ԵԱՔԴ/0070/01/13

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ. Ավետիսյան
քարտուղարությամբ` Ե. Կարապետյանի
մասնակցությամբ
մեղադրող` Ա. Կոստանդյանի

2013 թվականի հունիսի 5-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի Միհրան Սարգսի Ղազարյանի, ծնված 1990 թվականի դեկտեմբերի 20-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, նախկինում չդատված, չի աշխատում, հաշվառված և բնակվում է Երևան քաղաքի Հալաբյան փողոցի 29 շենքի թիվ 18 բնակարան հասցեում, մեղադրվում է ՀՀ քրեական օրենսգրքի 244 հոդվածով, որպես խափանման միջոց է ընտրվել չհեռանալու մասին ստորագրությունը,
Պ Ա Ր Զ Ե Ց

1.Գործի դատավարական նախապատմությունը.
2013թ. մարտի 1-ին ՀՀ ոստիկանության ՔԳՎ Երևան քաղաքի քննչական վարչության ՃՏՀ քննության բաժնում Միհրան Սարգսի Ղազարյանի կողմից Ստյոպա Արմանի Ալեքսանյանին վրաերթի ենթարկելուց հետո ՃՏՊ վայրը թողնել հեռանալու դեպքի առթիվ ՀՀ քրեական օրենսգրքի 244 հոդվածով նախատեսված հանցագործության հատկանիշներով հարուցվել է թիվ 60106613 քրեական գործը:
2013 թվականի մարտի 13-ի որոշմամբ թիվ 60106613 քրեական գործով ավտովարորդ Աշոտ Գագիկի Մանուկյանի նկատմամբ քրեական հետապնդում չի իրականացվել` նրա արաքում հանցակազմի բացակայության պատճառաբանությամբ: Ատովարորդ Միհրան Սարգսի Ղազարյանի նկատմամբ` Արման Ստյոպայի Ալեքսանյանին պատճառված մարմնական վնասվածքների և Աշոտ Մանուկյանի վարած ավտոմեքենայի հետ վթարի ենթարկվելու մասերով, քրեական հետապնդում չի իրականացվել` նրա արարքում հանցակազմի բացակայության պատճառաբանությամբ, իսկ Ստյոպա Ալեքսանյանին պատճառված մարմնական վնասվածքների մասով, քրեական հետապնդում չի իրականացվել` տուժողի հետ հաշտության կապակցությամբ:
Նախաքննության մարմնի 2013 թվականի մարտի 14-ի որոշմամբ Միհրան Սարգսի Ղազարյանը ներգրավվել է որպես մեղադրյալ ՀՀ քրեական օրենսգրքի 244 հոդվածով: Նրա նկատմամբ որպես խափանման միջոց է կիրառվել չհեռանալու մասին ստորագրությունը:
2013 թվականի ապրիլի 29-ին թիվ 60106613 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
2.Գործի փաստական հանգամանքները.
Նախնական քննության մարմինն ամբաստանյալ Միհրան Սարգսի Ղազարյանին ՀՀ քրեական օրենսգրքի 244 հոդվածով մեղադրանք է առաջադրել այն արարքի կատարման համար, որ նա, չունենալով վարորդական իրավունքի վկայականª ՙՃանապարհային երթևեկության անվտանգության ապահովման մասին՚ ՀՀ օրենքի 24-րդ հոդվածի 5-րդ կետի պահանջի խախտմամբ, 2013թ. հունվարի 1-ին, ժամը 2030-ի սահմաններում իր անձնական օգտագործման ՙՎազ-21214՚ մակնիշի 99 AA 969 պ/հ ավտոմեքենայով Երևան քաղաքի Հր. Քոչար, Բաղրամյան և Կասյան փողոցների հետ հատվող խաչմերուկի կողմից Կիևյան փողոցով Լենինգրադյան փողոցի ուղղությամբ երթևեկելիս, լուսացույցի կանաչ լուսաազդանշանի միացված լինելու պայմաններում մուտք է գործել Օրբելու փողոցի հետ հատվող խաչմերուկ ու խախտել ՃԵԿ-ի 65, 67 կետերի պահանջները: Այն է. ավտոմեքենան վարել է դեպքի վայրի ճանապարհահատվածի համար սահմանված թույլատրելի 40 կմ/ժ-ը գերազանցող 70-80 կմ/ժ արագությամբ և ուշադիր չլինելով ողջ ճանապարհատրանսպորտային իրադրությանն ու իր երթևեկության համար վտանգն առաջանալու պահից սկսած մինչ հետիոտնին հասնելն ավտոմեքենան կանգնեցնելու տեխնիկական հնարավորություն ունենալով, ինքն իրեն զրկել է վրաերթը կանխելու տեխնիկական հնարավորությունից, ժամանակին միջոցներ չի ձեռնարկել ավտոմեքենան կանգնեցնելու կամ ընթացքը դանդաղեցնելու համար և հնարավորություն չի տվել հետիոտնին դուրս գալու իր վարած ավտոմեքենայի ընթացքագոտուց, որի հետևանքով ավտոմեքենայի աջակողմյան մասով վրաերթի է ենթարկել հետիոտն Ստյոպա Արմանի Ալեքսանյանին, անզգուշությամբ պատճառելով առողջությանը միջին ծանրության վնաս՝ առողջության տևական քայքայումով: Այնուհետև, Մ.Ղազարյանը ՃԵԿ-ի պահանջները խախտելու հետևանքով վրաերթ կատարելուց հետո թողնելով ճանապարհատրանսպորտային պատահարի վայրը՝ իր վարած ՙՎազ-21214՚ մակնիշի 99 AA 969 պ/հ ավտոմեքենայով հեռացել է:
3.Ապացույցների հետազոտում.
