ԵԱՔԴ/0110/01/13




Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահող դատավոր` Լ. Ավետիսյան
քարտուղարությամբ` Ե. Կարապետյանի
մասնակցությամբ
մեղադրող` Լ. Մանուկյանի
պաշտպան` Է. Աղաջանյանի


2013 թվականի հուլիսի 24-ին, Երևան քաղաքում, դռնբաց դատական նիստում, դատական քննության արագացված կարգով քննեց քրեական գործն ըստ մեղադրանքի` Խաչիկ Կոլյայի Աղաջանյանի, ծնված 1965 թվականի փետրվարի 05-ին, Կոտայքի մարզի Նոր Գեղի գյուղում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին երեք անձ, դատվածությունը մարված, չի աշխատել, ֆիզիկապես վատառողջ, հաշվառված և բնակվել է Կոտայքի մարզի գյուղ Նոր Գեղի Պ. Սևակի փողոցի թիվ 9 տուն հասցեում, մեղադրվում է ՀՀ քրեական օրենսգրքի 266 հոդվածի 1-ին մասով, կալանքի տակ է 2013 թվականի հունիսի 27-ից

Պ Ա Ր Զ Ե Ց

1.Գործի դատավարական նախապատմությունը.
2013 թվականի հունիսի 13-ին ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթուն քննչական բաժնում ՀՀ քրեական օրենսգրքի 266 հոդվածի 1-ին մասով նախատեսված հանցագործության հատկանիշներով հարուցվել է թիվ 09112313 քրեական գործը:
2013 թվականի հունիսի 14-ին կասկածյալ Խաչիկ Կոլյայի Աղաջանյանի նկատմամբ որպես խափանման միջոց է ընտրվել չհեռանալու մասին ստորագրությունը:
Նախաքննության մարմնի 2013 թվականի հունիսի 17-ի որոշմամբ Խաչիկ Կոլյայի Աղաջանյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 266 հոդվածի 1-ին մասով: Նրա նկատմամբ ընտրված խափանման միջոցը թողնվել է անփոփոխ:
Դատարանի որոշմամբ Խաչիկ Կոլյայի Աղաջանյանի նկատմամբ որպես խափանման միջոց է կիրառվել կալանավորումը:
2013 թվականի հունիսի 28-ի որոշմամբ Նոդար Էլիզբարի Մոմցեմլիձեյի նկատմամբ թիվ 09112313 քրեական գործով քրեական հետապնդում չի իրականացվել ՀՀ քրեական դատավարության օրենսգրքի 35 հոդվածի 1-ին մասի 2-րդ կետով` հանցակազմի բացակայության պատճառաբանությամբ:
2013 թվականի հուլիսի 03-ին թիվ 09112313 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
2.Գործի փաստական հանգամանքները.

Նախնական քննության մարմինն ամբաստանյալ Խաչիկ Կոլյայի Աղաջանյանին ՀՀ քրեական օրենսգրքի 266 հոդվածի 1-ին մասով մեղադրանք է առաջադրել այն արարքի կատարման համար, որ նա քննությամբ չպարզված հանգամանքերում, իրացման նպատակով ապօրինի ձեռք է բերել և իր մոտ պահել է մարիխուանա տեսակի թմրամիջոց, որի մի մասը` մանր չափի` 0.04 գրամ հաստատուն քաշով չորացված մարիխուանա տեսակի թմրամիջոցը, 2013թ. հունիսի 03-ին ժամը 21:00-ի սահմաններում Երևան քաղաքի Պ. Սևակի փողոցի 5 հասցեի հարակից տարածքում հյուրասիրման եղանակով ապօրինի իրացրել է Վրաստանի Հանրապետության քաղաքացի Նոդար Էլիզբարի Մոմցեմլիձեին, ում մոտ այն հայտնաբերվել է նույն օրը ոստիկանության Դավիթաշենի բաժանմունքում կատարված անձնական խուզարկությամբ:
3. Արագացված դատական քննություն.
Մինչև դատաքննությունն սկսելն ամբաստանյալ Խաչիկ Կոլյայի Աղաջանյանը միջնորդեց դատական քննությունն անցկացնել արագացված կարգով և հայտարարեց, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու բնույթն ու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո: Միջնորդությունը հաստատեց նաև ամբաստանյալի պաշտպան Էդուարդ Աղաջանյանը:
Մեղադրող Լ.Մանուկյանը մեղադրական եզրակացությունը հաստատելիս դատական քննության արագացված կարգ կիրառելուն առարկել է, սակայն դատարանում փոխելով դիրքորոշումը, դատական քննության արագացված կարգ կիրառելուն չառարկեց:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել դատական քննության արագացված կարգ կիրառելու մասին:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Խաչիկ Կոլյայի Աղաջանյանին առաջադրված մեղադրանքը ՀՀ քրեական օրենսգրքի 266 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 266 հոդվածի 1-ին մասի հատկանիշներին և արարքի որակումը ճիշտ է:
Կատարած արարքի համար ամբաստանյալ Խաչիկ Աղաջանյանը ենթակա է քրեական պատասխանատվության և պատժի:
ՀՀ քրեական օրենսգրքի 48 հոդվածի համաձայն,
1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից ու ազատություններից օրենքով նախատեսված զրկմամբ կամ դրանց սահմանափակմամբ:
2. Պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները:
ՀՀ քրեական օրենսգրքի 61 հոդվածի համաձայն`
1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործության՝ հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում՝ պատասխանատվությունը և պատիժը մեղմացնող կամ ծանրացնող հանգամանքներով:
3. Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները:
Ամբաստանյալ Խաչիկ Աղաջանյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ Խաչիկ Աղաջանյանի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նրա խնամքին են գտնվում երկու անչափահաս երեխաները (Նարինե Խաչիկի Աղաջանյան` ծնված 13.08.1998թ., Նելլի Խաչիկի Աղաջանյան` ծնված 15.01.2008թ.) և կենսաթոշակառու հայրը (մայրը մահացած է), կինը չի աշխատում, ընտանիքի միակ կերակրողն ինքն է, նրա ընտանիքն ընդգրկված է սոցիալապես անապահով ընտանիքների ՙՓարոս՚ ծրագրում, բնութագրվում է դրական, ֆիզիկապես վատառողջ է (գտնվել էբուժման մեջ ՀՀ ԱՆ ՙՀանրապետական հակատուբերկուլյոզային դիսպանսեր՚ ՓԲԸ-եւմ 05.08.1987-10.08.1988թթ. աջ թոքի վերին բլթի բազմաթիվ տուբերկուլոմաներ` քայքայման փուլում, ՏՄԲ + /դրական/ ախտորոշմամբ: 31.05.1988թ. կատարվել է ձախ թոքի 1,2,3 և 10-րդ սեգմենտների մասնահատում):
Ամբաստանյալի պատասխանատվությունը և պատիժը ծանրացնող հանգամանքներ առկա չեն:
Հաշվի առնելով Խաչիկ Աղաջանյանի կատարած արարքի հանրության համար վտանգավորության աստիճանը և բնույթը, նրա անձը, նրան բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 266 հոդվածի 1-ին մասի սանկցիայով նախատեսված է պատիժ միայն ազատազրկման ձևով, դատարանը գտնում է, որ պատժի նպատակներին հասնելու համար ամբաստանյալ Խաչիկ Կոլյայի Աղաջանյանի նկատմամբ ՀՀ քրեական օրենսգրքի 266 հոդվածի 1-ին մասով նախատեսված հանցանք կատարելու համար պատիժ պետք է նշանակել ազատազրկման ձևով, որը նա պետք է կրի:
ՀՀ քրեական դատավարության օրենսգրքի 3753 հոդվածի 6-րդ մասի համաձայն դատարանը արագացված կարգով դատական քննության արդյունքում մեղադրական դատավճիռ կայացնելիս նշանակում է պատիժ, որը չի կարող գերազանցել կատարված հանցագործության համար նախատեսված առավել խիստ պատժի երկու երրորդը, իսկ եթե առավել խիստ պատժի երկու երրորդը փոքր է տվյալ հանցագործության համար նախատեսված առավել մեղմ պատժից, ապա` առավել մեղմ պատիժը:
Անդրադառնալով ամբաստանյալ Խաչիկ Աղաջանյանի նկատմամբ ընտրված խափանման միջոցի հարցին, դատարանը գտնում է, որ Խաչիկ Կոլյայի Աղաջանյանի նկատմամբ ընտրված խափանման միջոցը` կալանավորումը, պետք է թողնել անփոփոխ, մինչև դատավճռի օրինական ուժի մեջ մտնելը։
Նկատի ունենալով, որ ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթուն քննչական բաժնի քննիչի 28.06.2013թ.-ի որոշմամբ իրեղեն ապացույց ճանաչված 0.04 գրամ քաշով չորացված մարիխուանա տեսակի թմրամիջոցը նշանակված դատաքիմիական փորձաքննության ընթացքում ամբողջությամբ ծախսվել է, դատարանը գտնում է, որ իրեղեն ապացույցի տնօրինման հարցը պետք է համարել լուծված:
Դատարանը գտնում է, որ դատական ծախսերն ամբաստանյալից ենթակա չեն բռնագանձման, նկատի ունենալով, որ ՀՀ քրեական դատավարության օրենսգրքի 168 հոդվածի 1-ին մասի 1-ին կետով նախատեսված դատական ծախս սույն քրեական գործով չկա, իսկ 2-8-րդ կետերով նախատեսված դատական ծախսերն արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի, ամբաստանյալից ենթակա չեն բռնագանձման:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց


Խաչիկ Կոլյայի Աղաջանյանին մեղավոր ճանաչել ՀՀ քրեական օրենսգրքի 266 հոդվածի 1-ին մասով նախատեսված հանցանք կատարելու մեջ և նրան դատապարտել ազատազրկման երեք (3) տարի ժամկետով:
Խաչիկ Աղաջանյանի նկատմամբ նշանակված պատժի սկիզբը հաշվել 2013 թվականի հունիսի 27-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Խաչիկ Աղաջանյանի նկատմամբ կիրառված խափանման միջոցը` կալանավորումը թողնել անփոփոխ, մինչև դատավճռի օրինական ուժի մեջ մտնելը:
Դատական ծախսերի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:

Դատավոր` ստորագրություն
Բնագրի հետ ճիշտ է`
Դատավոր Լ.Ավետիսյան