ԵԱՔԴ/0066/01/13

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահող դատավոր Լ. Ավետիսյան
քարտուղարությամբ` Ն. Ղազարյանի
մասնակցությամբ
մեղադրող` Դ. Կարապետյանի
պաշտպան` Ա. Դանիելյանի

2013 թվականի մայիսի 15-ին, Երևան քաղաքում, դռնբաց դատական նիստում, դատական քննության արագացված կարգով քննեց քրեական գործն ըստ մեղադրանքի Թաթուլ Սերյոժայի Դավթյանի, ծնված 1981 թվականի օգոստոսի 19-ին, Կոտայքի մարզի Կարենիս գյուղում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին երկու անչափահաս երեխա, նախկինում չդատված, չի աշխատում, հաշվառված և բնակվում է Կոտայքի մարզի Կարենիս գյուղի 5-րդ փողոցի 1 նրբ. թիվ 5 հասցեում, մեղադրվում է ՀՀ քրեական օրենսգրքի 325 հոդվածի 1-ին մասով, որպես խափանման միջոց է ընտրվել չհեռանալու մասին ստորագրությունը,

Պ Ա Ր Զ Ե Ց

1.Գործի դատավարական նախապատմությունը.
2013 թվականի փետրվարի 5-ին Երևան քաղաքի դատախազ Հր.Բադալյանի որոշմամբ ՀՀ քրեական օրենսգրքի 178 հոդվածի 2-րդ մասի 2-րդ կետով, 325 հոդվածի 1-ին մասով նախատեսված հանցագործության հատկանիշներով հարուցվել է թիվ 63200313 քրեական գործը:
Նախաքննության մարմնի 2013 թվականի ապրիլի 20-ի որոշմամբ Թաթուլ Դավթյանի նկատմամբ խարդախություն և ինքնիրավչություն կատարելու մասով քրեական հետապնդում չի իրականացվել` վերջինիս արարքում հանցակազմի բացակայության հիմքով:
Նախաքննության մարմնի 2013 թվականի ապրիլի 21-ի որոշմամբ Թաթուլ Սերյոժայի Դավթյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 325 հոդվածի 1-ին մասով, նկատմամբ որպես խափանման միջոց է ընտրվել չհեռանալու մասին ստորագրությունը:
2013 թվականի ապրիլի 25-ին թիվ 63200313 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Թաթուլ Սերյոժայի Դավթյանին մեղադրանք է առաջադրել այն արարքի կատարման համար, որ նա 06.10.2012թ.-ին Չարենցավան քաղաքի բնակիչ Սամվել Հովհաննիսյանի անվամբ լրացրել է իրավունք վերապահող փաստաթուղթ հանդիսացող սահմանված ձևի կեղծ լիազորագիր, որում ստորագրել է Ս.Հովհաննիսյանի փոխարեն և որպես լիազորված անձ նշել իր աներորդի Արմեն Հակոբյանի տվյալները, որն էլ վերջինիս միջոցով օգտագործել է 07.10.2012թ.-ին ներկայացնելով Երևան քաղաքի Հր.Քոչար 5 հասցեում գտնվող ՙԻնգո Արմենիա՚ ԱՓԲ ընկերություն` Ս.Հովհաննիսյանի բուժման նպատակով կատարած ծախսերի հատուցումը ստանալու համար:
3. Արագացված դատական քննություն.
Մինչև դատաքննությունն սկսելն ամբաստանյալ Թաթուլ Սերյոժայի Դավթյանը միջնորդեց դատական քննությունն անցկացնել արագացված կարգով և հայտարարեց, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու բնույթն ու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո: Միջնորդությունը հաստատեց նաև ամբաստանյալի պաշտպան Արսեն Դանիելյանը:
Մեղադրող Դ.Կարապետյանը դատական քննության արագացված կարգ կիրառելուն չի առարկել:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել դատական քննության արագացված կարգ կիրառելու մասին:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Թաթուլ Սերյոժայի Դավթյանին առաջադրված մեղադրանքը ՀՀ քրեական օրենսգրքի 325 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 325 հոդվածի 1-ին մասին և արարքի որակումը ճիշտ է:
Կատարած արարքի համար ամբաստանյալ Թաթուլ Սերյոժայի Դավթյանը ենթակա է քրեական պատասխանատվության և պատժի:
Ամբաստանյալ Թաթուլ Դավթյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ Թաթուլ Դավթյանի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել, նրա խնամքին են գտնվում մինչև տասնչորս տարեկան երկու երեխան (Սերգեյ Թաթուլի Դավթյան` ծնված 03.07.2005թ., Սոֆի Թաթուլի Դավթյան` ծնված 01.05.2009թ.), բնութագրվում է դրական, առաջին անգամ հանգամանքների պատահական զուգորդմամբ է կատարել ոչ մեծ ծանրության հանցանքը:
Ամբաստանյալի պատասխանատվությունը և պատիժը ծանրացնող հանգամանքներ առկա չեն:
ՀՀ քրեական օրենսգրքի 61 հոդվածի 3-րդ մասի համաձայն, հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները:
Հաշվի առնելով Թաթուլ Դավթյանի կատարած արարքի հանրության համար վտանգավորության աստիճանը և բնույթը, նրա անձը, նրան բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 325 հոդվածի 1-ին մասի սանկցիայով նախատեսված է պատիժ նաև տուգանքի ձևով և պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, դատարանը գտնում է, որ ամբաստանյալ Թաթուլ Սերյոժայի Դավթյանի նկատմամբ պատիժ պետք է նշանակել տուգանքի ձևով:
Դատարանը գտնում է, որ Թաթուլ Դավթյանի նկատմամբ որպես խափանման միջոց կիրառված չհեռանալու մասին ստորագրությունը պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը գտնում է, որ դատավճիռն օրինական ուժի մեջ մտնելուց հետո, ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնի քննիչի 21.04.2013թ.-ի որոշումով ապացույց ճանաչված և քրեական գործին կցված 06.09.2012թ. կազմված լիազորագիրը պետք է պահել քրեական գործի հետ միասին:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց

Թաթուլ Սերյոժայի Դավթյանին մեղավոր ճանաչել ՀՀ քրեական օրենսգրքի 325 հոդվածի 1-ին մասով նախատեսված հանցանք կատարելու մեջ և նրան դատապարտել տուգանքի նվազագույն աշխատավարձի երկուհարյուրապատիկի` 200.000 (երկու հարյուր հազար) ՀՀ դրամի չափով:
Թաթուլ Դավթյանի նկատմամբ որպես խափանման միջոց ընտրված չհեռանալու մասին ստորագրությունը թողնել անփոփոխ, մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո, ապացույց ճանաչված և քրեական գործին կցված 06.09.2012թ. կազմված լիազորագիրը պահել քրեական գործի հետ միասին:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:

Դատավոր` ստորագրություն
Բնագրի հետ ճիշտ է`
Դատավոր Լ. Ավետիսյան