ԵԱՔԴ/0118/01/13

ԴԱՏԱՎՃԻՌ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ. Ավետիսյան
քարտուղարությամբ` Ե.Կարապետյանի
Հ.Արտաշեսյանի
մասնակցությամբ`
մեղադրող Ռ.Էլիզբարյանի
պաշտպան Կ.Քաջազնունու

2013 թվականի օգոստոսի 8-ին, Երևան քաղաքում, դռնբաց դատական նիստում, դատական քննության արագացված կարգով, քննեց քրեական գործն ըստ մեղադրանքի Բաբկեն Գրիգորի Գաբոյանի, ծնված 1991 թվականի ապրիլի 20-ին, Շիրակի մարզի Կառնուտ գյուղում, ազգությամբ հայ, ՀՀ քաղաքացի, չամուսնացած, բարձրագույն կրթությամբ, ծառայում է ՀՀ ՊՆ թիվ 24923 զորամասի 1-ին ջոկատի 3-րդ վաշտի 3-րդ խմբի 2-րդ ջոկում` որպես ավագ հետախույզ, կոչումով կրտսեր սերժանտ, նախկինում չդատված, բնակվել է Շիրակի մարզի Կառնուտ գյուղում, մեղադրվում է ՀՀ քրեական օրենսգրքի 359 հոդվածի 1-ին մասով, որպես խափանման միջոց է ընտրվել հրամանատարության հսկողությանը հանձնելը,
Նշան Արթուրի Զաքարյանի, ծնված 1993 թվականի հունվարի 1-ին, Լոռու մարզի Ստեփանավան քաղաքում, ազգությամբ հայ, ՀՀ քաղաքացի, չամուսնացած, միջնակարգ կրթությամբ, ծառայել է ՀՀ ՊՆ թիվ 24923 զորամասի 1-ին ջոկատի 3-րդ վաշտի 2-րդ խմբի 2-րդ ջոկում` որպես հետախույզ-գնդացրորդ, կոչումով կրտսեր սերժանտ, նախկինում չդատված, բնակվում է Լոռու մարզի Ստեփանավան քաղաքի Միքայելյան փողոցի 93 տանը, մեղադրվում է ՀՀ քրեական օրենսգրքի 359 հոդվածի 1-ին մասով, որպես խափանման միջոց է ընտրվել չհեռանալու մասին ստորագրությունը,

ՊԱՐԶԵՑ

1.Գործի դատավարական նախապատմությունը.
2013 թվականի մայիսի 29-ին Երևանի կայազորի զինվորական դատախազությունում ՀՀ քրեական օրենսգրքի 359 հոդվածի 1-ին մասով նախատեսված հանցագործության հատկանիշներով հարուցվել է թիվ 90208013 քրեական գործը և ուղարկվել ՀՀ ՊՆ ՔԾ չորրորդ կայազորային քննչական բաժին` նախաքննություն կատարելու համար:
Նախաքննության մարմնի 2013 թվականի հունիսի 21-ի որոշմամբ Նշան Արթուրի Զաքարյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 359 հոդվածի 1-ին մասով: Նրա նկատմամբ որպես խափանման միջոց է ընտրվել չհեռանալու մասին ստորագրությունը:
Նախաքննության մարմնի 2013 թվականի հունիսի 21-ի որոշմամբ Բաբկեն Գրիգորի Գաբոյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 359 հոդվածի 1-ին մասով: Նրա նկատմամբ որպես խափանման միջոց է ընտրվել հրամանատարության հսկողությանը հանձնելը:
2013 թվականի հուլիսի 10-ին թիվ 90208013 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:

