ԵԱՔԴ/0021/01/13

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահող դատավոր` Լ. Ավետիսյան
քարտուղարությամբ` Ն. Ղազարյանի
մասնակցությամբ
մեղադրող` Ա. Մանուկյանի

2013 թվականի մարտի 12-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի Հովհաննես Գեղամի Մխիթարյանի, ծնված 1990 թվականի հունիսի 10-ին, Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ֆիզիկապես առողջ, ամուրի, խնամքին ոչ ոք, նախկինում չդատված, չի աշխատում, հաշվառված և բնակվում է Երևան քաղաքի Մոլդովական փողոցի 27 շենքի թիվ 803-804 բնակարան հասցեում, մեղադրվում է ՀՀ քրեական օրենսգրքի 268 հոդվածի 1-ին մասով, որպես խափանման միջոց է կիրառվել չհեռանալու մասին ստորագրությունը,

Պ Ա Ր Զ Ե Ց

1.Գործի դատավարական նախապատմությունը.
2012 թվականի դեկտեմբերի 24-ին ՀՀ ոստիկանության Երևան քաղաքի քննչական վարչության ԾՀՔ բաժնում Հովհաննես Գեղամի Մխիթարյանի կողմից առանց իրացնելու նպատակի զգալի չափերով հաշիշ տեսակի թմրամիջոց ապօրինի պահելու փաստի առթիվ ՀՀ քրեական օրենսգրքի 268 հոդվածի 1-ին մասով նախատեսված հանցագործության հատկանիշներով հարուցվել է թիվ 59104812 քրեական գործը:
Նախաքննության մարմնի 2012 թվականի դեկտեմբերի 29-ի որոշմամբ Հովհաննես Գեղամի Մխիթարյանը որպես մեղադրյալ է ներգրավվել ՀՀ քրեական օրենսգրքի 268 հոդվածի 1-ին մասով, նրա նկատմամբ որպես խափանման միջոց է կիրառվել չհեռանալու մասին ստորագրությունը:
2013 թվականի փետրվարի 8-ին Հովհաննես Գեղամի Մխիթարյանին առաջադրված մեղադրանքը փոփոխվել և նրան կրկին մեղադրանք է առաջադրվել ՀՀ քրեական օրենսգրքի 268 հոդվածի 1-ին մասով:
2013 թվականի փետրվարի 8-ի որոշմամբ թիվ 59104812 քրեական գործի նյութերով անհայտ անձի կողմից, անհայտ ժամանակահատվածում և վայրում Հովհաննես Մխիթարյանին զգալի չափի` ընդհանուրը 0,26 գրամ քաշով հաշիշ տեսակի թմրամիջոց ապօրինի իրացնելու փաստի առթիվ հարուցվել է թիվ 59100713 քրեական գործը` ՀՀ քրեական օրենսգրքի 266 հոդվածի 1-ին մասի հատկանիշներով:
2013 թվականի փետրվարի 15-ին թիվ 59104812 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
2.Գործի փաստական հանգամանքները.
Նախնական քննության մարմինն ամբաստանյալ Հովհաննես Գեղամի Մխիթարյանին ՀՀ քրեական օրենսգրքի 268 հոդվածի 1-ին մասով մեղադրանք է առաջադրել այն արարքի կատարման համար, որ նա առանց իրացնելու նպատակի անհայտ անձից ապօրինի ձեռք է բերել զգալի չափի` ընդհանուր 0,26 գրամ քաշով հաշիշ տեսակի թմրամիջոց և ապօրինի պահել իր տաբատի հետևի ձախ գրպանում` դրամապանակի մեջ, որը հայտնաբերվել է 2012 թվականի դեկտեմբերի 20-ին, ժամը 1710-ի սահմաններում ՀՀ ոստիկանության ՙԿարեն Դեմիճյանի՚ անվան մետրոպոլիտենի պահպանության բաժնի աշխատակիցների կողմից` մետրոպոլիտենի ՙԲարեկամություն՚ կայարանի ոստիկանության բաժանմունք նրան բերման ենթարկելու և անձնական խուզարկության ենթարկելու արդյունքում:
3.Ապացույցների հետազոտում.
Առաջադրված մեղադրանքում ամբաստանյալ Հովհաննես Մխիթարյանն իրեն լիովին մեղավոր ճանաչեց և ցուցմունք տվեց այն մասին, որ 2012 թվականի դեկտեմբերի 20-ին, ժամը 1710-ի սահմաններում գտնվել է մետրոպոլիտենի ՙԲարեկամություն՚ կայարանում, որի ընթացքում իրեն են մոտեցել ոստիկանության աշխատակիցները և տարել ոստիկանության բաժին: Ընթերակաների ներկայությամբ իրեն խուզարկել են, որի ժամանակ իր ջինսե տաբատի հետևի ձախ գրպանից հայտնաբերել են իր դրամապանակը, որի գրպանիկից հայտնաբերվել է մեկ պոլիէթիլենային փաթեթ, որի մեջ եղել է թմրամիջոց: Ոստիկանների կողմից այն կշռվել, փաթեթավորվել, կնիքվել և առգրավվել է:
Հայտնեց, որ դրանից երկու ամիս առաջ Ավան թաղամասով զբոսնելիս նկատել է ՙպլանի՚ նման բույս, քաղել և մշակել է անձամբ: Մեկ անգամ ծխելու միջոցով օգտագործել է, ոչինչ չի զգացել, պահել է մոտը: Հայտնաբերելուց մոտ տաս օր առաջ էլ է օգտագործել, իսկ մնացածը դրել է իր դրամապանակում: Ինքը ոչ մեկի չի հյուրասիրել, ոչ ոք այդ մասին չի իմացել: Նախկինում չի օգտագործել:
Ամբաստանյալ Հովհաննես Մխիթարյանին մեղսագրված հանցանքը նրա խոստովանական ցուցմունքից բացի, հիմնավորվել է նաև հետևյալ ապացույցներով.
Վկա Արսեն Շախբազյանի և Արարատ Մարգարյանի նախաքննության ընթացքում տված և դատաքննության ժամանակ հետազոտված նույնաբովանդակ ցուցմունքներով այն մասին, որ 2012 թվականի դեկտեմբերի 20-ին, ժամը 1710-ի սահմաններում իրենց մոտեցել են ոստիկանության աշխատակիցներ և խնդրել մասնակցել իրենց կողմից կատարվող միջոցառմանը: Հետևելով նրանց մտել են մետրոպոլիտենի ՙԲարեկամություն՚ կայարանի ոստիկանական բաժանմունք և ներկա են գտնվել Հովհաննես Գեղամի Մխիթարյանի, Արթուր Սամվելի Մինասյանի և Սամվել Սմբատի Ծատուրյանի անձնական խուզարկությանը: Բացատրելով որպես ընթերակա իրենց իրավունքները, արտաքնապես զննել են Հովհաննես Գեղամի Մխիթարյանի, Արթուր Սամվելի Մինասյանի և Սամվել Սմբատի Ծատուրյանի հագուստները: Արթուր Սամվելի Մինասյանի և Սամվել Սմբատի Ծատուրյանի մոտ ոչինչ չեն հայտնաբերել, իսկ հետո, երբ հերթը հասել է Հովհաննես Գեղամի Մխիթարյանին և ոստիկանները սկսել են ստուգել նրան, նրա ջինսե տաբատի ետևի ձախ գրպանից հայտնաբերել են դրամապանակ, որի գրպանիկից հայտնաբերվել է մեկ պոլիէթիլենային փաթեթ, որի մեջ եղել է շականակագույն զանգված: Հայտնաբերված զանգվածի վերաբերյալ Հ.Մխիթարյանը հայտարարել է, որ այն իրենն է և իր օգտագործման համար է: Հայտնաբերվածը տեղում կշռվել է ոսկերչական կշեռքով, որի ընդհանուր քաշը կազմել է 0,3 գրամ, որից հետո փաթեթավորվել և կնքվել է ոստիկանների կողմից: Այդ ամենի մասին ոստիկանության աշխատակիցները կազմել են արձանագրություն, որը կարդացվել և ստորագրվել է ներկա գտնվողների կողմից:
Հովհաննես Գեղամի Մխիթարյանին ՀՀ ոստիկանության մետրոպոլիտենի պահպանության բաժին բերման և անձնական խուզարկության ենթարկելու մասին արձանագրություններով այն մասին, որ 2012 թվականի դեկտեմբերի 20-ին, ժամը 1710-ի սահմաններում վերջինս թմրամիջոց պահելու և օգտագործելու կասկածանքով բերման է ենթարկվել և անձնական խուզարկությամբ նրա մոտից հայտնաբերվել է 0,3 գրամ շականակագույն զանգված:
Դատաքիմիական փորձաքննության փորձագետի թիվ 303Ք եզրակացությամբ, համաձայն որի Հ.Գ.Մխիթարյանի մոտ հայտնաբերված և փորձաքննության ներկայացված բուսական ծագմամբ, ընդհանուր 0,26 գրամ քաշով նյութի թվով երկու կտորը հանդիսանում է հաշիշ տեսակի թմրամիջոց: Հաշիշ տեսակի թմրամիջոցը պատրաստվում է տնայնագործնական եղանակով կանեփի բույսից:
Հովհաննես Մխիթարյանի կողմից ապօրինի պահված զգալի չափի` ընդհանուր 0,26 գրամ քաշով հաշիշ տեսակի թմրամիջոցն իրեղեն ապացույց ճանաչելու մասին որոշմամբ:
4.Դատարանի իրավական վերլուծությունները.
Վերլուծելով և գնահատելով դատական քննության ժամանակ հետազոտված ապացույցներն իրենց համակցության մեջ, դատարանը ձեռք բերված ապացույցները բավարար է գտնում և գործի փաստական հանգամանքներով հաստատված է համարում, որ ամբաստանյալ Հովհաննես Մխիթարյանը կատարել է հանցավոր արարք, որը համապատասխանում է ՀՀ քրեական օրենսգրքի 268 հոդվածի 1-ին մասի հատկանիշներին:
Ամբաստանյալ Հովհաննես Մխիթարյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ Հովհաննես Մխիթարյանի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարած արարքի համար, նախկինում դատված չի եղել, երիտասարդ է:
Ամբաստանյալի պատասխանատվությունը և պատիժը ծանրացնող հանգամանքներ առկա չեն:
Կատարած արարքի համար ամբաստանյալ Հովհաննես Գեղամի Մխիթարյանը ենթակա է քրեական պատասխանատվության և պատժի:
Հաշվի առնելով Հովհաննես Մխիթարյանի կատարած արարքի հանրության համար վտանգավորության աստիճանը և բնույթը, նրա անձը, նրան բնութագրող տվյալները, պատասխանատվությունը և պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 268 հոդվածի 1-ին մասի սանկցիայով նախատեսված է պատիժ նաև կալանքի ձևով, դատարանը գտնում է, որ ամբաստանյալ Հովհաննես Գեղամի Մխիթարյանի նկատմամբ ՀՀ քրեական օրենսգրքի 268 հոդվածի 1-ին մասով կատարած հանցանքի համար պատիժ պետք է նշանակել կալանքի ձևով:
Դատարանը հաշվի առնելով հանցավորի անձը բնութագրող տվյալները, պատասխանատվությունը և պատիժը մեղմացնող հանգամանքները, ինչպես նաև պատասխանատվությունը և պատիժը ծանրացնող հանգամանքների բացակայությունը, հանգում է այն հետևության, որ ամբաստանյալի ուղղվելը հնարավոր է պատիժը պայմանականորեն չկիրառելու, սակայն` նրա վարքագծի նկատմամբ վերահսկողություն իրականացնելու պայմաններում:
Դատարանը գտնում է, որ Հովհաննես Գեղամի Մխիթարյանի նկատմամբ որպես խափանման միջոց կիրառված չհեռանալու մասին ստորագրությունը պետք է թողնել անփոփոխ` մինչև դատավճռի օրինական ուժի մեջ մտնելը:
Անդրադառնալով իրեղեն ապացույցների տնօրինման հարցին, դատարանը գտնում է, որ դատավճիռն օրինական ուժի մեջ մտնելուց հետո 2012թ. դեկտեմբերի 25-ի որոշմամբ իրեղեն ապացույց ճանաչված և քրեական գործին կցված, ընդհանուր 0,26 գրամ քաշով հաշիշ տեսակի թմրամիջոցը /փաթեթավորված մեկ փաթեթում և կնիքված ՀՀ ոստիկանության ՓՔՎ փորձագետ թիվ 16 կնիքով/ պետք է ոչնչացնել:

Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 365, 369-372 հոդվածներով, դատարանը

Վ Ճ Ռ Ե Ց

Հովհաննես Գեղամի Մխիթարյանին մեղավոր ճանաչել ՀՀ քրեական օրենսգրքի 268 հոդվածի 1-ին մասով նախատեսված հանցանք կատարելու մեջ և նրան դատապարտել կալանքի երկու (2) ամիս ժամկետով:
Կիրառել ՀՀ քրեական օրենսգրքի 70 հոդվածը և Հովհաննես Գեղամի Մխիթարյանի նկատմամբ կալանքի ձևով նշանակված պատիժը պայմանականորեն չկիրառել, սահմանելով փորձաշրջան մեկ (1) տարի ժամկետով:
Հովհաննես Գեղամի Մխիթարյանի նկատմամբ որպես խափանման միջոց կիրառված չհեռանալու մասին ստորագրությունը թողնել անփոփոխ, մինչև դատավճռի օրինական ուժի մեջ մտնելը:
Հովհաննես Գեղամի Մխիթարյանի վարքագծի նկատմամբ վերահսկողությունը հանձնարարել ՀՀ ԱՆ քրեակատարողական վարչության նրա բնակության վայրի այլընտրանքային պատիժների կատարման բաժնին: Փորձաշրջանի սկիզբը հաշվել քրեակատարողական վարչության այլընտրանքային պատիժների կատարման բաժնում Հովհաննես Մխիթարյանին հաշվառման վերցնելու օրվանից:
Դատավճիռն օրինական ուժի մեջ մտնելուց հետո, իրեղեն ապացույց հանդիսացող և քրեական գործին կցված ընդհանուր 0,26 գրամ քաշով հաշիշ տեսակի թմրամիջոցը /փաթեթավորված մեկ փաթեթում և կնիքված ՀՀ ոստիկանության ՓՔՎ փորձագետ թիվ 16 կնիքով/ ոչնչացնել:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում:

Դատավոր` ստորագրություն
Բնագրի հետ ճիշտ է`
Դատավոր Լ. Ավետիսյան