ԵԱՔԴ/0071/01/13
Ո Ր Ո Շ ՈՒ Մ

քրեական հետապնդումը դադարեցնելու և քրեական գործի վարույթը կարճելու մասին

22 մայիսի 2013թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը` նախագահությամբ դատավոր Լ.Ավետիսյանի, քարտուղարությամբ Ն.Ղազարյանի, մասնակցությամբ մեղադրող Վ.Մուրադյանի, ամբաստանյալ Ա.Բադալյանի, դռնբաց դատական նիստում, քննության առնելով Արամ Կարենի Բադալյանի (ծնված 1992 թվականի մարտի 21-ին, Երևան քաղաքում, ազգությամբ հայ, ՀՀ քաղաքացի, թերի բարձրագույն կրթությամբ, ՀՀ ոստիկանության ակադեմիայի իրավագիտության ֆակուլտետի 4-րդ կուրսի, 4-րդ դասակի նախկին ուսանող, ամուրի, նախկինում չդատված, չի աշխատում, բնակվում է ք.Երևան, Դավիթաշեն 4-րդ թաղամաս 10 շենք 24 բնակարան հասցեում, մեղադրվում է ՀՀ քրեական օրենսգրքի 113 հոդվածի 1-ին մասով, որպես խափանման միջոց է կիրառվել չհեռանալու մասին ստորագրությունը) վերաբերյալ քրեական գործը,

Պ Ա Ր Զ Ե Ց

2013 թվականի ապրիլի 05-ին ՀՀ հատուկ քննչական ծառայությունում ՀՀ քրեական օրենսգրքի 121 հոդվածի 1-ին մասի հատկանիշներով հարուցվել է թիվ 62202713 քրեական գործը:
2013 թվականի ապրիլի 9-ին կասկածյալ Արամ Բադալյանի նկատմամբ որպես խափանման միջոց է կիրառվել չհեռանալու մասին ստորագրությունը:
2013 թվականի ապրիլի 12-ի որոշմամբ Արամ Կարենի Բադալյանը ներգրավվել է որպես մեղադրյալ ՀՀ քրեական օրենսգրքի 113 հոդվածի 1-ին մասով այն արարքի կատարման համար, որ նա, հանդիսանալով պետական հատուկ ծառայություն իրականացնող անձ` ՀՀ ոստիկանության ակադեմիայի ուսանող, դիտավորությամբ ուրիշի առողջությանը պատճառել է միջին ծանրության վնաս: Այսպես.
2013թ. մարտի 24-ին, ժամը 1700-ի սահմաններում, առանց վարորդական վկայականի վարելով մոր` Վարդանուշ Կարաքեշիշյանի անվամբ հաշվառված ՙՄերսեդես բենց՚ մակնիշի, 77 TP 177 պետհամարանիշի ավտոմեքենան, Երևան քաղաքի Կոմիտաս-Վաղարշյան փողոցների խաչմերուկում ճանապարհը չզիջելու պատճառով վիճաբանել է ՙՕպել՚ մակնիշի, 22 SL 733 պետհամարանիշի ավտոմեքենայի վարորդ Վարդիթեր Արմենակի Էքսուզյանի հետ, որի ընթացքում վերջինիս ու նրա դստեր` Մարիամ Համբարձումյանի հասցեին հայհոյանքներ է տվել, բացել նրանց ավտոմեքենայի դուռը, ձեռքով հարվածել Վարդիթեր Էքսուզյանի դեմքին` պատճառելով ֆիզիկական ցավ, այնուհետև մեքենայի դուռը փակելիս հարվածել նրա ոտքին` վերջինիս առողջությանը պատճառելով միջին ծանրության վնաս:
2013 թվականի ապրիլի 29-ին թիվ 62202713 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
Տուժող Վարդիթեր Էքսուզյանը գրավոր դիմում է ներկայացրել դատարան, հայտնելով. նկատի ունենալով, որ ամբաստանյալ Արամ Բադալյանը ներողություն է խնդրել և զղջացել է կատարած արարքի համար, հեռացվել է ոստիկանության ակադեմիայից և ենթակա է պարտադիր զինվորական ծառայության զորակոչի, ուստի ղեկավարվելով ՀՀ քրեական դատավարության օրենսգրքի 59 հոդվածի 1-ին մասի 13-րդ կետով և 183 հոդվածի 1-ին մասով` հաշտվել է ամբաստանյալի հետ և չի ցանկանում, որ նա ենթարկվի քրեական պատասխանատվության: Միաժամանակ հայտնել է, որ առողջական խնդիրների պատճառով դատարան ներկայանալ չի կարող և խնդրում է սույն դիմումն ընդունել որպես հիմք և քրեական գործի ընթացքը լուծել ՀՀ քրեական դատավարության օրենսգրքի 35 և 183 հոդվածներով սահմանված կարգով:
Ամբաստանյալ Արամ Բադալյանը հայտնեց, որ ինքն ու տուժողը հաշտվել են, ինքը զղջում է կատարածի համար, հատուցել է տուժողին պատճառված նյութական վնասը, համաձայն է, որպեսզի իր նկատմամբ քրեական հետապնդումը դադարեցվի և իր վերաբերյալ քրեական գործի վարույթը կարճվի` տուժողի հետ հաշտվելու հիմքով:
Մեղադրող Վ.Մուրադյանը հայտնեց, որ տուժողի միջնորդությունը բխում է ՀՀ քրեական դատավարության օրենսգրքի 35 և 183 հոդվածների պահանջներից և ենթակա է բավարարման:
Վերոգրյալը հաշվի առնելով, դատարանը գտնում է, որ Արամ Բադալյանի նկատմամբ քրեական հետապնդումը պետք է դադարեցնել և թիվ ԵԱՔԴ/0071/01/13 քրեական գործի վարույթը կարճել, նկատի ունենալով հետևյալը.
ՀՀ քրեական դատավարության օրենսգրքի 35 հոդվածի 1-ին մասի 5-րդ կետի համաձայն, քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական դատավարության օրենսգրքի 183 հոդվածի 1-ին մասի համաձայն, ՀՀ քրեական օրենսգրքի 113 հոդվածի 1-ին մասով (...) նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի, մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
ՀՀ քրեական դատավարության օրենսգրքի 35 հոդվածի 4-րդ մասի համաձայն, մեղադրողը, դատարանում հայտնաբերելով քրեական հետապնդումը բացառող հանգամանքներ, պարտավոր է հայտարարել ամբաստանյալի նկատմամբ քրեական հետապնդում իրականացնելուց հրաժարվելու մասին: Ամբաստանյալի նկատմամբ քրեական հետապնդում իրականացնելուց հրաժարվելու մասին մեղադրողի հայտարարությունը դատարանի համար քրեական գործի վարույթը կարճելու և քրեական հետապնդումը դադարեցնելու հիմք է:
Անդրադառնալով ամբաստանյալի նկատմամբ կիրառված խափանման միջոցին, դատարանը գտնում է, որ Արամ Կարենի Բադալյանի նկատմամբ որպես խափանման միջոց կիրառված չհեռանալու մասին ստորագրությունը պետք է վերացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 33 հոդվածի 2-րդ մասով, 35 հոդվածի 1-ին մասի 5-րդ կետով և 4-րդ մասով, 36, 183, 294 և 313 հոդվածներով, դատարանը
Ո Ր Ո Շ Ե Ց

Արամ Կարենի Բադալյանի նկատմամբ ՀՀ քրեական օրենսգրքի 113 հոդվածի 1-ին մասով քրեական հետապնդումը դադարեցնել և նրա վերաբերյալ թիվ ԵԱՔԴ/0071/01/13 քրեական գործի վարույթը կարճել` ամբաստանյալի հետ տուժող Վարդիթեր Արմենակի Էքսուզյանի հաշտվելու հիմքով:
Արամ Բադալյանի նկատմամբ որպես խափանման միջոց կիրառված չհեռանալու մասին ստորագրությունը վերացնել:
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավորª ստորագրություն
Բնագրի հետ ճիշտ է
Դատավոր Լ. Ավետիսյան