2.Գործի փաստական հանգամանքները.
Նախնական քննության մարմինը Բաբկեն Գրիգորի Գաբոյանին ՀՀ քրեական օրենսգրքի 359 հոդվածի 1-ին մասով մեղադրանք է առաջադրել հետևյալ արարքի կատարման համար. նա պարտադիր ժամկետային զինվորական ծառայության մեջ է գտնվել ՀՀ ՊՆ 24923 զորամասում` որպես 1-ին ջոկատի հատուկ պայթեցնող խմբի ավագ հետախույզ-պայթեցնող, կոչումով կրտսեր սերժանտ: 2013թ. մայիսի 15-ին, ժամը 08:00-ի սահմաններում զորամասի ճաշարանում սեղանի շուրջ նստելու առնչությամբ առաջացած տարաձայնության կապակցությամբ նույն օրը, ժամը 20:00-ի սահմաններում, զորամասի 3-րդ ջոկատի զորանոցի միջանցքում վիճաբանել է համածառայող, կրտսեր սերժանտ Նշան Արթուրի Զաքարյանի հետ, որի ընթացքում ստորադասության հարաբերությունների բացակայության դեպքում խախտել է ՀՀ ԶՈՒ ներքին ծառայության կանոնագրքի 13-րդ հոդվածով սահմանված` համածառայողի պատիվն ու արժանապատվությունը հարգելու, նրան ծաղրուծանակի չենթարկելու, միմյանց նկատմամբ բռնություն չգործադրելու կանոնները, բռնի գործողություններ է կատարել վերջինիս նկատմամբ` քաշքշել է նրան և պատճառել առողջության թեթև վնասի հատկանիշներ չպարունակող մարմնական վնասվածքներ:
Նախնական քննության մարմինը Նշան Արթուրի Զաքարյանին ՀՀ քրեական օրենսգրքի 359 հոդվածի 1-ին մասով մեղադրանք է առաջադրել հետևյալ արարքի կատարման համար. նա պարտադիր ժամկետային զինվորական ծառայության մեջ է գտնվել ՀՀ ՊՆ 24923 զորամասում` որպես պահպանության վաշտի ծանր զենքի դասակի հետախույզ-գնդացրորդ, կոչումով կրտսեր սերժանտ: 2013թ. մայիսի 15-ին, ժամը 08:00-ի սահմաններում զորամասի ճաշարանում սեղանի շուրջ նստելու առնչությամբ առաջացած տարաձայնության կապակցությամբ նույն օրը, ժամը 20:00-ի սահմաններում, զորամասի 3-րդ ջոկատի զորանոցի միջանցքում վիճաբանել է համածառայող, կրտսեր սերժանտ Բաբկեն Գրիգորի Գաբոյանի հետ, որի ընթացքում ստորադասության հարաբերությունների բացակայության դեպքում խախտել է ՀՀ ԶՈՒ ներքին ծառայության կանոնագրքի 13-րդ հոդվածով սահմանված` համածառայողի պատիվն ու արժանապատվությունը հարգելու, նրան ծաղրուծանակի չենթարկելու, միմյանց նկատմամբ բռնություն չգործադրելու կանոնները, բռնի գործողություններ է կատարել վերջինիս նկատմամբ` քաշքշել է նրան և պատճառել առողջության թեթև վնասի հատկանիշներ չպարունակող մարմնական վնասվածքներ:

3. Արագացված դատական քննություն.
Մինչև դատաքննությունն սկսելն ամբաստանյալներ Բաբկեն Գաբոյանը և Նշան Զաքարյանը միջնորդեցին դատական քննությունն անցկացնել արագացված կարգով և հայտարարեցին, որ առաջադրված մեղադրանքն իրենց պարզ է, համաձայն են իրենց առաջադրված մեղադրանքին, գիտակցում են արագացված կարգով դատական քննություն անցկացնելու բնույթն ու հետևանքները, միջնորդությունը ներկայացրել են կամավոր` պաշտպանի հետ խորհրդակցելուց հետո: Միջնորդությունը հաստատեց նաև ամբաստանյալների պաշտպան Կարինե Քաջազնունին:
Մեղադրող Ռ.Էլիզբարյանը դատական քննության արագացված կարգ կիրառելուն չի առարկել:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել դատական քննության արագացված կարգ կիրառելու մասին:

4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալներ Բաբկեն Գաբոյանին և Նշան Զաքարյանին առաջադրված մեղադրանքը ՀՀ քրեական օրենսգրքի 359 հոդվածի 1-ին մասով հիմնավորված է: Նրանց կողմից կատարված արարքը համապատասխանում է ՀՀ քրեական օրենսգրքի 359 հոդվածի 1-ին մասի հատկանիշներին և արարքի որակումը ճիշտ է:
ՀՀ Ազգային ժողովի կողմից 2013թ. ապրիլի 30-ին ընդունված (որը ՀՀ Նախագահի կողմից ստորագրվել է 2013թ. մայիսի 21-ին) օրենքով ՀՀ քրեական օրենսգրքի 359 հոդվածի 1-ին մասի սանկցիան փոփոխվել և պատիժը խստացվել է:
ՀՀ քրեական օրենսգրքի 12 հոդվածի համաձայն`
1. Արարքի հանցավորությունը և պատժելիությունը որոշվում են դա կատարելու ժամանակ գործող քրեական օրենքով:
2. Հանցանքը կատարելու ժամանակ է համարվում հանրության համար վտանգավոր գործողությունը (անգործությունը) իրականացնելու ժամանակը՝ անկախ հետևանքները վրա հասնելու պահից:
ՀՀ քրեական օրենսգրքի 13 հոդվածի 2-րդ և 3-րդ մասերի համաձայն`
2. Արարքի հանցավորությունը սահմանող, պատիժը խստացնող կամ հանցանք կատարած անձի վիճակն այլ կերպ վատթարացնող օրենքը հետադարձ ուժ չունի:
3. Պատասխանատվությունը մասնակիորեն մեղմացնող և միաժամանակ պատասխանատվությունը մասնակիորեն խստացնող օրենքը հետադարձ ուժ ունի միայն այն մասով, որը մեղմացնում է պատասխանատվությունը:
Նկատի ունենալով, որ Նման պայմաններում ամբաստանյալներ Բաբկեն Գաբոյանը և Նշան Զաքարյանը հանցանքը կատարել են 2013թ. մայիսի 15-ին, դատարանը գտնում է, որ նրանք ենթակա են քրեական պատասխանատվության և պատժի նախկին խմբագրությամբ ՀՀ քրեական օրենսգրքի 359 հոդվածի 1-ին մասով:
ՀՀ քրեական օրենսգրքի 48 հոդվածի համաձայն,
1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից ու ազատություններից օրենքով նախատեսված զրկմամբ կամ դրանց սահմանափակմամբ:
2. Պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները:
ՀՀ քրեական օրենսգրքի 61 հոդվածի համաձայն`
1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործության՝ հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում՝ պատասխանատվությունը և պատիժը մեղմացնող կամ ծանրացնող հանգամանքներով:
3. Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները:
Ամբաստանյալների նկատմամբ պատիժ նշանակելիս, դատարանը հաշվի է առնում նրանց կատարած արարքների հանրության համար վտանգավորության աստիճանը և բնույթը, ինչպես նաև հանցավորների անձը:
Որպես ամբաստանյալ Բաբկեն Գաբոյանի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա նախկինում դատված չի եղել, հրամանատարության կողմից բնութագրվում է դրական, զղջում է կատարածի համար, հաշտվել է մյուս ամբաստանյալ Ն.Զաքարյանի հետ:
Որպես ամբաստանյալ Բ.Գաբոյանի պատասխանատվությունը և պատիժը ծանրացնող հանգամանք դատարանը դիտում է հանցագործության մեջ նրա առանձնապես ակտիվ դերը:
Դատարանը գտնում է, որ կատարած արարքի համար ամբաստանյալ Բաբկեն Գաբոյանը ենթակա է քրեական պատասխանատվության և պատժի, որը նա պետք է կրի: Դատարանն անհրաժեշտ է համարում Բ.Գաբոյանի նկատմամբ պատիժ նշանակել կարգապահական գումարտակում պահելու ձևով:
Որպես ամբաստանյալ Նշան Զաքարյանի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա նախկինում դատված չի եղել, հրամանատարության կողմից բնութագրվում է դրական, զղջում է կատարածի համար, հաշտվել է մյուս ամբաստանյալ Բ.Գաբոյանի հետ:
Ամբաստանյալի պատասխանատվությունը և պատիժը ծանրացնող հանգամանքներ առկա չեն:
Հաշվի առնելով Նշան Զաքարյանի կատարած արարքի հանրության համար վտանգավորության աստիճանը և բնույթը, նրա անձը, նրան բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 359 հոդվածի 1-ին մասի սանկցիայով նախատեսված է պատիժ նաև կալանքի ձևով, դատարանը գտնում է, որ ամբաստանյալ Նշան Արթուրի Զաքարյանի նկատմամբ ՀՀ քրեական օրենսգրքի 359 հոդվածի 1-ին մասով նախատեսված հանցանք կատարելու համար պատիժ պետք է նշանակել կալանքի ձևով:
Դատարանը նկատի ունենալով, որ արդեն ավարտել է ամբաստանյալ Նշան Զաքարյանի զինվորական ծառայության ժամկետը և նա զորացրվել է, գտնում է, որ իրադրության փոփոխման հետևանքով ամբաստանյալի անձը և նրա կատարած արարքը դադարել է հանրության համար վտանգավոր լինելուց:
Դատարանը հաշվի առնելով Ն.Զաքարյանի անձը բնութագրող տվյալները, պատասխանատվությունը և պատիժը մեղմացնող հանգամանքները, ինչպես նաև պատասխանատվությունն ու պատիժը ծանրացնող հանգամանքների բացակայությունը, հանգում է այն հետևության, որ ՀՀ քրեական օրենսգրքի 48 հոդվածի 2-րդ մասով նախատեսված սոցիալական արդարության վերականգնումը և ամբաստանյալի ուղղվելը հնարավոր է պատիժը պայմանականորեն չկիրառելու, սակայն` նրա վարքագծի նկատմամբ վերահսկողություն իրականացնելու պայմաններում:
Դատարանը գտնում է, որ ամբաստանյալ Բ.Գաբոյաի նկատմամբ կիրառված խափանման միջոցը` հրամանատարության հսկողությանը հանձնելը, պետք է փոխել, որպես խափանման միջոց ընտրել կալանավորումը և նրան կալանքի վերցնել դատարանի դահլիճում:
Դատարանը գտնում է, որ ամբաստանյալ Ն.Զաքարյանի նկատմամբ կիրառված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