Ամբաստանյալ Միհրան Ղազարյանն իրեն լիովին մեղավոր ճանաչեց և հրաժարվեց ցուցմունք տալ, պնդեց նախաքննության ընթացքում տված իր ցուցմունքը:
Նախաքննության ընթացքում Միհրան Ղազարյանը ցուցմունք է տվել այն մասին, որ 2013թ. հունվարի 1-ին ժամը 2030-ի սահմաններում, չունենալով վարորդական իրավունքի վկայական, իր անձնական օգտագործման ՙՎազ-21214՚ մակնիշի 99 AA 969 պ/հ ավտոմեքենայով՝ մոտակա լույսերը միացված վիճակում, ընթանալիս է եղել Երևան քաղաքի Կիևյան փողոցով՝ Հր.Քոչար, Կասյան և Բաղրամյան փողոցների հետ հատվող խաչմերուկի կողմից Լենինգրադյան փողոցի ուղղությամբ, իր ուղեմասի ձախ եզրային 3-րդ գոտով, մոտ 70-80 կմ/ժ արագությամբ: Մոտենալով Օրբելու փողոցի հետ հատվող խաչմերուկին, նկատել է, որ իր համար միացված է լուսացույցի կանաչ լուսաազդանշանը և շարունակելով նույն արագությամբ ու ուղղությամբ երթևեկել, մուտք է գործել խաչմերուկ, որտեղ նկատել է իր առջևից՝ աջից 2-րդ գոտով համընթաց երթևեկող մի ՙՄերսեդես-Բենց՚ մակնիշի ավտոմեքենայի, որը խաչմերուկն անցնելու պահին դանդաղեցրել է ընթացքի արագությունը, հասցնելով մոտ 10-20 կմ/ժ-ի: Ինքը շարունակել է նույն ուղղությամբ ընթանալ, որից հետո չհասած այդ ավտոմեքենայի հետնամասին՝ նկատել է դրա առջևից՝ առաջամասից մոտ 2-3 մետր հեռավորությունից, արագ քայլերով դուրս եկող ու իր ընթացքի ուղղության նկատմամբ աջից դեպի ձախ կողմ, դեպի ձախ ուղղվածությամբ շեղանկյան տակ ուղեմասը կողք-կողքի հատող Արման և Ստյոպա Ալեքսանյաններին ու այդ պահին տվել է ձայնային ազդանշան, որպեսզի նրանք զգուշանան: Տեսնելով, որ նրանք շարունակում են հատել փողոցը, կտրուկ ձախ է մանևրել, որից հետո արգելակել ու արգելակած վիճակում անցել է մոտ 4-5 մետր տարածություն: Այնուհետև ավտոմեքենան կորցրել է կառավարելիությունը և դեպի ձախ ուղղությամբ ընթանալով՝ սկսել է պտտվել, որի ընթացքում՝ 3-րդ գոտում, ավտոմեքենայի աջակողմյան մասով վրաերթի է ենթարկել հետիոտներին, որից հետո իր վարած ավտոմեքենան դեպի ձախ ուղղությամբ պտտվելով դուրս է եկել հանդիպակաց երթևեկության ուղեմաս ու ավտոմեքենայի առջևի ձախ անկյունային մասով ընդհարվել է այդ ուղեմասով դեպի Օրբելու փողոցի հետ հատվող խաչմերուկի ուղղությամբ 3-րդ գոտով երթևեկող ՙՖոլկսվագեն-Գոլֆ՚ մակնիշի 33 VL 376 պ/հ ավտոմեքենայի ձախակողմյան մասին ու կանգ առել հադիպակաց ուղեմասում՝ մոտ 180 աստիճանի չափով թեքված դիրքում: 5-10 վայրկյանի չափով նույն դիրքում կանգնած մնալուց հետո տեղից շարվելով՝ վերսկսել է երթևեկությունը, ձախ հետադարձ կատարել ու հեռացել դեպքի վայրից դեպի Լենինգրադյան փողոցի ուղղությամբ: Հետիոտներն իր տեսադաշտում ՙՄերսեդես-Բենց՚ մակնիշի ավտոմեքենայի առջևի մասում հայտնվելու պահից արագ քայլերով անցել են 2 քայլ՝ մոտ 1,5 մետրի չափով, որից հետո դանդաղացրել են քայլերի տեմպն ու այդ տեմպով անցել ևս 2 քայլ՝ 1,5 մետրի չափով, ու վերջին պահին՝ մոտ 1 վայրկյանի չափով, կանգ են առել իր ընթացագոտում և վրաերթի ենթարկվել իր վարած ավտոմեքենայի կողմից, ինչի արդյունքում շպրտվել են ու վայր ընկել ասֆալտին: Ինքը մայթեզրի մոտ, ինչպես նաև 1-ին և 2րդ գոտիներով երթևեկող ավտոմեքենաների առաջամասով հատող հետիոտնին չի նկատել, քանի որ այդ ուղղությամբ չի նայել: Բացի այդ, մտքերով տարված լինելու արդյունքում ուշադրությունը շեղել է երթևեկությունից, որի հետևանքով հետիոտներին նկատել է միայն ՙՄերսեդես-Բենց՚ մակնիշի ավտոմեքենայի առջևի ձախ անկյունային մասից դուրս գալու պահին: Վրաերթից մոտ ժամուկես անց իրեն է զանգահարել ավտոմեքենայի նախկին տերը և հայտնել, որ ոստիկանությունն իրեն է փնտրում: Նույն օրը ժամը 2300-ին ներկայացել է ՃՏՀ քննության բաժին և հայտնել, որ վրաերթը ինքն է կատարել՝ ՙՎազ-21214՚ մակնիշի 99 AA 969 պ/հ ավտոմեքենայով:
Ամբաստանյալ Միհրան Ղազարյանին մեղսագրված հանցանքը նրա խոստովանական ցուցմունքից բացի, հիմնավորվել է նաև հետևյալ ապացույցներով.
Վկա Արման Ստյոպայի Ալեքսանյանի ցուցմունքով այն մասին, որ 2013թ. հունվարի 1-ին, ժամը 2030-ի սահմաններում իր որդու՝ անչափահաս Ստյոպա Ալեքսանյանի հետ միասին՝ կողք-կողքի, հատել են Կիևյան փողոցի երթևեկելի մասը ոչ հետիոտնային անցումներով՝ խաչմերուկի եզրային մասով, Լենիգրադյան փողոցի կողմ տանող ուղեմասին հարակից մայթի կողմից դեպի դիմացի մայթի ուղղությամբ` ձախ ուղղվածությամբ շեղանկյան տակ: Մայթից մի քանի քայլ դանդաղ քայլերով անցնելուց հետո Օրբելու և Կիևյան փողոցների խաչմերուկի կողմից դեպի Լենինգրադյան փողոցի ուղղությամբ, 1-ին գոտով երթևեկող տաքսու տարբերանշանով ավտոմեքենան իրենց զիջելու նպատակով դանդաղեցրել է ընթացքի արագությունն ու իրենք դանդաղ քայլերով անցել են դրա առջևի մասով, որից հետո նույն ուղղությամբ, սակայն արդեն 2-րդ գոտով երթևեկող մի ՙՄերսեդես-բենց՚ մակնիշի ավտոմեքենա նույնպես իրենց զիջելու նպատակով դանդաղեցրել է ընթացքի արագությունը և իրենք արագացրել են քայլերի տեմպը, այդ տեմպով անցել ՙՄերսեդես-բենց՚ մակնիշի ավտոմեքենայի առջևի մասով ու վերջինիս առջևի ձախ անկյունային մասից դուրս գալով արագ 2 քայլ են կատարել մոտ 1,5 մետրի չափով, որից հետո դանդաղեցրել են քայլերի տեմպը: Այդ տեմպով անցել են 2 քայլ՝ կրկին մոտ 1,5 մետրի չափով, որի ընթացքում ինքը նկատել է խաչմերուկի կողմից 3-րդ գոտով ու բարձր արագությամբ դեպի իրենց ուղղությամբ անկառավարելիորեն ընթացող ՙՎազ-21214՚ մակնիշի 99 AA 969 պ/հ ավտոմեքենային ու այդ պահին էլ կանգ է առել, գրկել որդուն ու մոտ 1 վայրկյանի չափով նույն դիրքում կանգնած մնալուց հետո վրաերթի են ենթարկվել դեպի ձախ ուղղությամբ պտտվող այդ ՙՎազ-21214՚ մակնիշի ավտոմեքենայի աջակողմյան մասով, ինչի արդյունքում իրենք շպրտվելով վայր են ընկել ասֆալտին ու ստացել մարմնական վնասվածքներ: Վրաերթի հետևանքով ինքը կորցրել է գիտակցությունը: Քիչ անց, երբ գիտակցության է եկել, չի կարող ասել Մ.Ղազարյանն այդ պահին ներկա էր, թե ոչ: Հետագայում տեսագրությունը դիտելիս է տեսել, որ ամբաստանյալը հեռացել է: Իրեն և իր որդուն պատճառված մարմնական վնասվածքների համար ինքը բողոք, քաղաքացիական հայցի պահանջ չի ներկայացրել, քանի որ հաշտվել է Միհրան Ղազարյանի հետ, իսկ վերջինիս կողմից՝ որպես բուժման և դրա հետ կապված այլ ծախսերի փոխհատուցում է կատարվել:
Վկա Աշոտ Գագիկի Մանուկյանի ցուցմունքով այն մասին, որ 2013թ. հունվարի 1-ին, ժամը 2030-ի սահմաններում իր անձնական օգտագործման ՙՖոլկսվագեն-Գոլֆ՚ մակնիշի 33 VL 376 պ/հ ավտոմեքենայով ընթանալիս է եղել Երևան քաղաքի Կիևյան փողոցով՝ Լենինգրադյան փողոցի կողմից Օրբելու փողոցի հետ հատվող խաչմերուկի ուղղությամբ, իր ուղեմասի 3-րդ գոտով ու մոտ 40 կմ/ժ արագությամբ: Չհասած Օրբելու փողոցի հետ հատվող խաչմերուկին, նկատել է հանդիպակաց ուղեմասից անկառավարելիորեն, բարձր՝ 60 կմ/ժ-ից բարձր արագությամբ դեպի իր ուղղությամբ երթևեկող ՙՎազ-21214՚ մակնիշի 99 AA 969 պ/հ ավտոմեքենային, որը դեպի ձախ ուղղությամբ պտտվելով մուտք է գործել իր ուղեմաս և իր ուղեմասում արդեն մոտ 60 կմ/ժ արագությամբ անկառավարելիորեն անցել է մոտ 1 մետր տարածություն ու առջևի ձախ անկյունային մասով բախվել է իր վարած ավտոմեքենայի ձախակողմյան մասին, որից հետո ինքը մեքենայով անցնելով խաչմերուկը կանգ է առել խաչմերուկի անկյունային մասում: Մինչև վթարն ինքը արգելակման չի դիմել, քանի որ չի հասցրել: Իր ավտոմեքենային ընդհարված ՙՎազ-21214՚ մակնիշի ավտոմեքենան դեպքից հետո մի քանի վայրկյան անց հեռացել է դեպքի վայրից դեպի Լենինգրադյան փողոցի ուղղությամբ:
Վկա Տիգրան Մարզպետի Հարությունյանի ցուցմունքով այն մասին, որ 2013թ. հունվարի 1-ին, ժամը 2030-ի սահմաններում երթուղային տաքսի մեքենայով Կիևյան փողոցով երթևեկելու ժամանակ նկատել է Կիևյան փողոցի մայթին պառկած երեխայի ու հետաքրքրությունից ելնելով, իջել է երթուղային տաքսուց, մոտեցել տուժածին և տեսնելով, որ վերջինս մարմնական վնասվածքներ ունի իր բջջային 095529972 հեռախոսահամարից զանգահարել է ՙ103՚ ծառայություն: Դեպքի վայրում հավաքված՝ իրեն անծանոթ մարդկանց խոսակցություններից տեղեկացել է, որ երեխան վրաերթի է ենթարկվել մի ավտոմեքենայի կողմից, որի վարորդը թողնելով պատահարի վայրը, հեռացել է: Խոսակցություններից իմացել է նաև, որ վրաերթ կատարած ավտոմեքենան եղել է սպիտակ գույնի և ՙՆիվա՚ մակնիշի:
Վկա Արթուր Սաշիկի Բալյանի ցուցմունքով այն մասին, որ աշխատում է դեպքի վայրի հարևանությամբ գտնվող ՙՎիոլա՚ արյան ախտորոշման կենտրոնում՝ որպես անվտանգության աշխատակից: 2013թ. հունվարի 1-ին, ժամը 2030-ի սահմաններում գտնվել է կենտրոնի ներսում, երբ փողոցի երթևեկելի մասից լսել է արգելակման ճռռոցի, ապա նաև հարվածի ձայն ու դուրս գալով կենտրոնից՝ նկատել է Կիևյան փողոցի դեպի Լենինգրադյան փողոցի կողմ տանող ուղեմասի վրա՝ ասֆալտին ընկած մի անչափահաս երեխայի ու մի տղամարդու: Անմիջապես մոտեցել է երեխային ու տեսնելով, որ նա վնասվածքներ է ստացել, իր բջջային 098064311 հեռախոսահամարից զանգահարել է ՙ103՚ ծառայություն: Դեպքի վայրում խոսակցություններից տեղեկացել է, որ նրանք վրաերթի են ենթարկվել մի ավտոմեքենայի կողմից, որը վրաերթից հետո դեպքի վայրից դիմել է փախուստի: Ինքը վրաերթ կատարած ավտոմեքենային դեպքի վայրում չի տեսել:
Վկա Կարեն Լեռնիկի Աբելյանի ցուցմունքով այն մասին, որ աշխատում է ՃՈ 1-ին գումարտակի 4-րդ դասակում՝ որպես ավագ տեսուչ: 2013թ. հունվարի 1-ին, ժամը 2030-ի սահմաններում Երևանի Կիևյան փողոցում ծառայություն կատարելով, նկատել է մայթին պառկած մի երեխայի, ում շուրջը հավաքված է եղել բազմություն: Կանգնեցրել է ավտոմեքենան, մոտեցել երեխային, նկատել է, որ նա վնասվածքներ ունի և իր բջջային 091451115 հեռախոսահամարից զանգահարել է ՙ103՚ ծառայություն: Դեպքի վայրում հավաքված մարդկանցից տեղեկացել է, որ վրաերթը կատարվել է սպիտակ գույնի ՙՆիվա՚ մակնիշի 99 AA 969 պ/հ ավտոմեքենայի կողմից, որը դեպքի վայրից դիմել է փախուստի: Կատարված վրաերթի, վրաերթ կատարած ավտոմեքենայի մակնիշի, հաշվառման համարանիշի մասին հայտնել է ՃՈ օպերատիվ կառավարման կենտրոն:
Դատաբժշկական փորձաքննության թիվ 21/հ եզրակացությամբ այն մասին, որ Ստյոպա Ալեքսանյանի ստացած մարմնական վնասվածքները՝ գանգուղեղային փակ վնասվածքի,, որը ուղեկցվել է գլխուղեղի թեթև աստիճանի սալջարդով, քթի ոսկրերի փակ կոտրվածքների, ծոծրակային շրջանի ներկայիս սպիի, նախկինում եղած սալջարդ վերքի ձևերով, հասցվել են բութ, կոշտ առարկաներով, ինչպիսիք կարող էին հանդիսանալ նաև շարժվող տրանսպորտի արտացցված մակերեսները, հնարավոր է որոշման մեջ նշված ժամկետում, չի բացառվում որոշման մեջ նկարագրված գործի հանգամանքներին և պատճառել են առողջությանը միջին ծանրության վնաս՝ առողջության տևական քայքայումով, նկատի ունենալով վնասվածքի հետ անմիջական պատճառական կապի մեջ եղած հետևանքների տևողությունը՝ 21 օրից ավելի:
Դատաբժշկական փորձաքննության թիվ 66 եզրակացությամբ այն մասին, որ Արման Ստյոպայի Ալեքսանյանի ստացած մարմնական վնասվածքները՝ ճակատի ձախ կեսի շրջանի և ձախ արմնկային հոդի շրջանի քերծվածքների, գանգուղեղային փակ, բութ տրավմայի ձևով, հասցվել են բութ առարկայով /ներով/, հնարավոր է որոշման մեջ նշված ժամկետին և պայմաններում, որոնք պատճառել են թեթև վնաս` առողջության կարճատև քայքայումով, նկատի ունենալով վնասվածքների հետ անմիջական կապի մեջ եղած հետևանքների տևողությունը ոչ պակաս 6 օրից և ոչ ավելի 21 օրից:
Դատահետքաբանական, դատաքիմիական և մանրաթելային համալիր փորձաքննության թիվ հմ. 21 եզրակացությամբ այն մասին, որ՝
ՙՎազ-21214՚ մակնիշի 99 AA 969 պ/հ ավտոմեքենայի առջևի թափարգելի ձախ հատվածում առկա վնասվածքները առաջացել են վթարի, իսկ վերջինիս հետևի աջ կողմի անվաթևի վրա առկա վնասվածքները առաջացել են վրաերթի հետևանքով:
Սև գույնի մակադրակը պատկանում է ՙՎազ-21214՚ մակնիշի 99 AA 969 պ/հ ավտոմեքենայի առջևի թափարգելին:
ՙՖոլկսվագեն-Գոլֆ՚ մակնիշի 33 VL 376 պ/հ ավտոմեքենայի ձախ կողմի վրա առկա վնասվածքներն առաջացել են վթարի արդյունքում:
ՙՖոլկսվագեն-Գոլֆ՚ մակնիշի 33 VL 376 պ/հ ավտոմեքենայի ձախ կողմի հետևի թափարգելի ձախ կողային մասում՝ անվակամարի եզրին և ՙՎազ-21214՚ մակնիշի 99 AA 969 պ/հ ավտոմեքենայի առջևի ձախ անվաթևի առաջամասում, անվակամարի եզրին, հայտնաբերված սև գույնի պոլիմերային նյութի քսվածքները միանման են սև գույնի, թափարգելի ձախ անկյունային մակադրակի սև գույնի պոլիմերային նյութին:
Դատաավտոտեխնիկական փորձաքննության թիվ 03371308 եզրակացությամբ այն մասին, որ՝
ՙՎազ-21214՚ մակնիշի 99 AA 969 պ/հ ավտոմեքենայի վարորդը, ավտոմեքենան վարելով դեպքի վայրի ճանապարհահատվածի համար սահմանված թույլատրելի առավելագույնը գերազանցող արագությամբ և ուշադիր չլինելով ողջ ճանապարհատրանսպորտային իրադրությանն ու իր երթևեկության համար վտանգն առաջանալու պահից սկսած ժամանակին միջոցներ չձեռնարկելով ավտոմեքենան մինչև վրաերթի տեղին հասնելը կանգնեցնելու համար, թույլ է տվել ՙՃանապարհային երթևեկության անվտանգության ապահովման մասին՚ ՀՀ օրենքի հոդված 23-ի 3-րդ կետի, ՃԵԿ-ի 65, 67 կետերի պահանջներին հակասող գործողություններ, դրանով իսկ պայմանավորել պատահարի առաջացումը՝ ինքն իրեն զրկելով այն կանխելու տեխնիկական հնարավորությունից: ՙՎազ-21214՚ մակնիշի 99 AA 969 պ/հ ավտոմեքենայի վարորդը, երթևեկության անվտանգությունն ապահովելու և պատահարը կանխելու նպատակով տեխնիկական տեսակետից պետք է նախ և առաջ ուշադիր լիներ ճանապարհատրանսպորտային իրադրությանը և ավտոմեքենան վարեր դեպքի վայրի ճանապարհահատվածի համար սահմանված թույլատրելի առավելագույն 40 կմ/ժ արագությունը չգերազանցող արագությամբ ու իր երթևեկության համար վտանգն առաջանալու պահից սկսած ժամանակին կատարված արգելակումով կանգնեցներ իր վարած ավտոմեքենան մինչև վրաերթի տեղին հասնելը, ինչի տեխնիկական հնարավորությունն ունեցել է և ինչը կատարելով՝ նա կկանխեր պատահարի առաջացումը:
ՙՖոլկսվագեն-Գոլֆ՚ մակնիշի 33 VL 376 պ/հ ավտոմեքենայի վարորդը պատահարը կանխելու տեխնիկական հնարավորություն չի ունեցել, և նրա կողմից թույլ տրված այնպիսի գործողություններ, որպիսիք, տեխնիկական տեսակետից հակասելով ՃԵԿ-ի պահանջներին, պայմանավորած լինեին պատահարի առաջացումը, չեն դիտվում:
ՙՎազ-21214՚ մակնիշի 99 AA 969 պ/հ ավտոմեքենայի բանվորական արգելակային և ղեկային կառավարման համակարգերը, կախոցներն ու անիվները, գտնվում են աշխատունակ վիճակում և դրանց այնպիսի անսարքություններ, որպիսիք գոյություն ունեցած լինեին մինչև տվյալ պատահարը և պայմանավորած լինեին ավտոմոբիլի ընթացքի կայունության կամ կառավարելիության կորստի առաջացումը, չեն հայտնաբերվել:
Դեպքի վայրի զննության արձանագրությամբ այն մասին, որ դեպքի վայրը հանդիսանում է Երևան քաղաքի Կիևյան և Օրբելու փողոցների խաչմերուկը, որտեղ ճանապարհն ասֆալտապատ է և ուղիղ: Կիևյան փողոցն ունի վայրէջքի ձևով թեքություն՝ 0,5 %-ի չափով, դեպի Լենինգրադյան փողոցի կողմ: Կիևյան և Օրբելու փողոցները բաժանված են ուղեմասերի: Կիևյան փողոցի դեպի Լենինգրադյան փողոցի կողմ տանող ուղեմասը բաժանված է ուղեգոտիների՝ 4,6 * 3,3 * 3,3 մետր չափերով: Կիևյան փողոցի՝ դեպի Հր.Քոչար փողոցի կողմ տանող ուղեմասը բաժանված է ուղեգոտիների՝ 4,8 * 3,4 * 3,3 մետր չափերով: Խաչմերուկում՝ Օրբելու փողոցի եզրից 2,8 մետր, իսկ Կիևյան փողոցի՝ դեպի Լենինգրադյան փողոցի կողմ տանող ուղեմասի աջ եզրից 9 մետր հեռավորություններից հայտնաբերվել են անվադողի քսվածքի հետքեր՝ 12, 5, 24,5 և 23,5 մետր երկարություններով, որոնք կորագծով տանում են դեպի հանդիպակաց ուղեմաս, որտեղ էլ ավարտվում են: Հետվթարային դիրքում գտնվող ՙՖոլկսվագեն գոլֆ՚ մակնիշի ավտոմեքենայի ձախակողմյան մասում հայտնաբերվել է սև գույնի, պլաստմասսե ավտոմեքենայի դետալ: Կիևյան փողոցի՝ Հր.Քոչար, Բաղրամյան, Կասյան փողոցների խաչմերուկի կողմից դեպի Օրբելու փողոցի հետ հատվող խաչմերուկի կողմ տանող ուղեմասով երթևեկող տրանսպորտային միջոցների համար սահմանված է առավելագույն 40 կմ/ժ արագության սահմանափակում:
Տրանսպորտային միջոցի զննության արձանագրությամբ այն մասին, որ վթարի հետևանքով դեֆորմացված է ՙՖոլկսվագեն-Գոլֆ՚ մակնիշի 33 VL 376 պ/հ ավտոմեքենայի ձախակողմյան հետևի դուռը, ձախակողմյան անվաթևի եզրային մասը:
Տրանսպորտային միջոցի զննության արձանագրությամբ այն մասին, որ պատահարի հետևանքով դեֆորմացված է ՙՎազ-21214՚ մակնիշի 99 AA 969 պ/հ ավտոմեքենայի աջ կողմի դռան և անվաթևի եզրային հատվածները, առջևի ձախ անվաթևի անկյունային մասը, առջևի թափարգելի ձախակողմյան մասը, իսկ առջևի թափարգելի ձախակողմյան պլաստմասսե դետալը ավտոմեքենայի վրայից բացակայել է:
Դեպքի վայրի զննության ընթացքում հայտնաբերված սև գույնի պլաստմասսե դետալի զննությամբ այն մասին, որ այն ընկել է վրաերթ կատարած ավտոմեքենայի վրայից և հանդիսանում է ավտոմեքենայի թափարգելին ամրացվող դետալ:
ՃՈ-ից ստացված լազերային սկավառակի վրա արտատպված տեսագրության զննության արձանագրությամբ այն մասին, որ տեսագրությունը կատարված է մթության պայմաններում և դրանում նկարահանված է 01.01.2013թ-ին Երևանի Կիևյան և Օրբելու փողոցների խաչմերուկում տեղի ունեցող իրադարձությունները, մասնավորապես.
-ՙORB-KIV1՚ վերնագրով տեսանյութի զննությամբ պարզվել է, թե ինչպես են բազմաթիվ ավտոմեքենաներ խաչմերուկով երթևեկում տարբեր ուղղություններով, ինչպես նաև խաչմերուկի փողոցներով անցնում են մարդիկ: 01.01.2013թ. ժամը 20.29.15-ին խաչմերուկի եզրային մասով՝ Կիևյան փողոցի դեպի Լենինգրադյան փողոցի կողմ տանող ուղեմասի աջ մասից՝ մայթի մոտից, երկու հետիոտներ կողք-կողքի սկսում են հատել փողոցը ոչ հետիոտնային անցումներով ու փողոցը հատում են դեպի Լենինգրադյան փողոցի ուղղությամբ երթևեկող ավտոմեքենաների ընթացքի ուղղության նկատմամբ աջից դեպի ձախ կողմ և ձախ ուղղվածությամբ շեղանկյան տակ: Այդ ուղղությամբ մայթից մի քանի քայլ կատարելուց հետո խաչմերուկի կողմից դեպի Լենինգրադյան փողոցի կողմ տանող ուղեմասի 1-ին գոտով երթևեկող բաց գույնի, տաքսու տարբերանշանով մի ավտոմեքենա դանդաղեցնում է ընթացքը, զիջում ճանապարհը նրանց, ապա հետիոտները քայլելով անցնում են դրա առջևից ու այդ պահին նույն ուղղությամբ, 2-րդ գոտով երթևեկող մի մուգ գույնի ՙՄերսեդես-բենց՚ մակնիշի ավտոմեքենա նույնպես դանդաղեցնում է ընթացքը ու կրկին զիջում ճանապարհը նրանց, հետիոտներն արագացնում են քայլերի տեմպը, անցնում այդ ավտոմեքենայի առջևից ու այդ ավտոմեքենայի առջևի ձախ անկյունային մասից դուրս գալուց հետո մոտ 2 քայլ նույն արագ տեմպով անցնելուց հետո համեմատաբար դանդաղեցնում են քայլերի տեմպը ու այդ տեմպով անցնում ևս մոտ 2 քայլ, այնուհետև վերջին պահին մի պահ կանգ են առնում ու վրաերթի ենթարկվում 3-րդ գոտուց խաչմերուկ մուտք գործած և խաչմերուկից դեպի Լենինգրադյան փողոցի ուղղությամբ երթևեկող, սպիտակ գույնի ՙՎազ-2121՚ /Նիվա/ մակնիշի ավտոմեքենայի աջակողմյան մասով, որի արդյունքում նրանք շպրտվելով վայր են ընկնում ասֆալտի վրա, իսկ վրաերթ կատարած նշված ավտոմեքենան մի քանի վայրկյանի չափով կանգնած մնալուց հետո շրջվում է դեպի ձախ ուղղությամբ ու հեռանում դեպի Լենինգրադյան փողոցի կողմ: Վրաերթ կատարած ավտոմեքենայի հեռանալուց հետո հավաքվում են մարդիկ և վրաերթի ենթարկվածներին տեղափոխում մայթ: Մինչ վրաերթը նշված ՙՎազ-2121՚ /Նիվա/ մակնիշի ավտոմեքենան խաչմերուկից դուրս գալու պահին շեղվում է ընթացքի ուղղությունից դեպի ձախ ուղղությամբ, կորցնում կառավարելիությունը, սկսում պտտվել նշված ուղղությամբ ու դեպի ձախ ուղղությամբ պտտվելու ժամանակ էլ՝ 3-րդ գոտում, վրաերթ է կատարում, որից հետո կանգ է առնում հանդիպակաց ուղեմասի 3-րդ գոտում՝ մոտ 180 աստիճանի չափով պտտված վիճակում: Ինչպես զիջող, այնպես էլ վրաերթ կատարած ավտոմեքենաները խաչմերուկ են մուտք գործում լուսացույցի՝ իրենց համար միացված կանաչ լուսաազդանշանի միացված լինելու պայմաններում: Մթության պայմաններում զիջող և վրաերթ կատարած, դեպքի վայրից հեռացող ավտոմեքենայի հաշվառման համարանիշերը չնկատվեցին:
Տեսանյութը՝ որպես այլ փաստաթուղթ, քրեական գործով ճանաչվել է որպես ապացույց:
4.Դատարանի իրավական վերլուծությունները.
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ, դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալ Միհրան Ղազարյանը կատարել է հանցավոր արարք, որը համապատասխանում է ՀՀ քրեական օրենսգրքի 244 հոդվածի հատկանիշներին:
Կատարած արարքի համար ամբաստանյալ Միհրան Սարգսի Ղազարյանը ենթակա է քրեական պատասխանատվության և պատժի:
Ամբաստանյալ Միհրան Ղազարյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը և բնույթը, ինչպես նաև հանցավորի անձը:
Որպես ամբաստանյալի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարած արարքի համար, նախկինում դատված չի եղել, հատուցել է հանցագործությամբ պատճառած նյութական վնասը:
Ամբաստանյալի պատասխանատվությունը և պատիժը ծանրացնող հանգամանքներ չկան:
ՀՀ քրեական օրենսգրքի 61 հոդվածի 3-րդ մասի համաձայն, հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները:
Հաշվի առնելով Միհրան Ղազարյանի կատարած արարքի հանրության համար վտանգավորության աստիճանը և բնույթը, նրա անձը, նրան բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 244 հոդվածի սանկցիայով նախատեսված է պատիժ նաև տուգանքի ձևով և պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, դատարանը գտնում է, որ ամբաստանյալ Միհրան Ղազարյանի նկատմամբ պատիժ պետք է նշանակել տուգանքի ձևով:
Դատարանը գտնում է, որ դատավճիռն օրինական ուժի մեջ մտնելուց հետո, ՀՀ ոստիկանության ՔԳՎ Երևան քաղաքի քննչական վարչության ՃՏՀ քննության բաժնի ավագ քննիչի 15.04.2013թ.-ի որոշմամբ այլ ապացույց ճանաչված և քրեական գործին կցված, լազերային սկավառակի վրա արտատպված տեսագրությունը պետք է պահել քրեական գործի հետ միասին:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 365, 369-372 հոդվածներով, դատարանը

Վ Ճ Ռ Ե Ց

Միհրան Սարգսի Ղազարյանին մեղավոր ճանաչել ՀՀ քրեական օրենսգրքի 244 հոդվածով նախատեսված հանցանք կատարելու մեջ և նրան դատապարտել տուգանքի նվազագույն աշխատավարձի երկուհարյուրապատիկի` 200.000 (երկու հարյուր հազար) ՀՀ դրամի չափով` տրանսպորտային միջոցներ վարելու իրավունքից զրկելով մեկ (1) տարի ժամկետով:
Միհրան Սարգսի Ղազարյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ, մինչև դատավճռի օրինական ուժի մեջ մտնելը:
Այլ ապացույց ճանաչված և քրեական գործին կցված, լազերային սկավառակը պահել քրեական գործի հետ միասին:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան