ԵԱՔԴ/0028/01/13


Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր` Լ. Ավետիսյան
քարտուղարությամբ` Ն. Ղազարյանի
մասնակցությամբ
մեղադրող` Հ. Հարությունյանի
պաշտպան` Ա. Քոչարյանի
տուժողի ներկայացուցիչ` Վ. Եսաֆյանի


2013 թվականի մարտի 15-ին, Երևան քաղաքում, դռնբաց դատական նիստում, դատական քննության արագացված կարգով, քննեց քրեական գործն ըստ մեղադրանքի Սամվել Արմենի Սարգսյանի, ծնված 1991 թվականի օգոստոսի 23-ին, Արարատի մարզի Արարատ քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, նախկինում չդատված, ծառայել է ՀՀ ՊՆ թիվ 68617 զորամասում որպես ժամկետային զինծառայող, կոչումով սերժանտ, 09.12.2011թ. ծառայության ժամկետը լրանալու կապակցությամբ զորացրվել է ՀՀ զինված ուժերից, հաշվառված և բնակվել է Արարատի մարզի Արարատ քաղաքի Աբովյան փողոցի 7 շենքի թիվ 1 բնակարան հասցեում, մեղադրվում է ՀՀ քրեական օրենսգրքի 179 հոդվածի 2-րդ մասի 1-ին, 2-րդ և 3-րդ կետերով, կալանքի տակ է 2012 թվականի սեպտեմբերի 5-ից:

Պ Ա Ր Զ Ե Ց

1.Գործի դատավարական նախապատմությունը.
2012թ. փետրվարի 18-ին ՀՀ ՊՆ ՀԿԳ քննչական բաժնում ՀՀ քրեական օրենսգրքի 177 հոդվածի 2-րդ մասի 3-րդ կետով նախատեսված հանցագործության հատկանիշներով հարուցվել է թիվ 90150512 քրեական գործը:
Նախաքննության մարմնի 2012թ. մայիսի 02-ի որոշմամբ Արթուր Սիմոնի Ղուլյանը ներգրավվել է որպես մեղադրյալ ՀՀ քրեական օրենսգրքի 375 հոդվածի 1-ին մասով, 367 հոդվածի 1-ին մասով և 179 հոդվածի 3-րդ մասի 1-ին կետով: Դատարանի որոշմամբ նրա նկատմամբ որպես խափանման միջոց կիրառվել է կալանավորումը:
2012թ. մայիսի 05-ի որոշմամբ էդգար Գագիկի Աղաբեկյանը ներգրավվել է որպես մեղադրյալ ՀՀ քրեական օրենսգրքի 367 հոդվածի 1-ին մասով:
2012թ. մայիսի 05-ի որոշմամբ Արման Հրանտի Մանուկյանը ներգրավվել է որպես մեղադրյալ ՀՀ քրեական օրենսգրքի 367 հոդվածի 1-ին մասով:
2012թ. մայիսի 5-ի որոշմամբ Սպարտակ Գագիկի Վարդանյանը ներգրավվել է որպես մեղադրյալ ՀՀ քրեական օրենսգրքի 367 հոդվածի 1-ին մասով:
2012թ. մայիսի 12-ի որոշմամբ Հենզել Մնացականի Գալստյանը ներգրավվել է որպես մեղադրյալ ՀՀ քրեական օրենսգրքի 367 հոդվածի 1-ին մասով:
2012թ. մայիսի 22-ին որոշմամբ Արթուր Լևոնի Վարդանյանը ներգրավվել է որպես մեղադրյալ ՀՀ քրեական օրենսգրքի 38-179 հոդվածի 3-րդ մասի 1-ին կետով:
2012թ. մայիսի 29-ի որոշմամբ Մուշեղ Արայի Մահորյանը ներգրավվել է որպես մեղադրյալ ՀՀ քրեական օրենսգրքի 179 հոդվածի 3-րդ մասի 1-ին կետով և 367 հոդվածի 1-ին մասով:
2012թ. մայիսի 30-ի որոշմամբ Սամվել Արմենի Սարգսյանը ներգրավվել է որպես մեղադրյալ ՀՀ քրեական օրենսգրքի 375 հոդվածի 1-ին մասով, 367 հոդվածի 1-ին մասով և 179 հոդվածի 3-րդ մասի 1-ին կետով, նրա նկատմամբ հայտարարվել է հետախուզում և որպես խափանման միջոց կիրառվել կալանավորումը:
2012թ. հուլիսի 20-ի որոշմամբ Մխիթար Հակոբի Ճավռշյանը ներգրավվել է որպես մեղադրյալ ՀՀ քրեական օրենսգրքի 367 հոդվածի 1-ին մասով:
2012թ. սեպտեմբերի 05-ին Սամվել Արմենի Սարգսյանը ՌԴ-ում հայտնաբերվել և ձերբակալվել է:
2012թ. սեպտեմբերի 10-ի որոշումներով Մխիթար Հակոբի Ճավռշյանին նախկինում առաջադրված մեղադրանքի մասը վերացվել, այն փոփոխվել և նրան նոր մեղադրանք է առաջադրվել ՀՀ քրեական օրենսգրքի 179 հոդվածի 2-րդ մասի 3-րդ կետով, էդգար Գագիկի Աղաբեկյանին նախկինում առաջադրված մեղադրանքի մասը վերացվել, այն փոփոխվել և նրան նոր մեղադրանք է առաջադրվել ՀՀ քրեական օրենսգրքի 179 հոդվածի 2-րդ մասի 3-րդ կետով, Սպարտակ Գագիկի Վարդանյանին նախկինում առաջադրված մեղադրանքի մասը վերացվել, այն փոփոխվել և նրան նոր մեղադրանք է առաջադրվել ՀՀ քրեական օրենսգրքի 179 հոդվածի 2-րդ մասի 3-րդ կետով, Հենզել Մնացականի Գալստյանին նախկինում առաջադրված մեղադրանքի մասը վերացվել, այն փոփոխվել և նրան նոր մեղադրանք է առաջադրվել ՀՀ քրեական օրենսգրքի 179 հոդվածի 2-րդ մասի 3-րդ կետով, Արման Հրանտի Մանուկյանին նախկինում առաջադրված մեղադրանքի մասը վերացվել, այն փոփոխվել և նրան նոր մեղադրանք է առաջադրվել ՀՀ քրեական օրենսգրքի 179 հոդվածի 2-րդ մասի 3-րդ կետով:
2012թ. սեպտեմբերի 13-ի որոշմամբ Արթուր Լևոնի Վարդանյանին նախկինում առաջադրված մեղադրանքը փոփոխվել, լրացվել և նրան նոր մեղադրանք է առաջադրվել ՀՀ քրեական օրենսգրքի 38-179 հոդվածի 2-րդ մասի 2-րդ և 3-րդ կետերով:
Նախաքննության մարմնի 2012թ. սեպտեմբերի 15-ի որոշմամբ թիվ 90150512 քրեական գործի վարույթից անջատվել է ՀՀ քրեական օրենսգրքի 179 հոդվածի 2-րդ մասի 1-ին, 2-րդ և 3-րդ կետերով մեղադրյալ Սամվել Արմենի Սարգսյանի վերաբերյալ մասը, գործն առանձնացվել է առանձին վարույթում և շնորհվել 90153512 համարը:
2012թ. սեպտեմբերի 20-ի որոշումներով Մուշեղ Արայի Մահորյանին նախկինում առաջադրված մեղադրանքի մասը վերացվել, առաջադրված մեղադրանքը փոփոխվել, լրացվել և նրան նոր մեղադրանք է առաջադրվել ՀՀ քրեական օրենսգրքի 179 հոդվածի 2-րդ մասի 2-րդ և 3-րդ կետերով, Արթուր Սիմոնի Ղուլյանին նախկինում առաջադրված մեղադրանքի մասերը վերացվել, առաջադրված մեղադրանքը փոփոխվել, լրացվել և նրան նոր մեղադրանք է առաջադրվել ՀՀ քրեական օրենսգրքի 179 հոդվածի 2-րդ մասի 1-ին, 2-րդ և 3-րդ կետերով:
2012թ. հոկտեմբերի 03-ի որոշմամբ Սամվել Արմենի Սարգսյանին նախկինում առաջադրված մեղադրանքի մասերը վերացվել, առաջադրված մեղադրանքը փոփոխվել, լրացվել և նրան նոր մեղադրանք է առաջադրվել ՀՀ քրեական օրենսգրքի 179 հոդվածի 2-րդ մասի 1-ին, 2-րդ և 3-րդ կետերով:
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության 2012 թվականի դեկտեմբերի 28-ի դատավճռով Արթուր Ղուլյանը, Մուշեղ Մահորյանը, Սպարտակ Վարդանյանը, Արման Մանուկյանը, էդգար Աղաբեկյանը, Հենզել Գալստյանը, Մխիթար Ճավռշյանը և Արթուր Վարդանյանը դատապարտվել են:
2012թ. փետրվարի 07-ին Սամվել Արմենի Սարգսյանը տեղափոխվել է ՙՆուբարաշեն՚ ՔԿՀ:
Դատարանի 2012թ. փետրվարի 08-ի որոշմամբ վերահաստատվել է Սամվել Արմենի Սարգսյանի նկատմամբ կալանավորումը խափանման միջոց երկու ամիս ժամկետով ընտրելու մասին դատարանի 30.05.2012թ. որոշումը:
2013թ. փետրվարի 21-ին թիվ 90153512 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Սամվել Արմենի Սարգսյանին ՀՀ քրեական օրենսգրքի 179 հոդվածի 2-րդ մասի 1-ին, 2-րդ և 3-րդ կետերով մեղադրանք է առաջադրել այն արարքի կատարման համար, որ նա ծառայությունը կրելով ՀՀ ՊՆ թիվ 68617 զորամասի 1-ին հրաձգային գումարտակի 1-ին հրաձգային վաշտում որպես հրաձիգ, կոչումով սերժանտ, հանդիսանալով պաշտոնատար անձ, 2011թ. հուլիսի 18-ին զորամասի հրամանատարի 18.07.2011թ. թիվ 451 հրամանի համաձայն, թվով 15 այլ զինծառայողների հետ միասին ծառայության նշանակվելով Երևան քաղաքի Օրբելու փողոցի թիվ 29 հասցեում տեղակայված ՌԴ նախկին հոսպիտալի տարածքում, 2011թ. հուլիս-օգոստոս ամիսների տարբեր օրերին, պաշտոնեական դիրքն օգտագործելով, նախնական համաձայնության գալով մի խումբ անձանց հետ, կատարել է իրեն վստահված ուրիշի գույքի խոշոր չափերի հափշտակություն՝ յուրացում:
Այն է` նախնական համաձայնության գալով նույն զորամասի 1-ին հրաձգային գումարտակի 1-ին հրաձգային վաշտի ժամկետային զինծառայող, Մուշեղ Մահորյանի և ՀՀ ՊՆ թիվ 68617 զորամասը սպասարկող աղբատար ԳԱԶ-53 մակնիշի 423 ՏՍ 63 պետհամարանիշի ավտոմեքենայի վարորդ Արթուր Վարդանյանի հետ, վերը նշված բուժական հաստատության շենք-շինություններում առկա АМН 160 SB4/16 3002 Р0 5 կվտ տեսակի 200.000 դրամ արժողությամբ էլեկտրական շարժիչը, դրան սնուցող 20մ երկարությամբ КПЛ 18хо0,75 տեսակի 16.000 ՀՀ դրամ արժողությամբ մալուխը, К90/20 տեսակի երկուական պոմպերը, յուրաքանչյուրը 160.000-ական դրամ արժողությամբ և К45/30 տեսակի երկուական պոմպերը, յուրաքանչյուրը 140.000-ական դրամ արժողությամբ, շարքային Մ.Մահորյանի հետ ապամոնտաժելով հափշտակել, տեղավորել են Ա.Վարդանյանին ամրակցված ԳԱԶ 53 մակնիշի 423 ՏԱ 63 պետհամարանիշի աղբատար ավտոմեքենայի մեջ ու նրա օժանդակությամբ, գողոնը վաճառելու նպատակով զորամասի տարածքից դուրս են հանել և տեղափոխելով Արարատի մարզի Այնթափ ավանում տեղակայված մետաղի ընդունման կետ` որպես ջարդոն հանձնել են:
Այնուհետև, նույն ժամանակահատվածում շարունակելով հանցավոր գործունեությունը, Ս.Սարգսյանը նախնական համաձայնության գալով նույն շարքային Մ.Մահորյանի, վարորդ Ա.Վարդանյանի և ՀՀ ՊՆ թիվ 68617 զորամասի զինծառայող, վաշտի հրամանատար, հոսպիտալում որպես ավագ նշանակված կապիտան Արթուր Ղուլյանի հետ, վերջիններիս հետ համատեղ հանցագործության մեջ ներգրավելով նաև հոսպիտալի տարածքում ծառայություն իրականացնող պարտադիր ժամկետային զինծառայողներ, շարքայիններ Սպարտակ Վարդանյանին, էդգար Աղաբեկյանին, Արման Մանուկյանին, Հենզել Գալստյանին և Մխիթար Ճավռշյանին, դարձյալ կատարել են իրենց վստահված ուրիշի գույքի խոշոր չափերի հափշտակություն.
Այն է` վերը նշված հասցեում տեղակայված շենք-շինությունների տարբեր հարկաբաժինների հիվանդասենյակներից հատուկ հարմարեցված փայտով լուսամուտագոգերի տակից ջարդելու, պոկելու և ԳԱԶ-53 մակնիշի 423 ՏԱ 63 պետհամարանիշի ավտոմեքենայի բեռնախցիկում տեղավորելու միջոցով հափշտակել են թուջե օգտագործված թվով 3113 հատ ջեռուցման մարտկոցներ, դրանք տեղավորել Արթուր Վարդանյանին ամրակցված ավտոմեքենայի բեռնախցիկի մեջ, կապիտան Ա.Ղուլյանի և շարժային Մ.Մահորյանի հետ տեղափոխել ու որպես ջարդոն հանձնել են Արարատի մարզի Այնթափ ավանում տեղակայված մետաղի ընդունման կետ և ստացված գումարն օգտագործել անձնական կարիքների համար` հափշտակելով խոշոր չափերի հասնող` 2.279.110 ՀՀ դրամ արժեքի գույք:
3. Արագացված դատական քննություն.
Մինչև դատաքննությունն սկսելն ամբաստանյալ Սամվել Արմենի Սարգսյանը միջնորդեց դատական քննությունն անցկացնել արագացված կարգով և հայտարարեց, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու բնույթն ու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո: Միջնորդությունը հաստատեց նաև ամբաստանյալի պաշտպան Արտակ Քոչարյանը:
Մեղադրող Հ.Հարությունյանը մեղադրական եզրակացությունը հաստատելիս դատական քննության արագացված կարգ կիրառելուն առարկել էր, սակայն դատարանում փոխելով դիրքորոշումը, դատական քննության արագացված կարգ կիրառելուն չառարկեց:
Տուժողի ներկայացուցիչ Վիգեն Եսաֆյանը նույնպես դատական քննության արագացված կարգ կիրառելուն չառարկեց:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննության անցկացնելու մասին:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Սամվել Արմենի Սարգսյանին առաջադրված մեղադրանքը ՀՀ քրեական օրենսգրքի 179 հոդվածի 2-րդ մասի 1-ին, 2-րդ և 3-րդ կետերով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 179 հոդվածի 2-րդ մասի 1-ին, 2-րդ և 3-րդ կետերին և արարքի որակումը ճիշտ է:
Ամբաստանյալի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ Սամվել Սարգսյանի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ հանցանքն ընդունել և զղջում է կատարած արարքի համար, նախկինում դատված չի եղել, երիտասարդ է, վերականգնված է հանցագործությամբ պետությանը պատճառված նյութական վնասը:
Ամբաստանյալ Սամվել Սարգսյանի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալը ենթակա է քրեական պատասխանատվության և պատժի:
ՀՀ քրեական օրենսգրքի 61 հոդվածի 3-րդ մասի համաձայն, հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները:
Հաշվի առնելով Սամվել Սարգսյանի կատարած արարքի հանրության համար վտանգավորության աստիճանը և բնույթը, նրա անձը, նրան բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 179 հոդվածի 2-րդ մասի սանկցիայով նախատեսված է պատիժ նաև տուգանքի ձևով և պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, դատարանը գտնում է, որ ամբաստանյալ Սամվել Արմենի Սարգսյանի նկատմամբ պատիժ պետք է նշանակել տուգանքի ձևով:
Հաշվի առնելով, որ տուժողի ներկայացուցիչ Վ.Եսաֆյանը հայտնեց, որ հանցագործությամբ անմիջականորեն պատճառված վնասը վերականգնված է և խնդրեց իրեն իրավունք վերապահել քաղաքացիական հայցի խախտված իրավունքը վերականգնելուն ուղղված ծախսերի հատուցման հարցը լուծել քաղաքացիական դատավարության կարգով, դատարանը գտնում է, որ տուժողի ներկայացուցչին պետք է իրավունք վերապահել քաղաքացիական դատավարության կարգով դիմելու դատարան:
Դատարանը միաժամանակ պարզաբանում է, որ ՀՀ քրեական դատավարության օրենսգրքի 155 հոդվածի 2-րդ մասի համաձայն, քրեական դատավարությունում քաղաքացիական հայց չհարուցելու դեպքում անձն իրավունք ունի քաղաքացիական հայց հարուցել քաղաքացիական դատավարության կարգով:
Դատարանը գտնում է, որ իրեղեն ապացույց ճանաչված թուջե 2 մարտկոցների տնօրինման հարցը պետք է համարել լուծված, նկատի ունենալով, որ նախորդ դատավճռով այն տնօրինվել է:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 3753 և 3754 հոդվածներով, դատարանը

Վ Ճ Ռ Ե Ց

Սամվել Արմենի Սարգսյանին մեղավոր ճանաչել ՀՀ քրեական օրենսգրքի 179 հոդվածի 2-րդ մասի 1-ին, 2-րդ և 3-րդ կետերով նախատեսված հանցանք կատարելու մեջ և նրան դատապարտել տուգանքի նվազագույն աշխատավարձի վեցհարյուրապատիկի` վեց հարյուր հազար (600.000) ՀՀ դրամի չափով:
Սամվել Արմենի Սարգսյանի նկատմամբ որպես խափանման միջոց կիրառված կալանավորումը վերացնել և նրան անհապաղ ազատել կալանքից դատական նիստի դահլիճում:
Տուժողի ներկայացուցիչ Վ.Եսաֆյանին իրավունք վերապահել խախտված իրավունքը վերականգնելուն ուղղված ծախսերի հատուցման պահանջով քաղաքացիական դատավարության կարգով դիմել դատարան:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:

Դատավորª ստորագրություն
Բնագրի հետ ճիշտ է
Դատավոր Լ. Ավետիսյան