ՎՃՌԵՑ

Բաբկեն Գրիգորի Գաբոյանին մեղավոր ճանաչել ՀՀ քրեական օրենսգրքի 359 հոդվածի 1-ին մասով նախատեսված հանցանք կատարելու մեջ և նրան դատապարտել կարգապահական գումարտակում պահելով երեք (3) ամիս ժամկետով:
Բաբկեն Գրիգորի Գաբոյանի նկատմամբ կիրառված խափանման միջոցը` հրամանատարության հսկողությանը հանձնելը, փոխել, ընտրել կալանավորումը և նրան կալանքի վերցնել դատարանի դահլիճում:
Պատժի սկիզբը հաշվել Բաբկեն Գրիգորի Գաբոյանին արգելանքի վերցնելու օրվանից` 2013թ. օգոստոսի 8-ից: Պատիժը պետք է կրի ՀՀ համապատասխան քրեակատարողական հիմնարկում:
Նշան Արթուրի Զաքարյանին մեղավոր ճանաչել ՀՀ քրեական օրենսգրքի 359 հոդվածի 1-ին մասով նախատեսված հանցանք կատարելու մեջ և նրան դատապարտել կալանքի երեք (3) ամիս ժամկետով:
Կիրառել ՀՀ քրեական օրենսգրքի 70 հոդվածը և Նշան Արթուրի Զաքարյանի նկատմամբ ազատազրկման ձևով նշանակված պատիժը պայմանականորեն չկիրառել, սահմանելով փորձաշրջան մեկ (1) տարի ժամկետով:
Նշան Արթուրի Զաքարյանի նկատմամբ կիրառված խափանման միջոցը` չհեռանալու մասին ստորագրությունը, թողնել անփոփոխ, մինչև դատավճռի օրինական ուժի մեջ մտնելը:
Նշան Զաքարյանի վարքագծի նկատմամբ վերահսկողությունը հանձնարարել ՀՀ ԱՆ քրեակատարողական վարչության նրա բնակության վայրի այլընտրանքային պատիժների կատարման բաժնին: Փորձաշրջանի սկիզբը հաշվել քրեակատարողական վարչության այլընտրանքային պատիժների կատարման բաժնում Նշան Արթուրի Զաքարյանին հաշվառման վերցնելու օրվանից:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:


Դատավոր` ստորագրություն
Բնագրի հետ ճիշտ է
ԴԱՏԱՎՈՐ Լ.ԱՎԵՏԻՍՅԱՆ