ԵԱՔԴ/0022/01/13

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր` Լ. Ավետիսյան
քարտուղարությամբ` Ն. Ղազարյանի
մասնակցությամբ
մեղադրող` Ա. Քալաշյանի, Լ.Մանուկյանի
պաշտպան` Վ. Մելքոնյանի


2013 թվականի հունիսի 17-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի Հովհաննես Գասպարի Այվազյանի, ծնված 1968 թվականի դեկտեմբերի 9-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին հինգ անձ, նախկինում դատված` 1.Արմավիրի մարզի առաջինն ատյանի դատարանի 18.04.2009թ. դատավճռով ՀՀ քրեական օրենսգրքի 268 հոդվածի 2-րդ մասի 2-րդ կետով դատապարտվել է ազատազրկման 6 ամիս ժամկետով, 2.Երևան քաղաքի Կենտրոն և Նորք Մարաշ համայնքների առաջին ատյանի դատարանի 12.10.2009թ. դատավճռով ՀՀ քրեական օրենսգրքի 268 հոդվածի 2-րդ մասի 1-ին, 2-րդ կետերով, ՀՀ քրեական օրենսգրքի 67 հոդվածի հիման վրա վերջին հաշվով դատապարտվել է ազատազրկման 1 տարի 1 օր ժամկետով, պատիժը լրիվ կրելով ազատվել է 23.07.2010թ.-ին, դատվածությունը չմարված, չի աշխատել, հաշվառված է Երևան քաղաքի Վրացական փողոցի 21/1 շենքի թիվ 16 բնակարան հասցեում, բնակվել է Երևան քաղաքի Հ. Էմինի փողոցի 128/1 տուն հասցեում, մեղադրվում է ՀՀ քրեական օրենսգրքի 268 հոդվածի 2-րդ մասի 2-րդ կետով, կալանքի տակ է 2012 թվականի դեկտեմբերի 12-ից,

Պ Ա Ր Զ Ե Ց

1.Գործի դատավարական նախապատմությունը.
2012 թվականի դեկտեմբերի 12-ին ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնում թիվ 14140512 քրեական գործից Հովհաննես Գասպարի Այվազյանի կողմից առանց իրացնելու նպատակի խոշոր չափերով թմրանյութ պահելու` ՀՀ քրեական օրենսգրքի 268 հոդվածի 2-րդ մասի 2-րդ կետով նախատեսված հանցագործություն դեպքով մասն անջատվել և քննությունը շարունակվել է առանձին վարույթում` քրեական գործին շնորհելով թիվ 14144112 համարը:
2012 թվականի դեկտեմբերի 12-ին Հովհաննես Գասպարի Այվազյանը ձերբակալվել է:
Նախաքննության մարմնի 2012 թվականի դեկտեմբերի 15-ի որոշմամբ Հովհաննես Գասպարի Այվազյանը ներգրավվել է որպես մեղադրյալ ՀՀ քրեական օրենսգրքի 268 հոդվածի 2-րդ մասի 2-րդ կետով: Դատարանի որոշմամբ նրա նկատմամբ որպես խափանման միջոց է կիրառվել կալանավորումը:
2013 թվականի փետրվարի 08-ի որոշմամբ թիվ 14144112 քրեական գործից անջատվել է անհայտ անձի կողմից խոշոր չափ համարվող 0,66 գրամ ափիոն տեսակի թմրամիջոց Հովհաննես Այվազյանին իրացնելու վերաբերյալ նյութերը` ՀՀ քրեական օրենսգրքի 268 հոդվածի 2-րդ մասի 2-րդ կետով, հարուցվել է թիվ 14107013 քրեական գործը:
2013 թվականի փետրվարի 15-ին թիվ 14144112 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2.Գործի փաստական հանգամանքները.
Նախնական քննության մարմինն ամբաստանյալ Հովհաննես Գասպարի Այվազյանին ՀՀ քրեական օրենսգրքի 268 հոդվածի 2-րդ մասի 2-րդ կետով մեղադրանք է առաջադրել այն արարքի կատարման համար, որ նա առանց իրացնելու նպատակի, իր օգտագործման համար քննությամբ դեռևս չպարզված անձից ապօրինի ձեռք է բերել խոշոր չափ հանդիսացող 0.66 գրամ ափիոն տեսակի թմրանյութ, որը հայտնաբերվել է Հ.Այվազյանի տան խուզարկությամբ:
3.Ապացույցների հետազոտում.
