ԵԱՔԴ/0026/01/13

Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանըª

նախագահող դատավոր Լ. Ավետիսյան
քարտուղարությամբ` Ն. Ղազարյանի, Հ. Թադևոսյանի
մասնակցությամբ
մեղադրող` Դ. Կարապետյանի


2013 թվականի ապրիլի 9-ին, Երևան քաղաքում, դռնբաց դատական նիստում քննեց քրեական գործն ըստ մեղադրանքի Գևորգ Սերյոժայի Նիկողոսյանի, ծնված 1986 թվականի ապրիլի 11-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, նախկինում դատված` Երևանի Ավան և Նոր-Նորք վարչական շրջանների ընդհանուր իրանասության դատարանի 26.03.2010թ.-ի դատավճռով ՀՀ քրեական օրենսգրքի 112 հոդվածի 1-ին մասով դատապարտվել է ազատազրկման 4 տարի ժամկետով, ՀՀ վերաքննիչ քրեական դատարանի 19.05.2010թ. որոշմամբ դատավճիռը փոփոխվել է և նա դատապարտվել է ազատազրկման 3 տարի ժամկետով: 14.07.2011թ.-ին կիրառվել է 26.05.2011թ. համաներման ակտը, պատիժը կրճատվել և սահմանվել է ազատազրկում 2 տարի 7 ամիս 26 օր ժամկետով, պատիժը լրիվ կրելով ազատվել է 07.06.2012թ.-ին, դատվածությունը չմարված, չի աշխատում, հաշվառված և բնակվում է Երևան քաղաքի Մառի փողոցի 18 շենքի թիվ 35 բնակարան հասցեում, մեղադրվում է ՀՀ քրեական օրենսգրքի 263 հոդվածի 1-ին մասով, որպես խափանման միջոց է կիրառվել չհեռանալու մասին ստորագրությունը,

Պ Ա Ր Զ Ե Ց

1.Գործի դատավարական նախապատմությունը.
2013 թվականի հունվարի 8-ին ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթունի քննչական բաժնում ՀՀ քրեական օրենսգրքի 263 հոդվածի 1-ին մասով նախատեսված հանցագործության հատկանիշներով հարուցվել է թիվ 09100513 քրեական գործը:
Նախաքննական մարմնի 2013 թվականի հունվարի 31-ի որոշմամբ Գևորգ Սերյոժայի Նիկողոսյանը ներգրավվել է որպես մեղադրյալ ՀՀ քրեական օրենսգրքի 263 հոդվածի 1-ին մասով, նրա նկատմամբ որպես խափանման միջոց է ընտրվել չհեռանալու մասին ստորագրությունը:
2013 թվականի փետրարի 21-ին թիվ 09100513 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Գևորգ Սերյոժայի Նիկողոսյանին մեղադրանք է առաջադրել այն արարքի կատարման համար, որ նա 2012 թվականի սեպտեմբեր-հոկտեմբեր ամիսներին, համացանցի ՙՕդնոկլասսնիկի՚ վեբ կայքի ՙxxxARMINKAxxx՚ և ՙPU4URIK LILUSHIK՚ պայմանական անուններով իր կողմից օգտագործվող նույն էջում, տեղադրել է թվով 1 հատ պոռնկագրական բնույթի տեսահոլովակ և մինչև 2012 թվականի դեկտեմբերի 13-ը համացանցում տարբեր անձանց հետ շփվելու եղանակով տարածել դրանք:
3.Ապացույցների հետազոտում.
Առաջադրված մեղադրանքում Գևորգ Նիկողոսյանն իրեն մեղավոր ճանաչեց մասնակիորեն և ցուցմունք տվեց այն մասին, որ ազատ ժամանակ զբաղվում է www.odnoklassniki.ru վեբ կայքում առկա խաղերով: 2011 թվականին հեռախոսազրույցով պատահական ծանոթացել է Արմինկա անունով մի աղջկա հետ, որին նրա իսկ խնդրանքով անվանել է Լիլուշիկ: Իր խնդրանքով Լիլուշիկն իրեն տրամադրել է www.odnoklassniki.ru կայքի ՙPU4URIK LILUSHIK՚ պայմանական անունով էջը: Լիլուշիկի հետ ինքը չի հանդիպել, չգիտի նրա ով լինելը, հեռախոսային խոսակցությունների ժամանակ տեղեկացել է, որ նա աշխատել է Կենտրոն վարչական շրջանում գտնվող ինչ-որ պայուսակների խանութում: Նշված էջն իր կողմից օգտագործվելիս դրանում արդեն ներբեռնված են եղել իրեն անծանոթ տարբեր աղջիկների լուսանկարներ, որոնք ինքը չի ջնջել: Նշված կայքում 2012թ.-ի սեպտեմբեր-հոկտեմբեր ամիսների ընթացքում ներբեռնել է պոռնկագրական բնույթի մեկ տեսահոլովակ: Ինքը կայքից չի հասկանում, միտումնավոր ոչինչ չի արել, պարզապես թյուրիմացաբար կարող է ՙդաբավիծ՚ է տվել: Ոստիկանները ևս տեսել են, որ ինքն այդ վիդեոին ուղարկված հաղորդագրություններին չի պատասխանել: ՙLILUSHIK՚-ի էջում է եղել այդ տեսահոլովակը, որի պրոֆիլը բաց էր և կարող էին տեսնել բոլորը: Մինչև ՀՀ ոստիկանության ԿՀԴՊԳ վարչության աշխատակիցների կողմից իրեն հայտնաբերելը էջի անվանումը ՙPU4URIK LILUSHIK՚-ից վերանվանվել է ՙxxxARMINKAxxx՚-ի, որի վերաբերյալ իրեն ոչին հայտնի չէ: Ինքը Է.Խաչատրյանին չի ճանաչում և չգիտի, որ նշված էջում առկա լուսանկարներից 2-ը եղել են նրա անձնական նկարները:
Ամբաստանյալին մեղսագրված հանցանքը հիմնավորվել է նաև հետևյալ ապացույցներով.
Վկա Էվելինա Համլետի Խաչատրյանի ցուցմունքով այն մասին, որ 2012 թվականի սեպտեմբերի 18-ին, իրեն զանգահարել է Արմեն անունով իր ծանոթներից մեկը, ով ապրում է ՌԴ Մոսկվա քաղաքում և տեղեկացրել, որ համացանցում տեսել է իր անձնական լուսանկարներով ՙPU4URIK LILUSHIK՚ պայմանական անունով մի էջ: Ինքն անմիջապես մտել է համացանցի www.odnoklassniki.ru իր անձնական կայքով փնտրել, գտել է նշված էջը և տեսել, որ էջի գլխավոր նկարի տեղում դրված է իր անձնական լուսանկարը, որը նկարվել է 2009թ.-ին իրենց տանը, կարճ շորտով բազկաթոռին նստած: Բացի դրանից նշված էջում տեսել է իր անձնական նկարներից ևս մեկ նկար, որը նկարվել է 2010թ.-ին` լողազգեստով գետի ափին, քարերի վրա: Նշված լուսանկարներն ինքը համացանցի իր www.odnoklassniki.ru կայքի էջում տեղադրել է մեկ անգամ կարճ ժամանակով, ապա ջնջել, որպեսզի ամուսինը և երեխաները չտեսնեն: Այդ լուսանկարներն ինքը ուրիշ ոչ մեկի ցույց չի տվել: Իր կարծիքով հնարավոր է, որ ինչ որ մեկը համացանց ներբեռնած ժամանակ քաշել է իր էջից: Ինքը հաղորդագրություն է ուղարկել ՙPU4URIK LILUSHIK՚ էջին, պահանջել ջնջել իր լուսանկարները, սակայն իր պահանջը չի կատարվել: Զննելով նշված էջը տեսել է, որ իր նկարներից բացի շատ աղջիկների նկարներ կային: ՙՎիդոներ՚ բաժնում կար պոռնկագրական բնույթի տեսահոլովակ: Իր ծանոթները և ինքը մի քանի անգամ գրել են նրան, սակայն պատասխան չեն ստացել: Դիմել է ոստիկանություն:
Վկա Գարիկ Գուրգենի Առաքելյանի ցուցմունքով այն մասին, որ ճանաչում է Գևորգ Սերյոժայի Նիկողոսյանին, ով հանդիսանում է իր հորաքրոջ տղան: 2012թ. ամռանը գնել է համակարգիչ և իր հարևան Արմեն Բաղդասարյանի թույլտվությամբ օգտվել վերջինիս ՙU!.com՚ ինտերնետային ծառայությունից: 2012թ. աշնան ամիսներին իր հորաքրոջ որդին` Գևորգ Նիկողոսյանը հաճախակի այցելել է իրենց տուն, երբեմն նաև գիշերել է իրենց տանը և իր համակարգչից օգտվելով մտել համացանց: Նշված ժամանակահատվածում ինքը նկատել է, որ Նիկողոսյանը բացի իր անձնական տվյալներով www.odnoklassniki.ru վեբ կայքից օգտագործում է նաև ևս մեկ կայք, որը գրանցված է եղել մի աղջկա տվյալներով: Ինքն ուշադրություն չի դարձրել դրան և Գևորգին դրա վերաբերյալ հարցեր չի տվել: Տեսահոլովակը տեսել է, բայց չի հիշում թե որ կայքում: Այն մերկ աղջիկների մասնակցությամբ տեսահոլովակ էր` պոռնկագրական բնույթի: Այդ տեսահոլովակը Գևորգը չի գցել, չգիտի թե ով է գցել:
Վկա Արմեն Արտյոմի Բաղդասարյանի ցուցմունքով այն մասին, որ ճանաչում է Գևորգ Նիկողոսյանին, ով հանդիսանում է իր հարևան Գարիկ Առաքելյանի ազգականը: Գ.Նիկողոսյանին հաճախակի հանդիպել է Գ.Առաքելյանի տուն հյուր գնալիս և տեսել է, որ վերջինս օգտվում է Գ.Առաքելյանի համակարգչից, ում ինքը տրամադրել է իր ՙU!.com՚ ինտերնետային ծառայությունը: Նկատել է, որ Գ.Նիկողոսյանն օգտագործում է ՙLILUSHIK՚ անունով, աղջկա նկարով կայք: Գևորգն ուներ նաև իր էջը, որտեղ մի անգամ իրեն խնդրել է նրա նկարը գցել, քանի որ ինքը չէր կարողանում: Չի հիշում կայքում ներբեռնված նկարները և այդ կայքում առկա պոռնկագրական բնույթի տեսահոլովակի մասին նույնպես ոչինչ հայտնի չի եղել:
Գևորգ Նիկողոսյանի կողմից օգտագործված ՙPU4URIK LILUSHIK՚-ից ՙxxxARMINKAxxx՚-ի վերանվանված վեբ կայքի զննության արձանագրությամբ, համաձայն որի նշված էջի վիդիոներ բաժնում առկա են թվով 23 տեսահոլովակներ, որոնց շարքում առկա է ՙparty 1.mp4՚ գրառումով տեսահոլովակը: Տեսահոլովակի վերևի աջ անկյունում պատկերված է այն դիտած և ՙՄեկնաբանություններ՚ կատարած օգտատերերի քանակը, որոնց ընդհանուր թիվը կազմում է զննության պահին 403, իսկ տեսահոլովակը դիտած և ՙԿլասս՚ տված օգտատերերի քանակը` 2001:
Փորձագետի հմ. 02122 եզրակացությամբ, համաձայն որի փորձաքննությանը ներկայացված` Գ.Նիկողոսյանի կողմից օգտագործված www.odnoklassniki.ru վեբ կայքից տեսաձայնագրված DVD-R սկավառակում առկա տեսահոլովակը հանդիսանում է պոռնկագրական բնույթի:
4.Դատարանի իրավական վերլուծությունները.
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ, դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալ Գևորգ Նիկողոսյանը կատարել է հանցավոր արարք, որը համապատասխանում է ՀՀ քրեական օրենսգրքի 263 հոդվածի 1-ին մասի հատկանիշներին:
Կատարած արարքի համար ամբաստանյալ Գևորգ Սերյոժայի Նիկողոսյանը ենթակա է քրեական պատասխանատվության և պատժի:
Ամբաստանյալ Գևորգ Նիկողոսյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ Գևորգ Նիկողոսյանի անձը բնութագրող, պատասխանատվությունը և պատիժը մեղմացնող հանգամանքներ դատարանը դիտում է այն, որ նա հանցանքն ընդունել և զղջում է կատարածի համար, երիտասարդ է:
Որպես ամբաստանյալի պատասխանատվությունը և պատիժը ծանրացնող հանգամանք դատարանը դիտում է հանցանքը կատարելու ռեցիդիվը, նկատի ունենալով, որ ամբաստանյալ Գևորգ Նիկողոսյանը դիտավորյալ հանցագործություն (դիտավորությամբ առողջությանը ծանր վնաս պատճառելը` ՀՀ քրեական օրենսգրքի 112 հոդվածի 1-ին մաս) կատարելու համար ազատազրկման դատապարտված լինելով և դատվածություն ունենալով, կրկին կատարել է դիտավորյալ հանցագործություն:
ՀՀ քրեական օրենսգրքի 22 հոդվածը 1-ին մասի համաձայն ՙՀանցագործությունների ռեցիդիվ է համարվում դիտավորությամբ հանցանք կատարելն այն անձի կողմից, ով դատվածություն ունի նախկինում դիտավորությամբ կատարված հանցանքի համար՚:
Դատարանը գտնում է, որ ամբաստանյալ Գևորգ Նիկողոսյանի նկատմամբ պատիժ նշանակելիս պետք է ղեկավարվել ՀՀ քրեական օրենսգրքի 67.1 հոդվածի 2-րդ մասով, համաձայն որի ՙ … Հանցագործությունների ռեցիդիվի համար նշանակված պատիժը չի կարող պակաս լինել սույն օրենսգրքի Հատուկ մասի համապատասխան հոդվածի սանկցիայով նախատեսված առավելագույն պատժի կեսից՚:
Հաշվի առնելով Գևորգ Նիկողոսյանի կատարած արարքի հանրության համար վտանգավորության աստիճանը և բնույթը, նրա անձը, նրան բնութագրող տվյալները, պատասխանատվությունը և պատիժը մեղմացնող ու ծանրացնող հանգամանքները, ինչպես նաև այն, որ ՀՀ քրեական օրենսգրքի 263 հոդվածի 1-ին մասի սանկցիայով նախատեսված առավելագույն պատիժը երկու տարի ժամկետով ազատազրկումն է, դատարանը գտնում է, որ ամբաստանյալ Գևորգ Սերյոժայի Նիկողոսյանի նկատմամբ պատիժ պետք է նշանակել ազատազրկման ձևով` մեկ տարուց ոչ պակաս ժամկետով:
Դատարանը գտնում է, որ Գևորգ Նիկողոսյանի նկատմամբ որպես խափանման միջոց կիրառված չհեռանալու մասին ստորագրությունը պետք է թողնել անփոփոխ` մինչև դատավճռի օրինական ուժի մեջ մտնելը:
Հաշվի առնելով հանցավորի վերը շարադրված անձը բնութագրող տվյալները, պատասխանատվությունը և պատիժը մեղմացնող հանգամանքները, հանցագործության ոչ մեծ վտանգավորության աստիճանը և գործի կոնկրետ հանգամանքները, դատարանը հանգում է հետևության, որ ամբաստանյալի ուղղվելը հնարավոր է պատիժը պայմանականորեն չկիրառելու, սակայն նրա վարքագծի նկատմամբ վերահսկողություն իրականացնելու պայմաններում:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 365, 369-372 հոդվածներով, դատարանը

Վ Ճ Ռ Ե Ց

Գևորգ Սերյոժայի Նիկողոսյանին մեղավոր ճանաչել ՀՀ քրեական օրենսգրքի 263 հոդվածի 1-ին մասով նախատեսված հանցանք կատարելու մեջ և նրան դատապարտել ազատազրկման մեկ (1) տարի ժամկետով:
Կիրառել ՀՀ քրեական օրենսգրքի 70 հոդվածը և Գևորգ Սերյոժայի Նիկողոսյանի նկատմամբ ազատազրկման ձևով նշանակված պատիժը պայմանականորեն չկիրառել, սահմանելով փորձաշրջան մեկ (1) տարի ժամկետով:
Գևորգ Սերյոժայի Նիկողոսյանի նկատմամբ որպես խափանման միջոց կիրառված չհեռանալու մասին ստորագրությունը թողնել անփոփոխ, մինչև դատավճռի օրինական ուժի մեջ մտնելը:
Գևորգ Սերյոժայի Նիկողոսյանի վարքագծի նկատմամբ վերահսկողությունը հանձնարարել ՀՀ ԱՆ քրեակատարողական վարչության նրա բնակության վայրի այլընտրանքային պատիժների կատարման բաժնին: Փորձաշրջանի սկիզբը հաշվել քրեակատարողական վարչության այլընտրանքային պատիժների կատարման բաժնում Գևորգ Նիկողոսյանին հաշվառման վերցնելու օրվանից:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է`
Դատավոր Լ. Ավետիսյան