ԵԱՔԴ/0125/01/13
Ո Ր Ո Շ ՈՒ Մ

քրեական հետապնդումը դադարեցնելու և քրեական գործի վարույթը կարճելու մասին

24 հոկտեմբերի 2013թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը` նախագահությամբ դատավոր Լ.Ավետիսյանի, քարտուղարությամբ Ե.Կարապետյանի, մասնակցությամբ ամբաստանյալ Լ.Մկրտչյանի, պաշտպան Ռ.Սաֆարյանի, մեղադրող Ա.Ամիրյանի, դռնբաց դատական նիստում քննեց քրեական գործն ըստ մեղադրանքի Լավրենտի Մայիսի Մկրտչյանի (ծնված 1993 թվականի սեպտեմբերի 10-ին, Շիրակի մարզի Գետափ գյուղում, ազգությամբ հայ, ՀՀ քաղաքացի, միջնակարգ կրթությամբ, ամուրի, նախկինում դատված` Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 20.05.2013թ. դատավճռով ՀՀ քրեական օրենսգրքի 34-177 հոդվածի 2-րդ մասի 3-րդ կետով դատապարտվել է տուգանքի 500.000 ՀՀ դրամի չափով, 26.12.2011թ. զորակոչվել է ՀՀ զինված ուժեր, ծառայում է ՀՀ ՊՆ 24923 զորամասում, որպես 4-րդ ջոկատի հետախույզ-ռադիոհեռագրավար, կոչումով շարքային, հաշվառված և բնակվել է Շիրակի մարզի Գետափ գյուղի 4-րդ փողոցի 1 տուն հասցեում) ՀՀ քրեական օրենսգրքի 361 հոդվածի 1-ին մասով, որպես խափանման միջոց է ընտրվել հրամանատարության հսկողությանը հանձնելը:
Պ Ա Ր Զ Ե Ց

2013 թվականի հուլիսի 2-ին Երևանի կայազորի զինվորական դատախազությունում ՀՀ քրեական օրենսգրքի 361 հոդվածի 1-ին մասով նախատեսված հանցագործության հատկանիշներով հարուցվել է թիվ 90210013 քրեական գործը:
2013 թվականի հուլիսի 6-ին թիվ 90210013 քրեական գործը ՀՀ ՊՆ քննչական ծառայության 4-րդ կայազորային քննչական բաժնում ընդունվել է վարույթ և կատարվել նախաքննություն:
2013 թվականի հուլիսի 23-ին Լավրենտի Մայիսի Մկրտչյանը ներգրավվել է որպես մեղադրյալ ՀՀ քրեական օրենսգրքի 316 հոդվածի 1-ին մասով այն արարքի կատարման համար, որ նա հանդիսանալով ՀՀ ՊՆ 24923 զորամասի ժամկետային զինծառայող, կոչումով շարքային, երեք ամսվա ընթացքում երեք անգամ մեկ ժամից մինչև երեք օր տևողությամբ` 1-ին անգամ 2013թ. ապրիլի 30-ին, ժամը 2330-ից մինչև 2013թ. մայիսի 1-ը, ժամը 0530-ը, 2-րդ անգամ` 2013թ. հունիսի 19-ին, ժամը 1200-ից մինչև ժամը 1600-ն, 3-րդ անգամ 2013թ. հունիսի 19-ին, ժամը 1930-ից մինչև հունիսի 20-ը, ժամը 0255-ը, առանց հարգելի պատճառների ինքնակամ թողել է զորամասի տարածքը:
2013 թվականի հուլիսի 23-ին նրա նկատմամբ որպես խափանման միջոց է ընտրվել զորամասի հրամանատարության հսկողությանը հանձնելը:
2013 թվականի օգոստոսի 1-ին թիվ 90210013 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
Դատական նիստի ժամանակ պաշտպան Ռ.Սաֆարյանը միջնորդեց ՀՀ Ազգային Ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշման կիրառմամբ Լավրենտի Մկրտչյանի նկատմամբ քրեական հետապնդումը դադարեցնել և քրեական գործի վարույթը կարճել:
Ամբաստանյալ Լավրենտի Մկրտչյանը միջնորդեց իր նկատմամբ կիրառել համաներման մասին որոշումը, քրեական հետապնդումը դադարեցնել և քրեական գործի վարույթը կարճել:
Մեղադրող Ա.Ամիրյանը հիմք ընդունելով ՀՀ Ազգային Ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշումը միջնորդեց Լավրենտի Մայիսի Մկրտչյանի նկատմամբ քրեական հետապնդումը դադարեցնել և քրեական գործի վարույթը կարճել:
Դատարանը գտնում է, որ Լավրենտի Մկրտչյանի վերաբերյալ քրեական գործի վարույթը պետք է կարճել և նրա նկատմամբ քրեական հետապնդումը դադարեցնել` հետևյալ պատճառաբանությամբ.
ՀՀ ոստիկանության ինֆորմացիոն կենտրոնի կողմից տրված պահանջագրի համաձայն, Լավրենտի Մայիսի Մկրտչյանը նախկինում դատապարտված է եղել (Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 20.05.2013թ. դատավճռով ՀՀ քրեական օրենսգրքի 34-177 հոդվածի 2-րդ մասի 3-րդ կետով դատապարտվել է տուգանքի 500.000 ՀՀ դրամի չափով: Դատավճիռն ուժի մեջ է մտել 21.06.2013թ.-ին: Ամբաստանյալի կողմից դատարանի դատավճռով նշանակված տուգանքն ամբողջությամբ վճարվել է (հիմք ՙԻնեկոբանկ՚ ՓԲԸ Արաբկիր մասնաճյուղի 02.07.2013թ. թիվ 075, ՙՎՏԲ-Հայաստան բանկ՚ ՓԲԸ Արաբկիր մասնաճյուղի 04.07.2013թ. թիվ 130704018069040, ՙԱԿԲԱ-ԿՐԵԴԻՏ ԱԳՐԻԿՈԼ ԲԱՆԿ՚ ՓԲԸ Արթիկ մասնաճյուղի 25.07.2013թ. թիվ 15 անդորրագրերը և ՀՀ ԱՆ քրեակատարողական վարչության այլըտրանքային պատիժների կատարման բաժնի Արաբկիր և Քանաքեռ-Զեյթուն բաժանմունքի պետի 22.10.2013թ. 40/16-3-500 գրությունը) և դատավճիռը կատարվել է:)
Ներկա գործով հանցագործությունն ավարտվել է 19.06.2013թ.-ին, այսինքն` մինչև նախորդ գործով կայացված դատավճիռն օրինական ուժի մեջ մտնելը:
ՀՀ Ազգային Ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշման 15-րդ կետի համաձայն, սույն որոշումը կիրառվում է այն անձանց նկատմամբ, ովքեր հանցագործություն են կատարել մինչև 2013 թվականի սեպտեմբերի 1-ը ներառյալ: Լավրենտի Մկրտչյանը հանրորեն վտանգավոր արարքները կատարել է 2013թ. ապրիլ, հունիս ամիսների ընթացքում:
Նույն որոշման 5-րդ կետի 2-րդ ենթակետի համաձայն, պետք է քրեական հետապնդում չհարուցել և քրեական հետապնդում չիրականացնել, ինչպես նաև կարճել մինչև 2013 թվականի սեպտեմբերի 1-ը կատարած հանցագործությունների վերաբերյալ հետաքննության մարմինների, նախաքննության մարմինների կամ դատարանների վարույթում գտնվող քրեական գործերը, բացառությամբ սույն որոշման 8-րդ կետի 4-6-րդ ենթակետերով և 9-րդ կետով նախատեսված դեպքերի, որոնցով` անձինք կարող են մեղադրվել կամ մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ` ոչ ավելի, քան երեք տարի ժամկետով ազատազրկում:
ՀՀ քրեական օրենսգրքի 361 հոդվածի 1-ին մասով նախատեսված պատժի առավելագույն չափը երկու տարի ժամկետով ազատազրկումն է:
Համաներման որոշման 9-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը: Մասնավորապես` համաներման որոշման 9-րդ կետի 7-րդ ենթակետում թվարկված են ՀՀ քրեական օրենսգրքի այն հոդվածները և հոդվածների մասերը, որոնցով նախատեսված արարքները կատարած անձանց նկատմամբ համաներումը կիրառելի չէ: Թվարկված հոդվածների և հոդվածների մասերի թվում ընդգրկված չէ ՀՀ քրեական օրենսգրքի 361 հոդվածի 1-ին մասը: Լավրենտի Մայիսի Մկրտչյանի պարագայում բացակայում են նաև համաներման որոշման 9-րդ կետում նշված այն սահմանափակումները, որոնք կարող են արգելք հանդիսանալ համաներման ակտի կիրառման համար:
Վերոնշյալ որոշման 13-րդ կետի 1.ա ենթակետի համաձայն, համաներման որոշման կատարումը վերապահվել է Հայաստանի Հանրապետության ընդհանուր իրավասության առաջին ատյանի դատարաններին` այն անձանց նկատմամբ, որոնց վերաբերյալ գործերը Հայաստանի Հանրապետության ընդհանուր իրավասության առաջին ատյանի կամ վերաքննիչ քրեական դատարաններում են, սակայն մինչև սույն որոշումն ուժի մեջ մտնելը չեն քննվել, կամ այն անձանց նկատմամբ, որոնց վերաբերյալ գործերը քննվել են, բայց դատավճիռներն օրինական ուժի մեջ չեն մտել:
Հիմք ընդունելով վերը նշվածը, դատարանը գտնում է, որ ամբաստանյալ Լավրենտի Մայիսի Մկրտչյանի նկատմամբ կիրառելի է ՀՀ Ազգային ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշումը:
Համաձայն ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի, հարուցված քրեական գործի վարույթը ենթակա է կարճման, եթե` ընդունվել է համաներման ակտ:
Դատարանը գտնում է, որ ՀՀ ՊՆ ՔԾ 4-րդ կայազորային քննչական բաժնի քննիչի 27.07.2013թ.-ի որոշմամբ ապացույց ճանաչված և քրեական գործին կցված այլ փաստաթուղթ հանդիսացող` հեռախոսագրերը, Լ.Մկրտչյանի 2013թ. ապրիլի 30-ին, ժամը 23:30-ից մինչև 2013թ. մայիսի 1-ը, ժամը 05:30-ը, 2013թ. հունիսի 19-ին, ժամը 12:00-ից մինչև ժամը 16:00-ն, 2013թ. հունիսի 19-ին, ժամը 19:30-ից մինչև հունիսի 20-ը, ժամը 02:55-ը, առանց հարգելի պատճառների զորամասի տարածքը ինքնակամ թողելու վերաբերյալ տեղեկանքները, Լավրենտի Մայիսի Մկրտչյանի 2011թ. դեկտեմբերի 26-ին ՀՀ ԶՈԻ զորակոչվելու և ՀՀ ՊՆ 24923 զորամասում ծառայության նշանակվելու վերաբերյալ հրամանի քաղվածքը պետք է պահել քրեական գործի հետ միասին:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 35 հոդվածի 1-ին մասի 13-րդ կետով, 313 հոդվածով և ՀՀ Ազգային ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշման 5-րդ կետի 2-րդ ենթակետով, 13-րդ կետի 1.ա ենթակետով, դատարանը

Ո Ր Ո Շ Ե Ց

Լավրենտի Մայիսի Մկրտչյանի նկատմամբ ՀՀ քրեական օրենսգրքի 361 հոդվածի 1-ին մասով քրեական հետապնդումը դադարեցնել և թիվ ԵԱՔԴ/0125/01/13 քրեական գործի վարույթը կարճել` ՀՀ Ազգային ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշման 5-րդ կետի 2-րդ ենթակետի համաձայն:
Լավրենտի Մայիսի Մկրտչյանի նկատմամբ կիրառված խափանման միջոցը` հրամանատարության հսկողությանը հանձնելը, վերացնել:
Ապացույց ճանաչված և քրեական գործին կցված հեռախոսագրերը, տեղեկանքները, հրամանի քաղվածքը, պահել քրեական գործի հետ միասին:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան