թ. որոշումն անհիմն է, դրա կայացումը հանգեցրել է դատավարական իրավունքի խախտման, ուստի ենթակա է բեկանման հետևյալ պատճառաբանությամբ.
Մեջբերելով ՀՀ ԱԺ կողմից 03.10.2013թ. ընդունված <<Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին>> որոշման 1-ին կետը` նշել է, որ Առաջին ատյանի դատարանը, նկատի ունենալով, որ առկա չեն վերը նշված ԱԺ որոշման կիրառման 8-րդկետի 4-6-րդ ենթակետերով և 9-րդ կետով նախատեսված համաներման կիրառման սահմանափակումներ, հիմք ընդունելով որոշման 1-ին կետի 3-րդ ենթակետը, 17.10.2013թ. որոշում է կայացրել ամբաստանյալ Գերասիմ Գեղամի Վարդապետյանին պատժից ազատելու մասին այն դեպքում, երբ 17.09.2013թ. թիվ ԵԱՔԴ/0126/01/13 դատավճիռն օրինական ուժի մեջ չի մտել:
Հղում կատարելով ՀՀ քրեական դատավարության օրենսգրքի 427-րդ հոդվածի 1-ին մասին, 379-րդ հոդվածի 1-ին մասին, ՀՀ ԱԺ կողմից 03.10.2013թ. ընդունված <<Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին>> որոշման 5-րդ կետի 2-րդ ենթակետին, ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետին` նշել է, որ Առաջին ատյանի դատարանն իր իսկ կողմից 17.09.2013թ. կայացված ԵԱՔԴ/0126/01/13 դատավճիռը դեռևս օրինական ուժի մեջ մտած չլինելու պայմաններում անհիմն կիրառել է ՀՀ ԱԺ կողմից 03.10.2013թ. ընդունված <<Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին>> որոշման 1-ին կետի 3-րդ ենթակետը` 17.10.2013թ. որոշում է կայացրել ամբաստանյալ Գերասիմ Վարդապետյանին պատժից ազատելու մասին, այնինչ վերոգրյալ պայմաններում պետք է կիրառեր վերը նշված որոշման 5-րդ կետի 2-րդ ենթակետը, ինչի կիրառման պարագայում քրեական գործի վարույթը ՀՀ քրեական դատավարության օրենսգրքի 35-րդ հոդվածով նախատեսված կարգով ենթակա է կարճման, այսինքն` Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի կողմից համաներման ակտի դրույթների ոչ ճիշտ կիրառումը հանգեցրել է դատավարական իրավունքի խախտման այն դեպքում, երբ համաներման կիրառման դատավարական բաղադրիչի պահպանումը կարևոր նշանակություն ունի օրենքի միատեսակ կիրառության համար, քանզի հանցանք կատարած անձին օրենսդիր մարմնի կողմից ընդունված որոշմամբ քրեական պատասխանատվությունից ազատելը չպետք է լինի ինքնանպատակ:
Խնդրել է ամբողջությամբ բեկանել Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի կողմից ամբաստանյալ Գերասիմ Գեղամի Վարդապետյանին պատժից ազատելու մասին 17.10.2013թ. կայացված որոշումը և ՀՀ ԱԺ կողմից 03.10.2013թ. ընդունված <<Հայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին>> որոշման 5-րդ կետի 2-րդ ենթակետի կիրառմամբ կարճել N 90209713 քրեական գործիվարույթը:

ՎԵՐԱՔՆՆԻՉ ԴԱՏԱՐԱՆԻ ՊԱՏՃԱՌԱԲԱՆՈՒԹՅՈՒՆՆԵՐԸ ԵՎ ԵԶՐԱՀԱՆԳՈՒՄԸ.
13. Վերաքննիչ դատարանը, քննության առնելով վերաքննիչ բողոքը` բողոքի հիմքերի և հիմնավորումների սահմաններում, լսելով նաև բողոքում ներկայացված հետևությունները հիմնավորելու մասին մեղադրողի պատճառաբանությունները, ինչպես նաև ուսումնասիրելով և վերլուծելով գործի նյութերը, դրանք գնահատելով իրենց համակցությամբ, հանգում է այն հետևության, որ մեղադրող Տ.Կարապետյանի վերաքննիչ բողոքը պետք է բավարարել, հետևյալ պատճառաբանությամբ.
03.10.2013թ. ՀՀ Ազգային Ժողովի կողմից ընդունվել է <<ՀՀ անկախության հռչակման 22-րդ տարեդարձի կապակցությամբ համաներում հայտարարելու մասին>> որոշում, որի 5-րդ կետի 2-րդ ենթակետի համաձայն` <<Քրեական հետապնդում չհարուցել և քրեական հետապնդում չիրականացնել, ինչպես նաև կարճել մինչև 2013 թվականի սեպտեմբերի 1-ը կատարած հանցագործությունների վերաբերյալ հետաքննության մարմինների, նախաքննության մարմինների կամ դատարանների վարույթում գտնվող քրեական գործերը, բացառությամբ սույն որոշման 8-րդ կետի 4-6-րդ ենթակետերով և 9-րդ կետով նախատեսված դեպքերի, որոնցով` անձինք կարող են մեղադրվել կամ մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ` ոչ ավելի, քան երեք տարի ժամկետով ազատազրկում.>>:
Որոշման 1-ին կետի 3-րդ ենթակետի համաձայն` <<Պատժից ազատել, բացառությամբ սույն որոշման 8-րդ կետի 4-6-րդ ենթակետերով և 9-րդ կետով նախատեսված դեպքերի` այն անձանց, որոնց նկատմամբ նշանակվել է առավելագույնը երեք տարի ժամկետով ազատությունից զրկելու հետ կապված պատիժ>>:
Վաղինակ Վահրամի Բաբերցյանին մեղադրանք է առաջադրվել ՀՀ քրեական օրենսգրքի 364-րդ հոդվածի 1-ին մասով, համաձայն որի`
<< Զինվորական ծառայությունից կամ դրա առանձին պարտականությունները կատարելուց զինծառայողի հրաժարվելը, որը զուգորդվել է դրանց չկատարմամբ կամ փաստացի դադարեցմամբ`
պատժվում է կալանքով՝ առավելագույնը երեք ամիս ժամկետով, կամ կարգապահական գումարտակում պահելով՝ առավելագույնը երկու տարի ժամկետով, կամ ազատազրկմամբ՝ առավելագույնը երկու տարի ժամկետով:>>:
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 17.09.2013թ. դատավճռով Գերասիմ Գեղամի Վարդապետյանը մեղավոր է ճանաչվել ՀՀ քրեական օրենսգրքի 364 հոդվածի 1-ին մասով նախատեսված հանցանք կատարելու մեջ և դատապարտվել է կալանքի տասնհինգ (15) օր ժամկետով:
14. ՀՀ քրեական դատավարության օրենսգրքի 395-րդ հոդվածի համաձայն`
<< Բողոքարկված դատական ակտը բեկանվում կամ փոխվում է, եթե թույլ է տրվել դատական սխալ, այն է`
(…)
2) ճիշտ չի կիրառվել քրեական օրենքը կամ Հայաստանի Հանրապետության միջազգային պայմանագիրը. (…)>>:
Նույն օրենսգրքի 397-րդ հոդվածի համաձայն`
<< 1. Քրեական օրենքի կամ միջազգային պայմանագրի ոչ ճիշտ կիրառումը քրեական օրենքի կամ Հայաստանի Հանրապետության միջազգային պայմանագրի այն հոդվածի կամ հոդվածի այն մասի կիրառումն է, որը ենթակա չէր կիրառման, կամ այն հոդվածի կամ հոդվածի այն մասի չկիրառումն է, որը ենթակա էր կիրառման, կամ քրեական օրենքի կամ միջազգային պայմանագրի սխալ մեկնաբանումն է, որը չի համապատասխանում դրա իսկական իմաստին:(...)>>:
ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի համաձայն` <<Քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե` ընդունվել է համաներման ակտ:>>:
ՀՀ քրեական օրենսգրքի 82-րդ հոդվածի համաձայն`
<<Հանցանք կատարած անձն օրենսդիր մարմնի կողմից ընդունվող համաներման ակտով կարող է ազատվել քրեական պատասխանատվությունից, իսկ դատապարտյալը կարող է լրիվ կամ մասնակիորեն ազատվել ինչպես հիմնական, այնպես էլ լրացուցիչ պատժից, կամ պատժի չկրած մասը կարող է փոխարինվել ավելի մեղմ պատժատեսակով, կամ կարող է վերացվել դատվածությունը:>>:
15. Գործի նյութերից երևում է, որ Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանն իր <<Համաներման կիրառմամբ պատժից ազատելու մասին>> 2013թ. հոկտեմբերի 17-ի որոշմամբ ամբաստանյալ Գերասիմ Վարդապետյանի նկատմամբ ՀՀ Ազգային Ժողովի` 03.10.2013թ. <<ՀՀ անկախության հռչակման 22-րդ տարեդարձի կապակցությամբ համաներում հայտարարելու մասին>> որոշման 5-րդ կետի 2-րդ ենթակետը կիրառելու փոխարեն կիրառել է նույն որոշման 1-ին կետի 3-րդ ենթակետը` նրան ազատել է նշանակված պատժից, այսինքն` կիրառել է համաներման մասին որոշման այն նորմը, որը ենթակա չէր կիրառման և չի կիրառել այն նորմը, որը ենթակա էր կիրառման, որով թույլ է տրվել ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի և ՀՀ քրեական օրենսգրքի 82-րդ հոդվածի վերը նշված պահանջների խախտում, ինչը և ՀՀ քրեական դատավարության օրենսգրքի 395-րդ հոդվածի համաձայն դատական ակտի բեկանման հիմք է հանդիսանում:
Ելնելով վերը շարադրվածից` Վերաքննիչ դատարանն արձանագրում է, որ Գերասիմ Վարդապետյանի նկատմամբ պետք է կիրառել ՀՀ Ազգային Ժողովի` 03.10.2013թ. <<ՀՀ անկախության հռչակման 22-րդ տարեդարձի կապակցությամբ համաներում հայտարարելու մասին>> որոշման 5-րդ կետի 2-րդ ենթակետը` վերջինիս նկատմամբ ՀՀ քրեական օրենսգրքի 364-րդ հոդվածի 1-ին մասով քրեական գործի վարույթը կարճել, դադարեցնել քրեական հետապնդումը:
Գործի նյութերով հիմնավորվել է, որ սույն քրեական գործով ամբաստանյալ Գերասիմ Վարդապետյանի նկատմամբ ՀՀ Ազգային Ժողովի` 03.10.2013թ. <<ՀՀ անկախության հռչակման 22-րդ տարեդարձի կապակցությամբ համաներում հայտարարելու մասին>> որոշման կիրառման սահմանափակում նախատեսող որևէ նորմ առկա չէ:
16. ՀՀ Ազգային Ժողովի` 03.10.2013թ. <<ՀՀ անկախության հռչակման 22-րդ տարեդարձի կապակցությամբ համաներում հայտարարելու մասին>> որոշման 13-րդ կետի համաձայն`
<<Սույն որոշման կատարումը վերապահել`
1) Հայաստանի Հանրապետության ընդհանուր իրավասության առաջին ատյանի և վերաքննիչ քրեական դատարաններին`
ա. այն անձանց նկատմամբ, որոնց վերաբերյալ գործերը Հայաստանի Հանրապետության ընդհանուր իրավասության առաջին ատյանի կամ վերաքննիչ քրեական դատարաններում են, սակայն մինչև սույն որոշումն ուժի մեջ մտնելը չեն քննվել, կամ այն անձանց նկատմամբ, որոնց վերաբերյալ գործերը քննվել են, բայց դատավճիռներն օրինական ուժի մեջ չեն մտել, (...)>>:
Այսպիսով, Վերաքննիչ դատարանը գտնում է, որ դատախազ Տ.Կարապետյանի վերաքննիչ բողոքը պետք է բավարարել, իսկ Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 2013 թվականի սեպտեմբերի 17-ի դատավճիռը և <<Համաներման կիրառմամբ պատժից ազատելու մասին>> 2013թ. հոկտեմբերի 17-ի որոշումը պետք է բեկանել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետով, 393-395-րդ, 397-րդ, 402-րդ, 412-րդ և 418-րդ հոդվածներով` Վերաքննիչ քրեական դատարանը

Ո Ր Ո Շ Ե Ց

1. Երևանի կայազորի զինվորական դատախազության դատախազ Տ.Կարապետյանի վերաքննիչ բողոքը բավարարել:
2. Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի` Գերասիմ Գեղամի Վարդապետյանի նկատմամբ <<Համաներման կիրառմամբ պատժից ազատելու մասին>> 2013թ. հոկտեմբերի 17-ի որոշումը բեկանել:
3. Գերասիմ Գեղամի Վարդապետյանի նկատմամբ կիրառել ՀՀ Ազգային Ժողովի` 03.10.2013թ. <<ՀՀ անկախության հռչակման 22-րդ տարեդարձի կապակցությամբ համաներում հայտարարելու մասին>> որոշման 5-րդ կետի 2-րդ ենթակետը և Գերասիմ Գեղամի Վարդապետյանի նկատմամբ` ՀՀ քրեական օրենսգրքի 364-րդ հոդվածի 1-ին մասով քրեական գործի վարույթը կարճել, դադարեցնել քրեական հետապնդումը:
4. Գերասիմ Գեղամի Վարդապետյանի նկատմամբ որպես խափանման միջոց ընտրված զորամասի հրամանատարությանը հանձնելը վերացնել:
5. Որոշումը կարող է բողոքարկվել ՀՀ Վճռաբեկ դատարան հրապարակման պահից` մեկամսյա ժամկետում:


ՆԱԽԱԳԱՀՈՂ ԴԱՏԱՎՈՐ ստորագրություն
ԴԱՏԱՎՈՐՆԵՐ ստորագրություններ

Իսկականի հետ ճիշտ է

ՆԱԽԱԳԱՀՈՂ ԴԱՏԱՎՈՐ Ե. ԴԱՐԲԻՆՅԱՆ