Առաջադրված մեղադրանքում Հովհաննես Այվազյանն իրեն մեղավոր ճանաչեց մասնակիորեն և ցուցմունք տվեց այն մասին, որ փողոցում քայլելիս տեսնելով ծխախոտի տուփ, բացել և տեսել է, որ թմրամիջոց է: Բերել է իր բնակության վայր հանդիսացող Երևան քաղաքի Հ.Էմինի փողոցի 128/1 տուն, պահել մի երկու օր, քանի որ պարբերաբար չի օգտագործում: Երբ գլխացավ է ունեցել, տանը պատրաստել և օգտագործել է թմրամիջոցի կեսը, մնացած կեսը նորից փաթեթավորել, պահել է: Հաջորդ օրը ոստիկանները եկել են խուզարկության: Ինքն է ներկայացրել թմրամիջոցը, այլ` ոչ թե այն հայտնաբերվել է խուզարկությամբ: Ընթերակաների ներկայությամբ կշռել են, գրել: Ուղղակի չի հասկանում, թե ինչպես քաշը ՙչորսից դարձավ վեց՚: Տանը կշռել են ինչ որ կշեռքով, որը լավ չէր աշխատում, մոտավորապես են կշռել: Իրեն մեղավոր է ճանաչում, որ ապօրինի օգտագործել է թմրամիջոց: Ունի գլխացավեր, այդ պատճառով անըդհատ օգտագործել է, սակայն կախվածություն չունի: Զղջում է իր արարքի համար:
Դատարանը գնահատելով ամբաստանյալի նշված պատճառաբանությունն այն մասին, որ ինքը թմրանյութը կամովին է ներկայացրել ոստիկանության աշխատակիցներին ուստի քրեական պատասխանատվության չպետք է ենթարկվի, գտնում է, որ այն հիմնավոր չէ և նրան քրեական պատասխանատվությունից ազատելու հիմք հանդիսանալ չի կարող, նկատի ունենալով, որ ամբաստանյալը թմրանյութը ներկայացրել է միայն այն բանից հետո, երբ դատարանի որոշման հիման վրա նրա բնակարանում խուզարկություն պետք է կատարվեր:
ՀՀ քրեական օրենսգրքի 266 հոդվածի 6-րդ մասի համաձայն, թմրամիջոցներ կամ հոգեմետ (հոգեներգործուն) նյութեր, դրանց պրեկուրսորներ, ինչպես նաև խիստ ներգործող կամ թունավոր նյութեր կամովին հանձնող անձն ազատվում է հանձնված թմրամիջոցները կամ հոգեմետ (հոգեներգործուն) նյութերը, դրանց պրեկուրսորները կամ խիստ ներգործող կամ թունավոր նյութերն ապօրինի պատրաստելու, վերամշակելու, ձեռք բերելու, պահելու, փոխադրելու կամ առաքելու համար սույն գլխի 266-րդ, 268-րդ և 275-րդ հոդվածներով նախատեսված քրեական պատասխանատվությունից:
Տվյալ դեպքում ամբաստանյալ Հ.Այվազյանի գործողությունները չեն կարող դիտվել որպես ՀՀ քրեական օրենսգրքի 266 հոդվածի 6-րդ մասով նախատեսված թմրամիջոցի կամովին հանձնում: Հետևաբար ամբաստանյալը նշված հիմքով քրեական պատասխանատվությունից ազատվել չի կարող:
Ամբաստանյալին մեղսագրված հանցանքը հիմնավորվել է նաև հետևյալ ապացույցներով.
