ԵԱՔԴ/0094/01/13
Ո Ր Ո Շ ՈՒ Մ

քրեական հետապնդումը դադարեցնելու և քրեական գործի վարույթը կարճելու մասին

11 հոկտեմբերի 2013թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների առաջին ատյանի դատարանը` նախագահությամբ դատավոր Լ.Ավետիսյանի, քարտուղարությամբ Ե.Կարապետյանի, մասնակցությամբ մեղադրող Գ.Ալումյանի, ամբաստանյալներ Զ.Սողոմոնյանի, Դ.Ղազարյանի, պաշտպան Ս.Հարությունյանի, տուժող Գ.Հովիկյանի, դռնբաց դատական նիստում քննեց քրեական գործն ըստ մեղադրանքի`
Զենֆիկ Անդասի Սողոմոնյանի (ծնված 02.06.1967թ., Վայոց Ձորի մարզի Արենի գյուղում, ազգությամբ հայ, ՀՀ քաղաքացի, միջնակարգ կրթությամբ, այրի, խնամքին մեկ անձ, նախկինում չդատված, չի աշխատում, հաշվառված է Վայոց Ձորի մարզի Արենի գյուղի 1-ին փողոցի 6-րդ նրբ. 5-րդ տանը, բնակվում է ք.Հրազդան, Միկրոշրջան 16 շենքի թիվ 2 բնակարանում) ՀՀ քրեական օրենսգրքի 216 հոդվածի 1-ին մասով, որպես խափանման միջոց է ընտրվել ստորագրություն չհեռանալու մասին:
Դիաննա Գերմանի Ղազարյանի (ծնված 18.12.1991թ., Արագածոտնի մարզի Թալին քաղաքում, ազգությամբ հայ, ՀՀ քաղաքացի, ութամյա կրթությամբ, ամուսնալուծված, նախկինում չդատված, չի աշխատում, առանց հաշվառման, ժամանակավորապես բնակվում է ք.Երևան, Պոպովի փողոց 98 տանը) ՀՀ քրեական օրենսգրքի 177 հոդվածի 1-ին մասով, որպես խափանման միջոց է ընտրվել չհեռանալու մասին ստորագրությունը:
Պ Ա Ր Զ Ե Ց

2013 թվականի մարտի 5-ին ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 216 հոդվածի 1-ին մասի հատկանիշներով հարուցվել է թիվ 14111713 քրեական գործը:
2013 թվականի մարտի 11-ին կասկածյալ Զենֆիկ Անդասի Սողոմոնյանի նկատմամբ որպես խափանման միջոց է ընտրվել չհեռանալու մասին ստորագրությունը:
2013 թվականի մարտի 11-ին Զենֆիկ Անդասի Սողոմոնյանը ներգրավվել է որպես մեղադրյալ ՀՀ քրեական օրենսգրքի 216 հոդվածի 1-ին մասով այն արարքի կատարման համար, որ նա 2013 թվականի հունվարի 19-ին, իր ծանոթ Դիաննա Գերմանի Ղազարյանից նվեր է ստացել ակնհայտ հանցավոր ճանապարհով ձեռք բերված, զգալի չափ կազմող ՙՍամսունգ՚ և ՙԴոռադո՚ տեսակի բջջային հեռախոսներ, որոնց հանցավոր ճանապարհով ձեռք բերված լինելու հանգամանքը Զենֆիկ Սողոմոնյանին նախապես հայտնի է եղել:
2013 թվականի ապրիլի 15-ի որոշմամբ Դիաննա Գերմանի Ղազարյանը ներգրավվել է որպես մեղադրյալ ՀՀ քրեական օրենսգրքի 177 հոդվածի 1-ին մասով այն արարքի կատարման համար, որ նա 2013 թվականի հունվարի 19-ին` ժամը 0500-ից մինչև 0900-ն ընկած ժամանակահատվածում, գտնվելով Երևան քաղաքի Նիկոլ Դուման փողոցի 2-րդ տանը, գաղտնի հափշտակել է Գրիշա Անդրանիկի Հովիկյանին պատկանող ՙՍամսունգ՚, ՙԴոռադո՚ և ՙՆոկիա՚ տեսակների բջջային հեռախոսները` Գ.Հովիկյանին պատճառելով զգալի չափի` 80.000 ՀՀ դրամի գույքային վնաս:
2013 թվականի ապրիլի 15-ին Դիաննա Գերմանի Ղազարյան նկատմամբ որպես խափանման միջոց է ընտրվել չհեռանալու մասին ստորագրությունը:
2013 թվականի հունիսի 7-ին թիվ 14111713 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթույն վարչական շրջանների ընդհանուր իրավասության դատարան:
Դատարանի 2013 թվականի հուլիսի 19-ի որոշմամբ թիվ ԵԱՔԴ/0094/01/13 քրեական գործով ամբաստանյալ Դիաննա Գերմանի Ղազարյանի նկատմամբ հայտարարվել է հետախուզում: Նրա նկատմամբ կիրառված խափանման միջոցը` չհեռանալու մասին ստորագրությունը, թողնվել է անփոփոխ:
23.09.2013թ.-ին հետախուզվող Դիաննա Գերմանի Ղազարյանը հայտնաբերվել է:
Դատարանի 2013թ. սեպտեմբերի 23-ի որոշմամբ Զենֆիկ Անդասի Սողոմոնյանի վերաբերյալ ՀՀ քրեական օրենսգրքի 216 հոդվածի 1-ին մասով և Դիաննա Գերմանի Ղազարյանի վերաբերյալ ՀՀ քրեական օրենսգրքի 177 հոդվածի 1-ին մասով թիվ ԵԱՔԴ/0094/01/13 քրեական գործի վարույթը վերսկսվել է:
Դատական նիստի ժամանակ պաշտպան Ս.Հարությունյանը միջնորդեց ամբաստանյալ Դիաննա Ղազարյանի նկատմամբ քրեական հետապնդումը դադարեցնել` նկատի ունենալով, որ տուժող Գ.Հովիկյանը հաշտվել է ամբաստանյալ Դ.Ղազարյանի հետ: Ամբաստանյալ Զենֆիկ Սողոմոնյանի նկատմամբ կիրառել համաներման մասին ՀՀ Ազգային Ժողովի 03.10.2013թ.-ի որոշումը և նրա նկատմամբ քրեական հետապնդումը նույնպես դադարեցնել:
Մեղադրող Գ.Ալոյանը նույնպես միջնորդեց ամբաստանյալ Դիաննա Ղազարյանի նկատմամբ քրեական հետապնդումը դադարեցնել` տուժող Գ.Հովիկյանի և ամբաստանյալ Դ.Ղազարյանի հաշտության հիմքով:
Մեղադրողը միջնորդեց հիմք ընդունելով ՀՀ Ազգային Ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշումը` Զենֆիկ Սողոմոնյանի նկատմամբ քրեական հետապնդումը դադարեցնել և քրեական գործի վարույթը կարճել:
Ամբաստանյալ Զենֆիկ Սողոմոնյանը հայտնեց, որ ինքը համաձայն է որպեսզի իր նկատմամբ կիրառվի համաներման ակտը:
Դատաքննության ընթացքում տուժող Գրիշա Հովիկյանը դիմում ներկայացրեց դատարան և հայտնեց, որ ամբաստանյալ Դիաննա Ղազարյանի հետ հաշտվել է, պատճառված նյութական վնասն ամբողջությամբ վերականգնվել է: Խնդրեց ամբաստանյալ Դիաննա Ղազարյանի նկատմամբ քրեական հետապնդումը դադարեցնել և նրա վերաբերյալ քրեական գործի վարույթը կարճել: Հայտնեց նաև, որ ամբաստանյալ Զենֆիկ Սողոմոնյանից որևէ նյութական պահանջ չունի:
Ամբաստանյալ Դիաննա Ղազարյանը հայտնեց, որ ինքն ու տուժողը հաշտվել են և համաձայն է, որպեսզի իր վերաբերյալ քրեական գործի վարույթը կարճվի:
Վերոգրյալը հաշվի առնելով, դատարանը գտնում է, որ Դիաննա Ղազարյանի նկատմամբ քրեական հետապնդումը պետք է դադարեցնել, նկատի ունենալով հետևյալը.
ՀՀ քրեական դատավարության օրենսգրքի 183 հոդվածի 1-ին մասի համաձայն, ՀՀ քրեական օրենսգրքի 177 հոդվածի 1-ին մասով (...) նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի, մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
ՀՀ քրեական դատավարության օրենսգրքի 35 հոդվածի 1-ին մասի 5-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական դատավարության օրենսգրքի 35 հոդվածի 4-րդ մասի համաձայն, մեղադրողը, դատարանում հայտնաբերելով քրեական հետապնդումը բացառող հանգամանքներ, պարտավոր է հայտարարել ամբաստանյալի նկատմամբ քրեական հետապնդում իրականացնելուց հրաժարվելու մասին: Ամբաստանյալի նկատմամբ քրեական հետապնդում իրականացնելուց հրաժարվելու մասին մեղադրողի հայտարարությունը դատարանի համար քրեական գործի վարույթը կարճելու և քրեական հետապնդումը դադարեցնելու հիմք է:
Դատարանը գտնում է, որ Զենֆիկ Անդասի Սողոմոնյանի վերաբերյալ քրեական գործի վարույթը պետք է կարճել և նրա նկատմամբ քրեական հետապնդումը դադարեցնել` հետևյալ պատճառաբանությամբ.
ՀՀ Ազգային Ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշման 15-րդ կետի համաձայն, սույն որոշումը կիրառվում է այն անձանց նկատմամբ, ովքեր հանցագործություն են կատարել մինչև 2013 թվականի սեպտեմբերի 1-ը ներառյալ: Զենֆիկ Անդասի Սողոմոնյանը հանրորեն վտանգավոր արարքը կատարել է 2013 թվականի հունվարին:
Նույն որոշման 5-րդ կետի 2-րդ ենթակետի համաձայն, պետք է կարճել այն անձանց կողմից կատարված հանցագործությունների վերաբերյալ գործերը, ովքեր մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ ոչ ավելի, քան երեք տարի ժամկետով ազատազրկում:
ՀՀ քրեական օրենսգրքի 216 հոդվածի 1-ին մասով նախատեսված պատժի առավելագույն չափը երեք ամիս ժամկետով կալանքն է:
Սույն քրեական գործով բացակայում են համաներման մասին հիշյալ որոշման 9-րդ կետում նշված այն սահմանափակումները, որոնք կարող են արգելք հանդիսանալ ամբաստանյալ Զենֆիկ Սողոմոնյանի նկատմամբ համաներման ակտի կիրառման համար:
Համաներման որոշման 13-րդ կետի 1-ին ենթակետի ՙա՚ պարբերության համաձայն, որոշման կատարումը վերապահվել է դատարաններին` այն անձանց նկատմամբ, որոնց վերաբերյալ գործերը գտնվում են դատարաններում, սակայն մինչև սույն որոշումն ուժի մեջ մտնելը չեն քննվել, կամ այն անձանց նկատմամբ, որոնց վերաբերյալ գործերը քննվել են, բայց դատավճիռներն օրինական ուժի մեջ չեն մտել:
Հիմք ընդունելով վերը նշվածը, դատարանը գտնում է, որ ամբաստանյալ Զենֆիկ Անդասի Սողոմոնյանի նկատմամբ կիրառելի է ՀՀ Ազգային ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշումը:
Համաձայն ՀՀ քրեական դատավարության օրենսգրքի 35-րդ հոդվածի 1-ին մասի 13-րդ կետի, հարուցված քրեական գործի վարույթը ենթակա է կարճման, եթե` ընդունվել է համաներման ակտ:
Դատարանը գտնում է, որ քննիչի 2013թ. ապրիլի 2-ի որոշմամբ իրեղեն ապացույց ճանաչված և քրեական գործին կցված ՙԴոռադո՚ տեսակի բջջային հեռախոսը պետք է վերադարձնել տուժող Գրիշա Հովիկյանին:
Անդրադառնալով ամբաստանյալների նկատմամբ կիրառված խափանման միջոցին, դատարանը գտնում է, որ Դիաննա Ղազարյանի և Զենֆիկ Սողոմոնյանի նկատմամբ կիրառված խափանման միջոցը պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 33 հոդվածի 2-րդ մասով, 35 հոդվածի 1-ին մասի 5-րդ, 13-րդ կետերով, նույն հոդվածի 4-րդ մասով, 36, 183 և 313 հոդվածներով, hիմք ընդունելով ՀՀ Ազգային ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշման 5-րդ կետի 2-րդ ենթակետը, 13-րդ կետի 1.ա ենթակետը, դատարանը

Ո Ր Ո Շ Ե Ց

Դիաննա Գերմանի Ղազարյանի նկատմամբ ՀՀ քրեական օրենսգրքի 177 հոդվածի 1-ին մասով քրեական հետապնդումը դադարեցնել` ամբաստանյալի հետ տուժող Գրիշա Անդրանիկի Հովիկյանի հաշտվելու հիմքով:
Դիաննա Ղազարյանի նկատմամբ կիրառված խափանման միջոցը` չհեռանալու մասին ստորագրությունը, վերացնել:
Զենֆիկ Անդասի Սողոմոնյանի նկատմամբ ՀՀ քրեական օրենսգրքի 216 հոդվածի 1-ին մասով քրեական հետապնդումը դադարեցնել և թիվ ԵԱՔԴ/0094/01/11 քրեական գործի վարույթը կարճել` ՀՀ Ազգային ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշման 5-րդ կետի 2-րդ ենթակետի համաձայն:
Զենֆիկ Սողոմոնյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Քաղաքացիական հայցի հարցը համարել լուծված:
Որոշումն օրինական ուժի մեջ մտնելուց հետո իրեղեն ապացույց հանդիսացող ՙԴոռադո՚ տեսակի բջջային հեռախոսը վերադարձնել Գրիշա Հովիկյանին:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից մեկամսյա ժամկետում:

Դատավոր Լ. Ավետիսյան