ԵԱՔԴ/0069/01/13

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
24.09.2013թ. ք. Երևան

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության դատարանըª

նախագահությամբ դատավոր` Արմեն Խաչատրյանի,
քարտուղարությամբ` Իրինա Մակյանի,
Մագդա Գրիգորյանի,
մասնակցությամբ մեղադրող` Ռաֆայել Խաչատրյանի,
պաշտպան` Վարդուհի Էլբակյանի,
տուժող` Արման Մանուկյանի,

դատարանում, դռնբաց դատական նիստում քննեց քրեական գործն ըստ մեղադրանքի

Էդգար Գևորգի Խաչոյանի` ծնված 12.08.1980թ.-ին, Առինջ գյուղում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին մինչև 14 տարեկան երկու երեխաները, չի աշխատում, նախկինում չդատված, հաշվառված և բնակվել է Կոտայքի մարզ, գյուղ Առինջ, 14 փողոց, 7 տուն հասցեում, մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով նախատեսված հանցանք կատարելու համար, կալանքի տակ է 2012թ.-ի նոյեմբերի 6-ից:

2012 թվականի հոկտեմբերի 26-ին ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթունի քննչական բաժնում ՀՀ քրեական օրենսգրքի 112-րդ հոդվածի 1-ին մասի հատկանիշներով հարուցվել է թիվ 09114512 քրեական գործը:
2012 թվականի հոկտեմբերի 26-ին թիվ 09114512 քրեական գործն ըստ քննչական ենթակայության ուղարկվել է ՀՀ ոստիկանության ՔԳՎ Երևան քաղաքի քննչական վարչության Արաբակիրի քննչական բաժին:
2012 թվականի հոկտեմբերի 26-ին թիվ 09114512 քրեական գործը ՀՀ ոստիկանության ՔԳՎ Երևան քաղաքի քննչական վարչության Արաբակրի քննչական բաժնում ընդունվել է վարույթ և կատարվել է նախաքննություն:
2013 թվականի ապրիլի 25-ին թիվ 09114512 քրեական գործից անջատվել է ոմն Աշոտի և երկու անհայտ անձանց կողմից Արման Վաչագանի Մանուկյանին ծեծի ենթարկելու մասը, որին շնորհվել է 14122213 համարը:
2012 թվականի նոյեմբերի 2-ին Էդգար Գևորգի Խաչոյանը որպես մեղադրյալ է ներգրավվել ՀՀ քրեական օրենսգրքի 112-րդ հոդվածի 1-ին մասով նախատեսված այն արարքի կատարման համար, որ ՙնա 2012 թվականի հոկտեմբերի 25-ին ժամը 23.30-ի սահմաններում Երևան քաղաքի Կոմիտաս 25 հասցեում գործող ՙԷՔՍՏԱԶԻ՚ կարաոկե ակումբում Քրիստինե Այվազյանի, վերջինիս քրոջ և ընկերուհիների հետ պարելու պատճառով վիճաբանության մեջ է մտել Արման Մանուկյանի հետ, որից պարզաբանումներ պահանջելու նպատակով դուրս է հրավիրել նրան ու շարունակվող վիճաբանության ժամանակ իր մոտ գտնվող ծակող-կտրող գործիքով դիտավորությամբ հարվածել է Արման Մանուկյանի կրծքավանդակին` վերջինիս առողջությանը դիտավորությամբ պատճառելով ծանր վնաս` կրծքավանդակի ձախ կեսի ծակած-կտրած թափանցող վերքի, հեմոպնեմոթորաքսի ձևով՚:
2013 թվականի ապրիլի 26-ին թիվ 09114513 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան` ըստ էության քննելու համար:
Դատաքննությամբ և գործով ձեռք բերված ապացույցներով դատարանը պարզեց հետևյալը.
2012 թվականի հոկտեմբերի 25-ին ժամը 23:00-ի սահմաններում Էդգար Խաչոյանը գործով ինքնությունը չպարզված մի քանի անձանց` այդ թվում ոմն Աշոտի հետ այցելել է Երևան քաղաքի Կոմիտաս 25 հասցեում գործող ՙԷքստազի՚ կարաոկե ակումբ: ժամը 23:30-ի սահմաններում ակումբում զվարճացող անձանց պարը խանգարելու պատճառով խոսկցություն է սկսվել այդտեղ գտնվող Արման Մանուկյանի և ոմն Աշոտի միջև: Վերջիններս հարաբերությունները պարզելու նպատակով ակումբից դուրս են եկել և սկսել են վիճաբանությունը, ինչը վեր է ածվել քաշքշոցի, որին ներգրավվել է նաև Էդգար Խաչոյանը: Վերջինս իր մոտ գտնվող ծակող-կտրող գործիքով դիտավորությամբ հարվածել է Արման Մանուկյանի կրծքավանդակին` վերջինիս առողջությանը դիտավորությամբ պատճառելով ծանր վնաս, կյանքին վտանգ սպառնացող` կրծքավանդակի ձախ կեսի ծակած-կտրած թափանցող վերքի, հեմոպնևմոթորաքսի ձևով:
Այսպես.
ՀՀ քրեական օրենսգրքի 112-րդ հոդվածի 1-ին մասով առաջադրված մեղադրանքում ամբաստանյալ Էդգար Խաչոյանն իրեն մեղավոր չճանաչեց և հրաժարվեց ցուցմունք տալուց: Նախաքննության ընթացքում առաջադրված մեղադրանքում Էդգար Խաչոյանը նույնպես իրեն մեղավոր չի ճանաչել և հրաժարվել է ցուցմունք տալուց:
Ամբաստանյալ Էդգար Խաչոյանի կողմից մեղքը չընդունելը նպատակ է հետապնդում խուսափելու քրեական պատասխանատվությունից: Էդգար Խաչոյանի կողմից ՀՀ քրեական օրենսգրքի 112-րդ հոդվածի 1-ին մասով նախատեսված հանցանքի կատարումը հիմնավորվել է հետևյալ ապացույցներով.
Տուժող Արման Մանուկյանի ցուցմունքով այն մասին, որ 2012թ. հոկտեմբերի 24-ին իր ծանոթներից Քրիստինեն զանգահարել է իրեն ու խնդրել, որպեսզի զանգահարի ՙԷքստազի՚ կարաոկե ակումբ և նախապես պայմանավորվի ակումբի աշխատակազմի հետ հոկտեմբերի 25-ին այնտեղ միջոցառում կազմակերպելու համար: Ինքը զանգահարել է, պայմանավորվել, որից հետո հոկտեմբերի 25-ին ժամը 17:00-ի կամ 18:00-ի սահմաններում իր ընկերներ Մկրտիչի և Սերգեյի հետ գնացել է ՙԷքստազի՚ կարաոկե ակումբ: Ակումբում հանդիպել է Քրիստինեին, ով նստած է եղել իր քրոջ, ընկերուհիների ու մի երիտասարդի հետ: Իրենք նստել են նրանց սեղանից առանձին: Որոշ ժամանակ անց Քրիստինեենց սեղանի շուրջ նստած երիտասարդը հեռացել է: Ընթացքում սկսել են ինքն ու իր ընկերները պարել և ուրախանալ Քրիստինեի, նրա քրոջ ու ընկերուհիների հետ: Ժամը 23:00-ի սահմաններում ակումբ են մտել 4 երիտասարդ, նրանցից Աշոտ անունով մեկը մոտեցել է Մկրտիչին և բարևել, որից հետո նստել են առանձին մի սեղանի շուրջ: Իրենց պարելու ընթացքում Աշոտը պարելով անցել է աղջիկների արանքով, հրել նրանց, ձեռքերով դիպչել ու այդ կերպ անհանգստացրել է վերջիններիս: Քրիստինեն մոտեցել է իրեն ու խնդրել, որպեսզի ինքը զգուշացնի այդ երիտասարդին, որ իրենց չխանգարի, քանի որ իրենք արդեն դուրս են գալիս: Ինքը զգուշացրել է այդ տղային, ով իրեն պատասխանել է, որ խնդիր չկա: Սակայն դրանից մոտ 10-15 րոպե անց կրկին իրեն է մոտեցել Քրիստինեն ու ասել, որ այդ երիտասարդն իրենց կրկին անհանգստացնում է: Այդ ժամանակ ինքը փորձել է կրկին խոսել այդ երիտասարդի հետ, սակայն ակումբում տիրող աղմուկի պատճառով խնդրել է նրան դուրս գալ ակումբից` խոսելու: Այդ ամենը դուր չի եկել Աշոտին ու երբ դուրս են եկել նա կոպիտ ձևով իրեն ասել է, թե ՙով խանգարի իր քեֆը, իր հետ խնդիրներ կունենա՚: Ինքը փորձել է բացատրել, որ իրեն դուրս է հրավիրել ընդամենը նրա համար, որպեսզի կրկին խնդրի աղջիկներին չանհանգստացնելու համար, այլ ոչ թե դուրս է կանչել վիճաբանելու, իրենց միջև քաշքշոց է սկսվել: Այդ ընթացքում իրենց է մոտեցել Աշոտի ընկերներից մեկը` Էդգար Խաչոյանը, ով բարկացած հարցրել է իրեն, թե ՙդու ես մեզ դուրս հրավիրել՚ ու միաժամանակ բռնել է իր հագուստից: Ինքը ևս բռնել է նրա հագուստից ու կարծելով, որ այդ ամենը կարող է վերածվել կռվի, փորձել է ազատվել նրանից: Էդգարը մի փոքր առաջացել է ու իրեն թվացել է, որ ուզում է հարվածի, ինքը հետ է քաշվել, զգացել է, որ վերջինս ձեռքը տարել է դեպի գրպանը և հանելուց հետո հարվածել է իր կրծքավանդակի ձախ կողմին` թևատակին: Իրեն թվացել է, որ Էդգարն իրեն բռունցքով է հարվածել, սակայն զգացել է թուլություն, ՙներսը տաքացել է՚ ու հասկացել է, որ հարվածել են դանակով, սակայն ինքը դանակ չի տեսել: Դրանից հետո Էդգարն իրեն բաց է թողել ու ինքը կարողացել է փախնել: Վազելով իջել է դեպի ՙԵրիցյանների խաչմերուկի՚` Կոմիտաս և Փափազյան փողոցների խաչմերուկի կողմը: Ճանապարհին հանդիպել են Մկրտիչն ու Սերգեյը մեքենայով, ովքեր տեղեկանալով, որ իրեն դանակով հարվածել են` տարել են հիվանդանոց: Աշոտի և Էդգարի հետ խոսակցության ժամանակ իրենք կանգնած են եղել դեպի ՙԷքստազի՚ կարաոկե ակումբ իջնող աստիճանահարթակի վերևի հարթ մասում, Աշոտը գտնվել է իր աջակողմյան հատվածում, իսկ Էդգարը` ձախակողմյան, իր հետևում եղել է ճաղավանդակ:
Վկա Սերգեյ Ասլանյանի նախաքննության ընթացքում տված ցուցմունքով այն մասին, որ աշխատում է ՙՄինուտկա՚ տաքսի ծառայությունում, որպես մեխանիկ: Դպրոցական տարիներից ճանաչում է Արման Մանուկյանին, վերջինս նաև աշխատում է իրենց տաքսի ծառայությունում որպես վարորդ, նրա հետ գտնվում է մտերիմ հարաբերությունների մեջ: Շուրջ 6-7 տարի է ճանաչում է Մկրտիչ Հովհաննիսյանին, ով հանդիսանում է իր ընկերը: 2012 թվականի հոկտեմբերի 22-ին կամ 23-ին Արմանն իրեն և Մկրտիչին ասել է, որ հոկտեմբերի 25-ին իր ծանոթ աղջիկները Կոմիտաս պողոտայի վրա գտնվող ՙԷքստազի՚ կարաոկե ակումբում են լինելու: Արմանն իրենց առաջարկել է միասին գնալ այդ ակումբ ժամանակ անցկացնելու: Իրենք համաձայնվել են և հոկտեմբերի 25-ին իրենց տաքսի ծառայության գրասենյակի տնօրենին պատկանող արծաթագույն ՙՏոյոտա Կորոլա՚ մակնիշի ավտոմեքենայով ժամը 20:30-ից մինչև 21:00-ն ընկած ժամակահատվածում գնացել են ՙԷքստազի՚ կարաոկե ակումբ: Մտնելով ակումբ` նկատել են սեղանի շուրջ նստած 5-6 հոգի աղջիկների, որոնց մեջ եղել է Արմանի ծանոթը` Քրիստինեն: Նրանց սեղանին նստած է եղել նաև մոտ 23-25 տարեկան մի երիտասարդ: Ինքն, Արմանը և Մկրտիչը նստել են աղջիկների սեղանից մի քանի սեղան այն կողմ: Աղջիկների սեղանի շուրջ նստած երիտասարդը մոտ 30-40 րոպե նստելուց հետո հեռացել է ակումբից, որից հետո իրենք սկսել են այդ աղջիկների հետ պարել և ուրախանալ: Որոշ ժամանակ անց ակումբ են այցելել նաև չորս երիտասարդներ: Ակումբ մտնելուց հետո նրանք մոտեցել են իրենց սեղանին, բարևել ու համբուրել են Մկրտիչին, իրենց ևս բարևելուց հետո նստել են իրենց սեղանից մի քանի սեղան այն կողմ: Որոշ ժամանակ անց նստած տեղից նկատել է, թե ինչպես է այդ տղաներից մեկը պարելով անցնում աղջիկների արանքով, որից հետո` ժամը 23:00-ի սահմաններում նկատել է, թե ինչպես են Արմանը և այդ երիտասարդը միմյանց հետ զրուցելով գնում և նստում ակումբի ծայրում գտնվող սեղանին: Երբ Արմանը և նշված երիտասարդը սկսել են վիճաբանել միմյանց հետ և փորձել են հարվածել միմյանց, այդ պահին ինքը, Մկրտիչը և այդ երիտասարդի հետ ակումբ եկած տղաները մոտեցել են նրանց: Դրանից հետո բոլորով դուրս են եկել ակումբից և քանի որ իրենք սեղանին իրեր են ունեցել` դրամապանակ, բանալիներ, մոտեցել է սեղանին, վերցրել այդ իրերը և դուրս եկել ակումբից: Դուրս գալուց հետո նկատել է, որ Արմանը և երկու երիտասարդ ակումբի դիմաց քաշքշում են իրար, իսկ մնացածը կանգնած են եղել, սակայն նրանց մեջ չի նկատել Մկրտիչին: Առողջական խնդիրների պատճառով չի խառնվել վիճաբանությանը և գնացել է դեպի ակումբի դիմաց, փողոցի վրա կայանած իր մեքենան ու նստել, որից հետո մեքենան է նստել նաև Մկրտիչը: Վերջինս հարցրել է, թե որտեղ է Արմանը, ինքն էլ քանի որ նկատել է, որ այդ քաշքշուկից Արմանն ընկել է գետնին և բարձրանալուց հետո վազել է դեպի Փափազյան փողոցը, Մկրտչին պատասխանել է, որ Արմանը վազել է դեպի ներքև: Այուհետև մեքենան վարել է դեպի Արմանի կողմը, ով գտնվել է ակումբից մոտ 30 մետր հեռավորության վրա: Մոտենալով Արմանին` վերջինս նստել է մեքենայի հետևի նստատեղին, և հայտնել, որ մարմնի ձախ կողմն արնահոսում է և իրեն դանակահարել են: Դա լսելով ավտոմեքենան շտապ վարել է դեպի ՙՄիքայելյանի՚ անվան հիվանդանոց: Դեպքի վայրից մոտ 5-ից 7 րոպե անց հասել են հիվանդանոց, Արմանին ուղեկցել ներս, իսկ երբ բժշկիներն Արմանին մտցրել են վերելակ ինքն ու Մկրտիչը գնացել են տաքսի ծառայության գրասենյակ: Ինքը չի տեսել, թե ով է դանակահարել Արմանին, սակայն համոզված է, որ նրան դանակահարողը եղել է վերջինիս հետ վիճող երկու անձանցից մեկը:
Վկա Մկրտիչ Հովհաննիսյանի նախաքննության ընթացքում տված ցուցմունքով այն մասին, որ Սերգեյ Ասլանյանին ճանաչում է երկար տարիներ` դեռևս դպրոցական տարիներից, իսկ Արման Մանուկյանին ճանաչում է շուրջ երեք ամիս, քանի որ վերջինս աշխատել է Սերգեյ Ասլանյանի մոտ` տաքսի ծառայությունում, որպես վարորդ: 2012 թվականի հոկտեմբերի 22-ին կամ 23-ին Սերգեյն իրեն հայտնել է, որ Արմանը եկել է իր մոտ ու ասել, որ իր ծանոթ աղջիկներից մեկը ընկերուհինների հետ միջոցառում է նշելու ՙԷքստազի՚ կարաոկե ակումբում և իրեն հրավիրել են մասնակցելու այդ միջոցառմանը: Արմանն առաջարկել է, որ ինքն ու Սերգեյը ևս իր հետ միասին գնան այնտեղ: Ինքն ու Սերգեյը համաձայնության են եկել և 2012 թվականի հոկտեմբերի 25-ին ժամը 20:00-ից 20:30-ն ընկած ժամանակահատվածում Սերգեյի վարած ՙՏոյոտա Կորոլա՚ մակնիշի արծաթագույն ավտոմեքենայով Արմանի հետ գնացել են Կոմիտաս պողոտայի վրա գտնվող ՙԷքստազի՚ կարաոկե ակումբ: Մտնելով ներս` նկատել են, որ Արման Մանուկյանի ծանոթ աղջիկների սեղանի շուրջ տղա է եղել նստած, իրենք երեքով նստել են նրանցից մի քանի սեղան այն կողմ: Որոշ ժամանակ անց տղան դուրս է եկել ակումբից, որից հետո իրենք սկսել են այդ աղջիկների հետ պարել: Այդ ընթացքում ակումբ են այցելել 30 տարեկանից բարձր մոտ 5-6 հոգի տղաներ: Նրանց մեջ է եղել նաև Աշոտը, ում ինքը ճանաչում է Առինջ գյուղից, որտեղ բարեկամներին հաճախակի այցելելու ընթացքում ծանոթացել է վերջինիս հետ: Աշոտը մոտեցել է իրեն ու համբուրելով բարևել: Դա իր համար անսպասել է եղել, քանի որ իրենք ընկերներ չեն եղել: Դրանից հետո նրանք նստել են իրենցից մի քանի սեղան այն կողմ: Ինքը մի պահ դուրս է եկել սրահից և գնացել սանհանգույց: Մոտ 5 րոպե հետո վերադարձել է սրահ ու տեսել, որ Արմանը և Աշոտը սրահի վերջնամասում զրուցում են, սակայն հեռվից նկատել է, որ զրույցը թեժանում է և նրանց են մոտենում նաև մյուս տղաները, որնք եկել էին Աշոտի հետ: Երբ ինքը մոտեցել է նրանց, վերջիններս սկսել են դուրս գալ ակումբից: Ինքը գնացել է նրանց հետևից և ակումբից դուրս գնացող աստիճանների վրա նկատել, որ բաճկոնը, որի գրպանում եղել է գումար, մոռացել է սրահում: Որոշել է հետ գնալ և այն վերցնել: Բաճկոնը վերցնելուց հետո, արդեն ակումբից դուրս գալու ժամանակ նկատել է, որ դրսում շատ մարդիկ են հավաքված, չի հասկացել, թե ինչ է պատահել, միայն նկատել է, որ Սերգեյը նստում է իր ավտոմեքենան և ինքը նույնպես գնացել է դեպի մեքենայի կողմը: Նստելով մեքենան` Սերգեյին հարցրել է, թե որտեղ է Արմանը, վերջինս պատասխանել է, որ Արմանը վազելով իջել է առաջ, ավտոմեքենան մոտ 50 մետր վարելուց հետո հասել են Արմանին: Վերջինս, նստելով ավտոմեքենան, ասել է, որ իրեն շատ վատ է զգում, ձախ կողմից արյուն է հոսում և իրեն դանակահարել են: Սերգեյն անմիջապես մեքենան վարել է դեպի ՙՄիքայելյանի՚ անվան հիվանդանոց: Ճանապարհին հնարավոր չի եղել Արմանի հետ զրուցել, քանի որ նա իրեն շատ վատ է զգացել, նույնիսկ մեկ-երկու անգամ ուշաթափվել է: Հասնելով հիվանդանոց` ինքը և Սերգեյը Արմանին ուղեկցել են ներս, իսկ երբ բժիշկներն Արմանին մտցրել են վերելակ, ինքն ու Սերգեյը հեռացել են և գնացել տաքսի ծառայության գրասենյակ:
Վկա Քրիստինե Այվազյանի ցուցմունքով այն մասին, որ ճանաչում է տուժող Արման Մանուկյանին: Քրոջ հարսանեկան արարողությունից առաջ որոշել են այդ առիթով ընկերուհիներով ՙԷքստազի՚ կարաոկե ակումբում երեկո անցկացնել: 2012թ. հոկտեմբերի սկզբներին իրեն է զանգահարել իր ծանոթ Արմանը, ում ինքը հայտնել է, որ քրոջ համար ցանկանում է ՙԷքստազի՚ կարաոկե ակումբում միջոցառում կազմակերպել ու հարցրել է, թե հնարավոր է այնտեղ սեղան պատվիրել, իսկ վերջինս պատասխանել է, որ կզանգահարի ՙԷքստազի՚ կարաոկե ակումբ և իրենց համար սեղան կպատվիրի: Արմանին տեղեկացրել է նաև, որ միջոցառումը կազմակերպելու են հոկտեմբերի 25-ին: Այդպես, 2012թ.-ի հոկտեմբերի 25-ին, ժամը մոտ 19:00-ից 20:00-ի սահմաններում ինքը քրոջ` Մարիաննայի և իրենց ընդհանուր ընկերուհիների հետ եկել են ՙԷքստազի՚ կարաոկե ակումբ: Սկզբում ակումբում իրենցից բացի գրեթե այլ այցելուներ չեն եղել: Նստելուց մեկ ժամ չանցած իրենց է մոտեցել Գևորգը և բերել է պատվիրված տորթը: Ինքը հրավիրել է Գևորգին, որպեսզի մի քիչ նստի իրենց հետ: Վերջինս մոտ 15-20 րոպե նստելուց հետո հեռացել է: Այդ ընթացքում` իրենց գնալուց մոտ 1 կամ 2 ժամ անց, ակումբ է եկել Արմանն իր ընկերներ Մկրտիչի և Սերգեյի հետ ու նստել են իրենց սեղանից առանձին: Արմանին և նրա ընկերներին ինքը սակայն հրավիրած չի եղել իրենց երեկույթին: Դրանից հետո, երբ սկսել են պարել Արմանը և նրա ընկերները մոտեցել են իրենց և սկսել իենց կողքին պարել: Որոշ ժամանակ անց ակումբ են եկել նաև այլ տղաներ, որոնք բարևել են Արմանին և նրա ընկերներին, այնուհետև նստել են իրենց սեղանից մի քանի սեղան այն կողմ: Պարելու ընթացքում այդ երիտասարդներից մեկը պարելով անցել է իր ընկերուհիների միջով: Ինքը խնդրել է Արմանին զգուշացնել այդ տղաներին, որպեսզի իրենց չխանգարեն: Արմանն ասել է, որ այնպայման կզգուշացնի, սակայն ինքը տեղյակ չէ Արմանը նրանց ինչ-որ բան ասել է, թե` ոչ: Մի պահ ինքը դուրս է եկել սրահից լվացվելու ու երբ ետ է վերադարձել, տեսել է Արմանին իր ընկերների ու այդ երիտասարդների հետ ակումբի միջանցքում կանգնած զրուցելիս: Նրանց մեջ է եղել նաև այն տղան, որը պարելու ընթացքում իրենց միջով անցել է: Այդ ամենն իրեն տարօրինակ է թվացել, մոտեցել է Արմանին ու հարցրել, թե ինչ է պատահել, վերջինս պատասխանել է, որ` ոչինչ: Այնուհետև, նրանք դուրս են եկել ակումբից: Քիչ անց, ժամը 22:30-ից մինչև 23:00-ի սահմաններում իրենք ևս հաշիվը փակելուց հետո դուրս են եկել ակումբից: Դրսում Արմանին ու այդ տղաներից ոչ մեկին չի տեսել: Հաջորդ օրն իրեն է զանգահարել Մկրտիչը և ասել, որ այդ երեկոյից հետո դրսում վեճ է եղել ու Արմանին դանակահարել են, վերջինս գտնվում է հիվանդանոցում: Դեպքի օրը երեկույթով զբաղված լինելու պատճառով ինքը ուշադրություն չի դարձրել ակումբում գտնվող անձանց վրա, բացի այդ ակումբում մութ լինելու պատճառով հստակ չի տեսել այնտեղ գտնվողներին:
Վկա Մարիաննա Գալստյանի նախաքննության ընթացքում տված ցուցմունքով այն մասին, որ 2012 թվականի սեպտեմբերի 23-ից աշխատում է ՙԷքստազի՚ կարաոկե ակումբում, որպես մատուցողուհի: Կարաոկե ակումբը աշխատում է ամեն օր ժամը 15:00-ից մինչև հաջորդ օրը ժամը 03:00-ն ընկած ժամանակահատվածում: 2012 թվականի հոկտեմբերի 25-ին ժամը 19:30-ի սահմաններում ակումբ են այցելել երեք աղջիկ, մոտեցել են իրեն և հայտնել, որ առիթ ունեն նշելու, լինելու են 7 հոգով և իրենց սեղան է անհրաժեշտ: Նրանց ուղեկցել է ակումբի վերջում գտնվող թվով 3-րդ սեղանի մոտ և առաջարկել է նստել նշված սեղանի շուրջ: Աղջիկների նստելուց 15-ից 20 րոպե անց նրանց են միացել ևս 4 աղջիկ: Նրանց նստելուց կես ժամ անց ակումբ է եկել մոտ 27-28 տարեկան երիտասարդ, ով աղջիկների համար թխվածք է բերել և նստել է նրանց սեղանի շուրջ: Այդ ընթացքում ակումբ են այցելել ևս երեք երիտասարդ տղամարդ, որոնք նստել են 5-րդ սեղանի շուրջ, աղջիկների սեղանից մոտ երկու մետր հեռավորության վրա: Այդ երեք տղաների գալուց հետո, աղջիկների սեղանին նստած երիտասարդը որոշ ժամանակ անց հեռացել է: Դրանից հետո այդ երեք երիտասարդները մոտեցել են աղջիկներին և պարել ու ուրախացել նրանց հետ: Դրանից որոշ ժամանակ անց ակումբ են այցելել ևս 6 տղամարդ, որոնք նստել են մուտքից դեպի աջ գտնվող 7-րդ համարի սեղանի շուրջ: 7-րդ համարի սեղանի շուրջ նստած տղամարդկանցից ոչ ոք չի մոտեցել աղջիկներին, սակայն նրանցից մեկը մոտեցել է 5-րդ համարի սեղանի շուրջ նստած տղաներից մեկին, զրուցել նրա հետ, այնուհետև առանձնացել են և նստել են այլ սեղանի շուրջ: Այդ ընթացքում ինքն անվտանգությունից ելնելով զգուշացրել է ակումբի անվտանգության աշխատակիցներին, որպեսզի վերջիններս ուշադիր լինեն այդ երիտասարդների նկատմամբ: Աշխատանքով զբաղված լինելու պատճառով ուշադիր չի եղել, թե ինչ է տեղի ունեցել, միայն նկատել է, որ այդ երիտասարդները միասին դուրս են եկել սրահից, իսկ մի քանի րոպե անց ակումբից դուրս են եկել նաև 6 հոգանոց սեղանի շուրջ նստած մնացած 5 հոգին, այնուհետև 3 հոգանոց սեղանին նստած մնացած երկու հոգին: Նրանց դուրս գալուց հետո աղջիկները շարունակել են միջոցառումը մինչև ժամը 24:00-ի սահմանները: Այդ տղաների դուրս գալուց հետո ինքն այլևս ոչինչ չի նկատել և տեղյակ չի եղել, թե դրսում ինչ է կատարվել: Դրա հաջորդ օրը հոկտեմբերի 26-ին աշխատանքի վայրում տեղեկացել է, որ 5-րդ սեղանի շուրջ նստած տղաներից մեկը դանակահարվել է:
Վկա Հայկ Սարգսյանի ցուցմունքով այն մասին, որ ՙԷքստազի՚ կարաոկե ակումբում աշխատում է որպես հնչյունային օպերատոր: Տուժող Արման Մանուկյանին ճանաչում է երկար ժամանակ, որպես իրենց մշտական հաճախորդ: Ճանաչում է նաև վերջինիս ընկերոջը` Մկրտիչին: Քրիստինեին ևս ճանաչում է որպես իրենց ակումբի մշտական հաճախորդ: 2012թ. հոկտեմբերի 25-ին ինքը եղել է աշխատանքի վայրում և ակումբ է զանգահարել Արմանն ու ասել, որ այդ օրը ակումբ է գալու իրենց հաճախորդներից Քրիստինեն իր ընկերուհիների հետ ու եթե ազատ տեղ ունեն, ապա պահեն, քանի որ նրանք պատրաստվում են միջոցառում նշել: Ինքն ասել է, որ իրենք ամեն ինչ կկազմակերպեն: Այդպես, հոկտեմբերի 25-ին, ժամը մոտ 20-ի սահմաններում իենց ակումբ է եկել Քրիստինեն իր ընկերուհիների հետ` մոտ 8 հոգով և զբաղեցրել իրենց սեղանը: Աղջիկների գալուց մոտ մեկ ժամ անց եկել են նաև Արմանն ու Մկրտիչը, որոնք նստել են այդ աղջիկների սեղանից առանձին: Այդ օրը սրահը եղել է մարդաշատ, սակայն մյուս հաճախորդներին ինքը չի ճանաչում, հստակ չի հիշում Էդգար Խաչոյանին այդ օրը տեսել է ակումբում, թե` ոչ: Աղջիկները, ինչպես նաև սրահում գտնվողները պարել, ուրախացել են: Քանի որ սրահում եղել են շատ այցելուներ ու պատվերները ևս եղել են մեծաքանակ, ինքը հիմնականում զբաղվել է դրանցով և սրահի վրա ուշադրություն չի դարձրել: Բացի այդ, սրահի տարածքը մթության և լուսային էֆեկտների պատճառով հստակ տեսանելի չէ ու ինքը չի տեսել, թե պարելու ընթացքում ինչ-որ մեկը աղջիկների միջով պաբերաբար անցել է, թե` ոչ: Այդ օրն ընդհանրապես ակումբի ներսում ինքը որևէ միջադեպ չի նկատել, իսկ թե դրսում ինչ է կատարվել, իրեն հայտնի չէ: Միայն հաջորդ օրը երեկոյան ոստիկաններից իմացել են, որ ակումբից դուրս միջադեպ է տեղի ունեցել, որի ժամանակ Արմանին դանակահարել են ու վերջինս գտնվում է հիանդանոցում:
Լուսանկարով անձին ճանաչման ներկայացնելու մասին 31.10.2012թ.-ի արձանագրությամբ, համաձայն որի տուժող Արման Մանուկյանն իրեն ներկայացված 4 լուսանկարներից ձախից դեպի աջ ճանաչել է 3-րդ լուսանկարում պատկերված անձին` Էդգար Գևորգի Խաչոյանին և հայտնել, որ վերջինս 2012թ. հոկտեմբերի 25-ին ՙԷքստազի՚ կարաոկե ակումբի դիմաց 4-5 անծանոթ անձանց հետ վիճաբանել է իր հետ, որի ընթացքում վերջինս դանակով մեկ անգամ հարվածել է իր կրծքավանդակի ձախ հատվածին:
Անձին ճանաչման ներկայացնելու մասին 29.01.2013թ.-ի արձանագրությամբ, համաձայն որի տուժող Արման Մանուկյանը ճանաչել է իրեն ներկայացված 4 անձանցից ձախից դեպի աջ կանգնած 4-րդ անձին` Էդգար Գևորգի Խաչոյանին և հայտնել, որ վերջինս 2012թ. հոկտեմբերի 25-ին ՙԷքստազի՚ կարաոկե ակումբի դիմաց մեկ այլ անձի հետ քաշքշել են միմյանց, որից հետո Էդգար Խաչոյանը բռունցքով հարվածել է իր ձախ թևատակին, ինքը հետ-հետ է գնացել ու կիսով չափ ընկել: Այնուհետև զգալով, որ շնչահեղձ է լինում, վազելով իջել է դեպի Փափազյան-Կոմիտաս խաչմերուկ և նստելով ընկերոջ կողմից վարվող ՙՏոյոտա Կորոլա՚ մակնիշի ավտոմեքենան նկատել է, որ արնահոսում է, գնացել է հիվանդանոց:Միաժամանակ հայտնել է, որ Էդգար Խաչոյանը հենց այն անձն է, ով դանակահարել է իրեն:
Դատաբժշկական փորձաքննության փորձագետի թիվ 1835հ եզրակացությամբ` համաձայն որի քաղ. Ա. Մանուկյանի մարմնական վնասվածքները, ըստ բժշկական փաստաթղթերի և օբյեկտիվ ուսումնասիրության տվյալների` կրծքավանդակի ձախ կեսի ծակած-կտրած թափանցող վերքի ձևով, ուղեկցված հեմոպնևմոթորաքսով, հասցվել է` սուր ծակող-կտրող գործիքով, հնարավոր է` որոշման մեջ նշված ժամկետին, հնարավոր չէ վայր ընկնելուց, որը առաջացրել է առողջությանը ծանր վնաս, կյանքին վտանգ սպառնացող: Քաղ. Ա. Մանուկյանը վնասվածք ստանալու պահին, տարածության մեջ կարող է գտնվել վնասվածքի առաջացումը չբացառող ցանկացած հավանական դիրքում, կրծքավանդակի ձախ կեսի կողմնային մակերեսով ուղղված վնասվածք առաջացնող սուր ծակող-կտրող գործիքի ծայրը: Համաձայն հիվանդության պատմագրի տվյալների, քաղ. Ա. Մանուկյանի արյունը պատկանում է A /երկրորդ/ խմբին, Rh /+/ ռեզուս դրական: Քանի որ, քաղ. Ա. Մանուկյանի վնասվածքը փորձաքննության պահին սպիացած է /ապաքինման հետևանքով/, իսկ հիվանդության պատմագրում վնասվածքը նկարագրած է ոչ լիարժեք, հետևաբար դատողություններ անել վնասվածք հասցնող գործիքի չափագրական տվյաների մասին հնարավոր չէ: Այդ հարցը անհրաժեշտ է պարզել հագուստների հետքաբանական փորձաքննությամբ, որը եղել է նրա հագին դեպքի պահին:
Դատաբժշկական փորձաքննության փորձագետի թիվ 358 եզրակացությամբ` համաձայն որի
1. Փորձաքննության ներկայացված Արման Մանուկյանի արյան նմուշն ըստ արյան ABO իզոշճաբանական համակարգի պատկանում է A խմբին:
2. Փորձաքննության ներկայացված ՙՏոյոտա Կորոլա մակնիշի ավտոմեքենայի զննության ընթացքում՚ բամբակյա 2 խծուծներով վերցված, վերնաշապկի, շապիկի անդրավարտիքի և պիջակի վրա տեղակայված կասկածելի հետքերում հաստատվեց արյան առկայություն, որը պատկանում է մարդու և առաջացել է ըստ արյան ABO իզոշճաբանական համակարգի A խումբ ունեցող որևէ անձից կամ անձանցից, այդ թվում նաև կարող էր առաջանալ Արման Մանուկյանից
3. Փորձաքննության ներկայացված մեկ զույգ կոշիկներկի վրա տեղակայված բորբոսանման հետքերից վերցված քսվածքներում արյուն չհայտնաբերվեց:
Տուժող Արման Մանուկյանի հագուստները ներկայացնելու մասին 26.10.2012թ. արձանագրությամբ:
Դատահետքաբանական փորձաքննության փորձագետի թիվ Հմ. 189 եզրակացությամբ` համաձայն որի
1.2.3. Փորձաքննությանը ներկայացված Արման Մանուկյանի կոստյումի, վերնաշապիկի և ուսաժապավեններով շապիկի մակերեսներին առկա վնասվածքները ծակած-կտրած են և կարող էին առաջանալ մեկ սայրանի ծակող-կտրող շեղբ ունեցող գործիքի` հնարավոր է դանակի շեղբի մեկ ներգործության արդյունքում:
4.ՙԻնչ դիրքում են գտնվել տուժող Ա. Մանուկյանը և մեղադրյալ Է. Խաչոյանը` վերջինիս կողմից վնասվածքը հասցնելու պահին՚ հարցի պարզաբանումը չի մտնում հետքաբան-փորձագետի իրավասության մեջ, այն ունի դատաբժշկական պարզաբանման հիմնավորման բնույթ:
Իրեղեն ապացույց հանդիսացող տուժող Արման Վաչագանի Մանուկյանի հագին 2012թ. հոկտեմբերի 25-ին եղած մեկ հատ մուգ կապույտ գույնի վիլյուրատիպ կտորից կարված կոստյումի, մեկ հատ կապույտ և սպիտակ գույնի թելերով կարված վերնաշապիկի, մեկ հատ սպիտակ գույնի կտորից կարված ուսաժապավեններով շապիկի, մեկ հատ մուգ կապույտ գույնի վիլյուրատիպ կտորից կարված անդրավարտիքի և մեկ զույգ կաշվե սև գույնի կոշիկների առկայությամբ:
Է. Խաչոյանի մեղադրանքի հիմքում դրվել է նաև անձին լուսանկարով ճանաչման ներկայացնելու մասին 30.10.2012թ.-ի արձանագրությունը, համաձայն որի վկա Սերգեյ Ասլանյանն իրեն ներկայացված 4 լուսանկարներից ձախից դեպի աջ ճանաչել է 4-րդ լուսանկարում պատկերված անձին` Էդգար Գևորգի Խաչոյանին և հայտնել, որ Արման Մանուկյանի հետ 2012թ. հոկտեմբերի 25-ին ժամը 23:00-ի սահմաններում ՙԷքստազի՚ կարաոկե ակումբի դիմաց վիճաբանած անձանցից մեկը հանդիսանում է Էդգար Գևորգի Խաչոյանը: Դատարանն այդ ապացույցը որպես հավաստի չի կարող համարել, քանի որ նախաքննության ընթացքում վկա Ս. Ասլանյանը փաստաբան Հրանտ Գևորգյանի հետ մասնակցել է նաև անձին ճանաչման ներկայացնելու վերաբերյալ քննչական գործողությանը, որի ընթացքում կազմված արձանագրությամբ քննիչն արձանագրել է, որ ՙզննելով իրեն ճանաչման ներկայացված չորս անձանց հայտարարեց, որ նրանցից ոչ մեկին չի ճանաչում՚, ընդորում վկա Ս. Ասլանյանին ճանաչման ներկայացված 4 անձանց թվում եղել է նաև Էդգար Գևորգի Խաչոյանը: Բացի այդ, հիշյալ արձանագրության մեջ նշված չէ, թե ժամը քանիսին է սկսվել և ավարտվել քննչական գործողությունը, մինչդեռ ՀՀ քրեական դատավարության օրենսգրքի 29-րդ հոդվածի համաձայն` ՙԱրձանագրությունում նշվում են՝ 1) դատավարական գործողության իրականացման վայրը, օրը, ամիսը, տարեթիվը, սկսելու և ավարտելու ժամանակը՝ րոպեի ճշտությամբ. ........՚, ՀՀ քրեական դատավարության օրենսգրքի 224-րդ հոդվածի 2-րդ մասի համաձայն` ՙԱրձանագրության մեջ նշվում է ճանաչման ներկայացնելու տեղը, ժամանակը, ինչպես նաև այն կատարող անձի ազգանունը և պաշտոնը՚:
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ` դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալ Էդգար Խաչոյանը կատարել է հանցավոր արարք, որը համապատասխանում է ՀՀ քրեական օրենսգրքի 112-րդ հոդվածի 1-ին մասի հատկանիշներին, որով էլ նա ենթակա է քրեական պատասխանատվության:
Ամբաստանյալի նկատմամբ պատիժ նշանակելիս դատարանը հաշվի է առնում ինչպես կատարած հանցագործությունների բնույթն ու հանրության համար վտանգավորության աստիճանը, այնպես էլ նրա անձը բնութագրող տվյալները` այն, որ ամբաստանյալը երիտասարդ է, նախկինում դատված ու արատավորված չի եղել, ՀՀ Կոտայքի մարզի Առինջի գյուղապետարանի կողմից բնութագրվում է դրականորեն /բնութագիրը հաստատվել է համայնքի ղեկավար Գ. Սարգսյանի և քարտուղար Ա. Բարսեղյանի կողմից/:
Որպես ամբաստանյալի պատասխանատվությունը և պատիժը մեղմացնող հանգամանքներ դատարանը դիտում է այն, որ պատիժ նշանակելու պահին նրա խնամքի տակ են գտնվում մինչև 14 տարեկան 2 երեխանները /ծնված 26.08.2004թ.-ին, 05.10.2005թ.-ին/, ինչպես նաև այն, որ վերջինս ինքնակամ է ներկայացել ՀՀ ոստիկանության Արաբկիրի բաժին:
Որպես ամբաստանյալ Էդգար Խաչոյանի պատիժը և պատասխանատվությունը ծանրացնող հանգամանքներ դատարանը չի հայտնաբերել:
Նման պայմաններում դատարանը գտնում է, որ ամբաստանյալ Էդգար Խաչոյանն իր կատարած հանցանքի համար ենթակա է պատժի, որը պետք է կրի ՀՀ ԱՆ համապատասխան քրեակատարողական հիմնարկում, իսկ նրա նկատմամբ կիրառված խափանման միջոցը պետք է թողնել անփոփոխ` մինչև դատավճռի օրինական ուժի մեջ մտնելը:
Անդրադառնալով իրեղեն ապացույցի հարցին` դատարանը գտնում է, որ դատավճիռն օրինական ուժի մեջ մտնելուց հետո իրեղեն ապացույց հանդիսացող տուժող Արման Վաչագանի Մանուկյանի հագին 2012թ. հոկտեմբերի 25-ին եղած մուգ կապույտ գույնի վիլյուրատիպ կտորից կարված կոստյումը, կապույտ և սպիտակ գույնի թելերով կարված վերնաշապիկը, սպիտակ գույնի կտորից կարված ուսաժապավեններով շապիկը, մուգ կապույտ գույնի վիլյուրատիպ կտորից կարված անդրավարտիքը և մեկ զույգ կաշվե սև գույնի կոշիկները պետք է վերադարձնել Արման Մանուկյանին:
Ղեկավարվելով ՀՀ քրեական դատավարության օրենսգրքի 119-րդ, 357-360-րդ, 365-րդ, 369-373-րդ հոդվածներով` դատարանը

Վ Ճ Ռ Ե Ց

Ամբաստանյալ Էդգար Գևորգի Խաչոյանին մեղավոր ճանաչել ՀՀ քրեական օրենսգրքի 112-րդ հոդվածի 1-ին մասով նախատեսված հանցանք կատարելու մեջ և նրան դատապարտել ազատազրկման 3 /երեք/ տարի 6 /վեց/ ամիս ժամկետով:
Էդգար Խաչոյանի պատժի սկիզբը հաշվել 2012 թվականի նոյեմբերի 6-ից, որը պետք է կրի ՀՀ ԱՆ համապատասխան քրեակատարողական հիմնարկում:
Էդգար Խաչոյանի նկատմամբ որպես խափանման միջոց կիրառված կալանավորումը թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո իրեղեն ապացույց հանդիսացող տուժող Արման Վաչագանի Մանուկյանի հագին 2012թ. հոկտեմբերի 25-ին եղած մուգ կապույտ գույնի վիլյուրատիպ կտորից կարված կոստյումը, կապույտ և սպիտակ գույնի թելերով կարված վերնաշապիկը, սպիտակ գույնի կտորից կարված ուսաժապավեններով շապիկը, մուգ կապույտ գույնի վիլյուրատիպ կտորից կարված անդրավարտիքը և մեկ զույգ կաշվե սև գույնի կոշիկները վերադարձնել Արման Մանուկյանին:
Դատավճիռը կարող է բողոքարկվել ՀՀ քրեական վերաքննիչ դատարան հրապարակվելու օրվանից հետո մեկամսյա ժամկետում:

դատավոր` ստորագրություն
Բնագրի հետ ճիշտ է`
դատավոր` Ա. Խաչատրյան