Հովհաննես Այվազյանի տանը 2012 թվականի դեկտեմբերի 12-ին խուզարկություն և առգրավվում կատարելու մասին կազմված արձանագրությամբ:
Դատաքիմիական փորձաքննության փորձագետի թիվ 296 Ք եզրակացությամբ, համաձայն որի փորձաքննությանը ներկայացված 0,66 գրամ հաստատուն քաշով նյութը հանդիսանում է ափիոն տեսակի թմրամիջոց: Ներկայացված 20 մլ ծավալով ներարկիչում, դանակի, շերեփի և պոլիէթիլենային թաղանթի վրա հայտնաբերվել են ափիոն տեսակի թմրամիջոցի հետքեր: Բամբակյա խծուծների վրա հայտնաբերվել են ացետիլացված ափիոն տեսակի թմրամիջոցի հետքեր, իսկ 5 մլ ծավալով թվով 3 ներարկիչում որևէ թմրամիջոցի հետք չի հատնաբերվել:
0,66 գրամ հաստատուն քաշով ափիոն տեսակի թմրամիջոցն իրեղեն ապացույց ճանաչելու և քրեական գործին կցելու մասին որոշմամբ:
ՀՀ ոստիկանության ՓՔՎ հատուկ հետազոտությունների բաժնի պետի տեղակալ, փորձագետ Ա.Աբաջյանի ցուցմունքով այն մասին, որ փորձաքննության է ներկայացվել փաթեթով փաթեթավորված մուգ շագանակագույն նյութ, ջերմային ազդեցությամբ ֆիքսված, անգույն թափանցիկ կրկնակի թաղանքով փաթեթավորված: Նյութի և փաթեթի ընդհանուր քաշը կազմել է 0,75 գրամ: Նյութի քաշը կազմել է 0,68 գրամ: Որոշակի ջերմաստիճանի պայմաններում չորցվելուց հետո հաստատուն քաշը կազմել է 0,66 գրամ:
Հաստատուն քաշի բերվել է միայն ափիոն թմրամիջոցը: Հաստատուն քաշի բերելու հետ կապված բամբակյա խծուծների հետ ինքը ոչինչ չի արել, ուղղակի եզրակացություն է տվել, որ բամբակյա խծուծների վրա ացետիլացված ափիոն տեսակի թմրամիջոցի հետքեր կան: Թմրամիջոցը ներկայացվել է փորձաքննության առանձին փաթեթով, խծուծները` առանձին: Ինքը տվել է նյութի ընդհանուր քաշը փաթեթով և առանց փաթեթի: Նյութը հետազոտվել է միջին նմուշի սկզբունքով: Միջին նմուշի սկզբունք նշանակում է միջին հատվածից նյութ, որը փոքր նյութի կտոր է: Հետազոտվել է 0,05 գրամ նյութ: Ոստիկանության աշխատակիցների կողմից նշված քաշը և փորձաքննության ժամանակ տրված քաշերի միջև եղած փոքր հակասությունները կապված են կշեռքների հետ:
Փորձագետ Ա.Աբաջյանը հայտնեց նաև, որ դատարանի դահլիճում անհնար է կշռել իրեղեն ապացույցը, քանի որ լաբորատորիան, որտեղ աշխատանքներ են տարվում թմրամիջոցների հետ կապված, աշխատում է հատուկ կշեռքների միջոցով: Կշեռքները ֆիքսված են և տեղաշարժել չի կարելի, այլապես կշեռքի խախտում տեղի կունենա: Տարին մեկ անգամ պարբերաբար, համապատասխան մասնագետների կողմից ստուգվում, կարգավորվում են կշեռքները: Ափիոն տեսակի թմրամիջոցն այն տեսակի թմրամիջոցներից է, որ խոնավություն է քաշում: Որպեսզի ինքը նորից կշռի թմրամիջոցը, պետք է այն հաստատուն քաշի բերի ու նոր կշռի և դա երկար ժամանակ է պահանջում:
4.Դատարանի իրավական վերլուծությունները.
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ, դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալ Հովհաննես Այվազյանը կատարել է հանցավոր արարք, որը համապատասխանում է ՀՀ քրեական օրենսգրքի 268 հոդվածի 2-րդ մասի 2-րդ կետի հատկանիշներին:
Կատարած արարքի համար ամբաստանյալ Հովհաննես Գասպարի Այվազյանը ենթակա է քրեական պատասխանատվության և պատժի:
Ամբաստանյալ Հովհաննես Այվազյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը և բնույթը, ինչպես նաև հանցավորի անձը:
Որպես ամբաստանյալի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարած արարքի համար, նրա խնամքին են գտնվում մինչև տասնչորս տարեկան երկու երեխաները, հիվանդ կինը և ամուսնալուծված դուստրը` իր մանկահասակ երեխայի հետ, որոնց միակ կերակրողն ինքն է:
Որպես ամբաստանյալի պատասխանատվությունը և պատիժը ծանրացնող հանգամանք դատարանը դիտում է հանցանքը կատարելու վտանգավոր ռեցիդիվը, նկատի ունենալով, որ ամբաստանյալ Հովհաննես Այվազյանը նախկինում միջին ծանրության դիտավորյալ հանցագործություն (խոշոր չափերով թմրամիջոց ձեռք բերելու և պահելու` ՀՀ քրեական օրենսգրքի 268 հոդվածի 2-րդ մաս) կատարելու համար երկու անգամ ազատազրկման դատապարտված լինելով և դատվածություն ունենալով, կրկին կատարել է միջին ծանրության դիտավորյալ հանցագործություն:
ՀՀ քրեական օրենսգրքի 22 հոդվածը 2-րդ մասի 1-ին կետի համաձայն ՙՀանցագործությունների ռեցիդիվը վտանգավոր է համարվում դիտավորությամբ հանցանք կատարելու դեպքում, եթե անձը նախկինում երկու անգամից ոչ պակաս ազատազրկման է դատապարտվել դիտավորյալ հանցագործության համար՚:
Հաշվի առնելով Հովհաննես Այվազյանի կատարած արարքի հանրության համար վտանգավորության աստիճանը և բնույթը, նրա անձը, նրան բնութագրող տվյալները, պատասխանատվությունը և պատիժը մեղմացնող ու ծանրացնող հանգամանքները, ինչպես նաև այն, որ ՀՀ քրեական օրենսգրքի 268 հոդվածի 2-րդ մասի սանկցիայով նախատեսված է պատիժ միայն ազատազրկում առավելագույնը երեք տարի ժամկետով, դատարանը գտնում է, որ պատժի նպատակներին հասնելու համար ամբաստանյալ Հովհաննես Գասպարի Այվազյանի նկատմամբ ՀՀ քրեական օրենսգրքի 268 հոդվածի 2-րդ մասի 2-րդ կետով նախատեսված հանցանք կատարելու համար պատիժ պետք է նշանակել ազատազրկման ձևով, որը նա պետք է կրի:
Դատարանը գտնում է, որ ամբաստանյալ Հովհաննես Այվազյանի նկատմամբ պատիժ նշանակելիս պետք է ղեկավարվել ՀՀ քրեական օրենսգրքի 67.1 հոդվածի 2-րդ մասով, համաձայն որի ՙ … Հանցագործությունների վտանգավոր ռեցիդիվի համար նշանակված պատիժը չի կարող պակաս լինել սույն օրենսգրքի Հատուկ մասի համապատասխան հոդվածի սանկցիայով նախատեսված առավելագույն պատժի երկու երրորդից՚:
Դատարանը գտնում է, որ Հովհաննես Այվազյանի նկատմամբ որպես խափանման միջոց կիրառված կալանավորումը պետք է թողնել անփոփոխ` մինչև դատավճռի օրինական ուժի մեջ մտնելը:
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո, ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնի քննիչի 27.12.2012թ.-ի որոշմամբ իրեղեն ապացույց ճանաչված և քրեական գործին կցված, 0,66 գրամ քաշով ափիոն տեսակի թմրամիջոցը, Հ.Այվազյանի բնակարանի խուզարկությամբ հայտնաբերված ներարկիչները, խոհանոցային դանակն ու շերեփը, պոլիէթիլենային թաղանթը, բամբակյա խծուծները (բոլորը կնիքված փորձագետի թիվ 16 կնիքով), հաշվի առնելով ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնի պետի գրությունը, պետք է հանձնել ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնին` թիվ 14107013 քրեական գործին կցելու համար:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 365, 369-372 հոդվածներով, դատարանը

Վ Ճ Ռ Ե Ց

Հովհաննես Գասպարի Այվազյանին մեղավոր ճանաչել ՀՀ քրեական օրենսգրքի 268 հոդվածի 2-րդ մասի 2-րդ կետով նախատեսված հանցանք կատարելու մեջ և նրան դատապարտել ազատազրկման երկու (2) տարի ժամկետով:
Պատժի սկիզբը հաշվել 2012 թվականի դեկտեմբերի 12-ից: Պատիժը պետք է կրի ՀՀ ԱՆ համապատասխան քրեակատարողական հիմնարկում:
Հովհաննես Գասպարի Այվազյանի նկատմամբ կիրառված խափանման միջոցը` կալանավորումը թողնել անփոփոխ, մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո իրեղեն ապացույց հանդիսացող, 0,66 գրամ հաստատուն քաշով ափիոն տեսակի թմրամիջոցը, Հ.Այվազյանի բնակարանի խուզարկությամբ հայտնաբերված ներարկիչները, խոհանոցային դանակն ու շերեփը, պոլիէթիլենային թաղանթը, բամբակյա խծուծները (բոլորը կնիքված փորձագետի թիվ 16 կնիքով), հաշվի առնելով ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնի պետի գրությունը, հանձնել ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնին` թիվ 14107013 քրեական գործին կցելու համար:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է
Դատավոր Լ. Ավետիսյան