Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահող դատավոր` Լ. Ավետիսյան
քարտուղարությամբ` Ն.Ղազարյանի, Հ.Թադևոսյանի, Ե.Կարապետյանի
մասնակցությամբ
մեղադրող` Ա. Աղայանի, Լ. Մանուկյանի
պաշտպաններ` Վ. Մելքոնյանի, Գ. Մադոյանի
տուժողներ` Ջ. Մկրտչյանի, Ա. Ազարյանի

2013 թվականի հոկտեմբերի 8-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի Լյուդվիգ Գրիգորի Հովհաննիսյանի, ծնված 1987 թվականի մայիսի 28-ին, Կոտայքի մարզի Առինջ գյուղում, ազգությամբ հայ, ՀՀ քաղաքացի, միջնակարգ կրթությամբ, ֆիզիկապես վատառողջ, ամուրի, խնամքին մեկ անձ, չի աշխատել, նախկինում դատված` Գեղարքունիքի մարզի առաջին ատյանի դատարանի 02.10.2006թ. դատավճռով ՀՀ քրեական օրենսգրքի 361 հոդվածի 4-րդ մասով դատապարտվել է ազատազրկման 1 տարի ժամկետով, ՀՀ քրեական օրենսգրքի 70 հոդվածի կիրառմամբ նշանակված պատիժը պայմանականորեն չի կիրառվել` սահմանվել է 1 տարի ժամանակով փորձաշրջան, դատվածություն չունեցող, հաշվառված և բնակվել է Կոտայքի մարզի Առինջ գյուղի 8 փողոցի 18 տուն հասցեում, մեղադրվում է ՀՀ քրեական օրենսգրքի 176 հոդվածի 1-ին մասով, ՀՀ քրեական օրենսգրքի 177 հոդվածի 2-րդ մասի 2-րդ կետով, կալանքի տակ է 2012 թվականի հոկտեմբերի 26-ից:

Պ Ա Ր Զ Ե Ց

1.Գործի դատավարական նախապատմությունը.
2012 թվականի օգոստոսի 09-ին ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթուն քննչական բաժնում ՀՀ քրեական օրենսգրքի 176 հոդվածի 1-ին մասով նախատեսված հանցագործության հատկանիշներով հարուցվել է թիվ 09108812 քրեական գործը:
Նախաքննության մարմնի 2012 թվականի օգոստոսի 22-ի որոշմամբ Լյուդվիգ Գրիգորի Հովհաննիսյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 176 հոդվածի 1-ին մասով: Նրա նկատմամբ որպես խափանման միջոց է ընտրվել չհեռանալու մասին ստորագրությունը:
2012 թվականի հոկտեմբերի 17-ին Լյուդվիգ Գրիգորի Հովհաննիսյանին առաջադրված մեղադրանքը փոփոխվել և նա ներգրավվել է որպես մեղադրյալ ՀՀ քրեական օրենսգրքի 176 հոդվածի 1-ին մասով: Նրա նկատմամբ հայտարարվել է հետախուզում: Դատարանի որոշմամբ նրա նկատմամբ որպես խափանման միջոց կիրառվել է կալանավորումը:
2012 թվականի հոկտեմբերի 26-ին Լյուդվիգ Գրիգորի Հովհաննիսյանը ձերբակալվել է:
Դատարանի 26.10.2012թ. որոշմամբ նրա նկատմամբ որպես խափանման միջոց կիրառված կալանքը վերահաստատվել է:
29.10.2012թ.-ին Երևան քաղաքի ՔՎ Նոր-Նորք քննչական բաժնից Քանաքեռ-Զեյթուն քննչական բաժին է ստացվել Լ.Հովհաննիսյանի վերաբերյալ թիվ 17129412 քրեական գործը:
Նախաքննության մարմնի 2012 թվականի հոկտեմբերի 29-ի որոշմամբ թիվ 17129412 քրեական գործը միացվել է թիվ 09108812 քրեական գործին, նախաքննությունը շարունակվել է թիվ 09108812 քրեական գործի համարով:
04.12.2012թ.-ին ՀՀ ոստիկանության Կոտայքի քննչական բաժանմունքից Քանաքեռ-Զեյթուն քննչական բաժին է ստացվել Լ.Հովհաննիսյանի վերաբերյալ թիվ 20119412 քրեական գործը:
2012 թվականի դեկտեմբերի 4-ի որոշմամբ թիվ 20119412 քրեական գործը միացվել է թիվ 09108812 քրեական գործին, նախաքննությունը շարունակվել է թիվ 09108812 քրեական գործի համարով:
2013 թվականի փետրվարի 21-ի որոշմամբ Լյուդվիգ Հովհաննիսյանի կողմից Գայանե Հովհաննիսյանից զգալի չափերի` 10.000 ՀՀ դրամ ընդհանուր արժողության մետաղադրամներ գաղտնի հափշտակելու փաստով քրեական հետապնդում չի իրականացվել` ՀՀ քրեական դատավարության օրենսգրքի 35 հոդվածի 1-ին մասի 5-րդ կետով` մեղադրյալի և տուժողի միջև կայացած հաշտության հետևանքով:
2013 թվականի փետրվարի 21-ին Լյուդվիգ Գրիգորի Հովհաննիսյանին առաջադրված մեղադրանքը փոփոխվել, լրացվել և նրան նոր մեղադրանք է առաջադրվել ՀՀ քրեական օրենսգրքի 176 հոդվածի 1-ին մասով և ՀՀ քրեական օրենսգրքի 177 հոդվածի 2-րդ մասի 2-րդ կետով: Նրա նկատմամբ ընտրված խափանման միջոցը թողնվել է անփոփոխ:
2013 թվականի մարտի 5-ին թիվ 09108812 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինը Լյուդվիգ Գրիգորի Հովհաննիսյանին ՀՀ քրեական օրենսգրքի 177 հոդվածի 2-րդ մասի 2-րդ կետով, ՀՀ քրեական օրենսգրքի 176 հոդվածի 1-ին մասով մեղադրանք է առաջադրել այն արարքների կատարման համար, որ նա 2012թ. օգոստոսի 4-ին, ժամը 1550-ի սահմաններում, ուրիշի գույքը բացահայտ հափշտակելու դիտավորությամբ, Պ.Սևակի փողոցի թիվ 5 հասցեում գտնվող Սրտաբանական Ինստիտուտի մոտ, իր կողմից վարվող ՙՎԱԶ 2107՚ մակնիշի 0331Լ պ/հ տաքսի ավտոմեքենայի սրահում տեսնելով Ջուլետա Վոլոդյայի Մկրտչյանի պայուսակը, նրան խաբեությամբ իջեցրել է մեքենայից և այն վարելով դիմել փախուստի` բացահայտ հափշտակելով ավտոմեքենայում գտնվող Ջ.Մկրտչյանի պայուսակը և պոլիէթիլենային տոպրակը, որոնցում եղել են ընդհանուր գումարով 40703,16 դրամ արժողությամբ` 2 հատ ՙRexona՚ տեսակի կոսմետիկ միջոցներ, 2 հատ շրթներկ, 1 հատ ծաղկի տեսքով կոսմետիկ միջոց, 2 հատ մատիտներ, 1 հատ ՙA.ME՚ գրառմամբ, 1 հատ ՙBelle Jardin՚ գրառմամբ քսուքներ, 1 հատ դեմքի փայլ, 1 հատ օճառ, 1 հատ մանիկյուր, 1 հատ օդեկոլոն, 2 հատ աչքի տուշեր, 2 հատ կոսմետիկ մատիտներ, 3 հատ դեմքի փոշիներ, 1 հատ կանացի պայուսակ, 6 հատ կրակայրիչներ, 4 հատ ծոցատետրեր, 4 հատ գրիչներ, 2 հատ կանացի ներքնաշորեր, 2 հատ հայելի, 10 հատ պահպանակներ, 2 հատ ՙPant Oil՚ տեսակի միանգամյա օգտագործման օճառապղպջակներ /շամպուն/, 3 հատ պլաստմասե տարաներով մարգանցովկա, 1 հատ սանր, 1 հատ գրպանի դանակ, 1 հատ ունելի, 1 հատ մկրատ, 1 հատ ասեղ, 1 հատ գունավոր քարերով վզնոց, 1 հատ դեղին մետաղից շղթա, 2 հատ մատանիներ, 1 հատ կայծակ ճարմանդ, 1 հատ ՙSimens՚ տեսակի AF51 մոդելի, 1 հատ ՙNokia՚ տեսակի, 2 հատ ՙSony Ericsson՚ տեսակի P900i, ՙSamsung D-900՚ տեսակի, ՙMotorola՚ տեսակի L-7 մոդելի բջջային հեռախոսներ, 1 հատ ՙDOLCE&GABBANA՚ տեսակի տաբատ, 1 հատ կանացի վերնազգեստ, 1 հատ կիսաշրջազգեստ, 1003,16 դրամին համարժեք ՙերկու եվրո՚ մետաղադրամ, 16.000 ՀՀ դրամ գումար:
Բացի այդ Լ.Հովհաննիսյանը, 2012թ.-ի օգոստոսի 16-ից 2012թ.-ի հոկտեմբերի 15-ն ընկած ժամանակահատվածում, օգտվելով քաղաքացի Ավետիս Հովհաննեսի Ազարյանի` Երևան քաղաքի Խուդյակովի փողոցի 4-րդ նրբանցքի 1-ին տանը վարձակալության հիմունքներով բնակվելու հանգամանքից, այնտեղից գաղտնի հափշտակել է 10.000 ՀՀ դրամ արժողության գազի ջրատաքացուցիչ, 280.000 ՀՀ դրամ արժողության 1 հատ ոսկյա մատանի, 2000 ՀՀ դրամ արժողության 1 հատ արծաթյա մատանի, 200.000 ՀՀ դրամ արժողության ՙJVC՚ հեռուստացույց, 40.539 ՀՀ դրամին համարժեք 100 ԱՄՆ դոլար, 113.400 ՀՀ դրամին համարժեք 9000 ՌԴ ռուբլի, 126.150 ՀՀ դրամին համարժեք 250 եվրո և 150.000 ՀՀ դրամ` Ա.Ազարյանին պատճառելով խոշոր չափի` ընդհանուր 922.089 ՀՀ դրամ գույքային վնաս:
3.Ապացույցների հետազոտում.
Առաջադրված մեղադրանքում Լյուդվիգ Գրիգորի Հովհաննիսյանն իրեն մեղավոր ճանաչեց մասնակիորեն և ցուցմունք տվեց այն մասին, որ երկու տարուց ավելի է ճանաչում է Ջ.Մկրտչյանին, իսկ Ա.Ազարյանին` բնակարանը վարձակալելու ժամանակ: Վերջինս մի օր ուշ ժամի դուռը թակել և ասել է, որ կորել է իր 100 դոլար գումարը: Ինքն առաջարկել է գնալ ոստիկանություն, ինչին Ավետիսը չի համաձայնել, ասելով, որ կամ ինքը պետք է տա իր գումարը, կամ` դուրս գա բնակարանից: Մեկ շաբաթ հետո բնակարանը հանձնել է: Հետո իր հետ փաստական ամուսնական հարաբերությունների մեջ գտնվող Լիանա Եղիազարյանի մայրն ասել է, որ Լիանային տարել են ոստիկանություն: Ինքը գնացել է ոստիկանություն և իմացել, որ Ա.Ազարյանը բողոքել է: Ոստիկանությունում իրեն ասել են, որ մի երկու բան գրեն, ինքն ընդունի, թողեն գնա, ոչինչ չի լինի: Համոզել են: Ուշ ժամ էր, գրել են, դուրս է եկել: Հեռուստացույցը փչացած էր, դրված էր տանից դուրս, աշխատանքային գործիքների հետ միասին: Փոքր հեռուստացույց էր, այն 200.000 դրամ արժենալ չէր կարող: Ավետիսն իրեն ասել է, որ հեռուստացույցը վերցրել է վարձով ապրողներից մեկից` մեկ ամսվա վարձի դիմաց: Գազի կաթսան ինքն է գնել 40.000 դրամով: Համաձայնության են եկել, որ եթե մինչև ամսվա վերջ մնային ու վարձը չկարողանար տալ, կաթսան թողնելու էր, սակայն մինչև ամսվա վերջ չեն մնացել: Ավետիսը հաշվել է վարձի գումարը, որը եղել է 20.000 դրամ: Ինքը վճարել է և այդ պատճառով կաթսան չի թողել:
Ջ.Մկրտչյանից կատարված հափշտակության դրվագով ամբողջությամբ ընդունում է իր մեղքը: Ջուլետայի վնասը ամբողջությամբ հատուցել է: Ա.Ազարյանի դրվագով մեղքը չի ընդունում: Նրա տանից ինքը որևէ բան չի գողացել: Տաս օրից ավել այդ տանը չի ապրել: Ա.Ազարյանի վնասը չի ցանկանում վերականգնել, քանի որ ուրիշի արածի համար չի ուզում պատասխան տալ:
Նախաքննության ընթացքում Լյուդվիգ Գրիգորի Հովհաննիսյանը ցուցմունք է տվել այն մասին, որ 2012թ.-ի օգոստոսի 04-ին` ժամը 1200-ի սահմաններում հանդիպել է իր ծանոթ Ջուլետա Մկրտչյանին: Նա խնդրել է օգնել իրեն էժան գնով ԴՎԴ նվագարկիչ և հեռուստացույց գնելու հարցում, իսկ ինքը խոստացել է գումարը չբավականացնելու դեպքում օգնել նրան: Ընկերոջը սպասելու պատրվակով` Ջ.Մկրտչյանին իր կողմից վարած ՙՎԱԶ 2107՚ մակնիշի տաքսի ավտոմեքենայով տարել է Երևան քաղաքի Զեյթուն վարչական շրջանի Պարույր Սևակի փողոցի թիվ 5 հասցեում գտնվող ՙՍրտաբանական ինստիտուտի՚ մոտ, որտեղ մեքենայի մեջ ունեցել են սեռական հարաբերություն: Դրանից հետո Ջ.Մկրտչյանին մեքենայի միջից տվել է շշով ջուր ու ասել, որ իջնի լվացվելու: Ջ.Մկրտչյանին թողնելով դրսում` արագ վարել է մեքենան և հեռացել` իր հետ տանելով վերջինիս պայուսակը և պոլիէթիլենային տոպրակը, որոնք գտնվել են մեքենայի մեջ: Դրանից հետո զննել է Ջ.Մկրտչյանի պայուսակը և պոլիէթիլենային տոպրակը, վերցրել 16.000 ՀՀ դրամը: Նույն օրը` երեկոյան, Ջ.Մկրտչյանի ՙSamsung D900՚ մոդելի բջջային հեռախոսը նվիրել իր ծանոթ Քրիստինե Խաչատրյանին, իսկ ՙSoni Ericsson՚ և ՙMotorola L7՚ բջջային հեռախոսները դեն է նետել: Այնուհետև տեղեկանալով, որ Ջ.Մկրտչյանը դիմել է ոստիկանություն, մնացած իրերը տվել է հորը` Գրիգոր Հովհաննիսյանին` ոստիկանություն ներկայացնելու համար: Հայտնել է, որ զղջում է կատարածի համար:
Բացի այդ նշել է նաև, որ կնոջ` Լիանա Եղիազարյանի հետ վարձակալությամբ բնակվել է Ավետիս Ազարյանի` Երևան քաղաքի Խուդյակովի փողոցի 4-րդ նրբանցքի 1-ին տանը: Բնակության համար Ա.Ազարյանը իրենց է հատկացրել տան առաջին հարկում մեկ սենյակ, բաղնիք, զուգարան և խորդանոց: Ազատ ելումուտ է ունեցել Ա.Ազարյանի տուն, որոշակի հարցերում օգնել նրան: Վերջինս իրեն չի արգելել մտնել նրա տան սենյակներ: Տան առաջին հարկի սենյակներից մեկը նախատեսված է եղել գործիքներ և տարբեր տեսակի չօգտագործվող առարկաներ պահելու համար: Դրա մուտքի դուռը փական չի ունեցել և Ա.Ազարյանի կողմից չի կողպվել: Առանց վերջինիս ներկայության նշված սենյակ ելումուտ անելու և հարկ եղած դեպքում գործիքներ և այլ առարկաներ վերցնելու թույլտվություն նույնպես ունեցել է: Այդ ժամանակահատվածում, կոնկրետ օրը չի հիշում, մուրճ փնտրելիս, տեսել է, որ Ա.Ազարյանը մտել է նշված սենյակ, իր ներկայությամբ բացել այդտեղ առկա փայտյա պահարանը և դրա մեջ գումար դրել: Դրա հաջորդ օրը, երբ Ա.Ազարյանը գտնվել է հողամասում, մտել է նշված սենյակ, բացել վերը նշված պահարանի դռները, որոնք փական չեն ունեցել և միջից գողացել այդտեղ գտնվող արտարժույթով գումարը: Նույն սենյակից վերցրել է նաև ՙJVC՚ տեսակի հարթէկրան հեռուստացույցը ու դրա հեռակառավարման վահանակը, որը տարել դրել է տարածքում գտնվող մոտ 1 մետր բարձրություն ունեցող պատի վրա, որպեսզի հետագայում տեղափոխի այլ վայր: 2 ժամ անց իրենց տանն են եղել կնոջ հարազատները` Բուսաթը, Վարդուհին, Անժելան և Ռիման, ուստի Բուսաթ Սարգսյանին առաջարկել է միասին տեղ գնալ: Մեքենայով շարժվել են վերը նշված պատի մոտ, իջել է ավտոմեքենայից, վերցրել հեռուստացույցը ու բերել դրել մեքենան: Մեքենան վարել է Զեյթուն վարչական շրջանում գտնվող գազալցակայանի ուղղությամբ, սակայն հերթ լինելու պատճառով մեքենան չի լացքավորել ու մոտ 10 րոպե անց Բ.Սարգսյանին հետ է բերել ու իջեցրել է տուն, իսկ ինքը գնացել է աշխատանքի: Հաջորդ օրը հեռուստացույցը տվել է իր ծանոթին: Ա.Ազարյանի տանից գողացել և իր հետ տարել է նաև ջրատաքացուցիչը, որը եղել է այն սենյակում, որտեղ բնակվել են: Այն այնուհետև վաճառել է:
Քրեական գործի հետագա նախաքննության ընթացքում մեղադրյալ Լ.Հովհաննիսյանը կրկին ցուցմունք է տվել այն մասին, որ Ա.Ազարյանի տանից գողություն կատարելու վերաբերյալ իր տրված ցուցմունքը սուտ է, նշված գողության հետ որևէ առնչություն չունի, հրաժարվել է պատասխանել որևէ հարցի ու առերես հարցաքննվել որևէ անձի հետ:
Դատարանը գնահատելով ամբաստանյալի տված ցուցմունքները, գտնում է, որ արժանահավատ պետք է համարել քրեական գործի նախնական քննության սկզբում նրա տված ցուցմունքը: Նախաքննության հետագա ընթացքում և դատարանում տված ցուցմունքներով ամբաստանյալը ցանկանում է խուսափել գողության համար նախատեսված քրեական պատասխանատվությունից:
Ամբաստանյալին մեղսագրված հանցանքը հիմնավորվել է նաև հետևյալ ապացույցներով.
Տուժող Ջուլետա Մկրտչյանի ցուցմունքով այն մասին, որ 2010թ.-ին ծանոթացել է Լ.Հովհաննիսյանի հետ, ով եղել է տաքսու վարորդ: Քանի որ հաճախ օգտվել է նրա ծառայություններից, մտերմացել են: 2012թ.-ի օգոստոսի 4-ին զանգահարել է Լ.Հովհաննիսյանին և հայտնել, որ ցանկանում է գնել հեռուստացույց և ԴՎԴ նվագարկիչ, սակայն ունի ընդամենը 16.000 ՀՀ դրամ: Լ.Հովհաննիսյանը խոստացել է օգնել այդ հարցում: Նա 10-15 րոպե անց հետ է զանգահարել և հայտնել է, որ զրուցել է ընկերոջ հետ, ու ԴՎԴ նվագարկիչը և հեռուստացույցը միասին կարժենան 25.000 ՀՀ դրամ: Լ.Հովհաննիսյանը հայտնել է նաև, որ կօգնի իրեն գումարի հարցով: Ինքն ասել է, որ ծնողները գումար են ուղարկելու ու մեկ շաբաթից պարտքը կվերադարձնի: 20-30 րոպե անց հանդիպել են Խանջյան փողոցում: Լ.Հովհաննիսյանն ասել է, որ ընկերոջ խանութը ՙՌայկոմում՚ է ու մեքենայով ուղևորվել են Զեյթուն վարչական շրջան: Այդ ժամանակ Լ.Հովհաննիսյանը ստացել է հեռախոսազանգ, որից հետո իրեն հայտնել է, որ ընկերը գործով տեղ է գնացել, ուստի պետք է 30 րոպե սպասեն ու առաջարկել է սպասել ՙՍրտաբանական ինստիտուտի՚ մոտ: Այդ ժամանակ Լ.Հովհաննիսյանի առաջարկով տեղափոխվել են մեքենայի հետնամաս ու սեռական հարաբերություն ունեցել, որից հետո Լ.Հովհաննիսյանը կրկին ստացել է հեռախոսազանգ ու զրուցելուց հետո կրկին տեղափոխվել վարորդի նստատեղին և առաջարկել իրեն տեղափոխվել մեքենայի առջև, սակայն չի հասցրել, քանի որ հենց մեքենայից իջել է, Լ.Հովհաննիսյանը, արագ վարելով մեքենան, հեռացել է՝ հափշտակելով իր պայուսակը և պոլիէթիլենային տոպրակը, որոնցում եղել են 6 բջջային հեռախոս, 16.000 ՀՀ դրամ, և մի շարք այլ իրեր: Բացի 16.000 ՀՀ դրամից, ՙMotorola L7՚ և ՙSony Ericsson՚ տեսակի բջջային հեռախոսից` մյուս իրերը դեպքից հետո ոստիկանության կողմից հայտնաբերվել և վերադարձվել են իրեն:
Տուժող Ավետիս Ազարյանի ցուցմունքով այն մասին, որ կնոջ հետ միասին բնակվում է Երևան քաղաքի Խուդյակովի փողոցի 4-րդ նրբանցքի 1-ին տանը: Հարևանի տղան ծանոթացրել է Լյուդվիգի և նրա կնոջ Լիանայի հետ, որոնց վարձակալությամբ տրամադրել է 1-ին հարկի 2 սենյակները: Լ.Հովհաննիսյանն ազատ ելումուտ է ունեցել իր տան բոլոր սենյակները, քանի որ չի արգելել նրան և չի փակել դռները: Ինքը կնոջ հետ մեկնել է ՌԴ: Մի քանի օր անց միայնակ վերադարձել է: Երբ հարևանը վերադարձրել է իրենից պարտքով վերցրած 100 դոլարը, Լյուդվիգը տեսել է, որ ինքն այն դրել է անդրավարտիքի հետևի գրպանում: Նրա կնոջ ծննդյան օրվա արարողությունից մի քանի օր առաջ, ինքը նկատել է, որ 100 դոլարանոց թղթադրամը չկա: Լյուդվիգին ասել է, որ վերադարձնի գումարը, թե չէ տանից կհանի: Աստիճանների վրա վայր ընկնելու հետևանքով կոտրվել են իր ոտքերը և պառկել է: Իր կինն ու դուստրը ՌԴ-ից վերադարձել են: Հետո պարզվել է, որ ննջասենյակից բացակայում են իր կնոջ 5000 ՌԴ ռուբլի գումարը, 250 Եվրո գումարը, իր 4000 ՌԴ ռուբլի գումարը: Փայտյա պահարանի մեջից բացակայում են 150.000 ՀՀ դրամ գումարը, ոսկյա և արծաթյա մատանիները: Հյուրասենյակից բացակայում է ՙJVC՚ տեսակի հեռուստացույցը: Լ.Հովհաննիսյանից պահանջել է, որ լքի իր տունը: Վերջինս առանց իրեն տեղյակ պահելու հեռացել է իր տնից: Որից հետո ինքը պարզել է, որ այն սենյակից, որտեղ բնակվել են Լյուդվիգը և Լիանան, բացակայում է նաև ջրի տաքացուցիչը:
Ա.Ազարյանը նշել է, նաև, որ բացի Լ.Հովհաննիսյանից, որը ազատ ելումուտ է ունեցել իր տան բոլոր սենյակները, ոչ ոք չէր կարող կատարել նշված գողությունը, ուստի վստահ է, որ հենց նա է կատարել հանցանքը:
Նախաքննության ընթացքում տված ցուցմունքի հակասության հետ կապված` այն մասին, որ Լ.Հովհաննիսյանը եղել է տարօրինակ անձնավորություն և ինքը նրան չի վստահել, Ա.Ազարյանը դատարանում պնդեց, որ ինքը Լյուդվիգին վստահել է, այդ պատճառով իր տան բոլոր դռները բաց են եղել նրա առջև: Ինքը Լ.Հովհաննիսյանի մոտ գողացված իրերը չի տեսել:
Վկա Գրիգոր Հովհաննիսյանի ցուցմունքով այն մասին, որ հանդիսանում է Լյուդվիգ Հովհաննիսյանի հայրը: Մի օր երեկոյան իր տուն է եկել որդին և հայտնել, որ ինչ-որ աղջիկ նրա տաքսի ավտոմեքենայի մեջ պայուսակ է մոռացել: Ինքը ուղևոր ունի, գնում է շրջան: Ասել է, որ իրեն ճանաչում են, կգան կտանեն: Խնդրել է մինչև երեկո սպասել, եթե չգան, ինքն այդ իրերը տանի ոստիկանություն: Այդպես էլ արել է: Ա.Ազարյանին ճանաչում է մոտ 1 ամիս: Նա իրեն պատմել է, որ նրան նյութական վնաս է պատճառել իր որդու հետ ապրող աղջիկը: Գ.Հովհաննիսյանը պնդեց նախաքննության ընթացում տված իր ցուցմունքը:
Վկա Գրիգոր Հովհաննիսյանի նախաքննության ընթացում տված ցուցմունքով այն մասին որ, հանդիսանում է Լյուդվիգ Հովհաննիսյանի հայրը: 2012թ.-ի օգոստոսի 4-ին ` ժամը 2200-ի սահմաններում, իր տուն է եկել որդին, և հայտնել, որ ինչ-որ աղջիկ նրա տաքսի ավտոմեքենայի մեջ իրեր է մոռացել, իսկ դուստրը` Գայանեն զանգահարել և նրան հայտնել է, որ այդ աղջիկը դիմել է ոստիկանություն: Լ.Հովհաննիսյանը խնդրել է, որ ինքն այդ իրերը տանի ոստիկանություն ու իրեն է տվել սև գույնի կանացի պայուսակ և պոլիէթիլենային տոպրակ: Հարցրել է, արդյոք խնդիրներ չկան, ինչին որդին պատասխանել է, որ չկան: Հայտնել է նաև, որ ինքը ուղևոր ունի, ուստի անձամբ չի կարող դրանք ներկայացնել ոստիկանությանը: 2 օր անց, առանց նշված պայուսակը և պոլիէթիլենային տոպրակը բացելու, դրանք ներկայացրել է ոստիկանության քննիչին, ով հրավիրել է ընթերականեր և նրանց ու իր ներկայությամբ բացել դրանք և կազմել արձանագրություն:
Վկա Քրիստինե Խաչատրյանի նախաքննության ընթացում տված ցուցմունքով այն մասին, 2012թ.-ի օգոստոսի 4-ին գտնվել է Չարբախում` բարեկամի տանը: Ժամը 17.00-ի սահմաններում, խանութ գնալիս, ճանապարհին տեսել է ընկերուհու` Լիանա Եղիազարյանի ամուսնուն` Լյուդվիգ Հովհաննիսյանին: Զրուցել է նրա հետ ու այդ ժամանակ հայտնել, որ իր բջջային հեռախոսը փչացել է: Լ.Հովհաննիսյանը հայտնել է, որ ունի բջջային հեռախոս և առաջարկել է տալ իրեն, մինչ իրենը կվերանորոգի ու մեքենայի միջից տվել է ՙSamsung D900՚ մոդելի բջջային հեռախոս: Վերցրել է այդ հեռախոսը ու գնացել տուն: Ք.Խաչատրյանը նշել է նաև, որ տեղյակ չի եղել, որ նշված հեռախոսը Լ.Հովհաննիսյանը 04.08.2012թ.-ին բացահայտ հափշտակել է Ջուլիետա Մկրտչյանից ու այն ներկայացրել է քննությանը:
Վկա Բուսաթ Սարգսյանի նախաքննության ընթացում տված ցուցմունքով ցուցմունքով այն մասին, որ ճանաչում է մորաքրոջ դստեր` Լիանա Եղիազարյանի նախկին ամուսնուն՝ Լյուդվիգ Հովհաննիսյանին: Երևանում վարձակալությամբ բնակվելու ժամանակ հաճախ է հյուր գնացել նրանց, որոնք նույնպես վարձակալությամբ բնակվել են Երևան քաղաքի Խուդյակովի փողոցի 4-րդ նրբանցքի 1-ին տանը: 2012թ.-ի հոկտեմբերի 7-ին մոր՝ Վարդուհի Եղիազարյանի և մորաքրոջ մյուս դստեր` Անժելայի հետ գնացել է Լ.Եղիազարյանի և Լ.Հովհաննիսյանի վարձակալած տուն: Տանն են եղել Լ.Հովհաննիսյանը, Լ.Եղիազարյանը և նրա մայրը` Ռիման: Այնուհետև Լ.Հովհաննիսյանը գնացել է աշխատանքի և վերադարձել ժամը 13.30-ից 14.00-ի սահմաններում: Նա սուրճ է խմել ու իրեն դուրս կանչել՝ ընտանիքի անդամներին ասելով, որ շուտով կվերադառնան: Լ.Հովհաննիսյանին հարցրել է, թե ուր են գնում, սակայն վերջինս չի պատասխանել ու ասել է, որ ինքը նստի մեքենան: Մեքենայով գնացել են մոտ 50 մետր, կանգ են առել, Լ.Հովհաննիսյանն իրեն ասել, որ սպասի մեքենայում: Դրանից հետո, նա իջել է մեքենայից, քայլել վարձակալած տան պարսպի մոտ և մտել ներս: Լ.Հովհաննիսյանը վերադարձել է մոտ 15-20 րոպե անց ու իր հետ բերել է հարթ էկրան հեռուստացույց և հեռակառավարման վահանակ, որը դրել է մեքենայի հետևի նստատեղին ու վարել մեքենան դեպի կենտրոն: Ինքը հարցրել է, թե ինչ հեռուստացույց է, իսկ նա պատասխանել է, որ ընկերոջն է, թողել է նրա մոտ, որ վաճառի: Նա մի քանի զանգ է կատարել: Ինքը խոսակցությունից հասկացել է, որ խոսքը գնում է հեռուստացույցի վաճառքի մասին: Ճանապարհի կեսին Լ.Հովհաննիսյանը կատարել է շրջադարձ ու իրեն տարել տուն, ասելով, որ գնում է իր գործերով: Ժամը 23.00-ի սահմաններում Լյուդվիգը վերադարձել է: Մի քանի րոպե անց նա խնդրել է իրեն, որ մեքենայից բերի ծխախոտ: Բացելով մեքենայի դուռը նկատել է, որ հեռուստացույցը այնտեղ չէ: Լ.Հովհանիսյանն իր հարցին պատասխանել, որ հեռուստացույցը թողել է վերանորոգելու:
Վկա Լիանա Եղիազարյանի նախաքննության ընթացում տված ցուցմունքով այն մասին, որ 2012թ.-ի փետրվար ամսից սկսած Լ.Հովհաննիսյանի հետ գտնվել է փաստական ամուսնական հարաբերությունների մեջ: Վարձակալությամբ բնակվել են տարբեր բնակարաններում, իսկ 16.09.2012թ.-ից մինչ 15.10.2012թ.-ը՝ վարձակալել են Ավետիս Ազարյանին պատկանող Երևան քաղաքի Խուդյակովի փողոցի 4-րդ նրբանցքի 1-ին տունը: Լ.Հովհաննիսյանն աշխատել է ՙԷլենա՚ տաքսի ընկերությունում, այնուհետև` ՙՇոու՚ տաքսի ընկերությունում, որպես վարորդ: Ամեն օր իրեն է տվել 4000-ից 6000 ՀՀ դրամ` առօրյա ծախսերի համար, իսկ իր ծննդյան տարեդարձի օրվանից մի քանի օր առաջ տվել է 30.000 ՀՀ դրամ և ասել, որ անհրաժեշտության դեպքում կավելացնի: Բացի այդ նա իր ծննդյան օրը գնել է թխվածք, խմիչք և միրգ: Ծննդյան տարեդարձի հաջորդ օրը իրենց տան սեփականատեր Ավետիս Ազարյանն իրեն հայտնել է, որ Լ.Հովհաննիսյանը նրա տաբատի գրպանից գողացել է 100 ԱՄՆ դոլար: Այդ մասին զրուցել է ամուսնու հետ, որը հերքել է իր կողմից գողության կատարումը: 2012թ.-ի հոկտեմբերի 11-ից գնացել և մնացել է եղբոր՝ Կարեն Եղիազարյանի տանը և եղբոր քենու մահվան պատճառով խնամել է վերջինիս երեխաներին: Այդ պատճառով 15.10.2012թ.-ին իրենց իրերը Ա.Ազարյանի տնից տեղափոխելիս ներկա չի գտնվել: Դրանից հետո, երբ գնացել է Քանաքեռում վարձակալած նոր բնակարան, տեսել է ջրատաքացուցիչը, որը նախկինում կախված էր Ա.Ազարյանի տանը` իրենց զբաղեցրած սենյակում: Հարցրել է, թե ինչու է Լ.Հովհաննիսյանը վերցրել կաթսան, որին վերջինս պատասխանել է, որ նա է գնել 40.000 ՀՀ դրամով:
Լ.Եղիազարյանը նշել է նաև, որ ոստիկանությունում տեղեկացել է, որ ամուսինը` Լ.Հովհաննիսյանը Ա.Ազարյանից գողացել է ոսկյա և արծաթյա մատանիներ, ջրատաքացուցիչը, հեռուստացույց ու տարբեր գումարներ: Նշել է նաև, որ Լ.Հովհաննիսյանի կալանավորումից հետո իր մորաքրոջ որդին` Բուսաթ Սարգսյանն իրեն պատմել է, որ տեղյակ է, որ Լ.Հովհաննիսյանը գողացել է Ա.Ազարյանի հեռուստացույցը, որը տեսել է Լ.Հովհաննիսյանի մեքենայում, իսկ վերջինս նրան ասել է, որ դա նրա ընկերոջն է:
Ամբաստանյալի կատարած հանցանքը հիմնավորվել է նաև քրեական գործով ձեռք բերված հետևյալ ապացույցներով.
Տուժող Ջ.Մկրտչյանի և մեղադրյալ Լ.Հովհաննիսյանի առերես հարցաքննության արձանագրությամբ:
Առարկաները ներկայացնելու մասին արձանագրությամբ, համաձայն որի գործով մեղադրյալ Լ.Հովհաննիսյանի հայրը, քննությանն է ներկայացրել Լ.Հովհաննիսյանի կողմից գործով տուժող Ջ.Մկրտչյանից բացահայտ հափշտակած` Ջ.Մկրտչյանի պայուսակը և պոլիէթիլենային տոպրակը որոնցում եղել են 2 հատ ՙRexona՚ տեսակի կոսմետիկ միջոցներ, 2 հատ շրթներկ, 1 հատ ծաղկի տեսքով կոսմետիկ միջոց, 2 հատ մատիտներ, 1 հատ ՙA.ME՚ գրառմամբ, 1 հատ ՙBelle Jardin՚ գրառմամբ քսուքներ, 1 հատ դեմքի փայլ, 1 հատ օճառ, 1 հատ մանիկյուր, 1 հատ օդեկոլոն, 2 հատ աչքի տուշեր, 2 հատ կոսմետիկ մատիտներ, 3 հատ դեմքի փոշիներ, 1 հատ կանացի պայուսակ, 6 հատ կրակայրիչներ, 4 հատ ծոցատետրեր, 4 հատ գրիչներ, 2 հատ կանացի ներքնաշորեր, 2 հատ հայելի, 10 հատ պահպանակներ, 2 հատ ՙPant Oil՚ տեսակի միանգամյա օգտագործման օճառապղպջակներ /շամպուն/, 3 հատ պլաստմասե տարաներով մարգանցովկա, 1 հատ սանր, 1 հատ գրպանի դանակ, 1 հատ ունելի, 1 հատ մկրատ, 1 հատ ասեղ, 1 հատ գունավոր քարերով վզնոց, 1 հատ դեղին մետաղից շղթա, 2 հատ մատանիներ, 1 հատ կայծակ ճարմանդ, 1 հատ ՙSimens AF51՚ մոդելի, 1 հատ ՙNokia՚ տեսակի, 1 հատ ՙSony Ericsson՚ մոդելի բջջային հեռախոսներ, 1 հատ ՙDOLCE&GABBANA՚ տեսակի տաբատ, 1 հատ կանացի վերնազգեստ, 1 հատ կիսաշրջազգեստ, 1003,16 դրամին համարժեք ՙերկու եվրո՚ մետաղադրամ:
Բջջային հեռախոս ներկայացնելու մասին արձանագրությամբ, համաձայն որի սույն գործով վկա Քրիստինե Սուրենի Խաչատրյանը քննությանն է ներկայացրել Ջ.Մկրտչյանի ՙSamsung D-900՚ մոդելի բջջային հեռախոսը և հայտարարել, որ այն 2012թ.-ի օգոստոսի 4-ին իրեն է տվել Լյուդվիգ Գրիգորի Հովհաննիսյանը:
Դատաապրանքագիտական փորձաքննության հմ 453 ԱՊ եզրակացությամբ, համաձայն որի փորձաքննությանը տրամադրված 2 հատ ՙRexona՚ տեսակի կոսմետիկ միջոցները, 2 հատ շրթներկները, 1 հատ ծաղկի տեսքով կոսմետիկ միջոցը, 2 հատ մատիտները, 1 հատ ՙA.ME՚ գրառմամբ և 1 հատ ՙBelle Jardin՚ գրառմամբ քսուկները, 1 հատ դեմքի փայլը, 1 հատ օճառը, 1 հատ մանիկյուր, 1 հատ դիկտոֆոնը, 2 հատ աչքի տուշերը, 2 հատ կոսմետիկ մատիտները, 3 հատ դեմքի փոշիները հանդիսանում են անձնական հիգիենայի պարագաներ, օգտագործված են և իրենցից սպառողական արժեք չեն ներկայացնում, ինչից ելնելով դրանց շուկայական արժեք չի տրվում:
Փորձաքննությանը տրամադրված 1 հատ կանացի պայուսակի, 6 հատ կրակայրիչների, 3 հատ ծոցատետրերի, 4 հատ գրիչների, 2 հատ կանացի ներքնաշորերի, 2 հատ հայելիների զննությամբ պարզվեց, որ դրանք հնամաշ են, պատռված և կոտրված տեղամասերով, շուկայում նմանատիպ հնամաշ ապրանքատեսակների առուվաճառք չի իրականացվում, ուստի այդ ապրանքատեսակներին շուկայական արժեք չի տրվում:
Փորձաքննությանը տրամադրված 10 հատ ՙՆեվալյաշկա՚ տեսակի պահպանակների, 2 հատ ՙPANT OIL՚ տեսակի միանգամյա օգտագործման օճառապղպջակների, 3 հատ 1 գրամանոց պլաստմասե տարաներով մարգանցովկաների ընդհանուր շուկայական արժեքը կարող է կազմել 700 ՀՀ դրամ:
Փորձաքննությանը տրամադրված 1 հատ 12 սմ երկարությամբ, սև հիմնագույն պլաստմասե սանրի, 1 հատ բաց վիճակում 9 սմ երկարությամբ մետաղական իրանով գրպանի դանակի, 1 հատ մետաղական իրանով ունելու, 1 հատ մետաղական իրանով և սև գույնի պլաստմասե բռնակներով մկրատի ընդհանուր շուկայական արժեքը, հաշվի առնելով օգտագործված լինելու հանգամանքը, կարող է կազմել 300 ՀՀ դրամ:
Փորձաքննությանը տրամադրված 1 հատ գունավոր քարերով վզնոցի, 1 հատ դեղին գույնի ոչ թանկարժեք մետաղից շղթայի, 2 հատ մատանիների զննությամբ պարզվել է, որ դրանք հանդիսանում են բիժուտերիա և դրանց ընդհանուր շուկայական արժեքը, հաշվի առնելով օգտագործված լինելու հանգամանքը, կարող է կազմել 400 ՀՀ դրամ:
Փորձաքննությանը տրամադրված 23սմ երկարության և սև գույնի կայծակ ճարմանդը և 11x8 սմ չափերի և կապույտ հիմնագույնի ծոցատետրը նոր են և դրանց ընդհանուր շուկայական արժեքը կարող է կազմել 200 ՀՀ դրամ:
Փորձաքննությանը տրամադրված ՙSiemens՚ տեսակի AF51 մոդելի, ՙNokia՚ տեսակի 7360 մոդելի, ՙSoni Ericsson՚ տեսակի P900i մոդելի բջջային հեռախոսները գտնվում են անաշխատունակ վիճակում, կոտրված, ապակոմպլեկտավորված և ներկա ծածկույթի տարանջատված տեղամասերով, պիտանի են որպես պահեստամասեր և դրանց ընդհանուր շուկայական արժեքը կարող է կազմել 3000 ՀՀ դրամ:
Փորձաքննությանը տրամադրված տաբատի զննությամբ պարզվել է, որ ՙDolce & Gabbana՚ տեսակի է, ըստ ապրանքանիշ պիտակի վրայի գրառման Հոնկոնգի արտադրության, կապույտ հիմնագույնի ջինսային գործվածքից կարված, երկու կողային և երկու ետնամասի գրպաններով և մեկ աջակողմյան գրպանիկով, օգտագործված է և ունի բավարար ապրանքային տեսք, պիտանի հետագա նպատակային օգտագործման համար, առկա ապրանքային վիճակի հաշվառմամբ նմանատիպ տաբատի միջին շուկայական արժեքը կարող է կազմել 1000 ՀՀ դրամ:
Փորձաքննությանը տրամադրված կանացի վերնազգեստի զննությամբ պարզվել է, որ այն արտասահմանյան արտադրության, շագանակագույն հիմնագույնի դեղին և մարմնագույն գծանախշերով, կիսասինթետիկ գործվածքից կարված, երկու թևքերի եզրամասերում կարաքանդված տեղամասերով, օգտագործված է, ունի բավարար ապրանքային տեսք, պիտանի է հետագա նպատակային օգտագործման համար, առկա ապրանքային վիճակի հաշվառմամբ նմանատիպ վերնազգեստի միջին շուկայական արժեքը կարող է կազմել 300 ՀՀ դրամ:
Փորձաքննությանը տրամադրված կիսաշրջազգեստի զննությամբ պարզվել է, որ այն արտասահմանյան արտադրության, կիսաբամբակյա սպիտակ հիմնագույնի գործվածքից կարված, մոխրագույն սինթետիկ աստառով, կոճկվում է կայծակ ճարմանդներով և 1 կոճակով, օգտագործված է, ունի բավարար ապրանքային տեսք, պիտանի է հետագա նպատակային օգտագործման համար, առկա ապրանքային վիճակի հաշվառմամբ նմանատիպ կիսաշրջազգեստի միջին շուկայական արժեքը կարող է կազմել 800 ՀՀ դրամ:
Փորձաքննությանը տրամադրված 2 եվրո մետաղադրամի միջին շուկայական արժեքը սահմանվում է կենտրոնական բանկի տվյալ օրվա փոխարժեքով:
Դատաապրանքագիտական փորձաքննության հմ 28561210 եզրակացությամբ համաձայն, որի` փորձաքննությանը տրամադրված ՙSamsung D-900՚ մոդելի բջջային հեռախոսի առկա վիճակի շուկայական արժեքը, աշխատունակ վիճակում գտնվելու դեպքում, 2012թ.-ի օգոստոսի 04-ի դրությամբ ՀՀ գործող շուկայական գներով, կարող էր կազմել 5000 ՀՀ դրամ:
Ներկայացված Ջ.Մկրտչյանին պատկանող իրերն իրեղեն ապացույց ճանաչելու և տուժող Ջ.Մկրտչյանին ի պահ հանձնելու 19.10.2012թ. որոշումով, համաձայն որի 2 հատ ՙRexona՚ տեսակի կոսմետիկ միջոցները, 2 հատ շրթներկը, 1 հատ ծաղկի տեսքով կոսմետիկ միջոցը, 2 հատ մատիտները, 1 հատ ՙA.ME՚ գրառմամբ, 1 հատ ՙBelle Jardin՚ գրառմամբ քսուքները, 1 հատ դեմքի փայլը, 1 հատ օճառը, 1 հատ մանիկյուռը, 1 հատ օդեկոլոնը, 2 հատ աչքի տուշերը, 2 հատ կոսմետիկ մատիտները, 3 հատ դեմքի փոշիները, 1 հատ կանացի պայուսակը, 6 հատ կրակայրիչները, 4 հատ ծոցատետրերը, 4 հատ գրիչները, 2 հատ կանացի ներքնաշորերը, 2 հատ հայելին, 10 հատ պահպանակները, 2 հատ ՙPant Oil՚ տեսակի միանգամյա օգտագործման օճառապղպջակները /շամպուն/, 3 հատ պլաստմասե տարաներով մարգանցովկան, 1 հատ սանրը, 1 հատ գրպանի դանակը, 1 հատ ունելին, 1 հատ մկրատները, 1 հատ ասեղը, 1 հատ գունավոր քարերով վզնոցը, 1 հատ դեղին մետաղից շղթան, 2 հատ մատանիները, 1 հատ կայծակ ճարմանդը, 1 հատ ՙSimens AF51՚ մոդելի, 1 հատ ՙNokia՚ տեսակի, 1 հատ ՙSony Ericsson՚ մոդելի բջջային հեռախոսները, 1 հատ ՙDOLCE&GABBANA՚ տեսակի տաբատը, 1 հատ կանացի վերնազգեստը, 1 հատ կիսաշրջազգեստը, 1003,16 դրամին համարժեք ՙերկու եվրո՚ մետաղադրամը և ՙSamsung D-900՚ մոդելի բջջային հեռախոսը ճանաչվել են իրեղեն ապացույց և ի պահ հանձնվել տուժող Ջ.Մկրտչյանին:
Ստացիոնար դատահոգեբուժական փորձաքննության ֎` 1 եզրակացությամբ` համաձայն որի, Լ.Հովհաննիսյանը 2008թ.-ին տարել է ՙՀետտրավմատիկ էնցեֆալպաթիա, աֆեկտիվ զառանցանքային համախտանիշ՚ ժամանակավոր հոգեկան խանգարում, իրավախախտումները կատարելիս և ներկայումս նրա մոտ ակտիվ հոգեախտաբանական ախտանիշներ չեն հայտնաբերվել, այլ հայտնաբերվել են ՙանձի օրգանական խանգարում՚: ՙԱնձի օրգանական խանգարումը՚ Լ.Հովհաննիսյանի մոտ արտահայտված չէ այն աստիճանի և չի ուղեկցվում ակտիվ հոգեախտաբանական ախտանիշներով, մտավոր հիշողական կոպիտ խանգարումներով, որ ինչպես իրավախախտումը կատարելիս, այնպես էլ ներկայումս զրկեր և զրկի նրան իր գործողությունների վտանգավորությունը գիտակցելու և դրանք ղեկավարելու հնարավորություններից: Իրեն մեղսագրվող արարքի նկատմամբ Լ.Հովհաննիսյանը ճանաչվել է մեղսունակ և իր ներկա հոգեկան վիճակով վերջինս կարող է ճիշտ ընկալել օբյեկտիվ իրականությունը և մասնակցել դատաքննչական գործողություններին:
ՀՀ քրեական դատավարության օրենսգրքի 349 հոդվածի կարգով հրապարակված քրեական գործում առկա այլ փաստաթղթերով:
4.Դատարանի իրավական վերլուծությունները.
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ, դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալ Լյուդվիգ Հովհաննիսյանը կատարել է հանցավոր արարքներ, որոնք համապատասխանում են ՀՀ քրեական օրենսգրքի 176 հոդվածի 1-ին մասի, ՀՀ քրեական օրենսգրքի 177 հոդվածի 2-րդ մասի 2-րդ կետի հատկանիշներին:
Կատարած արարքների համար ամբաստանյալ Լյուդվիգ Գրիգորի Հովհաննիսյանը ենթակա է քրեական պատասխանատվության և պատժի:
ՀՀ քրեական օրենսգրքի 48 հոդվածի համաձայն`
ՙ1. Պատիժը պետական հարկադրանքի միջոց է, որը դատարանի դատավճռով պետության անունից նշանակվում է հանցագործության համար մեղավոր ճանաչված անձի նկատմամբ և արտահայտվում է այդ անձին իրավունքներից ու ազատություններից օրենքով նախատեսված զրկմամբ կամ դրանց սահմանափակմամբ:
2. Պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61 հոդվածի համաձայն`
ՙ1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում՝ հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործության՝ հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում՝ պատասխանատվությունը և պատիժը մեղմացնող կամ ծանրացնող հանգամանքներով:
3. Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները՚:
Ամբաստանյալ Լյուդվիգ Հովհաննիսյանի նկատմամբ պատիժ նշանակելիս, դատարանը հաշվի է առնում նրա կատարած արարքների հանրության համար վտանգավորության աստիճանը և բնույթը, ինչպես նաև հանցավորի անձը:
Որպես ամբաստանյալի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա բնութագրվում է դրական, ֆիզիկապես վատառողջ է /տառապում է ՙԱնձի օրգանական խանգարում՚ ախտորոշմամբ/, նրա խնամքին է գտնվում 2-րդ խմբի հաշմանդամ մայրը, ամբողջությամբ հատուցել է տուժողներին պատճառված նյութական վնասը:
Ամբաստանյալի պատասխանատվությունը և պատիժը ծանրացնող հանգամանքներ առկա չեն:
Հաշվի առնելով Լյուդվիգ Հովհաննիսյանի կատարած արարքների հանրության համար վտանգավորության աստիճանը և բնույթը, նրա անձը, նրան բնութագրող տվյալները, պատասխանատվությունը և պատիժը մեղմացնող ու ծանրացնող հանգամանքները, ինչպես նաև այն, որ ՀՀ քրեական օրենսգրքի 176 հոդվածի 1-ին մասի սանկցիայով նախատեսված է պատիժ նաև ազատազրկում առավելագույնը երեք տարի ժամկետով, ՀՀ քրեական օրենսգրքի 177 հոդվածի 2-րդ մասի սանկցիայով նախատեսված է պատիժ նաև ազատազրկում առավելագույնը հինգ տարի ժամկետով, դատարանը գտնում է, որ ամբաստանյալ Լյուդվիգ Գրիգորի Հովհաննիսյանի նկատմամբ պատիժ պետք է նշանակել ազատազրկման ձևով:
ՀՀ Ազգային ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշման 15-րդ կետի համաձայն, սույն որոշումը կիրառվում է այն անձանց նկատմամբ, ովքեր հանցագործություն են կատարել մինչև 2013 թվականի սեպտեմբերի 1-ը ներառյալ: Լյուդվիգ Հովհաննիսյանը հանրորեն վտանգավոր արարքները կատարել է 2012թ. օգոստոս-հոկտեմբեր ամիսների ընթացքում:
Սույն քրեական գործով բացակայում են համաներման մասին հիշյալ որոշման 9-րդ կետում նշված այն սահմանափակումները, որոնք կարող են արգելք հանդիսանալ ամբաստանյալների նկատմամբ համաներման ակտի կիրառման համար:
Համաներման որոշման 13-րդ կետի 1-ին ենթակետի ՙա՚ պարբերության համաձայն, որոշման կատարումը վերապահվել է դատարաններին` այն անձանց նկատմամբ, որոնց վերաբերյալ գործերը գտնվում են դատարաններում, սակայն մինչև սույն որոշումն ուժի մեջ մտնելը չեն քննվել, կամ այն անձանց նկատմամբ, որոնց վերաբերյալ գործերը քննվել են, բայց դատավճիռներն օրինական ուժի մեջ չեն մտել:
Հիմք ընդունելով վերը նշվածը, դատարանը գտնում է, որ ամբաստանյալ Լյուդվիգ Հովհաննիսյանի նկատմամբ կիրառելի է ՀՀ Ազգային Ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշումը:
Դատարանը գտնում է, որ տուժող Ջուլետա Մկրտչյանի և Ավետիս Ազարյանի քաղաքացիական հայցերի հարցը պետք է համարել լուծված, նկատի ունենալով, որ հատուցվել է հանցագործություններով պատճառված վնասը և նրանք ամբաստանյալից որևէ նյութական պահանջ չունեն, որի մասին տուժողները հայտնել են դատական քննության ժամանակ:
Նման պայմաններում դատարանը գտնում է, որ քննիչի 22.11.2011թ.-ի որոշմամբ Լյուդվիգ Գրիգորի Հովհաննիսյանի անվամբ ընդհանուր համատեղ սեփականության իրավունքով գրանցված Կոտայքի մարզի Առինջ համայնքի 8-րդ փող. թիվ 18 հասցեի բնակելի տան և բնակելի կառուցապատման հողամասի վրա դրված կալանքը պետք է վերացնել:
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո քննիչի 19.10.2012թ.-ի որոշմամբ իրեղեն ապացույց ճանաչված և տուժող Ջուլետա Մկրտչյանին ի պահ հանձնված 2 հատ ՙRexona՚ տեսակի կոսմետիկ միջոցները, 2 հատ շրթներկը, 1 հատ ծաղկի տեսքով կոսմետիկ միջոցը, 2 հատ մատիտները, 1 հատ ՙA.ME՚ գրառմամբ, 1 հատ ՙBelle Jardin՚ գրառմամբ քսուքները, 1 հատ դեմքի փայլը, 1 հատ օճառը, 1 հատ մանիկյուռը, 1 հատ օդեկոլոնը, 2 հատ աչքի տուշերը, 2 հատ կոսմետիկ մատիտները, 3 հատ դեմքի փոշիները, 1 հատ կանացի պայուսակը, 6 հատ կրակայրիչները, 4 հատ ծոցատետրերը, 4 հատ գրիչները, 2 հատ կանացի ներքնաշորերը, 2 հատ հայելին, 10 հատ պահպանակները, 2 հատ ՙPant Oil՚ տեսակի միանգամյա օգտագործման օճառապղպջակները /շամպուն/, 3 հատ պլաստմասե տարաներով մարգանցովկան, 1 հատ սանրը, 1 հատ գրպանի դանակը, 1 հատ ունելին, 1 հատ մկրատները, 1 հատ ասեղը, 1 հատ գունավոր քարերով վզնոցը, 1 հատ դեղին մետաղից շղթան, 2 հատ մատանիները, 1 հատ կայծակ ճարմանդը, 1 հատ ՙSimens AF51՚ մոդելի, 1 հատ ՙNokia՚ տեսակի, 1 հատ ՙSony Ericsson՚ մոդելի բջջային հեռախոսները, 1 հատ ՙDOLCE&GABBANA՚ տեսակի տաբատը, 1 հատ կանացի վերնազգեստը, 1 հատ կիսաշրջազգեստը, 1003,16 դրամին համարժեք ՙերկու եվրո՚ մետաղադրամը և ՙSamsung D-900՚ մոդելի բջջային հեռախոսը պետք է թողնել Ջուլետա Մկրտչյանի տնօրինությանը:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 365, 369-373 հոդվածներով և hիմք ընդունելով ՀՀ Ազգային ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշումը, դատարանը

Վ Ճ Ռ Ե Ց

Լյուդվիգ Գրիգորի Հովհաննիսյանին մեղավոր ճանաչել ՀՀ քրեական օրենսգրքի 177 հոդվածի 2-րդ մասի 2-րդ կետով և ՀՀ քրեական օրենսգրքի 176 հոդվածի 1-ին մասով նախատեսված հանցանքներ կատարելու մեջ:
ՀՀ քրեական օրենսգրքի 177 հոդվածի 2-րդ մասի 2-րդ կետով Լյուդվիգ Գրիգորի Հովհաննիսյանին դատապարտել ազատազրկման երկու (2) տարի ժամկետով: ՀՀ քրեական օրենսգրքի 176 հոդվածի 1-ին մասով Լյուդվիգ Գրիգորի Հովհաննիսյանին դատապարտել ազատազրկման մեկ (1) տարի ժամկետով:
ՀՀ քրեական օրենսգրքի 66 հոդվածի հիման վրա, հանցանքների համակցությամբ պատիժները մասնակիորեն գումարելու միջոցով Լյուդվիգ Գրիգորի Հովհաննիսյանի նկատմամբ վերջնական պատիժ նշանակել ազատազրկում երկու (2) տարի վեց (6) ամիս ժամկետով:
Կիրառել ՀՀ Ազգային Ժողովի ՙՀայաստանի Հանրապետության անկախության հռչակման 22-րդ տարեդարձի կապակցությամբ համաներում հայտարարելու մասին՚ 2013 թվականի հոկտեմբերի 3-ի որոշման 1-ին կետի 3-րդ ենթակետը և Լյուդվիգ Գրիգորի Հովհաննիսյանին ազատել պատժից:
Լյուդվիգ Հովհաննիսյանի նկատմամբ կիրառված խափանման միջոցը` կալանավորումը վերացնել և նրան անհապաղ ազատել կալանքից դատական նիստի դահլիճում:
Տուժողներ Ջուլետա Մկրտչյանի և Ավետիս Ազարյանի քաղաքացիական հայցերի հարցը համարել լուծված:
Դատավճիռն օրինական ուժի մեջ մտնելուց հետո իրեղեն ապացույց հանդիսացող և տուժող Ջուլետա Մկրտչյանին ի պահ հանձնված 2 հատ ՙRexona՚ տեսակի կոսմետիկ միջոցները, 2 հատ շրթներկը, 1 հատ ծաղկի տեսքով կոսմետիկ միջոցը, 2 հատ մատիտները, 1 հատ ՙA.ME՚ գրառմամբ, 1 հատ ՙBelle Jardin՚ գրառմամբ քսուքները, 1 հատ դեմքի փայլը, 1 հատ օճառը, 1 հատ մանիկյուռը, 1 հատ օդեկոլոնը, 2 հատ աչքի տուշերը, 2 հատ կոսմետիկ մատիտները, 3 հատ դեմքի փոշիները, 1 հատ կանացի պայուսակը, 6 հատ կրակայրիչները, 4 հատ ծոցատետրերը, 4 հատ գրիչները, 2 հատ կանացի ներքնաշորերը, 2 հատ հայելին, 10 հատ պահպանակները, 2 հատ ՙPant Oil՚ տեսակի միանգամյա օգտագործման օճառապղպջակները /շամպուն/, 3 հատ պլաստմասե տարաներով մարգանցովկան, 1 հատ սանրը, 1 հատ գրպանի դանակը, 1 հատ ունելին, 1 հատ մկրատները, 1 հատ ասեղը, 1 հատ գունավոր քարերով վզնոցը, 1 հատ դեղին մետաղից շղթան, 2 հատ մատանիները, 1 հատ կայծակ ճարմանդը, 1 հատ ՙSimens AF51՚ մոդելի, 1 հատ ՙNokia՚ տեսակի, 1 հատ ՙSony Ericsson՚ մոդելի բջջային հեռախոսները, 1 հատ ՙDOLCE&GABBANA՚ տեսակի տաբատը, 1 հատ կանացի վերնազգեստը, 1 հատ կիսաշրջազգեստը, 1003,16 դրամին համարժեք ՙերկու եվրո՚ մետաղադրամը և ՙSamsung D-900՚ մոդելի բջջային հեռախոսը թողնել Ջուլետա Մկրտչյանի տնօրինությանը:
Լյուդվիգ Գրիգորի Հովհաննիսյանի անվամբ ընդհանուր համատեղ սեփականության իրավունքով գրանցված Կոտայքի մարզ, Առինջ համայնքի 8-րդ փող. թիվ 18 հասցեի բնակելի տան և բնակելի կառուցապատման հողամասի վրա դրված կալանքը վերացնել:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:
Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան