ԵԱՔԴ/0119/01/13

Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր` Լ. Ավետիսյան
քարտուղարությամբ` Ե. Կարապետյանի, Հ.Արտաշեսյանի
մասնակցությամբ`
մեղադրող Գ. Գասպարյանի
տուժող Գ. Մուշեղյանի
պաշտպան Մ. Հակոբյանի

2013 թվականի օգոստոսի 26-ին, Երևան քաղաքում, դռնբաց դատական նիստում, դատական քննության արագացված կարգով, քննեց քրեական գործն ըստ մեղադրանքի Արա Արմենի Աղաջանյանի, ծնված 1985 թվականի հոկտեմբերի 20-ին, Երևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ամուսնացած չէ, նախկինում չդատված, ծառայում է ՀՀ ՊՆ 59016 զորամասում` որպես կապի վաշտի հրամանատար, կոչումով ավագ լեյտենանտ, բնակվում է Երևան քաղաքի Դրոյի փողոցի 10 շենքի թիվ 46 բնակարանում, մեղադրվում է ՀՀ քրեական օրենսգրքի 359 հոդվածի 1-ին մասով, խափանման միջոց է ընտրվել չհեռանալու մասին ստորագրությունը,
ՊԱՐԶԵՑ

1.Գործի դատավարական նախապատմությունը.
2013 թվականի մայիսի 29-ին Երևանի կայազորի զինվորական դատախազությունում ՀՀ քրեական օրենսգրքի 359 հոդվածի 1-ին մասով նախատեսված հանցագործության հատկանիշներով հարուցվել է թիվ 90208213 քրեական գործը և ուղարկվել ՀՀ ՊՆ ՔԾ չորրորդ կայազորային քննչական բաժին` նախաքննություն կատարելու համար:
Նախաքննության մարմնի 2013 թվականի հունիսի 21-ի որոշմամբ Արա Արմենի Աղաջանյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 359 հոդվածի 1-ին մասով: Նրա նկատմամբ որպես խափանման միջոց է ընտրվել չհեռանալու մասին ստորագրությունը:
2013 թվականի հուլիսի 22-ին թիվ 90208213 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
2.Գործի փաստական հանգամանքները.
Նախնական քննության մարմինն ամբաստանյալ Արա Արմենի Աղաջանյանին ՀՀ քրեական օրենսգրքի 359 հոդվածի 1-ին մասով մեղադրանք է առաջադրել այն արարքի կատարման համար, որ նա հանդիսանալով ՀՀ ՊՆ 59016 զորամասի զինծառայող, կոչումով ավագ լեյտենանտ, գտնվելով կարճատև արձակուրդում, 2013թ. մայիսի 20-ին, ժամը 2300-ի սահմաններում, գնացել է ՀՀ ՊՆ 31549 զորամաս, որտեղ հսկիչ անցագրային կետում հանդիպել է նույն զորամասի ժամկետային զինծառայող, շարքային Գարիկ Վասակի Մուշեղյանին և խախտելով ՀՀ ԶՈՒ ներքին ծառայության կանոնագրքի 13-րդ հոդվածով սահմանված` զինվորական ընկերասիրությունը բարձր պահելու, ընկերոջ պատիվն ու արժանապատվությունը հարգելու, այլ զինծառայողների նկատմամբ կոպտություն թույլ չտալու, զինծառայողների փոխհարաբերությունների կանոնագրքային կանոնները, ստորադասության հարաբերությունների բացակայության դեպքում բռնություն է գործադրել վերջինիս նկատմամբ` քաշքշել, հարվածներ է հասցրել նրան և Գ.Մուշեղյանի առողջությանը պատճառել թեթև վնաս` առողջության կարճատև քայքայումով:
3. Արագացված դատական քննություն.
Մինչև դատաքննությունն սկսելն ամբաստանյալ Արա Աղաջանյանը միջնորդեց դատական քննությունն անցկացնել արագացված կարգով և հայտարարեց, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու բնույթն ու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո: Միջնորդությունը հաստատեց նաև ամբաստանյալի պաշտպան Մանուշակ Հակոբյանը:
Մեղադրող Գ. Գասպարյանը դատական քննության արագացված կարգ կիրառելուն չի առարկել:
Տուժող Գ.Մուշեղյանը նույնպես արագացված քննություն կիրառելուն չառարկեց:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել դատական քննության արագացված կարգ կիրառելու մասին:
Դատարանի իրավական վերլուծությունները.
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ, դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալ Արա Աղաջանյանը կատարել է հանցավոր արարք, որը համապատասխանում է ՀՀ քրեական օրենսգրքի 359 հոդվածի 1-ին մասի հատկանիշներին:
Կատարած արարքի համար ամբաստանյալ Արա Արմենի Աղաջանյանը ենթակա է քրեական պատասխանատվության և պատժի:
ՀՀ Ազգային ժողովի կողմից 2013թ. ապրիլի 30-ին ընդունված (որը ՀՀ Նախագահի կողմից ստորագրվել է 2013թ. մայիսի 21-ին) օրենքով ՀՀ քրեական օրենսգրքի 359 հոդվածի 1-ին մասի սանկցիան փոփոխվել և պատիժը խստացվել է:
ՀՀ քրեական օրենսգրքի 12 հոդվածի համաձայն`
1. Արարքի հանցավորությունը և պատժելիությունը որոշվում են դա կատարելու ժամանակ գործող քրեական օրենքով:
2. Հանցանքը կատարելու ժամանակ է համարվում հանրության համար վտանգավոր գործողությունը (անգործությունը) իրականացնելու ժամանակը՝ անկախ հետևանքները վրա հասնելու պահից:
ՀՀ քրեական օրենսգրքի 13 հոդվածի 2-րդ և 3-րդ մասերի համաձայն`
2. Արարքի հանցավորությունը սահմանող, պատիժը խստացնող կամ հանցանք կատարած անձի վիճակն այլ կերպ վատթարացնող օրենքը հետադարձ ուժ չունի:
3. Պատասխանատվությունը մասնակիորեն մեղմացնող և միաժամանակ պատասխանատվությունը մասնակիորեն խստացնող օրենքը հետադարձ ուժ ունի միայն այն մասով, որը մեղմացնում է պատասխանատվությունը:
Նկատի ունենալով, որ նման պայմաններում ամբաստանյալ Արա Աղաջանյանը հանցանքը կատարել է 2013թ. մայիսի 20-ին, դատարանը գտնում է, որ նա ենթակա է քրեական պատասխանատվության և պատժի նախկին խմբագրությամբ ՀՀ քրեական օրենսգրքի 359 հոդվածի 1-ին մասով:
ՀՀ քրեական օրենսգրքի 48 հոդվածի համաձայն,
ՙ1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից ու ազատություններից օրենքով նախատեսված զրկմամբ կամ դրանց սահմանափակմամբ:
2. Պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61 հոդվածի համաձայն`
ՙ1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործության՝ հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում՝ պատասխանատվությունը և պատիժը մեղմացնող կամ ծանրացնող հանգամանքներով:
3. Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները՚:
Ամբաստանյալի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարած արարքի համար, զորամասի հրամանատարության կողմից բնութագրվում է դրական, պարգևատրվել է ՙՀՀ զինված ուժեր 20 տարի՚ հոբելյանական մեդալով, ՙԱնբասիր ծառայության համար՚ առաջին աստիճանի մեդալով, տուժողը հաշտվել է նրա հետ և խնդրել է մեղմ պատիժ նշանակել:
Ամբաստանյալի պատասխանատվությունը և պատիժը ծանրացնող հանգամանքներ չկան:
Հաշվի առնելով Արա Աղաջանյանի կատարած արարքի հանրության համար վտանգավորության աստիճանը և բնույթը, նրա անձը, նրան բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 359 հոդվածի 1-ին մասի սանկցիայով նախատեսված է պատիժ նաև կալանքի ձևով, դատարանը գտնում է, որ ամբաստանյալ Արա Արմենի Աղաջանյանի նկատմամբ ՀՀ քրեական օրենսգրքի 359 հոդվածի 1-ին մասով նախատեսված հանցանք կատարելու համար պատիժ պետք է նշանակել կալանքի ձևով:
Դատարանը հաշվի առնելով Ա.Աղաջանյանի անձը բնութագրող տվյալները, պատասխանատվությունը և պատիժը մեղմացնող հանգամանքները, ինչպես նաև պատասխանատվությունն ու պատիժը ծանրացնող հանգամանքների բացակայությունը, հանգում է այն հետևության, որ ՀՀ քրեական օրենսգրքի 48 հոդվածի 2-րդ մասով նախատեսված սոցիալական արդարության վերականգնումը և ամբաստանյալի ուղղվելը հնարավոր է պատիժը նույն օրենսգրքի 70 հոդվածի հիման վրա պայմանականորեն չկիրառելու, սակայն` նրա վարքագծի նկատմամբ վերահսկողություն իրականացնելու պայմաններում:
Դատարանը գտնում է, որ Արա Աղաջանյանի նկատմամբ որպես խափանման միջոց կիրառված չհեռանալու մասին ստորագրությունը պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը գտնում է, որ ապացույց հանդիսացող թիվ 90208213 քրեական գործում առկա օպերատիվ հետախուզական միջոցառումների արդյունքները, զեկուցագրերը, հրամանների քաղվածքները, հեռախոսագրերը պետք է պահել քրեական գործի հետ միասին:
Հաշվի առնելով, որ տուժող Գարիկ Մուշեղյանը դատարանում հայտնել է, որ ամբաստանյալ Արա Աղաջանյանի նկատմամբ որևէ նյութական պահանջ չունի, դատարանը գտնում է, որ քաղաքացիական հայցի հարցը պետք է համարել լուծված:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

ՎՃՌԵՑ

Արա Արմենի Աղաջանյանին մեղավոր ճանաչել ՀՀ քրեական օրենսգրքի 359 հոդվածի 1-ին մասով նախատեսված հանցանք կատարելու մեջ և նրան դատապարտել կալանքի երեք (3) ամիս ժամկետով:
Կիրառել ՀՀ քրեական օրենսգրքի 70 հոդվածը և Արա Արմենի Աղաջանյանի նկատմամբ կալանքի ձևով նշանակված պատիժը պայմանականորեն չկիրառել, սահմանելով փորձաշրջան մեկ (1) տարի ժամկետով:
Արա Արմենի Աղաջանյանի նկատմամբ կիրառված խափանման միջոցը` չհեռանալու մասին ստորագրությունը, թողնել անփոփոխ, մինչև դատավճռի օրինական ուժի մեջ մտնելը:
Արա Աղաջանյանի վարքագծի նկատմամբ վերահսկողությունը հանձնարարել ՀՀ ՊՆ 59016 զորամասի հրամանատարին: Փորձաշրջանի սկիզբը հաշվել զորամասում Արա Արմենի Աղաջանյանին հաշվառման վերցնելու օրվանից:
Ապացույց հանդիսացող թիվ 90208213 քրեական գործում առկա օպերատիվ հետախուզական միջոցառումների արդյունքները, զեկուցագրերը, հրամանների քաղվածքները, հեռախոսագրերը պահել քրեական գործի հետ միասին:
Տուժող Գ.Մուշեղյանի քաղաքացիական հայցի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:

Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան